“Min Hu Bħal Jehovah Alla Tagħna?”

“Min hu bħal Jehovah Alla tagħna, hu li qiegħed jagħmel il-​għamara tiegħu fuq il-​għoli?”−SALM 113:5.

1, 2. (a) Ix-​Xhieda taʼ Jehovah kif iħarsu lejn Alla u l-​Bibbja? (b) Liema mistoqsijiet jixirqilhom li nikkunsidrawhom?

DAWK li jfaħħru lil Jehovah huma tabilħaqq imberkin. Xi privileġġ hu li tkun fost din il-​folla ferriħija! Bħala x-​Xhieda tiegħu, aħna naċċettaw il-​pariri, il-​liġijiet, it-​tagħlim, il-​wegħdiet, u l-​profeziji tal-​Kelma t’Alla, il-​Bibbja. Aħna ferħanin li nitgħallmu mill-​Iskrittura u li niġu “mgħallmin minn Jehovah.”−Ġwann 6:45.

² Minħabba r-​reverenza profonda tagħhom lejn Alla, ix-​Xhieda taʼ Jehovah jistgħu jistaqsu: “Min hu bħal Jehovah Alla tagħna?” (Salm 113:5) Dawk il-​kelmiet tas-​salmista jimplikaw fidi. Imma x-​Xhieda għala għandhom daqstant fidi f’Alla? U liema raġunijiet għandhom biex ifaħħru lil Jehovah?

Fidi u Tifħir Xierqa

3. X’inhuma s-​Salmi Ħallel, u għala jissemmew hekk?

³ Fidi f’Jehovah hija xierqa għaliex huwa dak Alla uniku. Dan huwa enfasizzat f’​Salmi 113, 114, u 115, parti mis-​sitt Salmi Ħallel. Skond l-​Iskola taʼ Ħillel rabbinika, Salm 113 u 114 kienu jitkantaw matul l-​ikla tal-​Qbiż Lhudi wara li kienet tiġi mferraʼ t-​tieni tazza nbid u wara li kien jiġi spjegat is-​sinjifikat tal-​osservanza. Salmi 115 sa 118 kienu jitkantaw wara r-​rabaʼ tazza nbid. (Qabbel Mattew 26:30.) Huma kienu msejħin “Salmi Ħallel” għaliex huma b’mod ripetut jużaw l-​espressjoni Hallelujah!—“Faħħru lil Jah!”

4. X’inhu t-​tifsir tat-​terminu “Hallelujah,” u kemm-il darba jidher fil-​Bibbja?

⁴ “Hallelujaħ!” hija transliterazzjoni taʼ espressjoni Ebrajka li tidher 24 darba fis-​Salmi. F’post ieħor fil-​Bibbja, forma Griega tagħha tidher erbaʼ darbiet rigward ferħ imġarrab minħabba l-​qerda taʼ Babilonja l-​Kbira, l-​imperu dinji taʼ reliġjon falza, u l-​ferħ assoċċjat maʼ li Alla Jehovah beda jaħkem bħala Sultan. (Rivelazzjoni 19:l-6) Hekk kif issa neżaminaw tlieta mis-​Salmi Ħallel, aħna nistgħu b’mod tajjeb nimmaġinaw lilna nfusna nkantaw dawn il-​għanjiet għat-​tifħir taʼ Jehovah.

Faħħru lil Jah!

5. Salm 113 iwieġeb liema mistoqsija, u l-​kmand taʼ Salm 113:1, 2 għal min japplika b’mod speċjali?

⁵ Salm 113 iwieġeb il-​mistoqsija, Għala tfaħħar lil Jehovah? Jiftaħ bil-​kmand: “Faħħru lil Jah! Offru tifħir, O intom qaddejja taʼ Jehovah, faħħru lill-​isem taʼ Jehovah. Jalla l-​isem taʼ Jehovah isir imbierek minn issa ’l quddiem u għal żmien indefinit.” (Salm 113:1, 2) “Hallelujah!” Iva, “Faħħru lil Jah!” Dak il-​kmand japplika b’mod speċjali għall-​poplu t’Alla f’dan iż-​żmien tat-​tmiem.” (Danjel 12:4) Minn issa ’l quddiem u għal dejjem, isem Jehovah se jiġi eżaltat mal-​art kollha. Ix-​Xhieda tiegħu issa jiddikjaraw li Jehovah hu Alla, li Kristu hu Sultan, u li s-​Saltna ġiet stabbilita fis-​sema. Satana x-​Xitan u l-​organizzazzjoni tiegħu ma jistgħux iwaqqfu dan it-​tifħir lil Jehovah.

6. Jehovah kif qed jiġi mfaħħar ‘minn tlugħ sa nżul ix-​xemx’?

⁶ Il-​għanja taʼ tifħir se tibqaʼ għaddejja sakemm Jehovah iġagħalha timla l-​art. “Minn tlugħ ix-​xemx sa nżulha l-​isem taʼ Jehovah irid jiġi mfaħħar.” (Salm 113:3) Dan ifisser iżjed minn qima taʼ kuljum minn xi ħlejjaq umani. Ix-​xemx titlaʼ fil-​Lvant u tinżel fil-​Punent, billi tiksi l-​art kollha. Kulfejn tiddi x-​xemx, isem Jehovah dalwaqt se jiġi mfaħħar min-​nies kollha meħlusin mill-​jasar tar-​reliġjon falza u tal-​organizzazzjoni taʼ Satana. Fil-​fatt, din il-​għanja li qatt ma se tintemm issa qiegħda titkanta minn Xhieda taʼ Jehovah midlukin u minn dawk li se jkunu wlied tal-​art tas-​Sultan tiegħu, Ġesù Kristu. Xi privileġġ għandhom bħala wħud li jkantaw it-​tifħir lil Jehovah!

Jehovah Hu Bla Paragun

7. Liema żewġ aspetti tas-​supremazija taʼ Jehovah huma nnotati f’Salm 113:4?

⁷ Is-​salmista jżid: “Jehovah sar għoli fuq il-​ġnus kollha; il-​glorja tiegħu hi fuq is-​smewwiet.” (Salm 113:4) Dan jinnota żewġ aspetti tas-​supremazija t’Alla: (1) Għal Jehovah, il-​Wieħed Suprem, “għoli fuq il-​ġnus kollha,” huma bħal qatra minn barmil u bħala sempliċi trab fuq il-​miżien; (Isaija 40:15; Danjel 7:18) (2) il-​glorja tiegħu hija bil-​wisq akbar minn dik tas-​smewwiet fiżiċi, għax l-​anġli jagħmlu r-​rieda sovrana tiegħu.—Salm 19:1, 2; 103:20, 21.

8. Jehovah għala u kif jitbaxxa biex jagħti kas tal-​affarijiet fis-​sema u fl-​art?

⁸ Imqanqal mill-​kobor t’Alla, is-​salmista qal: “Min hu bħal Jehovah Alla tagħna, hu li qiegħed jagħmel il-​għamara tiegħu fuq il-​għoli? Hu qiegħed jitbaxxa biex iħares lejn is-​sema u l-​art.” (Salm 113:5, 6) Alla hu tant eżaltat li hu jrid jitbaxxa biex jagħti kas taʼ affarijiet fis-​sema u fl-​art. Għalkemm Jehovah m’huwa inferjuri għal ħadd jew sottomess lejn oħrajn, hu juri umiltà f’li jeżerċita l-​ħniena u l-​mogħdrija lejn midinbin baxxi. Il-​provvediment taʼ Ibnu, Ġesù Kristu, bħala “sagrifiċċju taʼ tpattija” għall-​Kristjani midlukin u għad-​dinja taʼ bnedmin hija espressjoni tal-​umiltà taʼ Jehovah.—1 Ġwann 2:1, 2.

Jehovah Juri Mogħdrija

9, 10. Alla, kif ‘jeżalta lill-​fqir, biex iġagħlu jpoġġi maʼ nobbli’?

⁹ Billi jenfasizza l-​mogħdrija taʼ Jehovah, is-​salmista jżid li Jehovah qed “jerfaʼ lill-​wieħed baxx mill-​istess trab; hu jeżalta lill-​wieħed fqir mill-​ħofra tal-​irmied infisha, biex jagħmlu joqgħod bil-​qiegħda maʼ nobbli, man-​nobbli tan-​nies tiegħu. Hu qiegħed iġiegħel lill-​mara ħawlija tgħammar f’dar bħal omm mimlija ferħ taʼ wlied subien. Faħħru lil Jah!” (Salm 113:7-9) In-​nies taʼ Jehovah għandhom fidi li hu jistaʼ jeħles lil uħud retti li jkunu fil-​bżonn, ibiddel l-​istat tagħhom, u jissodisfa l-​bżonnijiet u x-​xewqat xierqa tagħhom. ‘Il-​Wieħed Għoli u Kbir jagħti l-​ħajja mill-​ġdid lill-​ispirtu tal-​baxxi u lill-​qalb taʼ dawk li qegħdin jiġu mfarrkin.’—Isaija 57:15.

¹⁰ Jehovah kif ‘jeżalta lill-​wieħed fqir, biex jagħmlu joqgħod bil-​qiegħda maʼ nobbli’? Meta tkun ir-​rieda t’Alla, hu jpoġġi lill-​qaddejja tiegħu f’pożizzjonijiet taʼ glorja ugwali maʼ dik taʼ nobbli. Hekk għamel fil-​każ taʼ Ġużeppi, li sar l-​amministratur tal-​ikel tal-​Eġittu. (Ġenesi 41:37-49) F’Iżrael, li tpoġġi man-​nobbli, jew irġiel taʼ awtorità fost in-​nies taʼ Jehovah, kien privileġġ taʼ għożża. Bħall-​anzjani Kristjani llum, irġiel bħal dawn kellhom il-​għajnuna u l-​barka t’Alla.

11. Għala jistaʼ jingħad li Salm 113:7-9 japplika b’mod speċjali għall-​poplu taʼ Jehovah taż-​żmien modern?

¹¹ Xi ngħidu dwar li ‘jagħmel lill-​mara ħawlija omm mimlija ferħ’? Alla ta lil Ħanna li kienet ħawlija iben—Samwel, li hi ddedikat għas-​servizz Tiegħu. (1 Samwel 1:20-28) B’mod iżjed sinjifikanti, billi bdiet b’Ġesù u bit-​tferrieħ tal-​ispirtu qaddis fuq id-​dixxipli tiegħu f’Pentekoste 33 E.K., il-​mara simbolika t’Alla, Sijon tas-​sema, bdiet twelled tfal spiritwali. (Isaija 54:1-10, 13; Atti 2:1-4) U sewwa sew bħalma Alla rrestawra lil-​Lhud f’arthom wara eżilju fil-​Babilonja, fl-​1919 hu ħeles lill-​fdal midlukin taʼ “l-​Iżrael t’Alla” minn jasar Babilonjan u tant berikhom bil-​kbir spiritwalment li l-​kliem taʼ Salm 113:7-9 japplika għalihom. (Galatin 6:16) Bħala Xhieda leali taʼ Jehovah, il-​fdal taʼ Iżrael spiritwali u sħabhom b’tamiet għall-​art qegħdin iwieġbu mill-​qalb għall-​kliem finali taʼ Salm 113: “Faħħru lil Jah!”

Prova taʼ kemm Jehovah Hu Uniku

12. Salm 114 kif juri kemm Jehovah hu uniku?

¹² Salm 114 juri kemm Jehovah hu uniku billi jsemmi ġrajjiet uniċi li jinvolvu lill-​Iżraeliti. Is-​salmista kanta: “Meta Iżrael mar ’il quddiem mill-​Eġittu, id-​dar taʼ Ġakobb minn poplu li qiegħed jitkellem mingħajr ma jiftiehem, Ġuda sar il-​post qaddis tiegħu, Iżrael id-​dominju grandjuż tiegħu.” (Salm 114:1, 2) Alla ħeles lil Iżrael mill-​jasar tal-​Eġizzjani, li l-​lingwa tagħhom kienet stramba għal widnejhom. Il-​ħelsien tal-​poplu taʼ Jehovah, imsejjaħ Ġuda u Iżrael f’paralleliżmu poetiku, juri li Alla jistaʼ jeħles lill-​qaddejja kollha tiegħu llum.

13. Salm 114:3-6 kif juri s-​supremazija taʼ Jehovah u japplika għall-​esperjenzi taʼ Iżrael tal-​qedem?

¹³ Is-​sovranità taʼ Jehovah fuq il-​ħolqien kollu hija evidenti fil-​kelmiet: “Il-​baħar innifsu ra u ħarab; inkwantu għall-​Ġordan, hu beda jdur lura. Il-​muntanji nfushom qabżu ’l hawn u ’l hinn bħal imtaten, il-​għoljiet bħal ħrief. Xi ġralek, O baħar, biex ħrabt, O Ġordan, biex bdejt iddur lura? O muntanji, biex bdejtu taqbżu ’l hawn u ’l hinn bħal imtaten; O għoljiet, bħal ħrief?” (Salm 114:3-6) Il-​Baħar l-​Aħmar “ħarab” meta Alla fetaħ mogħdija minnu għall-​poplu tiegħu. Iżrael imbagħad ra l-​id kbira taʼ Jehovah fl-​azzjoni kontra l-​Eġizzjani li mietu fl-​ilmijiet meta dawn reġgħu lura. (Eżodu 14:21-31) F’turija simili taʼ qawwa divina, ix-​Xmara Ġordan ‘bdiet iddur lura,’ billi ħalliet lill-​Iżraeliti jaqsmu għal ġo Kangħan. (Ġożwè 3:14-16) Il-​muntanji qabżu ’l hawn u ’l hinn bħal imtaten” hekk kif il-​Muntanja Sinaj ħarġet id-​duħħan u theżhżet meta l-​patt tal-​Liġi ġie mwaqqaf. (Eżodu 19:7-18) Hekk kif qorob lejn il-​quċċata tal-​għanja tiegħu, is-​salmista poġġa l-​affarijiet f’għamla taʼ mistoqsija, forsi biex jissuġġerixxi li l-​baħar, ix-​xmara, il-​muntanji, u l-​għoljiet bla ħajja baqgħu mistgħaġbin b’dawn it-​turijiet tal-​qawwa taʼ Jehovah.

14. X’sar permezz tal-​qawwa taʼ Jehovah f’Meriba u Kadex, u kif għandu dan jeffettwa lill-​qaddejja tiegħu taż-​żmien modern?

¹⁴ Billi kompla jalludi għall-​qawwa taʼ Jehovah, is-​salmista kanta: “Minħabba l-​Mulej kun f’weġgħat ħorox, O art, minħabba dak Alla taʼ Ġakobb, li qiegħed ibiddel il-​blata f’għadira tal-​ilma kollha qasab, blata biż-​żnied f’għajn tal-​ilma.” (Salm 114:7, 8) B’mod figurattiv, is-​salmista b’hekk jindika li l-​bnedmin għandhom jieqfu bil-​biżaʼ taʼ Jehovah, il-​Mulej u l-​Ħakkiem Universali tal-​art kollha. Hu kien “dak Alla taʼ Ġakobb,” jew Iżrael, kif hu tal-​Iżraeliti spiritwali u taʼ sħabhom tal-​art. F’Meriba u f’Kadex fix-​xagħri, Jehovah wera l-​qawwa tiegħu billi b’mod mirakoluż ipprovda l-​ilma għal Iżrael, billi “biddel il-​blata f’għadira tal-​ilma kollha qasab, blata biż-​żnied f’għajn.” (Eżodu 17:1-7; Numri 20:1-11) Tfakkiriet bħal dawn tal-​qawwa tremenda u tal-​ħsieb teneru taʼ Jehovah jagħtu lix-​Xhieda tiegħu raġunijiet sodi għal fidi mingħajr ebda dubju fih.

Mhux bħal Allat Idoli

15. Salm 115 kif setaʼ kien jitkanta?

¹⁵ Salm 115 iħeġġiġna biex infaħħru u nafdaw f’Jehovah. Huwa jattribwixxi l-​barka u l-​għajnuna lilu u jagħti prova li l-​idoli huma inutli. Dan is-​salm forsi kien jitkanta antifonalment. Jiġifieri, vuċi waħda tkanta: “Intom li tibżgħu minn Jehovah, afdaw f’Jehovah.” Il-​kongregazzjoni kienet twieġeb: “Hu l-​għajnuna tagħhom u t-​tarka tagħhom.”—Salm 115:11.

16. Liema kuntrast jistaʼ jintgħamel bejn Jehovah u l-​idoli tal-​ġnus?

¹⁶ Il-​glorja għandha tmur mhux għalina imma għall-​isem taʼ Jehovah, dak Alla taʼ qalb tajba bl-​imħabba, jew imħabba leali, u verità. (Salm 115:1) Il-​għedewwa jistgħu jistaqsu biex iwaqqgħu għaċ-​ċajt: “Fejn . . . hu Alla tagħhom?” Imma n-​nies taʼ Jehovah jistgħu jwieġbu: ‘Alla tagħna hu fis-​sema u jagħmel dak kollu li jogħġbu jagħmel.’ (Versi 2, 3) L-​idoli tal-​ġnus ma jistgħu jagħmlu xejn, madankollu, għax huma statwi tal-​fidda u tad-​deheb magħmulin mill-​bniedem. Minkejja li għandhom ħalq, għajnejn, u widnejn, huma ma jitkellmux, ma jarawx, u ma jisimgħux. Għandhom imnieħer imma ma jistgħux ixommu, saqajn imma ma jistgħux jimxu, u grieżem imma ma jistgħu jagħmlu ebda ħoss. Dawk li jagħmlu idoli impotenti kif ukoll dawk li jafdaw fihom se jiġu bla ħajja bħalhom.—Versi 4-8.

17. Ladarba l-​mejtin ma jistgħux ifaħħru lil Jehovah, x’għandna nagħmlu, u b’liema prospetti?

¹⁷ Imbagħad tingħata eżortazzjoni biex nafdaw f’Jehovah bħala Dak li jagħti l-​għajnuna u t-​Tarka protettiva taʼ Iżrael, tad-​dar saċerdotali taʼ Aronne, u taʼ dawk kollha li jibżgħu minn Alla. (Salm 115:9-11) Bħala dawk li nibżgħu minn Jehovah, aħna għandna reverenza profonda lejn Alla u biżaʼ bnin li nonqsu li nogħġbuh. Għandna wkoll fidi li “Dak li għamel is-​sema u l-​art” ibierek lill-​adoraturi leali tiegħu. (Versi 12-15) Is-​smewwiet huma l-​post tat-​tron tiegħu, imma Alla għamel l-​art id-​dar eterna tal-​bnedmin leali u ubbidjenti. Ladarba il-​mejtin siekta u bla sensi ma jistgħux ifaħħru lil Jehovah, aħna, il-​ħajjin, għandna nagħmlu hekk b’devozzjoni u lealtà totali. (Ekkleżjasti 9:5) Dawk biss li jfaħħru lil Jehovah se jgawdu ħajja eterna u jkunu jistgħu ‘jbierku lil Jah’ għal dejjem, billi jitkellmu tajjeb dwaru “għal żmien indefinit.” Ejjew għalhekk nieqfu bil-​lealtà maʼ dawk li qegħdin jagħtu kas tal-​eżortazzjoni: “Faħħru lil Jah!”−Salm 115:16-18.

Il-​Kwalitajiet tal-​Għaġeb taʼ Jehovah

18, 19. Il-​kwalitajiet taʼ Jehovah b’liema modi jiddistingwuh mill-​allat foloz?

¹⁸ Kuntrarju għal idoli bla ħajja, Jehovah hu dak Alla l-​ħaj, li juri kwalitajiet tal-​għaġeb. Huwa l-​istess personifikazzjoni tal-​imħabba u “mimli ħniena u grazzjuż, bil-​mod biex jirrabja u abbundanti fil-​qalb tajba bl-​imħabba.” (Eżodu 34:6; 1 Ġwann 4:8) Kemm hu differenti mill-​alla krudili Kangħanit Molek, li lilu kienu jiġu ssagrifikati t-​tfal! Huwa ssuġġerit li l-​immaġni taʼ dan l-​alla kellha forma taʼ raġel u ras taʼ barri. L-​idolu hu rrapportat li kien jiġi msaħħan sakemm jikwi, u t-​tfal kienu jintefgħu f’dirgħajh li kienu miftuħin, billi jaqgħu fil-​forn jaqbad taʼ taħt. Imma Jehovah tant hu taʼ mħabba u ħanin li l-​idea taʼ sagrifiċċji umani bħal dawn qatt saħansitra ma ‘ġiet f’qalbu.’—Ġeremija 7:31.

¹⁹ Il-​kwalitajiet prinċipali taʼ Jehovah jinkludu wkoll ġustizzja perfetta, għerf infinit, u qawwa suprema. (Dewteronomju 32:4; Ġob 12:13; Isaija 40:26) Xi ngħidu għal allat mitoloġiċi? Minflok ma jipprattikaw il-​ġustizzja, allat irġiel u nisa Babilonjani kienu vendikattivi. Allat Eġizzjani ma kinux kampjuni tal-​għerf imma kienu ppreżentati bħala li kellhom djufijiet umani. Dan mhux sorprendenti, ladarba allat foloz kienu l-​prodott taʼ bnedmin “rashom vojta” li jistqarru li huma għorrief. (Rumani 1:21-23) Allat Griegi kien jintqal li jikkonfoffaw kontra xulxin. Per eżempju, fil-​mitoloġija, Żews abbuża mill-​poter tiegħu billi neħħa mit-​tron lil missieru, Kronus, li hu nnifsu kien neħħa mit-​tron lil missieru, Uranus. X’barka hi li taqdi u tfaħħar lil Jehovah, dak Alla ħaj u veru, li juri mħabba, ġustizzja, għerf, u qawwa perfetti!

Jehovah Denju taʼ Tifħir Etern

20. Is-​Sultan David liema raġunijiet ta talli faħħar isem Jehovah?

²⁰ Kif juru s-​Salmi Ħallel, Jehovah jixraqlu tifħir etern. B’mod simili, meta David u Iżraeliti sħabu kkontribwew għall-​bini tat-​tempju, hu qal quddiem il-​kongregazzjoni: “Imbierek jalla tkun, O Jehovah dak Alla taʼ Iżrael missierna, minn żmien indefinit saħansitra sa żmien indefinit. Tiegħek, O Jehovah, huma l-​kobor u s-​setgħa u l-​ġmiel u l-​eċċellenza u d-​dinjità; għax kulma hemm fis-​smewwiet u fl-​art huwa tiegħek. Tiegħek hi s-​saltna, O Jehovah, Dak ukoll li qiegħed terfaʼ lilek innifsek ’il fuq bħala kap fuq kulħadd. Il-​għana u l-​glorja huma minħabba fik, u qiegħed tiddomina kollox; u f’idek hemm qawwa u setgħa, u f’idek hemm l-​abbiltà li tagħmel kbir u li tagħti s-​saħħa lil kulħadd. U issa, O Alla tagħna, aħna qegħdin niżżuk ħajr u nfaħħru lil ismek sabiħ.”−1 Kronaki 29:10-13.

21. Rivelazzjoni 19:l-6 jagħti liema evidenza dwar li Jehovah jiġi mfaħħar mill-​qtajja tas-​sema?

²¹ Jehovah se jiġi wkoll imbierek u mfaħħar eternament fis-​smewwiet. L-​appostlu Ġwanni samaʼ “folla kbira fis-​sema” tgħid: “Faħħru lil Jah! Is-​salvazzjoni u l-​glorja u l-​qawwa jappartjenu lil Alla tagħna, għaliex il-​ġudizzji tiegħu huma veri u taʼ tjieba. Għax hu esegwixxa l-​ġudizzju fuq il-​mara żienja l-​kbira [Babilonja l-​Kbira] li kkorrompiet l-​art biż-​żina tagħha, u hu vvendika d-​demm tal-​irsiera tiegħu taħt idha.” Għal darb’oħra huma qalu: “Faħħru lil Jah!” Hekk għamlu “l-​erbgħa u għoxrin anzjani u l-​erbaʼ ħlejjaq ħajjin.” Leħen mit-​tron qal: “Kunu qegħdin tfaħħru lil Alla tagħna, intom l-​irsiera kollha tiegħu, li tibżgħu minnu, iż-​żgħar u l-​kbar.” Imbagħad Ġwanni żied: “Jien smajt dak li kien bħal leħen taʼ folla kbira u bħall-​ħoss taʼ ħafna ilmijiet u bħall-​ħoss taʼ ragħdiet qawwijin. Huma qalu: ‘Faħħru lil Jah, għaliex Jehovah Alla tagħna, li Jistaʼ Kollox, beda jaħkem bħala sultan.’”−Rivelazzjoni 19:l-6.

22. Jehovah kif se jiġi mfaħħar fid-​dinja ġdida mwiegħda tiegħu?

²² Kemm hu xieraq li qtajja tas-​sema jfaħħru lil Jehovah! Fid-​dinja ġdida tiegħu li issa hija qrib, uħud leali li jiġu rxoxtati se jingħaqdu maʼ dawk li se jinħelsu fit-​tmiem taʼ din is-​sistema f’li jfaħħru lil Jah. Muntanji għoljin se jerfgħu rjushom f’għanjiet taʼ tifħir lil Alla. Għoljiet li jħaddru u siġar tal-​frott se jkantaw it-​tifħir tiegħu. Iva, kull ħlejqa li tgħix u tieħu n-​nifs se tfaħħar isem Jehovah fil-​kor kbir taʼ Hallelujah! (Salm 148) Se jinstamaʼ leħnek fost dik il-​folla ferriħija? Se jinstamaʼ jekk int taqdi lealment lil Jah mal-​poplu tiegħu. Dak għandu jkun l-​iskop tiegħek fil-​ħajja, għax min hu bħal Jehovah Alla tagħna?

Kif Twieġeb Int?

◻ Għala nfaħħru lil Alla Jehovah?

◻ Jehovah b’liema modi hu bla paragun?

◻ X’evidenza hemm li Jehovah juri mogħdrija?

◻ Jehovah kif inhu differenti minn idoli bla ħajja u allat foloz?

◻ Għala nistgħu ngħidu li Jehovah se jirċievi tifħir etern fis-​sema u fl-​art?