“Żmien il-​Paċi” Huwa Qrib!

“Kollox għandu żmienu, . . . żmien it-​taqbid, u żmien il-​paċi.”—KOĦÈLET 3:1, 8.

1. Liema sitwazzjoni ironika eżistiet matul is-​seklu 20 f’konnessjoni mal-​gwerra u l-​paċi?

IL-​MAĠĠURANZA tan-​nies jixxennqu għall-​paċi, u bir-​raġun kollu. Is-​seklu 20 ra inqas paċi minn kwalunkwe seklu ieħor fl-​istorja. Kemm hi ħaġa ironika, meta tqis li qatt qabel ma saru daqshekk sforzi biex jassiguraw il-​paċi! Fl-​1920 ġiet ifformata l-​Lega tan-​Nazzjonijiet. Fl-​1928, il-​Patt taʼ Kellogg-Briand, li xogħol taʼ referenza wieħed sejjaħlu “l-​iktar sforz grandjuż mis-​serje taʼ sforzi għaż-​żamma tal-​paċi li saru wara l-​Ewwel gwerra dinjija,” ġie appoġġat minn “kważi n-​nazzjonijiet kollha tad-​dinja . . . li qablu li jirrinunzjaw għall-​gwerra bħala strument taʼ politika nazzjonali.” Imbagħad, fl-​1945 ġiet stabbilita l-​organizzazzjoni tal-​Ġnus Magħquda biex tieħu post il-​Lega tan-​Nazzjonijiet li ma kinitx għadha tiffunzjona.

2. Il-​Ġnus Magħquda liema mira tistqarr li għandha, u din sa liema punt kellha suċċess?

² Il-​mira li tistqarr li għandha l-​Ġnus Magħquda kienet bħal dik tal-​Lega​—li tassigura paċi dinjija. Imma s-​suċċess tagħha kien limitat. Irridu nammettu li mkien fid-​dinja m’hi għaddejja xi gwerra taʼ l-​istess skala taż-​żewġ gwerer dinjin. Madankollu, hemm partita konflitti iżgħar li, lil mijiet taʼ eluf taʼ nies għadhom qed jisirqulhom il-​paċi tal-​moħħ, l-​affarijiet li jippossiedu, u taʼ spiss anki l-​istess ħajjithom. Nażżardaw aħna nittamaw li l-​Ġnus Magħquda tkun kapaċi tibdel is-​seklu 21 fi “żmien il-​paċi”?

Il-​Bażi għall-​Paċi Vera

3. Il-​paċi ġenwina għala ma tistax teżisti flimkien mal-​mibegħda?

³ Il-​paċi bejn il-​popli u n-​nazzjonijiet tirrikjedi iktar minn sempliċi tolleranza. Jistaʼ xi ħadd tassew ikun fil-​paċi maʼ xi ħadd li hu jobgħod? Le, skond l-1 Ġwann 3:15: “Kull min jobgħod lil ħuh hu qattiel.” Bħalma turi l-​istorja reċenti, mibegħda profonda faċli tikber u twassal għal atti taʼ vjolenza.

4. Min biss jistaʼ jesperjenza l-​paċi, u għala?

⁴ Ladarba Jehovah hu dak “Alla tas-​sliem,” il-​paċi jistgħu jesperjenzawha biss nies li għandhom imħabba lejn Alla u rispett profond lejn il-​prinċipji tiegħu taʼ tjieba. Jidher ċar li Jehovah ma jagħtix il-​paċi lil kulħadd. “‘M’hemmx sliem għall-​ħżiena,’ jgħid Alla tiegħi.” Dan hu minħabba li l-​ħżiena jirrifjutaw li jħallu lilhom infushom jiġu gwidati mill-​ispirtu qaddis t’Alla, li waħda mill-​frott tiegħu hija l-​paċi.—Rumani 15:33; Isaija 57:21; Galatin 5:22.

5. Il-​Kristjani veri x’ma jgħaddilhomx minn moħħhom li jagħmlu?

⁵ Il-​Kristjani ġenwini lanqas biss jgħaddilhom minn moħħhom li jidħlu fi gwerra kontra bnedmin sħabhom​—bħalma għamlu tant sikwit l-​hekk imsejħa Kristjani, partikolarment fis-​seklu 20. (Ġakbu 4:1-4) Veru, huma jissieltu kontra t-​tagħlim li jirrappreżenta ħażin lil Alla, imma din il-​gwerra hija mfassla biex tgħin lil individwi, mhux biex tagħmlilhom il-​ħsara. Il-​fatt li xi ħadd jippersegwita lil xi ħaddieħor minħabba differenzi reliġjużi, jew li jagħmillu ħsara fiżika għal raġunijiet nazzjonalistiċi, m’għandu x’jaqsam xejn mal-​Kristjanità vera. “Jekk jistaʼ jkun, sakemm ikun ġej minnkom,” qal Pawlu lill-​Kristjani f’Ruma, “għixu fil-​paċi maʼ kulħadd.”—Rumani 12:17-19; 2 Timotju 2:24, 25.

6. Il-​paċi ġenwina fejn biss tistaʼ tinstab illum?

⁶ Illum, il-​paċi li tiġi mingħand Alla tinstab biss fost l-​adoraturi veri t’Alla Jehovah. (Salm 119:165; Isaija 48:18) Ebda differenzi politiċi ma jfixklu l-​unità tagħhom, ladarba kullimkien huma newtrali politikament. (Ġwann 15:19; 17:14) Minħabba li huma “magħqudin kif imiss, ħsieb wieħed u fehma waħda,” ebda differenzi reliġjużi ma jheddu l-​paċi tagħhom. (1 Korintin 1:10) Il-​paċi li jgawdu x-​Xhieda taʼ Jehovah hija miraklu taʼ żmienna, wieħed li Alla jwettaq fi qbil mal-​wegħda tiegħu: “Nagħmel is-​Sliem it-​tmexxija tiegħek, u l-​Ġustizzja l-​ħakma tiegħek.”—Isaija 60:17; Lhud 8:10.

Għala “Żmien it-​Taqbid”?

7, 8. (a) Minkejja l-​waqfa paċifika tagħhom, ix-​Xhieda taʼ Jehovah kif iqisuh il-​preżent? (b) X’inhi l-​arma prinċipali li Kristjan juża għall-​gwerra?

⁷ Minkejja l-​waqfa paċifika tagħhom, ix-​Xhieda taʼ Jehovah xorta waħda jqisu l-​preżent prinċipalment bħala “żmien it-​taqbid.” M’għandniex xi ngħidu, dan m’huwiex xi taqbid letterali, ladarba ħadd ma jistaʼ jisforza l-​messaġġ tal-​Bibbja fuq ħadd b’xi arma ppontata lejh, għax dan ikun qed jikkontradixxi l-​istedina t’Alla biex “jieħu b’xejn min irid l-​ilma tal-​Ħajja.” (Korsiv tagħna.) (Apokalissi 22:17) Hawnhekk ħadd ma qed jisforza lil ħadd biex jikkonverti! Il-​gwerra li qed jiġġieldu x-​Xhieda taʼ Jehovah hija strettament spiritwali. Pawlu kiteb: “L-​armi tagħna għall-​ġlied m’humiex tad-​dinja; iżda għandhom il-​qawwa taʼ Alla biex iġarrfu l-​fortizzi.”—2 Korintin 10:4; 1 Timotju 1:18.

⁸ L-​arma prinċipali fost “l-​armi tagħna għall-​ġlied” hija x-​“xabla taʼ l-​Ispirtu li hi l-​kelma taʼ Alla.” (Efesin 6:17) Din ix-​xabla hija potenti. “Il-​kelma taʼ Alla hi ħajja u qawwija, taqtaʼ aktar minn xabla b’żewġt ixfar; hija tinfed sa tifred minn xulxin ir-​ruħ u l-​ispirtu u l-​ġogi u l-​mudullun; u tgħarbel il-​ħsibijiet u l-​fehmiet tal-​qalb.” (Lhud 4:12) Billi jużaw din ix-​xabla, il-​Kristjani huma kapaċi jwaqqgħu “kull raġunament u kull kburija li tqum kontra l-​għarfien taʼ Alla.” (2 Korintin 10:4, 5 [2 Korintin 10:5, NW]) Tgħinhom jikxfu duttrini foloz, prattiċi li jagħmlu l-​ħsara, u filosofiji li jirriflettu għerf uman minflok għerf divin.—1 Korintin 2:6-8; Efesin 6:11-13.

9. Għala ma nistgħu qatt inbattu fil-​ġlieda tagħna kontra l-​ġisem midneb?

⁹ Xorta oħra taʼ gwerra spiritwali hi dik li tiġi miġġielda kontra l-​ġisem midneb tagħna. Il-​Kristjani jsegwu l-​eżempju taʼ Pawlu, li ammetta: “Ngħakkes bl-​aħrax lil ġismi u njassru, biex ma jiġrilix li, wara li nkun ippridkajt lil ħaddieħor, jiena stess insib ruħi kkundannat.” (1 Korintin 9:27) Il-​Kristjani f’Kolossi ġew imwissijin biex imewtu “dak kollu [‘l-​membri tagħhom,’ Saydon] li hu taʼ l-​art: żína, faħx, ġibdiet, xewqat ħżiena, u r-​regħba li hi idolatrija.” (Kolossin 3:5) U Ġuda, wieħed mill-​kittieba tal-​Bibbja, wissa lill-​Kristjani biex “[‘jissieltu,’ Saydon] għal dik il-​fidi li ngħatat darba għal dejjem lill-​qaddisin.” (Ġuda 3) Dan għala għandna nagħmluh? Pawlu jwieġeb: “Jekk tgħixu skond il-​ġisem, tmutu; imma jekk tmewwtu l-​għemil tal-​ġisem bl-​Ispirtu, tgħixu.” (Rumani 8:13) Meta nqisu din l-​istqarrija ċara, ma nistgħu qatt inbattu fil-​ġlieda tagħna kontra t-​tendenzi ħżiena.

10. X’ġara fl-​1914, u dan għal xiex se jwassal fil-​futur qarib?

¹⁰ Jerġaʼ raġuni oħra għala ż-​żmien preżenti jistaʼ jitqies bħala żmien għal gwerra hi li “jum il-​vendetta taʼ Alla tagħna” huwa imminenti. (Isaija 61:1, 2) Fl-​1914, iż-​żmien imwaqqat t’Alla kien wasal biex hu jistabbilixxi s-​Saltna Messjanika u jawtorizzaha ħalli tiġġieled gwerra attiva kontra s-​sistema taʼ Satana. Il-​perijodu taʼ żmien assenjat lill-​bnedmin biex jesperimentaw bil-​ħakma umana mingħajr indħil divin skada f’dak iż-​żmien. Minflok ma jaċċettaw lill-​Ħakkiem Messjaniku maħtur minn Alla, il-​biċċa l-​kbira tan-​nies jibqgħu jirrifjutawh, l-​istess bħalma għamlu l-​biċċa l-​kbira fl-​ewwel seklu. (Atti 28:27) Għalhekk, minħabba l-​oppożizzjoni lejn is-​Saltna, Kristu ġie sforzat biex imur ‘jaħkem f’nofs l-​għedewwa tiegħu.’ (Salm 110:2) B’ferħ, Apokalissi 6:2 iwiegħed li hu se “[j]kompli jirbaħ.” Dan se jagħmlu matul il-​“gwerra taʼ nhar il-​Jum il-​kbir taʼ Alla li jistaʼ kollox . . . , li bil-​Lhudi jsejjħulu Ħarmagedon.”—Apokalissi 16:14, 16.

Wasal “Żmien li Titkellem”

11. Jehovah għala għadu juri paċenzja tant kbira, imma x’se jiġri eventwalment?

¹¹ Għaddew 85 sena mill-​1914, il-​punt kruċjali taʼ bidla fl-​affarijiet umani. Jehovah għadu juri paċenzja tant kbira maʼ l-​umanità. Hu ġiegħel lix-​Xhieda tiegħu jkunu konxji bis-​sħiħ taʼ l-​urġenza tas-​sitwazzjoni. Hemm miljuni taʼ ħajjiet involuti. Dawn il-​folol taʼ nies jixirqilhom li jiġu mwissijin għax “il-​Mulej . . . ma jridx li xi ħadd jintilef, imma li kulħadd jersaq għall-​indiema.” (2 Pietru 3:9) Minkejja dan, dalwaqt il-​“Mulej Ġesù jfeġġ mis-​smewwiet imdawwar bl-​anġli tal-​qawwa tiegħu.” Imbagħad, dawk kollha li minn jeddhom irrifjutaw il-​messaġġ tas-​Saltna t’Alla se jġarrbu l-​‘ħlas [“vendetta,” NW]’ li Ġesù se jġib fuq “dawk li ma jagħrfux lil Alla, u . . . dawk li ma jobdux l-​Evanġelju taʼ Sidna Ġesù.”—2 Tessalonikin 1:6-9.

12. (a) Għala jkun kollu għalxejn li wieħed joqgħod jispekula dwar meta għandha mnejn tibda t-​tribulazzjoni l-​kbira? (b) Dwar liema periklu f’konnessjoni maʼ dan wissa Ġesù?

¹² Il-​paċenzja taʼ Jehovah meta finalment se tispiċċa? Ikun kollu għalxejn li wieħed joqgħod jispekula dwar meta għandha mnejn tibda d-​“diqa [“tribulazzjoni,” NW] kbira.” Ġesù stqarr b’mod ċar: “Dwar dak il-​jum u s-​siegħa ħadd ma jaf xejn.” Mill-​banda l-​oħra, hu wissa: “Ishru, [“ibqgħu għassu,” NW] mela, għax ma tafuhx il-​jum li fih jiġi Sidkom. . . . kunu lesti intom ukoll, għax qatt ma tistgħu tobsru s-​siegħa li fiha jiġi Bin il-​bniedem.” (Mattew 24:21, 36, 42, 44) Fi kliem sempliċi, dan ifisser li kull ġurnata għandna nibqgħu għassa għall-​ġrajjiet dinjin u nżommu f’moħħna li se tfaqqaʼ t-​tribulazzjoni l-​kbira. (1 Tessalonikin 5:1-5) Kemm hu perikoluż li naħsbu li nistgħu niħduha bil-​lajma, u ngħixu, l-​hekk imsejħa ħajja normali, waqt li nistennew biex naraw kif jistgħu jiżvolġu l-​affarijiet! Ġesù qal: “Oqogħdu attenti, u qisu li l-​ikel u x-​xorb żejjed u s-​sokor ma jmewwtulkomx qalbkom, u tħallux li l-​ħafna tħassib għall-​ħtiġiet tal-​ħajja jeħdilkom raskom, li ma ssibuhx dak il-​Jum fuqkom għal għarrieda.” (Luqa 21:34, 35) Nistgħu nkunu ċerti dwar dan: L-​“erbat irjieħ” tal-​qerda li fil-​preżent qed jiġu miżmumin mill-​“erbaʼ anġli” taʼ Jehovah, m’humiex se jibqgħu miżmumin għal dejjem.—Apokalissi 7:1-3.

13. X’irrikonoxxew kważi sitt miljun ruħ?

¹³ Meta wieħed iqis il-​jum taʼ rendikont li tant riesaq bil-​ħeffa, il-​kliem taʼ Salamun dwar li hemm “żmien li titkellem” jieħu tifsira speċjali. (Koħèlet 3:7) Billi rrikonoxxew li issa hu tabilħaqq iż-​żmien li jitkellmu, kważi sitt miljun Xhud taʼ Jehovah qegħdin jitkellmu b’mod żeluż dwar il-​glorja tas-​Saltna t’Alla u jwissu dwar il-​jum taʼ vendetta tiegħu. Huma joffru lilhom infushom minn rajhom f’dan il-​jum tal-​qawwa militari taʼ Kristu.—Salm 110:3, Saydon; Salm 145:10-12.

Dawk li Jitkellmu dwar is-​‘Sliem, u Sliem m’Hemmx’

14. Liema profeti foloz kienu jeżistu matul is-​sebaʼ seklu Q.E.K.?

¹⁴ Matul is-​sebaʼ seklu Q.E.K., il-​profeti t’Alla Ġeremija u Eżekjel taw messaġġi divini taʼ ġudizzju kontra Ġerusalemm minħabba l-​korsa stinata tagħha taʼ diżubbidjenza lejn Alla. Il-​qerda li bassru seħħet fis-​sena 607 Q.E.K., avolja l-​mexxejja reliġjużi prominenti u influwenti kienu qalu l-​oppost taʼ dak li qalu l-​messaġġiera t’Alla. Dawn il-​mexxejja reliġjużi wrew kemm kienu “profeti boloh li . . . qarrqu bil-​poplu . . . [t’Alla], meta qalulu: ‘Sliem’, u sliem ma kienx hemm.”—Eżekjel 13:1-16; Ġeremija 6:14, 15; 8:8-12.

15. Jeżistu xi profeti foloz simili llum? Spjega.

¹⁵ Il-​biċċa l-​kbira tal-​mexxejja reliġjużi llum, bħal dawk il-​“profeti boloh” taʼ dak iż-​żmien, jonqsu li jwissu lin-​nies dwar il-​jum tal-​ġudizzju t’Alla li riesaq. Minflok, huma jagħtu stampa ottimista li gruppi politiċi fl-​aħħar mill-​aħħar se jiksbu l-​paċi u s-​sigurtà. Billi huma iktar moħħhom f’li jogħġbu lill-​bnedmin milli lil Alla, lin-​nies tal-​parroċċi tagħhom jgħidulhom dak li jieħdu gost jisimgħu minflok ma jispjegawlhom li s-​Saltna t’Alla ġiet stabbilita u li s-​Sultan Messjaniku dalwaqt se jlesti l-​konkwista tiegħu. (Danjel 2:44; 2 Timotju 4:3, 4; Apokalissi 6:2) Bħala profeti foloz, huma wkoll jitkellmu dwar ‘sliem, u sliem m’hemmx.’ Imma dalwaqt il-​konvinzjoni li għandhom f’daqqa waħda se tinbidel f’orrur meta huma se jkollhom jiffaċċjaw il-​qilla taʼ dak il-​Wieħed li rrappreżentaw ħażin u li min jaf kemm ġabu tmaqdir fuq ismu. Il-​mexxejja taʼ l-​imperu dinji taʼ reliġjon falza, deskritti fil-​Bibbja bħala mara immorali, se jieħdu d-​daqqa tal-​mewt huma u jgħajtu għajat qarrieq taʼ paċi.—Apokalissi 18:7, 8.

16. (a) Ix-​Xhieda taʼ Jehovah liema ħaġa ddikjaraw pubblikament li huma? (b) Kif inhuma differenti minn dawk li jgħajtu ‘sliem, u sliem m’hemmx’?

¹⁶ Dawk li għandhom fidi fil-​wegħda t’Alla taʼ paċi vera m’humiex se jitilfu l-​fiduċja tagħhom minħabba li l-​maġġuranza tal-​mexxejja prominenti u influwenti jippersistu fil-​wegħda ipokrita tagħhom taʼ paċi. Għal iktar minn seklu, ix-​Xhieda taʼ Jehovah ddikjaraw pubblikament li huma difensuri leali tal-​Kelma t’Alla, avversarji kuraġġużi tar-​reliġjon falza, u wħud li jappoġġaw b’mod riżolut is-​Saltna t’Alla. Mhux talli lin-​nies ma joqogħdux ibennuhom b’xi kantaliena dwar il-​paċi li ddoqqilhom għal widnejhom, imma talli jistinkaw b’mod ħabriek biex iġagħluhom jistenbħu għar-​realtà li llum hu żmien taʼ gwerra.—Isaija 56:10-12; Rumani 13:11, 12; 1 Tessalonikin 5:6.

Jehovah ma Jibqax Sieket

17. X’ifisser li Jehovah dalwaqt m’huwiex se jibqaʼ sieket iktar?

¹⁷ Salamun qal ukoll: “Il-​ġust u l-​ħażin Alla jagħmel ħaqq minnhom, għax kull ħaġa għandha waqtha.” (Koħèlet 3:17) Iva, Jehovah għandu żmien imwaqqat biex jesegwixxi l-​ġudizzju fuq ir-​reliġjon falza u fuq “is-​slaten taʼ l-​art [li] iqumu . . . kontra l-​Mulej u l-​Midluk tiegħu.” (Salm 2:1-6; Apokalissi 16:13-16) Ladarba jkun wasal dak iż-​żmien, ikun għadda ż-​żmien li Jehovah jibqaʼ ‘sieket.’ (Salm 83:2 [Salm 83:1, NW]; Isaija 62:1; Ġeremija 47:6, 7) Permezz taʼ Ġesù Kristu, is-​Sultan Messjaniku tiegħu li jinsab fuq it-​tron, hu se ‘jitkellem’ bl-​unika lingwa li mid-​dehra jifhmu l-​avversarji tiegħu: “Joħroġ il-​Mulej bħal wieħed qawwi, u jqanqal bħal gwerrier il-​ħeġġa tiegħu; jgħajjat l-​għajta tal-​gwerra, ħa juri kontra l-​għedewwa l-​qawwa tiegħu. Ili ħafna żmien inżomm is-​skiet, qgħadt bi kwieti u trażżant. Bħal mara fl-​uġigħ tal-​ħlas se ngħajjat, nonfoħ u nilheġ f’nifs wieħed. Il-​muntanji u l-​għoljiet nagħmilhom ħerba, innixxfilhom ħdurithom kollha. Nbiddel ix-​xmajjar f’xagħri, u nnixxef l-​ilma qiegħed. Nmexxi lill-​għomja fi triq li ma jafuhiex; mogħdijiet li ma jafuhomx inqabbadhom. Id-​dlam inbiddlu f’dawl quddiemhom, it-​triqat mgħawwġa niddrittahom. Dan kollu nagħmlu għalihom, u qatt iżjed ma nabbandunahom.” (Korsiv tagħna.)—Isaija 42:13-16.

18. In-​nies t’Alla f’konnessjoni maʼ liema ħaġa dalwaqt se ‘jibqgħu siekta’?

¹⁸ Meta Jehovah ‘jitkellem’ biex jiddefendi d-​Divinità tiegħu, in-​nies tiegħu m’humiex se jkollhom iktar għalfejn jitkellmu biex jiddefendu lilhom infushom. Se jkun imiss lilhom li ‘jibqgħu siekta.’ Dan il-​kliem se japplika għalihom bħalma applika għall-​qaddejja t’Alla fl-​imgħoddi: “Intom ma tiġġildux f’din il-​battalja; oqogħdu f’postkom, tiċċaqilqux, u taraw ir-​rebħa tal-​Mulej għalikom.”—2 Kronaki 20:17.

19. L-​aħwa spiritwali taʼ Kristu liema privileġġ dalwaqt se jkollhom?

¹⁹ X’disfatta totali għal Satana u l-​organizzazzjoni tiegħu! L-​aħwa glorifikati taʼ Kristu se jieħdu sehem f’li jagħmlu rebħa impressjonanti f’isem it-​tjieba, fi qbil mal-​wegħda: “Alla tas-​sliem ma jdumx ma jisħaq taħt riġlejkom lil Satana.” (Rumani 16:20) Żmien il-​paċi li tant ilna nistennewh fl-​aħħar jinsab qrib.

20. Dalwaqt se jkun żmien għal liema ħaġa?

²⁰ Kemm se jkunu mberkin dawk kollha fuq l-​art li se jibqgħu ħajjin wara li Jehovah jkun wera x’qawwa kbira għandu! Ftit wara, maʼ dawn se jissieħbu rġiel u nisa leali tal-​passat li jkun waslilhom iż-​żmien imwaqqat għalihom ħalli jiġu rxoxtati. Ir-​Renju t’Elf Sena taʼ Kristu se jkun verament “żmien li tħawwel . . . , żmien li tfejjaq . . . , żmien li tibni . . . , żmien li tidħak . . . , żmien li tiżfen . . . , żmien li tgħannaq, u . . . żmien li tħobb.” Iva, u se jkun għall-​eternità “żmien il-​paċi”!—Koħèlet 3:1-8; Salm 29:11; 37:11; 72:7.

X’Inhi t-​Tweġiba Tiegħek?

◻ X’inhi l-​bażi għall-​paċi dejjiema?

◻ Ix-​Xhieda taʼ Jehovah għala jqisu ż-​żmien preżenti bħala “żmien it-​taqbid”?

◻ In-​nies t’Alla meta għandhom ‘jitkellmu,’ u meta għandhom ‘jibqgħu siekta’?

◻ Jehovah kif u meta m’huwiex se jibqaʼ sieket?

[Kaxxa/Stampi f’paġna 13]

Jehovah Għandu Żmien Imwaqqat biex

◻ jiġbed lil Gog ħalli jattakka lin-​nies t’Alla.—Eżekjel 38:3, 4, 10-12

◻ idaħħalha f’qalb il-​ħakkiema umani biex jeqirdu lil Babilonja l-​Kbira.—Apokalissi 17:15-17; 19:2

◻ jiċċelebra ż-​żwieġ tal-​Ħaruf.—Apokalissi 19:6, 7

◻ jagħti bidu għall-​gwerra taʼ Ħar–Magedon.—Apokalissi 19:11-16, 19-21

◻ jorbot lil Satana ħalli jibda r-​Renju t’Elf Sena taʼ Kristu.—Apokalissi 20:1-3

Dawn il-​ġrajjiet huma mniżżlin sempliċement bl-​ordni kif issir referenza għalihom fl-​Iskrittura. Nistgħu nibqgħu ċerti li l-​ħames ġrajjiet kollha kemm huma se jseħħu fl-​ordni li Jehovah jiddetermina u eżattament meta jiddetermina hu.

[Stampi f’paġna 15]

Ir-​renju t’elf sena taʼ Kristu se jkun verament żmien . . .

li tidħak . . .

li tgħannaq . . .

li tħobb . . .

li tħawwel . . .

li tiżfen . . .

li tibni . . .