Hu ssaporta minkejja l-inġustizzja

ELIJA mexa tul il-​Wied tal-​Ġordan. Kien ilu ġimgħat sħaħ jivvjaġġa lejn it-​Tramuntana mill-​Muntanja Ħoreb ’il bogħod. Issa sa fl-​aħħar lura f’Iżrael, hu setaʼ jara bidliet f’art twelidu. L-​effetti tan-​nixfa twila bdew jgħibu. Bdiet nieżla x-​xita ħafifa tal-​ħarifa u l-​bdiewa kienu qegħdin jaħartu l-​għelieqi tagħhom. Min jaf kemm ħassu mfarraġ il-​profeta li jara l-​art tirkupra, imma hu min-​nies kien jimpurtah l-​iktar. Spiritwalment ma tantx kienu tajbin. Il-​pjaga tal-​qima taʼ Bagħal kienet għadha mifruxa sew fosthom, u Elija kellu ħafna x’jagħmel.a

Qrib il-​belt t’Abel-​meħola, Elija ra proġett taʼ biedja fuq skala kbira. Kien hemm 24 barri b’kull par taħt madmad wieħed, u t-​12-​il par kienu qed jaħartu flimkien jagħmlu raddi paralleli fil-​ħamrija niedja. Ir-​raġel li kien qed imexxi l-​aħħar par kien dak li kien qed ifittex Elija. Dan kien Eliżew, ir-​raġel li Ġeħova kien għażel bħala s-​suċċessur t’Elija. Elija darba kien ħaseb li hu biss kien leali lejn Alla, għalhekk, bla dubju kien ħerqan li jiltaqaʼ maʼ dan ir-​raġel.—1 Slaten 18:22; 19:14-​19.

Ħassu wkoll Elija naqra inċert dwar jekk jiddelegax xi ftit mir-​responsabbiltajiet tiegħu, jekk jaqsamx il-​privileġġi li kellu maʼ ħaddieħor, jew jekk xi darba kienx se jiġi sostitwit? Ma nistgħux ngħidu; lanqas ma nistgħu ngħidu li tħassib bħal dan m’għaddilux minn moħħu. Wara kollox, hu kien “raġel b’sentimenti bħal tagħna.” (Ġakbu 5:17) Kien x’kien, il-​Bibbja tgħid: “Elija qasam għal ħdejh u tefagħlu fuqu l-​libsa tiegħu taʼ profeta.” (1 Slaten 19:19) Il-​libsa uffiċjali t’Elija—x’aktarx tal-​ġilda bis-​suf tan-​nagħaġ jew tal-​mogħoż—kienet tintlibes bħala mantar u kienet tissinifika l-​ħatra speċjali tiegħu minn Ġeħova. Mela, il-​fatt li tpoġġiet fuq spallejn Eliżew kien ġest li kellu tifsira kbira. Elija kien lest li jissottometti ruħu għall-​kmand taʼ Ġeħova biex jaħtar lil Eliżew bħala s-​suċċessur tiegħu. Elija fada f’Alla tiegħu u obdieh.

Min-​naħa tiegħu, ir-​raġel iżgħar kien ħerqan biex jgħin lill-​profeta akbar minnu. Eliżew ma kellux jissostitwixxi lil Elija fil-​pront. Pjuttost, għal madwar sitt snin, hu b’umiltà akkumpanja lill-​profeta akbar minnu u għenu. Iktar tard sar magħruf bħala dak “li kien iferraʼ l-​ilma f’idejn Elija.” (2 Slaten 3:11) Kemm kien taʼ faraġ għal Elija li jkollu dan l-​assistent kapaċi u li tant jgħinu! Iż-​żewġt irġiel x’aktarx li saru ħbieb sewwa. L-​inkuraġġiment li taw lil xulxin żgur li għenhom jissaportu minkejja li raw l-​inġustizzji terribbli li kienu qed isiru mal-​pajjiż kollu. Partikularment, il-​ħażen tas-​sultan, Aħab, kien sejjer iktar għall-​agħar.

Ġieli tiffaċċja xi inġustizzja? Ħafna minna jiffaċċjawha f’din id-​dinja korrotta. Ħabib li jħobb lil Alla jistaʼ jgħinek tissaporti. Int tistaʼ wkoll titgħallem ħafna mill-​fidi t’Elija meta tiffaċċja l-​inġustizzja.

“QUM, INŻEL ILTAQAʼ M’AĦAB”

Elija u Eliżew ħadmu iebes biex isaħħu lin-​nies spiritwalment. Milli jidher, huma kienu minn taʼ quddiem biex iħarrġu profeti oħrajn, li setgħu kienu organizzati f’xi tip taʼ skejjel. Iżda maż-​żmien, Elija rċieva inkarigu ġdid mingħand Ġeħova: “Qum, inżel iltaqaʼ m’Aħab is-​sultan taʼ Israel.” (1 Slaten 21:18) Aħab x’kien għamel?

Is-​sultan kien diġà apostata, l-​agħar wieħed mis-​slaten taʼ Iżrael sa dak iż-​żmien. Hu kien iżżewweġ lil Ġeżabel u ħalla l-​qima taʼ Bagħal tiffjorixxi fil-​pajjiż, u anki s-​sultan innifsu kien jieħu sehem fiha. (1 Slaten 16:31-​33) Il-​qima taʼ Bagħal kienet tinkludi riti tal-​fertilità, prostituzzjoni ritwali, u saħansitra ssagrifikar tat-​tfal. Barra minn hekk, Aħab ftit qabel ma kienx obda kmand taʼ Ġeħova biex joqtol lis-​sultan Sirjan mill-​agħar Ben-​ħadad. Ir-​rifjut t’Aħab milli jidher kellu x’jaqsam mal-​prospett taʼ qligħ taʼ flus. (1 Slaten, kapitlu 20) Iżda issa, ir-​regħba, il-​materjaliżmu, u l-​vjolenza t’Aħab u Ġeżabel marru iżjed għall-​agħar.

Aħab kellu palazz fis-​Samarija—u dan verament kien bini enormi! Kellu wkoll palazz f’Ġeżragħel, madwar 37 kilometru ’l bogħod. Maġenb din it-​tieni residenza kien hemm għalqa tad-​dwieli. Aħab ixxennaq għal din il-​biċċa art, li kienet tappartjeni lil raġel jismu Nabot. Aħab bagħat għalih u offrielu l-​flus għaliha jew inkella li jpartathielu. Imma Nabot qallu: “Ma jgħaddilix minn moħħi, mill-​ħarsa taʼ Ġeħova, li nagħtik wirt missirijieti.” (1 Slaten 21:3) Kien Nabot rasu iebsa? Irresponsabbli? Ħafna hekk ħasbu. Fil-​fatt hu kien qed jobdi l-​Liġi taʼ Ġeħova, li ma kinitx tippermetti lill-​Iżraelin ibigħu għal dejjem art li kienet wirt il-​familja tagħhom. (Levitiku 25:23-​28) Nabot, lanqas biss għaddielu minn moħħu li jikser il-​Liġi t’Alla. Hu kien raġel taʼ fidi u kuraġġ għax żgur li kien jaf li kien perikoluż li jieqaf lil Aħab.

M’għandniex xi ngħidu, Aħab ma kienx jikkalkulaha l-​Liġi taʼ Ġeħova. Hu mar id-​dar, “bin-​nervi u mdejjaq” għax m’għaddietx tiegħu. Aħna naqraw: “Imtedd fuq soddtu u dawwar wiċċu u ma kielx.” (1 Slaten 21:4) Meta Ġeżabel rat lil żewġha bil-​geddum donnu xi tifel bil-​buri, hi malajr ikkonfoffat biex tiksiblu dak li ried—u wkoll, sadattant, teqred familja sewwa.

Mhux faċli taqra dwar il-​konfoffa tagħha mingħajr ma tibqaʼ miblugħ kemm kienet mill-​agħar. Is-​Sultana Ġeżabel kienet taf li l-​Liġi t’Alla kienet tirrikjedi t-​testimonjanza taʼ żewġ xhieda biex tiġi provata akkuża serja. (Dewteronomju 19:15) Għalhekk kitbet ittri f’isem Aħab, u dderiġiet lil irġiel prominenti taʼ Ġeżragħel biex isibu żewġt irġiel li kienu lesti li jakkużaw falz lil Nabot bid-​dagħa, għax dan kellu l-​piena tal-​mewt. Il-​pjan tagħha mexa ħarir. Żewġt irġiel “m’huma tajbin għal xejn” xehdu falz kontra Nabot, u minħabba f’hekk ġie mħaġġar. U mhux hekk biss—ulied Nabot ukoll ġew maqtulin!b (1 Slaten 21:5-​14; Levitiku 24:16; 2 Slaten 9:26) Aħab, fil-​fatt, abbanduna t-​tmexxija bħala kap tal-​familja billi ħalla lil martu tagħmel li trid u teqred lil nies innoċenti.

Immaġina x’ħass Elija meta Ġeħova rrivelalu dak li kienu għamlu s-​sultan u s-​sultana. Jistaʼ jkun ferm skuraġġanti meta nies mill-​agħar jidhru li qed jittrijonfaw fuq uħud innoċenti. (Salm 73:3-​5, 12, 13) Illum, spiss naraw inġustizzji terribbli jsiru—xi drabi saħansitra minn irġiel li għandhom is-​setgħa u li jsostnu li qed jaġixxu bħala r-​rappreżentanti t’Alla. Iżda nistgħu nsibu l-​faraġ f’dan ir-​rakkont. Il-​Bibbja hawnhekk tfakkarna li xejn m’hemm moħbi minn Ġeħova. Hu jara kollox. (Ebrej 4:13) U x’jagħmel dwar l-​għemejjel mill-​agħar li jara?

“SIBTNI, JA GĦADU TIEGĦI?”

Ġeħova bagħat lil Elija għand Aħab. Alla qallu bla tlaqliq: “Hu jinsab fl-​għalqa tad-​dwieli taʼ Nabot.” (1 Slaten 21:18) Meta Ġeżabel qalet lil Aħab li l-​għalqa tad-​dwieli issa kienet tiegħu, qam jiġri u mar jifraħ b’dak li kien għadu kif akkwista. Qatt m’għaddielu minn moħħu li Ġeħova kien qed jara kollox. Immaġina l-​espressjoni taʼ wiċċu hekk kif kien qed jitlajja fl-​għalqa tad-​dwieli, joħlom dwar kif kien se jibdel dan il-​post fi ġnien meraviljuż. Imma f’daqqa waħda feġġ Elija! Aħab, wiċċu filli deher ferħan, u filli nbidel f’dagħdigħa u mibegħda, hekk kif b’rabja qal: “Sibtni, ja għadu tiegħi?”—1 Slaten 21:20.

Kliem Aħab jirrivela bluha doppja. L-​ewwel, billi lil Elija qallu, “Sibtni,” Aħab wera li kien agħma spiritwalment. Ġeħova kien diġà ‘sabu.’ Hu kien ra lil Aħab jabbuża mir-​rieda ħielsa mogħtija lilu u jgawdi l-​frott tal-​konfoffa mill-​agħar taʼ Ġeżabel. Alla ra x’kien hemm f’qalb Aħab, li l-​imħabba biex jakkwista affarijiet materjali kienet saret iktar importanti minn kwalunkwe sens taʼ ħniena, ġustizzja, jew mogħdrija. It-​tieni, meta qal lil Elija, “Ja għadu tiegħi,” Aħab kixef il-​mibegħda li kellu għal raġel li kien ħabib t’Alla Ġeħova u li setaʼ għen lil Aħab idur lura mit-​triq diżastruża tiegħu.

Nistgħu nitgħallmu lezzjonijiet vitali mill-​bluha t’Aħab. Għandna dejjem niftakru li Alla Ġeħova jara kollox. Bħala Missier li jħobbna, hu jaf meta nitbiegħdu mit-​triq it-​tajba, u jkun ħerqan biex jarana nbiddlu l-​attitudni tagħna. Biex jgħinna, spiss juża lil ħbiebu—bnedmin leali li, bħal Elija, iwasslu kliem Alla lill-​bnedmin sħabhom. Xi żball ikun jekk inqisu l-​ħbieb t’Alla bħala l-​għedewwa tagħna!—Salm 141:5.

Immaġina lil Elija jwieġeb lil Aħab: “Sibtek.” Hu kien sabu fis-​sens li kien jaf x’tip taʼ persuna kien Aħab—ħalliel, qattiel, u ribell kontra Alla Ġeħova. Min jaf kemm kellu bżonn kuraġġ biex jieqaf lil dak il-​bniedem mill-​agħar! Elija kompla jagħti l-​ġudizzju t’Alla dwar Aħab. Ġeħova ra l-​istampa kollha—il-​ħażen kien qed jinfirex mill-​familja t’Aħab u jinfetta lin-​nies. Għalhekk, Elija qal lil Aħab li Alla kien se ‘jiknes kollox,’ kien se jeqred dik id-​dinastija kollha kemm hi. Ġeżabel ukoll kellha tiġi ġudikata.—1 Slaten 21:20-​26.

Elija ma kienx jassumi li n-​nies sempliċement jgħadduha lixxa meta juru kondotta mill-​agħar u inġusta. Ħaġa bħal din malajr tassumiha fid-​dinja tal-​lum. Dan ir-​rakkont Bibliku jfakkarna li Alla Ġeħova mhux biss jara xi jkun qed isir imma wkoll li hu se jġib il-​ġustizzja f’waqtha. Kelmtu tassigurana li ġej il-​jum li fih hu se jtemm l-​inġustizzja kollha darba għal dejjem! (Salm 37:10, 11) Imma forsi tgħid: ‘Il-​ġudizzji t’Alla kastig biss jinvolvu? Tintwera ħniena wkoll fihom?’

“RAJT KIF AĦAB UMILJA RUĦU?”

Forsi Elija baqaʼ mistagħġeb bir-​reazzjoni t’Aħab għall-​ġudizzju divin. Ir-​rakkont jgħid: “Malli semaʼ dan il-​kliem, Aħab ċarrat ħwejġu u libes ilbies taʼ l-​ixkora fuq il-​laħam; u beda jsum u baqaʼ jimtedd fuq l-​ixkejjer u jimxi b’qalbu maqtugħa.” (1 Slaten 21:27) Kien Aħab qed jindem mill-​ħażen tiegħu?

Għall-​inqas nistgħu ngħidu li dan kien pass fid-​direzzjoni t-​tajba. Aħab kien qed jumilja ruħu—bla dubju xi ħaġa diffiċli għal raġel kburi u arroganti bħal dan. Imma kienet din indiema vera? Qabbel dan maʼ sultan li ġie wara Aħab u li għandu mnejn kien iktar mill-​agħar minnu—Manasse. Meta Ġeħova kkastiga lil Manasse, dan ir-​raġel umilja ruħu, u talab lil Ġeħova għall-​għajnuna. Hu għamel iktar minn hekk. Hu biddel ħajtu billi qered l-​istatwi idolatrużi li kien għamel. Imbagħad għamel sforz biex jaqdi lil Ġeħova, u saħansitra inkuraġġixxa lill-​poplu jagħmel l-​istess. (2 Kronaki 33:1-​17) Irreaġixxa bl-​istess mod Aħab? B’dispjaċir, le.

Innota Ġeħova li Aħab wera pubblikament li kien sogħbien? Ġeħova qal lil Elija: “Rajt kif Aħab umilja ruħu minħabba fija? Talli umilja ruħu minħabba fija, ma nġibx il-​gwaj fi żmienu. Fi żmien ibnu nġib il-​gwaj fuq daru.” (1 Slaten 21:29) Kien Ġeħova qed jaħfirlu lil Aħab? Le, l-​indiema vera biss setgħet tqanqal il-​ħniena divina. (Eżekjel 33:14-​16) Imma peress li Aħab wera ammont taʼ dispjaċir, Ġeħova wieġeb bl-​istess ammont taʼ ħniena. Aħab kien se jinħeles mill-​esperjenza tal-​biżaʼ li jara lill-​familja kollha tiegħu tinqered.

Xorta waħda, Ġeħova ma biddilx il-​ġudizzju tiegħu dwar dan ir-​raġel. Ġeħova, iktar tard ikkonsulta mal-​anġli tiegħu dwar l-​aħjar mod kif setaʼ jidħaq b’Aħab sabiex dan jieħu sehem fil-​battalja li kellha ttemmlu ħajtu. Ftit wara, is-​sentenza li Ġeħova qataʼ kontra Aħab twettqet. Aħab indarab fil-​battalja, żvina, u miet fil-​karru tiegħu. Ir-​rakkont iżid dan id-​dettall ikrah: Meta ħaslu l-​karru rjali, xi ftit mill-​klieb lagħqu d-​demm tas-​sultan. B’hekk, in-​nies setgħu jaraw li kien twettaq il-​kliem taʼ Ġeħova li Elija wassal lil Aħab: “Fil-​post fejn il-​klieb lagħqu d-​demm taʼ Nabot, il-​klieb se jilagħqu d-​demm tiegħek.”—1 Slaten 21:19; 22:19-​22, 34-​38.

It-​tmiem t’Aħab ipprovda tfakkira rassiguranti għal Elija, Eliżew, u dawk kollha leali fost il-​poplu t’Alla, li Ġeħova ma nesiex il-​kuraġġ u l-​fidi taʼ Nabot. Qatt ma jonqos li, illum jew għada, l-​Alla tal-​ġustizzja jġib il-​kastig għall-​ħażen; lanqas ma jonqos li jinkludi l-​ħniena fil-​ġudizzju tiegħu jekk ikun hemm bażi għal dan. (Numri 14:18) X’lezzjoni qawwija kienet din għal Elija, li kien issaporta għal ħafna snin taħt il-​ħakma taʼ dak is-​sultan mill-​agħar! Ġieli sfajt vittma taʼ xi inġustizzja? Tixxennaq li tara lil Alla jirranġa l-​affarijiet? Tagħmel tajjeb jekk timita l-​fidi t’Elija. Flimkien maʼ sieħbu leali Eliżew, hu baqaʼ jipproklama l-​messaġġi t’Alla u jissaporti minkejja l-​inġustizzja!