Mistoqsijiet mill-​Qarrejja

Jistaʼ Satana x-​Xitan ikun jaf x’qed naħsbu?

Għalkemm ma nistgħux inkunu mija fil-​mija ċerti, milli jidher la Satana u lanqas id-​demonji tiegħu m’għandhom l-​abbiltà li jkunu jafu dak li qed naħsbu.

Ikkunsidra l-​ismijiet deskrittivi li japplikaw għal Satana. Hu msejjaħ Satana (Avversarju), ix-​Xitan (Kalunnjatur), is-​Serp (sinonimu maʼ Qarrieq), it-​Tentatur, u l-​Giddieb. (Ġob 1:6; Mattew 4:3; Ġwann 8:44; 2 Korintin 11:3; Apokalissi 12:9) Ebda wieħed minn dawn l-​ismijiet deskrittivi ma jimplikaw li Satana għandu l-​abbiltà li jkun jaf dak li qed naħsbu.

B’kuntrast kbir, iżda, Alla Jehovah hu deskritt bħala dak li ‘jġarrab il-​qlub.’ (Proverbji 17:3; 1 Samwel 16:7; 1 Kronaki 29:17) Lhud 4:13 jgħid: “Xejn ma hemm fil-​ħolqien li hu moħbi għalih [Jehovah], imma kollox hu miftuħ għal għajnejn Alla, li lilu rridu nagħtu kont.” Mhux taʼ b’xejn li Jehovah ta l-​abbiltà li jeżamina l-​qlub lil ibnu, Ġesù. Wara l-​irxoxt tiegħu Ġesù qal: “Jiena hu dak li jifli l-​ġewwieni u l-​qalb u li jagħti lil kull wieħed minnkom skond ma ħaqqu għall-​opri tiegħu.”—Apokalissi 2:23.

Il-Bibbja ma tgħidx li Satana hu kapaċi jifli l-​qlub u l-​imħuħ tal-​bnedmin. Dan hu sinifikanti ladarba l-​appostlu Pawlu jassigurana li l-​Kristjani jafu “x’inhuma l-​ħsibijiet tiegħu [taʼ Satana].” (2 Korintin 2:11) B’hekk, m’għandniex nibżgħu li Satana għandu xi abbiltà straordinarja li aħna ma nafu xejn dwarha.

Minkejja dan, ma nistgħux ngħidu li l-​Avversarju tagħna ma jistax jinduna bid-​dgħjufijiet tagħna. Satana kellu ħafna żmien biex jistudja l-​imġiba tal-​bnedmin. M’għandux għalfejn ikun jaf kif jaqra l-​imħuħ biex jiddetermina l-​modi taʼ l-​imġiba tagħna, biex josserva liema tip taʼ divertiment infittxu, jew biex jismaʼ dak li nitkellmu dwaru, u affarijiet bħal dawn. Mill-​espressjoni taʼ wiċċna u l-​qagħda tagħna forsi jkollu idea taʼ dak li qed naħsbu jew inħossu.

Ġeneralment, però, Satana juża l-​istess makakkeriji li uża fil-​ġnien taʼ l-​Għeden​—il-​gideb, il-​qerq, u l-​informazzjoni żbaljata. (Ġenesi 3:​1-5) Waqt li l-​Kristjani m’għandhomx għalfejn jibżgħu li Satana se jaqralhom moħħhom, għandhom tassew għalfejn ikunu konċernati dwar liema ħsibijiet Satana forsi jipprova jdaħħal ġewwa moħħhom. Hu jrid li l-​Kristjani jsiru “moħħhom maqlub u nieqsa mill-​verità.” (1 Timotju 6:5) Mhux taʼ b’xejn li d-​dinja taʼ Satana qed toffri ruxxmata taʼ informazzjoni u divertiment korrott. Biex jieqfu sodi kontra dan l-​attakk, il-​Kristjani għandhom jipproteġu moħħhom billi jilbsu “l-​elmu tas-​salvazzjoni.” (Efesin 6:17) Dan jagħmluh billi jimlew moħħhom b’veritajiet Bibliċi u jevitaw kuntatt bla bżonn maʼ l-​influwenzi baxxi tad-​dinja taʼ Satana.

Satana huwa għadu qawwi ferm. Imma m’għandux ikollna biżaʼ esaġerat minn Satana jew mid-​demonji tiegħu. Ġakbu 4:7 jassigurana: “Ieqfu lix-​xitan, u hu jaħrab minnkom.” Jekk insegwu dan il-​parir, aħna, bħal Ġesù, inkunu nistgħu niddikjaraw li Satana m’għandu ebda qabda fuqna.—Ġwann 14:30.