Ikun Pedament Tajjeb għaż-​Żwieġ Jekk Tnejn Jgħixu Flimkien?

LI TNEJN min-​nies tas-​sess oppost jgħixu flimkien mingħajr ma jiżżewġu “saret xi ħaġa komuni f’soċjetajiet industrijalizzati mad-​dinja kollha,” jgħid il-​Journal of Marriage and Family. “Nofs il-​koppji li jgħixu flimkien iqisu din is-​sitwazzjoni bħala mod kif jaraw jekk humiex kompatibbli qabel ma jiżżewġu.” Allura, jekk dan hu minnu, wieħed jistenna li b’hekk “se jiġi eliminat in-​nuqqas taʼ kompatibiltà, u meta l-​koppja tasal għaż-​żwieġ, dan ikun iktar stabbli,” josserva l-​Journal.

“Madankollu, l-​evidenza tissuġġerixxi l-​oppost,” ikompli jgħid il-​Journal. “Fost il-​miżżewġin, il-​koppji li kienu jgħixu flimkien qabel iż-​żwieġ isibu inqas sodisfazzjon fiż-​żwieġ, iqattgħu inqas ħin f’attivitajiet flimkien, jaqblu bejniethom inqas, ikollhom inqas appoġġ mis-​sieħeb jew is-​sieħba tagħhom, huma inqas kapaċi jsolvu l-​problemi, [u] ikollhom iktar problemi fiż-​żwieġ . . . Barra minn hekk, meta jitqabblu maʼ koppji li jidħlu direttament għaż-​żwieġ, dawk li l-​ewwel jgħixu flimkien għandhom riskju akbar li ż-​żwieġ tagħhom jispiċċa fix-​xejn.”

Bħalma juri dan l-​istudju, dak li jistaʼ jidher għaqli mill-​ħarsa tal-​bniedem jistaʼ fir-​realtà ma jkunx. Dan il-​fatt jenfasizza l-​verità tal-​kliem taʼ Ġeremija 10:23 li ‘l-​bniedem ma jistax jidderieġi l-​passi tiegħu.’ Kemm huwa iktar għaqli li tħares fil-​Kelma t’Alla, il-​Bibbja, li tipprovdi ħafna pariri tajbin fuq is-​suġġett taż-​żwieġ! (2 Timotju 3:​16) Per eżempju, rigward ir-​relazzjoni taż-​żwieġ, il-​Bibbja tgħid: “Ir-​raġel iħalli lil missieru u lil ommu u jingħaqad maʼ martu u jsiru ġisem wieħed.”​—Ġenesi 2:​24; Mattew 19:5.

Jekk insegwu din id-​direzzjoni divina, minflok ma noqogħdu fuq l-​irraġunar uman difettuż u li spiss ikun inkonsistenti, nistgħu niġu megħjunin biex intejbu ħafna l-​prospetti tagħna għal żwieġ verament hieni u dejjiemi.​—Proverbji 3:​5, 6.