Itfaʼ Ħsiebek fuq l-​Ispirtu u Tgħix!

“Li titfaʼ ħsiebek fuq l-​ispirtu jfisser ħajja.”—RUMANI 8:​6, NW.

1, 2. Il-Bibbja liema kuntrast tagħmel bejn “il-​ġisem” u “l-​ispirtu”?

M’HIJIEX ħaġa faċli li żżomm moralment nadif f’għajnejn Alla waqt li tgħix f’soċjetà mħassra li tinkuraġġik biex tintelaq għax-​xewqat tal-​ġisem. Madankollu, l-​Iskrittura tagħmel kuntrast bejn “il-​ġisem” u “l-​ispirtu.” Din tiġbed linja ċara bejn il-​konsegwenzi ħżiena li jiġu fuq min iħalli lilu nnifsu jinħakem mill-​ġisem midneb u l-​barkiet li jiġu bħala riżultat taʼ li wieħed iħalli lilu nnifsu jiġi influwenzat mill-​ispirtu qaddis t’Alla.

² Per eżempju, Ġesù Kristu qal: “Hu l-​ispirtu li jagħti l-​ħajja, il-​ġisem ma jiswa għal xejn. Il-​kliem li jiena għedtilkom huwa spirtu u ħajja.” (Ġwann 6:63) Lill-​Kristjani fil-​Galazja, l-​appostlu Pawlu kitbilhom: ‘Il-​passjonijiet tal-​ġisem huma kontra l-​ispirtu, u l-​ispirtu hu kontra l-​ġisem; dawn it-​tnejn huma kontra xulxin.’ (Galatin 5:17) Pawlu qal ukoll: “Min jiżraʼ f’ġismu jaħsad mill-​ġisem it-​taħsir; min jiżraʼ fl-​ispirtu, jaħsad mill-​ispirtu l-​ħajja taʼ dejjem.”—Galatin 6:8.

3. X’inhu meħtieġ biex ninħelsu minn xewqat u ġibdiet ħżiena?

³ L-​ispirtu qaddis taʼ Jehovah, jew il-​forza attiva tiegħu, jistaʼ jtemm ‘ix-​xewqat imniġġsin tal-​ġisem’ u l-​ħakma qerrieda mill-​ġisem midneb. (1 Pietru 2:​11) Biex ninħelsu mill-​jasar tal-​ġibdiet ħżiena, huwa vitali li jkollna l-​għajnuna taʼ l-​ispirtu t’Alla, għax Pawlu kiteb: “Li titfaʼ ħsiebek fuq il-​laħam [jew, il-​ġisem] ifisser mewt, imma li titfaʼ ħsiebek fuq l-​ispirtu jfisser ħajja u paċi.” (Rumani 8:​6, NW) X’ifisser li titfaʼ ħsiebek fuq l-​ispirtu?

“Li Titfaʼ Ħsiebek fuq l-​Ispirtu”

4. X’ifisser “li titfaʼ ħsiebek fuq l-​ispirtu”?

⁴ Meta Pawlu kiteb dwar “li titfaʼ ħsiebek fuq l-​ispirtu,” hu uża kelma Griega li tfisser “mod taʼ ħsieb, moħħ(-mixħut), . . . mira, aspirazzjoni, stinkar.” Kelma oħra mill-​istess għerq tfisser “li taħseb, li titfaʼ ħsiebek f’ċerta direzzjoni.” B’hekk, li titfaʼ ħsiebek fuq l-​ispirtu jfisser li tkun kontrollat, dominat, u mqanqal mill-​forza attiva taʼ Jehovah. Dan ifisser li minn jeddna nħallu l-​ħsibijiet, il-​ġibdiet, u l-​miri tagħna jiġu influwenzati bis-​sħiħ mill-​ispirtu qaddis t’Alla.

5. Sa liema punt għandna nissottomettu ruħna għall-​influwenza taʼ l-​ispirtu qaddis?

⁵ Pawlu enfasizza sa liema punt għandna nissottomettu ruħna għall-​influwenza taʼ l-​ispirtu qaddis meta tkellem dwar li ‘nservu bħala lsiera taʼ l-​ispirtu.’ (Rumani 7:6) Fuq il-​bażi tal-​fidi tagħhom fis-​sagrifiċċju taʼ Ġesù bħala fidwa, il-​Kristjani ġew meħlusin mill-​ħakma tad-​dnub, u b’hekk ‘mietu’ għas-​sitwazzjoni li kienu fiha qabel bħala lsiera tiegħu. (Rumani 6:​2, 11) Dawk li b’mod figurattiv mietu għad-​dnub għadhom ħajjin fiżikament u issa ħielsa li jsegwu lil Kristu bħala ‘lsiera tal-​ġustizzja.’—Rumani 6:​18-20.

Bidla Impressjonanti

6. Liema bidla jġarrbu dawk li jsiru ‘lsiera tal-​ġustizzja’?

⁶ Il-​bidla minn “ilsiera tad-​dnub” għal qaddejja t’Alla bħala ‘lsiera tal-​ġustizzja’ hija tabilħaqq impressjonanti. Pawlu kiteb dwar xi wħud li ġarrbu din il-​bidla: “Issa tnaddaftu, tqaddistu u ġejtu ġġustifikati fl-​isem taʼ Sidna Ġesù Kristu u fl-​Ispirtu taʼ Alla tagħna.”—Rumani 6:​17, 18; 1 Korintin 6:11.

7. Għala huwa importanti li nħarsu lejn l-​affarijiet bil-​mod kif iħares lejhom Jehovah?

⁷ Biex inġarrbu din il-​bidla taʼ l-​għaġeb, l-​ewwel irridu nitgħallmu dwar il-​mod kif Jehovah jħares lejn l-​affarijiet. Sekli ilu, is-​salmista David talab bil-​ħrara lil Alla: “Triqatek, Mulej, għarrafni . . . Mexxini fis-​sewwa tiegħek u għallimni.” (Salm 25:​4, 5) Jehovah semgħu lil David. Anki llum, Hu jistaʼ jwieġeb talb simili mingħand il-​qaddejja tiegħu. Ladarba t-​triqat u l-​verità t’Alla huma ndaf u qaddisa, ikun t’għajnuna li nimmeditaw fuqhom jekk niġu ttantati biex inċedu għal xi xewqat imniġġsa tal-​ġisem.

L-​Irwol Vitali tal-​Kelma t’Alla

8. Għala huwa vitali li nistudjaw il-​Bibbja?

⁸ Il-​Kelma t’Alla, il-​Bibbja, hija prodott taʼ l-​ispirtu tiegħu. B’hekk, mod vitali kif inħallu l-​ispirtu jopera fuqna hu billi naqraw u nistudjaw il-​Bibbja—kuljum jekk jistaʼ jkun. (1 Korintin 2:​10, 11; Efesin 5:18) Meta nimlew moħħna u qalbna bil-​veritajiet u l-​prinċipji tal-​Bibbja niġu megħjunin nirreżistu l-​attakki fuq l-​ispiritwalità tagħna. Iva, meta jinqalgħu xi tentazzjonijiet immorali, l-​ispirtu t’Alla jistaʼ jġagħalna niftakru ħsibijiet skritturali u prinċipji taʼ gwida li jistgħu jsaħħu d-​determinazzjoni tagħna li naġixxu fi qbil mar-​rieda t’Alla. (Salm 119:​1, 2, 99; Ġwann 14:26) B’hekk ma nitqarrqux u naqbdu xi triq ħażina.—2 Korintin 11:3.

9. L-​istudju tal-​Bibbja kif jistaʼ jsaħħilna d-​determinazzjoni li nħarsu r-​relazzjoni tagħna maʼ Jehovah?

⁹ Hekk kif inkomplu nistudjaw l-​Iskrittura bis-​sinċerità u bis-​serjetà permezz taʼ pubblikazzjonijiet ibbażati fuq il-​Bibbja, l-​ispirtu t’Alla jinfluwenza ’l moħħna u ’l qalbna, u b’hekk jgħinna nkabbru r-​rispett tagħna għal-​livelli taʼ Jehovah. Ir-​relazzjoni tagħna m’Alla ssir l-​iktar ħaġa importanti f’ħajjitna. Meta niffaċċjaw xi tentazzjoni, ma nħallux ħsibijietna jiġru bina dwar kemm jistaʼ jkun pjaċevoli li nagħmlu l-​ħażen. Minflok, kulma naħsbu dwaru dak il-​ħin għandu jkun li nżommu l-​integrità tagħna lejn Jehovah. Apprezzament qawwi għar-​relazzjoni tagħna miegħu jqanqalna biex nikkumbattu kull inklinazzjoni li tistaʼ tħassar jew teqred din ir-​relazzjoni.

“Kemm Inħobbha l-​Liġi Tiegħek!”

10. Għala huwa neċessarju li nobdu l-​liġi taʼ Jehovah sabiex nitfgħu ħsiebna fuq l-​ispirtu?

¹⁰ Jekk irridu nitfgħu ħsiebna fuq l-​ispirtu mhux biżżejjed li jkollna għarfien tal-​Kelma t’Alla. Is-​Sultan Salamun kien jafhom sew il-​livelli taʼ Jehovah, imma naqas li jsegwihom lejn it-​tmiem taʼ ħajtu. (1 Slaten 5:​9, 10 [4:​29, 30, NW]; 11:​1-6) Jekk aħna nies spiritwali, mhux se naraw biss il-​bżonn li nkunu nafu x’tgħid il-​Bibbja imma wkoll li nobdu l-​liġi t’Alla b’qalbna kollha. Dan ifisser li neżaminaw bir-​reqqa l-​livelli taʼ Jehovah u nagħmlu ħilitna kollha biex insegwuhom. Is-​salmista kellu din il-​kwalità taʼ attitudni. Hu kanta: “Kemm inħobbha l-​liġi tiegħek! Il-​jum kollu ħsiebi fiha.” (Salm 119:97) Meta nkunu verament determinati li nsegwu l-​liġi t’Alla, niġu mqanqlin nuru l-​kwalitajiet li għandu Alla f’ħajjitna. (Efesin 5:​1, 2) Minflok ma ninġibdu lejn il-​ħażin bla ma nafu kif, nibdew nuru l-​frott taʼ l-​ispirtu f’ħajjitna, u x-​xewqa li nogħġbu lil Jehovah tbegħedna ‘mill-​għemejjel imħassra tal-​ġisem.’—Galatin 5:​16, 19-23; Salm 15:​1, 2.

11. Kif tispjega li l-​liġi taʼ Jehovah li tipprojbixxi ż-​żína hija taʼ protezzjoni għalina?

¹¹ Kif nistgħu niżviluppaw rispett profond u mħabba għal-​liġi taʼ Jehovah? Mod wieħed hu billi neżaminaw bir-​reqqa l-​valur tagħha. Ikkunsidra l-​liġi t’Alla li tippermetti li jkun hemm relazzjonijiet sesswali fiż-​żwieġ biss u tipprojbixxi ż-​żína u l-​adulterju. (Lhud 13:4) Iċċaħħadna din il-​liġi minn xi ħaġa tajba meta nobduha? Sejjer Missierna tas-​sema kollu mħabba jagħmel xi liġi li ċċaħħadna minn xi ħaġa li hi taʼ benefiċċju? Żgur li le! Innota x’qed jiġri fil-​ħajjiet taʼ ħafna li ma jgħixux fi qbil mal-​livelli morali taʼ Jehovah. Tqala mhux mixtieqa spiss twassalhom għall-​abort jew forsi għal żwieġ qabel il-​waqt jew żwieġ mingħajr ferħ. Ħafna jkollhom irabbu tarbija mingħajr is-​sieħeb jew is-​sieħba tagħhom. Barra minn hekk, dawk li jipprattikaw iż-​żína jesponu ruħhom għal mard trasmess sesswalment. (1 Korintin 6:18) U jekk xi qaddej taʼ Jehovah jikkommetti ż-​żína, dan jistaʼ jġarrab ħsara emozzjonali kbira. Meta l-​kuxjenza tibda tniggżu minħabba xi ħtija, dan jistaʼ jkun il-​kaġun taʼ ljieli bla rqad u niket mentali. (Salm 32:​3, 4; 51:5 [51:​3, NW]) M’huwiex ovvju, mela, li l-​liġi taʼ Jehovah li tipprojbixxi ż-​żína hija mfassla biex tipproteġina? Iva, meta nżommu l-​indafa morali l-​benefiċċji huma kbar tassew!

Itlob għall-​Għajnuna taʼ Jehovah

12, 13. Għala hu xieraq li nitolbu meta ninħakmu minn xewqat midinba?

¹² Ċertament li trid titlob mill-​qalb biex tibqaʼ titfaʼ ħsiebek fuq l-​ispirtu. Huwa xieraq li titlob għall-​għajnuna taʼ l-​ispirtu t’Alla, għax Ġesù qal: “Mela jekk intom . . . tafu tagħtu lil uliedkom ħwejjeġ tajba, kemm aktar il-​Missier mis-​smewwiet jagħti spirtu qaddis lil dawk li jitolbuhulu!” (Luqa 11:13) Fit-​talb nistgħu nesprimu ruħna dwar il-​bżonn li nistrieħu fuq l-​ispirtu għall-​għajnuna fid-​dgħjufijiet tagħna. (Rumani 8:​26, 27) Jekk nirrealizzaw li qed niġu effettwati minn xewqat jew attitudnijiet midinba, jew jekk xi ħadd taʼ l-​istess twemmin li jħobbna jiġbdilna l-​attenzjoni għal dan, ikun għaqli li nkunu speċifiċi dwar il-​problema meta nitolbu ’l Alla għall-​għajnuna biex negħlbu dawn it-​tendenzi.

¹³ Jehovah jistaʼ jgħinna nikkonċentraw fuq affarijiet li huma ġusti, safjin, virtużi, u li jistħoqqilhom tifħir. U kemm hu xieraq li nitolbuh bil-​ħrara sabiex “is-​sliem taʼ Alla” jgħassilna qalbna u moħħna! (Filippin 4:​6-8) Għalhekk, ejja nitolbu għall-​għajnuna taʼ Jehovah biex infittxu li jkollna “l-​ġustizzja, it-​tjieba, il-​fidi, l-​imħabba, is-​sabar, il-​ħlewwa.” (1 Timotju 6:​11-14) Bl-​għajnuna taʼ Missierna tas-​sema, l-​ansjetajiet u t-​tentazzjonijiet ma jikbrux sal-​punt li ma nkunux nistgħu nikkontrollawhom. Minflok, ħajjitna tkun trankwilla mimlija bil-​paċi li jagħtina Alla.

Tnikkitx l-​Ispirtu

14. L-​ispirtu t’Alla għala huwa forza taʼ ndafa?

¹⁴ Qaddejja maturi taʼ Jehovah japplikaw personalment il-​parir taʼ Pawlu: “Ixxekklux l-​Ispirtu.” (1 Tessalonikin 5:19) Ladarba l-​ispirtu t’Alla jissejjaħ “l-​ispirtu tal-​qdusija,” dan huwa nadif, pur, u sagru. (Rumani 1:​4, KŻ) B’hekk, meta jopera fuqna, dan l-​ispirtu hu forza taʼ qdusija, jew indafa. Jgħinna nżommu ħajjitna nadifa li tingħaraf mill-​ubbidjenza lejn Alla. (1 Pietru 1:2) Min jieħu sehem fi kwalunkwe drawwa mniġġsa jkun qed jinjora dan l-​ispirtu, u dan jistaʼ jkollu konsegwenzi diżastrużi. Kif?

15, 16. (a) Kif nistgħu nnikktu l-​ispirtu t’Alla? (b) Kif nistgħu nevitaw li nnikktu l-​ispirtu taʼ Jehovah?

¹⁵ Tajjeb, Pawlu kiteb: “Tnikktux l-​Ispirtu s-​Santu taʼ Alla, li fih intom issiġillati għal jum il-​fidwa.” (Efesin 4:30) L-​Iskrittura tidentifika l-​ispirtu taʼ Jehovah bħala siġill, jew “rahan” għall-​Kristjani midlukin u leali. Dan ifisser ħajja immortali fis-​sema. (2 Korintin 1:22; 1 Korintin 15:​50-57; Apokalissi 2:10) L-​ispirtu t’Alla jistaʼ jiggwida lill-​midlukin u lil sħabhom b’tama għall-​art f’ħajja taʼ fedeltà u jistaʼ jgħinhom jevitaw għemejjel midinba.

¹⁶ L-​appostlu wissa kontra tendenzi lejn il-​gideb, serq, kondotta taʼ mistħija, u affarijiet bħal dawn. Jekk inħallu lilna nfusna ninġibdu lejn dawn l-​affarijiet, inkunu qed immorru kontra l-​pariri mnebbħa bl-​ispirtu fil-​Kelma t’Alla. (Efesin 4:​17-29; 5:​1-5) B’hekk, b’xi mod nistgħu nkunu qegħdin innikktu l-​ispirtu t’Alla, u aħna żgur li ma rridux nagħmlu hekk. Jekk niġu f’dan, meta xi ħadd minna jibda jinjora l-​pariri tal-​Kelma taʼ Jehovah, jistaʼ jibda jiżviluppa attitudnijiet u tendenzi li jistgħu jwassluh biex jidneb apposta u jitlef il-​favur t’Alla. (Lhud 6:​4-6) Għalkemm forsi bħalissa m’aħniex nipprattikaw id-​dnub, nistgħu nkunu mexjin f’dik id-​direzzjoni. Jekk taʼ sikwit immorru kontra l-​gwida taʼ l-​ispirtu, inkunu qed innikktuh. Inkunu wkoll qed nirreżistu u nnikktu lil Jehovah, is-​sors taʼ l-​ispirtu qaddis. Bħala nies li jħobbu ’l Alla, qatt m’għandna nkunu rridu li nagħmlu dan. Minflok, ejja nitolbu għall-​għajnuna taʼ Jehovah sabiex ma nnikktux l-​ispirtu tiegħu imma nkunu nistgħu nġibu unur lill-​isem qaddis tiegħu billi nkomplu nitfgħu ħsiebna fuq l-​ispirtu.

Ibqaʼ Itfaʼ Ħsiebek fuq l-​Ispirtu

17. Liema huma xi miri spiritwali li nistgħu nagħmlu, u għala jkun għaqli li naħdmu biex nilħquhom?

¹⁷ Mod eċċellenti li bih nibqgħu nitfgħu ħsiebna fuq l-​ispirtu hu li nagħmlu miri spiritwali u naħdmu biex inwettquhom. Dan jiddependi fuq il-​bżonnijiet u ċ-​ċirkustanzi tagħna. Il-​miri tagħna jistgħu jinkludu li ntejbu d-​drawwiet tagħna taʼ studju jew li nżidu s-​sehem tagħna fix-​xogħol taʼ l-​ippridkar. Mira oħra tistaʼ tkun li nistinkaw għal xi privileġġ speċifiku taʼ servizz, bħall-​ministeru taʼ pijunier full-time, is-​servizz f’Betel, jew ix-​xogħol missjunarju. Dan se jokkupalna moħħna b’interessi spiritwali u se jgħinna biex ma nċedux għad-​dgħjufijiet umani. Jgħinna wkoll biex ma niġux imħajrin mill-​miri materjalistiċi u xewqat mhux skritturali li tant huma komuni f’din id-​dinja. Din żgur li hi għażla għaqlija, għax Ġesù ħeġġiġna: “Tgeddsux għalikom teżori f’din id-​dinja, fejn kollox jitmermer bil-​kamla u s-​sadid, u fejn il-​ħallelin jinfdu u jisirqu. Iżda ġemmgħu għalikom teżori fis-​sema, fejn xejn ma jitmermer u la bil-​kamla u lanqas bis-​sadid, u fejn ma hemmx ħallelin jinfdu u jisirqu. Għax fejn hemm it-​teżor tiegħek, hemm tinsab qalbek ukoll.”—Mattew 6:​19-21.

18. Għala huwa daqshekk importanti li nkomplu nitfgħu ħsiebna fuq l-​ispirtu f’dawn l-​aħħar jiem?

¹⁸ Ċertament li l-​iktar ħaġa għaqlija li nistgħu nagħmlu f’dawn l-​aħħar jiem hi li nitfgħu ħsiebna fuq l-​ispirtu u nżommu ’l bogħod mix-​xewqat dinjin. (2 Timotju 3:​1-5) Wara kollox, “id-​dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.” (1 Ġwann 2:​15-17) Per eżempju, jekk Kristjan żagħżugħ ikollu l-​mira għas-​servizz full-time, dan jistaʼ jservi taʼ gwida għalih matul is-​snin diffiċli taʼ l-​adolexxenza jew taż-​żgħożija. Meta ssirlu pressjoni biex jikkomprometti ruħu, individwu bħal dan ikollu idea ċara f’moħħu taʼ dak li jrid iwettaq fis-​servizz taʼ Jehovah. Bniedem spiritwali bħal dan jaraha ħaġa mhix għaqlija, saħansitra bluha, li jwarrab il-​miri spiritwali biex jiġri wara affarijiet materjali jew pjaċiri li d-​dnub iwiegħed li jagħtih. Ftakar li Mosè għax kien bniedem spiritwali “għażel li aħjar ikun imkasbar flimkien mal-​poplu taʼ Alla milli jgawdi l-​hena tad-​dnub.” (Lhud 11:​24, 25) Kemm jekk għadna żgħażagħ u kemm jekk kbirna sew fl-​età, nagħmlu għażla simili meta nkomplu nitfgħu ħsiebna fuq l-​ispirtu minflok fuq il-​ġisem midneb.

19. Liema benefiċċji se ngawdu jekk inkomplu nitfgħu ħsiebna fuq l-​ispirtu?

¹⁹ “Li titfaʼ ħsiebek fuq il-​laħam ifisser mewt,” filwaqt li meta “titfaʼ ħsiebek fuq l-​ispirtu jfisser ħajja u paċi.” (Rumani 8:​6, 7, NW) Jekk nibqgħu nitfgħu ħsiebna fuq l-​ispirtu, se nesperjenzaw paċi prezzjuża. Qlubna u l-​fakultajiet mentali tagħna se jkunu iktar protetti bis-​sħiħ mill-​influwenza tal-​kundizzjoni midinba tagħna. Se nkunu iktar kapaċi nirreżistu t-​tentazzjoni li nieħdu sehem fil-​ħażen. U se jkollna l-​protezzjoni divina biex inkampaw mal-​ġlieda kontinwa bejn il-​ġisem u l-​ispirtu.

20. Għala nistgħu nkunu ċerti li huwa possibbli li noħorġu rebbiħin fit-​taqbida bejn il-​ġisem u l-​ispirtu?

²⁰ Jekk inkomplu nitfgħu ħsiebna fuq l-​ispirtu, aħna nżommu rabta vitali maʼ Jehovah, is-​sors kemm tal-​ħajja u kemm taʼ l-​ispirtu qaddis. (Salm 36:10; 51:13 [36:9; 51:​11, NW]) Satana x-​Xitan u l-​aġenti tiegħu qed jagħmlu kulma jistgħu biex ikissru r-​relazzjoni tagħna m’Alla Jehovah. Huma jipprovaw jikkontrollawlna moħħna, billi jafu li jekk inċedu, dan maż-​żmien se jwassalna biex insiru l-​għedewwa t’Alla u nieħdu l-​mewt. Imma nistgħu noħorġu rebbiħin f’din it-​taqbida bejn il-​ġisem u l-​ispirtu. Hekk ġralu Pawlu, għax meta kiteb dwar it-​taqbida tiegħu, hu l-​ewwel staqsa: “Min se jeħlisni minn dan il-​ġisem tal-​mewt?” Imbagħad, biex juri li l-​ħelsien kien possibbli, hu għajjat bil-​ferħ: “Niżżi ħajr lil Alla permezz taʼ Ġesù Kristu Sidna!” (Rumani 7:​21-25) Aħna wkoll nistgħu niżżu ħajr lil Alla permezz taʼ Kristu talli pprovdielna l-​mezz biex inkampaw mad-​dgħjufijiet umani u nibqgħu nitfgħu ħsiebna fuq l-​ispirtu bit-​tama taʼ l-​għaġeb taʼ ħajja taʼ dejjem.—Rumani 6:23.

Tiftakar Int?

• X’ifisser li titfaʼ ħsiebek fuq l-​ispirtu?

• Kif nistgħu nħallu l-​ispirtu taʼ Jehovah jopera fuqna?

• Spjega għala, fit-​taqbida tagħna kontra d-​dnub, huwa vitali li nistudjaw il-​Bibbja, nobdu l-​liġi taʼ Jehovah, u nitolbuh.

• Li nagħmlu miri spiritwali kif jistaʼ jżommna fit-​triq tal-​ħajja?

[Stampa f’paġna 16]

L-​istudju tal-​Bibbja jgħinna nirreżistu l-​attakki fuq l-​ispiritwalità tagħna

[Stampa f’paġna 17]

Huwa xieraq li nitolbu għall-​għajnuna taʼ Jehovah biex negħlbu xewqat midinba

[Stampi f’paġna 18]

Miri spiritwali jistgħu jgħinuna biex nibqgħu nitfgħu ħsiebna fuq l-​ispirtu