Int Kif Tħares Lejn il-​Mewt?

MINKEJJA kemm jistaʼ jkollna saħħa jew flus, il-​mewt iġġibilna ħsibijiet taʼ swied il-​qalb hekk kif ngħixu l-​ħajja tagħna taʼ kuljum. Tistaʼ tiġi fuqna d-​darba li jmissna naqsmu t-​triq jew hekk kif immorru nimteddu fis-​sodda. Diżastri bħall-​attakki terroristiċi tal-​11 taʼ Settembru, 2001, fil-​Belt taʼ New York u f’Washington, D.C., iġibuna wiċċ imbwiċċ mal-​fatt li l-​mewt, “l-​aħħar għadu,” tieħu l-​vittmi tagħha minn kull qasam tal-​ħajja u minn kull età. Xi kultant tieħu eluf taʼ vittmi fi ftit minuti biss.—1 Korintin 15:26.

Minkejja dan, il-​mewt qisha tiġbed l-​attenzjoni taʼ ħafna nies. Donnu li xejn iktar ma jġiegħel lin-​nies jixtru daqshekk gazzetti jew jibqgħu mwaħħlin mat-​televixin daqskemm jagħmlu r-​rapporti taʼ mwiet, speċjalment meta tkun xi mewt taʼ massa nies f’daqqa f’ċirkustanzi li jwerwru. In-​nies donnhom li qatt ma jgħajjew minnhom, kemm jekk ikunu mwiet minħabba xi gwerra, diżastri naturali, kriminalità, jew inkella mard. Din il-​fissazzjoni bil-​mewt tidher l-​iktar stramba meta naraw is-​sentimenti qawwijin li juru xi wħud meta tmut persuna magħrufa jew xi ċelebrità.

Dawn ir-​reazzjonijiet ma nistgħux niċħduhom. In-​nies jibqgħu msaħħrin bil-​mewt—bil-​mewt taʼ ħaddieħor. Però, lanqas biss ikunu jridu jaħsbu dwar il-​mewt tagħhom stess. Il-​mewt tagħna hija suġġett li ħafna minna ma rridux noqogħdu naħsbu dwaru.

Imħawwad Minħabba l-​Mewt?

Il-​ħsieb tal-​mewt tagħna stess dejjem jimbottana u hekk se jibqaʼ jagħmel. Għalfejn? Minħabba li Alla poġġa ġewwa fina x-​xewqa qawwija biex ngħixu għal dejjem. “Qiegħed ukoll f’[qalbhom] il-​ħsieb taʼ l-​eternità,” jgħid Ekkleżjażti 3:​11, skond il-​Bibbja taʼ Karm Żammit. Għalhekk, il-​fatt li l-​mewt ma tistax tiġi evitata, ħoloq konflitt ġewwieni fil-​bniedem, nuqqas taʼ qbil kontinwu. Biex itemmu dan il-​konflitt ġewwieni u biex jissodisfaw din ix-​xewqa naturali li jkomplu jgħixu, il-​bnedmin ivvintaw minn kull xorta taʼ twemmin, mid-​duttrina taʼ l-​immortalità tar-​ruħ sat-​twemmin fir-​riinkarnazzjoni.

Xorta waħda, il-​mewt hija ġrajja taʼ inkwiet u taʼ twerwir, u l-​biżaʼ mill-​mewt jinsab maʼ kullimkien. Għalhekk, m’għandniex għalfejn niskantaw li s-​soċjetà umana b’mod ġenerali tħares lejn il-​mewt bħala prospett tal-​biżaʼ. Ngħiduha kif inhi, il-​mewt tikxef kemm fl-​aħħar mill-​aħħar ħajja mogħtija għall-​ġiri wara l-​ġid u s-​setgħa hija frugħa.

Iżolat Minħabba l-​Mewt?

Fl-​imgħoddi, xi ħadd li kien ikun marid b’mard terminali jew inkella ferut gravi ġeneralment kien jitħalla jmut fl-​ambjent familjari li tant kien jgħożż tad-​dar tiegħu. Ħafna drabi, hekk kien jiġri wkoll fi żminijiet Bibliċi, u saħansitra anki f’xi kulturi taʼ llum għadu jiġri hekk. (Ġenesi 49:​1, 2, 33) F’każi bħal dawn, il-​familja tinġabar u l-​ulied jingħaqdu fil-​konversazzjoni. Dan jgħin lil kull membru tal-​familja biex ma jħossx li qiegħed jitnikket waħdu, u jgħin ukoll biex tinqasam ir-​responsabbiltà u biex jagħmlu vistu flimkien.

Dan huwa f’kuntrast kbir maʼ dak li jiġri f’soċjetà li fiha diskussjoni dwar il-​mewt hija xi ħaġa projbita, meqjusa bħala barra minn lokha, u t-​tfal jitħallew barra minnha kompletament bil-​ħsieb li dan jistaʼ jkun “wisq” għalihom. Il-​mod kif wieħed imut illum huwa differenti f’ħafna aspetti, u spiss ikun iktar solitarju. Għalkemm ħafna jippreferu li jmutu d-​dar, fil-​paċi u taħt il-​kura kollha mħabba tal-​familja, għal ħafna r-​realtà ħarxa hi li jispiċċaw imutu l-​isptar, ħafna drabi iżolati u muġugħa, u mqabbdin maʼ qabda apparat taʼ l-​aħħar teknoloġija. Min-​naħa l-​oħra, miljuni jmutu b’mod anonimu​—bħall-​vittmi mhux identifikati li jmutu b’konsegwenza taʼ ġenoċidji, ġuħ, AIDS, gwerer ċivili, jew sempliċement b’faqar estrem.

Suġġett Tajjeb biex Nixtarruh

Il-​Bibbja ma tiskuraġġiniex milli naħsbu fuq il-​mewt. Fil-​fatt Koħèlet 7:2 jgħidilna: “Aħjar tmur f’dar il-​vistu milli f’dar fejn hemm festa; għax . . . dak hu tmiem il-​bniedem.” Meta niġu ffaċċjati bir-​realtà tal-​mewt, nistgħu nieqfu ftit mir-​rutina tal-​ħsibijiet u l-​attivitajiet li jkollna u niffokaw fuq kemm hi qasira l-​ħajja. Dan jistaʼ jgħinna ngħixu ħajjitna iktar bi skop minflok ma sempliċement ngħixuha bla ħsieb jew naħluha.

Int kif tħares lejn il-​mewt? Eżaminajt sew is-​sentimenti, it-​twemmin, it-​tamiet, u l-​beżgħat li għandek dwar tmiem ħajtek?

Bħan-natura tal-​ħajja, in-​natura tal-​mewt ma tistax tiġi spjegata u mifhuma mill-​bniedem. L-​uniku wieħed li jistaʼ jitkellem fuq dan is-​suġġett b’awtorità taʼ min joqgħod fuqha huwa l-​Ħallieq tagħna. Għandu hemm “l-​għajn tal-​ħajja” u minnu “l-​ħruġ mill-​mewt.” (Salm 36:10 [36:​9, NW]; 68:​21, Saydon [68:​20, NW]) Minkejja li jistaʼ jidher sorprendenti, eżaminar taʼ twemmin popolari dwar il-​mewt fid-​dawl tal-​Kelma t’Alla se jkun kemm taʼ faraġ kif ukoll taʼ rifreskar. Se juri li l-​mewt m’hijiex neċessarjament it-​tmiem taʼ kollox.

[Kumment f’paġna 4]

Il-​possibbiltà tal-​mewt tgħinna ngħixu ħajjitna iktar bi skop