Nitgħallmu Nsibu Tgawdija fil-​Biżaʼ taʼ Jehovah

“Ejjew, ulied, agħtuni widen; il-​biżaʼ taʼ Jehovah huwa dak li se ngħallimkom.”—SALM 34:11.

1. Il-​biżaʼ kif se jiġi mneħħi permezz tas-​Saltna t’Alla, imma jfisser dak kull xorta taʼ biżaʼ?

IN-​NIES kullimkien jixxennqu għal libertà mill-​biżaʼ​—biżaʼ mill-​kriminalità u l-​vjolenza, biżaʼ mill-​qagħad, biżaʼ minn mard serju. X’jum grandjuż se jkun dak meta dik il-​libertà ssir realtà taħt is-Saltna t’Alla! (Isaija 33:24; 65:21-23; Mikea 4:4) Madankollu, mhux il-​biżaʼ kollu se jiġi mneħħi dak in-​nhar, lanqas m’għandna nipprovaw inneħħu kull biżaʼ mill-​ħajjiet tagħna issa. Hemm biżaʼ li huwa tajjeb u biżaʼ li huwa ħażin.

2. (a) Liema xorta taʼ biżaʼ huwa ħażin, u liema tip huwa taʼ min jixtiequ? (b) X’inhu l-​biżaʼ t’Alla, u l-​iskritturi ċċitati kif jindikawh dak?

² Il-​biżaʼ jistaʼ jkun velenu mentali, billi jipparalizza l-​abbiltà taʼ dak li jkun biex jirraġuna. Jistaʼ jmermer il-​kuraġġ u jeqred it-​tama. Biżaʼ bħal dan jistaʼ jkun esperjenzat minn xi ħadd li jkun mhedded fiżikament minn xi għadu. (Ġeremija 51:30) Jistaʼ jiġi esperjenzat minn xi ħadd li jagħti importanza żejda għal li jkollu l-​approvazzjoni taʼ ċerti bnedmin influwenti. (Proverbji 29:25) Imma hemm ukoll biżaʼ li huwa edifikanti, it-​tip li jżommna lura milli nagħmlu xi ħaġa kif ġie ġie, milli nagħmlu d-​deni lilna nfusna. Il-​biżaʼ t’Alla jinkludi saħansitra iktar minn hekk. Huwa stagħġib b’rispett lejn Jehovah, reverenza profonda lejh, flimkien maʼ tkexkix edifikanti li ma nogħġbuhx. (Salm 89:7) Dan il-​biżaʼ li nqanqlu d-​dispjaċir t’Alla jinbet minn apprezzament għall-​qalb tajba bl-​imħabba u għat-​tjubija tiegħu. (Salm 5:7; Ħosea 3:5) Jinkludi wkoll li wieħed ikun konxju li Jehovah hu l-​Imħallef Suprem u Dak li jistaʼ kollox, li għandu l-​qawwa li jagħti l-​kastig, saħansitra l-​mewt, lil dawk li jirrifjutaw li jobduh.—Rumani 14:10-12.

3. Il-​biżaʼ taʼ Jehovah kif inhu f’kuntrast maʼ dak assoċjat maʼ xi wħud mill-​allat pagani?

³ Il-​biżaʼ t’Alla huwa edifikanti, mhux tal-​waħx. Dan iqanqal lil dak li jkun biex ikun sod għal dak li huwa sewwa, bla ma jagħmel kompromess billi jagħmel il-​ħażin. M’huwiex bħall-​biżaʼ assoċjat maʼ l-​alla Grieg Fobos tal-​qedem li huwa deskritt bħala alla tal-​waħx li kien jispira t-​terrur. U m’huwiex bħal dak il-​biżaʼ assoċjat maʼ l-​alla mara tal-​Ħindu Kali, li xi drabi jpinġuha bħala li hija għatxana għad-​demm, billi tuża katavri, sriep, u rjus tal-​mejtin bħala ornamenti. Il-​biżaʼ t’Alla jattira; mhux ibiegħed. Huwa minsuġ b’imħabba u apprezzament. B’hekk, il-​biżaʼ t’Alla jressaqna lejn Jehovah.—Dewteronomju 10:12, 13; Salm 2:11.

Għala Xi Wħud Għandhom u Xi Wħud M’Għandhomx

4. Bħalma huwa muri mill-​appostlu Pawlu, f’liema kundizzjoni waslet l-​umanità, u x’inhu l-​kaġun taʼ dan?

⁴ L-​umanità inġenerali m’hijiex immotivata mill-​kwalità tal-​biżaʼ t’Alla. F’Rumani 3:9-18, l-​appostlu Pawlu jiddeskrivi kemm il-​bnedmin tbiegħdu mill-​perfezzjoni oriġinali. Wara li stqarr li kulħadd huwa ddominat mid-​dnub, Pawlu jikkwota mis-​Salmi, billi jgħid: “M’hemmx bniedem twajjeb, lanqas saħansitra wieħed.” (Ara Salm 14:1.) Imbagħad jipprovdi dettalji billi jsemmi affarijiet bħalma huma n-​negliġenza tal-​bnedmin fit-​tfittxija għal Alla, in-​nuqqas taʼ qalb tajba tagħhom, il-​kliem qarrieq tagħhom, id-​dagħa, u t-​tixrid taʼ demm. Dak kemm jiddeskriviha tajjeb lid-​dinja tal-​lum! Il-​maġġoranza tan-​nies m’għandhom ebda interess f’Alla u fl-​iskopijiet tiegħu. Kwalunkwe turija taʼ qalb tajba hija, taʼ spiss, merfugħa għal okkażjonijiet meta jkun hemm xi ħaġa li wieħed jistaʼ jiggwadanja biha. Il-​gideb u l-​kliem oxxen huma komuni. It-​tixrid taʼ demm huwa muri mhux biss fl-​aħbarijiet imma wkoll fid-​divertiment. X’inhi r-​raġuni għal sitwazzjoni bħal din? Huwa veru li aħna lkoll dixxendenti tal-​midneb Adam, imma meta n-​nies jadottaw bħala l-​mod taʼ ħajja tagħhom l-​affarijiet deskritti mill-​appostlu Pawlu, xi ħaġa iktar minn hekk hija involuta. Vers 18 jispjega x’inhi, billi jgħid: “M’hemm ebda biżaʼ t’Alla quddiem għajnejhom.”—Ara Salm 36:1.

5. Xi nies għala għandhom il-​biżaʼ t’Alla, waqt li oħrajn m’għandhomx?

⁵ Għala huwa, iżda, li xi nies għandhom il-​biżaʼ t’Alla waqt li oħrajn m’għandhomx? Sempliċement, dan huwa għaliex xi nies jikkultivawh, waqt li oħrajn le. Ħadd minna ma jitwieled bih, imma lkoll kemm aħna għandna l-​kapaċità għalih. Il-​biżaʼ t’Alla huwa xi ħaġa li rridu nitgħallmu. Imbagħad, biex dan ikun forza qawwija li timmotivana f’ħajjietna, għandna bżonn nikkultivawh.

Stedina Attraenti

6. Min jestendilna l-​istedina mniżżla f’Salm 34:11, u dan it-​test kif juri li wieħed irid jitgħallem il-​biżaʼ t’Alla?

⁶ Stedina attraenti biex nitgħallmu l-​biżaʼ taʼ Jehovah hija estiża lilna f’Salm 34. Dan huwa salm taʼ David. U David lil min iffigura bil-​quddiem? Ħadd ħlief il-​Mulej Ġesù Kristu. Profezija li l-​appostlu Ġwanni applika speċifikament għal Ġesù hija mniżżla fil-​vers 20 taʼ dan is-​salm. (Ġwann 19:36) Fi żmienna, Ġesù hu l-​wieħed li jestendi stedina bħal dik fil-​vers 11: “Ejjew, ulied, agħtuni widen; il-​biżaʼ taʼ Jehovah huwa dak li se ngħallimkom.” Dan juri b’mod ċar li l-​biżaʼ t’Alla hija xi ħaġa li wieħed jistaʼ jitgħallimha, u Ġesù Kristu huwa kkwalifikat b’mod eċċellenti biex jgħallimna. Dak għala?

7. Ġesù għala hu b’mod speċjali wieħed li minnu nitgħallmu l-​biżaʼ t’Alla?

⁷ Ġesù Kristu jaf l-​importanza tal-​biżaʼ t’Alla. Ebrej 5:7 jgħid dwaru: “Fil-​jiem tal-​laħam tiegħu Kristu offra tħannin u wkoll petizzjonijiet lill-​Wieħed li setaʼ jsalvah mill-​mewt, b’agħjat qawwi u dmugħ, u kien mismugħ b’favur minħabba l-​biżaʼ tiegħu minn Alla.” Biżaʼ t’Alla bħal dak kien kwalità li Ġesù Kristu wera saħansitra qabel ma ġie kkonfrontat bil-​mewt fuq zokk tat-​tortura. Ftakar, fi Proverbji kapitlu 8, l-​Iben t’Alla hu deskritt bħala l-​personifikazzjoni taʼ l-​għerf. U fi Proverbji 9:10, jintqalilna: “Il-​biżaʼ taʼ Jehovah huwa l-​bidu taʼ l-​għerf.” Mela dan il-​biżaʼ t’Alla kien parti fundamentali mill-​personalità taʼ l-​Iben t’Alla ferm qabel ma ġie fuq l-​art.

8. F’Isaija 11:2, 3, x’nitgħallmu dwar il-​biżaʼ taʼ Jehovah?

⁸ Barra minn hekk, rigward Ġesù bħala Sultan Messjaniku, Isaija 11:​2, 3 jistqarr: “Fuqu l-​ispirtu taʼ Jehovah irid jistrieħ, l-​ispirtu t’għerf u taʼ fehma, l-​ispirtu taʼ parir u taʼ setgħa, l-​ispirtu t’għarfien u tal-​biżaʼ taʼ Jehovah; u se jkun hemm tgawdija bih fil-​biżaʼ taʼ Jehovah.” Kemm huwa espress b’mod sabiħ! Il-​biżaʼ taʼ Jehovah m’huwiex xi ħaġa spjaċevoli. Huwa pożittiv u kostruttiv. Huwa kwalità li se tkun mifruxa mad-​dominju kollu li fuqu Kristu jaħkem bħala Sultan. Hu qiegħed jaħkem issa, u lil dawk kollha li qegħdin jiġu miġburin bħala s-​sudditi tiegħu, qed jagħtihom struzzjoni fil-​biżaʼ taʼ Jehovah. Kif?

9. Ġesù Kristu kif qiegħed jgħallimna l-​biżaʼ taʼ Jehovah, u xi jridna nitgħallmu dwar dan?

⁹ Permezz tal-​laqgħat tagħna tal-​kongregazzjoni, taʼ l-​assembleat, u konvenzjonijiet, Ġesù, bħala Kap maħtur tal-​kongregazzjoni u bħala s-​Sultan Messjaniku, jgħinna nifhmu ċar u tond x’inhu l-​biżaʼ t’Alla u għala huwa tant taʼ benefiċċju. B’hekk jagħmel ħiltu biex ikabbrilna l-​apprezzament tagħna għal dan sabiex nitgħallmu nsibu l-​għaxqa fil-​biżaʼ taʼ Jehovah sewwa sew bħalma jagħmel hu.

Se Tagħmel Int L-​Isforz?

10. Meta nattendu għal-​laqgħat Kristjani, xi rridu nagħmlu jekk irridu nifhmu l-​biżaʼ taʼ Jehovah?

¹⁰ M’għandniex xi ngħidu, li sempliċement naqraw il-​Bibbja jew nattendu l-​laqgħat f’Sala tas-​Saltna m’huwiex garanzija li se jkollna l-​biżaʼ t’Alla. Innota dak li għandna bżonn nagħmlu jekk tassew irridu nifhmu l-​biżaʼ taʼ Jehovah. Proverbji 2:1-5 jgħid: “Ibni, jekk se tirċievi l-​qwiel tiegħi u taħżen bħal teżor il-​kmandamenti tiegħi stess miegħek innifsek, sabiex toqgħod attent għall-​għerf b’widintek, biex tistaʼ tmejjel lil qalbek lejn id-​dehen; jekk, barra minn hekk, issejjaħ għall-​fehma nfisha u tagħti leħnek għad-​dehen innifsu, jekk tibqaʼ tfittex għalih bħal li kieku għall-​fidda, u bħal li kieku għal teżori moħbijin tibqaʼ tfittex għalih, f’dak il-​każ se tifhem il-​biżaʼ taʼ Jehovah, u se ssib l-​istess għarfien t’Alla.” Mela, meta nattendu l-​laqgħat, għandna bżonn nagħtu attenzjoni lejn dak li jkun qed jintqal, nagħmlu sforz ħerqan biex nikkonċentraw fuq u niftakru l-​ħsibijiet prinċipali, naħsbu fil-​fond dwar kif il-​mod kif inħossuna dwar Jehovah għandu jinfluwenza l-​attitudni tagħna lejn il-​parir mogħti​—iva, niftħu qlubna. Imbagħad se nifhmu l-​biżaʼ taʼ Jehovah.

11. Biex nikkultivaw il-​biżaʼ t’Alla, x’għandna nagħmlu bis-​serjetà u taʼ spiss?

¹¹ Salm 86:11 jiġbed l-​attenzjoni lejn fattur importanti ieħor, dak tat-​talb. “Istruwini, O Jehovah, dwar il-​mogħdija tiegħek. Jien se nimxi fil-​verità tiegħek,” talab is-​salmista. “Għaqqad lil qalbi biex nibżaʼ minn ismek.” Jehovah approva dik it-​talba, għax ġegħilha tkun iddokumentata fil-​Bibbja. Biex nikkultivaw il-​biżaʼ t’Alla, aħna wkoll neħtieġu li nitolbu lil Jehovah għall-​għajnuna tiegħu, u se nibbenefikaw billi nitolbu bis-​serjetà u taʼ spiss.—Luqa 18:1-8.

Qalbek Hija Involuta

12. Il-​qalb għala trid tingħata attenzjoni speċjali, u dak x’jinkludi?

¹² Hemm xi ħaġa oħra li għandna ninnotaw f’Salm 86:11. Is-​salmista ma kienx qed jitlob sempliċement għal fehma intellettwali tal-​biżaʼ t’Alla. Hu jsemmi lil qalbu. L-​ikkultivar tal-​biżaʼ t’Alla jinvolvi l-​qalb figurattiva, li tirrikjedi attenzjoni speċjali minħabba li hija l-​persuna ġewwinija manifestata fl-​attivitajiet kollha tagħna tal-​ħajja u tinkludi l-​ħsibijiet tagħna, l-​attitudnijiet tagħna, ix-​xewqat tagħna, il-​motivazzjonijiet tagħna, il-​miri tagħna.

13. (a) X’jistaʼ jindika li l-​qalb taʼ persuna tkun maqsuma? (b) Hekk kif nikkultivaw il-​biżaʼ t’Alla, lejn liema mira għandna naħdmu?

¹³ Il-​Bibbja twissina li l-​qalb tal-​persuna tistaʼ tkun maqsuma. Tistaʼ tkun qarrieqa. (Salm 12:2; Ġeremija 17:9) Tistaʼ timmotivana biex nieħdu sehem f’attivitajiet edifikanti​—li mmorru għal-​laqgħat tal-​kongregazzjoni u fil-​ministeru taʼ l-​għalqa—​imma tistaʼ wkoll tħobb ċerti aspetti tal-​mod taʼ ħajja tad-​dinja. Dan jistaʼ jżommna lura milli nkunu verament b’ruħ sħiħa f’li nippromwovu l-​interessi tas-​Saltna. Imbagħad il-​qalb qarrieqa tistaʼ tipprova tipperswadina li, wara kollox, aħna qegħdin nagħmlu daqs ħafna oħrajn. Jew għandu mnejn li fl-​iskola jew fuq il-​post tax-​xogħol sekulari, il-​qalb tistaʼ tkun influwenzata mill-​biżaʼ tal-​bniedem. Bħala riżultat, f’dawk l-​ambjenti nistgħu noqogħdu naħsbuha biex nidentifikaw lilna nfusna bħala Xhieda taʼ Jehovah u għandna mnejn saħansitra nagħmlu affarijiet li m’humiex xierqa għal Kristjani. Wara, madankollu, il-​kuxjenza tagħna tniggiżna. Dik m’hijiex ix-​xorta taʼ persuna li rridu nkunu. Mas-​salmista, għalhekk, nitolbu lil Jehovah: “Għaqqad lil qalbi biex nibżaʼ minn ismek.” Aħna rridu l-​persuna ġewwinija kollha kemm hi, kif murija fl-​attivitajiet kollha tagħna tal-​ħajja, li tagħti evidenza li aħna ‘nibżgħu minn dak Alla veru u nżommu l-​kmandamenti tiegħu.’—Ekkleżjasti 12:13.

14, 15. (a) Meta bassar l-​irrestawrar taʼ Iżrael mill-​iskjavitù f’Babilonja, Jehovah x’wiegħed li jagħti lill-​poplu tiegħu? (b) Jehovah x’għamel f’dak li kellu x’jaqsam maʼ li jħawwel il-​biżaʼ t’Alla fi qlub il-​poplu tiegħu? (ċ) Iżrael għala dar lil hinn mill-​mogħdijiet taʼ Jehovah?

¹⁴ Jehovah wiegħed li kellu jagħti qalb li tibżaʼ minn Alla bħal din lill-​poplu tiegħu. Hu bassar ir-​restawrazzjoni taʼ Iżrael u qal, bħalma naqraw f’Ġeremija 32:37-39: “Se nġibhom lura lejn dan il-​post u nġegħilhom jgħammru fis-​sigurtà. U ċertament li se jsiru l-​poplu tiegħi, u jien innifsi se nsir dak Alla tagħhom. U se nagħtihom qalb waħda u mogħdija waħda sabiex jibżgħu minni dejjem, għall-​ġid lilhom u lil uliedhom warajhom.” Fil-​vers 40, il-​wegħda t’Alla hija msaħħa: “[I]l-biżaʼ minni se nqiegħed f’qalbhom sabiex ma jdurux lil hinn minni.” Fis-​sena 537 Q.E.K., Jehovah tassew li ġabhom lura lejn Ġerusalemm bħalma kien wiegħed. Imma xi ngħidu għall-​bqija taʼ dik il-​wegħda​—li kellu jagħtihom ‘qalb waħda sabiex jibżgħu minnu dejjem’? Il-​ġens tal-​qedem taʼ Iżrael għala dar lil hinn minn Jehovah wara li kien ġabhom lura minn Babilonja, bir-​riżultat li t-​tempju tagħhom ġie meqrud fis-​sena 70 E.K., biex qatt iżjed ma jerġaʼ jinbena?

¹⁵ Dan ma kienx dovut għal xi nuqqas min-​naħa taʼ Jehovah. Jehovah ħa, tabilħaqq, passi biex iqiegħed il-​biżaʼ t’Alla fi qlub il-​poplu tiegħu. Bil-​ħniena li wera f’li jeħlishom minn Babilonja u jirrestawrahom ġo art twelidhom, hu tahom kull raġuni biex iqisuh b’reverenza profonda. Alla saħħaħ dak kollu bi tfakkiriet, pariri, u ċanfir permezz tal-​profeti Ħaggaj, Żakkarija, u Malakija; minn Eżra, li kien mibgħut lilhom bħala għalliem; permezz tal-​Gvernatur Neħemija; u permezz taʼ l-​Iben innifsu t’Alla stess. Kultant in-​nies taw widen. Għamlu hekk meta bnew mill-​ġdid it-​tempju taʼ Jehovah għat-​tħeġġiġ taʼ Ħaggaj u Żakkarija u meta keċċew lil nisa barranin fi żmien Eżra. (Eżra 5:1, 2; 10:1-4) Imma iktar spiss m’obdewx. Ma kinux konsistenti dwar li jagħtu attenzjoni; ma komplewx ikunu lesti li jaċċettaw il-​pariri; ma ħallewx lil qlubhom miftuħin. L-​Iżraeliti ma kinux qegħdin jikkultivaw il-​biżaʼ t’Alla, u bħala riżultat, dan ma kienx forza qawwija li timmotivahom f’ħajjiethom.—Malakija 1:6; Mattew 15:7, 8.

16. Jehovah fil-​qlub taʼ min ħawwel il-​biżaʼ t’Alla?

¹⁶ Madankollu, il-​wegħda taʼ Jehovah li jqiegħed il-​biżaʼ t’Alla fil-​qlub tal-​poplu tiegħu ma fallietx. Hu għamel patt ġdid maʼ Iżrael spiritwali, dawk il-​Kristjani li quddiemhom poġġa tama għas-​sema. (Ġeremija 31:33; Galatin 6:16) Fl-​1919, Alla rrestawrahom mill-​jasar taʼ Babilonja l-​Kbira, l-​imperu dinji taʼ reliġjon falza. Fi qlubhom ħawwel b’mod sod il-​biżaʼ minnu. Dan ġab benefiċċji għonja lilhom u lill-​“folla kbira,” li għandhom it-​tama taʼ ħajja bħala sudditi fuq l-​art tas-​Saltna. (Ġeremija 32:39; Rivelazzjoni 7:9) Il-​biżaʼ taʼ Jehovah ġie li jkun fi qlubhom ukoll.

Kif Il-​Biżaʼ T’Alla Jiġi Mħawwel Fi Qlubna

17. Jehovah kif poġġa l-​biżaʼ t’Alla fi qlubna?

¹⁷ Jehovah kif ħawwel dan il-​biżaʼ t’Alla fi qlubna? Permezz tal-​ħidma taʼ l-​ispirtu tiegħu. U x’għandna aħna li huwa prodott taʼ l-​ispirtu qaddis? Il-​Bibbja, il-​Kelma mnebbħa t’Alla. (2 Timotew 3:16, 17) B’dak li għamel fil-​passat, bil-​modi li bihom jittratta mal-​qaddejja tiegħu issa bi twettieq tal-​Kelma profetika tiegħu, u permezz tal-​profeziji dwar affarijiet li għad iridu jiġu, Jehovah jipprovdi bażi soda għalina lkoll biex niżviluppaw il-​biżaʼ t’Alla.—Ġożwè 24:2-15; Ebrej 10:30, 31.

18, 19. Il-​konvenzjonijiet, l-​assembleat, u l-​laqgħat tal-​kongregazzjoni kif jgħinuna biex nakkwistaw il-​biżaʼ t’Alla?

¹⁸ Taʼ min jinnota li, bħalma huwa msemmi f’Dewteronomju 4:10, Jehovah qal lil Mosè: “Ikkongrega lin-​nies flimkien lejja biex inkun nistaʼ nħallihom jisimgħu kliemi, biex ikunu jistgħu jitgħallmu jibżgħu minni l-​jiem kollha li huma ħajjin fuq il-​ħamrija u biex ikunu jistgħu jgħallmu lil uliedhom.” B’mod simili llum, Jehovah għamel provvedimenti abbundanti biex jgħin lill-​poplu tiegħu jitgħallem jibżaʼ minnu. F’konvenzjonijiet, assembleat, u laqgħat tal-​kongregazzjoni, aħna nirrakkontaw l-​evidenza tal-​qalb tajba b’imħabba taʼ Jehovah u t-​tjubija tiegħu. Dak li konna qegħdin nagħmlu meta konna qegħdin nistudjaw il-​ktieb L-​Aqwa Bniedem Li Qatt Għex. Dak l-​istudju kif effettwa lilek u l-​attitudni tiegħek lejn Jehovah? Hekk kif int rajt id-​diversi kwalitajiet tal-​personalità grandjuża taʼ Missierna tas-​sema riflessi f’Ibnu, ma saħħaħx dan ix-​xewqa tiegħek biex qatt ma tkun taʼ dispjaċir għal Alla?—Kolossin 1:15.

¹⁹ Fil-​laqgħat tagħna, nistudjaw ukoll rakkonti taʼ kif Jehovah ħeles lill-​poplu tiegħu fil-​passat. (2 Samwel 7:23) Hekk kif nistudjaw il-​ktieb Bibliku taʼ Rivelazzjoni bil-​għajnuna tal-​ktieb Revelation​—Its Grand Climax At Hand!, insiru nafu dwar viżjonijiet profetiċi li diġà twettqu f’dan is-​seklu 20 u dwar ġrajjiet oħrajn li jnisslu l-​biżaʼ li għad iridu jiġu. Rigward l-​atti t’Alla kollha bħal dawn, Salm 66:5 jistqarr: “Ejjew u araw l-​attivitajiet t’Alla. L-​aġir tiegħu maʼ wlied il-​bnedmin jispira l-​biżaʼ.” Iva, jekk inħarsu lejhom b’ħarsa xierqa, dawn l-​atti t’Alla jħawlu fi qlubna biżaʼ taʼ Jehovah, reverenza profonda. B’hekk nistgħu naraw kif Alla Jehovah iwettaq il-​wegħda tiegħu: “[I]l-biżaʼ minni se nqiegħed f’qalbhom sabiex ma jdurux lil hinn minni.”—Ġeremija 32:40.

20. Sabiex il-​biżaʼ t’Alla jsir imħawwel profondament fi qlubna, x’inhu meħtieġ min-​naħa tagħna?

²⁰ Huwa evidenti, madankollu, li l-​biżaʼ t’Alla ma jiġix li jkun fi qlubna mingħajr sforz min-​naħa tagħna. Ir-​riżultati ma jiġux awtomatikament. Jehovah jagħmel il-​parti tiegħu. Aħna rridu nagħmlu tagħna billi nikkultivaw il-​biżaʼ t’Alla. (Dewteronomju 5:29) Iżrael naturali naqsu li jagħmlu dak. Imma billi jistrieħu fuq Jehovah, Iżraeliti spiritwali u sħabhom diġà qegħdin jesperjenzaw ħafna mill-​benefiċċji li jiġu lil dawk li jibżgħu minn Alla. Se nikkunsidraw xi wħud minn dawn il-​benefiċċji fl-​artiklu li jmiss. (w95 3/15)

Kif Twieġeb Int?

◻ X’inhu l-​biżaʼ t’Alla?

◻ Aħna kif qegħdin niġu mgħallmin biex insibu tgawdija fil-​biżaʼ taʼ Jehovah?

◻ Biex ikollna l-​biżaʼ t’Alla, liema sforz huwa meħtieġ min-​naħa tagħna?

◻ Li nakkwistaw il-​biżaʼ t’Alla għala jinvolvi l-​aspetti kollha tal-​qalb figurattiva tagħna?

[Stampi f’paġni 10, 11]

Studju diliġenti huwa meħtieġ biex wieħed jifhem il-​biżaʼ taʼ Jehovah