Lezzjoni Nru. 2
Min Hu Alla?
Min hu dak Alla veru, u x’jismu? (1, 2)
Liema xorta taʼ ġisem għandu? (3)
Liema huma l-kwalitajiet li jispikkaw tiegħu? (4)
Nistgħu nużaw xbihat u simboli fil-qima tagħna lejh? (5)
Liema huma żewġ modi kif nistgħu nitgħallmu dwar Alla? (6)
1. In-nies iqimu ħafna affarijiet. Imma l-Bibbja tgħidilna li hemm biss Alla wieħed VERU. Hu ħalaq kollox fis-sema u fuq l-art. Minħabba li tana l-ħajja, hu l-uniku Wieħed li għandna nqimu.—1 Korintin 8:5, 6; Apokalissi 4:11.
2. Alla għandu bosta titli imma għandu biss isem wieħed. Dak l-isem hu JEHOVAH. F’ħafna Bibbji, l-isem t’Alla ġie mneħħi u ġie mibdul mat-titli MULEJ jew ALLA. Imma meta nkitbet il-Bibbja, l-isem Jehovah deher fiha xi 7,000 darba!—Eżodu 3:15; Salm 83:19 [Salm 83:18, New World Translation].
3. Jehovah għandu ġisem, imma mhux bħal tagħna. “Alla huwa spirtu,” tgħid il-Bibbja. (Ġwann 4:24) Spirtu huwa forma taʼ ħajja ħafna ogħla minn tagħna. Ebda bniedem ma qatt rah ’l Alla. Jehovah jgħix fis-sema, imma jistaʼ jara kollox. (Salm 11:4, 5; Ġwann 1:18) X’inhu, iżda, l-ispirtu qaddis? M’huwiex persuna bħal Alla. Minflok, huwa l-forza attiva t’Alla.—Salm 104:30.
4. Il-Bibbja tirrivelalna l-personalità taʼ Jehovah. Turi li l-kwalitajiet li jispikkaw tiegħu huma l-imħabba, il-ġustizzja, l-għerf, u l-qawwa. (Dewteronomju 32:4; Ġob 12:13; Isaija 40:26; 1 Ġwann 4:8) Il-Bibbja tgħidilna li hu wkoll mimli ħniena, qalbu tajba, mimli maħfra, ġeneruż, u paċenzjuż. Aħna, bħal ulied ubbidjenti, għandna nipprovaw nimitawh.—Efesin 5:1, 2.
5. Nistgħu aħna mmilu quddiem jew nitolbu lil xbihat, stampi, jew simboli fil-qima tagħna? Le! (Eżodu 20:4, 5) Jehovah jgħid li rridu nqimu lilu biss. Ma se jaqsam il-glorja tiegħu maʼ ħadd u maʼ xejn iktar. Ix-xbihat m’għandhomx saħħa jgħinuna.—Salm 115:4-8; Isaija 42:8.
6. Kif tistaʼ ssir taf lil Alla aħjar? Mod wieħed huwa billi tosserva l-affarijiet li ħalaq u taħseb b’mod profond dwar x’jgħidulna. Il-ħolqien t’Alla jurina li Hu għandu qawwa u għerf kbir. Naraw l-imħabba tiegħu f’dak kollu li għamel. (Salm 19:2-7 [19:1-6, NW]; Rumani 1:20) Mod ieħor kif nistgħu nitgħallmu dwar Alla huwa billi nistudjaw il-Bibbja. Fiha jgħidilna ħafna iktar dwar x’tip taʼ Alla hu. Jgħidilna wkoll dwar l-iskop tiegħu u x’iridna nagħmlu.—Għamos 3:7; 2 Timotju 3:16, 17.
[Stampi f’paġna 5]
Nitgħallmu dwar Alla mill-ħolqien u mill-Bibbja