“Hu li Jagħti l-Qawwa lill-Għajjien”
1 Ilkoll kemm aħna nħossuna għajjenin kultant. Dan jistaʼ jkun mhux biss minħabba x-xogħol jew xi attività fiżika oħra imma wkoll minħabba l-problemi li niffaċċjaw f’dawn iż-“żminijiet kritiċi li diffiċli biex issib tarfhom.” (2 Tim. 3:1) Bħala qaddejja taʼ Ġeħova, kif nistgħu niksbu s-saħħa spiritwali meħtieġa biex nibqgħu ma nnaqqsux mill-ministeru tagħna? Dan nagħmluh billi nistrieħu fuq Ġeħova, il-wieħed li għandu setegħtu qawwija. (Is. 40:26) Hu jaf x’inhuma l-bżonnijiet tagħna u għandu interess ġenwin biex jgħinna.—1 Pt. 5:7.
2 Il-Provvedimenti taʼ Ġeħova: Ġeħova jsaħħaħna permezz taʼ l-ispirtu qaddis tiegħu, l-istess forza li xejn u ħadd ma jiflaħ għaliha u li uża biex joħloq l-univers. Jekk negħjew, l-ispirtu t’Alla jgħinna biex ‘nieħdu saħħitna’ lura. (Is. 40:31) Staqsi lilek innifsek, ‘Meta kienet l-aħħar darba li jien tlabt speċifikament għall-ispirtu qaddis biex isaħħaħni ħalli nwettaq l-obbligi Kristjani tiegħi?’—Lq. 11:11-13.
3 Hekk kif kuljum naqraw u nimmeditaw fuq il-Kelma ispirata t’Alla u niġu sostnuti spiritwalment permezz taʼ studju regulari tal-pubblikazzjonijiet Kristjani tagħna, aħna se nkunu bħal siġra b’saħħitha “mħawwla ħdejn nixxigħat taʼ l-ilma li tagħmel il-frott fi żmienha, u l-weraq tagħha ma jidbielx.”—Salm 1:2, 3.
4 Ġeħova juża wkoll lil sħabna fit-twemmin, li jistgħu jkunu bħala ‘għajnuna li ssaħħaħna.’ (Kol. 4:10, 11) Huma jsaħħuna fil-laqgħat tal-kongregazzjoni bil-konversazzjoni, il-kummenti, u t-taħditiet li jibnu tagħhom. (Atti 15:32) B’mod speċjali, l-anzjani Kristjani joffru għajnuna spiritwali u inkuraġġiment li jsaħħaħ.—Is. 32:1, 2.
5 Il-Ministeru: Jekk qed tħossok li qed tegħja, tiqafx milli tippriedka! Kuntrarju għal ħafna attivitajiet oħrajn, li nipparteċipaw regolarment fil-ministeru tassew jirrifreskana. (Mt. 11:28-30) Il-fatt li naqsmu l-aħbar tajba se jgħinna niffokaw fuq is-Saltna t’Alla u nżommu quddiem għajnejna l-eternità u l-prospetti meraviljużi tagħha.
6 Hemm ħafna x’nagħmlu qabel ma din is-sistema mill-agħar tiġi meqruda. Għandna kull raġuni biex nibqgħu sodi fis-servizz tagħna, waqt li ‘niddependu mis-saħħa li jagħti Alla.’ (1 Pt. 4:11) Bl-għajnuna taʼ Ġeħova se ntemmu x-xogħol tagħna, għax hu qed “jagħti l-qawwa lill-għajjien.”—Is. 40:29.