Insaħħu l-​Fiduċja Tagħna fit-​Tjieba t’Alla

“Ħa ngħallmek illum triqat il-​Mulej, biex fih tkun it-​tama [“fiduċja,” “NW”] tiegħek.”—PROVERBJI 22:19.

1, 2. (a) Ix-​Xhieda taʼ Jehovah għala juru fiduċja f’Jehovah? (Proverbji 22:19) (b) X’jindika li xi individwi għandhom bżonn isaħħu l-​fiduċja tagħhom f’Jehovah?

IL-​KRISTJANI veri huma mberkin b’għarfien eżatt dwar Jehovah u dwar l-​iskopijiet tiegħu. “Irsir leali u diskret” b’imħabba jipprovdilhom “l-​ikel [spiritwali] tagħhom fiż-​żmien xieraq.” (Mattew 24:45, NW) L-​għarfien li jiksbu jipprovdilhom pedament sod fuqiex jibbażaw il-​fiduċja f’Alla. B’hekk, bħala grupp, ix-​Xhieda taʼ Jehovah juru fiduċja taʼ l-​għaġeb f’Jehovah u fit-​tjieba tiegħu.

² Madankollu, donnu li bħala individwi xi Xhieda forsi għandhom bżonn isaħħu din il-​fiduċja. Is-​Soċjetà kultant tirċievi ittri li jesprimu inċertezza dwar spjegazzjonijiet li jkunu ngħataw fil-​pubblikazzjonijiet tagħha. Dawn id-​dubji għandhom mnejn ikunu reazzjoni għal xi aġġustamenti fil-​fehma, jew forsi jittrattaw dwar kwistjonijiet li jeffettwaw lil dak li jkun qed jistaqsi, speċjalment b’mod emozzjonali.—Qabbel Ġwann 6:60, 61.

3. X’jistaʼ jiġri saħansitra lil qaddejja leali taʼ Jehovah, u għala?

³ Anki qaddejja veri taʼ Jehovah jesperjenzaw il-​verità taʼ Koħèlet 9:11: “Rajt ukoll taħt ix-​xemx li ma tintrebaħx mill-​ħfief it-​tiġrija, lanqas mill-​felħana t-​taqbida. M’huwiex taʼ l-​għorrief il-​ħobż jew taʼ min jifhem il-​ġid; lanqas taʼ min jinqalaʼ s-​suċċess, iżda f’kollox jidħol iż-​żmien u ċ-​ċirkustanzi.” Dan kif jistaʼ juri li hu veru f’sens estiż, jew spiritwali? Għandna mnejn konna nafu lil xi Kristjani li kienu ħfief biex japplikaw il-​pariri tal-​Bibbja, setgħanin f’li jiddefendu l-​verità, għorrief f’li japplikaw prinċipji tal-​Bibbja, u żelużi biex jiksbu għarfien eżatt. Madankollu, minħabba ż-​“żmien u ċ-​ċirkustanzi,” xi wħud għandhom mnejn li issa jaraw lilhom infushom limitati bħala riżultat taʼ xi aċċident jew età avanzata. Forsi jiddubitaw jekk humiex se jidħlu fid-​dinja l-​ġdida t’Alla mingħajr ma jkollhom imutu.

4, 5. Il-​Kristjani għala m’għandhom ebda raġuni li jitilfu l-​fiduċja tagħhom fit-​tjieba taʼ Jehovah?

⁴ Meta Kristjan jitlef lis-​sieħba tiegħu, l-​uġigħ u s-​sens taʼ telfa huma kbar. Flimkien bħala koppja, huma għandhom mnejn qdew lil Jehovah għal snin jew saħansitra għaxriet taʼ snin. Dak li jibqaʼ ħaj minnhom jaf li l-​mewt tħoll ir-​rabta taż-​żwieġ.a (1 Korintin 7:39) Issa, jekk ma jridx li l-​fiduċja tiegħu titherra, irid jikkontrolla l-​emozzjonijiet tiegħu.—Qabbel Mark 16:8.

⁵ Kemm ikun għaqli li tħares lejn il-​mewt tas-​sieħeb jew tas-​sieħba, ġenitur, ibnek jew bintek, jew ħbieb Kristjani tal-​qalb, bħala opportunità biex turi fiduċja fit-​tjieba taʼ Jehovah! Saħansitra meta niġu ffaċċjati minn xi telfa persunali, nistgħu nkunu fiduċjużi li Jehovah mhux bla tjieba. Nistgħu nkunu fiduċjużi li kulmin jikseb il-​ħajja taʼ dejjem​—kemm billi jibqaʼ ħaj u kemm permezz taʼ l-​irxoxt—​se jkun hieni. Dwar Alla, is-​salmista jgħid: “Int tiftaħ idek, u xxabbaʼ ’l kulħadd bil-​ġid. Ġust il-​Mulej fl-​imġiba tiegħu kollha, twajjeb f’dak kollu li għamel. Qrib il-​Mulej lejn kull min isejjaħlu, lejn kull min isejjaħlu fis-​sewwa. Jaqtgħalhom xewqthom ’il dawk li jibżgħu minnu, jismaʼ l-​għajta tagħhom, u jsalvahom.”—Salm 145:16-19.

Jekk Inħossuna li Nkunu Batejna Għalxejn

6, 7. (a) Xi Xhieda li sofrew fil-​passat għala jistaʼ jkun li għandhom fehma differenti issa? (b) Għala m’għandniex inqisu lil Jehovah bħala bla tjieba talli ppermetta sofferenza bħal din fil-​passat?

⁶ Fil-​passat, xi Xhieda batew għax irrifjutaw li jieħdu sehem f’xi attività li issa l-​kuxjenza tagħhom għandha mnejn tippermetti. Per eżempju, din forsi kienet l-​għażla tagħhom snin ilu rigward ċerti tipi taʼ servizz ċivili. Xi ħadd mill-​aħwa issa forsi jħoss li dan jistaʼ kuxjenzjożament iwettqu mingħajr ma jikkomprometti n-​newtralità Kristjana fejn għandu x’jaqsam mas-​sistema preżenti t’affarijiet.

⁷ Kien Jehovah bla tjieba li ħallih ibati talli rrifjuta dak li issa jistaʼ jagħmlu mingħajr konsegwenzi? Il-​biċċa l-​kbira minn dawk li kellhom din l-​esperjenza ma jaħsbuhiex hekk. Minflok, huma jithennew li kellhom l-​opportunità juru pubblikament u b’mod ċar li kienu ddeterminati li jżommu sod rigward il-​kwistjoni tas-​sovranità universali. (Qabbel Ġob 27:5.) Liema raġuni jistaʼ xi ħadd ikollu biex jiddispjaċih li jkun segwa l-​kuxjenza tiegħu f’li jieħu waqfa soda għal Jehovah? Billi appoġġaw lealment il-​prinċipji Kristjani skond kif fehmuhom huma jew billi wieġbu għat-​tqanqil tal-​kuxjenza tagħhom, huma taw prova li kienu denji tal-​ħbiberija taʼ Jehovah. Ċertament, huwa għaqli li tevita korsa li tmur kontra l-​kuxjenza tiegħek jew li għandha mnejn iġġiegħel lil oħrajn jitfixklu. F’dan ir-​rigward nistgħu naħsbu dwar l-​eżempju li ħallielna l-​appostlu Pawlu.—1 Korintin 8:12, 13; 10:31-33.

8. Kristjani Lhud, li qabel kienu jħarsu l-​Liġi, għala ma kellhom ebda raġuni li jiddubitaw it-​tjieba taʼ Jehovah?

⁸ Sabiex jogħġbu lil Jehovah, kien meħtieġ mil-​Lhud li jobdu l-​Għaxar Kmandamenti kif ukoll varjetà kbira taʼ madwar 600 liġi oħra. Iktar tard, taħt l-​arranġament Kristjan, ubbidjenza lejn dawn il-​liġijiet bħala talin ma kinitx għadha meħtieġa biex wieħed jaqdi lil Jehovah, lanqas saħansitra għal-​Lhud naturali. Il-​liġijiet li ma kinux għadhom obbligatorji kienu jinkludu dawk li jittrattaw dwar iċ-​ċirkonċiżjoni, iż-​żamma tas-​Sabat, l-​offerti taʼ sagrifiċċji taʼ l-​annimali, u l-​osservar taʼ ċerti restrizzjonijiet fl-​ikel. (1 Korintin 7:19; 10:25; Kolossin 2:16, 17; Lhud 10:1, 11-14) Il-​Lhud​—inkluż l-​appostli—​li kienu saru Kristjani nħelsu mill-​obbligu li jħarsu l-​liġijiet li kienu meħtiġin jobdu meta kienu taħt il-​patt tal-​Liġi. Ilmentaw huma li l-​arranġament t’Alla kien bla tjieba minħabba li qabel kien irrikjeda minnhom affarijiet li ma kinux iżjed neċessarji? Le, huma thennew bil-​fehma miżjuda dwar l-​iskopijiet taʼ Jehovah.—Atti 16:4, 5.

9. X’jistaʼ jingħad dwar xi Xhieda, imma dawn għala m’għandhomx għalfejn ikunu ddispjaċuti?

⁹ Fi żmienna, kien hemm xi Xhieda li kienu stretti żżejjed fil-​ħarsa tagħhom taʼ x’jagħmlu jew x’ma jagħmlux. Minħabba f’hekk huma batew iżjed minn oħrajn. Iktar tard, għarfien miżjud għenhom jespandu l-​ħarsa tagħhom dwar ċerti affarijiet. Imma m’għandhomx għalfejn jiddispjaċihom li qabel kienu aġixxew fi qbil mal-​kuxjenza tagħhom, saħansitra meta dan għandu mnejn li ġabilhom iktar tbatija. Tassew li huma taʼ min ifaħħarhom talli wrew li kienu lesti jsofru biex jibqgħu leali lejn Jehovah, u li ‘għamlu dan kollu minħabba l-​Evanġelju.’ Jehovah jbierek dik ix-​xorta taʼ devozzjoni lejh. (1 Korintin 9:23; Lhud 6:10) L-​appostlu Pietru kiteb b’dehen: “Jekk tagħmlu t-​tajjeb u ssofru t-​tbatija bis-​sabar, din tkun grazzja quddiem Alla.”—1 Pietru 2:20.

Nitgħallmu minn Ġona

10, 11. Ġona kif wera nuqqas taʼ fiduċja f’Jehovah (a) meta ngħata l-​inkarigu biex imur Ninwè? (b) meta Alla ma qeridx lin-​nies taʼ Ninwè?

¹⁰ Meta ntalab imur Ninwè, Ġona wera nuqqas taʼ apprezzament għall-​fiduċja li Jehovah kien qed ipoġġi fih. Wara esperjenza tal-​biżaʼ li ġabha fuqu hu stess minħabba li ma kienx lest li jobdi, Ġona ġie f’sensih, irrealizza l-​iżball tiegħu, aċċetta l-​inkarigu tiegħu f’art barranija, u wissa lin-​nies taʼ Ninwè dwar il-​qerda li kellhom imdendla fuq rashom. Imbagħad ġara dak li ma kienx mistenni: Minħabba l-​attitudni niedma tan-​nies taʼ Ninwè, Jehovah ddeċieda li ma jeqridhomx.—Ġona 1:1–3:10.

¹¹ Ir-​reazzjoni taʼ Ġona? Iffastidjat, hu lmenta m’Alla fit-​talb. Is-​sugu taʼ l-​ilment tiegħu kien: ‘Ħsibtu jien li hekk se jispiċċaw l-​affarijiet. Kien għalhekk li mill-​ewwel ma ridtx niġi Ninwè. Issa, wara dak kollu li għaddejt minnu, inkluż it-​twerwir u l-​umiljazzjoni li ġarrabt meta belgħatni ħuta kbira, u wara dak ix-​xogħol kollu li ħadt biex inwissi lin-​nies taʼ Ninwè dwar qerda imminenti, dan! Ix-​xogħol u t-​tbatija tiegħi kienu kollha għalxejn! Aħjar li mitt!’—Ġona 4:1-3.

12. X’nistgħu nitgħallmu mill-​esperjenza taʼ Ġona?

¹² Kellu Ġona raġuni valida biex jilmenta? Kien Jehovah bla tjieba f’li jestendi ħniena lil min nidem mill-​ħażen tiegħu? Fil-​fatt, Ġona kien imissu feraħ; għaxriet taʼ eluf taʼ nies kienu se jinħelsu mill-​esekuzzjoni! (Ġona 4:11) Imma l-​attitudni tiegħu, bla rispett u kollha lmenti, uriet li ma kienx qed jesprimi fiduċja profonda fit-​tjieba taʼ Jehovah. Kien qed jaħseb wisq dwaru nnifsu u ftit ferm f’oħrajn. Ejjew nitgħallmu minn Ġona billi nżommu lilna nfusna u s-​sentimenti persunali tagħna fit-​tieni post. Ejjew inkunu konvinti li l-​ħaġa xierqa li għandna nagħmlu hija li nobdu lil Jehovah, billi nsegwu d-​direzzjoni li tingħata permezz taʼ l-​organizzazzjoni tiegħu u naċċettaw id-​deċiżjonijiet tiegħu. Aħna konvinti li “jkollhom l-​hena dawk li jibżgħu minn Alla talli jgħixu fil-​biżaʼ tiegħu.”—Koħèlet 8:13 [Koħèlet 8:12, NW].

Issa Huwa l-​Waqt li Nsaħħu l-​Fiduċja Tagħna!

13. Kif nistgħu lkoll kemm aħna nsaħħu l-​fiduċja tagħna f’Jehovah?

¹³ Il-​korsa għaqlija hija li nsaħħu l-​fiduċja tagħna f’Jehovah. (Proverbji 3:5-8) M’għandniex xi ngħidu, irridu nagħmlu iżjed milli sempliċement nitolbu biex Jehovah jgħinna nsiru iżjed fiduċjużi. Il-​fiduċja tikber fuq il-​bażi taʼ għarfien eżatt. Għalhekk l-​istudju persunali tal-​Bibbja, li naqraw kemm il-​Bibbja u kemm letteratura li tispjega l-​Bibbja, irridu nagħmluh parti mir-​rutina tagħna taʼ kuljum. Attendenza regulari għal-​laqgħat Kristjani hija vitali, bħalma huma wkoll preparazzjoni tajba u parteċipazzjoni sa fejn huwa possibbli. Li nagħmluha drawwa li naqsmu m’oħrajn il-​veritajiet tal-​Bibbja, waqt li bit-​tattika negħlbu l-​oġġezzjonijiet, ukoll ikabbar il-​fiduċja tagħna f’Jehovah u fil-​Kelma tiegħu. B’hekk, ir-​relazzjoni tagħna miegħu tikber minn jum għal jum.

14. In-​nies t’Alla għala dalwaqt se jintalbu juru l-​fiduċja tagħhom f’Jehovah iżjed minn qatt qabel?

¹⁴ Fil-​futur qarib, l-​akbar żmien taʼ tribulazzjoni li qatt se jkun laqat lir-​razza umana se jfaqqaʼ f’daqqa waħda. (Mattew 24:21) Meta dan iseħħ, il-​qaddejja t’Alla se jkollhom bżonn iżjed minn qatt qabel juru fiduċja fit-​tjieba taʼ Jehovah u fid-​direzzjoni pprovduta mill-​organizzazzjoni tiegħu. B’mod simboliku, huma mbagħad se jobdu b’fiduċja d-​direttiva t’Alla: “Mur, poplu tiegħi, idħol fil-​kmamar tiegħek, u sakkar il-​bibien warajk! Inħeba għal ftit sa ma tgħaddi l-​korla.” (Isaija 26:20) Huma diġà daħlu fl-​atmosfera protettiva taʼ iktar minn 85,000 kongregazzjoni f’232 pajjiż. Ikun x’ikun dak li tistaʼ tinkludi iżjed id-​direttiva “idħol fil-​kmamar tiegħek,” nistgħu nkunu fiduċjużi li Jehovah se jgħinna nwettquh.

15. Il-​kwistjoni tal-​fiduċja kif ġiet enfasizzata matul l-​1998, u għala kien dan bix-​xieraq?

¹⁵ Huwa imperattiv li aħna nsaħħu l-​fiduċja tagħna issa. Mingħajr fiduċja f’ħutna Kristjani, fl-​organizzazzjoni taʼ Jehovah u, fuq kollox, f’Jehovah nnifsu, ikun impossibbli li nibqgħu ħajjin. Mela kemm huwa xieraq li matul l-​1998, ix-​Xhieda taʼ Jehovah mad-​dinja kollha ġew imfakkrin ripetutament, permezz tal-​kliem taʼ l-​iskrittura tagħhom tas-​sena, li “kulmin isejjaħ isem Jehovah se jkun salvat”! (Rumani 10:13, NW) Irridu nibqgħu nkunu fiduċjużi dwar dan. Jekk nindunaw anki bl-​iċken ħjiel taʼ inċertezza f’din il-​fiduċja, għandna naħdmu biex nirranġawha issa, iva, illum.

Il-​Ġudizzju taʼ Jehovah se Jkun taʼ Tjieba

16. X’jistaʼ jiġrilha l-​fiduċja jekk ma tiġix ikkultivata, u kif nistgħu nevitaw li jiġri dan?

¹⁶ F’Lhud 3:14, il-​Kristjani midlukin huma mwissijin: “Aħna għandna sehem fi Kristu, jekk inżommu sħiħa sa l-​aħħar it-​tama [“il-​fiduċja,” NW] li kellna fil-​bidu.” Fil-​prinċipju, dan il-​kliem japplika wkoll għall-​Kristjani li għandhom tama għall-​art. Il-​fiduċja tal-​bidu tistaʼ titherra jekk ma tiġix żviluppata. Kemm huwa vitali li nkomplu nsegwu l-​għarfien eżatt, biex b’hekk insaħħu l-​pedament li fuqu hija bbażata l-​fiduċja tagħna!

17. Għala nistgħu nkunu fiduċjużi li, fejn jirrigwarda min se jibqaʼ ħaj, Ġesù se jiġġudika b’mod korrett?

¹⁷ Il-​ġnus kollha f’qasir żmien se jiġu eżaminati minn Kristu sabiex hu jkun jistaʼ “jifridhom minn xulxin, bħalma r-​ragħaj jifred in-​nagħaġ mill-​mogħoż.” (Mattew 25:31-33) Aħna nistgħu nkunu fiduċjużi li Kristu se juri tjieba meta jiġġudika min huwa denju li jibqaʼ ħaj. Jehovah tah l-​għerf, id-​dehen, u kwalitajiet neċessarji oħrajn biex “jagħmel ħaqq ġust mid-​dinja.” (Atti 17:30, 31) Ħalli l-​konvinzjoni tagħna tkun bħal dik t’Abraham, li qal: “Ma jkun qatt li inti [Jehovah] tagħmel ħaġa bħal din, li toqtol il-​bniedem ġust mal-​ħażin, u l-​ġust u l-​ħażin tmisshom l-​istess xorti. Ma jkun qatt minnek, l-​imħallef taʼ l-​art kollha, li ma tagħmilx ġustizzja.”—Ġenesi 18:25.

18. Għala m’għandniex inkunu kkonċernati żżejjed dwar dak li forsi ma nafux fil-​preżent?

¹⁸ B’fiduċja sħiħa fit-​tjieba taʼ Jehovah, m’għandniex għalfejn inħabblu rasna biex insibu tweġibiet għal mistoqsijiet bħal: ‘Kif se jiġu ġġudikati t-​trabi u t-​tfal żgħar? Jistaʼ jagħti l-​każ li għadd kbir taʼ nies ma jkunux għadhom intlaħqu bl-​aħbar tajba meta tasal Armageddon? Xi ngħidu għal dawk morda mentalment? Xi ngħidu . . . ?’ Veru, fil-​preżent għandna mnejn li ma nafux kif Jehovah se jsolvi dawn il-​kwistjonijiet. Madankollu, hu se jagħmel dan b’mod taʼ tjieba u ħniena. Qatt m’għandna niddubitawh dan. Fil-​fatt, għandna mnejn nibqgħu skantati u nitgħaxxqu bil-​ferħ meta nosservawh isolvihom b’mod li lanqas biss qatt ma konna noħolmu.—Qabbel Ġob 42:3; Salm 78:11-16; 136:4-9; Mattew 15:31; Luqa 2:47.

19, 20. (a) Għala m’huwiex żbaljat li tagħmel mistoqsijiet raġunevoli? (b) Jehovah meta se jipprovdi tweġibiet meħtiġin?

¹⁹ L-​organizzazzjoni taʼ Jehovah ma tiskuraġġix li jsiru mistoqsijiet sinċieri u f’waqthom, bħalma jsostnu b’mod żbaljat xi opponenti. (1 Pietru 1:10-12) Madankollu, il-​Bibbja twissina biex nevitaw mistoqsijiet stupidi u spekulattivi. (Titu 3:9) Li nistaqsu mistoqsijiet raġunevoli u nfittxu fil-​Kelma t’Alla u f’pubblikazzjonijiet Kristjani biex insibu tweġibiet Skritturali jistaʼ jżid l-​għarfien eżatt tagħna u jistaʼ b’hekk isaħħaħ il-​fiduċja tagħna f’Jehovah. L-​organizzazzjoni ssegwi l-​eżempju taʼ Ġesù. Hu żamm lura milli jwieġeb mistoqsijiet meta l-​waqt xieraq biex dawn jitwieġbu kien għadu ma wasalx. Hu spjega: “Baqagħli ħafna ħwejjeġ x’ngħidilkom, imma għalissa ma tifilħux għalihom.” (Ġwann 16:12) Hu ammetta wkoll li kien hemm xi affarijiet li hu nnifsu ma kienx jafhom f’dak il-​waqt.—Mattew 24:36.

²⁰ Jehovah għad għandu ħafna x’jirrivela. Kemm huwa għaqli li nistennewh, fiduċjużi li Alla se jirrivela l-​iskopijiet tiegħu meta jasal il-​waqt xieraq tagħhom. Aħna nistgħu nkunu fiduċjużi li meta jkun wasal il-​waqt xieraq taʼ Jehovah, se jkollna l-​ferħ li niksbu iżjed dehen dwar triqatu. Iva, se niġu ppremjati, dment li neżerċitaw fiduċja assoluta f’Jehovah u fl-​organizzazzjoni li qed juża. Proverbji 14:26 jiżgurana: “Tama [“fiduċja,” NW] qawwija jkollu min għandu l-​biżaʼ tal-​Mulej, u wliedu wkoll isibu l-​kenn.”

[Nota taʼ taħt]

Int x’Taħseb?

◻ Għala m’huwiex għaqli li nħallu l-​emozzjonijiet jherru l-​fiduċja tagħna f’Jehovah?

◻ X’nistgħu nitgħallmu mill-​esperjenza taʼ Ġona?

◻ L-​istudju tal-​Bibbja u l-​attendenza għal-​laqgħat għala huma daqstant importanti?

[Stampa f’paġna 16]

Anki jekk niffaċċjaw telf persunali, nistgħu nkunu fiduċjużi li Jehovah hu taʼ tjieba

[Stampi f’paġna 18]

Int ċert li l-​fiduċja tiegħek hija f’Jehovah?