Kif Tista’ Titgħallem Dwar Alla

Tista’ titgħallem dwar Jehovah billi taqra l-​Bibbja. Żmien ilu Alla qabbad ċerti bnedmin biex jiktbu l-​ħsibijiet tiegħu. Dawn il-​kitbiet huma msejħin il-​Bibbja. Illum nitgħallmu dwar Alla billi naqraw il-​Bibbja. Peress li l-​Bibbja fiha l-​kelma ta’ Jehovah, jew il-​messaġġ tiegħu, hija msejħa wkoll il-​Kelma t’Alla. Nistgħu nemmnu dak li tgħid il-​Bibbja għax Jehovah qatt ma jigdeb. “Ma jistax ikun li Alla jigdeb.” (Lhud 6:18, Saydon) Il-​Kelma t’Alla fiha l-​verità.—Ġwann 17:17.

Il-​Bibbja hija waħda mill-​iktar għotjiet prezzjużi li tana Alla. Hija bħal ittra mingħand missier kollu mħabba lil uliedu. Tgħidilna dwar il-​wegħda t’Alla li jbiddel l-​art f’post meraviljuż fejn ngħixu, li jagħmilha ġenna ta’ l-​art. Tgħidilna x’għamel fil-​passat, x’qed jagħmel issa, u x’se jagħmel fil-​futur għall-​ulied leali tiegħu. Din tgħinna wkoll insolvu l-​problemi tagħna u nsibu l-​ferħ.—2 Timotju 3:16, 17.

Ix-​Xhieda ta’ Jehovah huma l-​ħbieb t’Alla; huma se jgħinuk tifhem x’tgħallem il-​Bibbja. Sempliċement għidilhom li tixtieq tistudja l-​Bibbja. Ma jżommux flus ta’ dan. (Mattew 10:8) Iżjed minn hekk, tista’ tattendi l-​laqgħat Kristjani. Dawn jinżammu f’postijiet ta’ qima msejħin Swali tas-​Saltna. Jekk tattendi l-​laqgħat Kristjani, int se tkabbar iktar malajr l-​għarfien tiegħek dwar Alla.

Tista’ titgħallem dwar Alla mill-​affarijiet li għamel. Per eżempju, il-​Bibbja tgħid: “Alla ħalaq is-​sema u l-​art.” (Ġenesi 1:1) Meta Jehovah ħalaq “is-​sema,” hu għamel ix-​xemx. X’jgħallimna dan dwar Alla? Jgħallimna li Jehovah għandu qawwa kbira. Hu biss seta’ jagħmel xi ħaġa ta’ qawwa hekk kbira bħalma hi x-​xemx. Jurina wkoll li Jehovah hu għaref, ladarba kien meħtieġ l-​għerf biex jagħmel ix-​xemx, li tagħtina s-​sħana u d-​dawl u tibqa’ ma tispiċċax.

Il-​ħolqien ta’ Jehovah juri li hu jħobbna. Aħseb ftit dwar it-​tipi differenti ta’ frott li hawn fuq l-​art. Jehovah seta’ pprovdielna tip wieħed biss ta’ frott, jew saħansitra lanqas wieħed. Minflok, Jehovah tana minn kull xorta ta’ frott b’varjetà kbira t’għamliet, qisien, kuluri, u togħmiet. Dan juri li Jehovah m’huwiex biss Alla ta’ mħabba imma hu wkoll ferm ġeneruż, ta’ ħsieb, u ħanin.—Salm 104:24.