Imita Lil Jehovah, Alla Tagħna li Hu Imparzjali

“Alla ma jħarisx lejn l-​uċuħ.”—Rumani 2:11.

1, 2. (a) X’kien l-​iskop taʼ Jehovah għall-​Kangħanin in ġenerali? (b) Jehovah x’għamel, u dan x’mistoqsijiet iqajjem?

IKKAMPJATI fil-​Wita taʼ Mowab fl-​1473 Q.E.K., l-​Iżraelin jinsabu attenti jisimgħu lil Mosè. Kien hemm sfida lesta għalihom in-​naħa l-​oħra tax-​Xmara Ġordan. Mosè ddikjara l-​iskop taʼ Jehovah li Iżrael jeqred lis-​sebaʼ ġnus b’saħħithom taʼ Kangħan fl-​Art Imwiegħda. Kemm kien rassiguranti l-​kliem taʼ Mosè: “Il-​Mulej, Alla tiegħek, ikun irħiehom f’idejk, u int tkun għelibthom”! Iżrael ma kellu jikkonkludi ebda patt magħhom, u dawn il-​ġnus ma kienx jixirqilhom min iħenn għalihom.—Dewteronomju 1:1; 7:​1, 2.

² Madankollu, Jehovah ħeles lil familja waħda mill-​ewwel belt li attakka Iżrael. Nies minn erbaʼ rħula oħra wkoll ġew protetti minn Alla. Dan għala? X’jgħallmuna dwar Jehovah il-​ġrajjiet straordinarji konnessi mas-​salvazzjoni taʼ dawn il-​Kangħanin? U kif nistgħu nimitawh?

Kif Irreaġixxew Meta Semgħu X’Għamel Jehovah

3, 4. L-​aħbarijiet dwar ir-​rebħiet taʼ l-​Iżraelin kif effettwaw lil xi individwi f’Kangħan?

³ Matul l-​40 sena li l-​poplu taʼ Iżrael għamel fix-​xagħri qabel ma daħal fl-​Art Imwiegħda, Jehovah ipproteġieh u ġġieled għalih. Fin-​nofsinhar taʼ l-​Art Imwiegħda, Iżrael iffaċċja s-​sultan Għarad tal-​Kangħanin. Bl-​għajnuna taʼ Jehovah l-​Iżraelin għelbuh flimkien man-​nies tiegħu f’Ħorma. (Numri 21:​1-3) Iktar tard, Iżrael dar madwar iċ-​ċentru t’Edom u vvjaġġa lejn it-​tramuntana, jiġifieri lejn il-​grigal tal-​Baħar il-​Mejjet. F’dawn l-​inħawi, li qabel kienu abitati minn Mowab, issa kien hemm l-​Amurrin. Is-​sultan Amurri Siħon ma riedx iħalli lil Iżrael jgħaddi mit-​territorju tiegħu. Kien hemm battalja f’Ġaħaż, milli jidher fit-​tramuntana tal-​wied t’Arnon, fejn inqatel Siħon. (Numri 21:​23, 24; Dewteronomju 2:​30-​33) Iktar lejn it-​tramuntana, Għog kien jaħkem fuq xi Amurrin oħra f’Basan. Għalkemm Għog kien ġgant, hu ma setaʼ bl-​ebda mod jirbaħ lil Jehovah. Għog inqatel f’Edregħi. (Numri 21:​33-​35; Dewteronomju 3:​1-3, 11) L-​aħbar taʼ dawn ir-​rebħiet flimkien maʼ l-​istejjer dwar l-​Eżodu taʼ Iżrael mill-​Eġittu kellhom effett qawwi fuq dawk li kienu jgħixu f’Kangħan.a

⁴ Għall-​ewwel, meta l-​Iżraelin daħlu f’Kangħan wara li qasmu l-​Ġordan, huma kkampjaw f’Gilgal. (Ġożwè 4:​9-19) Mhux ’il bogħod minnhom kien hemm il-​belt fortifikata taʼ Ġeriko. Dak li Raħab il-​Kangħanija semgħet dwar l-​għemejjel taʼ Jehovah qanqalha biex taġixxi bil-​fidi. Minħabba f’hekk, meta Jehovah qered lil Ġeriko, hu skansa kemm lilha kif ukoll lil dawk f’darha.—Ġożwè 2:​1-13; 6:​17, 18; Ġakbu 2:25.

5. X’qanqal lill-​Gibgħonin biex jinqdew bil-​ħażen taʼ moħħhom?

⁵ Imbagħad, Iżrael telaʼ mill-​pjanuri taʼ ħdejn ix-​xmara lejn l-​għoljiet f’nofs ir-​reġjun. Waqt li segwa d-​direzzjoni taʼ Jehovah, Ġożwè uża t-​tattika biex jonsob il-​belt taʼ Għaj. (Ġożwè kapitlu 8) L-​aħbar dwar il-​qerda li ġiet wara qanqlet lil ħafna mis-​slaten taʼ Kangħan biex jingħaqdu flimkien għall-​gwerra. (Ġożwè 9:​1, 2) Il-​Ħiwwin, l-​abitanti tal-​belt fil-​qrib taʼ Gibgħon irreaġixxew b’mod differenti. Huma minn jeddhom “inqdew bil-​ħażen taʼ moħħhom” jgħid Ġożwè 9:4. Bħal Raħab, huma kienu semgħu bil-​mod kif Jehovah ħeles lill-​poplu tiegħu fl-​Eżodu u meta għeleb lil Siħon u Għog. (Ġożwè 9:​6-10) Il-​Gibgħonin irrealizzaw li kien ikun kollu għalxejn li jipprovaw jirreżistuhom. Mela, għan-​nom taʼ Gibgħon u taʼ tlett ibliet fil-​qrib—Kefira, Birot, u Kirjat-ġegħarim—huma bagħtu għand Ġożwè f’Gilgal delegazzjoni taʼ nies li għamlu taʼ bir-​ruħhom li ġejjin minn art fil-​bogħod. Il-​pjan irnexxa. Ġożwè kkonkluda patt magħhom li assigurahom li kienu se jsalvaw. Tlett ijiem wara, Ġożwè u l-​Iżraelin saru jafu li kienu ġew ingannati. Iżda, huma kienu ħalfu b’Jehovah biex iżommu dan il-​patt u għalhekk żammewh. (Ġożwè 9:​16-19) Jehovah approvah dan?

6. Jehovah kif irreaġixxa għall-​patt li Ġożwè kkonkluda mal-​Gibgħonin?

⁶ Il-​Gibgħonin tħallew jaqtgħu l-​injam u jġorru l-​ilma għall-​Iżraelin, saħansitra “għall-​artal tal-​Mulej” fit-​tabernaklu. (Ġożwè 9:​21-27) Iktar minn hekk, meta ħames slaten Amurrin u l-​armati tagħhom heddu lill-​Gibgħonin, Jehovah daħal għalihom b’mod mirakoluż. Kien hemm iktar uħud mill-​għadu li nqatlu b’ġebel tas-​silġ li waqaʼ mis-​smewwiet milli dawk li nqatlu mit-​truppi taʼ Ġożwè. Jehovah saħansitra wieġeb it-​talba taʼ Ġożwè biex ix-​xemx u l-​qamar jibqgħu weqfin ħalli l-​għadu jinqered kompletament. “Qatt ma kien hemm jum bħalu, la qabel u lanqas wara, li fih il-​Mulej samaʼ mill-​kelma taʼ bniedem; għax il-​Mulej kien jitqabad għal Iżrael.”—Ġożwè 10:​1-14.

7. Liema verità li għaraf Pietru ntweriet fil-​każ taʼ ċerti Kangħanin?

⁷ Raħab, il-​Kangħanija, flimkien mal-​familja tagħha, kif ukoll il-​Gibgħonin, beżgħu minn Jehovah u ħadu l-​passi meħtieġa. Dak li ġara lilhom juri eżatt kemm hu minnu l-​kliem li qal iktar tard l-​appostlu Pietru: “Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa.”—Atti 10:​34, 35.

Kif Jehovah Ittratta m’Abraham u maʼ Iżrael

8, 9. L-​imparzjalità taʼ Jehovah kif tidher mill-​mod kif ittratta lil Abraham u lill-​ġens taʼ Iżrael?

⁸ Id-​dixxiplu Ġakbu ġibed l-​attenzjoni lejn il-​qalb tajba mhix mistħoqqa t’Alla fil-​mod kif Hu ttratta lil Abraham u lil nislu. Kienet il-​fidi t’Abraham, u mhux in-​nazzjonalità tiegħu, li għamlitu l-​“ħabib taʼ Alla.” (Ġakbu 2:23) Il-​fidi u l-​imħabba li Abraham kellu għal Jehovah ġabu barka fuq id-​dixxendenti tiegħu. (2 Kronaki 20:7) Jehovah wiegħed lil Abraham: “Jien imbierkek żgur u nkattarlek sewwa lil nislek bħall-​kwiekeb tas-​sema u bħar-​ramel f’xatt il-​baħar.” Iżda innota l-​wegħda fil-​vers li jmiss: “Jitbierku b’nislek il-​ġnus kollha taʼ l-​art.”—Ġenesi 22:​17, 18; Rumani 4:​1-8.

⁹ Mhux talli Jehovah ma kienx parzjali, imma talli bil-​mod kif hu ttratta lil Iżrael wera x’jistaʼ jagħmel għal dawk li jobduh. Dawn huma eżempji taʼ kif Jehovah wera l-​imħabba leali mal-​qaddejja leali tiegħu. Għalkemm Iżrael kien il-​“propjetà speċjali” taʼ Jehovah, dan ma jfissirx li popli oħra ma setgħux jibbenefikaw mir-​rieda tajba t’Alla. (Eżodu 19:​5, NW; Dewteronomju 7:​6-8) Huwa minnu li Jehovah xtara lura lil Iżrael mill-​jasar fl-​Eġittu u minħabba f’hekk iddikjara: “Mir-​razez kollha taʼ l-​art ma ridt naf b’ħadd ħliefkom.” Imma permezz tal-​profeta Għamos u profeti oħrajn, Jehovah wiegħed ukoll prospett meraviljuż lin-​nies tal-​“ġnus kollha.”—Għamos 3:2; 9:​11, 12; Isaija 2:​2-4.

Ġesù, l-​Għalliem Imparzjali

10. Ġesù kif imita lil Missieru meta wera l-​imparzjalità?

¹⁰ Matul il-​ministeru tiegħu fuq l-​art, Ġesù, li hu x-​xbieha eżatta taʼ Missieru, imita l-​imparzjalità taʼ Jehovah. (Lhud 1:3) L-​iktar ħaġa importanti għalih dak iż-​żmien kienet li jsib in-​“nagħaġ li ntilfu mid-​dar taʼ Iżrael.” Madankollu, hu ma qagħadx lura milli jagħti xiehda lil waħda mara Samaritana ħdejn bir. (Mattew 15:24; Ġwann 4:​7-30) Hu wkoll għamel miraklu, meta uffiċjal taʼ l-​armata, li milli jidher ma kienx Lhudi, talbu l-​għajnuna. (Luqa 7:​1-10) Din kienet xi ħaġa oħra minbarra li bl-​azzjonijiet tiegħu wera mħabbtu għan-​nies t’Alla. Id-​dixxipli taʼ Ġesù wkoll ippridkaw maʼ kullimkien. Beda jidher ċar li l-​attitudni u mhux in-​nazzjonalità kienet il-​bażi biex dak li jkun jiġi mbierek minn Jehovah. Individwi umlin u taʼ qalb onesta li kienu bil-​ġuħ għall-​verità wieġbu għall-​aħbar tajba tas-​Saltna. Għall-​kuntrarju, dawk li kienu jaħsbu li huma xi ħaġa u li kienu kburin stmerrew lil Ġesù u l-​messaġġ tiegħu. “Nfaħħrek, Missier, Sid is-​sema u l-​art, għax int dawn il-​ħwejjeġ ħbejthom lil min għandu l-​għerf u d-​dehen u wrejthom liċ-​ċkejknin. Iva, Missier, għax lilek hekk għoġbok.” (Luqa 10:21) Meta nittrattaw lil oħrajn fuq il-​bażi taʼ l-​imħabba u l-​fidi, aħna naġixxu bl-​imparzjalità, għaliex nafu li Jehovah hekk jieħu pjaċir.

11. Kif kienet tintwera l-​imparzjalità fil-​kongregazzjoni Kristjana tal-​bidu?

¹¹ Fil-​kongregazzjoni Kristjana tal-​bidu, il-​Lhud u dawk li ma kinux Lhud kienu ndaqs. “Glorja u ġieħ u sliem għal kull min jagħmel it-​tajjeb, l-​ewwel għal-​Lhud, u mbagħad għall-​Griegi. Għax Alla ma jħarisx lejn l-​uċuħ!”b (Rumani 2:​10, 11) Dak li ddetermina jekk kellhomx jibbenefikaw mill-​qalb tajba mhix mistħoqqa taʼ Jehovah ma kienx in-​nazzjonalità iżda l-​mod kif huma rreaġixxew meta tgħallmu dwar Jehovah u l-​prospetti li offritilhom il-​fidwa taʼ Ibnu, Ġesù. (Ġwann 3:​16, 36) Pawlu kiteb: “Mhux dak li jidher li hu Lhudi minn barra hu Lhudi, lanqas min għandu ġismu ċirkonċiż; il-​Lhudi veru hu dak li hu Lhudi minn ġewwa; iċ-​ċirkonċiżjoni vera hi dik tal-​qalb, opra taʼ l-​ispirtu u mhux tal-​Liġi miktuba.” Bl-​użu taʼ kliem li jinvolvi t-​terminu “Lhudi” (li jfisser “taʼ Ġuda,” jiġifieri, mgħolli jew imfaħħar), Pawlu żied: “Bniedem bħal dan, mhux il-​bnedmin ifaħħruh, imma Alla.” (Rumani 2:​28, 29) Jehovah ifaħħar lil kulħadd mingħajr parzjalità. Hekk nagħmlu aħna?

12. Apokalissi 7:9 liema prospett joffri, u lil min?

¹² Iktar tard, f’viżjoni, l-​appostlu Ġwanni ra l-​Kristjani midlukin leali ffigurati bħala l-​ġens spiritwali tal-​144,000, “issiġillati . . . minn kull tribù taʼ wlied Iżrael.” Wara dan, Ġwanni lemaħ “kotra kbira . . . minn kull ġens u tribù, minn kull poplu u lsien, weqfin quddiem it-​tron u quddiem il-​Ħaruf, lebsin ilbiesi twal bojod, u bil-​friegħi tal-​palm f’idejhom.” (Apokalissi 7:​4, 9) Għalhekk, ebda nazzjonalità jew lingwa m’hija eskluża mill-​kongregazzjoni Kristjana taʼ llum. Individwi minn kull ambjent għandhom il-​prospett li jsalvaw “mit-​taħbit il-​kbir” li ġej u jixorbu mill-​“ilmijiet taʼ l-​għejun tal-​ħajja” fid-​dinja l-​ġdida.—Apokalissi 7:​14-17.

Effetti Pożittivi

13-15. (a) Kif nistgħu negħlbu d-​differenzi razzjali u kulturali? (b) Semmi eżempji tal-​benefiċċji li jiġu meta nkunu dħulin.

¹³ Jehovah jafna sew, daqskemm missier tajjeb jaf sew lil uliedu. Bl-​istess mod, meta nibdew nifhmu lil oħrajn billi nieħdu interess fil-​kultura u t-​trobbija tagħhom, id-​differenzi li jkun hemm isiru insinifikanti. Id-​differenzi taʼ bejn in-​nazzjonalitajiet jisparixxu, u r-​rabta tal-​ħbiberija u l-​imħabba jissaħħu. L-​għaqda se tikber. (1 Korintin 9:​19-23) Dan jidher sew fl-​attività tal-​missjunarji li jaqdu f’inkarigi barra pajjiżhom. Huma jieħdu interess fin-​nies li jgħixu hemm, u bħala riżultat, il-​missjunarji malajr isibu li jsiru parti mill-​kongregazzjonijiet lokali.—Filippin 2:4.

¹⁴ L-​effetti pożittivi taʼ li nkunu imparzjali qed jispikkaw ferm f’ħafna pajjiżi. Aklilu, li ġej mill-​Etjopja, ħassu waħdu fil-​kapitali tal-​Britannja, Londra. Hu beda jħossu iktar u iktar waħdu minħabba li n-​nies in ġenerali ma tantx kienu dħulin maʼ individwi minn pajjiżi barranin, xi ħaġa li tinħass f’ħafna bliet kbar taʼ l-​Ewropa taʼ żmienna. Kemm ħassu differenti Aklilu meta attenda laqgħa Kristjana fis-​Sala tas-​Saltna tax-​Xhieda taʼ Jehovah! Dawk li kienu hemm laqgħuh, u ma tantx dam biex beda jħossu komdu. Malajr għamel progress u żied l-​apprezzament tiegħu għall-​Ħallieq. Ftit wara beda jfittex opportunitajiet biex jaqsam l-​aħbar tajba tas-​Saltna m’oħrajn f’dan id-​distrett. Fil-​fatt, darba minnhom dak li kien qed jakkumpanja lil Aklilu fl-​ippridkar staqsieh dwar x’miri kellu issa fil-​ħajja, u Aklilu mill-​ewwel wieġbu li kien qed jittama li xi darba jkun parti minn kongregazzjoni tal-​lingwa tiegħu, l-​Amariku. Meta l-​anzjani tal-​kongregazzjoni lokali taʼ l-​Ingliż saru jafu b’dan, huma bil-​ferħ għamlu l-​arranġamenti għal taħdita pubblika mill-​Bibbja bil-​lingwa oriġinali t’Aklilu. L-​istedina li saret biex uħud jattendu ġabet għadd kbir taʼ stranġieri u nies lokali flimkien biex jappoġġaw l-​ewwel laqgħa pubblika bl-​Amariku fil-​Britannja. Illum, l-​Etjopjani u oħrajn f’dan il-​post huma magħqudin f’kongregazzjoni li sejra tajjeb ħafna. Ħafna minnhom sabu li xejn ma jistaʼ jwaqqafhom milli jieħdu waqfa għal Jehovah u jissimbolizzaw dan bil-​magħmudija Kristjana.—Atti 8:​26-36.

¹⁵ Il-​karatteristiċi u t-​trobbija jvarjaw. M’hijiex kwistjoni taʼ li xi ħadd ikun superjuri jew inferjuri; hija sempliċement li wieħed ikun differenti. Meta kienu qed jaraw il-​magħmudija taʼ qaddejja dedikati ġodda taʼ Jehovah fil-​gżira taʼ Malta, il-​ferħ mimli entużjażmu tax-​Xhieda lokali kkumplimenta l-​biki taʼ ferħ tal-​viżitaturi mill-​Britannja. Kemm il-​Maltin u kemm l-​Ingliżi esprimew is-​sentimenti tagħhom iżda b’modi differenti, u l-​imħabba kbira tagħhom għal Jehovah saħħet ir-​rabta tas-​sħubija Kristjana.—Salm 133:1; Kolossin 3:14.

Negħlbu l-​Preġudizzju

16-18. Semmi esperjenza li turi kif il-​preġudizzju jistaʼ jingħeleb fil-​kongregazzjoni Kristjana.

¹⁶ Hekk kif l-​imħabba tagħna għal Jehovah u għal ħutna l-​Kristjani tkompli tikber, nistgħu nimitaw iktar mill-​qrib lil Jehovah fil-​mod kif hu jqis lill-​oħrajn. Kwalunkwe preġudizzju li setaʼ kellna xi darba lejn ċerti nazzjonalitajiet, razez, jew kulturi jistgħu jingħelbu. Per eżempju, ejja nieħdu l-​eżempju t’Albert li kien jaqdi fl-​Armata Ingliża matul it-​Tieni Gwerra Dinjija u li nqabad mill-​Ġappuniżi meta ħadu lil Singapor taħt idejhom fl-​1942. Wara dan, hu għamel xi tliet snin jaħdem fil-​“linji tal-​ferrovija li jwasslu għall-​mewt,” ħdejn dak li sar magħruf bħala l-​pont fuq ix-​xmara Kwai. Meta nħeles fl-​aħħar tal-​gwerra, hu kien jiżen 32 kilo, kellu x-​xedaq u mnieħru miksurin, u kien qed ibati mid-​disenterija, il-​ħżież, u l-​malarja. Eluf minn sħabu l-​priġunieri spiċċaw ħafna agħar minnu; ħafna minnhom lanqas biss salvaw. Minħabba l-​moħqrija li Albert kien ra u għadda minnha, hu mar lura d-​dar fl-​1945 bħala raġel kollu mibegħda, li la ried jaf b’Alla u lanqas bir-​reliġjon.

¹⁷ Irene, il-​mara t’Albert, saret waħda mix-​Xhieda taʼ Jehovah. Biex jikkuntentaha, Albert attenda xi ftit laqgħat tal-​kongregazzjoni lokali tax-​Xhieda taʼ Jehovah. Paul, żagħżugħ Kristjan u ministru full-time, żar lil Albert biex jistudja l-​Bibbja miegħu. Albert malajr irrealizza li Jehovah iħares lejn l-​individwi skond il-​kundizzjoni taʼ qalbhom. Hu ddedika ħajtu lil Jehovah u tgħammed.

¹⁸ Paul iktar tard mar jgħix Londra, tgħallem il-​Ġappuniż, u beda jissieħeb maʼ kongregazzjoni tal-​Ġappuniż. Meta ssuġġerixxa li jieħu lil xi Xhieda Ġappuniżi li kienu qed iżuruhom fil-​kongregazzjoni li kellu qabel, l-​aħwa t’hemmhekk ftakru fil-​preġudizzju qawwi li Albert kellu għan-​nies taʼ dik in-​nazzjonalità. Mindu Albert kien reġaʼ mar lura l-​Britannja, hu kien evita li jiġi wiċċ imbwiċċ maʼ kulmin hu Ġappuniż, għalhekk l-​aħwa bdew jitħassbu kif kien se jirreaġixxi f’din is-​sitwazzjoni. Ma kellhomx għalfejn jinkwetaw—Albert ma setax jilqaʼ lill-​viżitaturi b’iktar affezzjoni milli laqagħhom.—1 Pietru 3:​8, 9.

“Iftħu Qalbkom Beraħ”

19. Liema parir taʼ l-​appostlu Pawlu jistaʼ jgħinna jekk għandna xi tendenza li nuru l-​parzjalità?

¹⁹ “M’hux sewwa tħares lejn l-​uċuħ,” kiteb is-​Sultan għaref Salamun. (Proverbji 28:21) Huwa faċli li nħossuna qrib taʼ dawk li nafu sew. Madankollu, kultant għandna t-​tendenza li ftit li xejn nieħdu interess f’dawk li ma nafuhomx sew. Din il-​parzjalità ma tixraqx lil min hu qaddej taʼ Jehovah. M’hemm ebda dubju li nagħmlu tajjeb jekk insegwu l-​parir ċar taʼ Pawlu biex ‘niftħu qalbna beraħ’—iva, niftħu qalbna beraħ fl-​imħabba tagħna għall-​Kristjani sħabna li jkollhom trobbija differenti.—2 Korintin 6:13.

20. F’liema aspetti taʼ ħajjitna għandna nimitaw lil Jehovah, l-​Alla imparzjali tagħna?

²⁰ Sew jekk għandna l-​privileġġ tas-​sejħa tas-​sema u sew jekk għandna l-​prospett li ngħixu għal dejjem fuq l-​art, il-​fatt li nkunu imparzjali se jgħinna ngawdu l-​għaqda taʼ merħla waħda, Ragħaj wieħed. (Efesin 4:​4, 5, 16) Jekk nistinkaw biex nimitaw lil Jehovah, l-​Alla imparzjali tagħna, se niġu megħjunin fil-​ministeru Kristjan tagħna, fil-​familja tagħna, u fil-​kongregazzjonijiet, tabilħaqq, fl-​aspetti kollha tal-​ħajja. Dan kif? L-​artiklu li jmiss se jitkellem dwar dan is-​suġġett.

[Noti taʼ taħt]

Int Kif Twieġeb?

• Jehovah kif wera li m’huwiex parzjali fil-​każ taʼ Raħab u l-​Gibgħonin?

• Ġesù kif wera li kien imparzjali fit-​tagħlim tiegħu?

• X’jistaʼ jgħinna negħlbu kwalunkwe preġudizzju fil-​kultura u r-​razza?

[Stampa f’paġna 13]

Tibda l-​konkwista taʼ Iżrael fuq Kangħan

[Stampa f’paġna 15]

Ġesù ma qagħadx lura milli jagħti xiehda lil waħda mara Samaritana

[Stampa f’paġna 16]

Laqgħa pubblika bl-​Amariku fil-​Britannja

[Stampa f’paġna 16]

L-​imħabba t’Albert għal Jehovah għenitu jegħleb il-​preġudizzju