Mistoqsijiet mill-Qarrejja

Ladarba Ġesù kien id-​dixxendent kemm taʼ Ġesse u kemm taʼ David, għala hu msejjaħ “l-​għerq” taʼ l-​antenati tiegħu Ġesse u David?

Int normalment taħseb dwar l-​għerq taʼ siġra jew taʼ pjanta bħala li jiġi qabel iz-​zokk jew il-​friegħi. Mela kien ikun jidher li Ġesse (jew ibnu David) kien jintqal dwaru li hu bħall-​għerq li minnu eventwalment ħareġ Ġesù. Xorta waħda, Isaija 11:10 bassar li l-​Messija li kien għad irid jiġi kellu jkun “l-​għerq taʼ Ġesse,” u Rumani 15:12 applika din il-​profezija għal Ġesù Kristu. Iktar tard Rivelazzjoni 5:5 sejjaħlu “l-​Iljun li hu tat-​tribù taʼ Ġuda, l-​għerq taʼ David.” Hemm raġunijiet għal dawn it-​titli.

Il-Bibbja taʼ spiss tuża pjanta, bħalma hi siġra, bħala tixbieha. Xi drabi dan jiġi mill-​fatt li bħalma żerriegħa tinbet u tikber, l-​għeruq jiżżviluppaw qabel il-​friegħi ħoxnin, friegħi oħrajn, jew frott li kollha huma appoġġjati mill-​għeruq. Per eżempju, Isaija 37:31 jgħid: “Dawk li jaħarbu tad-​dar taʼ Ġuda, dawk li jitħallew jibqgħu, ċertament li se jrabbu għerq ’l isfel u jipproduċu frott ’il fuq.”—Ġob 14:8, 9; Isaija 14:29.

Jekk il-​ħsara tolqot lill-​għerq, il-​bqija tas-​siġra tħoss l-​effett. (Qabbel Mattew 3:10; 13:6.) Fi qbil maʼ dan, Malakija kiteb: “‘[I]l-jum li ġej ċertament li se jiblagħhom,’ qal Jehovah taʼ l-​armati, ‘sabiex dan ma jħallilhomx jew għerq jew fergħa.’” (Malakija 4:1) It-​tifsira hija ċara​—qtugħ komplet. Il-​ġenituri (l-għeruq) kellhom jiġu maqtugħin, kif ukoll in-​nisel tagħhom (il-friegħi ħoxnin).a Dan jenfasizza r-​responsabbiltà li għandhom il-​ġenituri lejn uliedhom taʼ taħt l-​età; il-​futur dejjiemi taʼ tfal taħt l-​età jistaʼ jkun iddeterminat mill-​qagħda tal-​ġenituri tagħhom quddiem Alla.—1 Korintin 7:14.

Il-lingwaġġ f’​Isaija 37:31 u f’​Malakija 4:1 ġej mill-​fatt li l-​friegħi l-​ħoxnin (u l-​frott fuq friegħi sekondarji) jisiltu l-​ħajja tagħhom mill-​għerq. Dan huwa l-​qofol għal li wieħed jifhem kif Ġesù hu l-​“għerq taʼ Ġesse” u l-​“għerq taʼ David.”

B’mod tal-​laħam, Ġesse u David kienu l-​antenati taʼ Ġesù; huma kienu l-​għeruq, hu r-​rimja jew fergħa ħoxna. Isaija 11:1 qal dwar il-​Messija li kien għad irid jiġi: “Trid toħroġ fergħa miz-​zokk taʼ Ġesse; u mill-​għeruq tiegħu rimja se tkun tagħti l-​frott.” B’mod simili, f’​Rivelazzjoni 22:16, Ġesù sejjaħ lilu nnifsu “n-​nisel taʼ David.” Imma hu wkoll japplika għalih innifsu t-​termini “l-​għerq taʼ David.” Għala?

Mod wieħed li bih Ġesù huwa l-​“għerq” taʼ Ġesse u David huwa li permezz tiegħu l-​linja ġeneoloġika tagħhom tibqaʼ ħajja. L-​ebda bniedem illum ma jistaʼ jagħti prova li hu mit-​tribù taʼ Levi, Dan, jew saħansitra Ġuda, imma nistgħu nkunu ċerti li l-​linja taʼ Ġesse u David għadha ħajja minħabba li Ġesù issa hu ħaj fis-​sema.—Mattew 1:1-16; Rumani 6:9.

Ġesù rċieva wkoll il-​pożizzjoni taʼ Sultan tas-​sema. (Luqa 1:32, 33; 19:12, 15; 1 Korintin 15:25) Dan għandu x’jaqsam mar-​relazzjoni tiegħu saħansitra maʼ l-​antenati tiegħu. B’mod profetiku, David sejjaħ lil Ġesù l-​Mulej tiegħu.—Salm 110:1; Atti 2:34-36.

Fl-aħħarnett, Ġesù Kristu hu mogħti l-​poter bħala Mħallef. Matul il-​Millenju li ġej, il-​benefiċċji tar-​rahan taʼ Ġesù se jestendu wkoll għal Ġesse u David. Il-​ħajja tagħhom fuq l-​art imbagħad se tiddependi minn Ġesù, li se jaqdi bħala “Missier Etern” tagħhom.—Isaija 9:6.

Minħabba f’hekk, għalkemm Ġesù ħareġ mil-​linja taʼ Ġesse u David, dak li sar u dak li għad irid jagħmel jikkwalifikawh biex jiġi msejjaħ “l-​għerq taʼ Ġesse” u “l-​għerq taʼ David.” (w94 8/15)

[Nota taʼ taħt]

[Sors taʼ l-​Istampa f’paġna 32]

Pictorial Archive (Near Eastern History) Est.