In-​Ngħaġ taʼ Jehovah Jeħtieġu Attenzjoni Tenera

“Kunu afu li Jaħweh hu Alla. . . . Aħna l-​poplu tiegħu u n-​ngħaġ tal-​mergħa tiegħu.”—SALM 100:3.

1. Jehovah kif jittratta lill-​qaddejja tiegħu?

JEHOVAH hu r-​Ragħaj il-​Kbir. Jekk aħna l-​qaddejja tiegħu, hu jqisna bħala n-​ngħaġ tiegħu u jagħtina attenzjoni tenera. Missierna tas-​sema jfarraġna u jirrifreskana u jmexxina “fit-​triq tas-​sewwa minħabba l-​isem tiegħu.” (Salm 23:1-4) Ir-​Ragħaj mill-​Aħjar, Ġesù Kristu, tant iħobbna li ċeda ruħu għalina.—Ġwann 10:7-15.

2. In-​nies t’Alla f’liema kundizzjoni jsibu lilhom infushom?

² Bħala wħud li nirċievu attenzjoni tenera, nistgħu ngħidu mas-​salmista: “Aqdu bil-​ferħ lill-​Mulej, idħlu quddiemu b’għana ferrieħi. Kunu afu li Jaħweh hu Alla, hu ħalaqna, u aħna tiegħu, aħna l-​poplu tiegħu u n-​ngħaġ tal-​mergħa tiegħu.” (Salm 100:2, 3) Iva, aħna mimlijin ferħ u għandna s-​sigurtà. Huwa bħal li kieku konna ssalvagwardjati minn predaturi mill-​agħar f’maqjel tan-​ngħaġ li għandu ħitan b’saħħithom tal-​ġebel.—Numri 32:16; 1 Samwel 24:4 [1 Samwel 24:3, NW]; Sofonija 2:6.

Ragħajja Ħerqanin Tal-​Merħla

3. Anzjani Kristjani maħturin kif jittrattaw lill-​merħla t’Alla?

³ Mhux taʼ b’xejn li aħna mimlijin ferħ bħala n-​ngħaġ t’Alla! Anzjani maħturin jieħdu t-​tmexxija fostna. Huma ma ‘jaħkmux fuqna,’ ma jikkmandawniex, lanqas ma jipprovaw ikunu sidien fuq il-​fidi tagħna. (Numri 16:13; Mattew 20:25-28; 2 Korintin 1:24; Lhud 13:7) Minflok, huma ragħajja taʼ mħabba li japplikaw il-​parir taʼ l-​appostlu Pietru: “Irgħaw il-​merħla t’Alla li hemm fostkom, u ħudu ħsiebha, mhux imġegħlin, imma minn rajkom; mhux għall-​qliegħ moqżież, imma b’qalb imħeġġa; mhux qiskom is-​sidien tal-​wirt t’Alla, imma billi ssiru eżempju tal-​merħla.” (1 Pietru 5:2, 3, KŻ) L-​appostlu Pawlu qal lil anzjani sħabu: “Oqogħdu attenti għalikom infuskom u għall-​merħla kollha, li fostha l-​ispirtu qaddis ħatarkom indokraturi, biex tirgħu l-​kongregazzjoni t’Alla, li hu xtara bid-​demm taʼ Ibnu stess.” U kemm huma grati n-​ngħaġ li dawn l-​irġiel maħturin mill-​ispirtu qaddis ‘jittrattaw lill-​merħla b’tenerezza’!—Atti 20:28-30, NW.

4. Charles T. Russell għal liema xorta taʼ relazzjoni mal-​merħla kien magħruf ħafna?

⁴ Ġesù ta lill-​kongregazzjoni “għotjiet fi bnedmin,” xi wħud bħala “ragħajja,” li jittrattaw lill-​merħla taʼ Jehovah b’mod teneru. (Efesin 4:8, 11, NW) Wieħed minn dawn l-​irġiel kien Charles T. Russell, l-​ewwel president tal-​Watch Tower Society. Kien imsejjaħ Pastor Russell minħabba l-​attivitajiet tiegħu taʼ mħabba u mogħdrija f’li jirgħa l-​merħla taħt ir-​Ragħaj Ewlieni, Ġesù Kristu. Illum, anzjani Kristjani huma maħturin mill-​Ġemgħa li Tiggverna tax-​Xhieda taʼ Jehovah, u tingħata attenzjoni li ma jintużawx termini bħalma huma “pastor,” “anzjan,” jew “għalliem” bħala titli. (Mattew 23:8-12) Madankollu, anzjani taż-​żmien preżent jagħmlu xogħol pastorali, jew taʼ ragħajja, għall-​benefiċċju tan-​ngħaġ tal-​mergħa taʼ Jehovah.

5. Mgħammdin ġodda għala għandhom isiru jafu lill-​anzjani maħturin fil-​kongregazzjoni Kristjana?

⁵ Bħala ragħajja, l-​anzjani għandhom parti sinjifikanti fil-​progress spiritwali taʼ wħud ġodda. Għaldaqstant, il-​ktieb il-​ġdid Għarfien Li Jwassal Għall-​Ħajja Taʼ Dejjem jgħid f’paġna 168: “Sir afhom lill-​anzjani maħturin fil-​kongregazzjoni. Huma għandhom ħafna esperjenza fl-​applikar taʼ l-​għarfien dwar Alla, għax laħqu l-​kwalifiki mniżżlin fil-​Bibbja għal indokraturi. (1 Timotju 3:1-7; Titu 1:5-9) Iżżommx lura milli tavviċina lil xi wieħed minnhom jekk ikollok bżonn għajnuna spiritwali biex tegħleb xi vizzju jew xi karatteristika li hija f’konflitt mal-​ħtiġijiet t’Alla. Se ssib li l-​anzjani jsegwu t-​twissija taʼ Pawlu: ‘Agħmlu l-​qalb lill-​beżżiegħa [“erwieħ dipressi,” NW], għinu lid-​dgħajfa, stabru b’kulħadd.’—1 Tessalonkin 2:7, 8; 5:14.”

Meta Wħud Ġodda Jkunu Jridu Jippridkaw

6. Liema proċedura tiġi segwita jekk student tal-​Bibbja jrid isir pubblikatur tas-​Saltna?

⁶ Wara li student tal-​Bibbja jkun ħa għarfien u attenda għal-​laqgħat għal xi żmien, għandu mnejn ikun irid isir pubblikatur tas-​Saltna, predikatur taʼ l-​aħbar tajba. (Mark 13:10) Jekk dan huwa l-​każ, ix-​Xhud li jikkonduċi l-​istudju tal-​Bibbja miegħu għandu jikkuntattja lill-​indokratur li jippresiedi, u dan jagħmel arranġamenti biex wieħed mill-​anzjani fil-​Kumitat tas-​Servizz tal-​Kongregazzjoni u anzjan ieħor jiltaqgħu maʼ l-​istudent tal-​Bibbja u l-​għalliem tiegħu. Id-​diskussjoni tkun ibbażata fuq il-​ktieb Organized to Accomplish Our Ministry, paġni 98 u 99. Jekk dawn iż-​żewġ anzjani jaraw li l-​wieħed ġdid jemmen it-​tagħlim bażiku tal-​Bibbja u kkonforma mal-​prinċipji t’Alla, jintqallu li huwa kkwalifikat biex jieħu sehem fil-​ministeru pubbliku.a Meta jirrapporta l-​ministeru tiegħu billi jimla rapport tas-​servizz taʼ l-​għalqa, dan se jiġi mniżżel fuq karta taʼ l-​Istatistika tal-​Pubblikatur tal-​Kongregazzjoni maħruġa fuq ismu. Il-​wieħed ġdid jistaʼ issa jirrapporta l-​attività tiegħu t’għoti taʼ xiehda flimkien mal-​miljuni t’oħrajn li b’ferħ “ixandru l-​kelma taʼ Alla.” (Atti 13:5) Avviż li hu pubblikatur mhux mgħammed isir lill-​kongregazzjoni.

7, 8. Pubblikatur mhux mgħammed b’liema modi jistaʼ jingħata għajnuna meħtieġa fil-​ministeru?

⁷ Pubblikatur mhux mgħammed għandu bżonn l-​għajnuna taʼ l-​anzjani u taʼ Kristjani maturi oħrajn. Per eżempju, il-​progress spiritwali tiegħu huwa taʼ interess għall-​anzjan li jikkonduċi l-​Istudju tal-​Ktieb tal-​Kongregazzjoni fejn jattendi. Il-​pubblikatur ġdid għandu mnejn isibha diffiċli li jitkellem b’mod effettiv fix-​xogħol minn dar għal dar. (Atti 20:20) Għalhekk x’aktarx li jaċċetta mill-​qalb għajnuna, speċjalment mingħand dak li kien u għadu jikkonduċi studji tal-​Bibbja miegħu mill-​ktieb Għarfien. Għajnuna prattika bħal din hija xierqa, għaliex Ġesù Kristu ħejja lid-​dixxipli tiegħu għall-​ministeru.—Mark 6:7-13; Luqa 10:1-22.

⁸ Biex il-​ministeru tagħna jkun effettiv, preparazzjoni tajba bil-​quddiem hija essenzjali. Għalhekk, iż-​żewġ pubblikaturi jistgħu l-​ewwel jiltaqgħu flimkien biex jipprattikaw preżentazzjonijiet issuġġeriti fil-​ħarġa taʼ kull xahar taʼ Il-​Ministeru Tas-​Saltna. Meta jibdew is-​servizz tagħhom taʼ l-​għalqa, dak li għandu iżjed esperjenza jistaʼ jieħu l-​ewwel bieb jew tnejn. Wara introduzzjoni kordjali, iż-​żewġ pubblikaturi jistgħu jieħdu sehem f’li jagħtu xiehda. Li jaħdmu flimkien fil-​ministeru għal ftit ġimgħat għandu mnejn iwassal għal żjajjar lura mill-​aħjar u saħansitra għal studju tal-​Bibbja fid-​dar mill-​ktieb Għarfien Li Jwassal Għall-​Ħajja Taʼ Dejjem. Il-​pubblikatur b’iżjed esperjenza jistaʼ jikkonduċi l-​istudju għal ftit żmien u mbagħad jgħaddih lill-​proklamatur il-​ġdid tas-​Saltna. Kemm se jkunu henjin iż-​żewġ pubblikaturi jekk l-​istudent tal-​Bibbja juri apprezzament għall-​għarfien dwar Alla!

9. Liema arranġamenti jsiru meta pubblikatur jixtieq jitgħammed?

⁹ Hekk kif pubblikatur mhux mgħammed jipprogressa spiritwalment, jistaʼ jagħmel dedikazzjoni lil Alla fit-​talb u jkun irid jitgħammed. (Qabbel Mark 1:9-11.) Għandu jgħarraf ix-​xewqa tiegħu għall-​magħmudija lill-​indokratur li jippresiedi tal-​kongregazzjoni, u dan jagħmel arranġamenti biex anzjani jirrevedu mal-​pubblikatur il-​mistoqsijiet f’paġni 175 sa 218 taʼ Organized to Accomplish Our Ministry. L-​erbaʼ partijiet li fihom huma maqsumin il-​mistoqsijiet jistgħu jsiru fi tliet sezzjonijiet minn tliet anzjani differenti jekk ikun possibbli. Jekk dawn jaqblu li l-​pubblikatur mhux mgħammed għandu fehma raġonevoli tat-​tagħlim tal-​Bibbja u jikkwalifika b’modi oħrajn, jgħidulu li jistaʼ jitgħammed. Bħala riżultat tad-​dedikazzjoni u magħmudija tiegħu, hu jsir ‘immarkat’ għas-​salvazzjoni.—Eżekjel 9:4-6, KŻ.

Nilħqu Bżonnijiet Speċjali

10. Wara li jispiċċa l-​istudju tiegħu tal-​ktieb Għarfien u jitgħammed, wieħed kif se jżid l-​għarfien Skritturali tiegħu?

¹⁰ Wara li individwu jkun spiċċa l-​istudju tiegħu tal-​Bibbja mill-​ktieb Għarfien u jkun ġie mgħammed, jistaʼ ma jkunx neċessarju li tikkonduċi studju formali miegħu fit-​tieni ktieb, bħalma huwa Magħqudin Fil-​Qima Taʼ L-​Uniku Alla Veru.b M’għandniex xi ngħidu, l-​individwu mgħammed dan l-​aħħar se jitgħallem ħafna hekk kif iħejji għal-​laqgħat Kristjani u jattendi għalihom regolarment. Se jikseb ukoll iżjed għarfien hekk kif l-​għatx tiegħu għall-​verità jqanqlu biex jaqra u jistudja pubblikazzjonijiet Kristjani privatament u biex jiddiskuti affarijiet Skritturali maʼ kredenti sħabu. Imma xi ngħidu jekk iqumu bżonnijiet speċjali?

11. (a) Apollos kif kien mgħejjun minn Prixilla u Akwila? (b) Liema għajnuna tistaʼ tingħata lil adult żagħżugħ li tgħammed dan l-​aħħar u li qiegħed jikkunsidra ż-​żwieġ?

¹¹ Saħansitra Apollos, li kien “għaref fl-​Iskrittura” u mgħallem dwar Ġesù bil-​korrettezza, ibbenefika meta l-​Kristjani t’esperjenza Prixilla u Akwila “ħaduh magħhom u fissrulu t-​Triq taʼ Alla iktar bir-​reqqa.” (Atti 18:24-26; qabbel Atti 19:1-7.) Għalhekk, nassumu li adult żagħżugħ mgħammed dan l-​aħħar qiegħed jikkunsidra għerusija u żwieġ. Kristjan b’iżjed esperjenza jistaʼ jgħinu jsib informazzjoni fuq dawn is-​suġġetti f’pubblikazzjonijiet tal-​Watch Tower. Per eżempju, materjal t’għajnuna fuq dawn il-​linji jidher fil-​ktieb Questions Young People Ask​—Answers That Work, Sezzjoni 7.c Il-​pubblikatur li kkonduċa l-​istudju tal-​Bibbja miegħu jistaʼ jiddiskuti dan il-​materjal mal-​wieħed ġdid, għalkemm studju regulari ma jkunx involut.

12. Liema għajnuna tistaʼ tiġi pprovduta lil imseħbin fiż-​żwieġ li għadhom kif tgħammdu u li għandhom il-​problemi?

¹² Ikkunsidra eżempju ieħor. Għandu mnejn li mseħbin fiż-​żwieġ li għadhom kemm tgħammdu qegħdin ikollhom problemi f’li japplikaw prinċipji divini. Jistgħu jikkonsultaw m’anzjan, li jistaʼ jqattaʼ ftit ħin fl-​għaxijiet jiddiskuti l-​Iskrittura magħhom u jidderieġi l-​attenzjoni tagħhom lejn informazzjoni misjuba fil-​pubblikazzjonijiet tal-​Watch Tower. Madankollu, l-​anzjan ma jistabbilixxix mill-​ġdid studju regulari tal-​Bibbja mal-​koppja.

Jekk Wieħed Mgħammed Ġdid Jiżbalja

13. Anzjani tal-​kongregazzjoni għala għandhom juru ħniena lil wieħed mgħammed ġdid li jiżbalja imma li hu niedem?

¹³ L-​anzjani jimitaw lir-​Ragħaj il-​Kbir, Jehovah, li jgħid: “Jiena stess nirgħa n-​ngħaġ tiegħi, . . . ninfaxxa l-​ġrieħi tal-​miġruħa, u nqawwi l-​marida.” (Eżekjel 34:15, 16; Efesin 5:1) Fi qbil maʼ dak l-​ispirtu, id-​dixxiplu Ġuda ħeġġeġ li tintwera ħniena lil Kristjani midlukin li kellhom xi dubji jew li kienu waqgħu fid-​dnub. (Ġuda 22, 23) Ladarba bix-​xieraq nistennew wisq iżjed minn Kristjani t’esperjenza, ċertament li ħniena għandha tintwera lil persuna li għadha kif tgħammdet​—sempliċi ħaruf—​li tiżbalja imma hi niedma. (Luqa 12:48; 15:1-7) Anzjani, li ‘jiġġudikaw f’isem il-​Mulej,’ għalhekk jagħtu lil ngħaġ bħal dawn attenzjoni tenera u jaġġustawhom mill-​ġdid fi spirtu taʼ ħlewwa.—2 Kronaki 19:6; Atti 20:28, 29; Galatin 6:1.d

14. X’għandu jsir meta pubblikatur mgħammed dan l-​aħħar jikkommetti dnub serju, u kif jistaʼ jiġi mgħejjun?

¹⁴ Nassumu, allura, li pubblikatur li tgħammed dan l-​aħħar qabel kellu problema bix-​xorb u reġaʼ waqaʼ għal li jieħu żżejjed f’xi okkażjoni jew tnejn. Jew forsi għeleb vizzju tat-​tabakk li kien ilu fuqu ħafna imma ċeda għat-​tentazzjoni li jpejjep privatament xi darba jew tnejn. Avolja ħuna l-​ġdid ikun talab għall-​maħfra t’Alla, għandu jfittex l-​għajnuna t’anzjan sabiex id-​dnub ma jsirx drawwa. (Salm 32:2-5 [Salm 32:1-5, NW]; Ġakbu 5:14, 15) Meta jsemmi l-​iżball tiegħu lil wieħed mill-​anzjani, dak l-​anzjan għandu jipprova jaġġusta mill-​ġdid lill-​wieħed ġdid b’mod ħanin. (Salm 130:3) Pariri Skritturali għandhom mnejn ikunu biżżejjed biex jgħinuh jiddritta l-​mogħdijiet għal saqajh wara dan. (Lhud 12:12, 13) Dan l-​anzjan jiddiskuti ċ-​ċirkostanzi maʼ l-​indokratur li jippresiedi tal-​kongregazzjoni biex jiddetermina liema assistenza oħra għandha tingħata.

15. F’xi każi, x’jistaʼ jkun neċessarju meta persuna mgħammda dan l-​aħħar tidneb?

¹⁵ F’xi każi iktar jistaʼ jkun meħtieġ. Jekk isem ħażin, periklu għall-​merħla, jew problemi serji oħrajn huma involuti, il-​ġemgħa taʼ l-​anzjani jaħtru żewġ anzjani biex jinvestigaw il-​kwistjoni. Jekk dawn l-​anzjani jsibu li l-​kwistjoni hija serja biżżejjed li jkun meħtieġ kumitat ġudizzjarju, għandhom jirrapportaw dan lill-​ġemgħa taʼ l-​anzjani. Il-​ġemgħa taʼ l-​anzjani mbagħad jaħtru kumitat ġudizzjarju biex jgħin lill-​wieħed li qiegħed jiżbalja. Il-​kumitat ġudizzjarju għandu jittrattah b’mod teneru. Għandhom jistinkaw biex jaġġustawh mill-​ġdid bl-​Iskrittura. Jekk hu jwieġeb għall-​isforzi b’qalb tajba tal-​kumitat ġudizzjarju, imbagħad huma jistgħu jiddeterminaw jekk ikunx hemm xi benefiċċju f’li hu ma jintużax għal partijiet fuq il-​pletform fil-​laqgħat fis-​Sala tas-​Saltna jew jekk għandux jitħalla jikkummenta fil-​laqgħat.

16. L-​anzjani x’jistgħu jagħmlu biex jgħinu lil wieħed li qiegħed jiżbalja?

¹⁶ Jekk il-​wieħed li qiegħed jiżbalja jwieġeb, anzjan jew tnejn mill-​kumitat ġudizzjarju jistgħu jirranġaw biex jagħmlu żjajjar pastorali bl-​iskop li jwieżnu l-​fidi tiegħu u jibnu l-​apprezzament tiegħu għal-​livelli taʼ tjieba t’Alla. Kull wieħed minnhom jistaʼ jaħdem miegħu fil-​ministeru taʼ l-​għalqa minn żmien għal żmien. Jistgħu jsiru xi ftit diskussjonijiet Skritturali miegħu, possibilment billi jintużaw artikli addattati mit-​Torri Taʼ L-​Għassa u l-​Awake! imma ma jistabbilixxux mill-​ġdid studju regulari tal-​Bibbja. B’kura tenera bħal din, il-​wieħed li qiegħed jiżbalja jistaʼ jiġi msaħħaħ biex jirreżisti dgħjufijiet tal-​laħam fil-​ġejjieni.

17. Liema passi jittieħdu jekk wieħed mgħammed li jagħmel il-​ħażen ma jindimx u ma jabbandunax il-​korsa midinba tiegħu?

¹⁷ M’għandniex xi ngħidu, li jkun ġie mgħammed dan l-​aħħar m’huwiex skuża biex wieħed jipprattika d-​dnub mingħajr indiema. (Lhud 10:26, 27; Ġuda 4) Jekk wieħed mgħammed li jagħmel il-​ħażen ma jindimx u ma jabbandunax il-​korsa midinba tiegħu, dan ikollu jiġi mkeċċi mill-​kongregazzjoni. (1 Korintin 5:6, 11-13; 2 Tessalonkin 2:11, 12; 2 Ġwann 9-11) Meta din l-​azzjoni tidher neċessarja, il-​ġemgħa taʼ l-​anzjani jagħżlu kumitat ġudizzjarju. Jekk isseħħ tkeċċija, isir dan l-​avviż qasir: “ . . . ġie maqtugħ mis-​sħubija.”e

Ngħinuhom Biex ‘Jagħfsu ’L Quddiem Lejn Il-​Maturità’

18. Għala nistgħu nkunu ċerti li Kristjani mgħammdin ġodda u oħrajn dejjem se jkollhom iżjed x’jitgħallmu dwar Jehovah u dwar ir-​rieda tiegħu?

¹⁸ Il-​maġġoranza vasta tal-​qaddejja t’Alla se jibqgħu fil-​merħla. B’ferħ, ukoll, kull wieħed minna se jkun jistaʼ jersaq dejjem eqreb lejn Missierna tas-​sema għaliex dejjem se nkunu nistgħu nitgħallmu iżjed dwaru u dwar ir-​rieda tiegħu. (Koħelet 3:11; Ġakbu 4:8) L-​eluf mgħammdin f’Pentekoste tas-​sena 33 E.K. ċertament li kellhom iżjed x’jitgħallmu. (Atti 2:5, 37-41; 4:4) Hekk ukoll il-​Ġentili, li kienu neqsin minn sfond Skritturali. Per eżempju, dan kien veru dwar dawk li tgħammdu wara t-​taħdita taʼ Pawlu fuq l-​Areopagus f’Ateni. (Atti 17:33, 34) Illum, ukoll, mgħammdin ġodda għandhom iżjed x’jitgħallmu u jeħtieġu ħin u għajnuna biex isaħħu d-​determinazzjoni tagħhom biex jibqgħu jagħmlu dak li huwa sewwa f’għajnejn Alla.—Galatin 6:9; 2 Tessalonkin 3:13.

19. Dawk li qegħdin jitgħammdu kif jistgħu jiġu mgħejjunin biex ‘jagħfsu ’l quddiem lejn il-​maturità’?

¹⁹ Kull sena eluf jitgħammdu u jeħtieġu għajnuna sabiex ikunu jistgħu ‘jagħfsu ’l quddiem lejn il-​maturità.’ (Ebrej 6:1-3, NW) Bil-​kliem, bl-​eżempju, u bil-​għajnuna prattika fil-​ministeru, int għandek mnejn tkun tistaʼ tgħin lil xi wħud biex jilbsu l-​personalità l-​ġdida u ‘jibqgħu jimxu fil-​verità.’ (3 Ġwann 4; Kolossin 3:9, 10) Jekk int pubblikatur t’esperjenza, l-​anzjani għandhom mnejn jistiednuk biex tgħin lil xi sieħeb kredent ġdid fis-​servizz taʼ l-​għalqa jew biex tiddiskuti ċerti punti Skritturali miegħu għal ftit ġimgħat sabiex isaħħaħ il-​fidi tiegħu f’Alla, l-​apprezzament tiegħu għal-​laqgħat Kristjani, u affarijiet simili. Ir-​relazzjoni tar-​ragħajja mal-​merħla hija bħal dik taʼ missier fl-​eżortazzjoni u omm fil-​ġentilezza. (1 Tessalonkin 2:7, 8, 11) Madankollu, ftit anzjani u qaddejja ministerjali ma jistgħux jieħdu ħsieb taʼ kull ħaġa meħtieġa f’kongregazzjoni. Ilkoll kemm aħna qisna familja li l-​membri tagħha jgħinu lil xulxin. Kull wieħed minna jistaʼ jagħmel xi ħaġa biex ngħinu lill-​adoraturi sħabna. Int innifsek għandek mnejn li tistaʼ toffri inkuraġġiment, tikkonsla lid-​dipressi, twieżen lid-​dgħajfin.—1 Tessalonkin 5:14, 15.

20. X’tistaʼ tagħmel int biex ixxerred l-​għarfien dwar Alla u tipprovdi attenzjoni tenera għan-​ngħaġ tal-​mergħa taʼ Jehovah?

²⁰ L-​umanità teħtieġ l-​għarfien dwar Alla, u bħala Xhud taʼ Jehovah, int tistaʼ jkollok sehem mimli ferħ f’li dan ixxerrdu. In-​ngħaġ taʼ Jehovah jeħtieġu attenzjoni tenera, u int tistaʼ twettaq rwol taʼ mħabba f’li tgħin biex tipprovdiha. Jalla Jehovah ibierek il-​ministeru tiegħek, u jalla jippremjak għall-​isforzi tiegħek mill-​qalb biex tgħin lin-​ngħaġ tal-​mergħa tiegħu. (w96 1/15)

[Noti taʼ taħt]

Kif Twieġeb Int?

◻ Jehovah kif jittratta lin-​ngħaġ tiegħu?

◻ X’isir meta wħud ġodda jridu jippridkaw?

◻ Kredenti sħab kif jistgħu jgħinu wħud ġodda bi bżonnijiet speċjali?

◻ L-​anzjani liema għajnuna jistgħu jagħtu lil dawk li jiżbaljaw imma huma nidmin?

◻ Kif tistaʼ tgħin lil persuna li għadha kif tgħammdet biex ‘tagħfas ’il quddiem lejn il-​maturità’?

[Stampa f’paġna 11]

Charles T. Russell kien magħruf sewwa bħala ragħaj taʼ mħabba tal-​merħla

[Stampa f’paġna 13]

Ragħajja taʼ mogħdrija jittrattaw lill-​merħla t’Alla b’tenerezza