Tkellem il-​Lingwa Pura u Għix Għal Dejjem!

“Fittxu lil Jehovah . . . Fittxu t-​tjieba, fittxa li tkunu ġwejdin. X’aktarx tistgħu tiġu moħbijin f’jum ir-​rabja taʼ Jehovah.”−SOFONIJA 2:3.

1. (a) Liema metodi jużaw l-​istudenti biex jitgħallmu lingwa barranija? (b) Għala għandna nitkellmu l-​lingwa pura?

L-​ISTUDENTI jistgħu jitgħallmu xi lsien ġdid billi jużaw il-​metodu tal-​grammatika jew il-​metodu tal-​lingwa mitkellma. Taħt il-​metodu tal-​grammatika, huma ġeneralment jużaw kotba tal-​iskola u jitgħallmu regoli tal-​grammatika. Taħt il-​metodu tal-​lingwa mitkellma, huma jimitaw il-​ħsejjes u mudelli taʼ kliem mitkellma mill-​għalliem tagħhom. Iż-​żewġ metodi huma wżati f’li wieħed jitgħallem il-​“lingwa pura.” U huwa vitali li nitkellmu din il-​lingwa jekk nittamaw li niġu “moħbijin f’jum ir-​rabja taʼ Jehovah.”−Sofonija 2:1-3; 3:8, 9.

2. Kif nistgħu nitgħallmu dawk li nistgħu nsejħulhom ir-​regoli tal-​grammatika tal-​lingwa pura?

² Il-​ktieb prinċipali tal-​iskola li jintuża biex wieħed jitgħallem il-​lingwa pura huwa l-​Bibbja. Studju bil-​għaqal tagħha u taʼ pubblikazzjonijiet ibbażati fuq il-​Bibbja jgħallmek dawk li nistgħu nsejħulhom ir-​regoli tal-​grammatika għall-​lingwa pura. Studju tal-​Bibbja fid-​dar immexxi minn wieħed mix-​Xhieda taʼ Jehovah huwa bidu tajjeb. Għal dawk li diġa huma ddedikati lil Alla, studju regulari u diliġenti tal-​Iskrittura huwa essenzjali. Imma hemm modi speċjalment effettivi biex wieħed jitgħallem il-​lingwa pura? U x’benefiċċji jirriżultaw milli wieħed jitkellimha?

Kif Titgħallem il-​Lingwa Pura

3. Liema hu mod wieħed kif titgħallem il-​lingwa pura?

³ Mod wieħed kif titgħallem il-​lingwa pura huwa li tassoċja veritajiet li qed titgħallem maʼ punti li diġà taf, bħalma student tal-​lingwa jistaʼ jirrakkonta b’mod progressiv diversi regoli tal-​grammatika. Per eżempju, f’xi żmien int forsi kont taf li Ġesù Kristu huwa l-​Iben t’Alla, imma ftit kont taf dwar id-​dmirijiet tiegħu. Minn dak iż-​żmien ’il hawn, studju tal-​Bibbja forsi għallmek li Kristu qiegħed issa jaħkem bħala Sultan tas-​sema u li matul ir-​Renju taʼ Elf Sena tiegħu, l-​umanità ubbidjenti se tiġi mgħollija lejn il-​perfezzjoni. (Rivelazzjoni 20:5, 6) Iva, li tassoċja ħsibijiet ġodda maʼ dawk li diġà taf itejjeb il-​fehma tiegħek dwar il-​lingwa pura.

4. (a) Liema hu mod ieħor kif titgħallem ir-​‘regoli tal-​grammatika’ tal-​lingwa pura, u liema rakkont tal-​Bibbja huwa wżat biex jagħti stampa taʼ dan? (b) X’ġara hekk kif Gideon u t-​tliet mitt raġel tiegħu ħadu azzjoni? (ċ) Ir-​rakkont dwar Gideon igħallem liema lezzjoni?

⁴ Mod ieħor kif titgħallem ir-​‘regoli grammatiċi’ tal-​lingwa pura huwa billi tipprova ġġib quddiem għajnejk il-​ġrajjiet fil-​Bibbja. Biex nagħtu eżempju: Ipprova ‘ara u isma’’ r-​rakkont miktub f’​Imħallfin 7:15-23. Ħares! L-​imħallef Iżraelit Gideon fired il-​forzi tiegħu fi tliet kumpaniji taʼ mitt raġel kull waħda. Fid-​dlam, huma jinżlu bil-​kwiet minn fuq il-​Muntanja taʼ Gilboa u jdawru l-​kamp tal-​Midjaniti reqdin. Armati sewwa, dawn it-​300? Le, mhux militarment. Ħeqq, kieku kellhom jarawhom xi militaristi mkabbrin żgur li kienu jidħqu bihom! Kull wieħed għandu biss qarn, ġarra kbira tal-​ilma, u torċa ġewwa l-​ġarra. Imma isma’! Jingħata sinjal u l-​mitt raġel maʼ Gideon idoqqu l-​iqran tagħhom u jfarrku l-​ġarar tal-​ilma tagħhom. Il-​mitejn l-​oħra jagħmlu l-​istess ħaġa. Hekk kif huma jgħollu t-​torċi jaqbdu tagħhom ’il fuq, int tismagħhom igħajtu: “Is-​sejf taʼ Jehovah u taʼ Gideon!” Kif jitterrorizza lill-​Midjaniti dan! Huma joħorġu bil-​fixkla mit-​tined tagħhom, b’għajnejhom mimlijin irqad miftuħin bil-​biżaʼ minħabba l-​fjammi jogħlew li jikxfu dellijiet taʼ figuri u jrewħu biżaʼ superstizzjuz. Hekk kif il-​Midjaniti jibdew jaħarbu, l-​irġiel taʼ Gideon ikomplu jdoqqu l-​iqran tagħhom, u Alla jpoġġi lill-​egħdewwa tagħhom kontra xulxin. X’lezzjoni qawwija ferm fil-​lingwa pura! Alla jistaʼ jeħles lill-​qaddejja tiegħu mingħajr qawwa militari umana. Barra minn hekk, “Jehovah mhux se jabbanduna lill-​poplu tiegħu minħabba fl-​isem kbir tiegħu.”−1 Samwel 12:22.

5. Il-​laqgħat Kristjani kif jistgħu jgħinu biex jirraffinaw id-​diskors tagħna?

⁵ Meta l-​istudenti jiġu mgħallmin ilsien barrani permezz tal-​metodu tal-​lingwa mitkellma, huma jipprovaw jirrepetu l-​ħsejjes u l-​kliem tal-​għalliem b’mod korrett. Liema opportunitajiet mill-​aħjar hemm biex inti titkellem il-​lingwa pura fil-​laqgħat Kristjani! Hemm nisimgħu kif oħrajn jesprimu rwieħhom f’dik il-​lingwa taʼ verità Skritturali, u aħna jistaʼ jkollna l-​privileġġ li nikkummentaw aħna stess. Nibżgħu aħna li forsi ngħidu xi ħaġa ħażina? Ejjew ma nħallux dan jinkwetana, għax anki żball li jiġi kkorreġut b’qalb tajba mill-​anzjan li jkun qed jippresiedi laqgħa bħall-​istudju taʼ kull ġimgħa fuq it-​Torri tal-​Għassa jistaʼ jirraffinalna d-​diskors tagħna. Għalhekk, attendi u pparteċipa fil-​laqgħat Kristjani regolarment.—Ebrej 10:24, 25.

Infiltrazzjoni taʼ Impuritajiet

6. Għala hemm tant kuntrast bejn ix-​Xhieda taʼ Jehovah u l-​organizzazzjonijiet reliġjużi tal-​Kristjaneżmu?

⁶ Dawk li jiddikjaraw il-​għan taʼ Jehovah u jannunzjaw is-​Saltna stabbilita tiegħu fis-​sema qed jitkellmu l-​lingwa pura bħala x-​Xhieda tiegħu. Huma jagħmlu lil ismu magħruf u jaqduh “spalla maʼ spalla,” jew fi qbil wieħed. (Sofonija 3:9) Għalkemm ir-​reliġjonijiet tal-​Kristjaneżmu għandhom il-​Bibbja, m’humiex qegħdin jitkellmu l-​lingwa pura jew isejħu l-​isem t’Alla bil-​fidi. (Ġojeli 2:32) M’għandhom ebda messaġġ armonjuż ibbażat fuq l-​Iskrittura. Għala? Għaliex huma jpoġġu t-​tradizzjonijiet reliġjużi, il-​filosofiji tad-​dinja, u l-​lealtajiet politiċi fuq il-​Kelma t’Alla. Il-​għanijiet, it-​tamiet, u l-​metodi tagħhom huma kollha taʼ din id-​dinja mill-​agħar.

7. Liema differenzi bejn ix-​Xhieda taʼ Jehovah u r-​reliġjonijiet foloz huma indikati fl-​1 Ġwann 4:4-6.

⁷ Il-​Kristjaneżmu—fil-​fatt, l-​imperu dinji kollu kemm hu taʼ reliġjon falza—ma jitkellimx l-​istess lingwa bħal dik tax-​Xhieda taʼ Jehovah. Taʼ interess, lil dawk li qed jitkellmu l-​lingwa pura, l-​appostlu Ġwanni kitbilhom: “Intom toriġinaw minn Alla, . . . u kkonkwistajtu lil dawk il-​persuni, għaliex dak li hu f’għaqda magħkom hu akbar minn dak li hu f’għaqda mad-​dinja. Huma joriġinaw mid-​dinja; huwa għalhekk li jitkellmu dak li jissokta mid-​dinja u d-​dinja tismagħhom. Aħna noriġinaw minn Alla. Dak li jikseb il-​għarfien t’Alla jismagħna; dak li ma joriġinax minn Alla ma jismagħniex.” (1 Ġwann 4:4-6) Il-​qaddejja taʼ Jehovah ikkonkwistaw fuq għalliema foloz għaliex Alla, li hu f’għaqda mal-​poplu tiegħu, “hu akbar [mix-Xitan li] hu f’għaqda mad-​dinja,” is-​soċjetà umana bla tjieba. Ladarba l-​apostati “joriġinaw mid-​dinja” u għandhom l-​ispirtu mill-​agħar tagħha, huma “jitkellmu dak li jissokta mid-​dinja u d-​dinja tismagħhom.” Imma individwi li huma bħal ngħaġ jisimgħu minn dawk li joriġinaw minn Alla, billi jirrealizzaw li n-​nies taʼ Jehovah jitkellmu l-​lingwa pura taʼ verità Biblika pprovduta permezz tal-​organizzazzjoni tiegħu.

8. X’inhi l-​identità tar-​raġel taʼ bla liġi?

⁸ Ġiet imbassra apostasija kbira, u ‘misteru tan-​nuqqas taʼ ħarsien tal-​liġi’ kien diġà beda jaħdem fl-​ewwel seklu E.K. Hekk kif għadda ż-​żmien, irġiel li aċċettaw—jew ħatfu—r-​responsabbiltà taʼ li jgħallmu fil-​kongregazzjoni bdew igħallmu ħafna duttrini foloz. Il-​lingwa tagħhom kienet ’il bogħod minn waħda pura. Mela nħoloq “raġel taʼ bla liġi” kompost, il-​kleru tal-​Kristjaneżmu, li hu marbut maʼ ħafna tradizzjonijiet reliġjużi foloz, filosofiji tad-​dinja, u tagħlim li mhux Skritturali.—2 Tessalonkin 2:3, 7.

Lingwa Pura Mismugħa mad-​Dinja Kollha?

9. Liema żviluppi reliġjużi kien hemm matul is-​seklu 19?

⁹ Minoranza żgħir biss taʼ nies li jibżgħu minn Alla ‘jagħmlu ġlieda iebsa għall-​fidi li twasslet lill-​qaddisin.’ (Ġuda 3) Fejn setgħu jinstabu wħud li jemmnu bħal dawn? Għal sekli, ir-​reliġjon falza żammet lill-​kotriet fi dlam spiritwali, imma Alla kien jafhom lil dawk il-​ftit li kellhom l-​approvazzjoni tiegħu. (2 Timotew 2:19) U mbagħad, f’nofs il-​bidliet industrijali, kummerċjali, u soċjali tas-​seklu 19, bdew iqumu vuċijiet li kienu differenti mill-​babilonja ġenerali taʼ taħwid reliġjuż. Gruppi żgħar bdew jipprovaw jaqraw is-​sinjali taż-​żminijiet u jbassru t-​tieni miġja taʼ Ġesù, imma mhux kollha kienu qed jitkellmu l-​lingwa pura.

10. Liema grupp tat-​“tieni miġja” għażel Alla biex jitkellem il-​lingwa pura, u għala hu evidenti li l-​id taʼ Jehovah kienet magħhom?

¹⁰ Fl-​1879, madankollu, sar ċar liema leħen tat-​“tieni miġja” kien qed jintgħażel minn Jehovah biex jitkellmu l-​lingwa pura bħala x-​Xhieda tiegħu. Sa dak iż-​żmien, grupp żgħir taʼ studju tal-​Bibbja mmexxi minn Charles Taze Russell kien qed jiltaqaʼ f’Pittsburgh, Pennsylvania, U.S.A. Huma kienu saru ċerti li t-​tieni miġja taʼ Ġesù kellha tibda bil-​preżenza inviżibbli tiegħu, li dalwaqt kien ġej żmien taʼ niket dinji, u li dan kellu jiġi segwit mir-​Renju taʼ Elf Sena taʼ Kristu li kellu jġib restawrazzjoni tal-​Ġenna tal-​Art b’ħajja eterna għal bnedmin ubbidjenti. F’Lulju tal-​1879 dawn l-​Istudenti tal-​Bibbja bdew jippubblikaw ir-​rivista li issa hi magħrufa bħala The Watchtower, jew It-​Torri tal-​Għassa bil-​Malti. Tqassmu biss 6,000 kopja minn dik l-​ewwel ħarġa. Imma li “l-​id taʼ Jehovah” kienet maʼ dawk ix-​Xhieda huwa evidenti, għax din ir-​rivista hija issa ppubblikata f’111-il lingwa b’medja taʼ stampar taʼ ’l fuq minn 15,000,000 kopja għal kull ħarġa.—Qabbel Atti 11:19-21.

11, 12. Liema huma xi veritajiet Skritturali mifhuma minn dawk li jitkellmu l-​lingwa pura?

¹¹ Permezz tal-​Iskrittura Mqaddsa u taʼ pubblikazzjonijiet tax-​Xhieda taʼ Jehovah, u speċjalment bl-​ippridkar tal-​aħbar tajba minn dawn il-​Kristjani żelużi, il-​lingwa pura ġiet li saret magħrufa mal-​art kollha. U liema benefiċċji grandjużi jitgawdew minn dawk li jitkellmuha! Minflok ma jgħidu li ‘Alla u Alla, Kristu hu Alla, u l-​Ispirtu s-​Santu hu Alla’ bil-​lingwaġġ misterjuż tat-​Trinitarjaniżmu, huma jaqblu mal-​pożizzjoni tal-​Bibbja li Jehovah hu l-​Iktar Għoli, li Ġesù Kristu bħala wieħed iżgħar huwa Ibnu, u li l-​ispirtu qaddis huwa l-​forza attiva tal-​għaġeb t’Alla. (Ġenesi 1:2; Salm 83:18; Mattew 3:16, 17) Dawk li jitkellmu l-​lingwa pura jafu li l-​bniedem ma evolviex minn xi forma iktar baxxa taʼ ħajja imma ġie maħluq minn Alla li jħobb. (Ġenesi 1:27; 2:7) Huma jirrealizzaw li r-​ruħ ma tibqax teżisti mal-​mewt—fatt li jelimina l-​biżaʼ mill-​mejtin. (Ekkleżjasti 9:5, 10; Eżekjel 18:4) L-​infern huwa mifhum bħala l-​qabar komuni tal-​umanità, mhux post tan-​nar għal tbatija maħluq minn xi alla kattiv. (Ġob 14:13) Huma jafu wkoll li l-​irxoxt huwa t-​tama mogħtija minn Alla għall-​mejtin.—Ġwann 5:28, 29; 11:25; Atti 24:15.

¹² Dawk li jitkellmu l-​lingwa pura juru rispett lejn id-​demm u l-​ħajja. (Ġenesi 9:3, 4; Atti 15:28, 29) Huma jirrealizzaw li l-​ħajja fuq l-​art taʼ Kristu hija l-​prezz li tħallas bħala rahan biex jifdi lill-​bnedmin ubbidjenti. (Mattew 20:28; 1 Ġwann 2:1, 2) Qatt ma jitolbu lil xi “qaddisin,” ladarba jafu li t-​talbiet tagħhom għandhom ikunu diretti lejn Alla Jehovah permezz taʼ Ġesù Kristu. (Ġwann 14:6, 13, 14) Ladarba l-​Kelma t’Alla tikkundanna l-​idolatrija, xbihat ma jintużawx fil-​qima tagħhom. (Eżodu 20:4-6; 1 Korintin 10:14) U jevitaw il-​perikli tad-​dimoniżmu għaliex huma jiċħdu l-​ispiritiżmu, li hu wkoll ikkundannat fil-​Bibbja.—Dewteronomju 18:10-12; Galatin 5:19-21.

13. Dawk li jitkellmu l-​lingwa pura għala m’humiex imwerwrin?

¹³ Il-​qaddejja taʼ Jehovah, li jitkellmu l-​lingwa pura, m’humiex imwerwrin dwar fejn qegħdin fil-​medda taż-​żmien. Jehovah għallimhom li qegħdin fiż-​“żmien tat-​tmiem,” b’Ġesù preżenti bħala spirtu inviżibbli glorjuż. (Danjel 12:4; Mattew 24:3-14; 2 Timotew 3:1-5; 1 Pietru 3:18)) B’qawwiet setgħana tas-​sema warajh, Kristu wasal biex jirkeb għal ġol-​battalja biex jesegwixxi l-​ġudizzju t’Alla kontra din is-​sistema taʼ affarijiet. (Danjel 2:44; Rivelazzjoni 16:14, 16; 18:1-8; 19:11-21) Iva, u dawk li jitkellmu l-​lingwa pura huma mħabbtin jiddikjaraw l-​aħbar tajba li s-​Saltna t’Alla taħt Kristu dalwaqt se ġġib barkiet grandjużi għall-​bnedmin ubbidjenti kollha f’ġenna fuq l-​art. (Isaija 9:6, 7; Danjel 7:13, 14; Mattew 6:9, 10; 24:14; Luqa 23:43) Dan kollu, u aħna sempliċement ħakkejna ftit il-​wiċċ! Ċertament, il-​lingwa pura hi l-​iktar waħda rikka, l-​iktar ilsien prezzjuż fuq l-​art!

14. Liema benefiċċji oħra jitgawdew minn dawk li jitkellmu l-​lingwa pura?

¹⁴ Il-​benefiċċji li jitgawdew minn dawk li jitkellmu l-​lingwa pura jinkludu “l-​paċi t’Alla” lil tgħassew lil qlub u lil qawwiet mentali. (Filippin 4:6, 7) Huma jobdu l-​liġijiet tal-​Bibbja, li jġibu ’l quddiem is-​saħħa, il-​ferħ, u s-​sodisfazzjon li jiġi meta wieħed ikun jogħġob lill-​Ħallieq. (1 Korintin 6:9, 10) Iva, u l-​kelliema tal-​lingwa pura għandhom it-​tama taʼ ħajja eterna fid-​dinja l-​ġdida li Alla jwiegħed.— 2 Pietru 3:13.

Użaha jew Itlifha

15. Kif se tibbenefika int minn qabda mill-​aħjar tal-​lingwa pura?

¹⁵ Jekk int trid li titkellem il-​lingwa pura fid-​dinja l-​ġdida, int trid tant issir tafha sew li ssir il-​lingwa li biha taħseb. Meta wieħed ikun qed jitgħallem lingwa, għall-​ewwel jaħseb fil-​lingwa naturali tiegħu u jittraduċi l-​ħsibijiet tiegħu għal ġol-​lingwa l-​ġdida. Imma hekk kif isir jafha iktar lil dik il-​lingwa l-​ġdida, hu jibda jaħseb biha mingħajr il-​bżonn tal-​proċess taʼ traduzzjoni. B’mod simili, billi tistudja bir-​reqqa, int tistaʼ tant tikseb qabda soda u mill-​aħjar tal-​lingwa pura li int tkun taf kif tapplika l-​liġijiet u l-​prinċipji tal-​Bibbja biex issolvi l-​problemi u tibqaʼ fil-​“passaġġ tal-​ħajja.”—Salm 16:11.

16. X’jistaʼ jiġri jekk int ma tużax il-​lingwa pura regolarment?

¹⁶ Il-​lingwa pura trid tużaha regolarment, inkella titlef l-​abbiltà li titkellimha sewwa. Biex nagħtu eżempju: Snin ilu, xi wħud minna studjaw xi lingwa barranija. Forsi niftakru xi kelmiet f’dak l-​ilsien imma x’aktarx li ma tantx nitkellmuha tajjeb għaliex ma nużawhiex il-​ħin kollu. L-​istess jistaʼ jiġri bil-​lingwa pura. Jekk ma nużawhiex regolarment, nistgħu nitilfuha, u dan ikollu konsegwenzi traġiċi għall-​ispiritwalità tagħna. Ejjew għalhekk nitkellmuha regolarment fil-​laqgħat u fil-​ministeru Kristjan. Dawn l-​attivitajiet, flimkien maʼ studju persunali, se jgħinuna biex ingħidu l-​affarijiet sewwa fil-​lingwa pura. U kemm hu importanti dan!

17. X’hemm li juri li d-​diskors jistaʼ jsalva l-​ħajja jew jistaʼ jġib il-​mewt?

¹⁷ Il-​kliem jistaʼ jsalvalek ħajtek u jistaʼ jġib fuqek il-​mewt. Dan ġie muri meta kien hemm konflitt bejn it-​tribù Iżraelit taʼ Efraim u l-​Imħallef Ġefta taʼ Gilead. Biex jidentifikaw lill-​Efraimiti li kienu qed jipprovaw jaħarbu billi jaqsmu x-​Xmara Ġordan, il-​Gileaditi wżaw il-​kelma “Xibbolet,” li kienet tibda bil-​ħoss tal-​“exxe,” bħala password. L-​irġiel taʼ Efraim kixfu lilhom infushom mal-​għassiesa Gileaditi fl-​inħawi baxxi tal-​Ġordan billi qalu “Sibbolet,” minflok “Xibbolet,” billi ppronunzjaw ħażin il-​ħoss tal-​ftuħ taʼ dik il-​kelma. Bħala riżultat, 42,000 Efraimiti nqatlu! (Imħallfin 12:5, 6) Bl-​istess mod, dak li jgħallmu l-​kleru tal-​Kristjaneżmu jistaʼ jidher li hu qrib il-​lingwa pura għal dawk li ma tantx huma midħla tal-​verità tal-​Bibbja. Imma li titkellem b’mod reliġjuż falz ikun fatali f’jum ir-​rabja taʼ Jehovah.

Magħqudin Nibqgħu Aħna

18, 19. X’inhu s-​sinjifikat taʼ Sofonija 3:1-5?

¹⁸ B’referenza għal Ġerusalemm tal-​qedem li ma baqgħetx leali u għax-​xebh modern tagħhom, il-​Kristjaneżmu, jintqal f’​Sofonija 3:1-5: “Gwaj għaliha dik li qed tirvella u tniġġes lilha nfisha, il-​belt oppressiva! Ma semgħetx minn leħen; ma laqgħetx id-​dixxiplina. F’Jehovah ma fdatx. Lejn Alla tagħha ma resqetx qrib. Il-​prinċpijiet tagħha ġo nofsha kienu ljuni jagħjtu. L-​imħallfin tagħha kienu lpup taʼ fil-​għaxija li ma għomodewx il-​għadam sa fil-​għodu. Il-​profeti tagħha kienu insolenti, kienu nies taʼ ħażen kbir. Il-​qassisin tagħha nfushom ipprofanaw dak li kien qaddis; għamlu vjolenza lil-​liġi. Jehovah kien twajjeb ġo nofsha; ma kien jagħmel ebda nuqqas taʼ tjieba. Għodwa wara għodwa baqaʼ jagħti d-​deċiżjoni ġudizzjarja tiegħu stess. Bi nhar ma wrietx li kienet nieqsa. Imma l-​wieħed mhux twajjeb ma kien jaf ebda mistħija.” X’inhu s-​sinjifikat taʼ dak il-​kliem?

¹⁹ Kemm Ġerusalemm tal-​qedem u kemm il-​Kristjaneżmu modern irribellaw kontra Jehovah u niġġsu lilhom infushom b’qima falza. Il-​ħażen tal-​mexxejja tagħhom irriżulta f’oppressjoni. Minkejja t-​twissijiet ripetuti t’Alla, huma ma semgħux u ma qorbux lejh. Il-​prinċpijiet tagħhom kienu bħal iljuni feroċi u bil-​guħ, li b’arroganza warrbu t-​tjieba. Bħal ilpup għatxana għad-​demm, l-​imħallfin tagħhom ċarrtu l-​ġustizzja f’biċċiet. Il-​qassisin tagħhom ‘ipprofanaw dak li hu qaddis u għamlu vjolenza lil-​liġi’ t’Alla. Mela Jehovah wasal biex ‘jiġbor ġnus u jiġmaʼ flimkien saltniet, sabiex isawwab fuqhom id-​denunzja tiegħu, ir-​rabja taħraq kollha tiegħu.’—Sofonija 3:8.

20. (a) Xi trid tagħmel biex tibqaʼ ħaj f’jum ir-​rabja taʼ Jehovah? (b) Kif tistaʼ int tittama li tgawdi barkiet eterni mingħand Alla?

²⁰ Il-​jum tar-​rabja taʼ Jehovah qed joqrob malajr. Biex tibqaʼ ħaj għal ġod-​dinja ġdida t’Alla, għalhekk, tgħallem u tkellem il-​lingwa pura mingħajr dewmien. Billi tagħmel hekk biss tistaʼ int issib protezzjoni minn diżastru spiritwali issa u mill-​gwaj globali li tant hu qrib. Ix-​Xhieda taʼ Jehovah qed jiddikjaraw il-​jum tar-​rabja t’Alla u l-​messaġġ li jqawwi l-​qalb tas-​Saltna tiegħu. Kemm jieħdu pjaċir jitkellmu dwar il-​glorja tal-​istat tiegħu taʼ sultan! (Salm 145:10-13) Sir magħqud magħhom, u int tistaʼ tittama li tgawdi barkiet eterni mill-​oriġinatur tal-​lingwa pura, il-​Mulej Sovran Jehovah.

Kif Kont Twieġeb?

◻ Liema huma xi modi kif titgħallem il-​lingwa pura?

◻ Għala hu taʼ benefiċċju li titkellem il-​lingwa pura?

◻ X’jistaʼ jiġri jekk ma tużax il-​lingwa pura regolarment?

◻ Kif jistaʼ wieħed jibqaʼ ħaj f’jum ir-​rabja taʼ Jehovah u jgawdi barkiet eterni?

[Stampa f’paġna 15]

Mill-​1879 ’il quddiem intgħamel ċar li Charles Taze Russell u l-​imseħbin tiegħu kienu qed jiġu wżati minn Alla biex iġibu ’l quddiem il-​lingwa pura