Anzjani Trattaw Lill-​Merħla t’Alla B’Tenerezza!

“Sirna ġentili f’nofskom, bħal meta omm li trabbi tgħożż lil uliedha stess.”-1 TESSAL0NKIN 2:7.

1. Għala jistaʼ kull Xhud lejali taʼ Jehovah iħossu fis-​sigurtà?

JEHOVAH hu r-​Ragħaj il-​Kbir. Hu jipprovdi bl-​abbundanza għall-​qaddejja tiegħu bħal ngħaġ u jiggwidahom “fil-​mogħdijiet tat-​tjieba” minħabba l-​isem qaddis tiegħu. Għalhekk, dawk li jagħmlu r-​rieda tiegħu m’għandhom għalfejn jibżgħu minn xejn u jistgħu jħarsu lejn Alla tagħhom taʼ mogħdrija għall-​faraġ. Tabilħaqq, kull Xhud lejali taʼ Jehovah għandu raġuni soda biex iħossu fis-​sigurtà fil-​ħarsien taʼ mħabba t’Alla.—Salm 23:l-4.

2. Bħala r-​riflessjoni tal-​glorja t’Alla, xi kwalitajiet juri Ġesù?

² Ġesù Kristu “hu r-​riflessjoni tal-​glorja [t’Alla] u r-​rappreżentazzjoni eżatta tal-​eżistenza tiegħu nnifsu.” (Ebrej 1:l-4) Għalhekk Ġesù, ir-​Ragħaj mill-​Aħjar, ukoll juri mħabba u mogħdrija. (Ġwann lO:14,15) Per eżempju, darba minnhom “hu ra folla kbira, iżda hu ġie mqanqal mill-​ħniena għalihom, għaliex huma kienu bħal ngħaġ mingħajr ragħaj. U beda jgħallimhom ħafna affarijiet.”—Mark 6:34.

3. (a) Bħal Alla Jehovah u Ġesù Kristu, sotto-ragħajja Kristjani għandhom juru liema kwalitajiet? (b) Liema parir u twissija ta l-​appostlu Pawlu lill-​indokraturi?

³ Il-​Kristjani kollha għandhom ‘jimitaw lil Alla u jibqgħu mexjin fl-​imħabba sewwa sew bħalma Kristu ħabb lilhom.’ (Efesin 5:1,2) Għalhekk huma għandhom juru mħabba u mogħdrija. B’mod speċjali għandu dan ikun veru dwar is-​sotto-ragħajja tal-​merħla t’Alla. L-​appostlu Pawlu qal: “Oqogħdu attenti għalikom infuskom u għall-​merħla kollha, li fostha l-​ispirtu qaddis ħatarkom indokraturi, biex tirgħu l-​kongregazzjoni t’Alla, li hu xtara bid-​demm taʼ Ibnu stess. Jien naf li wara t-​tluq tiegħi lpup li jaħqru se jidħlu fostkom u mhux se jitrattaw lill-​merħla b’tenerezza, u minn fostkom stess se jqumu rġiel u jitkellmu affarijiet imgħawġa biex jiġbdu lid-​dixxipli warajhom.”−Atti 20:28-30.

4. (a) Maż-​żmien, x’ġara fi qbil mat-​twissija taʼ Pawlu f’Atti 20:29, 30? (b) Liema mistoqsijiet issa jixirqilhom jiġu kkunsidrati?

⁴ Maż-​żmien, dehru “lpup li jaħqru” apostati u ‘ma trattawx lill-​merħla b’tenerezza.’ Iżda kemm aħna ferħanin li anzjani fost ix-​Xhieda taʼ Jehovah ma jipprattikawx tiranija bħal din! Madankollu, liema xorta taʼ trattament jistgħu jistennew li jirċievu sħabhom li jemmnu mingħand dawn l-​indokraturi maħturin bl-​ispirtu? U dawn l-​uħud maħturin kif jistgħu juru nteress teneru għan-​ngħaġ taʼ Jehovah?

Ma Jagħmluhiex taʼ Sidien Fuqhom

5. (a)Mexxejja dinjin taʼ spiss kif jitrattaw liċ-​ċittadini tagħhom? (b) Ġesù kif wera li t-​tiranija m’għandha l-​ebda post fost is-​segwaċi tiegħu?

⁵ Aħna nistgħu b’mod xieraq nistennew li anzjani Kristjani jistmawna b’mod taʼ mogħdrija. Huma m’humiex bħal ħakkiema dinjin, li taʼ spiss jagħmluha taʼ sidien fuq iċ-​ċittadini tagħhom. Per eżempju, huwa rrapportat li s-​sultan tal-​Franki Karlumanju (li ħakem fis-​768-814 E.K.) “ġagħal lis-​Sassoni, taħt piena tal-​mewt, li jirċievu l-​magħmudija, ikkundanna għall-​iktar kastigi ħorox lil dawk li jiksru r-​Randan, u kullimkien poġġa l-​forza minflok il-​persważjoni.” (The History of the Christian Church, minn William Jones) It-​tiranija m’għandha l-​ebda post fost is-​segwaċi taʼ Ġesù, għax hu qal: “Intom tafu li l-​ħakkiema tal-​pagani jagħmluha taʼ sidien fuqhom, u l-​irġiel kbar tagħhom huma tiranni fuqhom. Ma għandux ikun hekk fostkom, iżda kulmin irid ikun kbir fostkom irid ikun il-​qaddej tagħkom, u kulmin irid iżomm l-​ewwel post fostkom irid ikun l-​irsir tagħkom, sewwa sew bħalma Bin il-​Bniedem ġie mhux biex jissefter, iżda biex isefter għal nies oħra, u biex jagħti ħajtu bħala rahan għal ħafna oħrajn.”−Mattew 20:25-28, An American Translation.

6. (a) Rigward l-​anzjani, liema fatturi bażiċi jispikkaw? (b) Il-​kongregazzjoni għandha raġuni li tistenna liema ħaġa mill-​anzjani, u dawn l-​irġiel kif għandhom iqisu lilhom infushom?

⁶ Raġel Kristjan li qed ‘jirsisti għall-​kariga taʼ ndokratur qed jixtieq xogħol mill-​aħjar.’ (1 Timotew 3:1) Meta nikkunsidraw dan u l-​parir taʼ Ġesù li għadu kif ġie ċċitat, dawn il-​fatturi bażiċi jispikkaw: (1) Anzjani Kristjani m’għandhomx jagħmluha taʼ tiranni fuq oħrajn; (2) dawk li jerfgħu r-​responsabbilità fost is-​segwaċi taʼ Ġesù jridu jkunu l-​irsiera tagħhom, mhux is-​sidien tagħhom; u (3) rġiel li qed jirsistu għall-​kariga taʼ ndokraturi għandhom iħarsu lejha bħala “xogħol mill-​aħjar,” mhux bħala pożizzjoni eżaltata. (Proverbji 25:27. 1 Korintin 1:31) It-​termini “anzjan” ma tgħollix lil xi raġel fuq adoraturi oħrajn taʼ Jehovah. Minflok, il-​kongregazzjoni għandha raġuni li tistenna li l-​anzjani kollha jkunu rġiel maturi spiritwalment, taʼ esperjenza u umlin li jkunu minn taʼ quddiem fis-​servizz sagru. Tabilħaqq, l-​anzjani għandhom iqisu ruħhom bħala rsiera umlin taʼ Alla Jehovah, taʼ Ġesù Kristu, u taʼ Kristjani sħabhom.—Rumani 12:11; Galatin 5:13; Kolossin 3:24.

7. (a) L-​anzjani kif għandhom japplikaw it-​2 Korintin 1:24 meta jitrattaw maʼ oħrajn? (b) X’għandhom jagħmlu l-​anzjani dwar l-​istruzzjonijiet li jiġu mill-​Ġemgħa li Tiggverna?

⁷ Li jitjassar bl-​umiltà għan-​nom taʼ oħrajn naturalment iżomm anzjan milli jipprova li ‘jagħmilha taʼ sid fuqhom.’ U kemm hu tajjeb li l-​indokraturi tagħna juru attitudni simili bħal dik taʼ Pawlu! Hu qal lill-​Kristjani f’Korintu:‘Aħna m’aħniex is-​sidien fuq il-​fidi tagħkom, iżda aħna ħaddiema bi sħab għall-​ferħ tagħkom.’ (2 Korintin 1:24) Bi qbil maʼ dan, dawk li jeżerċitaw indokrar taʼ mħabba ma jgħabbux lil sħabhom fit-​twemmin b’regolamenti umani bla bżonn. Minflok, indokraturi fost ix-​Xhieda taʼJehovah huma ggvernati minn prinċipji Skritturali u jagħtu servizz ħanin u taʼ għajnuna. Huma juru wkoll rispett profond għall-​merħla t’Alla billi malajr japplikaw struzzjonijiet mibgħutin mill-​Ġemgħa li Tiggverna tax-​Xhieda taʼ Jehovah.—Atti, kapitlu 15.

8. Liema attitudni kellu Pawlu lejn sħabu fit-​twemmin, u dan kif għandu jeffettwa lill-​anzjani tas-​seklu 20?

⁸ Għaliex Pawlu kellu rispett teneru għall-​merħla t’Alla, hu setaʼ jgħid lill-​Kristjani f’Tessalonika: “Sirna ġentili f’nofskom, bħal meta omm li trabbi tgħożż lil uliedha stess. Mela, billi għandna affezzjoni tenera għalikom, ħadna pjaċir sewwa li nwasslulkom, mhux biss l-​aħbar tajba t’Alla, iżda wkoll lil erwieħna stess, għaliex sirtu maħbubin għalina.” (1 Tessalonkin 2:​7, 8) Pawlu aġixxa bħalma tagħmel omm li trabbi, li tħobb lil uliedha b’mod tant profond li hi tpoġġi l-​interessi tagħhom qabel tagħha u għandha stima tenera għalihom. Kemm għandu jqanqal dan lill-​anzjani tas-​seklu 20 biex jistmaw il-​merħla t’Alla b’tenerezza!

Sorsi taʼ Għajnuna u Serħan

9. Liema ċirkustanzi tal-​poplu taʼ Jehovah taż-​żmien modern kienu mbassra f’Isaija 32:1, 2?

⁹ Waqt li pponta għal dan iż-​żmien taʼ ħakma tas-​Saltna permezz taʼ Ġesù Kristu, il-​profeta Isaija ħabbar li sultan kien “se jsaltan għat-​tjieba nfisha” u “prinċpijiet” kienu se jaħkmu “għall-​ġustizzja nfisha.” Għaldaqstant, l-​anzjani fl-​organizzazzjoni teokratika taż-​żmien preżenti qed jitrattaw l-​interessi tas-​Saltna stabbilita tas-​sema —servizz taʼ prinċep tabilħaqq! Għal dawn l-​irġiel responsabbli japplika l-​kliem profetiku l-​ieħor taʼ Isaija: “Kull wieħed irid juri li hu bħal moħba mir-​riħ u post taʼ kenn mill-​maltempata tax-​xita, bħal nixxigħat taʼ ilma f’pajjiż mingħajr ilma, bħad-​dell taʼ blata tqila f’art niexfa.”—Isaija 32:1,2.

10. Kull anzjan fost ix-​Xhieda taʼJehovah għandu jkun sors taʼ xiex?

¹⁰ Kuntrarju għall-​mexxejja reliġjużi oppressivi tal-​Kristjaneżmu, anzjani fost ix-​Xhieda taʼ Jehovah huma sorsi taʼ għajnuna u serħan. Bħala ġemgħat taʼ rġiel ixjeħ, huma javvanzaw il-​paċi, trankwilità, u sigurtà fost il-​poplu taʼ Jehovah. Individwalment, kull anzjan jistaʼ jikkontribwixxi għal din il-​kundizzjoni mill-​aħjar billi jitratta l-​merħla t’Alla b’tenerezza.

Bil-​Ġustizzja u t-​Tjieba

11. (a) Xi stat ġenerali li eżista fost il-​Kristjani tal-​ewwel seklu huwa prevalenti fil-​biċċa l-​kbira tal-​kongregazzjonijiet tax-​Xhieda taʼ Jehovah illum? (b) L-​indokraturi għandhom liema responsabbiltà lejn il-​kongregazzjoni, u għala?

¹¹ Għalkemm qamu xi problemi f’xi kongregazzjonijiet Kristjani tal-​ewwel seklu, l-​istat ġenerali tagħhom kien dak taʼ paċi, unità, u ferħ. (1 Korintin 1:10-12; 3:5-9; Efesin 1:2; Ġakbu 2:l-9; 3:2-12; 4:11,12; 1 Ġwann 1:3,4) Kundizzjoni spiritwali mill-​aħjar teżisti wkoll fil-​biċċa l-​kbira tal-​kongregazzjonijiet tax-​Xhieda taʼ Jehovah illum minħabba l-​barka t’Alla, it-​tmexxija taʼ Kristu, u x-​xogħol lejali taʼ ndokraturi maħtura. Biex jiżguraw il-​paċi, l-​unità, u l-​ferħ fil-​kongregazzjoni, dawn l-​irġiel ifittxu l-​għajnuna divina u jistinkaw b’mod ħabrieki biex iżommu l-​organizzazzjoni t’Alla nadifa, moralment u spiritwalment. (Isaija 52:11) Organizzazzjoni maħmuġa qatt ma tistaʼ tkun fil-​paċi u ferħana, u ċertament li mhux se jkollha l-​approvazzjoni u l-​barka t’Alla. Hu “pur wisq fil-​għajnejn biex jara dak li hu ħażin,” biex jittollera għemil ħażin. (Ħabbakkuk 1:13) Fost affarijiet oħra, mela, l-​anzjani huma mistennija li jieħdu ħsieb taʼ kwistjonijiet ġudizzjarji b’manjiera retta u skritturali. Iżda liema huma xi fatturi biex tiftakar meta titratta każi bħal dawn?

12. Għalkemm l-​anzjani m’humiex mistennija li jindaħlu fl-​affarijiet persunali li ma jiksrux liġijiet jew prinċipji tal-​Bibbja, x’għandu jsir bi qbil maʼ Galatin 6:1?

¹² L-​ewwelnett, f’każi li jinvolvu differenzi persunali, jistaʼ jkun possibbli għal individwi li jsolvu l-​kwistjoni privatament. (Mattew 18:​15-17) Ladarba l-​anzjani m’humiex ‘imgħallmin fuq il-​fidi tagħna,’ m’humiex mistennija li jindaħlu f’affarijiet purament persunali li ma jinvolvux xi ksur serju tal-​liġijiet u l-​prinċipji tal-​Bibbja. Naturalment, jekk hemm evidenza li xi ħadd ikun ħa “xi pass ħażin qabel ma jinduna bih,” dawk bi kwalifiki spiritwali għandhom ‘jippruvaw jirranġaw lil raġel bħal dan fi spirtu taʼ ħlewwa.’—Galatin 6:1.

13. L-​Iskrittura kif turi li l-​anzjani għandhom jaġixxu biss fuq evidenza taʼ għemil ħażin, mhux fuq x’igħidu n-​nies?

¹³ Anzjani għandhom jaqdu “għall-​ġustizzja nfisha,” billi qatt ma juru parzjalità. Għalhekk huma għandhom jaġixxu fuq evidenza taʼ għemil ħażin, mhux sempliċement fuq x’igħidu n-​nies. Pawlu wissa: “Tammettix xi akkuża kontra raġel ixjeħ, ħlief biss fuq l-​evidenza taʼ tnejn jew tliet xhieda.” (1 Timotew 5:19) Skond il-​livell taʼ Jehovah, f’Iżrael tal-​qedem persuna akkużata bi dnub kapitali kienet tingħata l-​mewt ‘fil-​fomm taʼ tnejn jew tliet xhieda, mhux wieħed.’ Iktar minn hekk, l-​akkużat milli jidher kellu l-​opportunità li jiffaċċja lill-​akkużati tiegħu, u jekk l-​evidenza kienet adekwata,‘l-​id tax-​xhieda l-​ewwelnett kellha tiġi fuqu biex toqtlu.’—Dewteronomju 17:6, 7.

14. (a) Diotrefes b’mod ħażin x’ipprova jagħmel? (b) X’jistenna Alla mill-​anzjani meta jkunu qed jitrattaw kwistjonijiet ġudizzjarji?

¹⁴ Irid ikun hemm bażi skritturali soda għal azzjoni ġudizzjarja. Kemm aħna ferħanin li l-​indokraturi tal-​kongregazzjoni m’humiex bħall-​kburi Diotrefes tal-​ewwel seklu E.K.! Hu b’mod ħażin kien jipprova “jkeċċi ’l barra mill-​kongregazzjoni” lil dawk li kienu jixtiequ jilqgħu lill-​aħwa li jivvjaġġaw bl-​ospitalità. L-​appostlu Ġwanni ma ħarisx lejn din il-​ħaġa u lejn nuqqasijiet oħra bħala ħaġa m’hi xejn iżda wissa: “Jekk niġi, jien se nfakkar ix-​xogħlijiet tiegħu.” (3 Ġwann 9,10) B’hekk, kumitat ġudizzjarju tal-​lum irid ikun ċert li hemm bażi biblika għal kwalunkwe azzjoni taʼ qtugħ mis-​sħubija li huma jieħdu.a Naturalment, Alla jistenna li anzjani Kristjani jkunu ġusti meta jitrattaw maʼ oħrajn. Tabilħaqq, dawk li jamministraw l-​affarijiet tal-​organizzazzjoni taʼ Jehovah fuq l-​art iridu jkunu “rġiel kapaċi, li jibżgħu minn Alla, irġiel taʼ min jafdahom.”−Eżodu 18:21.

15. X’parti għandu jkollu t-​talb f’laqgħat ġudizzjarji?

¹⁵ Kull kumitat ġudizzjarju Kristjan għandu jfittex il-​għajnuna taʼJehovah b’talb mill-​qalb. Laqgħa maʼ xi ħu jew oħt akkużati b’xi għemil ħażin serju għandha tibda b’talba. Fil-​fatt, ikun xieraq li titlob fi kwalunkwe ħin matul id-​diskuzzjoni fejn jinqalaʼ bżonn partikulari għall-​għajnuna t’Alla.—Ġakbu 5:13-18.

16. B’liema manjiera għandhom l-​anzjani jikkonduċu laqgħat ġudizzjarji, u għala?

¹⁶ L-​anzjani jafu li wieħed minn sħabhom fit-​twemmin li hu akkużat b’għemil ħażin huwa “nagħġa” fil-​merħla t’Alla u għandu jiġi trattat b’tenerezza. (Qabbel Eżekjel 34:7-14.) Ngħaġ litterali jinħtieġu attenzjoni tenera, għaliex huma ħlejjaq timidi li jiddependu mir-​ragħaj tagħom għall-​protezzjoni. Għalhekk, xi ngħidu dwar ngħaġ figurattivi fil-​kongregazzjoni lokali? Huma bla dubju jħossuhom fiż-​żgur fil-​ħarsien tar-​Ragħaj il-​Kbir, Alla Jehovah, u r-​Ragħaj mill-​Aħjar, Ġesù Kristu. Iżda sotto-ragħajja tal-​merħla għandhom jaġixxu b’modi li jikkontribwixxu għall-​paċi ġewwinija u sens taʼ sigurtà tal-​qaddejja bħal ngħaġ taʼ Jehovah. Jekk int sotto-ragħaj Kristjan, mela, iħossuhom fis-​sigurtà u trankwilli fil-​ħarsien tiegħek ħutek irġiel u nisa? Veru, l-​anzjani jridu b’mod sod jappoġġaw il-​liġijiet u l-​prinċipji tal-​Bibbja. Iżda huma meħtieġa skritturalment li jitrattaw man-​ngħaġ b’mod taʼ mħabba u li jikkonduċu laqgħat ġudizzjarji b’manjiera kalma, taʼ ordni, ħanina, u taʼ mogħdrija.

17. Liema punti Skritturali għandhom iżommu f’moħħhom l-​anzjani, speċjalment matul laqgħat ġudizzjarji?

¹⁷ Billi aħna mperfetti, “aħna lkoll nieħdu gambetta ħafna drabi” f’dak li ngħidu. (Ġakbu 3:2) Kull wieħed minna jinħtieġ il-​ħniena t’Alla u s-​“sagrifiċċju taʼ tpattija’ taʼ Kristu.” (1 Ġwann 1:8–2:2; Salm 130:3) Għalhekk sotto-ragħaj Kristjan għandu jkollu ħarsa umli tiegħu nnifsu. Hu għandu wkoll jiftakar fil-​kliem taʼ Ġesù: “Sewwa sew kif tridu li n-​nies jagħmlu lilkom, agħmlu bl-​istess mod lilhom.” (Luqa 6:31) B’mod speċjali għandu dan il-​parir jiġi applikat matul laqgħat ġudizzjarji. Irġiel kwalifikati spiritwalment għandhom jippruvaw jiġbdu lura Kristjan fl-​iżball ‘bi spirtu taʼ ħlewwa, fil-​waqt li kull wieħed minnhom iżomm għajn fuqu nnifsu, minħabba l-​biżaʼ li hu wkoll jistaʼ jiġi ttantat.’—Galatin 6:1; 1 Korintin lO:12.

18. (a) X’jistaʼ jirriżulta jekk l-​anzjani jitrattaw oħrajn b’mod aħrax matul laqgħa ġudizzjarja? (b) Bi qbil maʼ Mark 9:42, kontra li jagħmlu liema ħaġa għandhom l-​anzjani u Kristjani oħra joqogħdu għassa?

¹⁸ Li kieku l-​anzjani kellhom jitrattaw lill-​oħrajn b’mod aħrax matul laqgħat ġudizzjarji, dan jistaʼ jkun taʼ ħsara għal individwi bħal dawn. Iżda anki jekk ma tirriżultax ħsara emozzjonali jew fiżika, jistaʼ jkun hemm dannu spiritwali gravi, u l-​kwalifiki tal-​indokraturi jistgħu wkoll jiġu mistħarrġa. (Qabbel Ġakbu 2:13.) Għaldaqstant, matul laqgħat ġudizzjarji u fi kwalunkwe ħin ieħor, l-​anzjani għandhom juru ħniena u jridu jgħassu kontra li jfixklu lil oħrajn. Naturalment, il-​Kristjani kollha jridu joqogħdu attenti f’dan ir-​rigward, għax Ġesù qal: “Kulmin jagħti gambetta lil wieħed minn dawn iċ-​ċkejknin li jemmnu, ikun aħjar għalih jekk ġebla tat-​tħin bħal dik li jdawwar il-​ħmar titpoġġa madwar għonqu u fil-​fatt jiġi mitfugħ fil-​baħar.” (Mark 9:42) Ġebla taʼ fuq tat-​tħin setgħet tkun tant kbira li s-​saħħa taʼ annimal kienet normalment meħtieġa biex iddawwarha, u l-​ebda bniedem li jintefaʼ fil-​baħar b’piż bħal dak madwar għonqu ma setaʼ jibqaʼ ħaj. Ċertament, mela, anzjan għandu joqgħod attent biex ma jikkaġunax tfixkil li jistaʼ jwassal għal ħsara spiritwali dejjiema għalih innifsu u għal xi ndividwu li jiġi mfixkel b’dan il-​mod.—Filippin 1:9-11.

Ibqgħu Uru Nteress Teneru

19. Liema parir ta Pietru lill-​anzjani sħabu, u li b’mod xieraq japplikawh kif għandu x’jaqsam mal-​prospetti tagħhom?

¹⁹ L-​appostlu Pietru wera kif indokraturi sħabu kellhom jirgħu l-​merħla meta kiteb: “Irgħu l-​merħla t’Alla li hemm fil-​ħarsien tagħkom, mhux bil-​fors, iżda bil-​qalb; lanqas għal imħabba taʼ qligħ diżonest, iżda ħerqana; lanqas billi tagħmluha taʼ sidien fuq dawk li huma l-​wirt t’Alla, iżda billi ssiru eżempji għall-​merħla. U meta r-​ragħaj ewlieni jkun sar manifest, intom se tirċievu l-​kuruna taʼ glorja li ma titbielx.” (1 Pietru 5:2-4) Huwa biss billi japplikaw dan il-​parir u billi juru nteress teneru għall-​merħla t’Alla li ndokraturi midlukin jistgħu jakkwistaw il-​premju tagħhom tas-​sema bħala ħlejjaq spirti immortali u li anzjani bit-​tamiet għal fuq l-​art jistgħu jirċievu ħajja taʼ dejjem fil-​Ġenna globali li ġejja.

20. (a) Sotto-ragħajja Kristjani kif għandhom jitrattaw maʼ sħabhom fit-​twemmin? (b) Kif tħossok dwar is-​servizz eżemplari u l-​ħarsien teneru taʼ anzjani taʼ mħabba?

²⁰ Kemm Alla Jehovah u kemm Ġesù Kristu huma Ragħajja taʼ mħabba u taʼ mogħdrija. Għalhekk fil-​waqt li sotto-ragħajja Kristjani jappoġġaw b’mod sod livelli divini, huma jridu juru mħabba u mogħdrija meta jitrattaw maʼ sħabhom li jemmnu bħal ngħaġ. Ċertament, ix-​Xhieda lejali kollha taʼ Jehovah japprezzaw b’mod profond is-​servizz eżemplari taʼ dawn l-​anzjani li jagħmlu ħafna sagrifiċċji f’li jgħassu l-​prokura tagħhom u f’li jitrattaw il-​merħla t’Alla b’tenerezza. Dak l-​apprezzament, flimkien maʼ rispett xieraq, jistaʼ jintwera billi nkunu ubbidjenti lejn dawk li jieħdu t-​tmexxija fostna.

[Nota taʼ taħt]

Kif Taħisibha?

◻ Ġesù Kristu kif wera li t-​tiranija m’għandha l-​ebda post fost is-​segwaċi tiegħu?

◻ X’għandhom jagħmlu l-​anzjani meta jaslu xi struzzjonijiet mill-​Ġemgħa li Tiggverna?

◻ Skond Isaija 32:1,2, l-​anzjani għandhom ikunu s-​sorsi taʼ liema ħaġa?

◻ L-​lskrittura kif turi li l-​anzjani m’għandhomx jaġixxu fuq sempliċiment li jgħidu n-​nies?

Sotto-ragħajja Kristjani kif għandhom jitrattaw il-​merħla?