Aħdem Biex Tippreserva lill-Familja Tiegħek Għal ġod-Dinja l-Ġdida t’Alla

“Int innifsek, O Jehovah, se tgħassishom; int se tippreserva lil kull wieħed minn din il-​ġenerazzjoni għal żmien indefinit.”−SALM 12:7.

1, 2. (a) Xi familji kif inhuma sejrin taħt il-​pressjonijiet tal-​aħħar jiem? (b) Familji Kristjani kif jistgħu jfittxu li jibqgħu ħajjin?

“ILLUM qalbi mimlija ferħ!” esklama wieħed anzjan Kristjan li jismu John. X’kienet ir-​raġuni tal-​ferħ tiegħu? “Ibni, li għandu 14-il sena, u binti taʼ 12-il sena ġew imgħammdin,” hu jirrakkonta. Imma l-​ferħ tiegħu ma spiċċax hemm. “Ibni l-​ieħor, li għandu 17-il sena, u binti taʼ 16-il sena t-​tnejn qdew bħala pijunieri awżiljarji matul din l-​aħħar sena,” hu jżid.

² Ħafna familji fostna qegħdin ikollhom riżultati mill-​aħjar simili hekk kif japplikaw prinċipji Bibliċi. Xi ftit, iżda, qegħdin iġarrbu problemi. “Aħna għandna ħamest itfal,” tikteb koppja Kristjana, “u dejjem qed isir iżjed diffiċli biex nittrattaw magħhom. Diġà tlifna wieħed minnhom għal din is-​sistema qadima. It-​teenagers żgħar tagħna jidhru li huma l-​qasam taʼ attakk primarju taʼ Satana bħalissa.” Hemm ukoll koppji li għaddejjin minn ġlied aħrax bejniethom, li xi drabi jirriżulta f’separazzjoni jew divorzju. Madankollu, familji li jikkultivaw kwalitajiet Kristjani jistgħu jibqgħu ħajjin fit-​“tribulazzjoni kbira” u jiġu mħarsin għal ġod-​dinja ġdida li ġejja t’Alla. (Mattew 24:21; 2 Pietru 3:13) X’tistaʼ, allura, tagħmel int biex tiżżgura l-​ħarsien tal-​familja tiegħek?

Intejbu l-​Komunikazzjoni

3, 4. (a) Kemm hija importanti l-​komunikazzjoni fil-​ħajja tal-​familja, u għala taʼ spiss iqumu problemi fiha? (b) L-​irġiel miżżewġin għala għandhom jistinkaw biex ikunu semmiegħa tajbin?

³ Il-​komunikazzjoni tajba hija d-​demm tal-​ħajja taʼ familja b’saħħitha; meta tkun nieqsa, jiżdiedu t-​tensjoni u l-​istress. “Hemm taħwid tal-​pjanijiet fejn ma hemmx kliem kunfidenzjali,” igħid Proverbji 15:22. Taʼ interess, wieħed li jagħti pariri dwar iż-​żwieġ jirrapporta: “L-​iktar ilment familjari li nismaʼ min-​nisa miżżewġin hu ‘Ma jkunx irid ikellimni,’ u ‘Ma jismagħnix.’ U meta naqsam dan l-​ilment maʼ żwieġhom, huma ma jisimgħu lanqas lili.”

⁴ X’jikkaġuna nuqqas taʼ komunikazzjoni? L-​ewwelnett, l-​irġiel u n-​nisa huma differenti, u taʼ spiss għandhom stili taʼ komunikazzjoni differenti li jidhru. Artiklu wieħed innota li raġel miżżewweġ “għandu tendenza li jkun dirett u prattiku” fil-​konversazzjonijiet tiegħu, fil-​waqt li “dak li [l-mara miżżewġa] trid iktar minn kollox hu semmiegħ li jagħder.” Jekk dan joħloq problema fiż-​żwieġ tiegħek, aħdem biex ittejjeb l-​affarijiet. Raġel miżżewweġ Kristjan forsi jinħtieġ li jaħdem iebes biex isir semmiegħ aħjar. “Kull bniedem,” igħid Ġakbu, “irid ikun għaġġiel dwar li jismaʼ, bil-​mod dwar li jitkellem.” (Ġakbu 1:19) Itgħallem iżżomm lura milli tordna, twiddeb, jew tippriedka meta martek kulma trid minnek hu ‘li tħoss għaliha.’ (1 Pietru 3:8) “Kulmin iżomm lura l-​qwiel tiegħu qiegħed jippossjedi l-​għarfien,” igħid Proverbji 17:27.

5. Liema huma xi modi li bihom l-​irġiel miżżewġin jistgħu jitjiebu f’li jesprimu l-​ħsibijiet u s-​sentimenti tagħhom?

⁵ Mill-​banda l-​oħra, hemm “ħin biex titkellem,” u forsi għandek bżonn titgħallem kif tesprimi aħjar il-​ħsibijiet u s-​sentimenti tiegħek. (Ekkleżjasti 3:7) Per eżempju, ġeneruż int bit-​tifħir għal dak li tagħmel martek? (Proverbji 31:28) Turi lilek innifsek grat għax-​xogħol iebes li hi tagħmel biex tappoġġjak u biex tieħu ħsieb tal-​familja? (Qabbel Kolossin 3:15.) Jew forsi għandek bżonn tirranġa f’li tgħid “espressjonijiet t’affezzjoni.” (Għanja taʼ Salamun 1:2) Li tagħmel dan jistaʼ jidher skomdu għalik għall-​ewwel, imma jistaʼ jagħmel ħafna f’li jgħin lil martek tħossha żgura f’imħabbtek għaliha.

6. In-​nisa miżżewġin x’jistgħu jagħmlu biex itejbu l-​komunikazzjoni tal-​familja?

⁶ Xi ngħidu dwar nisa miżżewġin Kristjani? Waħda mara miżżewġa hi kkwotata li qalet li żewġha jaf li hi tapprezzah, u għalhekk m’hemmx bżonn li hi toqgħod tgħidlu dan. Madankollu, l-​irġiel ukoll jieħdu pjaċir b’apprezzament, billi jaqilgħu prosit, u b’tifħir. (Proverbji 12:8) Tinħtieġ int li tkun iżjed espressiva f’dan ir-​rigward? Mill-​banda l-​oħra, forsi għandek bżonn toqgħod iżjed attenta dwar kif tismaʼ. Jekk żewġek isibha diffiċli biex jiddiskuti l-​problemi, il-​biżaʼ, jew l-​anzjetajiet tiegħu bil-​miftuħ, tgħallimt int kif toħorġu minn qoxortu, bil-​ħlewwa u bit-​tattika?

7. X’jistaʼ jikkaġuna l-​ġlied bejn il-​miżżewġin, u kif jistaʼ jiġi evitat?

⁷ M’għandniex xi ngħidu, saħansitra koppji li normalment jiftehmu jistaʼ kultant iġarrbu ksur fil-​komunikazzjoni. L-​emozzjoni tistaʼ tegħleb lir-​raġuni, jew xi diskussjoni kalma tistaʼ malajr tispiċċa f’argument sħun. (Proverbji 15:1) “Aħna lkoll nieħdu gambetta ħafna drabi”; tilwima bejn il-​miżżewġin m’hix se ttemm iż-​żwieġ, madankollu. (Ġakbu 3:2) Imma “twerżieq u kliem t’abbuż” m’humiex xierqa u huma qerrieda għal kwalunkwe relazzjoni. (Efesin 4:31) Għaġġel biex tagħmel il-​paċi meta jintqal kliem li jweġġaʼ. (Mattew 5:23, 24) Il-​ġlied jistaʼ taʼ spiss jiġi evitat mill-​bidunett jekk it-​tnejn li intom tapplikaw il-​kliem taʼ Pawlu f’​Efesin 4:26: “Tħallux ix-​xemx tinżel bikom fi stat ipprovokat.” Iva, tkellmu dwar il-​problemi meta jkun għadhom żgħar u maneġġabbli; tistennewx sakemm l-​emozzjonijiet tagħkom jilħqu l-​quċċata. Li tqattgħu ftit minuti kuljum tiddiskutu affarijiet taʼ tħassib jistaʼ jgħinkom ħafna biex trawwmu l-​komunikazzjoni u tevitaw in-​nuqqas taʼ qbil.

‘Ir-​Regular Mentali taʼ Jehovah’

8. Xi żgħażagħ għala jistgħu jitbiegħdu mill-​verità?

⁸ Milli jidher xi ġenituri huma kuntenti li jħallu lil uliedhom jiġu mkaxkrin. It-​tfal jattendu l-​laqgħat u jieħdu xi sehem fis-​servizz tal-​għalqa, imma taʼ spiss huma ma jkunux bnew ir-​relazzjoni tagħhom infushom m’Alla. Maż-​żmien “ix-​xewqa tal-​laħam u x-​xewqa tal-​għajnejn” tistaʼ tiġbed lil ħafna minn żgħażagħ bħal dawn ’il bogħod mill-​verità. (1 Ġwann 2:16) Kemm ikun taʼ niket għal xi ġenituri li huma jsalvaw f’Armageddon imma minħabba traskuraġni tal-​passat iħallu lil uliedhom warajhom bħala vittmi tal-​gwerra!

9, 10. (a) X’jinvolvi li trabbi lit-​tfal “fid-​dixxiplina u r-​regular mentali taʼ Jehovah”? (b) Għala huwa importanti li tħalli lit-​tfal jesprimu liberament is-​sentimenti tagħhom?

⁹ B’hekk Pawlu kiteb: “Intom, missirijiet, tkunux qegħdin tirritaw lil uliedkom, imma ibqgħu rabbuhom fid-​dixxiplina u r-​regular mentali taʼ Jehovah.” (Efesin 6:4) Biex tagħmel hekk, int trid tkun familjari għalkollox mal-​livelli taʼ Jehovah inti stess. Int trid tagħti l-​eżempju xieraq fejn jidħlu affarijiet bħalma hi l-​għażla tiegħek taʼ divertiment, studju persunali, attendenza għal-​laqgħat, u servizz tal-​għalqa. Il-​kliem taʼ Pawlu jimplika wkoll li ġenitur irid (1) ikun osservatur għaqli taʼ wliedu u li (2) iżomm komunikazzjoni tajba magħhom. Hekk biss tistaʼ int tkun taf fejn għandhom bżonn “ir-​regular mentali.”

¹⁰ Huwa naturali għall-​adolexxenti li jirsistu għal miżura taʼ indipendenza. Madankollu, int trid toqgħod attent għal xi sinjali ovvji taʼ influwenza dinjija fi kliemhom, f’kif jaħsbu, f’kif jilbsu u jippettnaw, u fil-​għażla taʼ ħbieb. Missier għaqli qal kif insibu fi Proverbji 23:26: “Ibni, agħtini qalbek.” Iħossuhom uliedek liberi li jaqsmu l-​ħsibijiet u s-​sentimenti tagħhom miegħek? Meta t-​tfal ma jibżgħux li int immedjatament se taħtafhom, huma forsi iżjed juru tendenza li jirrivelaw kif verament iħossuhom dwar affarijiet bħalma huma l-​attivitajiet li m’humiex fis-​sillabu tal-​iskola, id-​dating, l-​edukazzjoni iktar għolja, jew il-​verità tal-​Bibbja nfisha.

11, 12. (a) Ħin l-​ikel kif jistaʼ jintuża biex javvanza l-​komunikazzjoni fil-​familja? (b) X’jistaʼ jirriżulta mill-​isforzi persistenti taʼ ġenitur biex javvanza l-​komunikazzjoni mat-​tfal tiegħu?

¹¹ F’ħafna pajjiżi hija d-​drawwa li familji jieklu flimkien. B’hekk ħin l-​ikel jistaʼ jipprovdi opportunità mill-​aħjar biex il-​membri kollha tal-​familja jieħdu sehem f’konversazzjoni li tibni. Taʼ spiss l-​ikla tal-​familja tiġi mfixkla bit-​T.V. u b’xi distrazzjonijiet oħrajn. Għal sigħat bla tmiem, iżda, uliedek inżammu tistaʼ tgħid f’jasar fl-​iskola u esposti għal ideat dinjin. Il-​ħin tal-​ikel huwa żmien tajjeb biex tikkomunika maʼ wliedek. “Aħna nużaw il-​ħin tal-​ikel biex nitkellmu dwar l-​affarijiet li ġraw mal-​ġurnata,” igħid wieħed ġenitur. Iżda, ħin l-​ikel m’għandux isir xi sessjoni taʼ dixxiplina imbarazzanti jew taʼ interrogazzjonijiet. Żomm l-​okkażjoni relassanti u taʼ pjaċir!

¹² Li ġġiegħel lit-​tfal jiftħu qalbhom miegħek hija sfida kbira u forsi jirrikjedi paċenzja bla tmiem. Maż-​żmien, iżda, tistaʼ tara riżultati nkuraġġanti. “It-​tifel tagħna li għandu 14-il sena kien dippress u maqtugħ għalih waħdu,” tiftakar waħda omm ikkonċernata. “Permezz tat-​talb u l-​persistenza tagħna, hu qed jibda joħroġ naqra minn qoxortu u jitkellem!”

Studju tal-​Familja li Jibni

13. It-​taħriġ bikri tat-​tfal għala huwa tant importanti, u kif jistaʼ jsir?

¹³ Ir-​“regular mentali” jinkludi wkoll struzzjoni formali fil-​Kelma t’Alla. Bħal fil-​każ taʼ Timotew, taħriġ bħal dan għandu jibda “mill-​infanzja.” (2 Timotew 3:15) Taħriġ bikri jsaħħaħ lit-​tfal għall-​provi taʼ fidi li jistgħu jiġu matul is-​snin tal-​iskola—ċelebrazzjonijiet taʼ għeluq is-​snin, ċeremonji patrijottiċi, jew festi reliġjużi. Mingħajr preparazzjoni għal provi bħal dawn, il-​fidi taʼ tfajjel tistaʼ titkisser. Mela ħu vantaġġ mill-​għodod li ħejjiet il-​Watch Tower Society għat-​tfal iż-​żgħar, bħalma huma l-​kotba Listening to the Great Teacher u Il-​Ktieb Tiegħi taʼ Stejjer mill-​Bibbja.a

14. L-​istudju tal-​familja kif jistaʼ jinżamm regulari, u int x’għamilt biex ikollok studju tal-​familja regulari?

¹⁴ Ħaġa oħra għall-​attenzjoni hu l-​istudju tal-​familja, li jistaʼ faċilment ma jibqax isir regulari jew isir ħaġa monotona u mekkanika li hi tedjanti kemm għall-​ġenituri u kemm għall-​ulied. Kif tistaʼ ttejjeb is-​sitwazzjoni? L-​ewwel, int trid ‘tixtri l-​ħin’ għall-​istudju, billi ma tħallihx jiġi mfixkel minn xi programmi fuq it-​T.V. jew xi distrazzjonijiet oħrajn. (Efesin 5:15-17) “Kien diffiċli għalina li nżommu l-​istudju tagħna tal-​familja regulari,” stqarr wieħed kap taʼ familja. “Ipprovajna ħinijiet differenti sakemm fl-​aħħar sibna ħin iktar tard fil-​għaxija li kien tajjeb għalina. Issa l-​istudju tagħna tal-​familja hu regulari.”

15. Kif tistaʼ tfassal l-​istudju tal-​familja għall-​bżonnijiet tal-​familja tiegħek?

¹⁵ Imbagħad, ikkunsidra l-​bżonnijiet partikulari tal-​familja tiegħek. Ħafna familji jieħdu pjaċir jippreparaw flimkien il-​lezzjoni tagħhom taʼ kull ġimgħa tat-​Torri tal-​Għassa. Iżda, minn żmien għal żmien, il-​familja tiegħek jistaʼ jkollha xi kwistjonijiet speċifiċi li jridu jiġu diskussi, inklużi problemi li jiġu ffaċċjati fl-​iskola. Il-​ktieb Questions Young People Ask—Answers That Work u artikli mit-​Torri tal-​Għassa u l-​Awake! jistgħu jaqdu dan il-​bżonn. “Jekk insiru nafu dwar xi attitudnijiet min-​naħa tat-​tfal tagħna li jinħtieġu korrezzjoni,” igħid wieħed missier, “aħna nirreferu għall-​kapitlu partikulari li jiddiskuti dan fil-​ktieb Young People Ask.” Martu żżid: “Aħna nipprovaw inkunu flessibbli. Jekk ikollna xi ħaġa ppjanata għall-​istudju tagħna, u jinqala l-​bżonn li niddiskutu xi ħaġa oħra, allura nbiddlu skond il-​bżonn.”

16. (a) Kif tistaʼ tkun ċert li wliedek jifhmu dak li qegħdin jitgħallmu? (b) Normalment x’għandu jiġi evitat meta tikkonduċi studju tal-​familja?

¹⁶ Kif tistaʼ tkun ċert li t-​tfal tiegħek verament jifhmu dak li qegħdin jitgħallmu? Il-​Għalliem il-​Kbir, Ġesù, kien jistaqsi mistoqsijiet għall-​opinjoni, bħal, “X’taħseb int?” (Mattew 17:26) Billi tagħmel l-​istess ħaġa, ipprova sib verament x’jaħsbu wliedek. Inkuraġġixxi lil kull wieħed minnhom biex iwieġeb fi kliemu stess. M’għandniex xi ngħidu, jekk int tirreaġixxi b’rabja jew stagħġib għall-​espressjonijiet onesti tagħhom, huma jistgħu jerġgħu jaħsbuha dwar jekk jiftħux qalbhom miegħek darb’oħra. Mela ibqaʼ kalm. Evita li l-​istudju tal-​familja tbiddlu f’laqgħa tal-​kastig. Għandu jkun taʼ pjaċir u edifikanti. “Jekk niskopri li xi ħadd mit-​tfal tiegħi għandu problema,” igħid wieħed missier, “nittratta magħha darb’oħra.” “Meta t-​tifel tkellmu waħdu,” iżżid waħda omm, “hu ma jħossux daqshekk imbarazzat u x’aktarx li jitkellem iżjed liberament milli jekk jiġi mwiddeb matul l-​istudju tal-​familja.”

17. X’jistaʼ jsir biex tagħmel l-​istudju tal-​familja interessanti, u x’sibt tajjeb għall-​familja tiegħek?

¹⁷ Li ġġiegħel lit-​tfal jipparteċipaw fl-​istudju tal-​familja jistaʼ jkun taʼ sfida, b’mod speċjali meta tkun qed tittratta maʼ tfal taʼ etajiet differenti. Tfal żgħar x’aktarx li jkunu bla sabar, jiċċaqalqu l-​ħin kollu, jew b’konċentrazzjoni qasira ħafna. X’tistaʼ tagħmel? Ipprova żomm l-​atmosfera tal-​istudju rilassata. Jekk it-​tfal tiegħek ma jikkonċentrawx għal żmien twil, ipprova qassar is-​sessjonijiet imma żommhom iżjed taʼ spiss. Igħin ukoll jekk int turi entużjażmu. “Dak li jippresiedi, ħa jagħmel dan tassew bil-​ħeġġa.” (Rumani 12:8) Żomm lil kulħadd involut. Tfal żgħar forsi jistgħu jikkummentaw fuq l-​istampi jew iwieġbu mistoqsijiet sempliċi. It-​teenagers jistgħu jiġu mistoqsijin biex jagħmlu riċerka barranija jew biex jagħmlu applikazzjoni prattika tal-​materjal li qed jiġi diskuss.

18. Il-​ġenituri kif jistgħu jnaqqxu l-​Kelma t’Alla f’kull okkażjoni, u b’liema riżultat?

¹⁸ Tillimitax l-​istruzzjoni spiritwali għal siegħa fil-​ġimgħa, madankollu. Naqqax il-​Kelma t’Alla f’uliedek f’kull okkażjoni. (Dewteronomju 6:7) Ħu l-​ħin biex tismagħhom. Ħeġġiġhom u farraġhom meta jkun hemm bżonn. (Qabbel 1 Tessalonkin 2:11.) Uri mogħdrija u ħniena. (Salm 103:13; Malakija 3:17) Billi tagħmel dan, int se ‘tieħu pjaċir’ b’uliedek u tappoġġja l-​ħarsien tagħhom għal ġod-​dinja ġdida t’Alla.—Proverbji 29:17.

“Ħin biex Tidħak”

19, 20. (a) Ir-​rikreazzjoni liema rwol għandha fil-​ħajja tal-​familja? (b) B’liema modi jistgħu l-​ġenituri jorganizzaw għar-​rikreazzjoni għall-​familja tagħhom?

¹⁹ Hemm “ħin biex tidħak . . . , ħin biex taqbeż lil hawn u lil hinn.” (Ekkleżjasti 3:4) Il-​kelma Ebrajka għal “tidħak” tistaʼ tiġi tradotta wkoll b’espressjonijiet bħal “tiċċelebra,” “tilgħab,” “tagħmel l-​isport,” jew saħansitra “tiddeverti.” (2 Samwel 6:21; Ġob 41:5; Imħallfin 16:25; Eżodu 32:6; Ġenesi 26:8) Il-​logħob jistaʼ jservi skop taʼ benefiċċju, u huwa importanti għat-​tfal u għaż-​żgħażagħ. Fi żminijiet bibliċi l-​ġenituri ħejjew divertiment u rikreazzjoni għall-​familji tagħhom. (Qabbel Luqa 15:25.) Tagħmel int l-​istess?

²⁰ “Aħna nieħdu vantaġġ minn ġonna pubbliċi,” igħid raġel miżżewweġ Kristjan. “Nistiednu lil xi ftit mill-​aħwa żgħażagħ u nilgħabu logħba ballun u nagħmlu picnic. Huma jieħdu pjaċir u jgawdu sħubija bnina.” Ġenitur ieħor iżid: “Aħna nippjanaw affarijiet mas-​subien tagħna. Immorru ngħumu, nilgħabu logħba ballun, nieħdu vaganzi. Imma nżommu d-​divertiment fil-​post xieraq tiegħu. Jien nenfasizza l-​bżonn li nsibu bilanċ.” Rikreazzjoni bnina, bħal xi get-together żgħir jew xi żjara lil xi zoo jew lil xi mużew, tistaʼ tgħin ħafna biex iżżomm lit-​tfal milli jiġu mħajrin lejn il-​pjaċiri tad-​dinja.

21. Il-​ġenituri kif jistgħu jevitaw milli wliedhom iħossuhom imċaħħdin għaliex ma jiċċelebrawx festi tad-​dinja?

²¹ Huwa importanti wkoll li wliedek ma jħossuhomx imċaħħdin għaliex huma ma jiċċelebrawx għeluq sninhom jew festi mhux kristjani. Bi ftit organizzazzjoni min-​naħa tiegħek, huma jistgħu jħarsu ’l quddiem lejn ħafna okkażjonijiet taʼ pjaċir matul is-​sena kollha. Iva, ġenitur tajjeb m’għandux bżonn xi festa bħala skuża biex jesprimi mħabbtu b’mod materjali. Bħal Missieru tas-​sema, hu ‘jaf kif jagħti għotjiet tajbin lil uliedu’—b’mod spontanju.—Mattew 7:11.

Ikseb Futur Etern għall-​Familja Tiegħek

22, 23. (a) Hekk kif toqrob it-​tribulazzjoni l-​kbira, familji li għandhom il-​biżaʼ t’Alla minn liema ħaġa jistgħu jkunu ċerti? (b) Il-​familji x’jistgħu jagħmlu biex jaħdmu għas-​salvazzjoni għal ġod-​dinja ġdida t’Alla?

²² Is-​salmista talab: “Int innifsek, O Jehovah, se tgħassishom; int se tippreserva lil kull wieħed minn din il-​ġenerazzjoni għal żmien indefinit.” (Salm 12:7) Il-​pressjoni minn Satana żgur li se tkompli tikber—b’mod speċjali kontra l-​familji tax-​Xhieda taʼ Jehovah. Iżda, huwa possibbli li tirreżisti dan l-​attakk li dejjem jiżdied. Bil-​għajnuna taʼ Jehovah u b’determinazzjoni assoluta u xogħol iebes min-​naħa tal-​irġiel, nisa miżżewġin, u t-​tfal, familji—inkluża dik tiegħek—jistgħu jkollhom it-​tama li jiġu mħarsin matul it-​tribulazzjoni l-​kbira.

²³ Irġiel u nisa miżżewġin, ġibu paċi u armonija fiż-​żwieġ tagħkom billi twettqu l-​irwolijiet tagħkom maħturin minn Alla. Ġenituri, ibqgħu agħtu eżempju xieraq lil uliedkom, billi tirbħu l-​ħin biex tagħtuhom taħriġ u dixxiplina li tant għandhom bżonn. Tkellmu magħhom. Isimgħuhom. Il-​ħajjiet tagħhom huma nvoluti! Tfal, isimgħu u obdu mill-​ġenituri tagħkom. Bil-​għajnuna taʼ Jehovah tistgħu tirnexxu u tiksbu għalikom infuskom futur etern fid-​dinja ġdida li ġejja t’Alla.

[Nota taʼ taħt]

Tiftakar?

◻ L-​irġiel u n-​nisa miżżewġin kif jistgħu jtejbu l-​komunikazzjoni tagħhom?

◻ Il-​ġenituri kif jistgħu jrabbu lil uliedhom fir-​“regular mentali taʼ Jehovah”? (Efesin 6:4)

◻ Liema huma xi modi li bihom tagħmel l-​istudju tal-​familja edifikanti u iżjed interessanti?

◻ Il-​ġenituri x’jistgħu jagħmlu biex jorganizzaw rikreazzjoni u divertiment għall-​familji tagħhom?

[Kaxxa f’paġna 15]

Il-​Mużika—Influwenza Qawwija

Igħid l-​awtur taʼ ktieb dwar it-​trobbija tat-​tfal: “Li kieku kelli nidher quddiem udjenza . . . u ninkuraġġixxi orġji taʼ sokor, tipjip tal-​kokaina, tal-​ħaxixa, jew taʼ xi droga oħra li teffettwa l-​moħħ, kulħadd kien iħares lejja bi stagħġib imbikkem. . . . [Madankollu] l-​ġenituri taʼ spiss jipprovdu lil uliedhom bi flus biex jixtru diski jew cassettes li fil-​beraħ jinkuraġġixxu dawn l-​affarijiet.” (Raising Positive Kids in a Negative World, minn Zig Ziglar) Fl-​Istati Uniti, per eżempju, kliem taʼ mużika rap li jiddeskrivi s-​sess b’mod ċar jinsab fuq ix-​xofftejn taʼ ħafna żgħażagħ. Qiegħed int tgħin lit-​tfal tiegħek biex ikunu selettivi fil-​għażla tagħhom tal-​mużika sabiex huma jevitaw nasbiet demoniċi bħal dawn?