X’Sar Minnhom?
NOF u No huma ismijiet Bibliċi tal-bliet kapitali taʼ l-Eġittu, Memfi u Tebe, li xi darba kienu famużi. Nof (Memfi) kienet tinsab madwar 23 kilometri lejn in-nofsinhar tal-Kajr, fuq in-naħa tal-punent tax-Xmara Nil. Madankollu, maż-żmien Memfi ma baqgħetx il-belt kapitali taʼ l-Eġittu. Fil-bidu tas-seklu 15 Q.E.K., l-Eġittu kellha belt kapitali ġdida, No (Tebe), li tinsab madwar 500 kilometri lejn in-nofsinhar taʼ Memfi. Fost il-ħafna fdalijiet taʼ tempji f’Tebe hemm dak taʼ Karnak, li hu meqjus bħala l-akbar struttura li qatt inbniet bil-kolonni. Tebe u t-tempju taʼ Karnak kienu dedikati għall-qima t’Amon, l-alla ewlieni taʼ l-Eġizzjani.
Il-Bibbja xi pprofetizzat rigward Memfi u Tebe? Ġie dikjarat il-ġudizzju kontra l-Fargħun taʼ l-Eġittu u l-allat tagħha, speċjalment l-alla ewlieni, “Amon taʼ No.” (Ġeremija 46:25, 26) Il-folla taʼ segwaċi li kienu jinġabru hemm kien se jsir “ħaqq” minnhom. (Eżekjel 30:14, 15) U hekk ġara. Kulma fadal mill-qima t’Amon huwa l-fdalijiet tat-tempji. Il-belt moderna taʼ Luxor tinsab fuq parti mill-inħawi fejn qabel kien hemm il-belt antika taʼ Tebe, u hemm irħula żgħar oħra f’nofs il-fdalijiet tagħha.
Memfi ftit li xejn fadal minnha apparti ċ-ċimiterji tagħha. L-istudjuż tal-Bibbja Louis Golding jgħid: “Għal sekli sħaħ il-konkwistaturi Għarab taʼ l-Eġittu użaw il-fdalijiet enormi taʼ Memfi bħala barriera biex jibnu l-belt kapitali tagħhom [il-Kajr] fuq in-naħa l-oħra tax-xmara. Tant kemm għamlu xogħolhom sew il-ħaddiema Għarab u x-xmara Nil li għal ħafna kilometri madwar il-belt antika lanqas ġebla waħda ma tidher ’il fuq mill-ħamrija sewda.” Verament, hu eżatt bħalma bassret il-Bibbja, Memfi saret “ħerba . . . mingħajr ħadd ma jgħammar fiha.”—Ġeremija 46:19.
Dawn huma biss tnejn mill-ħafna eżempji li juru l-eżattezza tal-profeziji tal-Bibbja. Il-qerda kompleta taʼ Tebe u Memfi tagħtina raġuni soda biex ikollna fiduċja f’dawk il-profeziji tal-Bibbja li s’issa għadhom ma twettqux.—Salm 37:10, 11, 29; Luqa 23:43; Apokalissi 21:3-5.
[Sors tal-Istampa f’paġna 32]
Ritratt meħud bil-kortesija tal-British Museum