“Il-​Mulej Qam Tassew!”

Immaġina kemm kienu mnikktin id-​dixxipli taʼ Ġesù meta nqatel il-​Mulej tagħhom. It-​tama tagħhom kienet tidher li hi bla ħajja daqs il-​ġisem li tqiegħed fil-​qabar minn Ġużeppi t’Arimatea. Kwalunkwe stennija li Ġesù kien se jeħles lil-​Lhud mill-​madmad taʼ Ruma kienet mietet ukoll.

KIEKU dan kien it-​tmiem tal-​kwistjoni, id-​dixxipli taʼ Ġesù x’aktarx li kienu jisparixxu bħas-​segwaċi tal-​ħafna wħud li kienu jgħidu li huma l-​Messija. Imma Ġesù kien ħaj! Skond l-​Iskrittura, hu deher lis-​segwaċi tiegħu f’diversi okkażjonijiet ftit wara mewtu. Għalhekk, xi wħud minnhom tqanqlu biex jesklamaw: “Il-​Mulej qam tassew!”—Luqa 24:34.

Id-dixxipli kellhom jiddefendu l-​fidi tagħhom f’Ġesù bħala l-​Messija. Meta għamlu dan, huma ppontaw b’mod speċjali lejn il-​qawmien tiegħu mill-​imwiet bħala prova ċara li hu kien il-​Messija. Tabilħaqq, “b’qawwa kbira l-​appostli kienu jagħtu xhieda tal-​qawmien tal-​Mulej Ġesù.”—Atti 4:33.

Kieku kien hemm xi ħadd li xi darba jew oħra wera li dan l-​irxoxt kien ingann—forsi billi jġiegħel lil wieħed mid-​dixxipli jammetti li kien hekk jew billi juri li l-​ġisem taʼ Ġesù kien għadu fil-​qabar—il-​Kristjanità kienet tfalli mill-​bidu. Imma ma fallietx. Peress li kienu jafu li Kristu kien ħaj, is-​segwaċi taʼ Ġesù marru jipproklamaw l-​irxoxt tiegħu maʼ kullimkien, u kotriet sħaħ saru jemmnu fi Kristu rxoxtat.

Għala tistaʼ temmen int ukoll fl-​irxoxt taʼ Ġesù? X’evidenza hemm li din kienet ġrajja li seħħet tassew?

Għala Għandna Nikkunsidraw l-​Evidenza?

L-​erbaʼ rakkonti taʼ l-​Evanġelju kollha jirrapportaw dwar l-​irxoxt taʼ Ġesù. (Mattew 28:​1-10; Mark 16:​1-8; Luqa 24:​1-12; Ġwann 20:​1-29)a Porzjonijiet oħrajn taʼ l-​Iskrittura Griega Kristjana jitkellmu b’ċertezza dwar il-​qawmien taʼ Kristu mill-​mewt.

Mhux taʼ b’xejn li l-​irxoxt taʼ Ġesù xxandar bil-​qawwa mis-​segwaċi tiegħu! Jekk hu fil-​fatt tqajjem għall-​ħajja minn Alla, din hi l-​iktar aħbar taʼ l-​għaġeb li d-​dinja qatt semgħet. Ifisser li Alla jeżisti. Iktar minn hekk, ifisser li Ġesù hu ħaj eżatt issa.

Kif jeffettwana dan? Sewwa, Ġesù talab: “Din hi l-ħajja ta’ dejjem, li jagħrfu lilek, Alla waħdek veru, u lil Ġesù Kristu, li inti bgħatt.” (Ġwann 17:3) Iva, nistgħu niksbu għarfien li jagħti l-​ħajja dwar Ġesù u Missieru. Billi napplikaw dan l-​għarfien, saħansitra jekk immutu, aħna stess nistgħu niġu rxoxtati, ladarba Ġesù ġie rxoxtat. (Ġwann 5:​28, 29) Jistaʼ jkollna t-​tama taʼ ħajja taʼ dejjem fuq art magħmula ġenna taħt is-​Saltna ċelestjali t’Alla li qegħda f’idejn l-​Iben glorifikat tiegħu, Ġesù Kristu, is-​Sultan tas-​slaten.—Isaija 9:​5, 6 [9:​6, 7, NW]; Luqa 23:43; Apokalissi 17:14.

Mela, allura, il-​mistoqsija dwar jekk Ġesù qamx fil-​fatt mill-​imwiet jew le hija importanti ħafna. Barra minn hekk, teffettwa l-​ħajja tagħna issa u l-​prospetti li għandna għall-​futur. Huwa għal din ir-​raġuni li qegħdin nistidnuk teżamina erbaʼ linji t’evidenza li Ġesù miet u ġie rxoxtat.

Ġesù Miet Tassew fuq iz-​Zokk

Xi nies xettiċi jsostnu li Ġesù ma mietx tassew fuq iz-​zokk għalkemm ġie msammar miegħu. Dawn jgħidu li hu kien biss kważi mejjet, u li reġaʼ ħa l-​ħajja permezz tal-​kesħa li kien hemm fil-​qabar. Madankollu, kull sors li hu disponibbli juri li kien il-​ġisem bla ħajja taʼ Ġesù li tpoġġa fil-​qabar.

Ladarba Ġesù ngħata l-​mewt fil-​pubbliku, kien hemm ix-​xhieda għall-​fatt li hu tassew miet fuq iz-​zokk. Il-​mewt tiegħu kienet ċertifikata miċ-​ċenturjun li ħa ħsieb il-​qtil. Dan il-​fizzjal taʼ l-​armata kien bniedem professjonali li xogħlu kien jinkludi li jiddetermina jekk il-​mewt tkunx seħħet jew le. Iktar minn hekk, kien biss wara li kkonferma li Ġesù kien miet li l-​Gvernatur Ruman Ponzju Pilatu ta l-​ġisem taʼ Ġesù lil Ġużeppi t’Arimatea biex jidfnu.—Mark 15:​39-46.

Il-​Qabar Instab Vojt

L-​ewwel prova li kellhom id-​dixxipli dwar l-​irxoxt taʼ Ġesù kienet il-​qabar vojt, u din levidenza ħadd qatt ma merieha. Ġesù ġie midfun f’qabar ġdid li qatt ma kien intuża qabel. Dan il-​qabar kien viċin il-​post fejn Ġesù ġie msammar maʼ zokk, u f’dak iż-​żmien setaʼ jinstab faċilment u mingħajr tfixkil. (Ġwann 19:​41, 42) Ir-​rakkonti taʼ l-​Evanġelju kollha jaqblu li meta l-​ħbieb taʼ Ġesù waslu ħdejn il-​qabar fit-​tieni għodwa wara l-​mewt tiegħu, ġismu ma kienx għadu hemm.—Mattew 28:​1-7; Mark 16:​1-7; Luqa 24:​1-3; Ġwann 20:​1-10.

Il-qabar vojt bellah lill-​għedewwa taʼ Ġesù, sewwa sew bħalma bellah lil ħbiebu. L-​avversarji tiegħu kienu ilhom jistinkaw biex jarawh mejjet u midfun. Wara li wettqu l-​għan tagħhom, huma ħadu l-​prekawzjonijiet kollha billi poġġew għassies u ssiġillaw il-​qabar. Minkejja dan, fl-​għodwa taʼ l-​ewwel jum tal-​ġimgħa, il-​qabar kien vojt.

Setgħu kienu l-​ħbieb taʼ Ġesù li ħadu l-​ġisem tiegħu mill-​qabar? X’aktarx li le, ladarba l-​Evanġelji juru li kienu mnikktin ferm wara li nqatel. Barra minn hekk, id-​dixxipli tiegħu ma kinux se joqogħdu jsofru l-​persekuzzjoni u l-​mewt għal xi ħaġa li kienu jafu li kienet ingann.

Min battlu l-​qabar? Żgur li ma kinux l-​għedewwa taʼ Ġesù li ħadu l-​ġisem tiegħu. Anki kieku ħaduh, ċertament li kienu jġibuh lura iktar tard sabiex iġibu fix-​xejn dak li sostnew id-​dixxipli dwar li Ġesù kien ġie rxoxtat u kien ħaj. Imma qatt ma ġara xejn taʼ din ix-​xorta, għax dak li seħħ kien ġej minn Alla.

Ġimgħat wara, l-​għedewwa taʼ Ġesù ma qamux jipprotestaw meta Pietru xehed: “Poplu taʼ Iżrael, isimgħu dan li se ngħidilkom. Ġesù taʼ Nazaret kien bniedem li Alla takom prova tiegħu permezz tal-​mirakli u l-​għeġubijiet u s-​sinjali li għamel bih fostkom, kif intom stess tafu. Lil dan Ġesù, Alla telaqhulkom f’idejkom skond l-​għerf u l-​pjan li fassal minn qabel, u intom neħħejtuh billi sallabtuh permezz taʼ nies ħżiena; imma Alla qajjmu mill-​imwiet billi ħall l-​irbit tal-​mewt, għaliex ma setax ikun li l-​mewt iżżommu taħt is-​setgħa tagħha. Għax David jgħid fuqu, ‘Żammejt lill-​Mulej dejjem quddiemi, . . . u ġismi wkoll jistrieħ fit-​tama, għax inti ma titlaqx fl-​imwiet lil ruħi, u ma tħallix il-​Qaddis tiegħek jara t-​taħsir.’”—Atti 2:​22-27.

Ħafna Raw lil Ġesù Rxoxtat

Fil-​ktieb taʼ l-​Atti, Luqa, il-​kittieb taʼ l-​Evanġelju, stqarr: “Wara l-​passjoni tiegħu [Ġesù] dehrilhom [lill-appostli] u tahom ħafna provi li hu ħaj; f’erbgħin jum rawh kemm-il darba u kellimhom fuq il-​ħwejjeġ tas-​Saltna taʼ Alla.” (Atti 1:​2, 3) Għadd taʼ dixxipli raw lil Ġesù rxoxtat f’diversi okkażjonijiet—fi ġnien, fi triq, waqt ikla, ħdejn il-​Baħar taʼ Tiberija.—Mattew 28:​8-10; Luqa 24:​13-43; Ġwann 21:​1-23.

Il-kritiċi jitfgħu dubju fuq kemm huma veri dawn id-​dehriet. Huma jgħidu li r-​rakkonti ġew ivvintati mill-​kittieba, jew jindikaw li fir-​rakkonti hemm dawk li jidhru li huma diskrepanzi. Fil-​fatt, il-​varjazzjonijiet żgħar li hemm fir-​rakkonti taʼ l-​Evanġelju juru li ma kienx hemm qerq involut. L-​għarfien li għandna dwar Ġesù jkompli jikber meta xi wieħed mill-​kittieba jagħtina dettalji li jsaħħu dak li diġà nafu minn rakkonti oħrajn dwar ċerti inċidenti fil-​ħajja taʼ Kristu fuq l-​art.

Kienu illużjonijiet id-​dehriet taʼ Ġesù wara l-​irxoxt? Kull argument li jinġieb f’dan ir-​rigward ma jistax jitwemmen, ladarba lil Ġesù rawh ħafna u ħafna nies. Fosthom kien hemm sajjieda, nisa, qaddej ċivili, u saħansitra l-​appostlu Tumas li għall-​ewwel beda jiddubita. Dan l-​appostlu kkonvinċa ruħu biss meta ra biċ-​ċar li Ġesù kien ġie mqajjem mill-​imwiet. (Ġwann 20:​24-29) F’diversi okkażjonijiet, id-​dixxipli taʼ Ġesù m’għarfuhx mill-​ewwel lill-​Mulej tagħhom irxoxtat. Darba minnhom, rawh iktar minn 500 ruħ. Il-​biċċa l-​kbira minn dawn kienu għadhom ħajjin meta l-​appostlu Pawlu uża dan l-​inċident bħala evidenza biex jiddefendi l-​irxoxt.—1 Korintin 15:6.

Ġesù Ħaj Għandu Effett fuq in-​Nies

L-​irxoxt taʼ Ġesù m’huwiex sempliċement kwistjoni taʼ kurżità jew dibattitu. Il-​fatt li hu ħaj effettwa b’mod pożittiv lin-​nies kullimkien. Mill-​ewwel seklu ’l hawn, numru bla għadd taʼ individwi mhux talli ma baqgħux jopponu b’mod totali lill-​Kristjanità jew ikunu indifferenti lejha, imma talli saru ċerti mija fil-​mija li din hi r-​reliġjon vera. X’kien li ġab din il-​bidla fihom? L-​istudju taʼ l-​Iskrittura wriehom li Alla rxoxta lil Ġesù għall-​ħajja bħala ħlejqa spirtu u glorjuża fis-​sema. (Filippin 2:​8-11) Huma eżerċitaw fidi f’Ġesù u fil-​provvediment t’Alla Jehovah għas-​salvazzjoni permezz tas-​sagrifiċċju taʼ Kristu li tħallas bħala prezz tal-​fidwa. (Rumani 5:8) Dawn l-​individwi sabu hena ġenwin f’li jagħmlu r-​rieda t’Alla u jgħixu fi qbil mat-​tagħlim taʼ Ġesù.

Ikkunsidra x’kien ifisser li tkun Kristjan fl-​ewwel seklu. Ma kontx tikseb xi prestiġju, poter, jew għana. Għall-​kuntrarju, ħafna Kristjani bikrin ‘ferħu meta serqulhom ġidhom’ minħabba l-​fidi tagħhom. (Lhud 10:34) Il-​Kristjanità kienet tesiġi ħajja taʼ sagrifiċċju u persekuzzjoni li f’ħafna każi spiċċat f’martirju.

Qabel ma saru segwaċi taʼ Kristu, xi wħud kellhom prospetti tajbin fejn kellhom x’jaqsmu l-​prestiġju u l-​għana. Sawl taʼ Tarsu studja taħt Gamaljel, għalliem magħruf tal-​Liġi, u kien beda jsir famuż fost il-​Lhud. (Atti 9:​1, 2; 22:3; Galatin 1:14) Madankollu, Sawl sar l-​appostlu Pawlu. Hu u ħafna oħrajn taw daharhom lill-​prestiġju u l-​poter li offritilhom din id-​dinja. Għala? Sabiex ixerrdu messaġġ taʼ tama vera bbażat fuq il-​wegħdi t’Alla u fuq il-​fatt li Ġesù Kristu kien ġie rxoxtat mill-​imwiet. (Kolossin 1:28) Huma kienu lesti li jsofru għal kawża li kienu jafu li kienet imsejsa fuq il-​verità.

Illum, l-​istess ħaġa tistaʼ tingħad dwar il-​miljuni fil-​kongregazzjonijiet tax-​Xhieda taʼ Jehovah madwar id-​dinja. Ix-​Xhieda jistidnuk minn qalbhom għall-​osservanza annwali tal-​mewt taʼ Kristu, li se ssir wara nżul ix-​xemx nhar il-​Ħadd, 8 t’April, 2001. Huma jieħdu pjaċir li tkun magħhom f’din l-​okkażjoni u fil-​laqgħat kollha tagħhom fejn jistudjaw il-​Bibbja fis-​Swali tas-​Saltna tagħhom.

Għala ma titgħallimx iktar, mhux biss dwar il-​mewt u l-​irxoxt taʼ Ġesù imma wkoll dwar il-​ħajja u t-​tagħlim tiegħu? Hu jistidinna mmorru għandu. (Mattew 11:​28-30) Aġixxi issa biex tikseb għarfien eżatt dwar Alla Jehovah u Ġesù Kristu. Li tagħmel dan jistaʼ jfisser ħajja eterna taħt is-​Saltna t’Alla f’idejn Ibnu lgħażiż.

[Nota taʼ taħt]

[Stampi f’paġna 7]

Miljuni jsibu l-​hena veru bħala segwaċi taʼ Ġesù Kristu

[Sors tal-​Istampa f’paġna 6]

Mis-​Self-Pronouncing Edition of the Holy Bible, li fiha l-​verżjonijiet tal-​King James u tar-​Revised