Imxi Kif Istruwit Minn Jehovah

“Istruwini, O Jehovah, dwar il-​mogħdija tiegħek. Jien se nimxi fil-​verità tieghek. Għaqqad lil qalbi biex nibżaʼ minn ismek.”−SALM 86:11.

1, 2. X’iqanqal lix-​Xhieda taʼ Jehovah biex ma jaċċettawx trasfużjonijiet tad-​demm?

“JISTAʼ jkun li x-​Xhieda taʼ Jehovah jagħmlu sewwa li jirrifiutaw l-​użu taʼ prodotti tad-​demm, għax huwa veru li għadd importanti taʼ aġenti patoġeniċi jistgħu jiġu trażmessi permezz taʼ demm trasfuż.”−Il-ġurnal mediku Franċiż Le Quotidien du Médecin, 15 taʼ Diċembru, 1987.

² Xi wħud li qraw dak il-​kumment forsi ħassew li hu b’kumbinazzjoni li x-​Xhieda taʼ Jehovah irritutaw trasfużjonijiet tad-​demm minn ħafna qabel ma sar magħruf b’mod ġenerali kemm dawn jistgħu jkunu perikolużi, saħansitra qattiela. Imma l-​waqfa li ħadu x-​Xhieda taʼ Jehovah dwar id-​demm mhix b’kumbinazzjoni, u lanqas ma hi xi reġola vvintata minn xi setta stramba, waqfa li rriżultat minn biżaʼ li d-​demm mhux taʼ min jorbot fuqu. Minflok, ix-​Xhieda jirrifjutaw id-​demm minħabba d-​determinazzjoni tagħhom li jimxu b’ubbidjenza quddiem il-​Għalliem Grandjuż tagħhom—Alla.

3. (a) David kif ħassu dwar id-​dipendenza fuq Jehovah? (b) Lejn liema riżultat ħares ’il quddiem David għaliex fada f’Alla?

³ Is-​Sultan David, li ħass id-​dipendenza tiegħu fuq Alla, kien determinat li jkun istruwit minnu u li ‘jimxi fil-​verità’ tiegħu. (Salm 86:11) David darba ngħatalu l-​parir li jekk jevita li jsir ħati tad-​demm f’għajnejn Alla, ‘ruħu tistaʼ turi li tkun imgeżwra fil-​ħorġa tal-​ħajja maʼ Jehovah.’ (1 Samwel 25:21, 22 25, 29) Bħalma n-​nies igeżwru affarijiet taʼ valur biex jipproteġuhom u jippreservawhom, hekk il-​ħajja taʼ David setgħet tkun protetta u ppreservata minn Alla. Billi aċċetta l-​parir għaqli, David ma fittixx li jsalva lilu nnifsu bi sforzi persunali imma fada f’Dak li lilu kien jaf ħajtu: “Int se ġġagħalni nkun naf il-​passaġġ tal-​ħajja. Ferh sas-​sodisfazzjon qiegħed maʼ wiċċek; hemm is-​sbuħija fuq idek il-​leminija għal dejjem.”−Salm 16:11.

4. David għala ried ikun struwit minn Jehovah?

⁴ B’dik l-​attitudni, David ma ħassx li hu personalment setaʼ jagħżel liema liġijiet divini kienu validi jew li kellhom jiġu obduti. L-​attitudni tiegħu kienet: “Istruwini, O Jehovah, fil-​mogħdija tiegħek, u mexxini fil-​passaġġ taʼ dak li hu rett.” “Istruwini, O Jehovah, dwar il-​mogħdija tiegħek. Jien se nimxi fil-​verità tiegħek. Għaqqad lil qalbi biex nibżaʼ minn ismek. Jien infaħħrek, O Jehovah Alla tiegħi, b’qalbi kollha.” (Salm 27:11; 86:11, 12) Kultant li timxi fil-​verità quddiem Alla jistaʼ jidher li hu inkonvenjenti jew jistaʼ jfisser sagrifiċċju kbir, imma David ried li jkun istruwit fil-​mogħdija t-​tajba u li jimxi fiha.

Istruwit dwar id-​Demm

5. David xi żgur li kien jaf dwar il-​waqfa t’Alla fuq id-​demm?

⁵ Tajjeb li ninnotaw li minn meta kien tifel, David kien imgħallem x’inhi l-​ħarsa t’Alla dwar id-​demm, liema ħarsa ma kinetx xi misteru reliġjuż. Meta l-​Liġi kienet tinqara lill-​poplu, David kien ikun samaʼ dan: “Ir-​ruħ tal-​laħam hi fid-​demm, u jien stess poġġejtu fuq l-​artal għalikom biex tagħmlu tpattija għal erwieħkom, għaliex huwa d-​demm li jagħmel tpattija bir-​rnh fih. Dak hu għala jien għedt lil ulied Iżrael: ‘Ebda ruħ minnkom ma trid tiekol demm u ebda resident barrani li qed igħammar bħala barrani f’nofskom ma għandu jiekol demm.”ˈ—Levitiku 17:11, 12; Dewteronomju 4:10; 31:11.

6. Kif kien hemm ħtieġa kontinwa għall-​qaddejja t’Alla biex jiġu struwiti dwar id-​demm?

⁶ Sakemm Alla dam juża lil Iżrael bħala l-​poplu kkongregat tiegħu, dawk li riedu jogħġbuh kellhom bżonn li jkunu struwiti dwar id-​demm. Ġenerazzjoni wara ġenerazzjoni taʼ tfal subien u bniet Iżraeliti ġew istruwiti b’dan il-​mod. Imma kienet se tkompli struzzjoni bħal din wara li Alla aċċetta lill-​kongregazzjoni taʼ Kristjani, billi kkostitwiehom bħala “l-​Iżrael t’Alla”? (Galatin 6:16) Iva, tabilħaqq. Il-​ħarsa t’Alla dwar id-​demm ma nbidlitx. (Malakija 3:6) Il-​pożizzjoni mistqarra tiegħu dwar li ma tużax ħażin id-​demm kienet teżisti minn qabel ma l-​patt tal-​Liġi beda jgħodd, u kompliet wara li ntemmet il-​Liġi.—Ġenesi 9:3, 4; Atti 15:28, 29.

7. Għala hu importanti għalina li nkunu struwiti minn Alla dwar id-​demm?

⁷ Ir-​rispett għad-​demm hu ċentrali għall-​Kristjanità. ‘Dik mhix esaġerazzjoni?’ xi wħud jistgħu jistaqsu. Iżda, x’hemm iktar ċentrali għall-​Kristjanità mis-​sagrifiċċju taʼ Ġesù? U l-​appostlu Pawlu kiteb: “Permezz tiegħu [taʼ Ġesù] għandna l-​ħelsien b’rahan permezz tad-​demm taʼ dak, iva, il-​maħfra tan-​nuqqasijiet tagħna, skond ir-​rikkezzi tal-​qalb tajba mhix mistħoqqa tiegħu.” (Efesin 1:7) The Inspired Letters, tradott minn Frank C. Laubach, jagħti dan il-​vers: “Id-​demm taʼ Kristu ħallas għalina u issa nappartjenu Lilu.”

8. Il-​“folla kbira” kif jiddependu fuq id-​demm għall-​ħajja?

⁸ Dawk kollha li jittamaw li jsalvaw fit-​“tribulazzjoni l-​kbira” u jgawdu l-​barkiet t’Alla f’ġenna tal-​art jiddependu fuq id-​demm imxerred taʼ Ġesù. Rivelazzjoni 7:9-14 jiddeskrivihom u jgħid b’mod retrospettiv: “Dawn huma dawk li joħorġu mit-​tribulazzjoni l-​kbira, u ħaslu lbieshom u għamluhom bojod fid-​demm tal-​Ħaruf.” Innota l-​lingwaġġ hawnhekk. Ma jgħidx li dawk li huma salvati mit-​tribulazzjoni ‘aċċettaw lil Ġesù’ jew ‘poġġew fidi fih,’ għalkemm dawn ċertament li huma aspetti vitali. Imur pass iktar ’il quddiem u jgħid li huma “ħaslu lbieshom u għamluhom bojod fid-​demm” taʼ Ġesù. Dan hu għaliex demmu għandu valur bħala rahan.

9. Għala hu tant serju li nobdu lil Jehovah rigward id-​demm?

⁹ Apprezzament għal dan il-​valur igħin lix-​Xhieda taʼ Jehovah biex ikunu riżoluti li ma jużawx ħażin id-​demm, saħansitra jekk tabib bis-​sinċerità jsostni li trasfużjoni hija vitali. Hu forsi jemmen li l-​benefiċċji potenzjali minn trasfużjoni jiswew iktar mir-​riskji għas-​saħħa li jiġu mid-​demm innifsu. Imma l-​Kristjan ma jistax jinjora riskju saħansitra akbar, ir-​riskju taʼ li jitlef l-​approvazzjoni t’Alla billi jaqbel mal-​użu ħażin tad-​demm. Pawlu darba tkellem dwar dawk li ‘pprattikaw id-​dnub għax riedu wara li kienu rċevew il-​għarfien eżatt tal-​verità.’ Dnub taʼ dik ix-​xorta għala kien tant serju? Għaliex wieħed bħal dan “għaffeġ fuq l-​Iben t’Alla u stmah bħala taʼ valur ordinarju d-​demm tal-​patt li bih ġie mqaddes.”−Ebrej 9:16-24; 10:26-29.

Għin lil Oħrajn Jiġu Struwiti

10. X’hemm wara d-​determinazzjoni tagħna biex nastjenu mid-​demm?

¹⁰ Aħna li napprezzaw is-​sagrifiċċju taʼ Ġesù bħala rahan noqogħdu attenti li ma nipprattikawx id-​dnub u b’hekk niċħdu l-​valur taʼ demmu li jsalva l-​ħajja. Billi ħsibna sewwa dwar din il-​ħaġa, nirrealizzaw li sempliċiment il-​gratitudni lejn Alla għall-​ħajja għandha tqanqalna biex niċħdu kull kompromess għal-​liġijiet taʼ tjieba tiegħu, li aħna fiduċjużi li ngħataw bl-​aħjar interessi tagħna f’qalbu—l-​aħjar interessi tagħna fit-​tul. (Dewteronomju 6:24; Proverbji 14:27; Ekkleżjasti 8:12) X’ingħidu, iżda, dwar uliedna?

11-13. Liema ħarsa żballjata dwar uliedhom u d-​demm għandhom xi ġenituri Kristjani, u għala?

¹¹ Waqt li wliedna għadhom trabi jew żgħar wisq biex jifhmu, Alla Jehovah iħares lejhom bħala nodfa u aċċettabbli fuq il-​bażi tad-​devozzjoni tagħna. (1 Korintin 7:14) Mela huwa vera li ċ-​ċkejknin f’dar Kristjana forsi jkunu għadhom ma fehmux u għamlu għażla dwar li jobdu l-​liġi t’Alla dwar id-​demm. Qegħdin aħna, madankollu, nagħmlu mill-​aħjar li nistgħu biex ingħallmuhom f’din il-​materja vitali? Ġenituri Kristjani għandhom iqisu dan serjament, għax xi ġenituri donnhom għandhom attitudni żballjata dwar uliedhom u d-​demm. Xi wħud jidhru li jħossu li ma tantx tassew għandhom kontroll fuq jekk uliedhom minuri jingħatawx trasfużjoni. Għala din il-​ħarsa żballjata?

¹² Ħafna pajjiżi għandhom liġijiet u aġenziji governattivi biex jipproteġu tfal li jiġu ttraskurati jew abbużati. It-​tfal tax-​Xhieda taʼ Jehovah ma humiex qed jiġu ttraskurati jew abbużati meta l-​ġenituri jiddeċiedu kontra li jħallu lill-​maħbub binhom jew binthom jingħata d-​demm, waqt li fl-​istess ħin jitolbu l-​użu taʼ terapiji alternattivi li l-​mediċina moderna tistaʼ tipprovdi. Anki mill-​aspett mediku, dan mhux traskuraġni jew abbuż, meta wieħed iqis il-​perikli li jammettuhom minn terapija bi trasfużjoni. Huwa l-​eżerċizzju tad-​dritt li wieħed jiżen ir-​riskji involuti u mbagħad jagħżel il-​kura.a Iżda, xi nies fil-​mediċina fittxew li jużaw provvedimenti legali biex ikollhom l-​awtorità li jinforzaw trasfużjoni lil wieħed li ma jkunx iridha.

¹³ Xi ġenituri, billi jafu li jkun faċli għan-​nies fil-​mediċina li jiksbu appoġġ tal-​qorti għal trasfużjoni fuq xi ħadd minuri, forsi jħossu li l-​kwistjoni m’għadhiex iktar f’idejhom, li m’hemm xejn li l-​ġenituri jistgħu jew jeħtieġ li jagħmlu. Kemm hi żballjata dik il-​ħarsa!—Proverbji 22:3.

14. David u Timotew kif kienu struwiti f’żgħożithom?

¹⁴ Innotajna li David kien struwit fil-​mogħdija t’Alla minn żgħożitu ’l fuq. Dan tah is-​saħħa biex iqis il-​ħajja bħala għotja mingħand Alla u biex ikun jaf li d-​demm jirrappreżenta l-​ħajja. (Qabbel 2 Samwel 23:14-17.) Timotew kien struwit fil-​ħsieb t’Alla “mill-​infanzja.” (2 Timotew 3:14, 15) Ma taqbilx li anki meta David u Timotew kien għad ma kellhomx l-​età legali taʼ wieħed adult kif inhi meqjusa llum, żgur li kienu kapaċi jesprimu rwieħhom tajjeb dwar kwistjonijiet li jinvolvu r-​rieda t’Alla? B’mod simili, ferm qabel ma jsiru adulti, il-​Kristjani żgħar illum għandhom jiġu mgħallmin fil-​mogħdija t’Alla.

15, 16. (a) Liema ħarsa żviluppat f’xi postijiet dwar id-​drittijiet tal-​minuri? (b) X’wassal biex wieħed minuri jingħata d-​demm?

¹⁵ F’xi postijiet wieħed li hu hekk imsejjaħ minuri matur jingħata l-​istess drittijiet bħal dawk tal-​adulti. Fuq il-​bażi tal-​età jew tal-​ħsieb matur, jew tat-​tnejn, żagħżugħ jistaʼ jitqies bħala matur biżżejjed biex jagħmel id-​deċiżjonijiet tiegħu stess dwar kura medika. Anki meta dan mhux liġi, imħallfin jew uffiċ-jali jistgħu jagħtu kas tajjeb tax-​xewqat taʼ żagħżugħ li kapaċi jesprimi b’mod ċar id-​deċiżjoni soda tiegħu dwar id-​demm. Għall-​kuntrarju, meta żagħżugħ ma hux kapaċi jesprimi t-​twemmin tiegħu b’mod ċar u matur, il-​qorti forsi tħoss li jkollha tiddeċiedi hi dak li jidher li hu l-​aħjar, bħal fil-​każ taʼ tarbija.

¹⁶ Wieħed żagħżugħ kien ilu jistudja l-​Bibbja mhux b’mod regulari għal snin imma ma tgħammidx. Minkejja li kien biss sebaʼ ġimgħat ’il bogħod mill-​età meta kien se jikseb id-​“dritt li jiċħad xi kura medika għalih innifsu,” l-​awtoritajiet tal-​isptar fejn kien qed jingħata kura għal kanċer fittxew l-​appoġġ tal-​qorti biex jagħtuh trasfużjoni kontra x-​xewqat tiegħu u dawk tal-​ġenituri tiegħu. L-​imħallef li kien taʼ kuxjenza staqsieh dwar it-​twemmin tiegħu fuq id-​demm u poġġielu xi mistoqsijiet bażiċi, bħal per eżempju l-​ismijiet tal-​ewwel ħames kotba tal-​Bibbja. Iż-​żagħżugħ ma kienx jafhom u lanqas ma setaʼ jagħti xiehda konvinċenti li hu fehem għala kien qed jirrifjuta d-​demm. B’dispjaċir, l-​imħallef awtorizza t-​trasfużjonijiet, waqt li kkummenta: “Iċ-​ċaħda [tiegħu] li jagħti kunsens għat-​trasfużjonijiet tad-​demm ma hix ibbażata fuq fehma matura tat-​twemmin reliġjuż tiegħu stess.”

17. Liema pożizzjoni ħadet tfajla taʼ 14-il sena dwar li tingħata d-​demm, u b’liema riżultat?

¹⁷ L-​affarijiet jistgħu jispiċċaw differenti għal wieħed minuri li hu struwit sewwa fil-​mogħdijiet t’Alla u li qed jimxi b’mod attiv fil-​verità Tiegħu. Waħda Kristjana żagħżugħa kellha l-​istess tip rari taʼ kanċer. It-​tifla u l-​ġenituri tagħha fehmu u aċċettaw kimoterapija modifikata minn wieħed speċjalista fi sptar magħruf. Xorta, il-​każ ittieħed il-​qorti. L-​imħallef kiteb: “D.P. xiehdet li hi kienet se tirreżisti li jkollha trasfużjoni tad-​demm b’kull mod li setgħet. Hi qieset trasfużjoni bħala invażjoni taʼ ġisimha u qabblitha maʼ stupru. Hi talbet lill-​Qorti biex tirrispetta l-​għażla tagħha u tippermettilha tkompli [fl-isptar] mingħajr trasfużjonijiet tad-​demm ordnati mill-​Qorti.” L-​istruzzjoni Kristjana li kienet irċeviet sabitu jgħinha f’dan il-​ħin diffidli.—Ara l-​kaxxa.

18. (a) Waħda tifla milquta ħadet liema waqfa soda dwar li tirċievi d-​demm? (b) L-​imħallef x’iddeċieda dwar il-​kura tagħha?

¹⁸ Tifla taʼ 12-il sena kienet qed tiġi kkurata għal leukemia. Aġenzija tal-​kura tat-​tfal daħħlet il-​kwistjoni l-​qorti biex id-​demm ikun jistaʼ jiġi nforzat fuqha. L-​imħallef ikkonkluda: “L. qalet lil din il-​qorti b’mod ċar u tond li, jekk isir sforz biex issirilha trasfużjoni tad-​demm, hi kienet se tiġġieled dik it-​trasfużjoni bis-​saħħa kollha tagħha. Hi qalet, u jien nemminha, li se twerżaq u tissara u li kienet se tiġbed il-​labra ’l barra minn driegħha u se tipprova teqred id-​demm fil-​borża fuq is-​sodda tagħha. Jien nirrifjuta li nagħti xi ordni li tistaʼ tagħti lil din it-​tifla kedda bħal din . . . Maʼ din il-​pazjenta, il-​kura proposta mill-​isptar tindirizza l-​marda biss f’sens fiżiku. Tonqos li tindirizza l-​ħtiġijiet emozzjonali tagħha u t-​twemmin reliġjuż tagħha.”

Ġenituri—Istruwixxu Sewwa

19. Liema obbligu speċjali għandhom iwettqu l-​ġenituri lejn uliedhom?

¹⁹ Esperjenzi bħal dawn iġorru messaġġ qawwi ferm għall-​ġenituri li jixtiequ li kulħadd fil-​familja tagħhom igħix skond il-​liġi t’Alla dwar id-​demm. Raġuni waħda għala Abraham kien il-​Ħabib t’Alla kienet li Hu kien jaf li l-​patrijarka kien “jikkmanda lil uliedu u lil taʼ daru warajh biex huma jżommu l-​mogħdija taʼ Jehovah biex jagħmlu t-​tjieba.” (Ġenesi 18:19) M’għandux dan ikun veru fil-​każ taʼ ġenituri Kristjani llum? Jekk int ġenitur, qiegħed int tistruwixxi lill-​maħbubin tfal tiegħek biex jimxu fil-​mogħdija taʼ Jehovah biex huma dejjem se jkunu ‘lesti biex jagħmlu difiża quddiem kulmin jitlobhom raġuni għat-​tama fihom, imma billi jagħmlu hekk bil-​ħlewwa u b’rispett profond.’?—1 Pietru 3:15.

20. X’irridu primarjament li t-​tfal tagħna jkunu jafu u jemmnu dwar id-​demm? (Danjel 1:3-14)

²⁰ Għalkemm ikun tajjeb għal uliedna li jkunu nformati dwar il-​perikli taʼ mard u riskji oħra minn trasfużjonijiet tad-​demm, li nistruwixxu lit-​tfal tagħna fil-​liġi perfetta t’Alla dwar id-​demm ma jfissirx primarjament li nippruvaw indaħħlu fihom biżaʼ mid-​demm. Jekk, per eżempju, imħallef jistaqsi lil tifla għala hi ma tridx li tingħata d-​demm u t-​tweġiba tagħha tkun essenzjalment li hi taħseb li d-​demm hu perikoluż wisq jew ibeżżagħha, x’jistaʼ jkun l-​effett? L-​imħallef jistaʼ forsi jikkonkludi li hi għadha mhix matura u qed tibżaʼ żżejjed, sewwa sew bħalma forsi tant tibżaʼ minn operazzjoni għall-​appendiċite li tibda tibki u tirreżisti din l-​operazzjoni anki jekk il-​ġenituri tagħha jħossu li jkun aħjar għaliha li tagħmilha. Iktar minn hekk, aħna innotajna iktar kmieni li r-​raġuni fundamentali għala l-​Kristjani joġġezzjonaw għat-​trasfużjonijiet ma hix għax id-​demm hu mniġġes imma għax hu prezzjuż għal Alla tagħna u Dak li Jagħti l-​Ħajja. It-​tfal tagħna għandhom ikunu jafuh dan, kif ukoll li l-​perikli mediċi possibbli mid-​demm jagħtu iktar saħħa lill-​pożizzjoni reliġjuża tagħna.

21. (a) Il-​ġenituri għandhom jitgħallmu liema ħaġa dwar uliedhom u l-​ħarsa tal-​Bibbja dwar id-​demm? (b) Il-​ġenituri kif jistgħu jgħinu lil uliedhom f’konnessjoni mad-​demm?

²¹ Jekk int għandek it-​tfal, ċert int li huma jaqblu maʼ u kapaċi jispjegaw il-​waqfa bbażata fuq il-​Bibbja rigward it-​trasfużjonijiet? Jemmnu huma verament li din il-​waqfa hija r-​rieda t’Alla? Konvinti huma illi l-​ksur tal-​liġi t’Alla jkun tant serju li jistaʼ jipperikola l-​prospett taʼ Kristjan għal ħajja taʼ dejjem? Ġenituri għaqlin se jgħaddu flimkien dawn il-​kwistjonijiet maʼ wliedhom, kemm jekk huma żgħar ħafna jew kważi adulti. Il-​ġenituri jistgħu jirreċtaw sitwazzjonijiet fejn kull żagħżugħ jiffaċċja mistoqsijiet li jistaʼ jqegħdilhom imħallef jew uffiċjal f’xi sptar. Il-​għan ma hux li t-​tfal jirrepetu bħal pappagall xi fatti jew tweġibiet magħżulin. Hu iktar importanti li huma jkunu jafu x’jemmnu huma, u għala. M’għandniex xi ngħidu, waqt seduta tal-​qorti, il-​ġenituri jew oħrajn jistgħu jippreżentaw tagħrif dwar ir-​riskji tad-​demm u x’terapiji alternattivi oħra jistgħu jinkisbu. Imma dak li mħallef jew xi uffiċjal probabbli li se jfittex li jitgħallem meta jitkellem mat-​tfal tagħna hu dwar jekk huma jifhmux b’mod matur is-​sitwazzjoni u l-​għażliet tagħhom u wkoll jekk huma nfushom għandhomx valuri u konvinzjonijiet sodi tagħhom stess.—Qabbel 2 Slaten 5:1-4.

22. X’jistaʼ jkun ir-​riżultat permanenti taʼ li aħna nkunu struwiti minn Alla dwar id-​demm?

²² Ilkoll kemm aħna jeħtieġ li napprezzaw u nżommu b’mod reżolut mal-​ħarsa t’Alla dwar id-​demm. Rivelazzjoni 1:5 jiddeskrivi lil Kristu bħala dak li ‘jħobbna u ħelisna minn dnubietna permezz taʼ demmu stess.’ Huwa biss billi naċċettaw il-​valur tad-​demm taʼ Ġesù li aħna nistgħu niksbu maħfra sħiħa u dejjiema għad-​dnubiet tagħna. Rumani 5:9 jgħid b’mod ċar: “Kemm iktar, għalhekk, la ġejna ddikjarati twajbin issa b’demmu, se niġu salvati permezz tiegħu mill-​korla.” Kemm hu għaqli, allura, għalina u għal uliedna li nkunu struwiti minn Jehovah dwar din il-​ħaġa u li nkunu determinati li nimxu fil-​mogħdija tiegħu għal dejjem!

[Nota taʼ taħt]

Punti Prinċipali taʼ Istruzzjoni

◻ X’ħarsa għandna jkollna dwar li niġu struwiti minn Jehovah?

◻ Li nobodu l-​liġi t’Alla dwar id-​demm għala hu daqshekk importanti?

◻ Għala huwa vitali li ż-​żgħażagħ ikunu kapaċi jispjegaw b’mod ċar u sod il-​konvinzjonijiet tagħhom dwar id-​demm?

◻ Il-​ġenituri Kristjani kif jistgħu jgħinu lit-​tfal tagħhom biex ikunu struwiti sewwa fil-​liġi taʼ Jehovah dwar id-​demm?

[Kaxxa f’paġna 15]

IL-​QORTI ĠIET IMPRESSJONATA

Id-​deċiżjoni tal-​qorti xi stqarret rigward D.P., imsemmija f’paragrafu 17?

“Il-​Qorti ġiet impressjonata ferm bl-​intelliġenza, il-​kalma, id-​dinjità, u l-​forza taʼ din iż-​żagħżugħa taʼ 14-il sena u nofs. Hi forsi kienet imbellha meta skopriet li kellha forma qattiela taʼ kanċer . . . Madankollu, kienet persuna żagħżugħa matura li ġiet il-​Qorti biex tixhed. Hi dehret li ffokat biċ-​ċar fuq il-​biċċa xogħol diffiċli li kienet qed tiffaċċjaha. Hi kienet attendiet is-​sessjonijiet kollha taʼ pariri, qablet għal pjan taʼ terapija, żviluppat filosofija li tagħmel sens dwar kif hi bħala esseri uman għandha tiffaċċja din l-​isfida medika, u ġiet il-​Qorti bit-​talba li tinfed: irrispetta d-​deċiżjoni tiegħi. . .

“Flimkien mal-​maturità tagħha, D.P. esprimiet bażi suffiċjenti għad-​deċiżjoni tagħha biex il-​Qorti tirrispettaha. Spiritwalment, psikoloġikament, moralment, u emozzjonalment issirilha ħsara bi pjan taʼ kura li jkun jinkludi trasfużjonijiet tad-​demm. Il-​Qorti se tirrispetta l-​pjan għal kura li għażlet hi.”