Uża Ħajtek bl-​Aħjar Mod li Tistaʼ

IL-​MISSIER kien id-​dar, fis-​sodda, qed imut bil-​kanċer. Ibnu kien fil-​garaxx fejn kien jaħdem missieru, jiżbarazza l-​għodda li missieru kien juża biex jaħdem l-​injam. Kif kien bil-​għodda f’idejh, beda jaħseb fuq l-​affarijiet sbieħ li missieru kien għamel bihom. Għalkemm il-​garaxx fejn kien jaħdem kien mad-​dar, kien jaf li missieru qatt iktar ma kien se jerġaʼ jidħol hemm, qatt ma kien se jerġaʼ jżomm f’idejh l-​għodda li tant kien juża bis-​sengħa. Dak iż-​żmien kien spiċċa.

L-iben ħaseb fl-​iskrittura taʼ Koħèlet 9:10: “Kull ma ssib x’tagħmel, agħmlu b’ħiltek kollha għax ma jkunx hemm ħidma jew ħsieb, xjenza jew għerf, f’Art l-​Imwiet [il-qabar] fejn inti sejjer.” Dik l-​iskrittura kien jafha tajjeb. Kien użaha ħafna drabi meta kien jgħallem lil oħrajn dwar il-​verità tal-​Bibbja li l-​mewt hija stat taʼ inattività. Kien issa li l-​argument taʼ Salamun laqtu fil-​laħam il-​ħaj​—aħna għandna nieħdu kemm nistgħu mill-​ħajja u ngawduha waqt li dan ikun possibbli għax għad jasal iż-​żmien meta ma nkunux nistgħu ngawduha iktar.

Gawdi l-​Ħajja

Mill-​bidu sat-​tmiem tal-​ktieb taʼ Koħèlet, is-​Sultan għaref Salamun iħeġġeġ lill-​qarrejja tiegħu biex igawdu l-​ħajja. Per eżempju, kapitlu 3 jistqarr: “Hekk fhimt li għall-​bnedmin m’hemmx aħjar milli jkunu ferħana u jgawdu ġidhom f’ħajjithom. Għax li wieħed jiekol u jixrob u jduq mill-​frott taʼ xogħlu, dan ukoll hu don taʼ Alla.”—Koħèlet 3:12, 13.

Salamun kien imnebbaħ minn Alla biex jirrepeti dan il-​ħsieb: “Ara, mela, x’sibt li hemm tajjeb u jaqbel għall-​bniedem: li jiekol u jixrob u jgawdi l-​frott taʼ kull taħbit li jġarrab taħt ix-​xemx tul l-​għomor li Alla jisilfu: għax dan hu li jmissu.”​—Koħèlet 5:17 [Koħèlet 5:18, NW].

Bl-istess mod, hu jħeġġeġ liż-​żgħażagħ: “Thenna, o żagħżugħ, fir-​rebbiegħa taʼ ħajtek, u ħa tkun ferħana qalbek f’jiem żgħożitek. Imxi wara t-​taħbit taʼ qalbek, u wara l-​għaxqa taʼ għajnejk.” (Koħèlet 11:9a) Kemm hu tajjeb li wieħed igawdi kemm jistaʼ s-​saħħa u l-​enerġija taż-​żgħożija!—Proverbji 20:29.

“Ftakar f’Min Ħalqek”

M’għandniex xi ngħidu, Salamun ma jridx ifisser li huwa għaqli li niġru wara dak kollu li jogħġob lil qalbna jew lil għajnejna. (Qabbel l-1 Ġwann 2:16.) Dan jidher ċar minn dak li kiteb wara: “Iżda kun af li taʼ dan kollu [affarijiet li għandhom mnejn jissodisfaw ix-​xewqat tiegħek] jitolbok kont Alla fil-​ħaqq tiegħu.” (Koħèlet 11:9b) Hi x’inhi l-​età tagħna, irridu niftakru li Alla josserva dak li nagħmlu b’ħajjitna u se jiġġudikana skond dan.

Kemm inkunu boloh jekk nirraġunaw li nistgħu ngħixu ħajja egoċentrika u nħallu d-​devozzjoni lejn Alla għal meta nikbru fl-​età! Il-​ħajja tagħna tistaʼ tintemm kull ħin u kull mument. Anki jekk le, li naqdu lil Alla ma ssirx xi ħaġa eħfef meta nixjieħu. Billi rrikonoxxa dan il-​fatt, Salamun kiteb: “Ftakar f’min ħalqek f’jiem żgħożitek qabel ma jaslu jiem in-​niket, u joqorbu s-​snin li tgħid għalihom: ‘Xejn ma jogħġbuni.’”—Koħèlet 12:1.

Hekk kif wieħed javanza fl-​età jibda jbati mill-​effetti xejn sbieħ li din iġġib magħha. Salamun issa jiddeskrivi l-​effetti taʼ l-​età avanzata billi juża termini simboliċi. L-​idejn jibdew jitriegħdu, is-​saqajn jiddgħajfu, u s-​snien jaqgħu. Ix-​xagħar jibjad u jibda jaqaʼ. In-​ngħas tant ikun ħafif li wieħed jistenbaħ anki għall-​ħoss taʼ xi għasfur. Is-​sensi​—il-​vista, is-​smigħ, il-​mess, ix-​xamm u t-​togħma—​kollha jbattu. Il-​fatt li l-​ġisem ikun iddgħajjef iwassal għal li wieħed jibda jibżaʼ li jaqaʼ, u għal “tkexkix” ieħor li wieħed iħoss meta jkun f’postijiet pubbliċi. Eventwalment il-​bniedem imut.—Koħèlet 12:2-7.

Ix-xjuħija hi żmien taʼ għali b’mod partikulari għal dawk li naqsu li ‘jiftakru f’min ħalaqhom’ matul iż-​żgħożija tagħhom. Minħabba li jkunu ħlew ħajjithom, persuni bħal dawn ‘xejn ma jkunu jogħġbuhom’ l-​aħħar snin tagħhom. Stil taʼ ħajja li jinjora kompletament l-​eżistenza t’Alla wkoll jistaʼ jżid mal-​problemi u l-​weġgħat tax-​xjuħija. (Proverbji 5:3-11) B’sogħba, meta wħud bħal dawn iħarsu ’l quddiem, ma jaraw ebda futur ħlief il-​qabar.

Kun Hieni fi Xjuħitek

Dan ma jfissirx li wħud imdaħħlin fiż-​żmien ma jistgħux igawdu l-​ħajja. Fil-​Bibbja, l-​“għomor twil u ħafna snin” ukoll huma assoċjati mal-​barka t’Alla. (Proverbji 3:1, 2) Jehovah qal lill-​ħabib tiegħu Abraham: “Int . . . tindifen meta tkun xjeħt sewwa.” (Ġenesi 15:15) Minkejja l-​iskumditajiet li ġġib magħha l-​età avanzata, Abraham sab il-​paċi u s-​serenità fl-​aħħar snin taʼ ħajtu, u setaʼ jħares lura b’sodisfazzjon lejn ħajja taʼ devozzjoni lejn Jehovah. Hu bil-​fidi ħares ’il quddiem ukoll lejn “belt mibnija fis-​sod,” is-​Saltna t’Alla. (Lhud 11:10) B’hekk, miet “xiħ mimli bil-​għomor [“xiħ u sodisfatt,” NW].”—Ġenesi 25:8.

Għaldaqstant, Salamun ħeġġeġ: “Jekk il-​bniedem jgħix bosta snin, ħa jgawdihom kollha.” (Koħèlet 11:8) Sew jekk aħna żgħażagħ u sew jekk aħna xjuħ, il-​ferħ veru huwa marbut mar-​relazzjoni tagħna m’Alla.

Hekk kif iż-​żagħżugħ fil-​garaxx kien qed jerfaʼ l-​aħħar għodda taʼ missieru, qagħad jaħseb dwar dawn l-​affarijiet. Ħaseb dwar in-​nies kollha li kien jaf u li pprovaw jużaw ħajjithom bl-​aħjar mod li setgħu imma ma sabux l-​hena għax ma kellhom ebda relazzjoni mal-​Ħallieq tagħhom. Kemm kien jidher xieraq li wara li Salamun ta inkuraġġiment biex wieħed ikun hieni matul ħajtu, hu ġabar kollox f’dan il-​kliem: “Hawn hu l-​qofol tad-​diskors wara li nstamaʼ kollox: ‘Ħobb lil Alla u ħares il-​kmandamenti tiegħu, għax f’dan jinġabar il-​bniedem kollu.’”—Koħèlet 12:13.