X’Inhi l-​Iktar Ħaġa Importanti f’Ħajtek?

“Għarrafni t-​triq li minnha għandi ngħaddi.”—SALM 143:8.

1. Is-​Sultan Salamun x’ikkonkluda dwar l-​interessi u l-​kisbiet umani?

INT probabbilment taf bħalma jaf kulħadd li l-​ħajja mimlija attivitajiet u taħbil il-​moħħ. Meta toqgħod tqis, tistaʼ tagħraf li xi wħud minn dawn huma essenzjali. Xi attivitajiet u taħbil il-​moħħ oħrajn huma inqas importanti jew saħansitra fil-​vojt. Il-​fatt li tirrealizza dan ifisser li int fi qbil maʼ wieħed mill-​iktar irġiel għorrief li qatt għexu, is-​Sultan Salamun. Wara li rreveda bir-​reqqa l-​attivitajiet tal-​ħajja, hu kkonkluda: “Ibżaʼ minn Alla, u ħares il-​kmandamenti tiegħu: għax dan hu d-​dmir taʼ kull bniedem.” (Ekkleżjażti 2:4-9, 11; 12:13, Karm Żammit) X’sinjifikat għandu dan għalina llum?

2. Nies li għandhom il-​biżaʼ t’Alla għandhom jistaqsu lilhom infushom liema mistoqsija bażika, li twassal għal liema mistoqsijiet relatati?

² Jekk trid ‘tibżaʼ minn Alla u tħares il-​kmandamenti tiegħu,’ staqsi lilek innifsek din il-​mistoqsija sfidanti, ‘X’inhi l-​iktar ħaġa importanti f’ħajti?’ Veru, għandu mnejn ma toqgħodx taħseb kuljum fuq dik il-​mistoqsija, imma għala ma tikkunsidrahiex issa? Fil-​fatt, din tissuġġerixxi xi mistoqsijiet relatati, bħalma huma, ‘Jistaʼ jagħti l-​każ li qiegħed inpoġġi enfasi żejda fuq l-​impjieg jew il-​professjoni tiegħi jew fuq affarijiet materjali? Id-​dar, il-​familja, u l-​maħbubin tiegħi fejn jidħlu fl-​istampa?’ Żagħżugħ jistaʼ jistaqsi, ‘L-​iskola sa liema punt tokkupa l-​attenzjoni u l-​ħin tiegħi? Verament, huwa xi passatemp, l-​isport, xi għamla taʼ divertiment, jew teknoloġija l-​interess primarju tiegħi?’ U hi x’inhi l-​età jew is-​sitwazzjoni tagħna, għandna bix-​xieraq nistaqsu, ‘Li naqdi ’l Alla x’post għandu f’ħajti?’ X’aktarx li taqbel dwar il-​ħtieġa għal prijoritajiet. Imma kif u fejn nistgħu niksbu għajnuna biex nistabbiluhom b’mod għaqli?

3. Li jistabbilixxu prijoritajiet x’jinvolvi għall-​Kristjani?

³ Il-​frażi “l-​iktar ħaġa importanti” għandha s-​sens bażiku taʼ xi ħaġa li tiġi qabel kollox jew li trid tiġi kkunsidrata l-​ewwel. Kemm jekk int wieħed mix-​Xhieda taʼ Jehovah jew int fost il-​miljuni taʼ studenti sinċieri tal-​Kelma t’Alla mseħbin magħhom, ikkunsidra din il-​verità: “Kollox għandu żmienu, u kull ħaġa għandha waqtha taħt is-​sema.” (Koħèlet 3:1) Bi dritt, dan jinkludi li turi tħassib taʼ mħabba għal relazzjonijiet tal-​familja. (Kolossin 3:18-21) Jinvolvi li tipprovdi onestament għal taʼ darek permezz taʼ xogħol sekulari. (2 Tessalonikin 3:10-12; 1 Timotju 5:8) U biex tbiddel ir-​ritmu tal-​ħajja, tistaʼ tieħu ħin għal xi passatemp jew xi divertiment jew rikreazzjoni taʼ kultant. (Qabbel Mark 6:31.) Iżda jekk taħseb serjament, ma tarax int li l-​ebda wieħed minn dawn m’hu l-​iktar ħaġa importanti fil-​ħajja? Xi ħaġa oħra hija iżjed importanti.

4. Filippin 1:9, 10 kif inhu relatat maʼ li nistabbilixxu l-​prijoritajiet?

⁴ Probabbilment int tirrikonoxxi li l-​prinċipji li jiggwidaw tal-​Bibbja huma għajnuniet imprezzabbli f’li jiġu stabbiliti prijoritajiet u biex jittieħdu deċiżjonijiet għaqlin. Per eżempju, f’Filippin 1:9, 10, il-​Kristjani huma mħeġġin biex ‘joktru dejjem iżjed bil-​għerf u b’kull dehen.’ Għal liema għan? L-​appostlu Pawlu żied: “Biex tistgħu tagħrfu tagħżlu l-​aħjar.” (Korsiv tagħna.) Ma jagħmilx sens dan? Fuq il-​bażi t’għarfien eżatt, Kristjan taʼ dehen jistaʼ jiddetermina x’għandu jkun taʼ interess ewlieni​—l-​iktar ħaġa importanti—​fil-ħajja.

Mudell Li Juri X’Inhi L-​Iktar Ħaġa Importanti

5. Meta tiddeskrivi l-​mudell imħolli għall-​Kristjani, l-​Iskrittura kif turi x’kienet l-​iktar ħaġa importanti fil-​ħajja taʼ Ġesù?

⁵ Insibu aspett prezzjuż t’għarfien fil-​kliem taʼ l-​appostlu Pietru: “Għal dan intom kontu msejjħa għax Kristu wkoll bata għalikom u ħallielkom eżempju biex timxu fuq il-​passi tiegħu.” (1 Pietru 2:21) Iva, għal ħjiel dwar x’inhi l-​iktar ħaġa importanti fil-​ħajja, nistgħu neżaminaw dak li Ġesù Kristu ħaseb dwar dan. Salm 40:9 [Salm 40:8, NW] qal profetikament dwaru: “Li nagħmel ir-​rieda tiegħek. Alla tiegħi, dan jogħġobni; il-​liġi tiegħek ġewwa qalbi.” Dan hu kif hu stqarr l-​istess ħsieb: “L-​ikel tiegħi hu li nagħmel ir-​rieda taʼ min bagħatni u li nwassal fit-​tmiem l-​opra tiegħu.”—Ġwann 4:34; Lhud 12:2.

6. Kif jistaʼ jkollna l-​istess riżultati bħalma kellu Ġesù f’li jpoġġi r-​rieda t’Alla l-​ewwel?

⁶ Innota dik iċ-​ċavetta​—li jagħmel ir-​rieda t’Alla. L-​eżempju taʼ Ġesù jenfasizza dak li d-​dixxipli tiegħu għandhom bix-​xieraq jagħmlu l-​iktar ħaġa importanti f’ħajjithom, għax hu qal li “kull min itemm it-​taħriġ tiegħu jsir bħall-​imgħallem tiegħu.” (Luqa 6:40) U hekk kif Ġesù mexa fil-​mogħdija li kienet fl-​iskop taʼ Missieru, hu wera li kien hemm “il-​milja tal-​ferħ” f’li wieħed jagħmel ir-​rieda t’Alla l-​iktar ħaġa importanti. (Salm 16:11; Atti 2:28) Tara int x’jimplika dan? Hekk kif is-​segwaċi taʼ Ġesù jagħżlu li jagħmlu r-​rieda t’Alla bħala l-​iktar ħaġa importanti f’ħajjithom, se jgawdu “l-​milja tal-​ferħ” u l-​ħajja vera. (1 Timotju 6:19) Għalhekk hemm iżjed minn raġuni waħda biex il-​prijorità f’ħajjitna tkun li nagħmlu r-​rieda t’Alla.

7, 8. Ġesù liema provi ffaċċja, u x’nistgħu nitgħallmu minn dan?

⁷ Eżatt wara li Ġesù ssimbolizza l-​preżentazzjoni tiegħu nnifsu biex jagħmel ir-​rieda t’Alla, ix-​Xitan ipprova jiżvijah. Kif? B’tentazzjonijiet fi tliet oqsma. Kull darba Ġesù wieġeb f’termini Skritturali ċarissimi. (Mattew 4:1-10) Imma kien hemm iżjed provi jistennewh​—persekuzzjoni, redikolar, tradiment minn Ġuda, akkużi foloz, u mbagħad mewt fuq zokk tat-​tortura. Xorta, ebda waħda minn dawn il-​provi ma ġagħlet lill-​Iben leali t’Alla jiżvija mill-​korsa tiegħu. F’punt kritiku, Ġesù talab: “Mhux kif irrid jien, iżda kif trid int. . . . Tkun magħmula r-​rieda tiegħek.” (Mattew 26:39, 42) M’għandux kull wieħed minna jkun imqanqal profondament b’dan l-​aspett tal-​mudell imħolli għalina, billi jġagħalna ‘nitolbu bla waqfien’?—Rumani 12:12.

⁸ Iva, meta nistabbilixxu l-​prijoritajiet tagħna fil-​ħajja, gwida divina hija partikolarment t’għajnuna, speċjalment jekk niffaċċjaw għedewwa tal-​verità u opponenti tar-​rieda t’Alla. Ġib quddiem għajnejk it-​talba bi ħrara tas-​Sultan David għal gwida meta ġarrab oppożizzjoni mill-​għedewwa. Se naraw dan hekk kif nikkunsidraw biċċa minn Salm 143. Dan għandu jgħinna biex nagħrfu kif nistgħu nsaħħu r-​relazzjoni persunali tagħna maʼ Jehovah u niġu ffortifikati biex inżommu l-​għemil tar-​rieda t’Alla quddiemnett f’ħajjitna.

Jehovah Jismaʼ u Jwieġeb It-​Talb Tagħna

9. (a) Għalkemm David kien midneb, il-​kliem u l-​azzjonijiet tiegħu x’jirrivelaw? (b) Għala m’għandniex nieqfu milli nagħmlu dak li huwa sewwa?

⁹ Għalkemm bniedem midneb, David kellu fidi li Jehovah kien se jismaʼ t-​talba bi ħrara tiegħu. B’umiltà talab bil-​ħniena: “Mulej, ismaʼ t-​talba tiegħi, agħtini widen, nitolbok bil-​ħniena; weġibni minħabba l-​fedeltà u l-​ġustizzja tiegħek. Tressaqx għall-​ħaqq lill-​qaddej tiegħek, għax ebda bniedem ma hu ġust quddiemek.” (Salm 143:1, 2) David kien konxju taʼ l-​imperfezzjoni tiegħu, u madankollu qalbu kienet sħiħa m’Alla. B’hekk, kien fiduċjuż li kien se jirċievi tweġiba bi tjieba. Ma jinkuraġġiniex dan? Għalkemm nonqsu milli nagħmlu t-​tjieba t’Alla, nistgħu nkunu fiduċjużi li hu jismagħna jekk qlubna jkunu sħaħ lejh. (Koħèlet 7:20; 1 Ġwann 5:14) Fil-​waqt li nipperseveraw fit-​talb, irridu nkunu determinati li ‘nirbħu l-​ħażen bit-​tajjeb’ f’dawn il-​jiem mill-​agħar.—Rumani 12:20, 21; Ġakbu 4:7.

10. David għala kellu perijodi t’anzjetà?

¹⁰ David kellu l-​għedewwa, bħalma għandna aħna. Kemm jekk bħala wieħed maħrub minn Sawl, sforzat li jfittex refuġju f’postijiet battala u inaċċessibbli, jew bħala sultan mikdud mill-​għedewwa, David kellu l-​perijodi tiegħu t’anzjetà. Hu ddeskriva kif dan effettwah: “L-​għadu għamel għalija . . . Fid-​dlam xeħetni ngħammar . . . Ruħi tinfena minn ġewwa, qalbi titniehed ġewwa fija.” (Salm 143:3, 4) Kellek int raġuni biex tħossok bħalma ħassu hu?

11. Il-​qaddejja t’Alla taż-​żmien modern liema mumenti t’anzjetà ffaċċjaw?

¹¹ Pressjoni mill-​għedewwa, provi minħabba tbatija ekonomika qawwija, mard serju, jew xi problemi inkwetanti oħrajn wasslu lil xi wħud min-​nies t’Alla biex iħossuhom bħal li kieku se jiddispraw. Xi drabi qlubhom ukoll kienu qishom imtarrxin. Huwa bħal li kieku għajtu b’leħen għoli: “Minn għawġ kbir u qalil int għaddejtni; iżda int terġaʼ tagħtini l-​ħajja . . . erġaʼ agħtini l-​faraġ tiegħek.” (Salm 71:20, 21) Kif ġew mgħejjunin?

Kif Tiffaċċja L-​Isforzi Taʼ L-​Għadu

12. Is-​Sultan David kif issupera l-​periklu u l-​provi?

¹² Salm 143:5 jindika x’għamel David meta kien imdawwar bil-​periklu u bi provi kbar: “Niftakar fiż-​żmien l-​imgħoddi, naħseb f’kull ma int għamilt, għemil idejk dejjem fi ħsiebi.” David ġab quddiem għajnejh kif Alla kien ittratta mal-​qaddejja Tiegħu u kif hu innifsu kien esperjenza ħelsien. Immedita fuq dak li Jehovah kien għamel minħabba l-​isem kbir Tiegħu. Iva, David żamm lilu nnifsu kkonċernat dwar ix-​xogħlijiet t’Alla.

13. Meta niffaċċjaw xi provi, li nirriflettu dwar eżempji taʼ qaddejja leali taż-​żmien tal-​qedem u dak modern kif jgħinna nissaportu?

¹³ Mhux taʼ spiss ftakarna aħna dwar kif Alla jittratta mal-​poplu tiegħu? Ċertament! Dan jinkludi r-​rekord magħmul mis-​“sħaba hekk kbira taʼ xhieda” fiż-​żminijiet taʼ qabel il-​Kristjanità. (Lhud 11:32-38; 12:1) Kristjani midlukin fl-​ewwel seklu wkoll ġew inkuraġġiti biex ‘jiftakru f’dawk l-​ewwel jiem’ u dak li kienu ssaportew. (Lhud 10:32-34) Xi ngħidu dwar l-​esperjenzi tal-​qaddejja t’Alla fiż-​żminijiet moderni, bħalma huma dawk irrakkontati fil-​ktieb Jehovah’s Witnesses​—Proclaimers of God’s Kingdom?a Rakkonti ddokumentati hemmhekk u f’postijiet oħrajn jgħinuna niftakru kif Jehovah għen lin-​nies tiegħu biex jissaportu projbizzjonijiet, tfigħ fil-​ħabsijiet, attakki minn marmalji, u kampijiet taʼ konċentrament u taʼ xogħol sforzat. Kien hemm provi f’artijiet imbiċċrin bil-​gwerer, bħalma huma l-​Burundi, l-​Irwanda, il-​Liberja, u dik li qabel kienet il-​Jugoslavja. Meta dehret l-​oppożizzjoni, il-​qaddejja t’Alla ssaportew minħabba li żammew relazzjoni qawwija maʼ Jehovah. Idu wieżnet lil dawk li l-​iktar ħaġa importanti f’ħajjithom kienet li jagħmlu r-​rieda tiegħu.

14. (a) Liema hu eżempju wieħed taʼ kif Alla wieżen persuna f’sitwazzjoni li tistaʼ tkun simili għal tagħna? (b) X’tislet minn dak l-​eżempju?

¹⁴ Madankollu, int tistaʼ twieġeb li ma ġarrabt ebda abbuż brutali bħal dan, u għandek mnejn tħoss li x’aktarx li qatt ma se jiġrilek hekk. L-​appoġġ t’Alla lill-​poplu tiegħu, iżda, ma kienx dejjem f’dawk li xi wħud jistgħu jqisu bħala ċirkostanzi drammatiċi. Hu appoġġja lil ħafna individwi “kwalunkwe” f’ċirkostanzi “normali.” Hawn biss wieħed minn ħafna eżempji: The Watchtower taʼ l-​1 taʼ Diċembru, 1996 kien fih rakkont li ntqal minn Penelope Makris. X’eżempju splendidu taʼ integrità Kristjana! Tistaʼ tiftakar dak li ssaportiet mill-​ġirien, kif hi ġġieldet kontra nuqqas serju taʼ saħħa, u xi sforzi għamlet biex tibqaʼ fil-​ministeru full-time? Xi ngħidu dwar l-​esperjenza premjanti tagħha f’Mytilene? Il-​punt hu, Tqis int eżempji bħal dawn bħala għajnuniet għalina lkoll f’li nistabbilixxu prijoritajiet, billi l-​għemil tar-​rieda t’Alla npoġġuh l-​ewwel f’ħajjitna?

15. Liema huma xi ftit mill-​atti taʼ Jehovah li għandna nimmeditaw fuqhom?

¹⁵ Isaħħaħna li nimmeditaw fuq l-​attivitajiet taʼ Jehovah, bħalma għamel David. Fit-​twettiq taʼ l-​iskop tiegħu, Jehovah għamel provvediment għal salvazzjoni permezz tal-​mewt, l-​irxoxt, u l-​glorifikazzjoni taʼ Ibnu. (1 Timotju 3:16) Hu stabbilixxa s-​Saltna tiegħu tas-​sema, naddaf is-​smewwiet minn Satana u d-​demonji tiegħu, u rrestawra l-​qima vera hawn fuq l-​art. (Apokalissi 12:7-12) Bena ġenna spiritwali u bierek lill-​poplu tiegħu b’żjieda. (Isaija 35:1-10; 60:22) In-​nies tiegħu issa qegħdin jagħtu xiehda finali qabel ma tfaqqaʼ t-​tribulazzjoni l-​kbira. (Apokalissi 14:6, 7) Iva, għandna ħafna fuqiex nimmeditaw.

16. Dwar liema ħaġa niġu inkuraġġiti li nkunu kkonċernati, u dan x’se jimpressjona fina?

¹⁶ Li nżommu lilna nfusna kkonċernati fuq ix-​xogħol taʼ jdejn Alla minflok ma nsiru preokkupati bl-​isforzi umani jimpressjona fuqna l-​fatt li l-​qawwa applikata taʼ Jehovah hija irreżistibbli. Dawk ix-​xogħlijiet, iżda, m’humiex limitati għax-​xogħlijiet fiżiċi taʼ l-​għaġeb taʼ ħolqien fis-​smewwiet u hawn fuq l-​art. (Ġob 37:14; Salm 19:2 [Salm 19:1, NW]; Salm 104:24) Ix-​xogħlijiet taʼ l-​għaġeb tiegħu jinkludu atti taʼ ħelsien għall-​poplu tiegħu minn għedewwa oppressivi, kif intwera mill-​esperjenzi tal-​poplu magħżul tiegħu tal-​qedem.—Eżodu 14:31; 15:6.

Nagħrfu T-​Triq Li Minnha Għandna Nimxu

17. Jehovah kemm kien reali għal David, u kif nistgħu nkunu rassigurati b’dan?

¹⁷ David talab għall-​għajnuna li ma jmurx jinxef l-​ilma tal-​ħajja minn ġo fih: “Lejk immidd idejja, ruħi bħal art bil-​għatx tixtieqek. Fittex weġibni, Mulej! Ruħi tinsab bla saħħa. La taħbix wiċċek minni, li ma nkunx bħal min nieżel għall-​qabar.” (Salm 143:6, 7) David, midneb, kien jaf li Alla kien konxju tas-​sitwazzjoni tiegħu. (Salm 31:8 [Salm 31:7, NW]) Xi drabi aħna wkoll forsi nħossuna li l-​ispiritwalità tagħna naqset ħafna. Imma s-​sitwazzjoni m’hijiex bla tama. Jehovah, li jismaʼ t-​talb tagħna, għandu mnejn jgħaġġel ir-​restawr tagħna billi jirrifreskana permezz t’anzjani taʼ mħabba, artikli fit-​Torri Taʼ L-​Għassa, jew partijiet fil-​laqgħat li donnhom imfasslin eżatt għalina.—Isaija 32:1, 2.

18, 19. (a) X’għandha tkun it-​talba ħerqana tagħna lil Jehovah? (b) Dwar liema ħaġa nistgħu nkunu żguri?

¹⁸ Il-​fiduċja tagħna f’Jehovah tqanqalna biex nitolbuh: “Fakkarni mas-​sebħ fi tjubitek, għax fik jien nittama. Għarrafni t-​triq li minnha għandi ngħaddi.” (Salm 143:8) Naqas hu lil Oħtna Makris, li kienet iżolata fuq gżira Griega? Mela sejjer jonqos lilek hekk kif tpoġġi l-​għemil tar-​rieda tiegħu l-​iktar ħaġa importanti f’ħajtek? Ix-​Xitan u l-​aġenti tiegħu kieku jixtiequ jfixklu jew iwaqqfu kompletament lix-​xogħol tagħna taʼ pproklamar tas-​Saltna t’Alla. Kemm jekk naqdu f’artijiet fejn il-​vera qima hija ġeneralment permessa jew jekk naqdu fejn hi miżmuma, it-​talb magħqud tagħna huwa f’armonija mal-​petizzjoni taʼ David: “Eħlisni mill-​għedewwa, Mulej, għax inti l-​kenn tiegħi.” (Salm 143:9) Is-​sigurtà tagħna kontra l-​gwaj spiritwali tinsab f’li aħna ngħammru fil-​post sigriet taʼ l-​Iktar Għoli.—Salm 91:1.

¹⁹ Il-​konvinzjoni tagħna dwar x’inhi l-​iktar ħaġa importanti hija bbażata fis-​sod. (Rumani 12:1, 2) Irreżisti, allura, l-​isforzi tad-​dinja biex timponi fuqek dak li hi taħseb li huwa importanti fl-​iskema umana t’affarijiet. Kompli ħalli lil kull aspett taʼ ħajtek jirrifletti dak li taf li hu l-​iktar ħaġa importanti—li tagħmel ir-​rieda t’Alla.—Mattew 6:10; 7:21.

20. (a) X’tgħallimna dwar David f’Salm 143:1-9? (b) Il-​Kristjani llum kif jirriflettu l-​ispirtu taʼ David?

²⁰ L-​ewwel disaʼ versi taʼ Salm 143 jenfasizzaw ir-​relazzjoni persunali intima taʼ David maʼ Jehovah. Meta kien imdawwar bl-​għedewwa, liberament talab bil-​ħniena lil Alla għall-​gwida. Hu ferraʼ qalbu, billi fittex l-​għajnuna rigward it-​triq xierqa li minnha kellu jimxi. Huwa simili llum mal-​fdal taʼ wħud midlukin bl-​ispirtu fuq l-​art u għal sħabhom. Huma jqisu r-​relazzjoni tagħhom maʼ Jehovah bħala prezzjuża hekk kif jitolbuh għall-​gwida. Iżommu quddiemnett l-​għemil tar-​rieda t’Alla, minkejja l-​pressjonijiet mix-​Xitan u d-​dinja.

21. Għala huwa importanti għalina li nagħtu eżempju tajjeb jekk irridu ngħallmu lil oħrajn x’għandha tkun l-​iktar ħaġa importanti f’ħajjithom?

²¹ Miljuni li qegħdin jistudjaw il-​Bibbja max-​Xhieda taʼ Jehovah jeħtieġu li jirrikonoxxu li l-​għemil tar-​rieda t’Alla huwa l-​iktar ħaġa importanti. Nistgħu ngħinuhom jifhmu dan meta niddiskutu kapitlu 13 tal-​ktieb Għarfien Li Jwassal Għall-​Ħajja Taʼ Dejjem, li jenfasizza prinċipji involuti f’li nkunu ubbidjenti lejn il-​Kelma.b M’għandniex xi ngħidu, għandhom jaraw eżemplifikat fina dak li qegħdin ngħallmu lilhom. Wara relattivament perijodu qasir taʼ żmien, huma wkoll se jaslu biex jagħrfu t-​triq li minnha għandhom jimxu. Hekk kif dawn il-​miljuni personalment jindunaw x’għandu jkun taʼ l-​akbar importanza f’ħajjithom, ħafna se jiġu mqanqlin biex jieħdu l-​passi taʼ dedikazzjoni u magħmudija. Wara dan, il-​kongregazzjoni tistaʼ tgħinhom biex jibqgħu jimxu fit-​triq tal-​ħajja.

22. Liema mistoqsijiet se jiġu kkunsidrati fl-​artiklu li jmiss?

²² Ħafna jirrikonoxxu bla tlaqliq li r-​rieda t’Alla għandha tkun taʼ importanza massima f’ħajjithom. Iżda, Jehovah kif jgħallem progressivament lill-​qaddejja tiegħu biex jagħmlu r-​rieda tiegħu? X’benefiċċji jġibilhom dan? Dawn il-​mistoqsijiet se jiġu kkunsidrati, flimkien maʼ diskussjoni taʼ vers prinċipali, Salm 143:10, fl-​artiklu li jmiss. (w96 12/15)

[Noti taʼ taħt]

X’Inhi T-​Tweġiba Tiegħek?

◻ Billi napplikaw Filippin 1:9, 10, kif nistgħu nistabbilixxu l-​prijoritajiet?

◻ Ġesù kif wera x’kienet l-​iktar ħaġa importanti f’ħajtu?

◻ X’nistgħu nitgħallmu mill-​azzjonijiet taʼ David meta kien taħt prova?

◻ Salm 143:1-9 b’liema mod jgħinna llum?

◻ X’għandha tkun l-​iktar ħaġa importanti f’ħajjitna?

[Stampa f’paġna 6]

L-​azzjonijiet taʼ David taw prova taʼ kemm kien jistrieħ fuq Jehovah

[Sors]

Riprodott minn Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s