Il-Hemm fil-Familja—Sinjal taż-Żminijiet

IL-​HEMM fil-​familja—ħafna jarawh bħala sinjal li r-​regoli tradizzjonali taż-​żwieġ u tat-​trobbija tat-​tfal huma antikwati. Oħrajn jarawh bħala riżultat taʼ bidla politika, ekonomika, u soċjali. Jerġaʼ oħrajn jarawh biss bħala daqqa taʼ ħarta oħra mit-​teknoloġija moderna. Fir-​realtà il-​problemi li l-​familji jridu jikkumbattu magħhom illum jippuntaw lejn xi ħaġa taʼ sinjifikat bil-​wisq akbar. Innota l-​kelmiet tal-​Bibbja fit-​2 Timotew 3:l-4:

“Kun af dan, li fl-​aħħar jiem se jkun hawn żminijiet kritiċi li iebes biex issib tarfhom. Għax il-​bnedmin se jkunu jħobbu lilhom infushom, iħobbu l-​flus, faħħarin, kburin, midgħajja, ma jobdux lill-​ġenituri, ma jroddux ħajr, m’humiex leali, m’għandhom ebda affezzjoni naturali, mhux lesti li jiftehmu, kalunnjaturi, mingħajr kontroll fuqhom infushom, feroċi, mingħajr imħabba lejn it-​tjubija, tradituri, rashom iebsa, minfuħin bil-​kburija, iħobbu l-​pjaċiri minflok ma jħobbu ’l Alla.”

M’humiex qegħdin dawn il-​kelmiet imorru fil-​għerq tal-​problemi tal-​lum? Il-​hemm tal-​lum fil-​familji jidher b’mod ċar li hu riżultat dirett tal-​kundizzjonijiet ipprofetizzati li kellhom iseħħu matul l-​aħħar jiem taʼ din id-​dinja. U hemm evidenza li tipperswadik li dan il-​perijodu taʼ hemm beda fis-​sena 1914.a Minn dak in-​nhar ’il hawn, l-​influwenza tal-​ħlejqa spirtu superuman imsejjaħ Satana x-​Xitan kienet b’mod partikulari fatali.—Mattew 4:8-10; 1 Ġwann 5:19.

Billi mill-​1914 kien kostrett għall-​viċinanza tal-​art, Satana għandu “rabja kbira, billi jaf li għandu perijodu qasir taʼ żmien.” (Rivelazzjoni 12:7-12) Ladarba Satana ħalef li jkun il-​għadu t’Alla “li lilu kull familja fis-​sema u fuq l-​art taf isimha,” m’hijiex xi ħaġa tal-​iskantament li l-​art saret post tant perikoluż għall-​familji? (Efesin 3:15) Satana huwa determinat li jdawwar lill-​umanità kollha ’l bogħod minn Alla. B’liema mod aħjar jistaʼ jwettaq dan jekk mhux billi jassalta l-​familji bil-​problemi?

Hemm bżonn iktar mill-​partita teoriji taʼ dawk li jgħidu li huma esperti biex jipproteġu l-​familji minn attakk superuman bħal dan. Minkejja dan, il-​Bibbja tgħid dwar Satana: “M’aħniex li ma nafux bit-​tfassil tiegħu.” (2 Korintin 2:11) Hemm ċertu ammont taʼ protezzjoni f’li tkun taf xi wħud mill-​modi speċifiċi li bihom jagħmel l-​assalt tiegħu.

Flus u Xogħol

Pressjoni ekonomika hija waħda mill-​iktar armi potenti taʼ assalt. Dawn huma “żminijiet kritiċi li iebes biex issib tarfhom,” jew kif tpoġġieha r-​Revised Standard Version fit-​2 Timotew 3:1, “żmien taʼ pressjoni.” F’artijiet li qegħdin jiżżviluppaw, problemi bħalma huma l-​qagħad, il-​pagi baxxi, u n-​nuqqas tan-​neċessitajiet bażiċi jikkaġunaw tant tbatija lill-​familji. Madankollu, saħansitra fl-​Istati Uniti li huwa relattivament pajjiż sinjur, il-​pressjonijiet ekonomiċi kellhom il-​konsegwenzi tagħhom. Stħarriġ wieħed fl-​Istati Uniti kixef li l-​flus huma wieħed mill-​kaġuni prinċipali tal-​konflitt fil-​familja. Il-​ktieb Secrets of Strong Families jispjega li “l-​ħin, l-​attenzjoni, [u] l-​enerġija” li jinħlew f’li jissodisfaw il-​ħtiġijiet tax-​xogħol jistgħu wkoll ikunu “għadu sottili” li jħassar l-​impenn matrimonjali.

Ċirkostanzi sfurzaw lil numru rekord taʼ nisa f’li jfittxu mpjieg. Il-​kittieb Vance Packard jirrapporta: “Fil-​preżent, minn tal-​inqas kwart mit-​tfal taʼ taħt it-​tliet snin fl-​Amerka għandhom ommijiethom li għandhom xi tip jew ieħor taʼ mpjieg barra mid-​dar.” Li tieħu ħsieb tal-​ħtiġijiet li qatt ma jispiċċaw tat-​tfal iż-​żgħar kif ukoll li jkollok impjieg jistaʼ jkun sforz kbir iżżejjed u li jeżawrik—b’effetti negattivi kemm fuq il-​ġenituri kif ukoll fuq it-​tfal. Packard iżid li minħabba n-​nuqqas taʼ provvedimenti adattati għat-​trobbija tat-​tfal fl-​Istati Uniti, “miljuni mhux ħażin taʼ tfal qegħdin fi żmien qasir tinbidlilhom il-​kura tajba fi ċkunithom.”−Our Endangered Children.

L-istess post tax-​xogħol taʼ spiss idgħajjef l-​armonija tal-​familja. Ħafna ħaddiema jiġu miġbudin f’relazzjonijiet illeċti maʼ sħabhom taʼ fuq ix-​xogħol. Jerġaʼ oħrajn jinqabdu fil-​ġiri vanituż wara s-​suċċess u jissagrifikaw il-​ħajja tal-​familja tagħhom biex javanzaw fil-​karriera. (Qabbel Ekkleżjasti 4:4) Wieħed raġel tant sar mehdi bl-​impjieg tiegħu bħala rappreżentant li jbigħ li martu ddiskriviet lilha nfisha bħala “omm waħedha de facto.”

Rabtiet taż-​Żwieġ Imdgħajfin

L-​istess istituzzjoni taż-​żwieġ ġiet ukoll taħt assalt. Igħid il-​ktieb The Intimate Environment: “Fil-​passat, l-​istennija kienet li l-​koppja jibqgħu miżżewġin sakemm xi ħadd minnhom jikkommetti xi offiża kbira kontra ż-​żwieġ—adulterju, krudeltà, traskuraġni estrema. Issa l-​biċċa l-​kbira tan-​nies jaraw l-​iskop taż-​żwieġ bħala twettieq persunali.” Iva, iż-​żwieġ jiġi ttrattat bħala doża kontra n-​niket, id-​dwejjaq, jew is-​solitudni—mhux bħala impenn għal tul il-​ħajja lejn persuna oħra. Li qed jiġi ffokat issa hu dak li tistaʼ takkwista miż-​żwieġ, mhux dak li tagħti għalih. (Agħmel kuntrast maʼ Atti 20:35.) Din “il-​bidla kbira fil-​valuri li qed jiċċirkondaw iż-​żwieġ” dgħajfet ferm lill-​irbit matrimonjali. Meta twettieq persunali jiskappalhom, il-​koppji taʼ spiss jaħtfu mad-​divorzju bħala s-​soluzzjoni taʼ malajr.

Nies f’dawn “l-​aħħar jiem” huma deskritti b’mod profetiku fil-​Bibbja bħala li “għandhom għamla taʼ devozzjoni lejn Alla imma jagħtu prova li huma foloz għall-​qawwa tagħha.” (2 Timotew 3:4, 5) Ħafna esperti jħossu li l-​waqgħa fir-​reliġjon kellha parti f’li jinkiser iż-​żwieġ. Fil-​ktieb tagħha The Case Against Divorce, Dr. Diane Medved kitbet: “Skond il-​biċċa l-​kbira tar-​reliġjonijiet, Alla qal li ż-​żwieġ kellu jkun permanenti. Meta ma tkunx ċert dwar Alla jew ma temminx Bih, allura tagħmel li trid.” Bħala riżultat, meta fiż-​żwieġ ikun hemm il-​problemi, il-​koppji ma jfittxux soluzzjonijiet sodi. “Huma malajr jiskartaw l-​isforz kollu.”

Żgħażagħ taħt Attakk

It-​tfal qegħdin jagħqdu fin-​nofs bil-​pressjonijiet tal-​lum. Numri li jgħaġġbuk taʼ tfal qegħdin jiġu mbiċċrin u abbużati verbalment jew sesswalment mill-​ġenituri tagħhom stess. Permezz tad-​divorzju, miljuni oħrajn jiġu mxennqin mill-​influwenza taʼ mħabba taż-​żewġ ġenituri, u l-​uġigħ tad-​divorzju tal-​ġenituri taʼ spiss jibqaʼ għal tul ħajjithom.

Iż-żgħażagħ huma bbombardjati minn influwenzi qawwijin. Sakemm xi żagħżugħ Amerikan jasal għal 14-il sena, hu jkun xhud taʼ 18,000 qtil u numru bla għadd taʼ forom oħrajn taʼ vjolenza, sess illeċitu, sadiżmu, u delitti sempliċement billi jara t-​televiżjoni. Il-​mużika wkoll teżerċita qawwa kbira fuq iż-​żgħażagħ, u ħafna minnha hija b’mod tal-​għaġeb suġġestiva, espliċita sesswalment, jew saħansitra satanika fil-​kontenut. L-​iskejjel jesponu liż-​żgħażagħ għal teoriji bħalma hi l-​evoluzzjoni li tasal biex tkisser il-​fidi f’Alla u l-​Bibbja. Pressjoni minn sħabhom tħeġġeġ lil ħafna biex jieħdu sehem fis-​sess qabel iż-​żwieġ u fl-​alkoħol jew fl-​abbuż tad-​drogi.

Il-​Għeruq tal-​Hemm fil-​Familja

L-​assalt fuq il-​familji huwa għalhekk akbar fl-​iskop u jistaʼ jkun qerriedi. X’jistaʼ jgħin lill-​familji biex isalvaw? John Bradshaw, wieħed li jagħti l-​pariri dwar il-​familja, jissuġġerixxi: “Ir-​regoli tagħna bħala ġenituri ma ġewx immodernizzati serjament f’150 sena. . . . Jiena nemmen li r-​regoli l-​qodma m’għadhomx jaħdmu.” Madankollu, iktar liġijiet magħmulin mill-​bniedem m’humiex is-​soluzzjoni. Alla Jehovah huwa l-​Oriġinatur tal-​familja. Hu jaf aħjar minn kwalunkwe ieħor kemm hu importanti rwol tal-​ħajja fil-​familja għall-​hena persunali tagħna u x’jinħtieġ biex jagħmel il-​ħajja tal-​familja ferħana u b’saħħitha. Għandu jissorprendina li l-​Kelma tiegħu, il-​Bibbja, tipprovdi s-​soluzzjoni għall-​hemm fil-​familja?

Dak il-​ktieb antik jispjega kif il-​ħajja tal-​familja bdiet tmajna. L-​ewwel koppja umana, Adam u Eva, ġew impoġġijin fi sfond taʼ ġnien sabiħ u ġew mogħtijin l-​isfida premjanti taʼ li jittrasformaw l-​art f’ġenna globali. Alla ħareġ id-​digriet li Adam kellu jkun il-​kap tal-​familja. Eva kellha tikkopera mat-​tmexxija tiegħu bħala “għajnuna għalih,” jew “komplement.” Imma Eva rribellat għal dan l-​arranġament. Hi ħatfet it-​tmexxija taʼ kap mingħand ir-​raġel tagħha u ma obdietx l-​unika projbizzjoni li Alla poġġa fuqhom. Adam imbagħad ċeda l-​istat taʼ kap tiegħu u ngħaqad magħha f’din ir-​rewwixta.—Ġenesi 1:26-3:6.

L-effetti distruttivi taʼ li ma baqgħux taħt l-​arranġament t’Alla deher iktar ċar immedjatament. Billi ma baqgħux puri u innoċenti, Adam u Eva rreaġixxew b’mistħija u ħtija. Adam, li iktar qabel iddeskriva lil martu b’termini brillanti u poetiċi, issa kiesaħ u biered irrefera għaliha bħala ‘l-​mara li tajtni.’ Dik ir-​rimarka negattiva kienet sempliċement il-​bidu taʼ miżerja matrimonjali. L-​attentati inutli taʼ Adam biex jerġaʼ jikseb l-​istat tiegħu taʼ kap kellhom jirriżultaw f’li hu ‘jiddominaha.’ Eva, mill-​banda l-​oħra, kellha jkollha “xenqa” għal żewġha, x’aktarx b’mod eċċessiv u mhux ibbilanċjat.—Ġenesi 2:23; 3:7-16.

Ma nistagħġbux li l-​pika matrimonjali bejn Adam u Eva kellha impatt taʼ ħsara fuq nisilhom. L-​ewwel iben tagħhom, Kajjin, sar qattiel bla skruplu. (Ġenesi 4:8) Lamek, dixxendent taʼ Kajjin, żied mal-​waqgħa tal-​ħajja fil-​familja billi sar l-​ewwel poligamista li qatt kien hawn. (Ġenesi 4:19) Adam u Eva b’hekk mhux biss għaddew legat taʼ dnub u mewt imma mudell marid tal-​familja li kien il-​wirt tar-​razza umana minn dak in-​nhar. Matul dawn l-​aħħar jiem, in-​nuqqas taʼ ftehim fil-​familja laħaq quċċata li qatt ma kien hawn bħalha.

Familji li Baqgħu Sodi

Mhux il-​familji kollha, madankollu, qed jissieltu taħt pressjonijiet illum. Ċertu raġel miżżewweġ, per eżempju, jgħix maʼ martu u ż-​żewġ uliedu bniet f’komunità ċkejkna fl-​Istati Uniti. Għalkemm ħafna mill-​ġirien tagħhom għandhom dik li jsejħulha generation gap bejn il-​ġenituri u wliedhom, hu u martu m’għandhomx, lanqas ma jinkwetaw li l-​bniet tagħhom jistgħu jesperimentaw bid-​drogi jew sess. Kull nhar taʼ Tnejn fil-​għaxija, meta żgħażagħ oħrajn ikun mwaħħlin mat-​televiżjoni, il-​familja kollha jkunu miġburin madwar il-​mejda tal-​ikel għal diskussjoni mill-​Bibbja. “Nhar taʼ Tnejn fil-​għaxija hija l-​lejla speċjali tagħna biex inkunu miġburin flimkien u nitkellmu,” huwa jispjega. “Uliedna jħossuhom liberi li jitkellmu dwar il-​problemi tagħhom magħna.”

Mill-banda l-​oħra, hemm omm mingħajr raġel fi New York City li wkoll tgawdi għaqda mhux tas-​soltu tal-​familja maż-​żewġ bniet tagħha. Is-​sigriet tagħha? “Inħallu t-​televiżjoni mitfi sa tmiem il-​ġimgħa,” hi tispjega. “Ikollna diskussjoni tat-​test Bibliku kuljum. Inwarrbu wkoll lejla waħda għal diskussjoni tal-​familja fuq il-​Bibbja.”

Iż-żewġ familji huma Xhieda taʼ Jehovah. Huma jsegwu l-​parir għall-​familji mniżżel fil-​Bibbja—u dan jirnexxi. Iżda, m’humiex xi eċċezzjonijiet. Hemm mijiet taʼ eluf taʼ familji eżatt bħalhom li qed jiksbu riżultati tajbin billi japplikaw ir-​regoli għal ħajja tal-​familja misjubin f’dak il-​ktieb.b Eżatt x’inhuma dawk ir-​regoli? Kif jistgħu jibbenefikaw lilek u lill-​familja tiegħek? Bi tweġiba nistednuk tikkunsidra l-​artikli li jibdew fil-​paġna li jmiss.

[Noti taʼ taħt]