Għandu t-​Twemmin Reliġjuż Ikun Ibbażat fuq ir-​Raġuni?

“Hemm wisq nies ‘reliġjużi’ li jsiru hekk preċiżament biex ma jkollhomx għalfejn joqogħdu jużaw il-​qawwa tar-​raġunar tagħhom,” jikteb id-​djaknu taʼ seminarju teoloġiku fl-​Istati Uniti. Hu jżid li huma jridu sempliċement jaċċettaw kollox b’għajnejhom magħluqa.

DAN jimplika li l-​biċċa l-​kbira min-​nies li jgħidu li għandhom twemmin reliġjuż ma tantx iħabblu rashom dwar għala jemmnu dak li jemmnu jew dwar jekk hemmx bażi li hi raġunevoli għat-​twemmin tagħhom. Mhux taʼ b’xejn li r-​reliġjon saret suġġett li ħafna ma tantx jieħdu gost jitħaddtu dwaru.

Jisgħobbina ngħidu li prattiċi bħalma huma l-​użu taʼ xbihat reliġjużi u r-​ripetizzjoni taʼ talb bl-​amment ukoll jiskuraġġixxu r-​raġunar. Dawn il-​prattiċi, flimkien m’arkitettura impressjonanti, twieqi mżejnin bi ħġieġ kulurit, u mużika li ssaħħrek, huma l-​uniċi affarijiet li hija bbażata fuqhom ir-​reliġjon taʼ miljuni sħaħ taʼ nies. Għalkemm xi knejjes isostnu li t-​twemmin tagħhom huwa bbażat fuq il-​Bibbja, il-​messaġġ tagħhom taʼ ‘emmen f’Ġesù u ssalva’ jiskuraġġixxi l-​istudju serju tal-​Bibbja. Oħrajn jiddedikaw ruħhom biex jippridkaw evanġelju soċjali jew politiku. X’inhu r-​riżultat taʼ dan kollu?

Dwar is-​sitwazzjoni li hemm fl-​Amerika taʼ Fuq, kittieb tar-​reliġjon qal: “Il-​Kristjanità . . . għandha t-​tendenza li tkun superfiċjali, [u] l-​membri tagħha ftit li xejn jiġu edukati f’dik li hi reliġjon.” Riċerkatur taʼ l-​opinjoni pubblika saħansitra wasal biex jiddeskrivi l-​Istati Uniti bħala “ġens taʼ nies li ftit li xejn jafu x’fiha l-​Bibbja.” Biex inkunu għedna kollox, dawn l-​osservazzjonijiet japplikaw ukoll għal pajjiżi oħrajn fejn tiddomina l-​hekk imsejħa Kristjanità. Ħafna reliġjonijiet li m’humiex Kristjani bl-​istess mod jiskuraġġixxu r-​raġunar. Huma jagħtu iktar importanza lill-​innijiet, lit-​talb ritwalistiku, u lid-​diversi forom taʼ meditazzjoni li jinvolvu s-​sopranaturali, milli li dak li jkun jirraġuna u jifhem.

Madankollu, fil-​ħajja tagħhom taʼ kuljum, l-​istess nies li ma tantx iħabblu rashom dwar kemm hu eżatt it-​twemmin reliġjuż tagħhom, jew kemm hu bbażat fuq il-​verità, spiss tgħidx kemm iħabblu rashom fuq affarijiet oħrajn. Ma taħsibx li hi ħaġa stramba li l-​istess individwu li tgħidx kemm idum jistaqsi u jfittex sempliċement biex jixtri karozza—li llum jew għada se taqaʼ biċċiet—jgħid dwar ir-​reliġjon tiegħu, ‘Jekk kienet tajba għall-​ġenituri tiegħi, tajba għalija’?

Jekk aħna interessati verament li nogħġbu lil Alla, m’għandniex aħna nqisu bis-​serjetà jekk dak li nemmnu huwiex fi qbil mal-​verità? L-​appostlu Pawlu tkellem dwar ċerti nies reliġjużi taʼ żmienu li kellhom ‘ħeġġa għal Alla, iżda din ma kinitx skond l-​għerf veru.’ (Rumani 10:2) Uħud bħal dawn jistgħu jitqabblu maʼ bajjâd li jaħdem iebes biex jiżbogħ dar imma juża kuluri żbaljati għax ma jagħtix widen għall-​istruzzjonijiet taʼ sid id-​dar. Il-​bajjâd jistaʼ jkun kuntent b’xogħlu, imma s-​sid se jaċċettah?

X’inhu aċċettabbli għal Alla rigward il-​qima vera? Il-​Bibbja twieġeb: “Dan hu tajjeb u jogħġob lil Alla s-​Salvatur tagħna, li jrid li l-​bnedmin kollha jsalvaw u jaslu biex jagħrfu l-​verità.” (1 Timotju 2:​3, 4) Xi wħud għandhom mnejn iħossu li huwa impossibbli li ssib għarfien bħal dan fost il-​ħafna reliġjonijiet taʼ llum. Imma aħseb ftit—jekk hi r-​rieda t’Alla li n-​nies jaslu għal għarfien eżatt tal-​verità, se jkun hu daqshekk inġust li jaħbihulhom? Mhux skond il-​Bibbja, li tgħid: “Jekk inti tfittxu [lil Alla], iħallik issibu.”—1 Kronaki 28:9.

Alla kif iħallihom isibuh lil dawk li jfittxuh bis-​sinċerità? L-​artiklu li jmiss se jgħidilna.