“Ma Nistax Noqgħod Sieket”

1. Ġeremija u profeti oħrajn taʼ Ġeħova għala ma baqgħux siekta?

“ISIMGĦU kelmet Ġeħova.” Dan il-​kliem kien jidwi fit-​toroq u l-​pjazez taʼ Ġerusalemm mis-​sena 647 Q.E.K. ’l quddiem. U l-​profeta t’Alla ma waqafx. Anke meta l-​belt ġiet meqruda 40 sena wara, hu rripeta din it-​tħeġġiġa. (Ġer. 2:4; 42:15) Alla li Jistaʼ Kollox bagħat profeti biex ikun ċert li l-​Lhud setgħu jisimgħu l-​parir Tiegħu u jindmu. Bħalma ntwera iktar kmieni f’din il-​pubblikazzjoni, Ġeremija kien jispikka fost dawn il-​kelliema t’Alla. Meta Alla inkarigah, hu qal lil Ġeremija: “Itlaʼ u għidilhom kulma nikkmandak jien. Titwerwirx minħabba fihom.” (Ġer. 1:17) Ix-​xogħol kien jitlob ħafna minnu. Ġeremija sofra wġigħ fiżiku u emozzjonali, imma minkejja provi bħal dawn, hu tqanqal biex iwettaq l-​inkarigu tiegħu. Hu qal: “Qalbi mimlija ansjetà. Ma nistax noqgħod sieket.”—Ġer. 4:19.

2, 3. (a) Id-​dixxipli taʼ Ġesù kif imitaw lil Ġeremija? (b) Għala għandek issegwi l-​eżempju taʼ Ġeremija?

² Il-​mod kif Ġeremija wettaq l-​inkarigu profetiku tiegħu ta eżempju lil qaddejja futuri taʼ Ġeħova. (Ġak. 5:10) Ftit wara Pentekoste tas-​sena 33 E.K., l-​awtoritajiet Lhud arrestaw lill-​appostli Pietru u Ġwanni u ordnawlhom jieqfu jippritkaw. Inti qrajt it-​tweġiba tagħhom. “Aħna ma nistgħux nieqfu nitkellmu dwar dak li rajna u smajna.” (Atti 4:19, 20) Wara li heddewhom li ma jgħadduhiex lixxa darb’oħra, il-​ħakkiema ħelsu lil Pietru u Ġwanni. Int taf x’ġara. Dawn l-​irġiel leali ma kinux se jieqfu jippritkaw, u infatti ma waqfux.

³ Tistaʼ tara int kif il-​kliem taʼ Pietru u Ġwanni mniżżel f’Atti 4:20 juri l-​istess żelu bħal taʼ Ġeremija? Bħala ministru t’Alla Ġeħova f’dawn l-​aħħar jiem kritiċi, m’intix int daqshekk ieħor determinat li taħseb, ‘Ma nistax nibqaʼ sieket!ʼ Ejja naraw kif nistgħu nibqgħu b’saħħitna bħal Ġeremija ħalli nkomplu nippritkaw l-​aħbar tajba minkejja l-​kundizzjonijiet taʼ madwarna li qed jiggravaw.

KOMPLI MINKEJJA L-​APATIJA

4. Liema attitudni kienet komuni f’Ġerusalemm tal-​qedem?

⁴ Żgur taqbel li l-​wegħda t’Alla għal futur meraviljuż taħt il-​ħakma t’Ibnu hi l-​aħjar ħaġa li n-​nies jistgħu jisimgħu dwarha! Madanakollu, ħafna llum jesprimu ruħhom kif għamlu darba xi Lhud meta qalu lil Ġeremija: “Dwar il-​kelma li għedtilna f’isem Ġeħova, ma rridux nisimgħu minnek.” (Ġer. 29:19; 44:16) Ġeremija spiss semaʼ espressjonijiet bħal dawn. L-​istess jisimgħu l-​qaddejja taʼ Ġeħova llum, għax ħafna nies jgħidu, “M’aħniex interessati.” L-​apatija mifruxa maʼ kullimkien tistaʼ tnaqqas iż-​żelu tal-​pubblikaturi tas-​Saltna. Jekk dan hu minnu fit-​territorju tiegħek, fost xi wħud fil-​kongregazzjoni tiegħek, jew saħansitra fil-​każ tiegħek, x’tistaʼ tagħmel?

5. (a) Ġeremija kif irreaġixxa għall-​apatija tan-​nies? (b) Dawk li huma apatetiċi lejn l-​aħbar tajba għala jkunu qed jissograwha?

⁵ Ikkunsidra r-​raġunar li żviluppa Ġeremija meta kellu jħabbat wiċċu man-​nies taʼ Ġuda li fil-​biċċa l-​kbira kienu apatetiċi. Fil-​bidu tal-​karriera taʼ Ġeremija, Ġeħova tah ħarsa bil-​quddiem tal-​ġudizzju divin li kien ġej. (Aqra Ġeremija 4:23-​26.) Il-​profeta mbagħad setaʼ jara li l-​ħajjiet t’eluf taʼ nies kienu jiddependu milli jisimgħu l-​kliem li kien se jgħidilhom u jaġixxu fi qbil miegħu. Illum, in-​nies huma f’sitwazzjoni simili, inkluż dawk fit-​territorju tiegħek. Rigward “dak il-​jum” tal-​ġudizzju t’Alla kontra d-​dinja mill-​agħar tal-​lum, Ġesù qal: “Għax jiġi fuq dawk kollha li jgħixu fuq wiċċ l-​art kollha. Għalhekk, ibqgħu mqajmin u itolbu bil-​ħerqa l-​ħin kollu biex jirnexxilkom taħarbu minn dak kollu li għandu jseħħ u tieqfu quddiem Bin il-​bniedem.” (Lq. 21:34-​36) Tistaʼ tikkonkludi minn kliem Ġesù li dawk li jiċħdu l-​aħbar tajba tassew ikunu qed jissograwha.

6. Għala għandek tibqaʼ tipprietka, anke lil dawk li ma tantx juru interess fil-​messaġġ tiegħek?

⁶ Però, dawk li jegħlbu l-​indifferenza u li jisimgħu l-​Kelma taʼ Ġeħova li nippreżentaw u jwieġbu għaliha se jirċievu barkiet imprezzabbli. Alla qed jiftaħ it-​triq għalina biex niskansaw il-​qerda u nidħlu fid-​dinja l-​ġdida tiegħu. F’ċerti aspetti, kien simili fil-​ministeru taʼ Ġeremija. L-​abitanti taʼ Ġuda setgħu jaħarbu. (Aqra Ġeremija 26:2, 3.) Biex jgħinhom, Ġeremija qattaʼ għaxriet taʼ snin iħeġġeġ lin-​nies biex “jisimgħu u jduru lura,” biex jagħtu kas il-​kelma tal-​Alla l-​veru. Ma nafux kemm kien hemm nies li nidmu u biddlu ħajjithom minħabba l-​għoti taʼ xhieda tal-​profeta. Imma xi wħud hekk għamlu, u l-​istess għamlu ħafna fi żmienna. Hekk kif inkomplu nippritkaw l-​aħbar tajba, spiss nisimgħu dwar kif il-​qalb tan-​nies li ma kinux interessati rtabet. (Ara l-​kaxxa “L-​Apatija Tistaʼ Tinbidel f’Interess,” f’paġna 184.) Mhijiex din raġuni oħra għala għandna nibqgħu attivi fil-​ministeru tagħna tal-​aħbar tajba li jsalva l-​ħajjiet?

DAWK LI JOPPONU MA JISTGĦU JAGĦMLU L-​EBDA ĦSARA DEJJIEMA

7. L-​għedewwa kif ipprovaw jeqirdu x-​xogħol profetiku taʼ Ġeremija?

⁷ Aspett wieħed taʼ min jinnotah dwar il-​ministeru taʼ Ġeremija hu kemm l-​opponenti spiss ipprovaw jeqirdu lilu u xogħlu. Profeti foloz merewh fil-​pubbliku. (Ġer. 14:13-​16) Hekk kif Ġeremija mexa fit-​toroq taʼ Ġerusalemm, nies li kienu fil-​qrib għajruh u ddieħqu bih. (Ġer. 15:10) Xi wħud mill-​għedewwa tiegħu kkonfoffaw dwar kif jistgħu jwaqqgħulu ġieħu. (Ġer. 18:18) Oħrajn qagħdu jfesfsu u jxerrdu qlajjiet kemm jifilħu biex idawru lil uħud taʼ qalb onesta mill-​veritajiet divini li kien qed jipprietka Ġeremija. (Lam. 3:61, 62) Qataʼ qalbu Ġeremija? Għall-​kuntrarju, hu baqaʼ jipprietka. Kif għamel dan?

8. Hekk kif l-​opponenti żiedu fl-​isforzi tagħhom kontra Ġeremija, dan kif irreaġixxa?

⁸ L-​arma ewlenija taʼ Ġeremija biex jiġġieled kontra l-​oppożizzjoni kollha kienet il-​fiduċja f’Ġeħova. Fil-​bidu tal-​ministeru taʼ Ġeremija, Alla qallu li Hu kien se jsostnih u jipproteġih. (Aqra Ġeremija 1:18, 19.) Ġeremija fada f’dik il-​wegħda, u Ġeħova ma ddiżappuntahx. Hekk kif l-​opponenti għamlulu pressjoni u ħadu miżuri iktar drastiċi kontrih, hu kellu iżjed qlubija, kuraġġ, u sabar. Innota kif dawn il-​kwalitajiet swewlu taʼ ġid.

9, 10. Liema ġrajjiet f’ħajjet Ġeremija għandhom jinkuraġġuk tkun qalbieni?

⁹ Darba minnhom, qassisin u profeti ribellużi kaxkru lil Ġeremija sa quddiem il-​prinċpijiet taʼ Ġuda biex jingħata l-​mewt. Beżżaʼ lil Ġeremija t-​theddid tagħhom tant li waqqfu minn xogħlu? Le. It-​tweġiba tiegħu tat prova li l-​akkużi taʼ dawn l-​apostati ma kinux veri, u għalhekk ħajtu ġiet skansata.—Aqra Ġeremija 26:11-​16; Lq. 21:12-​15.

¹⁰ Ftakar li wara li Pasħur, uffiċjal tat-​tempju, semaʼ l-​messaġġ qawwi taʼ Ġeremija, hu tefgħu fil-​qjud. Pasħur żgur li ħaseb li dan kien se jgħallmu lezzjoni lil Ġeremija u li issa kien se jibqaʼ sieket. Għalhekk, l-​għada Pasħur ħelsu. Imma Ġeremija, bla dubju muġugħ minħabba t-​tbatija li għadda minnha, kellem direttament lil Pasħur u ddikjara l-​ġudizzju taʼ Ġeħova kontrih. Le, lanqas it-​tortura ma sikktet lil Ġeremija! (Ġer. 20:1-​6) Għala le? Ġeremija nnifsu jgħidilna: “Ġeħova kien miegħi bħal wieħed setgħan u tal-​biżaʼ. Huwa għalhekk li dawk stess li qed jippersegwitawni se jitfixklu u ma jagħmlu xejn kontrija.” (Ġer. 20:11) Anke meta ġie wiċċ imb wiċċ m’opponenti ħorox, Ġeremija ma twerwirx. Il-​fiduċja tiegħu f’Ġeħova kienet imsejsa fis-​sod, u l-​fiduċja tiegħek tistaʼ tkun hekk ukoll.

11, 12. (a) Ġeremija kif wera sens komun meta Ħananija opponieh? (b) X’benefiċċju tistaʼ tikseb jekk ‘iżżomm ruħek imrażżan quddiem il-​ħażen’?

¹¹ Tajjeb li żżomm f’moħħok li Ġeremija ma kienx xi fanatiku. Hu uża s-​sens komun meta ffaċċja l-​opponenti u kien jaf meta kien ikun aħjar li jitlaq. Pereżempju, ikkunsidra l-​esperjenza tiegħu maʼ Ħananija. Wara li dan il-​profeta falz miera l-​kelma profetika taʼ Ġeħova fil-​pubbliku, Ġeremija kkoreġieh u spjega kif wieħed jistaʼ jagħraf profeta veru. Ġeremija kien qed iġorr madmad tal-​injam biex jagħti stampa tal-​fatt li kellhom jidħlu taħt il-​madmad taʼ Babilonja; Ħananija sar vjolenti u kisser il-​madmad. Min jaf x’setaʼ jasal biex jagħmel iktar Ħananija? Allura, x’kien se jagħmel Ġeremija? Naqraw: “Il-​profeta Ġeremija telaq għal triqtu.” Iva, Ġeremija ma baqax hemmhekk. Wara, bid-​direzzjoni taʼ Ġeħova, hu rritorna u qal lil Ħananija li Ġeħova kien se jibgħat lil-​Lhud fil-​jasar taħt is-​sultan taʼ Babilonja u li l-​mewt kienet lesta għal Ħananija.—Ġer. 28:1-​17.

¹² Jidher ċar minn dan ir-​rakkont imnebbaħ li meta nippritkaw nagħmlu tajjeb jekk flimkien mal-​qlubija nuru raġunar f’loku. Jekk f’dar minnhom xi ħadd jirrifjuta li jaċċetta r-​raġunar Skritturali u jibda jirrabja, anke jheddidna bil-​vjolenza, aħna bil-​ħlewwa kollha nistgħu niskużaw ruħna u ngħaddu għall-​bieb li jmiss. M’għandniex għalfejn noqogħdu nitbaqbqu man-​nies dwar l-​aħbar tajba tas-​Saltna. Billi ‘nżommu ruħna mrażżnin quddiem il-​ħażen,’ inħallu t-​triq miftuħa biex ngħinu lill-​inkwilin fi żmien iktar favorevoli.—Aqra t-​2 Timotju 2:23-​25; Prov. 17:14.

“TIBŻAX”

13. Ġeħova għala qal lil Ġeremija: “Tibżax,” u għala għandna nikkunsidraw dan?

¹³ L-​aduraturi veri kienu effettwati mill-​kundizzjonijiet terribbli li kienu tant mifruxin qabel il-​qerda taʼ Ġerusalemm fis-​sena 607 Q.E.K. B’hekk, tistaʼ tifhem għala Alla qal lil Ġeremija: “Tibżax.” (Ġer. 1:8; Lam. 3:57) U Ġeħova qabbdu jgħid lil oħrajn mill-​poplu tiegħu l-​istess kliem li jqawwi l-​qalb. (Aqra Ġeremija 46:27.) X’nistgħu nitgħallmu minn dan? F’dan iż-​żmien perikoluż tat-​tmiem, jistaʼ jagħti l-​każ li kultant inħossuna beżgħanin. Meta jiġrilna hekk, se nisimgħu aħna minn Ġeħova, li f’ċertu sens qed jgħidilna: ‘Tibżgħux’? Iktar kmieni f’din il-​pubblikazzjoni, aħna kkunsidrajna kif Alla sostna lil Ġeremija matul dan iż-​żmien tassew tal-​biżaʼ. Ejja nirrivedu fuq fuq dak li ġara, sabiex naraw x’lezzjoni hemm għalina.

14, 15. (a) F’liema sitwazzjoni perikoluża sab ruħu Ġeremija? (b) Ġeħova kif wettaq il-​wegħda tiegħu biex jipproteġi lil Ġeremija?

¹⁴ Hekk kif il-​Babiloniżi ħarrxu l-​azzjonijiet tagħhom kontra Ġerusalemm, il-​ġuħ fena lill-​poplu. Ma damx ma kien hemm ħafna nies mingħajr ikel. (Ġer. 37:21) Mhux talli hekk, imma talli Ġeremija kien maqful f’post li setaʼ sar il-​qabar tiegħu. Il-​prinċpijiet taʼ Ġuda kienu sforzaw lis-​Sultan Sedekija, li kien idurlu maʼ kull riħ, biex jaqbel magħhom u joqtol lil Ġeremija. Imbagħad raw li Ġeremija jiġi mitfugħ f’ġiebja fonda. Ma kienx hemm ilma fiha imma kienet mimlija ħama. Hekk kif Ġeremija beda jegħreq fit-​tajn, hu ma setax jara mod kif jistaʼ jeħles lilu nnifsu. Li kieku inti kont f’dik is-​sitwazzjoni, ma kontx tħossok xi ftit beżgħan?—Ġer. 38:4-​6.

¹⁵ Għalkemm kien bniedem bħalna, Ġeremija fada fil-​kelma taʼ Ġeħova li Hu qatt ma jabbandunah. (Aqra Ġeremija 15:20, 21.) Ippremjaha Ġeħova din il-​fiduċja? Aħna nafu fiċ-​ċert li ppremjaha. Alla qanqal lil Għebed-​melek biex jisfida lill-​prinċpijiet u jsalva lil Ġeremija. Bil-​permess tas-​sultan, Għebed-​melek tellaʼ lill-​profeta mill-​ġiebja, u b’hekk salvah minn mewta fit-​tajn fond.—Ġer. 38:7-​13.

16. Ġeħova minn liema perikli ħeles lil-​leali tiegħu?

¹⁶ Anke meta Ġeremija kien lura fuq art solida, ma kienx meħlus mill-​periklu. Għebed-​melek kien talab lis-​sultan għan-​nom taʼ Ġeremija u kien qallu: “Fejn qiegħed se jmut bil-​ġuħ. Għax ma baqax iżjed ħobż fil-​belt.” (Ġer. 38:9) L-​ikel tant kien skars f’Ġerusalemm li n-​nies kienu waslu biex jieklu lil bnedmin oħra. Madanakollu, Ġeħova reġaʼ interviena biex isalva lill-​profeta tiegħu. U Ġeremija ta lil Għebed-​melek garanzija taʼ protezzjoni minn Ġeħova. (Ġer. 39:16-​18) Ġeremija ma kienx nesa l-​assiguranza t’Alla: “Jien miegħek biex neħilsek.” (Ġer. 1:8) Ladarba kien hemm l-​Alla li Jistaʼ Kollox jgħasses lil dawn iż-​żewġt irġiel leali, la l-​għedewwa umani u lanqas il-​ġuħ ma setaʼ joqtolhom. Huma skansaw il-​mewt f’dik il-​belt kundannata. X’nitgħallmu minn dan? Ġeħova wiegħed il-​protezzjoni u żamm kelmtu.—Ġer. 40:1-​4.

17. Għala għandek tafda fil-​wegħda taʼ Ġeħova li jipproteġi lill-​qaddejja tiegħu?

¹⁷ It-​twettiq tal-​profezija taʼ Ġesù dwar il-​konklużjoni tas-​sistema riesaq lejn it-​tmiem, bla ma ħadd jistaʼ jwaqqfu. Fil-​futur qarib, se jseħħu “sinjali fix-​xemx u l-​qamar u l-​kwiekeb, u fuq l-​art diqa tal-​ġnus, li ma jafux x’jaqbdu jagħmlu . . . waqt li n-​nies iħosshom ħażin bil-​biżaʼ u bl-​istennija taʼ dak li jkun ġej fuq l-​art abitata.” (Lq. 21:25, 26) Irridu nistennew biex naraw kif se jitwettqu dawn is-​sinjali u x’terrur se jipproduċu fost ħafna nies. Iżda, jiġri x’jiġri, int qatt m’għandek għalfejn tiddubita l-​abbiltà u x-​xewqa taʼ Ġeħova li jsalva lil niesu. Però, ir-​riżultat għal dawk li m’għandhomx l-​approvazzjoni tiegħu se jkun differenti għall-​aħħar. (Aqra Ġeremija 8:20; 14:9.) Anke jekk jidher li l-​qaddejja tiegħu jkunu f’kundizzjoni bla tama daqslikieku kienu mitfugħin f’ġiebja umduża u mdallma, hu jistaʼ jsalvahom! Il-​kliem t’Alla lil Għebed-​melek sa japplika għal niesu: “‘Għax jien żgur nipprovdilek mezz biex taħrab, u ma tmutx bis-​sejf; u ruħek tiħodha bħala priża, għax int fdajt fija,’ hija l-​kelma taʼ Ġeħova.”—Ġer. 39:18.

KLIEM MIKTUB GĦALIK

18. (a) Liema kliem biddel il-​ħajja taʼ Ġeremija? (b) X’tifsir għandu għalik il-​kmand t’Alla f’Ġeremija 1:7?

¹⁸ “Mur għand kulmin se nibagħtek; u tkellem kulma nikkmandak.” (Ġer. 1:7) Ħajjet Ġeremija nbidlet għalkollox meta semaʼ dan il-​kmand minn Alla. Minn dak il-​ħin ’il quddiem, it-​tħassib ewlieni tiegħu kien li jħabbar “il-​kelma taʼ Ġeħova.” Din il-​frażi tidher darba wara l-​oħra matul il-​ktieb taʼ Ġeremija. Fl-​aħħar kapitlu, Ġeremija jirrakkonta l-​waqgħa taʼ Ġerusalemm u l-​eżilju tal-​aħħar sultan tagħha, Sedekija. Iva, Ġeremija kompla jgħallem u jħeġġeġ lin-​nies taʼ Ġuda biex jobdu lil Ġeħova sakemm il-​ġrajjiet għamluha ċara li xogħlu kien tlesta.

19, 20. (a) Is-​servizz taʼ Ġeremija għala hu t’eżempju għalik? (b) X’rabta hemm bejn ix-​xogħol tal-​ippritkar u li wieħed isib l-​hena u l-​kuntentizza? (ċ) Il-​fatt li kkunsidrajt il-​kotba taʼ Ġeremija u l-​Lamentazzjonijiet kif effettwak?

¹⁹ Hemm ħafna xebh bejn l-​inkarigu taʼ Ġeremija u l-​ministeru pubbliku tax-​Xhieda taʼ Ġeħova llum. Bħalu, int taqdi lill-​Alla l-​veru matul żmien taʼ ġudizzju. Responsabbiltajiet oħrajn jirrikjedu ftit mill-​ħin u l-​enerġija tiegħek; imma l-​ippritkar tal-​aħbar tajba hu bil-​wisq l-​iktar xogħol sinifikanti li tistaʼ tagħmel f’din is-​sistema. Permezz tiegħu, int tfaħħar bil-​kbir l-​isem grandjuż t’Alla u taċċetta d-​dritt u l-​awtorità assoluta tiegħu bħala s-​Sovran Universali. (Aqra Lamentazzjonijiet 5:19.) Int ukoll turi mħabba li tispikka lejn il-​proxxmu billi tgħin lil oħrajn isiru jafu lill-​Alla l-​veru u dak li jirrikjedi minnhom fil-​ħajja.—Ġer. 25:3-​6.

²⁰ Rigward ix-​xogħol li Ġeħova tah jagħmel, Ġeremija qal: “Kelmtek saret għalija l-​ferħ u l-​hena taʼ qalbi; għax ismek issejjaħ fuqi, O Ġeħova, Alla taʼ l-​armati.” (Ġer. 15:16) Hena u kuntentizza bħal dawn huma offruti lil dawk kollha llum li qalbhom tqanqalhom jitkellmu f’isem l-​Alla l-​veru. B’hekk, għandek kull raġun tibqaʼ tipproklama l-​messaġġ taʼ Ġeħova, l-​istess kif għamel Ġeremija!