Ġeħova Hu l-​Għajnuna Tagħna

“L-​għajnuna tiegħi mingħand [“Ġeħova,” “NW”], li għamel is-​sema u l-​art.” —Salm 121:2.

1, 2. (a) Għala nistgħu ngħidu li lkoll ikollna bżonn l-​għajnuna kultant? (b) Ġeħova x’tip taʼ persuna hu bħala l-​Għajnuna tagħna?

MIN minna qatt ma jkollu bżonn daqqa t’id? Il-​verità hi li lkoll għandna bżonn l-​għajnuna kultant—biex inkampaw maʼ problema kbira, nifilħu telfa taʼ wġigħ, u nissaportu meta nkunu għaddejjin minn xi prova diffiċli. Spiss meta l-​bnedmin ikollhom bżonn l-​għajnuna jmorru għand ħabib li jħobbhom. Jistgħu jsibuha iktar faċli jissaportu meta jaqsmu din it-​tagħbija maʼ ħabib bħal dan. Imma sħabna l-​bnedmin huma limitati f’dak li jistgħu jagħmlu biex jgħinuna. Barra minn hekk, l-​oħrajn għandhom mnejn mhux dejjem ikunu jistgħu jgħinuna meta jkollna bżonn.

² Madankollu, hemm Wieħed li jistaʼ jgħinna u għandu qawwa u riżorsi bla limitu. Iktar minn hekk, hu jaċċertana li qatt m’hu se jitlaqna. Hu l-​Wieħed identifikat mis-​salmista li bil-​fiduċja kollha ddikjara: “L-​għajnuna tiegħi mingħand [“Ġeħova,” NW].” (Salm 121:2) Is-​salmista għala kien konvint li Ġeħova kien se jgħinu? Biex inwieġbu din il-​mistoqsija, ejja neżaminaw Salm 121. Ladarba nagħmlu hekk, se nkunu nistgħu naraw għala aħna wkoll nistgħu nħarsu lejn Ġeħova bil-​fiduċja bħala l-​Għajnuna tagħna.

Sors t’Għajnuna li Hu Dejjem Disponibbli

3. Lejn liema għoljiet setaʼ refaʼ għajnejh is-​salmista, u għala?

³ Is-​salmista beda billi enfasizza l-​ħolqien taʼ Ġeħova bħala l-​bażi għall-​fiduċja: “Nerfaʼ għajnejja lejn l-​għoljiet; mnejn se tiġini l-​għajnuna? L-​għajnuna tiegħi mingħand [“Ġeħova,” NW], li għamel is-​sema u l-​art.” (Salm 121:1, 2) Is-​salmista ma refax għajnejh lejn kwalunkwe għolja li kellu quddiemu. Meta ġie mniżżel dan il-​kliem, it-​tempju taʼ Ġeħova kien jinsab f’Ġerusalemm. Din il-​belt, li tinsab ’il fuq fl-​għoljiet taʼ Ġuda, kienet il-​post figurattiv fejn kien jgħammar Ġeħova. (Salm 135:21) Is-​salmista għandu mnejn refaʼ għajnejh lejn l-​għoljiet taʼ Ġerusalemm fejn kien hemm mibni t-​tempju taʼ Ġeħova, waqt li b’fiduċja dar lejn Ġeħova għall-​għajnuna. Is-​salmista għala kien daqshekk ċert li Ġeħova setaʼ jgħinu? Għaliex hu “għamel is-​sema u l-​art.” Fi kliem ieħor, is-​salmista kien qed jgħid, ‘Żgur li m’hemm xejn li jistaʼ jtellef lill-​Ħallieq li jistaʼ kollox milli jgħinni!’—Isaija 40:26.

4. Is-​salmista kif wera li Ġeħova hu dejjem attent għall-​bżonnijiet tal-​poplu tiegħu, u dan għala huwa ħsieb taʼ faraġ?

⁴ Imbagħad, is-​salmista kompla jispjega li Ġeħova jinsab dejjem attent għall-​bżonnijiet tal-​qaddejja tiegħu: “Ma jħalli qatt li riġlek jogħtor; ma jongħosx dak li jħarsek. Ara, la jongħos u lanqas jorqod dak li jħares lil Iżrael.” (Salm 121:3, 4) M’huwiex possibbli li Alla jħalli lil dawk li jafdaw fih ‘jogħtru’ jew jesperjenzaw waqaʼ li ma jistgħux iqumu minnha. (Proverbji 24:16) Għala le? Għaliex Ġeħova hu bħal ragħaj b’għajnejh miftuħin beraħ ħalli jgħasses il-​merħla tiegħu. M’huwiex taʼ faraġ dan il-​ħsieb? Lanqas għal mument wieħed m’hu se jagħlaq għajnejh għall-​bżonnijiet tal-​poplu tiegħu. Lejl u nhar huma jinsabu taħt il-​ħarsien tiegħu.

5. Għala naqraw li Ġeħova jinsab “fuq lemintek”?

⁵ Peress li kien fiduċjuż li Ġeħova hu lProtettur leali tal-​poplu tiegħu, is-​salmista kiteb: “Il-​Mulej hu dak li jħarsek; il-​Mulej hu d-​dell tiegħek fuq lemintek. Ma tolqtokx ix-​xemx binhar, anqas il-​qamar billejl.” (Salm 121:5, 6) Għal min jivvjaġġa bil-​mixi fil-​Lvant Nofsani, post fid-​dell jipprovdi protezzjoni li żgur jieħu gost biha mix-​xemx tikwi. Ġeħova hu bħal dell għan-​nies tiegħu li jipproteġihom mill-​qilla taʼ l-​inkwiet. Innota li jingħad li Ġeħova jinsab “fuq lemintek.” Fil-​gwerer tal-​qedem, il-​leminija tas-​suldat kienet b’xi mod jew ieħor nieqsa mill-​protezzjoni tat-​tarka, li kienet tinżamm fl-​id ix-​xellugija. Ħabib leali setaʼ jipprovdi l-​protezzjoni billi jieqaf u jiġġieled fuq il-​lemin tas-​suldat. Bħal dan il-​ħabib, Ġeħova jieqaf lealment maʼ l-​aduraturi tiegħu u dejjem lest biex jgħinhom.

6, 7. (a) Is-​salmista kif jiżgurana li Ġeħova qatt m’hu se jieqaf jgħin lill-​poplu tiegħu? (b) Għala jistaʼ jkollna l-​istess fiduċja tas-​salmista?

⁶ Ġeħova qatt se jieqaf jgħin lill-​poplu tiegħu? Lanqas qatt ma jistaʼ jkun. Is-​salmista kkonkluda: “Iħarsek il-​Mulej minn kull deni; hu jħarislek ħajtek. Il-​Mulej iħarsek fil-​ħruġ u d-​dħul tiegħek, minn issa u għal dejjem.” (Salm 121:7, 8) F’vers 5, is-​salmista qal: “Il-​Mulej hu dak li jħarsek,” jiġifieri bħalissa. F’dawn il-​versi, is-​salmista kiteb: “Il-​Mulej iħarsek,” jiġifieri fil-​futur. L-​aduraturi veri huma żgurati li l-​għajnuna taʼ Ġeħova se tingħatalhom anki fil-​futur. Imorru fejn imorru, hu x’inhu l-​inkwiet li jiffaċċjaw, huma qatt ma se jkunu ’l bogħod wisq biex Ġeħova jagħtihom daqqa t’id.—Proverbji 12:21.

⁷ Tabilħaqq, il-​kittieb taʼ Salm 121 kien fiduċjuż li l-​Ħallieq li jistaʼ kollox jgħasses fuq il-​qaddejja tiegħu bit-​tenerezza taʼ ragħaj li jħobb u bil-​ħarsien t’għassies attent. Għandna kull raġuni biex ikollna l-​istess fiduċja tas-​salmista, għaliex Ġeħova ma jinbidilx. (Malakija 3:6) Ifisser dan li dejjem se ningħataw protezzjoni fiżika? Le, imma sakemm nibqgħu nduru lejh bħala l-​Wieħed li jgħinna, hu se jħarisna kontra dak kollu li jistaʼ jagħmlilna ħsara spiritwali. Huwa naturali li nistaqsu, ‘Kif jgħinna Ġeħova?’ Ejja neżaminaw erbaʼ modi kif jagħmel dan. F’dan l-​artiklu, se niddiskutu kif għen lill-​qaddejja tiegħu fi żminijiet Bibliċi. Fl-​artiklu li jmiss, se nikkunsidraw kif jgħin lin-​nies tiegħu llum.

Għajnuna mill-​Anġli

8. Għala ma niskantawx li l-​anġli jieħdu interess kbir fil-​benesseri tal-​qaddejja t’Alla fuq l-​art?

⁸ Ġeħova għandu miljuni u miljuni t’anġli taħt il-​kmand tiegħu. (Danjel 7:9, 10) Dawn l-​ulied spirti jwettqu r-​rieda tiegħu lealment. (Salm 103:20) Huma jafu li Ġeħova jħobb ħafna lill-​aduraturi umani tiegħu u li hu jrid jgħinhom. Mhux taʼ b’xejn li l-​anġli jieħdu interess kbir fil-​benesseri tal-​qaddejja t’Alla fuq l-​art. (Luqa 15:10) Mela żgur li l-​anġli jitgħaxxqu meta jintużaw minn Ġeħova biex jgħinu lill-​bnedmin. Ġeħova b’liema mod uża lill-​anġli biex jgħinu lill-​qaddejja umani tiegħu taʼ żmien il-​qedem?

9. Agħti eżempju taʼ kif l-​anġli ngħataw l-​awtorità u l-​qawwa minn Alla biex jipproteġu lill-​bnedmin leali.

⁹ L-​anġli ngħataw l-​awtorità u l-​qawwa minn Alla biex jipproteġu u jeħilsu lill-​bnedmin leali. Żewġ anġli għenu lil Lot u lil uliedu l-​bniet biex jaħarbu l-​qerda taʼ Sodoma u Gomorra. (Ġenesi 19:1, 15-17) Anġlu wieħed qatel 185,000 suldat Assirjan li kienu qed jheddu lil Ġerusalemm. (2 Slaten 19:35) Meta Danjel intefaʼ f’ħofra taʼ l-​iljuni, Ġeħova “bagħat l-​anġlu tiegħu jagħlaq ħalq l-​iljuni.” (Danjel 6:22, 23 [6:21, 22, NW]) Kien anġlu li ħeles lill-​appostlu Pietru mill-​ħabs. (Atti 12:6-11) Il-​Bibbja ssemmi ħafna eżempji oħra taʼ protezzjoni anġelika, u għalhekk tikkonferma dak li jgħid Salm 34:8 (34:7, NW): “L-​anġlu tal-​Mulej jgħasses madwar dawk li jibżgħu minnu, u jeħlishom.”

10. Ġeħova kif uża anġlu biex jinkuraġġixxi lill-​profeta Danjel?

¹⁰ Kultant, Ġeħova uża l-​anġli biex jinkuraġġixxi u jsaħħaħ lill-​bnedmin leali. Eżempju li jqanqlek taʼ dan jinsab f’Danjel kapitlu 10. Meta nkiteb, Danjel forsi kellu mal-​100 sena. Il-​profeta kien skuraġġit ferm, mid-​dehra minħabba l-​istat taʼ ħerba li kienet fih Ġerusalemm u minħabba li t-​tempju dam biex jerġaʼ jinbena. Hu ħassu ansjuż ukoll minħabba viżjoni tal-​biżaʼ li ra. (Danjel 10:2, 3, 8) Alla bl-​imħabba bagħat anġlu biex jinkuraġġih. Iktar minn darba l-​anġlu fakkar lil Danjel li hu kien “raġel għażiż” f’għajnejn Alla. X’kien ir-​riżultat? Il-​profeta xwejjaħ qal lill-​anġlu: “Raddejtli saħħti lura.”—Danjel 10:11, 19.

11. Liema hu eżempju wieħed taʼ kif l-​anġli ntużaw biex jidderieġu x-​xogħol taʼ l-​ippridkar taʼ l-​aħbar tajba?

¹¹ Ġeħova uża wkoll l-​anġli biex jidderieġi x-​xogħol taʼ l-​ippridkar taʼ l-​aħbar tajba. Anġlu dderieġa lil Filippu biex jippriedka dwar Kristu lil ewnuku Etjopjan, li mbagħad tgħammed. (Atti 8:26, 27, 36, 38) Ftit wara dan, Alla ried li l-​aħbar tajba tiġi pridkata lill-​Ġentili mhux ċirkonċiżi. F’viżjoni, anġlu deher lil Kornelju, Ġentil li jibżaʼ minn Alla, u dderiġieh biex jibgħat għall-​appostlu Pietru. Meta l-​messaġġiera mibgħutin minn Kornelju sabu lil Pietru, huma qalulu: “Kornelju . . . ngħata istruzzjonijiet divini minn anġlu qaddis biex jibgħat għalik ħa tiġi f’daru u jismaʼ x’għandek x’tgħid.” Pietru mar, u b’dan il-​mod l-​ewwel Ġentili mhux ċirkonċiżi saru parti mill-​kongregazzjoni Kristjana. (Atti 10:22, 44-48) Immaġina kif tħossok li kieku tkun taf li anġlu għenek tikkuntattja persuna li għandha attitudni xierqa!

Għajnuna Permezz taʼ l-​Ispirtu Qaddis

12, 13. (a) L-​appostli taʼ Ġesù għala kellhom raġun jemmnu li l-​ispirtu qaddis setaʼ jgħinhom? (b) L-​ispirtu qaddis b’liema mod qawwa lill-​Kristjani taʼ l-​ewwel seklu?

¹² Ftit qabel ma miet, Ġesù żgura lill-​appostli li ma kinux se jitħallew mingħajr għajnuna. Il-​Missier kellu jagħtihom “ajjutant, l-​ispirtu qaddis.” (Ġwanni 14:26) L-​appostli kellhom raġun jemmnu li l-​ispirtu qaddis setaʼ jgħinhom. Wara kollox, l-​Iskrittura ispirata fiha ħafna eżempji taʼ kif Ġeħova uża l-​ispirtu qaddis, l-​iktar forza qawwija disponibbli, biex jgħin lill-​poplu tiegħu.

¹³ F’ħafna okkażjonijiet, l-​ispirtu qaddis intuża biex iqawwi lill-​bnedmin ħalli jagħmlu r-​rieda taʼ Ġeħova. L-​ispirtu qaddis ta l-​qawwa lill-​Imħallfin biex jeħilsu lill-​Iżraelin. (Mħallfin 3:9, 10; 6:34) Dan l-​istess spirtu qawwa lill-​Kristjani taʼ l-​ewwel seklu biex ikomplu jippridkaw bil-​qlubija minkejja kull tip t’oppożizzjoni. (Atti 1:8; 4:31) Il-​fatt li rnexxielhom iwettqu l-​ministeru tagħhom ta evidenza qawwija li l-​ispirtu qaddis kien qed jaħdem. Xi spjegazzjoni oħra jistaʼ jkun hemm għal kif individwi “komuni u taʼ ftit skola” setgħu jxerrdu l-​messaġġ tas-​Saltna madwar id-​dinja magħrufa taʼ dak iż-​żmien?—Atti 4:13; Kolossin 1:23.

14. Ġeħova kif uża l-​ispirtu qaddis biex jagħti fehma akbar lill-​poplu tiegħu?

¹⁴ Ġeħova uża wkoll l-​ispirtu qaddis biex jagħti fehma akbar lill-​poplu tiegħu. Bl-​għajnuna taʼ l-​ispirtu t’Alla, Ġużeppi setaʼ jinterpreta l-​ħolm profetiku tal-​Fargħun. (Ġenesi 41:16, 38, 39) Permezz taʼ l-​ispirtu tiegħu, Ġeħova wera l-​iskopijiet tiegħu lill-​umli imma ħbiehom lill-​kburin. (Mattew 11:25) Għalhekk, dwar l-​affarijiet li jipprovdi Ġeħova “għal dawk li jħobbuh,” l-​appostlu Pawlu qal: “Alla rrivelah lilna permezz taʼ l-​ispirtu tiegħu.” (1 Korintin 2:7-10) Huwa biss bl-​għajnuna taʼ l-​ispirtu qaddis li individwu jifhem tassew x’inhi r-​rieda t’Alla.

Għajnuna mill-​Kelma t’Alla

15, 16. Xi ntqallu jagħmel lil Ġożwè biex jaġixxi bl-​għaqal?

¹⁵ Il-​Kelma ispirata taʼ Ġeħova “tiswa biex tgħallem,” u tippermetti lill-​qaddej t’Alla biex ikun “kapaċi għalkollox, armat bis-​sħiħ għal kull għemil tajjeb.” (2 Timotju 3:16, 17) Il-​Bibbja fiha ħafna eżempji taʼ kif in-​nies t’Alla fi żmien il-​qedem ġew megħjunin permezz taʼ siltiet mill-​Kelma tiegħu li kienu diġà mniżżlin bil-​miktub.

¹⁶ L-​Iskrittura għenet biex tiġi provduta gwida bnina lill-​aduraturi t’Alla. Meta Ġożwè ġie fdat bir-​responsabbiltà li jmexxi lil Iżrael, intqallu: “Ma jitbiegħed qatt il-​ktieb taʼ din il-​liġi [li ġie mniżżel bil-​miktub minn Mosè] minn fommok, u aħseb fuqu lejl u nhar, biex tagħraf tagħmel kull ma hu miktub fih, u hekk tirnexxi f’għemilek u jkollok ir-​riżq.” Innota li Ġeħova ma wegħedx lil Ġożwè li jagħtih l-​għerf b’xi miraklu. Minflok, jekk Ġożwè kien se jaqra u jimmedita fuq “il-​ktieb taʼ din il-​liġi,” imbagħad hu kien se jaġixxi bl-​għaqal.—Ġożwè 1:8; Salm 1:1-3.

17. Danjel u s-​Sultan Ġosija kif ġew megħjunin minn siltiet taʼ l-​Iskrittura li kienu disponibbli għalihom?

¹⁷ Il-​Kelma miktuba t’Alla għenet ukoll biex tirrivela r-​rieda u l-​iskop tiegħu. Per eżempju, Danjel induna mill-​kitbiet taʼ Ġeremija kemm kellha ddum il-​ħerba taʼ Ġerusalemm. (Ġeremija 25:11; Danjel 9:2) Ikkunsidra wkoll dak li seħħ matul ir-​renju tas-​Sultan Ġosija taʼ Ġuda. Sa dak iż-​żmien, il-​ġens kien telaq lil Ġeħova, u jidher ċar li s-​slaten ma kinux qed jagħmlu kopja persunali tal-​Liġi u jsegwuha. (Dewteronomju 17:18-20) Imma waqt li kien qed jissewwa t-​tempju, instab “il-​ktieb tal-​liġi,” possibbilment dak li kiteb Mosè. Jistaʼ jkun li din kienet il-​kitba oriġinali, li kienet tlestiet xi 800 sena qabel. Wara li qrawlu x’kien fiha, Ġosija rrealizza kemm il-​ġens kien żvija milli jagħmel ir-​rieda taʼ Ġeħova, u s-​sultan bil-​ħeġġa kollha ħa miżuri biex jagħmel dak li kien hemm miktub fil-​ktieb. (2 Slaten 22:8; 23:1-7) Ma jidhirx ċar li n-​nies t’Alla fi żmien il-​qedem ġew megħjunin minn siltiet taʼ l-​Iskrittura Mqaddsa li kienu disponibbli għalihom?

Għajnuna Permezz taʼ Sħabna fit-​Twemmin

18. Għala nistgħu ngħidu li Ġeħova hu s-​sors taʼ l-​għajnuna kulmeta aduratur veru jgħin lil ieħor?

¹⁸ L-​għajnuna li jipprovdi Ġeħova spiss tiġi minn sħabna fit-​twemmin. Tabilħaqq, Alla hu s-​sors taʼ l-​għajnuna kulmeta aduratur veru jgħin lil ieħor. Għala nistgħu ngħidu hekk? Għal żewġ raġunijiet. L-​ewwel, l-​ispirtu qaddis t’Alla huwa involut. Dan l-​ispirtu jipproduċi l-​frott, inkluż l-​imħabba u t-​tjubija, f’dawk li jfittxu li jiġu influwenzati minnu. (Galatin 5:22, 23) Għalhekk, meta xi ħadd mill-​qaddejja t’Alla jitqanqal biex jgħin lil ieħor, dan ikun evidenza ċara li l-​ispirtu taʼ Ġeħova qed jaħdem. It-​tieni, aħna magħmulin fix-​xbieha t’Alla. (Ġenesi 1:26) Dan ifisser li għandna l-​abbiltà biex nirriflettu l-​kwalitajiet tiegħu, inkluż il-​qalb tajba u l-​mogħdrija. Allura kulmeta qaddej wieħed taʼ Ġeħova jgħin lil ieħor, is-​Sors veru taʼ din l-​għajnuna hu l-​wieħed li l-​kwalitajiet tiegħu jkunu qed jiġu imitati.

19. Skond dak li hemm imniżżel fil-​Bibbja, Ġeħova kif ipprovda l-​għajnuna permezz taʼ mseħbin fit-​twemmin?

¹⁹ Fi żminijiet Bibliċi, Ġeħova kif ipprovda l-​għajnuna permezz taʼ mseħbin fit-​twemmin? Ġeħova spiss ikkaġuna li qaddej wieħed jagħti parir lil ieħor, bħal meta Ġeremija taʼ parir li salva l-​ħajja taʼ Bàruk. (Ġeremija 45:1-5) Kultant, l-​aduraturi veri ġew imqanqla jipprovdu għajnuna materjali lil sħabhom fit-​twemmin, bħal meta l-​Kristjani fil-​Maċedonja u l-​Akaja wrew il-​ħeġġa biex jgħinu lil ħuthom f’Ġerusalemm li kienu fil-​bżonn. L-​appostlu Pawlu nnota li din il-​ġenerożità b’mod xieraq ipproduċiet “espressjoni taʼ radd il-​ħajr lil Alla.”—2 Korintin 9:11.

20, 21. L-​appostlu Pawlu f’liema ċirkustanzi ġie msaħħaħ mill-​aħwa taʼ Ruma?

²⁰ Ir-​rakkonti dwar kif il-​qaddejja taʼ Ġeħova għamlu kulma setgħu biex isaħħu u jinkuraġġixxu lil xulxin tassew imissulek qalbek. Ikkunsidra eżempju li jinvolvi lill-​appostlu Pawlu. Meta kien fi vjaġġ lejn Ruma bħala ħabsi, Pawlu vvjaġġa fit-​triq prinċipali Rumana magħrufa bħala t-​Triq t’Appju. L-​aħħar parti tal-​vjaġġ ma tantx kienet pjaċevoli, għaliex wieħed kellu jgħaddi minn inħawi taʼ widien kollhom tajn.a L-​aħwa fil-​kongregazzjoni taʼ Ruma kienu jafu li kellu jiġi Pawlu. X’kienu se jagħmlu? Kienu se jistennew fil-​kumdità taʼ darhom fil-​belt sakemm Pawlu jasal u mbagħad imorru jilqgħuh?

²¹ Luqa, wieħed mill-​kittieba tal-​Bibbja, li ssieħeb maʼ Pawlu fil-​vjaġġ, jgħidilna x’ġara: “Meta l-​aħwa t’hemmhekk [taʼ Ruma] semgħu bina ġew jiltaqgħu magħna sa ħdejn is-​Suq t’Appju u t-​Tliet Taverni.” Tistaʼ timmaġina x-​xena? Peress li kienu jafu li ġej Pawlu, grupp t’aħwa vvjaġġaw minn Ruma biex jiltaqgħu miegħu. Parti mill-​grupp kien qed jistennieh fis-​Suq t’Appju, il-​post magħruf għall-​mistrieħ xi 74 kilometru ’l barra minn Ruma. Il-​bqija taʼ l-​aħwa kienu qed jistennew ħdejn it-​Tliet Taverni, post taʼ mistrieħ xi 58 kilometru barra l-​belt. Kif irreaġixxa Pawlu? Luqa jirrapporta: “Malli lemaħhom, Pawlu radd ħajr lil Alla u għamel il-​kuraġġ.” (Atti 28:15) Immaġina ftit—is-​sempliċi fatt li ra lil dawn l-​aħwa li għamlu kulma setgħu biex jivvjaġġaw it-​triq kollha kien sors taʼ saħħa u faraġ għal Pawlu! U Pawlu lil min irringrazzja għal din l-​għajnuna u l-​appoġġ? Hu rringrazzja lil dak li pprovdieha, Alla Ġeħova.

22. X’inhi l-​iskrittura tagħna tas-​sena għall-​2005, u x’se jiġi kunsidrat fl-​artiklu li jmiss?

²² Jidher ċar li dak li hemm imniżżel b’mod ispirat dwar kif Alla mexa mal-​poplu tiegħu jurina li hu tabilħaqq sors t’għajnuna. M’hemm ħadd bħalu li jistaʼ jagħtina l-​għajnuna li jagħtina hu. Bix-​xieraq, ix-​Xhieda taʼ Ġeħova se jkollhom bħala skrittura tas-​sena għall-​2005 l-​kliem taʼ Salm 121:2 (NW): “L-​għajnuna tiegħi ġejja mingħand Ġeħova.” Imma Ġeħova kif jgħinna llum? Dan se jiġi kunsidrat fl-​artiklu li jmiss.

[Nota taʼ taħt]

Tiftakar Int?

Ġeħova b’liema modi pprovda l-​għajnuna—

• permezz taʼ l-​anġli?

• permezz taʼ l-​ispirtu qaddis?

• permezz tal-​Kelma ispirata tiegħu?

• permezz taʼ sħabna l-​Kristjani?

[Kumment f’paġna 15]

L-​iskrittura tas-​sena għall-​2005 se tkun: “L-​għajnuna tiegħi ġejja mingħand Ġeħova.”—Salm 121:2, NW.

[Stampa f’paġna 16]

Pawlu rringrazzja ’l Alla għall-​għajnuna li tawh l-​aħwa taʼ Ruma