Kif Nistgħu Nkampaw maʼ “Xewka f’Ġisimna”

“Biżżejjed għalik il-​grazzja [“il-​qalb tajba mhix mistħoqqa,” “NW”] tiegħi.”—2 KORINTIN 12:9.

1, 2. (a) Għala m’għandniex għalfejn nitħawdu dwar il-​fatt li niffaċċjaw provi u problemi? (b) Għala nistgħu nkunu kunfidenti minkejja l-​provi?

“DAWK li jridu jgħixu ħajja tajba fi Kristu Ġesù lkoll jgħaddu mill-​persekuzzjoni.” (2 Timotju 3:12) Għala? Għax Satana jsostni li l-​bnedmin jaqdu lil Alla għal raġunijiet egoistiċi, u jinsab iddisprat biex juri li dan huwa minnu. Ġesù darba wissa lill-​appostli leali tiegħu: “Ix-​Xitan riedkom f’idejh biex jgħaddikom mill-​għarbiel bħall-​qamħ.” (Luqa 22:31) Ġesù kien jaf tajjeb li Alla jħalli lil Satana jittestjana permezz taʼ problemi li jistgħu jweġġgħuna. M’għandniex xi ngħidu, dan ma jfissirx li kull diffikultà li niffaċċjaw fil-​ħajja ġejja direttament minn Satana jew id-​demonji tiegħu. (Koħèlet 9:11) Imma Satana huwa ħerqan li juża kull mezz possibbli biex ikissrilna l-​integrità tagħna.

² Il-​Bibbja tgħidilna li m’għandniex għalfejn inħallu l-​provi li niffaċċjaw iħawduna. Kwalunkwe prova li tistaʼ tiġi fuqna la se tkun xi ħaġa li qatt ma ġrat u lanqas waħda li qatt ma stennejnieha. (1 Pietru 4:12) Fil-​fatt, ‘ħutna, imxerrdin fid-​dinja, qegħdin jaqsmu magħna l-​istess tbatijiet tagħna.’ (1 Pietru 5:9) Illum, Satana qed jagħmel pressjoni qawwija fuq kull qaddej t’Alla. Ix-​Xitan jieħu gost jarana turmentati b’ħafna problemi li jkunu bħal xewka f’ġisimna. Għal dan l-​għan, hu juża s-​sistema dinjija b’tali mod li din tkabbrilna kwalunkwe ‘xewka f’ġisimna’ jew tagħmilhielna iktar ħarxa. (2 Korintin 12:7) Minkejja dan, l-​attakki taʼ Satana m’għandhomx għalfejn ikissrulna l-​integrità tagħna. Sewwa sew bħalma Jehovah ‘jagħtina l-​qawwa u l-​għajnuna’ biex nifilħu għat-​tentazzjoni, l-​istess se jagħmel meta niffaċċjaw problemi li jkunu bħal xewk f’ġisimna.—1 Korintin 10:13.

Kif Nistgħu Ngħixu b’Xewka f’Ġisimna

3. Kif wieġeb Jehovah meta Pawlu talbu biex ineħħilu x-​xewka minn ġismu?

³ L-​appostlu Pawlu talab lil Alla biex ineħħilu x-​xewka minn ġismu. “Fuq hekk tliet darbiet tlabt il-​Mulej biex hi titbiegħed minni.” X’kienet it-​tweġiba taʼ Jehovah għat-​talba kollha ħrara taʼ Pawlu? “Biżżejjed għalik il-​grazzja [“il-​qalb tajba mhix mistħoqqa,” NW] tiegħi; għax il-​qawwa tiegħi tidher fl-​aqwa tagħha fejn hemm id-​dgħajjef.” (2 Korintin 12:​8, 9) Ejja nanalizzaw din it-​tweġiba u naraw kif din tistaʼ tgħinna nkampaw maʼ kwalunkwe problema li tkun bħal xewka f’ġisimna.

4. Pawlu b’liema modi bbenefika mill-​qalb tajba mhix mistħoqqa taʼ Jehovah?

⁴ Innota li Alla inkuraġġixxa lil Pawlu biex ikun grat għall-​qalb tajba mhix mistħoqqa li kienet diġà ntweriet miegħu permezz taʼ Kristu. Tabilħaqq, Pawlu tbierek bil-​kbir f’ħafna modi. Jehovah b’imħabba tah il-​privileġġ li jsir dixxiplu, minkejja li qabel kien jopponi b’mod fanatiku lis-​segwaċi taʼ Ġesù. (Atti 7:58; 8:3; 9:​1-4) Minn dakinhar ’il quddiem, Jehovah ta lil Pawlu ħafna inkarigi u opportunitajiet taʼ servizz eċċitanti. It-​tagħlima għalina hija ċara daqs il-​kristall. Anki fl-​agħar żmien, xorta jkollna ħafna barkiet għalxiex inkunu grati. Il-​provi tagħna qatt m’għandhom iġagħluna ninsew it-​tjubija abbundanti li wera magħna Jehovah.—Salm 31:20 (31:​19, NW).

5, 6. (a) Jehovah kif għallem lil Pawlu li l-​qawwa divina “tidher fl-​aqwa tagħha fejn hemm id-​dgħajjef”? (b) L-​eżempju taʼ Pawlu kif wera biċ-​ċar li Satana huwa giddieb?

⁵ Il-​qalb tajba mhix mistħoqqa taʼ Jehovah hija biżżejjed f’aspett ieħor. Il-​qawwa t’Alla hija iktar milli huwa meħtieġ biex tgħinna matul il-​provi tagħna. (Efesin 3:20) Jehovah għallem lil Pawlu li l-​qawwa divina “tidher fl-​aqwa tagħha fejn hemm id-​dgħajjef.” Kif? Billi b’imħabba ta lil Pawlu s-​saħħa kollha li kellu bżonn biex ikampa mal-​provi tiegħu. Min-​naħa taʼ Pawlu, is-​sabar tiegħu u l-​fiduċja sħiħa f’Jehovah urew lil kulħadd li fil-​każ taʼ dan ir-​raġel dgħajjef u midneb, il-​qawwa taʼ Jehovah kienet trijonfat. Issa ikkunsidra l-​effett fuq ix-​Xitan, li jsostni li l-​bnedmin jaqdu lil Alla biss meta l-​ħajja tkun kollha ward u żahar. L-​integrità taʼ Pawlu kienet bħal daqqa taʼ ħarta għal dak il-​kalunnjatur!

⁶ Dan hu l-​istess Pawlu li qabel kien jaħdem id f’id maʼ Satana fil-​ġlieda tiegħu kontra Alla, persekutur insolenti tal-​Kristjani, u Fariżew żeluż li, bla dubju, darba kien jgħix fil-​lussu għax kien ġej minn familja taʼ klassi għolja. Issa Pawlu kien qed jaqdi lil Jehovah u lil Kristu bħala “l-​inqas wieħed fost l-​appostli.” (1 Korintin 15:9) Bħala tali, hu umilment kien qed joqgħod għall-​awtorità tal-​ġemgħa li tiggverna Kristjana taʼ l-​ewwel seklu. U kien qed jissaporti lealment minkejja x-​xewka f’ġismu. Il-​provi li għadda minnhom Pawlu f’ħajtu ma taffewlux iż-​żelu tiegħu bħalma ried Satana. Pawlu qatt ma warrab minn quddiem għajnejh it-​tama tiegħu—li jkun parti mis-​Saltna tas-​sema taʼ Kristu. (2 Timotju 2:12; 4:18) L-​ebda xewka, kienet kemm kienet t’uġigħ, ma setgħet tnaqqaslu ż-​żelu tiegħu. Jalla ż-​żelu tagħna jkompli jkun b’saħħtu bl-​istess mod! Billi jsostnina matul il-​provi tagħna, Jehovah jonorana bl-​opportunità unika li ngħinuh joħroġ lil Satana taʼ giddieb.—Proverbji 27:11.

Il-​Provvedimenti taʼ Jehovah Huma Vitali

7, 8. (a) Jehovah liema mezzi juża biex isaħħaħ lill-​qaddejja tiegħu llum? (b) Li naqraw u nistudjaw il-​Bibbja kuljum għala huwa vitali biex nissaportu xi xewka f’ġisimna?

⁷ Illum, Jehovah jagħti l-​qawwa lill-​Kristjani leali permezz taʼ l-​ispirtu qaddis tiegħu, il-​Kelma tiegħu, u l-​fratellanza Kristjana tagħna. Bħall-​appostlu Pawlu, aħna nistgħu nitfgħu t-​tagħbija tagħna fuq Jehovah permezz tat-​talb. (Salm 55:​22, KŻ) Għalkemm Alla jistaʼ ma jeħlisniex mill-​provi tagħna, hu jistaʼ jagħtina l-​għerf biex inkunu nistgħu nkampaw magħhom, saħansitra maʼ dawk il-​provi li nsibuhom iktar diffiċli minn oħrajn biex nifilħu għalihom. Jehovah jistaʼ wkoll isaħħaħna, billi jagħtina qawwa iktar min-​normal, sabiex jgħinna nissaportu.—2 Korintin 4:7.

⁸ Kif nirċivuha għajnuna bħal din? Irridu nistudjaw bir-​reqqa l-​Kelma t’Alla, għax permezz tagħha, Alla żgur li se jfarraġna. (Salm 94:19) Fil-​Bibbja, naqraw il-​kliem li jqanqal tal-​qaddejja t’Alla meta dawn talbu għall-​għajnuna divina. It-​tweġibiet taʼ Jehovah, li taʼ spiss jinkludu kliem taʼ faraġ, iġagħluna nimmeditaw. Studju tal-​Kelma t’Alla se jsaħħaħna “ħalli b’hekk jidher sewwa li l-​kobor taʼ din il-​qawwa ġej minn Alla, u mhux minna.” Sewwa sew bħalma għandna bżonn nieklu ikel fiżiku kuljum biex nieħdu s-​sustanzi u s-​saħħa, hekk ukoll għandna nitimgħu lilna nfusna regolarment mill-​Kelma t’Alla. Nagħmlu hekk aħna? Jekk iva, se naraw li l-​qawwa iktar min-​normal li nirċievu se tgħinna nissaportu kwalunkwe xewk figurattiv li jistaʼ jnikkitna bħalissa.

9. L-​anzjani kif jistgħu jappoġġaw lil dawk li jkunu għaddejjin mill-​problemi?

⁹ L-​anzjani Kristjani li għandhom il-​biżaʼ t’Alla jistgħu juru li huma “lqugħ għar-​riħ, u kenn fit-​tempesta,” jiġifieri, protezzjoni mill-​inkwiet u l-​problemi. L-​anzjani, li jridu li din id-​deskrizzjoni mnebbħa tapplika għalihom, iridu jitolbu umilment u sinċerament lil Jehovah biex jagħtihom “ilsien taʼ wieħed jitgħallem” sabiex b’hekk ikunu jafu kif iwieġbu bi kliem xieraq lil uħud li qed ibatu. Il-​kliem taʼ l-​anzjani jistaʼ jkun bħal irxiex li jiffriska u jfarraġ l-​ispirtu tagħna meta ngħaddu minn żmien diffiċli. Billi ‘jikkonslaw lid-​dipressi,’ l-​anzjani jkunu qed jappoġġaw verament lil ħuthom spiritwali li forsi jkunu qegħdin jegħjew jew jaqtgħu qalbhom minħabba xi xewka f’ġisimhom.—Isaija 32:2; 50:4; 1 Tessalonikin 5:​14, NW.

10, 11. Il-qaddejja t’Alla kif jistgħu jinkuraġġixxu lil oħrajn li jkunu għaddejjin minn provi diffiċli?

¹⁰ Il-​qaddejja taʼ Jehovah kollha huma parti mill-​familja Kristjana magħquda tiegħu. Iva, “kull wieħed minna membru taʼ l-​ieħor,” u “[“qegħdin taħt obbligu li,” NW] nħobbu lil xulxin.” (Rumani 12:5; 1 Ġwann 4:11) Kif inwettquh dan l-​obbligu? Skond l-​1 Pietru 3:​8, aħna nagħmlu dan billi ‘nħossu għal xulxin, u nħobbu bħal aħwa u b’qalb ħanina’ lil qrabatna kollha fil-​fidi. Ilkoll kemm aħna nistgħu nuru konsiderazzjoni speċjali lejn dawk li għandhom xi xewka f’ġisimhom li qed tgħakkishom b’mod partikulari, sew jekk żgħażagħ u sew jekk kbar fl-​età. Kif?

¹¹ Irridu nagħmlu ħilitna biex inħossu għat-​tbatija tagħhom. Jekk ma nurux mogħdrija, inkunu insensittivi, jew indifferenti, nistgħu bla ma nintebħu nżidu t-​tbatija tagħhom. Il-​fatt li nkunu konxji taʼ dak li għaddejjin minnu għandu jqanqalna biex noqogħdu attenti għal dak li ngħidu, il-​mod kif ngħiduh, u kif naġixxu. Hi x’inhi x-​xewka li qed tkiddhom, jekk inkunu pożittivi u inkuraġġanti nistgħu ngħinuhom itaffu daqsxejn mill-​uġigħ qawwi li jkunu qed iħossu. B’dan il-​mod nistgħu nkunu t’għajnuna li ssaħħaħhom.—Kolossin 4:11.

Kif Xi Wħud Kampaw b’Suċċess

12-14. (a) X’għamlet waħda Kristjana biex tissaporti d-​diffikultajiet li ġew fuqha minħabba l-​kanċer? (b) L-​aħwa spiritwali taʼ din l-​oħt kif għenuha u inkuraġġewha?

¹² Hekk kif noqorbu lejn it-​tmiem taʼ dawn l-​aħħar jiem, “il-​weġgħat” ikomplu jiżdiedu kuljum. (Mattew 24:​8, KŻ) Għaldaqstant, il-​provi x’aktarx li se jiġu fuq kulħadd, speċjalment fuq il-​qaddejja leali taʼ Jehovah li qed iħabirku sabiex jagħmlu r-​rieda tiegħu. Ħu l-​eżempju taʼ waħda Kristjana li kienet qed taqdi fil-​ministeru full-time. Din sabulha kanċer u saritilha operazzjoni biex ineħħulha l-​glandoli limfatiċi u tar-​riq. Meta hi u żewġha saru jafu li kellha din il-​marda, minnufih għamlu talba twila u mimlija ħrara lil Jehovah. Iktar tard hi qalet li ħassew sens kbir taʼ paċi. Minkejja dan, kellha tiffaċċja ħafna mumenti koroh, speċjalment minħabba l-​effetti tal-​kura li tawha.

¹³ Sabiex tkampa mas-​sitwazzjoni tagħha, din l-​oħt ipprovat issir taf kemm tistaʼ dwar il-​kanċer. Hi tkellmet mat-​tobba tagħha. Iżjed minn hekk, fittxet fit-​Torri taʼ l-​Għassa, Stenbaħ!, u pubblikazzjonijiet Kristjani relatati oħrajn xi rakkonti taʼ wħud li kellhom din il-​marda u kampaw magħha emozzjonalment. Hi qrat ukoll xi siltiet mill-​Bibbja li juru kif Jehovah kapaċi jsostni lin-​nies tiegħu matul żminijiet diffiċli, u informazzjoni siewja oħra.

¹⁴ Artiklu wieħed li jittratta dwar id-​disperazzjoni jikkwota dan il-​kliem mimli għerf: “Min irid jinfired mill-​oħrajn jara x’jaqlaʼ.” (Proverbji 18:1) Għalhekk, l-​artiklu ta dan il-​parir: “Tinqatax għalik waħdek.”a L-​oħt tirrakkonta: “Ħafna qaluli li kienu qed jitolbu għalija, u kien hemm oħrajn li ċempluli. Żewġ anzjani kienu jċempluli regolarment biex jaraw kif jien. Qlajt ħafna fjuri u rċivejt muntanja kartolini. Xi wħud saħansitra kienu jippreparawli xi ikliet. Kien hemm ħafna wkoll li offrewli biex jiħduni għall-​kura.”

15-17. (a) Waħda Kristjana kif kampat mad-​diffikultajiet li ħabbtet wiċċha magħhom wara li kellha żewġ inċidenti? (b) L-​aħwa fil-​kongregazzjoni liema għajnuna taw?

¹⁵ Waħda li ilha żmien twil taqdi lil Jehovah fin-​New Mexico, fl-​Istati Uniti, kellha żewġ inċidenti bil-​karozza. Peress li weġġgħet għonqha u spallejha, l-​artrite, li kienet ilha tbati biha għal 25 sena, marret ferm għall-​agħar. Hi tirrakkonta: “Kont insibha diffiċli biex inżomm rasi ’l fuq u nġorr xi ħaġa li tkun tiżen iżjed minn 2 kilogrammi. Imma t-​talb mimli ħeġġa li tlabt lil Jehovah għenni ħafna. Anki l-​artikli li studjajna fit-​Torri taʼ l-​Għassa kienu t’għajnuna. Artiklu minnhom kien fuq Mikea 6:​8, u fih ħareġ il-​punt li meta wieħed ikun modest m’Alla jkun qed jagħraf il-​limitazzjonijiet tiegħu. Dan għenni nifhem li minkejja s-​sitwazzjoni tiegħi, m’għandix inħossni skuraġġita, avolja ma kontx qed inqattaʼ ħin fil-​ministeru daqs kemm xtaqt. Dak li jiswa l-​iktar huwa li naqdi lil Alla b’motivi sinċieri.”

¹⁶ Hi tgħid ukoll: “L-​anzjani dejjem faħħruni għall-​isforzi tiegħi biex nattendi l-​laqgħat u noħroġ fil-​ministeru taʼ l-​għalqa. Iż-​żgħar kienu jiġu jilqgħuni billi jgħannquni magħhom. Il-​pijunieri tant kienu jieħdu paċenzja bija. Taʼ spiss, meta kont inkun marida u ma kontx inkun nistaʼ noħroġ fil-​ministeru kienu jbiddlu l-​pjanijiet tagħhom. Meta kien ikun temp ikrah, kienu jiħduni fuq żjajjar lura jew jistidnuni biex immur magħhom fuq xi studju tal-​Bibbja. U peress li ma stajtx inġorr basket bil-​kotba, meta kont noħroġ nippriedka, il-​pubblikaturi l-​oħra kienu jżommuli l-​letteratura tiegħi fil-​basket tagħhom.”

¹⁷ Innota l-​għajnuna li dawn iż-​żewġ aħwa rċivew mingħand l-​anzjani tal-​kongregazzjoni u sħabhom fit-​twemmin biex ikunu jistgħu jkampaw mal-​mard li kien bħal xewk f’ġisimhom. B’qalb tajba, dawn offrew għajnuna prattika u speċifika għall-​bżonnijiet spiritwali, fiżiċi, u emozzjonali tagħhom. Ma jinkuraġġikx dan biex tgħin lil aħwa oħrajn li għaddejjin minn xi diffikultà? Intom iż-​żgħażagħ ukoll tistgħu tkunu t’għajnuna għal dawk fil-​kongregazzjonijiet tagħkom li qed jissieltu maʼ xi xewka f’ġisimhom.—Proverbji 20:29.

18. Liema inkuraġġiment nistgħu nsibu fir-​rakkonti pubblikati fir-​rivisti Stenbaħ! u It-​Torri taʼ l-​Għassa?

¹⁸ Fir-​rivisti Stenbaħ! u It-​Torri taʼ l-​Għassa ġew pubblikati ħafna rakkonti u esperjenzi taʼ Xhieda li kampaw, u għadhom qegħdin ikampaw, mal-​problemi tal-​ħajja. Hekk kif taqra regolarment artikli bħal dawn, se tara li ħafna minn ħutek spiritwali madwar id-​dinja ssaportew diffikultajiet ekonomiċi, il-​mewt tal-​maħbubin tagħhom f’diżastri, u sitwazzjonijiet perikolużi fi żmien taʼ gwerra. Oħrajn jgħixu b’mard li ħalliehom bla saħħa. Ħafna minnhom lanqas biss jistgħu jagħmlu xi wħud mill-​iktar affarijiet sempliċi fil-​ħajja, li għal oħrajn f’saħħithom m’huma xejn. Il-​mard huwa verament prova diffiċli għalihom, speċjalment meta ma jkunux jistgħu jieħdu sehem f’attivitajiet Kristjani daqs kemm ikunu jixtiequ. Kemm japprezzaw profondament l-​għajnuna u l-​appoġġ li jagħtuhom ħuthom, irġiel u nisa, żgħar u kbar!

Is-​Sabar Iġibilna l-​Ferħ

19. Pawlu għala setaʼ jifraħ minkejja l-​provi u d-​dgħjufijiet tiegħu li kienu bħal xewk f’ġismu?

¹⁹ Pawlu feraħ bil-​mod taʼ kif Alla saħħu. Hu qal: “Niftaħar minn qalbi l-​aktar bid-​debbulizzi tiegħi biex il-​qawwa taʼ Kristu tgħammar fija. Mela bil-​qalb kollha nitgħaxxaq bid-​debbulizzi tiegħi, bit-​tagħjir, bl-​għaks, bil-​persekuzzjonijiet, bid-​dwejjaq minħabba Kristu: għax meta nkun dgħajjef, nkun qawwi.” (2 Korintin 12:​9, 10) Minħabba l-​esperjenzi persunali tiegħu, Pawlu setaʼ b’mod kunfidenti jgħid: “Qiegħed ngħid dan mhux għax neħtieġ xi ħaġa; jien issa tgħallimt ngħaddi b’dak li jkolli; naf ngħix fl-​għaks, u naf ngħix fil-​ġid; kollox drajt u noqgħod għal kollox; ix-​xabaʼ u l-​ġuħ; il-​ġid u l-​għaks. Għal kollox niflaħ bis-​saħħa taʼ dak li jqawwini.”—Filippin 4:​11-13.

20, 21. (a) Għala jistaʼ jkollna l-​ferħ meta nimmeditaw fuq l-​affarijiet “li ma jidhrux”? (b) X’inhuma xi ftit mill-​affarijiet “li ma jidhrux” u li tittama li tara fil-​Ġenna taʼ l-​art?

²⁰ Mela, billi nissaportu kwalunkwe xewka li jistaʼ jkollna f’ġisimna, nistgħu niksbu ferħ kbir għax kulħadd ikun jistaʼ jara l-​qawwa taʼ Jehovah fl-​aqwa tagħha fid-​dgħjufijiet tagħna. Pawlu kiteb: “Ma naqtgħux qalbna . . . Il-​bniedem taʼ ġewwa jiġġedded minn jum għal jum. Id-​daqsxejn taʼ tbatija tagħna taʼ issa tħejjilna kobor taʼ glorja bla qjies għal dejjem; lilna li ma nħarsux lejn il-​ħwejjeġ li jidhru, iżda lejn dawk li ma jidhrux. Dawk . . . li ma jidhrux huma għal dejjem.”—2 Korintin 4:​16-18.

²¹ Il-​biċċa l-​kbira min-​nies taʼ Jehovah illum jittamaw li jgħixu fil-​Ġenna taʼ l-​art tiegħu u jgawdu l-​barkiet li wiegħed. Għalina llum, dawn il-​barkiet jistgħu jitqiesu bħala affarijiet “li ma jidhrux.” Madankollu, iż-​żmien qed joqrob bil-​ħeffa meta se naraw dawk il-​barkiet b’għajnejna stess, iva, u ngawduhom għal dejjem. Waħda minn dawn il-​barkiet se tkun li qatt ma se jkollna nerġgħu ngħixu b’xi problema li tkun bħal xewka f’ġisimna! L-​Iben t’Alla se “jħott kull ma għamel ix-​Xitan” u se jġib fix-​xejn lil ‘dak li għandu l-​mewt f’idejh.’—1 Ġwann 3:8; Lhud 2:14.

22. Liema fiduċja u determinazzjoni għandu jkollna?

²² Għalhekk, hi x’inhi x-​xewka f’ġisimna li qed tweġġagħna llum, ejja nkomplu nissaportuha. Bħal Pawlu, se jkollna s-​saħħa li nagħmlu dan permezz taʼ Jehovah, li b’mod ġeneruż jagħtina l-​qawwa. Meta nkunu qed ngħixu fil-​Ġenna taʼ l-​art, se nbierku lil Alla tagħna, Jehovah, kull jum għall-​għemejjel meraviljużi kollha li jagħmel għalina.—Salm 103:2.

[Nota taʼ taħt]

Int Kif Twieġeb?

• Ix-Xitan kif u għala jipprova jkisser l-​integrità tal-​Kristjani veri?

• Il-qawwa taʼ Jehovah kif “tidher fl-​aqwa tagħha fejn hemm id-​dgħajjef”?

• L-anzjani u oħrajn kif jistgħu jinkuraġġixxu lil dawk li għandhom xi problemi li qed inikktuhom?

[Stampa f’paġna 18]

Pawlu talab lil Alla tliet darbiet biex ineħħilu x-​xewka f’ġismu