Int Lil Liema Alla Tadura?

MADWAR id-​dinja, in-​nies iwieġbu dik il-​mistoqsija f’ħafna modi differenti. L-​appostlu Pawlu għamel l-​osservazzjoni: “Hemm ħafna ‘allat’ u ħafna ‘mulejiet,’” u llum allat li huma meqjuma hemm bil-​miljuni. (1 Korintin 8:5) Kont taf, iżda, li ħafna nies iqimu alla differenti mill-​wieħed li huma jaħsbu li qed iqimu? U rrealizzajt int li ħafna atei huma iktar devoti minn dawk li jemmnu f’xi alla? B’liema mod?

Sewwa, tifsira waħda tal-​kelma qima hi “li tagħti bil-​kbir, saħansitra b’mod estravaganti rispett, unur, jew devozzjoni.” Fil-​lingwi oriġinali tal-​Bibbja, il-​kelmiet għal qima jġorru l-​ħsieb taʼ servizz jew li tmil quddiem xi ħadd. B’dan f’moħħna, ejjew naraw kif in-​nies jistgħu jkunu żballjati dwar lil min jew lil liema ħaġa huma jaħsbu li verament qed iqimu.

Qima Mħallta

Ħu l-​eżempju tas-​Samaritani tal-​qedem. Ħafna minnhom kienu oriġinalment barranin li l-​Assirjani ħadu hemm fil-​Palestina biex jieħdu post il-​għaxar tribujiet tat-​Tramuntana taʼ Iżrael. Qabel, huma kienu jimxu wara allat pagani, imma issa għamlu sforz biex jitgħallmu dwar Jehovah, dak Alla taʼ Iżrael. Abbandunawha r-​reliġjon taʼ qabel tagħhom? Le. Il-​Bibbja tirrapporta: “Kien skond ir-​reliġjon taʼ qabel tagħhom li kienu qed jagħmlu. U dawn il-​ġnus ġew li jkunu wħud li jibżgħu minn Jehovah, imma kien lill-​immaġnijiet skolpiti tagħhom infushom li wrew li kienu jaqdu.” (2 Slaten 17:40, 41) Mela s-​Samaritani, waqt li bil-​kliem għarfu lil Jehovah, baqgħu jaqdu lill-​allat taʼ qabel tagħhom, u b’hekk kienu jipprattikaw xorta taʼ reliġjon imħallta.

Xi ħaġa simili ġrat meta missjunarji introduċew l-​Kattoliċiżmu Ruman fl-​Amerka t’Isfel. Huma kkonvertew lill-​biċċa l-​kbira tan-​nies, imma bħas-​Samaritani tal-​qedem, in-​nies ma nsewhomx lill-​allat taʼ qabel tagħhom. B’hekk, fil-​Brażil, ir-​riti pagani tal-​Vudù għadhom xorta jiġu osservati minn “Kristjani,” kif huma wkoll ċelebrazzjonijiet li jonoraw allat tal-​qedem, bħalma hi l-​alla mara Iemanjá. Affarijiet simili jiġru f’artijiet oħra tal-​Amerka t’Isfel.

Barra minn hekk, ir-​reliġjon li dawk il-​missjunarji introduċew fl-​Amerka t’Isfel kienet fiha nfisha reliġjon imħallta. Ħafna mid-​duttrini tagħha, bħalma huma t-​Trinità, in-​nar tal-​infern, u l-​immortalità tar-​ruħ, ġew minn reliġjonijiet u filosofiji qodma pagani. Huma żgur li ma kinux misjubin fil-​Bibbja. Bl-​istess mod, il-​festi tagħha—inkluż il-​Milied u l-​Għid il-​Kbir— kienu taʼ oriġini mhux Kristjan.a Ħuwa possibbli li tosserva festi pagani bħal dawn u temmen f’duttrini li m’humiex Kristjani bħal dawn u xorta tqim lil Alla tal-​Bibbja, li qal: “Ma jrid ikollok ebda allat oħra kontra wiċċi”? (Eżodu 20:3) Dażgur li le!

“Ħarsu Rwieħkom Mill-​Idoli”

Ikkunsidra mod ieħor li bih in-​nies qed jiġu mqarrqin fil-​kwistjoni taʼ qima. L-​appostlu Ġwanni kiteb: “Tfal ċkejknin, ħarsu rwieħkom mill-​idoli.” (1 Ġwann 5:21) Madwar elf miljun ruħ huma mniżżlin li jappartjenu lill-​Kristjaneżmu, u dawn isostnu li qed iqimu l-​istess Alla li kien iqim Ġwanni. Madankollu, mijiet taʼ miljuni minnhom imilu quddiem immaġnijiet taʼ “qaddisin,” taʼ Ġesu, u tal-​verġni Marija.

Hemm forom sottili oħra taʼ idolatrija. Fis-​sena 44 E.K., is-​Sultan Erodi Agrippa ta taħdida pubblika, u n-​nies kienu tant eċċitati li huma għajtu: “Leħen taʼ alla, mhux taʼ bniedem!” (Atti 12:21, 22) Iva, għamlu lil Erodi l-​idolu tagħhom, għamluh alla tagħhom. Affarijiet simili jiġru llum. Fil-​ġranet tal-​bidu taʼ meta n-​Nażiżmu kien qed jikber fil-​qawwa fl-​Ewropa, l-​għajta “Heil Hitler!” kienet verament għajta taʼ adorazzjoni. Ħafna kienu lesti li jiġġieldu u jmutu għall-​Führer bħal li kieku kien xi alla, is-​salvatur tal-​ġens. Madankollu, ħafna minn dawk li kienu qed jagħtu dik il-​qima kienu membri tal-​knejjes tal-​Kristjaneżmu!

Qabel u wara Hitler, mexxejja oħra politiċi b’mod simili mexxew u għollew lilhom infushom bħala figuri taʼ salvaturi u talbu devozzjoni esklussiva. Dawk li qablu magħhom għamlu allat minn dawn l-​irġiel, kienet x’kienet ir-​reliġjon li kellhom dawn l-​“aduraturi” jew saħansitra jekk sostnew li kienu atei. L-​attenzjoni żejda li l-​istilel kariżmatiċi tal-​isports, l-​istilel taċ-​ċinema, u dawk fil-​qasam tad-​divertiment jirċievu mill-​‘fans’ tagħhom hija wkoll qisha qima.

Qima tal-​Flus

Kompli aħseb fuq l-​implikazzjonijiet tal-​kliem taʼ Ġesù meta qal: “Hadd ma jistaʼ jaqdi bħala rsir lil żewġ sidien; għax jew se jobgħod lil wieħed u jħobb lill-​ieħor, jew se jżomm maʼ wieħed u jistmerr lill-​ieħor. Ma tistgħux taqdu bħala rsir lil Alla u lir-​Rikkezzi.” (Mattew 6:24) Taf lil xi ħadd li hu taʼ ċerta reliġjon imma li l-​interess ewlieni tiegħu fil-​ħajja hu li jagħmel iktar flus? Lil min tabilħaqq qed jaqdi wieħed bħal dan, lil Alla jew lir-​rikkezzi? B’kemm nies li ma jemmnux taf int li nqabdu fil-​ġirja sfrenata wara l-​flus? Żgur li huma wkoll qed iqimu l-​flus, forsi iktar b’mod żeluż minn ħafna li jemmnu.

L-appostlu Pawlu spjega prinċipju simili meta kiteb: “Mewtu, għalhekk, lill-​membri taʼ ġisimkom li qegħdin fuq l-​art rigward iż-​żina, in-​nuqqas taʼ ndafa, l-​aptit sesswali, ix-​xewqa li tweġġaʼ u x-​xenqa, li hi idolatrija.” (Kolossin 3:5) Jekk aħna nixxennqu għal xi ħaġa tant bil-​qawwi li naħlu l-​isforzi kollha tagħna biex nakkwistawha, forsi saħansitra niksru l-​liġi fil-​proċess, imbagħad dik il-​ħaġa għalina tkun idolu, alla. (Efesin 5:5) F’ittra oħra, Pawlu kiteb dwar ċerti wħud li kienu qed jagħmlu affarijiet ħżiena: “Żaqqhom hija l-​alla tagħhom.” (Filippin 3:19) Jekk il-​għan kollu tagħna fil-​ħajja huwa li nogħġbu lilna nfusna, bħal li kieku nimlew żaqqna, imbagħad aħna nkunu l-​alla tagħna nfusna. Kemm taf nies li jqimu din ix-​xorta taʼ alla?

Iva, kif kiteb l-​appostlu Pawlu: “Hemm ħafna ‘allat’ u ħafna ‘mulejiet.’” U f’ħafna każi, dawk li jqimuhom huma bħas-​Samaritani tal-​qedem, billi qed jaqdu alla wieħed bi kliemhom u ieħor bl-​azzjonijiet tagħhom. Fil-​fatt, iżda, hemm Alla wieħed biss li jixraqlu l-​qima tagħna. Taf min hu? Ukoll, hemm ħaġa waħda li tgħaqqad il-​qima tal-​allat l-​oħra kollha apparti minnu. X’inhi? Se naraw fl-​artiklu li jmiss.

[Nota taʼ taħt]