Kapitlu 18

“It-​Tmiem Tad-​Dinja” Huwa Qrib Ferm!

1. Is-segwaċi taʼ Kristu fuq l-​art kif kellhom ikunu jafu meta hu kien beda jaħkem fis-​sema?

META ĠESÙ KRISTU xeħet lil Satana u lill-​anġli tiegħu ’l barra mis-​sema u beda l-​ħakma tas-​Saltna tiegħu, dan kien ifisser li t-​tmiem taʼ Satana u tas-​sistema mill-​agħar tiegħu kien fil-​qrib. (Rivelazzjoni 12:​7-12) Imma s-​segwaċi taʼ Kristu fuq l-​art kif setgħu jkunu jafu li din il-​ġrajja fis-​sema, li ma kenitx tidher b’għajnejhom, kienet seħħet? Kif setgħu jkunu jafu li Kristu kien preżenti b’mod inviżibbli bil-​poter tas-​Saltna u li “t-​tmiem tad-​dinja” kien fil-​qrib? Setgħu jkunu jafu billi jiċċekkjaw biex jaraw jekk is-​“sinjal” li Ġesù ta kienx qiegħed jitwettaq.

2. Id-dixxipli taʼ Kristu liema mistoqsija staqsewh?

² Ftit qabel il-​mewt taʼ Ġesù, waqt li kien qiegħed bil-​qiegħda fuq l-​Għolja taż-​Żebbuġ, erbgħa mill-​appostli tiegħu ġew biex jistaqsuh għal “sinjal.” Dan huwa l-​mod kif il-​mistoqsija tagħhom inqrat, fil-​King James Version, minn miljuni taʼ nies: “Għidilna, meta se jkunu dawn l-​affarijiet? u x’se jkun is-​sinjal tal-​miġja tiegħek, u t-​tmiem tad-​dinja?” (Mattew 24:3) Imma dawn l-​espressjonijiet, il-​“miġja tiegħek” u “t-​tmiem tad-​dinja,” x’ifissru tassew?

3. (a) L-espressjonijiet “il-​miġja tiegħek” u “t-​tmiem tad-​dinja” x’ifissru tassew? (b) Il-​mistoqsija li għamlu d-​dixxipli taʼ Kristu kif, allura, tiġi tradotta b’mod korrett?

³ Il-kelma Griega hawnhekk tradotta “miġja” hija parousia, u tfisser “preżenza.” Mela, allura, meta s-​“sinjal” ikun jidher, dan ifisser li nkunu nafu li Kristu hu preżenti għalkemm ma jidhirx, li diġà ġie fil-​poter tas-​Saltna. L-​espressjoni “tmiem tad-​dinja” wkoll tistaʼ tiżvijak ferm. Din ma tfissirx it-​tmiem taʼ l-​art, imma, minflok, it-​tmiem tas-​sistema t’affarijiet taʼ Satana. (2 Korintin 4:4) Il-​mistoqsija taʼ l-​appostli għalhekk tinqara b’mod eżatt: “Għidilna, Meta se jkunu dawn l-​affarijiet, u x’se jkun is-​sinjal tal-​preżenza tiegħek u tal-​konklużjoni tas-​sistema t’affarijiet?”​—Mattew 24:3, New World Translation.

4. (a) Liema affarijiet jifformaw “is-​sinjal” li Ġesù ta? (b) “Is-​sinjal” b’liema mod jistaʼ jiġi mqabbel maʼ marka tas-​swabaʼ?

⁴ Ġesù ma tax biss ġrajja waħda bħala “s-​sinjal.” Hu rrakkonta dwar ħafna ġrajjiet u sitwazzjonijiet. Kittieba oħrajn tal-​Bibbja minbarra Mattew semmew ġrajjiet oħrajn li kellhom jimmarkaw l-​“aħħar jiem.” Dawn l-​affarijiet kollha li kienu mbassrin kellhom iseħħu matul iż-​żmien li l-​kittieba tal-​Bibbja sejħulu l-​“aħħar jiem.” (2 Timotew 3:​1-5; 2 Pietru 3:​3, 4) Dawn il-​ġrajjiet kellhom ikunu bħal-​linji differenti li jifformaw il-​marka tas-​swabaʼ taʼ persuna, marka li ma tistax tappartjeni lil kwalunkwe persuna oħra. L-​“aħħar jiem” fihom id-​disinn taʼ marki, jew ġrajjiet, tagħhom stess. Dawn jifformaw “marka tas-​swabaʼ” pożittiva li ma tistax tappartjeni lil kwalunkwe perijodu ieħor taʼ żmien.

5, 6. Hekk kif teżamina 11-il evidenza dwar l-​“aħħar jiem” fil-​paġni li ġejjin, x’tifhem dwar “il-​konklużjoni tas-​sistema t’affarijiet”?

⁵ F’kapitlu 16 taʼ dan il-​ktieb ikkunsidrajna evidenza Biblika li Kristu rritorna u beda jaħkem fost l-​għedewwa tiegħu fis-​sena 1914. Issa ħares bir-​reqqa lejn id-​diversi karatteristiċi tas-​“sinjal” tal-​preżenza taʼ Kristu u evidenza oħra taʼ l-​“aħħar jiem” tas-​sistema t’affarijiet mill-​agħar taʼ Satana. Waqt li teżamina dawn l-​affarijiet imbassrin fl-​erbaʼ paġni li jmiss, innota kif kienu u għadhom qegħdin ikollhom twettieq mill-​1914 ’l hawn.

“ĠENS SE JQUM KONTRA ĠENS u SALTNA KONTRA SALTNA.”​—Mattew 24:7.

Żgur li int rajt din il-​parti tas-​“sinjal” titwettaq mill-​1914 ’l hawn! F’dik is-​sena bdiet l-​I Gwerra Dinjija. Qatt fl-​istorja ma kien hemm gwerra terribbli bħal din. Kienet gwerra totali. L-​I Gwerra Dinjija kienet ħafna akbar mill-​gwerer il-​kbar kollha miġġildin matul l-​2,400 sena taʼ qabel l-​1914. Madankollu 21 sena biss wara li ntemmet dik il-​gwerra, bdiet it-​II Gwerra Dinjija. U din kienet erbaʼ darbiet iktar qerrieda mill-​I Gwerra Dinjija.

Gwerer terribbli jkomplu jiġu miġġildin. Mindu ntemmet it-​II Gwerra Dinjija fl-​1945, iktar minn 25 miljun ruħ inqatlu f’xi 150 gwerra miġġildin madwar il-​globu. Fi kwalunkwe ġurnata, kien u għad hemm, bħala medja, 12-il gwerra għaddejjin x’imkien fid-​dinja. U hemm it-​theddida kontinwa taʼ gwerra dinjija oħra. L-​Istati Uniti waħedha għandha biżżejjed armi nukleari biex teqred kull raġel, mara u tifel u tifla fuq l-​art għal 12-il darba!

“SE JKUN HEMM NUQQAS TAʼ IKEL.”​—Mattew 24:7.

Wara l-​I Gwerra Dinjija ġie l-​akbar ġuħ fl-​istorja kollha. Fit-​Tramuntana taċ-​Ċina biss 15,000 mietu kuljum mill-​ġuħ. Imma n-​nuqqas taʼ ikel kien saħansitra akbar wara t-​II Gwerra Dinjija. Kwart mid-​dinja kienu qegħdin imutu bil-​ġuħ dak iż-​żmien! U minn dak iż-​żmien ’l hawn, l-​ikel baqaʼ skars għal ħafna nies fuq l-​art.

“Kull 8.6 sekondi xi ħadd f’xi pajjiż m’huwiex żviluppat imut bħala riżultat taʼ mard ikkaġunat minn nutriment ħażin,” qalet it-​Times taʼ New York fl-​1967. Miljuni għadhom imutu bil-​ġuħ​—xi 50 miljun kull sena! Sa l-​1980, madwar kwart tan-​nies fuq l-​art (1,000,000,000 ruħ) kienu bil-​ġuħ għaliex ma kellhomx biżżejjed x’jieklu. Saħansitra f’pajjiżi fejn l-​ikel huwa abbundanti, ħafna huma fqar wisq biex jixtruh.

“F’POST WIEĦED WARA IEĦOR PESTI.”—Luqa 21:11.

Eżatt wara l-​I Gwerra Dinjija iktar nies mietu bl-​influwenza Spanjola milli kienu mietu minn kwalunkwe epidemija taʼ mard fl-​istorja taʼ l-​umanità. L-​għadd taʼ mwiet kien taʼ xi 21 miljun ruħ! Madankollu l-​pesta u l-​mard ikomplu jinfirxu bla kontroll. Miljuni sħaħ imutu kull sena minn mard tal-​qalb u kanċer. Mard venerju qiegħed jinfirex bil-​għaġla. Mardiet terribbli oħrajn, bħalma huma l-​malarja, is-​snail fever u r-​river blindness, iseħħu f’pajjiż wara l-​ieħor, speċjalment fl-​Asja, fl-​Afrika u fl-​Amerka Latina.

“SE JKUN HEMM . . . TERREMOTI F’POST WIEĦED WARA IEĦOR.”​—Mattew 24:7.

Mill-1914 s’issa, kien u għad hawn ħafna iktar terremoti kbar milli kien hemm f’xi perijodu simili ieħor fl-​istorja ddokumentata. Għal iktar minn 1,000 sena, mis-​sena 856 E.K. sa l-​1914, kien hemm biss 24 terremot kbir li kkaġunaw xi 1,973,000 mewt. Imma fit-​63 sena mill-​1915 sa l-​1978, total taʼ xi 1,600,000 ruħ mietu fi 43 terremot kbir.

“ŻJIEDA TAʼ ILLEGALITÀ.” ​—Mattew 24:12.

Minn kull parti tad-​dinja jaslu rapporti taʼ żjieda fl-​illegalità u fil-​kriminalità. Kriminalità taʼ vjolenza, bħalma huma l-​qtil, l-​istupru u s-​serq, hija issa inkontrollabbli. Fl-​Istati Uniti biss, att kriminali serju jiġi mwettaq, bħala medja, kważi kull sekonda. F’ħafna postijiet ħadd ma jħossu fis-​sigurtà fit-​toroq, saħansitra matul il-​ġurnata. Bil-​lejl in-​nies joqogħdu ġo djarhom bil-​bibien imsakkrin u bl-​istaneg, jibżgħu joħorġu barra.

“SE JKUN HEMM DEHRIET MIMLIJIN BIŻAʼ.”​—Luqa 21:11.

Il-biżaʼ huwa probabbli l-​akbar emozzjoni dominanti fil-​ħajjiet tan-​nies illum. Ftit wara li ġew sploduti l-​ewwel bombi nukleari, ix-​xjenzat atomiku Harold C. Urey qal: “Se nieklu l-​biżaʼ, norqdu l-​biżaʼ, ngħixu fil-​biżaʼ u mmutu fil-​biżaʼ.” Għal ħafna mill-​bnedmin dan huwa dak li qiegħed jiġri. U dan m’huwiex sempliċement minħabba t-​theddida dejjem preżenti taʼ gwerra nukleari. In-​nies ukoll jibżgħu mill-​kriminalità, mit-​tniġġis, mill-​mard, mill-​inflazzjoni u minn ħafna affarijiet oħrajn li jheddu s-​sigurtà tagħhom u l-​istess ħajjiethom.

‘DIŻUBBIDJENZA LEJN IL-​ĠENITURI.’​—2 Timotew 3:2.

Taʼ spiss illum il-​ġenituri ftit għandhom kontroll fuq uliedhom. Iż-​żgħażagħ jirribellaw kontra l-​awtorità kollha. Mela kull pajjiż fuq l-​art huwa effettwat mill-​pjaga tal-​kriminalità fost iż-​żgħażagħ. Iktar minn nofs ir-​reati serji kollha f’xi pajjiżi jitwettqu minn tfal taʼ bejn l-​10 u s-​17-il sena. Qtil, stupru, assalt, serq mid-​djar, serq taʼ karozzi, u kull xorta taʼ serq ieħor​—dawn l-​affarijiet kollha qegħdin isiru minn tfal. Qatt fl-​istorja ma kienet daqshekk komuni d-​diżubbidjenza lejn il-​ġenituri.

“IĦOBBU L-​FLUS.”​—2 Timotew 3:2.

Kull fejn tħares illum tistaʼ tara atti taʼ regħba. Ħafna se jagħmlu prattikament kwalunkwe ħaġa għall-​flus. Se jisirqu jew saħansitra joqtlu. M’hijiex xi ħaġa rari li persuni rgħiba jipproduċu u jbiegħu prodotti li huma magħrufin, b’mod jew ieħor, li jmarrdu jew li joqtlu lil oħrajn. Jew bil-​miftuħ, jew bil-​mod kif jgħixu, in-​nies qegħdin jgħidu dwar il-​flus: ‘Dan huwa l-​alla tiegħi.’

“IĦOBBU L-​PJAĊIRI MINFLOK MA JĦOBBU ’L ALLA.” ​—2 Timotew 3:4.

Il-biċċa l-​kbira tan-​nies illum jaħsbu biss dwar li jagħmlu dak li jogħġob lilhom jew lill-​familji tagħhom, mhux dak li jogħġob ’l Alla. Partikolarment ħafna jħobbu dak li Alla jikkundanna, inkluż il-​fornikazzjoni, l-​adulterju, is-​sokor, l-​abbuż tad-​drogi u l-​hekk imsejħin pjaċiri oħrajn. Saħansitra pjaċiri li, fihom infushom, jistgħu jkunu bnini jiġu mqegħdin qabel kwalunkwe sforz biex wieħed jitgħallem dwar Alla u jaqdih.

“GĦANDHOM GĦAMLA TAʼ DEVOZZJONI LEJN ALLA IMMA JAGĦTU PROVA LI HUMA FOLOZ GĦALL-​QAWWA TAGĦHA.”​—2 Timotew 3:5.

Mexxejja dinjin u bħalhom nies komuni taʼ spiss jilagħbuha taʼ tajbin. Huma jistgħu jattendu għal funzjonijiet fil-​knejjes u jagħtu kontribuzzjonijiet għal opri reliġjużi. Dawk fil-​gvern jistgħu jpoġġu idhom fuq Bibbja meta jieħdu l-​kariga. Imma taʼ spiss din hija sempliċement “għamla taʼ devozzjoni lejn Alla.” Sewwa sew bħalma bassret il-​Bibbja, il-​vera qima t’Alla m’hijiex tassew forza fil-​​ħajjiet tal-​biċċa l-​kbira tan-​nies illum. M’humiex immotivati minn qawwa reali għat-​tajjeb.

“JIRROVINAW L-​ART.”​—Rivelazzjoni 11:18.

L-arja li nibilgħu, l-​ilma li nixorbu u l-​art li fiha jikber l-​ikel tagħna qegħdin jiġu mniġġsin. Dan huwa tant serju li x-​xjenzat Barry Commoner wissa: “Nemmen li t-​tniġġis kontinwu taʼ l-​art, jekk ma jiġix ikkontrollat, eventwalment se jeqred il-​kapaċità taʼ din il-​pjaneta bħala post għal ħajja umana.”

⁶ Wara li kkunsidrajt dan kollu, m’huwiex ċar li “s-​sinjal” li Kristu ta u l-​evidenzi mbassrin mid-​dixxipli tiegħu qegħdin jitwettqu issa? Għalkemm hemm ħafna provi oħrajn, dawk imniżżlin hawnhekk għandhom ikunu biżżejjed biex juru li aħna tassew qegħdin ngħixu fiż-​żmien li l-​Bibbja bassret bħala l-​“aħħar jiem.”

7. (a) X’inhu dak li jagħmel lill-​profeziji tal-​Bibbja rigward il-​preżenza taʼ Kristu u l-​“aħħar jiem” daqstant straordinarji? (b) F’kuntrast maʼ dak li bassret il-​Bibbja, mexxejja dinjin x’kienu qegħdin ibassru preċiż qabel l-​1914?

⁷ Madankollu xi persuni jistgħu jgħidu: ‘Affarijiet bħalma huma l-​gwerer, il-​ġuħ, il-​pesti u t-​terremoti ġraw spiss matul l-​istorja. Mela ma jkunx diffiċli li tbassar li kellhom jerġgħu jiġru.’ Imma aħseb ftit: Il-​Bibbja mhux biss bassret dawn l-​affarijiet, imma indikat li kellhom jiġru fuq skala dinjija. Ukoll, il-​Bibbja qalet li dawn l-​affarijiet kollha kellhom iseħħu fuq il-​ġenerazzjoni li kienet ħajja fl-​1914. Madankollu xi mexxejja prominenti tad-​dinja x’kienu qegħdin ibassru preċiż qabel l-​1914? Kienu qegħdin jgħidu li kundizzjonijiet li jwiegħdu paċi dinjija qatt ma kienu daqshekk favorevoli. Madankollu l-​inkwiet terribbli li l-​Bibbja bassret beda eżatt fil-​​ħin, fl-​1914! Fil-​fatt, mexxejja dinjin issa jgħidu li l-​1914 kienet is-​sena li fiha l-​istorja nbidlet kompletament.

8. (a) Ġesù liema ġenerazzjoni indika li kellha tara t-​tmiem taʼ din is-​sistema t’affarijiet? (b) Mela dwar liema ħaġa nistgħu nkunu ċerti?

⁸ Wara li ġibed l-​attenzjoni lejn il-​​ħafna affarijiet li mmarkaw il-​perijodu mill-​1914 ’il quddiem, Ġesù qal: “Din il-​ġenerazzjoni bl-​ebda mod ma se tgħaddi sakemm dawn l-​affarijiet kollha [inkluż it-​tmiem taʼ din is-​sistema] jseħħu.” (Mattew 24:​34, 14) Liema ġenerazzjoni ried ifisser Ġesù? Hu ried ifisser il-​ġenerazzjoni taʼ nies li kienu ħajjin fl-​1914. Dawk il-​persuni li għad baqaʼ minn dik il-​ġenerazzjoni huma issa xjuħ ħafna. Madankollu, xi wħud minnhom se jkunu għadhom ħajjin biex jaraw it-​tmiem taʼ din is-​sistema mill-​agħar. Mela minn dan nistgħu nkunu ċerti: Dalwaqt issa se jkun hemm tmiem f’daqqa waħda għall-​​ħażen kollu u għan-​nies mill-​agħar kollha f’Armageddon.

[Stampa f’paġna 149]

Ġesù qal lid-​dixxipli tiegħu liema ħaġa kellha tkun prova viżibbli tal-​preżenza inviżibbli tiegħu fil-​poter tas-​Saltna

[Stampa f’paġna 154]

1914—ARMAGEDDON

Xi wħud mill-​ġenerazzjoni li kienu jgħixu fl-​1914 se jaraw it-​tmiem tas-​sistema t’affarijiet u jgħaddu ħajjin minnu