Il-​Kristjanità Vera Qed Tiffjorixxi

IL-​MINISTERU taʼ Ġesù Kristu feġġ fix-​xena dinjija b’impatt qawwi fl-​ewwel seklu. Il-​messaġġ tiegħu kien jagħti l-​qawwa, id-​dawl spiritwali, u jispira b’tali mod li n-​nies baqgħu mistagħġbin. Ħafna minn dawk li semgħuh jitkellem baqgħu impressjonati ħafna bi kliemu.—Mattew 7:28, 29.

Ġesù rrifjuta bla biżaʼ li jinvolvi ruħu fis-​sistemi ekkleżjastiċi u politiċi oppressivi taʼ żmienu imma għamel lilu nnifsu disponibbli għan-​nies komuni. (Mattew 11:25-30) Hu rrikonoxxa fil-​beraħ l-​influwenza kbira li għandhom l-​ispirti ħżiena fuq l-​art u wera l-​qawwa li hu għandu fuqhom u li ngħatatlu minn Alla. (Mattew 4:2-11, 24; Ġwanni 14:30) Ġesù b’sengħa kbira tefaʼ dawl fuq il-​konnessjoni fundamentali bejn is-​sofferenza u d-​dnub, u bi mħabba pponta lejn is-​Saltna t’Alla għal serħan dejjiemi. (Mark 2:1-12; Luqa 11:2, 17-23) Hu neħħa darba għal dejjem il-​velu taʼ dlam li tant kien ilu jgħatti l-​personalità vera taʼ Missieru, u għarraf isem Alla lil dawk kollha li huma interessati li jkollhom relazzjoni persunali Miegħu.—Ġwanni 17:6, 26.

Għaldaqstant, m’hijiex sorpriża li minkejja l-​persekuzzjoni reliġjuża u politika intensa, id-​dixxipli taʼ Ġesù xerrdu b’ħeffa kbira l-​messaġġ dinamiku tiegħu. Fi żmien qasir taʼ madwar 30 sena, ġew ifformati kongregazzjonijiet Kristjani attivi fl-​Afrika, l-​Asja, u l-​Ewropa. (Kolossin 1:23) Il-​veritajiet sempliċi li kien għallem Ġesù dawlu l-​qlub taʼ nies umli u taʼ qalb retta fl-​Imperu Ruman kollu.—Efesin 1:17, 18.

Madankollu, dawn id-​dixxipli ġodda kollha minn oqsma ekonomiċi, kulturali, lingwistiċi, u reliġjużi tant differenti kif kienu se jinġabru f’“fidi waħda” verament magħquda, bħalma sejħilha l-​appostlu Pawlu? (Efesin 4:5) X’kien se jżommhom ‘jaqblu fi kliemhom’ sabiex ma jinqatgħux ’il bogħod minn xulxin? (1 Korintin 1:10) Minħabba n-​nuqqas kbir t’għaqda li jeżisti llum fost dawk li jissejħu Kristjani, nagħmlu tajjeb jekk neżaminaw x’għallem Ġesù nnifsu.

Il-​Bażi għall-​Għaqda Kristjana

Meta kien għaddej ġuri quddiem Ponzju Pilatu, Ġesù identifika x’inhi l-​bażi għall-​għaqda Kristjana. Hu qal: “Jien għalhekk twelidt, u għalhekk ġejt fid-​dinja, biex nixhed għall-​verità. U kull min iħobb il-​verità jismaʼ leħni.” (Ġwanni 18:37) Għalhekk, il-​fatt li jaċċettaw it-​tagħlim taʼ Ġesù u l-​bqija tal-​Kelma mnebbħa t’Alla, il-​Bibbja, għandu effett qawwi li jgħaqqad fuq id-​dixxipli veri taʼ Kristu.—1 Korintin 4:6; 2 Timotju 3:16, 17.

M’għandniex xi ngħidu, xi drabi d-​dixxipli taʼ Ġesù kien se jkollhom mistoqsijiet sinċieri jew nuqqas taʼ qbil bejniethom. Imbagħad x’kienu se jagħmlu? Ġesù spjega: “Meta jiġi hu, l-​Ispirtu tal-​verità, iwassalkom għall-​verità kollha; għaliex hu ma jgħid xejn minn tiegħu, imma jgħid dak li jismaʼ, u jħabbrilkom il-​ġejjieni.” (Ġwanni 16:12, 13) Għaldaqstant, l-​ispirtu t’Alla kien se jgħin lid-​dixxipli veri taʼ Ġesù jifhmu l-​verità hekk kif tiġi rivelata bil-​mod il-​mod minn Alla. Ukoll, dan l-​ispirtu kien se jipproduċi l-​frott, bħall-​imħabba, l-​hena, u s-​sliem, u min-​naħa tagħhom dawn il-​kwalitajiet kellhom jinkuraġġixxu l-​għaqda bejniethom.—Atti 15:28; Galatin 5:22, 23.

Ġesù ma ħalliex wisaʼ għal konflitti jew frid fost id-​dixxipli tiegħu, u lanqas m’awtorizzahom biex jerġgħu jinterpretaw veritajiet divini skond it-​tradizzjonijiet kulturali jew reliġjużi taʼ dawk li kienu se jiltaqgħu magħhom. Minflok, fl-​aħħar lejla li qattaʼ magħhom, hu talab bil-​ħrara: “M’iniex nitlob għal dawn biss, imma wkoll għal dawk li għad jemmnu fija bis-​saħħa tal-​kelma tagħhom; nitolbok li jkunu lkoll ħaġa waħda. Kif inti fija, Missier, u jiena fik, ħa jkunu huma wkoll ħaġa waħda fina, biex hekk id-​dinja temmen li inti bgħattni.” (Ġwanni 17:20, 21) Għaldaqstant, l-​għaqda ġenwina fl-​ispirtu u l-​verità kellha tkun il-​marka li tidentifika b’mod ċar lid-​dixxipli taʼ Kristu mill-​bidu tal-​Kristjanità sa żmienna. (Ġwanni 4:23, 24) Minkejja dan kollu, il-​knejjes taʼ llum m’humiex magħqudin, imma mifrudin. Dan għala?

Għala l-​Knejjes Huma Mifrudin

L-​unika spjegazzjoni sinċiera għala hemm tant twemmin u prattiċi differenti fost dawk li jissejħu Kristjani llum hija li dawn ma żammewx mat-​tagħlim taʼ Ġesù. Wieħed kittieb osserva: “Bħal fil-​passat, il-​Kristjani ġodda taʼ llum għandhom it-​tendenza li jieħdu mill-​Bibbja dak li jgħodd għalihom—u jinjoraw dak kollu li ma jaqbilx mat-​tradizzjonijiet reliġjużi lokali tagħhom.” Dan hu eżatt dak li Ġesù u l-​appostli tiegħu bassru li kellu jiġri.

Per eżempju, l-​appostlu Pawlu kien imnebbaħ biex jikteb lill-​indokratur sieħbu Timotju: “Għad jiġi żmien meta għat-​tagħlim tajjeb ma jibqgħalhomx sabar, iżda widnejhom jikluhom u jiġbru madwarhom qabda mgħallmin skond ma jixtiequ, u jwarrbu widnejhom mis-​sewwa biex jiġġerrew wara l-​ħrejjef.” Kienu l-​Kristjani kollha se jiġu mqarrqin? Le. Pawlu kompla: “Imma int oqgħod dejjem b’għajnejk miftuħa, stabar fit-​tiġrib, agħmel ħidma taʼ evanġelista, aqdi sewwa l-​ministeru tiegħek.” (2 Timotju 4:3-5; Luqa 21:8; Atti 20:29, 30; 2 Pietru 2:1-3) Timotju u Kristjani leali oħrajn obdew dan il-​parir imnebbaħ.

Il-​Kristjani Veri Għadhom Magħqudin

Bħal Timotju, il-​Kristjani veri llum qed joqogħdu b’għajnejhom miftuħin billi jiċħdu raġunar uman u jaċċettaw biss dak li tgħid l-​Iskrittura dwar it-​twemmin duttrinali tagħhom. (Kolossin 2:8; 1 Ġwanni 4:1) L-​istess bħall-​Kristjani taʼ l-​ewwel seklu, ix-​Xhieda taʼ Jehovah qed jaqdu fil-​ministeru tagħhom f’iktar minn 230 pajjiż, u jwasslu l-​messaġġ oriġinali taʼ Ġesù, l-​aħbar tajba tas-​Saltna, lin-​nies taʼ kullimkien. Ikkunsidra erbaʼ modi importanti kif huma jimitaw f’unità lil Ġesù u jipprattikaw il-​Kristjanità vera minkejja fejn jgħixu.

It-twemmin tagħhom hu bbażat fuq il-​Kelma t’Alla. (Ġwanni 17:17) Kappillan fil-​Belġju kiteb dwarhom: “Ħaġa li nistgħu nitgħallmu minnhom [mix-Xhieda taʼ Jehovah] hi l-​ħerqa tagħhom biex jisimgħu mill-​Kelma t’Alla u l-​kuraġġ tagħhom biex jagħtu xiehda dwarha.”

Huma jħarsu lejn is-​Saltna t’Alla biex iġġib serħan mill-​problemi globali. (Luqa 8:1) F’Barranquilla, il-​Kolumbja, wieħed Xhud tkellem m’Antonio, partitarju akkanit taʼ moviment politiku. Ix-​Xhud la żamm miegħu, u lanqas ma tkellem favur xi ideoloġija politika oħra. Minflok, hu offra li jistudja l-​Bibbja bla ħlas m’Antonio u maʼ ħutu l-​bniet. Antonio malajr irrealizza li s-​Saltna t’Alla hija tabilħaqq l-​unika tama għan-​nies foqra fil-​Kolumbja u fil-​bqija tad-​dinja.

Huma jonoraw l-​isem t’Alla. (Mattew 6:9) Meta x-​Xhieda taʼ Jehovah iltaqgħu għall-​ewwel darba maʼ Maria, Kattolika sinċiera li tgħix fl-​Awstralja, hi ħalliet lix-​Xhieda juruha l-​isem t’Alla fil-​Bibbja. Kif irreaġixxiet? “L-​ewwel darba li rajt l-​isem t’Alla fil-​Bibbja, infqajt nibki. Tant ħassejtni emozzjonata għall-​fatt li stajt inkun naf u nuża l-​isem persunali t’Alla.” Maria kompliet tistudja l-​Bibbja, u għall-​ewwel darba f’ħajjitha, saret taf lil Jehovah bħala persuna u rnexxielha tibni relazzjoni dejjiema miegħu.

Huma magħqudin bl-​imħabba. (Ġwanni 13:34, 35) Editorjal fil-​gazzetta The Ladysmith-Chemainus Chronicle, tal-​Kanada, ikkummenta: “Għandek twemmin reliġjuż jew m’għandikx, ikollok tammira lill-​4,500 Xhud taʼ Jehovah li ħadmu lejl u nhar matul il-​ġimgħa u nofs li għaddew biex jibnu Sala taʼ l-​Assemblea t’2,300 metru kwadru f’Cassidy . . . Il-​fatt li ħaġa bħal din issir bil-​ferħ, mingħajr argumenti, tilwim u ftaħir, hija marka tal-​Kristjanità vera.”

Mela ikkunsidra l-​evidenza. Filwaqt li t-​teoloġi, il-​missjunarji, u l-​lajċi tal-​Kristjaneżmu jkomplu jissieltu mal-​kriżi kontroversjali li riesqa fuq il-​knejjes tagħhom, il-​Kristjanità vera qed tiffjorixxi mad-​dinja kollha. Tabilħaqq, il-​Kristjani veri qed iwettqu l-​ministeru mogħti lilhom biex jippridkaw u jgħallmu l-​Kelma t’Alla. (Mattew 24:14; 28:19, 20) Jekk int fost dawk li qed “jitniehdu u jitbikkew” minħabba l-​affarijiet mistmerra li qed jiġru bħalissa u tinsab inkwetat minħabba n-​nuqqas t’għaqda fost ir-​reliġjonijiet tal-​Kristjaneżmu, nistidnuk biex tingħaqad max-​Xhieda taʼ Jehovah fil-​qima Kristjana magħquda taʼ l-​uniku Alla veru, Jehovah.—Eżekjel 9:4; Isaija 2:2-4.