‘Barkiet Jinżlu fuq il-​Ġust’

“KONT żagħżugħ, u issa xjeħt, u qatt ma rajt il-​ġust minsi, jew uliedu jittallbu ħobżhom,” qal is-​salmista David fi xjuħitu. (Salm 37:25) Alla Jehovah jħobb lil dawk li huma ġusti u jieħu ħsiebhom b’għożża kbira. Fil-​Kelma tiegħu, il-​Bibbja, hu jħeġġeġ lil adoraturi veri biex ifittxu l-​ġustizzja.—Sofonija 2:3.

Li tkun ġust ifisser li tkun tajjeb m’Alla billi tkun fi qbil mal-​livelli tiegħu taʼ x’inhu tajjeb u x’inhu ħażin. Filwaqt li jinkuraġġina biex ngħixu skond ir-​rieda t’Alla, l-​10 kapitlu tal-​ktieb Bibliku tal-​Proverbji jiġbdilna l-​attenzjoni lejn il-​barkiet spiritwali għonja li jgawdu dawk li jagħmlu dan. Fost dawn il-​barkiet hemm provvista abbundanti taʼ ikel spiritwali li jsaħħaħ, xogħol premjanti u sodisfaċenti, u relazzjoni tajba m’Alla u mal-​bnedmin. Mela, ejja nirriflettu fuq Proverbji 10:​1-14.

Inċentiv mill-​Aqwa

Fil-​kliem tal-​ftuħ, il-​kapitlu ma jħallilna l-​ebda dubju dwar min hu l-​kittieb tas-​sezzjoni li jmiss fil-​ktieb tal-​Proverbji. Naqraw: “Il-​proverbji taʼ Salamun.” Is-​Sultan Salamun taʼ Iżrael tal-​qedem jidentifika inċentiv mill-​aqwa biex nagħmlu dak li hu tajjeb, billi jgħid: “Iben għaref iferraħ lil missieru, iben iblah inikket ’l ommu.”—Proverbji 10:1.

Kemm jitnikktu l-​ġenituri meta xi ħadd minn uliedhom jabbanduna l-​qima taʼ dak Alla veru u ħaj! Is-​sultan għaref jagħżel in-​niket taʼ l-​omm, forsi biex jissuġġerixxi li hi titnikket iktar mill-​missier. Dan kien minnu fil-​każ taʼ Doris.a Hi tirrakkonta: “Meta t-​tifel tagħna taʼ 21 sena telaq mill-​verità, jien u żewġi, Frank, konna qalbna maqsuma. Ħassejtni mweġġaʼ emozzjonalment iktar minn Frank. Għalkemm għaddew 12-il sena, il-​ferita għadha m’għalqitx.”

It-tfal jistgħu jeffettwaw il-​ferħ taʼ missierhom u jaqsmu qalb ommhom. Jalla aħna nuru l-​għerf u nferrħu lill-​ġenituri tagħna. U saħansitra iktar importanti, ejja nferrħu qalb Missierna tas-​sema, Jehovah.

‘Ruħ il-​Ġust Hija Sodisfatta’

“Ma fihx qligħ l-​għana bid-​dnewwa, mill-​mewt jinħeles min jimxi bis-​sewwa.” (Proverbji 10:2) Għall-​Kristjani veri li qed jgħixu fl-​aħħarnett taż-​żmien tat-​tmiem, dan il-​kliem hu prezzjuż tabilħaqq. (Danjel 12:4) Il-​qerda taʼ din id-​dinja li tiċħad lil Alla qiegħda wara l-​bieb. L-​ebda mezz taʼ sigurtà magħmul mill-​bniedem, sew jekk materjali, finanzjarju, jew militari, ma jistaʼ jagħti protezzjoni matul it-​tribulazzjoni l-​kbira li ġejja. (Apokalissi 7:​9, 10, 13, 14) “It-​tajbin [biss se] jgħammru fl-​art, u n-​nies sewwa joqogħdu fiha.” (Proverbji 2:21) Mela jalla nkomplu “[nfittxu] l-​ewwel is-​Saltna u l-​ġustizzja taʼ Alla.”—Mattew 6:33.

Il-​qaddejja taʼ Jehovah m’għandhomx għalfejn joqogħdu jistennew id-​dinja l-​ġdida mwiegħda biex jesperjenzaw il-​barkiet t’Alla. “Ma jħallix il-​Mulej il-​ġust bil-​ġuħ, iżda jġib fix-​xejn xewqat il-​ħżiena.” (Proverbji 10:3) Jehovah pprovda abbundanza taʼ ikel spiritwali permezz taʼ “l-​ilsir leali u diskret.” (Mattew 24:​45, NW) Żgur li l-​ġust għandu kull raġun ‘jgħanni bl-​hena taʼ qalbu.’ (Isaija 65:14) L-​għarfien huwa dak li jagħmlu ferħan. L-​għaxqa tiegħu hi li jfittex għal teżori spiritwali. Il-​wieħed mill-​agħar ma jaf bl-​ebda pjaċiri bħal dawn.

‘Il-​Bżulija Tagħmlek Għani’

Jerġaʼ l-​ġust hu mbierek b’mod ieħor. “Id l-​għażżien iġġib fuqu l-​faqar, imma id il-​bieżel iġġiblu l-​għana. Bil-​għaqal hu min jaħżen fis-​sajf, imma għajb għalih min jorqod fil-​ħsad.”—Proverbji 10:​4, 5.

Il-kliem li s-​sultan jgħid lill-​ħaddiema fi żmien il-​ħsad hu taʼ importanza partikulari. L-​istaġun tal-​ħsad m’huwiex iż-​żmien biex wieħed jongħos. Hu ż-​żmien li wieħed ikun bieżel u jaħdem sigħat twal. Hu żmien urġenti tabilħaqq.

Billi ma kellux f’moħħu l-​ħsad tal-​qamħ imma dak tan-​nies, Ġesù qal lid-​dixxipli tiegħu: “Il-​ħsad huwa kbir, iżda l-​ħaddiema ftit. Itolbu mela lil Sid il-​ħsad [Alla Jehovah] biex jibgħat ħaddiema għall-​ħsad tiegħu.” (Mattew 9:​35-38) Fis-​sena 2000, ’il fuq minn 14-il miljun persuna attendew il-​Mafkar tal-​mewt taʼ Ġesù—iktar mid-​doppju tax-​Xhieda taʼ Jehovah. Mela, min jistaʼ jiċħad il-​fatt li “l-​għelieqi bjadu għall-​ħsad”? (Ġwann 4:35) L-​adoraturi veri jitolbu lis-​Sid għal iktar ħaddiema filwaqt li fi qbil mat-​talb tagħhom iħabirku b’ħilithom kollha fix-​xogħol taʼ li jagħmlu dixxipli. (Mattew 28:​19, 20) U Jehovah kemm berikhom bil-​kbir l-​isforzi tagħhom! Matul is-​sena taʼ servizz 2000, tgħammdu iktar minn 280,000 ruħ. Dawn ukoll jistinkaw biex isiru għalliema tal-​Kelma t’Alla. Jalla jkollna l-​ferħ u s-​sodisfazzjon matul dan l-​istaġun tal-​ħsad billi nieħdu sehem sħiħ fix-​xogħol taʼ li nagħmlu dixxipli.

‘Barkiet Jinżlu fuq Rasu’

“Barkiet jinżlu fuq ras il-​ġust,” ikompli Salamun, “imma fomm il-​ħżiena jaħbi l-​vjolenza.”—Proverbji 10:6.

Wieħed li hu safi u ġust f’qalbu jagħti provi biżżejjed tal-​ġustizzja tiegħu. Kliemu juri qalb tajba u jsaħħaħ, l-​għemejjel tiegħu huma pożittivi u ġenerużi. Oħrajn jieħdu pjaċir bil-​kumpanija tiegħu. Individwu bħal dan se jirbaħ l-​istima tagħhom—il-​barkiet tagħhom—fis-​sens li huma jitkellmu tajjeb dwaru.

Mill-banda l-​oħra, wieħed mill-​agħar hu mimli mibegħda jew malizzja u moħħu biss biex jagħmel il-​ħsara lil oħrajn. Kliemu jistaʼ jkun ħelu u “jaħbi l-​vjolenza” li għandu f’qalbu, imma maż-​żmien hu jirrikorri għal attakki fiżiċi jew verbali. (Mattew 12:​34, 35) Inkella kif tpoġġiha n-​nota taʼ taħt fin-​New World Translation fuq Proverbji 10:​6, “Il-​vjolenza se tgħatti [jew tagħlaq] ħalq in-​nies mill-​agħar.” Dan jindika li l-​wieħed mill-​agħar ġeneralment jirċievi mingħand oħrajn dak li juri, jiġifieri ostilità. Dan bħallikieku jgħattilu, jew jagħlaqlu, ħalqu u jsikktu. X’barkiet jistaʼ jistenna wieħed bħal dan mingħand ħaddieħor?

“It-​tifkira tal-​ġust titbierek,” jikteb is-​sultan taʼ Iżrael, “imma isem il-​ħżiena jitħassar.” (Proverbji 10:7) Wieħed ġust iħalli tifkira sabiħa m’oħrajn, u l-​iktar importanti m’Alla Jehovah. Billi baqaʼ leali sal-​mewt, Ġesù ‘kiseb isem ogħla’ minn dak taʼ l-​anġli. (Lhud 1:​3, 4) Illum, il-​Kristjani veri jiftakru f’dawk l-​irġiel u n-​nisa leali li għexu qabel l-​era Kristjana bħala eżempji taʼ min jimitahom. (Lhud 12:​1, 2) Kemm hu differenti dan mill-​isem li jagħmel wieħed mill-​agħar, li jsir xi ħaġa li tqażżek u mnawra! Iva, “aħjar isem tajjeb minn ħafna ġid, aħjar fama tajba mill-​fidda u d-​deheb.” (Proverbji 22:1) Jalla nagħmlu isem tajjeb maʼ Jehovah u maʼ sħabna l-​bnedmin.

‘Min Jimxi fl-​Integrità Jimxi fis-​Sigurtà’

Salamun jagħmel kuntrast bejn l-​għaref u l-​iblah billi jistqarr: “Min hu tassew għaref jilqaʼ l-​kmandamenti, iżda min hu iblah fi kliemu jiġi fl-​għali.” (Proverbji 10:8) L-​għaref jaf tajjeb li “anqas min jimxi ma jistaʼ jiddirieġi l-​passi tiegħu.” (Ġeremija 10:23) Hu jagħraf il-​bżonn li jfittex il-​gwida taʼ Jehovah u jkun lest li jaċċetta l-​kmandamenti t’Alla. Min-​naħa l-​oħra, dak li hu iblah fi kliemu ma jifhmux dan il-​fatt bażiku. It-​tpaċpiċ fil-​vojt tiegħu jirrovinah.

Il-​ġust igawdi wkoll tip taʼ sigurtà li l-​wieħed mill-​agħar m’għandux. “Min jimxi dritt [“fl-​integrità,” “NW”], jimxi sod [“fis-​sigurtà,” “NW”], iżda min jgħawweġ triqatu jinqabad. Min jagħlaq għajnejh għall-​ħażen [“jegħmeż b’għajnu,” “NW”], iġib l-​inkwiet, iżda [“iblah lablabi jiġġarraf,” “KŻ”].”—Proverbji 10:​9, 10.

Bniedem taʼ integrità huwa onest f’kulma jagħmel. Hu jirbaħ ir-​rispett u l-​fiduċja t’oħrajn. Wieħed onest hu stmat bħala impjegat u taʼ spiss jiġi fdat b’responsabbiltajiet akbar. Il-​fatt li jkun magħruf għall-​onestà tiegħu jistaʼ jgħinu jżomm l-​impjieg tiegħu jew jagħmilhielu eħfef biex isib impjieg ieħor anki meta jkun hemm nuqqas taʼ xogħol. Iktar minn hekk, l-​onestà tiegħu tikkontribwixxi biex l-​atmosfera f’daru tkun pjaċevoli u paċifika. (Salm 34:​14, 15 [34:​13, 14, NW]) Hu jħossu protett fir-​relazzjoni li għandu mal-​membri l-​oħra tal-​familja tiegħu. Is-​sigurtà hija tabilħaqq frotta taʼ l-​integrità.

Is-​sitwazzjoni hija differenti fil-​każ taʼ min idur għad-​diżonestà għal qligħ egoistiku. Il-​qarrieq għandu mnejn jipprova jaħbi b’maskra l-​gideb tiegħu bi kliem mgħawweġ jew bil-​ġesti. (Proverbji 6:​12-14) Billi jegħmeż għajnejh bi ħsieb malizzjuż jew qarrieqi jistaʼ jikkaġuna ħafna wġigħ mentali lill-​vittmi tiegħu. Imma xi darba jew oħra, il-​qerq taʼ dan il-​wieħed se jsir magħruf. L-​appostlu Pawlu kiteb: “Hemm xi wħud li dnubiethom huma magħrufa sa minn qabel ma jsir ħaqq minnhom; oħrajn, iżda, dnubiethom jingħarfu wara. Hekk ukoll jintgħarfu l-​għemejjel it-​tajba; u saħansitra dawk li m’humiex magħrufa, ma jistgħux jibqgħu moħbija.” (1 Timotju 5:​24, 25) Hu min hu li hu involut—sew jekk ġenitur, ħabib, sieħeb fiż-​żwieġ, jew xi ħadd li taf—id-​diżonestà fl-​aħħar mill-​aħħar dejjem tinkixef. Min jistaʼ jafda lil xi ħadd li jkun magħruf għad-​diżonestà tiegħu?

‘Fommu Hu Għajn tal-​Ħajja’

“Fomm il-​ġust hu għajn tal-​ħajja,” jgħid Salamun, “imma fomm il-​ħżiena jaħbi d-​dnewwa.” (Proverbji 10:11) Il-​kliem li joħroġ mill-​fomm jistaʼ jdewwi jew iweġġaʼ. Jistaʼ jħeġġeġ u jagħti l-​ħajja lil persuna, jew jistaʼ jaqtgħalha qalbha.

Is-​sultan taʼ Iżrael jgħid hekk biex juri x’inhu l-​motiv li jkun hemm wara l-​kliem li jingħad: “Il-​mibegħda tqanqal il-​ġlied, imma l-​imħabba tgħatti kull ħtija.” (Proverbji 10:12) Il-​mibegħda tqanqal il-​ġlied fis-​soċjetà umana, u tkebbes l-​inkwiet. Dawk li jħobbu lil Jehovah jridu jneħħu għalkollox il-​mibegħda minn ħajjithom. Kif? Billi jħallu l-​imħabba tieħu post il-​mibegħda. “L-​imħabba tgħatti kotra taʼ dnubiet.” (1 Pietru 4:8) L-​imħabba “kollox tagħder,” jiġifieri, tgħatti kollox. (1 Korintin 13:7) L-​imħabba divina ma tistenniex il-​perfezzjoni minn nies imperfetti. Minflok ma xxandar maʼ l-​erbat irjieħ l-​iżbalji taʼ l-​oħrajn, imħabba bħal din tgħinna ninjoraw l-​iżbalji tagħhom, dment li ma jkunx involut xi ħażen serju. L-​imħabba saħansitra tagħder trattament ħażin fil-​ministeru taʼ l-​għalqa, fuq il-​post tax-​xogħol, jew fl-​iskola.

Is-​sultan għaref ikompli: “L-​għerf jinsab fuq fomm min jifhem, imma l-​bastun għal dahar min hu bla moħħ.” (Proverbji 10:13) L-​għerf jiggwida l-​passi taʼ min għandu l-​fehma. Il-​kliem li jsaħħaħ u li joħroġ minn fommu jgħin lil oħrajn jimxu fit-​triq tal-​ġustizzja. La hu u lanqas dawk li jagħtuh widen m’għandhom bżonn jitmexxew fid-​direzzjoni t-​tajba bil-​forza—bil-​bastun tal-​kastig.

‘Aħżen l-​Għarfien’

X’jgħin biex kliemna jkun bħal “nixxiegħa taʼ ilma ħaj” minflok tlablib fil-​vojt? (Proverbji 18:4) Salamun iwieġeb: “In-​nies bil-​għaqal jaħżnu l-​għerf [“għarfien,” “NW”], imma kliem l-​iblah iqarreb il-​qerda.”—Proverbji 10:14.

L-ewwel ħaġa li neħtieġu hi li moħħna jkun mimli bl-​għarfien t’Alla li jsaħħaħna. Hemm biss sors wieħed taʼ dan l-​għarfien. L-​appostlu Pawlu kiteb: “L-​Iskrittura kollha hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-​sewwa, biex hekk il-​bniedem taʼ Alla jkun perfett, mħejji għal kull ħidma tajba.” (2 Timotju 3:​16, 17) Aħna rridu naħżnu l-​għarfien u nħaffru fil-​Kelma t’Alla bħallikieku qed infittxu teżor moħbi. Kemm hi eċċitanti u premjanti tfittxija bħal din!

Biex ikollna l-​għerf fuq fommna, l-​għarfien taʼ l-​Iskrittura jrid jilħqilna wkoll qalbna. Ġesù qal lis-​semmiegħa tiegħu: “Il-​bniedem tajjeb mit-​teżor tajjeb taʼ qalbu joħroġ it-​tajjeb, u l-​bniedem ħażin mit-​teżor ħażin tiegħu joħroġ il-​ħażin, għax mill-​abbundanza tal-​qalb jitkellem il-​fomm.” (Luqa 6:45) Għalhekk, irridu nagħmluha drawwa li nimmeditaw fuq dak li qed nitgħallmu. Huwa minnu li l-​istudju u l-​meditazzjoni jeħtieġu sforz, imma kemm jagħmilna għonja spiritwalment studju bħal dan! M’hemm l-​ebda raġuni għala għandna nimxu fit-​triq taʼ wieħed li jlablab fil-​vojt, liema triq twassal biss għall-​qerda.

Iva, l-​għaref jagħmel dak li hu tajjeb f’għajnejn Alla u jħalli effett tajjeb fuq oħrajn. Hu jgawdi provvista abbundanti taʼ ikel spiritwali u għandu ħafna x’jagħmel fix-​xogħol premjanti tal-​Mulej. (1 Korintin 15:58) Bħala wieħed li jżomm l-​integrità, hu jħossu fis-​sigurtà u għandu l-​approvazzjoni t’Alla. Tabilħaqq, ħafna huma l-​barkiet tal-​ġust. Jalla nfittxu l-​ġustizzja billi ngħixu fi qbil mal-​livelli t’Alla taʼ x’inhu tajjeb u x’inhu ħażin.

[Nota taʼ taħt]

[Stampa f’paġna 25]

Li nkunu onesti jgħinna jkollna ħajja tal-​familja ferħana

[Stampa f’paġna 26]

‘In-​nies bil-​għaqal jaħżnu l-​għarfien’