X’għandek Taqra-Il-Parir Għaqli taʼ Salamun

“GĦAX il-​kotba joktru bla heda, u l-​istudju żejjed jgħajji l-​ġisem.” (Koħèlet 12:12) Meta kiteb dan il-​kliem xi 3,000 sena ilu, l-​għaref Sultan Salamun taʼ Iżrael ma kienx qed jiskuraġġixxi l-​qari. Minflok, hu kien qed jitkellem dwar il-​bżonn li tkun selettiv. Kemm hija f’waqtha din it-​tfakkira llum, hekk kif biljuni taʼ paġni mimlijin b’materjal għall-​qari qed jiġu stampati madwar id-​dinja kull sena!

Huwa evidenti li l-​‘kotba li joktru,’ li Salamun irrefera għalihom, la kienu jibnu u lanqas isaħħu. Għalhekk, hu rraġuna li l-​istudju żejjed tagħhom “jgħajji l-​ġisem,” minflok ma jipprovdi benefiċċji pożittivi u dejjiema.

Allura, kien Salamun qed jgħid li m’hemmx kotba li joffru gwida tajba u taʼ min joqgħod fuqha li tistaʼ tkun taʼ benefiċċju għall-​qarrej? Le, għaliex hu kiteb ukoll: “Kliem l-​għorrief hu bħal xpruni, bħal puntali sodi l-​ġabriet taʼ qwielhom; lkoll mogħtija minn ragħaj wieħed.” (Koħèlet 12:11) Tabilħaqq, hemm kliem imniżżel li “bħal xpruni” jistaʼ jipprovdi għajnuna. Dan il-​kliem jistaʼ jinkuraġġixxi lil dak li jkun biex jimxi fil-​mogħdija t-​tajba. Barra minn hekk, “bħal puntali sodi,” jistaʼ jgħinu biex isaħħaħ id-​determinazzjoni tiegħu u jibqaʼ sod.

Fejn nistgħu nsibu kliem għaqli bħal dan? Skond Salamun, l-​iktar kliem li jispikka huwa dak li oriġina mir-​Ragħaj uniku, Ġeħova. (Salm 23:1) Għalhekk, wieħed ma jistax jagħmel aħjar milli jdur lejn il-​ktieb li hu ispirat minn Alla​—il-​Bibbja. Il-​qari regulari taʼ kliem ispirat bħal dan jistaʼ jgħin lil dak li jkun biex isir “kapaċi għalkollox, armat bis-​sħiħ għal kull għemil tajjeb.”—2 Timotju 3:16, 17.