It-Tagħlim Divin Jittrijonfa

“Għajnejk iridu jsiru għajnejn li qegħdin jaraw lill-​Għalliem Grandjuż tiegħek. U widnejk stess se jisimgħu kelma warajk li tgħid: ‘Din hi l-​mogħdija. Imxu fiha.’”—ISAIJA 30:20, 21.

1. L-​istruzzjoni taʼ Jehovah għala tistaʼ b’mod xieraq tissejjaħ tagħlim divin?

ALLA JEHOVAH huwa s-​Sors taʼ l-​aqwa tagħlim li xi ħadd jistaʼ jirċievi. Jekk nisimgħu meta jitkellem, speċjalment permezz tal-​Kelma Sagra tiegħu, hu se jkun l-​Għalliem Grandjuż tagħna. (Isaija 30:20) It-​test tal-​Bibbja Ebrajka ssejjaħlu wkoll “il-​Wieħed Divin.” (Salm 50:1) Għalhekk, l-​istruzzjoni taʼ Jehovah hija tagħlim divin.

2. F’liema sens hu veru li Alla waħdu hu għaref?

² Id-​dinja hija kburija bil-​ħafna istituzzjonijiet edukattivi tagħha, imma lanqas waħda minnhom ma tagħti tagħlim divin. Iva, l-​għerf kollu li l-​umanità akkumulat matul l-​istorja jammonta għal ftit meta jitqabbel maʼ l-​istruzzjoni divina bbażata fuq l-​għerf infinit taʼ Jehovah. Rumani 16:27 igħid li Alla waħdu huwa għaref, u dan huwa veru fis-​sens li Jehovah biss jippossjedi għerf assolut.

3. Ġesù Kristu għala hu l-​aqwa għalliem li qatt mexa fuq l-​art?

³ L-​Iben t’Alla, Ġesù Kristu, huwa mudell taʼ għerf u kien l-​aqwa għalliem li qatt mexa fuq l-​art. U mhux taʼ b’xejn! Għal sekli sħaħ Jehovah kien l-​Għalliem tiegħu fis-smewwiet. Fil-​fatt, it-​tagħlim divin beda meta Alla beda jistruwixxi lill-​ewwel ħolqien tiegħu, l-​Iben uniġenitu tiegħu. Ġesù setaʼ għalhekk igħid: “Sewwa sew bħalma l-​Missier għallem lili jien nitkellem dawn l-​affarijiet.” (Ġwann 8:28; Proverbji 8:22, 30) Il-​kelmiet stess taʼ Kristu rreġistrati fil-​Bibbja jżidu ferm maʼ l-​għarfien tagħna taʼ tagħlim divin. Billi jgħallmu dak li għallem Ġesù, Kristjani midlukin jobdu lill-​Għalliem Grandjuż tagħhom, li r-​rieda tiegħu hi li “l-​għerf iddiversifikat ferm t’Alla” jkun mgħarraf permezz tal-​kongregazzjoni.—Efesin 3:10, 11; 5:1; Luqa 6:40.

It-​Tfittxija Għall-​Għerf

4. X’intqal dwar il-​kapaċità tal-​moħħ?

⁴ Il-​ksib taʼ l-​għerf li jirriżulta minn tagħlim divin jitlob użu diliġenti tal-​fakultajiet tal-​ħsieb tagħna mogħtijin minn Alla. Dan huwa possibbli għaliex il-​moħħ uman għandu potenzjal tremend. Igħid il-​ktieb The Incredible Machine: “Saħansitra l-​kompjuters l-​iktar sofistikati li nistgħu nġibu quddiem għajnejna huma primittivi mqabblin mal-​komplessità u l-​flessibilità kważi infiniti tal-​moħħ uman​—kwalitajiet magħmulin possibbli permezz tas-​sistema komplikata u kalibrata tiegħu taʼ sinjali elettrokimiċi. . . . Il-​miljuni taʼ sinjali li jgħaddu minn ġo moħħok fi kwalunkwe mument iġorru tagħbija straordinarja taʼ informazzjoni. Iġibu aħbarijiet dwar l-​ambjenti taʼ ġewwa u taʼ barra taʼ ġismek: dwar xi bugħawwieġ fis-​sabaʼ taʼ sieqek, jew ir-​riħa tfuħ tal-​kafè, jew xi kumment tad-​daħk taʼ xi ħabib. Hekk kif sinjali oħrajn jipproċessaw u janalizzaw l-​informazzjoni, jipproduċu ċerti emozzjonijiet, memorji, ħsibijiet, jew pjanijiet li jwasslu għal deċiżjoni. Kważi minnufih, sinjali minn moħħok igħidu lil partijiet oħrajn taʼ ġismek x’għandhom jagħmlu: ċaqlaq subgħajk taʼ sieqek, ixrob il-​kafè, idħak, jew forsi irrispondi b’mod makakk. Sadattant moħħok qiegħed ukoll jirregola n-​nifs, il-​kimika tad-​demm, u t-​temperatura tiegħek, u proċessi essenzjali oħrajn li m’intix konxju tagħhom. Jibgħat kmandi li jżommu lil ġismek stabbli u jaħdem tajjeb minkejja bidliet kontinwi fl-​ambjent tiegħek. Iħejji wkoll għal ħtiġijiet futuri.”​—Paġna 326.

5. Fis-​sens Skritturali, x’inhu l-​għerf?

⁵ Għalkemm il-​moħħ uman bla dubju għandu kapaċità taʼ l-​għaġeb, kif nistgħu nużaw il-​moħħ bl-​aħjar mod? Mhux billi ngħaddsu rasna biss fi studju iebes tal-​lingwa, taʼ l-​istorja, tax-​xjenza, jew tar-​reliġjon komparattiva. Għandna nużaw il-​fakultajiet taʼ ħsieb tagħna primarjament biex nirċievu tagħlim divin. Hu biss jirriżulta f’għerf ġenwin. Imma x’inhu l-​għerf veru? Fis-​sens Skritturali, għerf ipoġġi enfasi fuq ġudizzju sod ibbażat fuq għarfien eżatt u fehma vera. Permezz taʼ l-​għerf nistgħu nużaw l-​għarfien u l-​fehma b’suċċess biex insolvu problemi, biex nevitaw jew niskansaw perikli, biex ngħinu lil oħrajn, u biex inwettqu għanijiet. Taʼ interess, il-​Bibbja tagħmel kuntrast bejn l-​għerf u l-​bluha u l-​istupidità​—karatteristiċi li żgur li rridu nevitawhom.—Dewteronomju 32:6; Proverbji 11:29; Ekkleżjasti 6:8.

Il-​Ktieb Il-​Kbir Taʼ Istruzzjoni Taʼ Jehovah

6. Jekk irridu nuru l-​għerf veru, minn xiex irridu nagħmlu użu tajjeb?

⁶ Hemm abbundanza taʼ għerf dinji madwarna. (1 Korintin 3:18, 19) Iva, din id-​dinja hi kotrana bi skejjel u libreriji li fihom miljuni taʼ kotba! Ħafna minn dawn huma kotba taʼ istruzzjoni li jagħtu tagħlim f’dik li hi lingwa, matematika, xjenza, u oqsma oħrajn taʼ għarfien. Imma l-​Għalliem Grandjuż ipprovda l-​ktieb taʼ istruzzjoni li jisboq lill-​oħrajn kollha​—il-​Kelma mnebbħa tiegħu, il-​Bibbja. (2 Timotew 3:16, 17) Hija eżatta mhux biss meta ssemmi affarijiet relatati maʼ suġġetti bħalma huma l-​istorja, il-​ġeografija, u l-​istudju tal-​pjanti imma wkoll meta tbassar il-​futur. Barra minn hekk, tgħinna ngħixu l-​ħajja l-​iktar hienja u l-​iktar produttiva preċiż issa. M’għandniex xi ngħidu, sewwa sew bħalma l-​istudenti fi skola tad-dinja għandhom bżonn jużaw il-​kotba tagħhom, aħna rridu nsiru midħla sewwa mal-​Ktieb il-​kbir taʼ istruzzjoni t’Alla jekk irridu nuru għerf veru bħala dawk “mgħallmin minn Jehovah.”—Ġwann 6:45.

7. Li tkun midħla b’mod intellettwali mal-​kontenut tal-​Bibbja għala tgħid li m’huwiex biżżejjed?

⁷ Madankollu, li nkunu midħla b’mod intellettwali tal-​Bibbja m’huwiex l-​istess bħal li jkollna għerf veru u li naġixxu fi qbil mat-​tagħlim divin. Biex nagħtu stampa: Fis-​seklu 17 E.K., raġel Kattoliku li kien jismu Cornelius van der Steen ra kif għamel biex isir Ġeżwita imma ma ġiex aċċettat għaliex kien qasir wisq. Igħid Manfred Barthel fil-​ktieb tiegħu The Jesuits​—History & Legend of the Society of Jesus: “Il-​kumitat informa lil van der Steen li huma kienu lesti li jwarrbu l-​ħtieġa tat-​tul, imma biss bil-​patt li hu jitgħallem igħid il-​Bibbja kollha kemm hi bl-​amment. L-​istorja ma kinitx tkun taʼ min isemmiha li kieku van der Steen ma aċċettax din it-​talba kemmxejn prużuntuża.” Xi sforz kien meħtieġ biex jimmemorizza l-​Bibbja kollha kemm hi! Ċertament, madankollu, huwa bil-​wisq iżjed importanti li wieħed jifhem il-​Kelma t’Alla milli li jitgħallimha bl-​amment.

8. X’se jgħinna biex nibbenefikaw minn tagħlim divin u nuru għerf veru?

⁸ Jekk irridu nibbenefikaw bis-​sħiħ mit-​tagħlim divin u b’hekk nuru għerf veru, għandna bżonn għarfien eżatt taʼ l-​Iskrittura. Irridu wkoll inkunu ggwidati mill-​ispirtu qaddis, jew forza attiva, taʼ Jehovah. Permezz taʼ dan se nkunu nistgħu nitgħallmu veritajiet profondi, “l-​affarijiet profondi t’Alla.” (1 Korintin 2:10) Għalhekk, ħalli b’mod diliġenti nistudjaw il-​Ktieb il-​kbir taʼ istruzzjoni taʼ Jehovah u nitolbu għall-​gwida tiegħu permezz taʼ l-​ispirtu qaddis. F’armonija maʼ Proverbji 2:1-6, ħalli noqogħdu attenti għall-​għerf, immejlu lil qalbna lejn id-​dehen, u ngħajtu għall-​fehma. Għandna bżonn nagħmlu dan bħal li kieku qegħdin infittxu għal teżori moħbijin, għax imbagħad biss se ‘nifhmu l-​biżaʼ taʼ Jehovah u nsibu l-​istess għarfien t’Alla.’ Konsiderazzjoni taʼ xi trijonfi u benefiċċji tat-​tagħlim divin se ssebbaħ l-​apprezzament tagħna għall-​għerf mogħti minn Alla.

Fehma Progressiva

9, 10. Alla x’qal f’​Ġenesi 3:15, u x’inhi l-​fehma xierqa taʼ dawk il-​kelmiet?

⁹ It-​tagħlim divin jittrijonfa billi jagħti lin-​nies taʼ Jehovah fehma progressiva taʼ l-​Iskrittura. Per eżempju, tgħallimna li kien Satana x-​Xitan li tkellem permezz tas-​serpent f’Għeden u b’mod falz akkuża li Alla kien gideb meta Hu qal li l-​mewt kellha tkun il-​kastig talli kielu l-​frotta pprojbita. Madankollu, aħna naraw li d-​diżubbidjenza lejn Alla Jehovah tassew ġabet mewt fuq ir-​razza umana. (Ġenesi 3:1-6; Rumani 5:12) Madankollu, Alla ta tama lill-​umanità meta qal lis-​serpent, u b’hekk lil Satana: “Se nqiegħed għadwa bejnek u l-​mara u bejn iż-​żerriegħa tiegħek u ż-​żerriegħa tagħha. Hu se jbenġlek fir-​ras u int se tbenġlu fil-​għarqub.”—Ġenesi 3:15.

¹⁰ Dawk il-​kelmiet inkludew sigriet li ġie rrivelat b’mod progressiv permezz tat-​tagħlim divin. Jehovah għallem lill-​poplu tiegħu li t-​tema l-​iktar importanti tal-​Bibbja hija l-​ivvindikar tas-​sovranità tiegħu permezz taż-​Żerriegħa, billi dixxendent taʼ Abraham u David ikollu d-​dritt legali għall-​ħakma tas-​Saltna. (Ġenesi 22:15-18; 2 Samwel 7:12, 13; Eżekjel 21:25-27) L-​Għalliem Grandjuż tagħna għallimna li Ġesù Kristu huwa ż-​Żerriegħa primarja tal-​“mara,” l-​organizzazzjoni universali t’Alla. (Galatin 3:16) Minkejja kull prova li Satana ġab fuqu, Ġesù żamm l-​integrità​—saħansitra sal-​mewt, it-​tbenġil taż-​Żerriegħa fil-​għarqub. Tgħallimna wkoll li 144,000 werrieta mseħbin tas-​Saltna minn fost il-​bnedmin se jieħdu sehem maʼ Kristu f’li jfarrku r-​ras taʼ Satana, “is-​serpent oriġinali.” (Rivelazzjoni 14:​1-4; 20:2; Rumani 16:20; Galatin 3:29; Efesin 3:4-6) Kemm napprezzawh għarfien bħal dan tal-​Kelma t’Alla!

Ġod-​Dawl Taʼ L-​Għaġeb T’Alla

11. Għala jistaʼ jingħad li tagħlim divin jittrijonfa billi jġib lin-​nies fid-​dawl spiritwali?

¹¹ It-​tagħlim divin jittrijonfa billi jġib lin-​nies fid-​dawl spiritwali. Kristjani midlukin kellhom dik l-​esperjenza bi twettieq taʼ l-​1 Pietru 2:9: “Intom ‘razza magħżula, saċerdozju rjali, ġens qaddis, poplu għal pussess speċjali, biex għandkom tiddikjaraw barra l-​pajjiż l-​affarijiet eċċellenti’ taʼ dak li sejħilkom ’il barra mid-​dlam għal ġod-​dawl taʼ l-​għaġeb tiegħu.” Illum, dawl mogħti minn Alla huwa gawdut ukoll minn “folla kbira” li se jgħixu għal dejjem f’ġenna taʼ l-​art. (Rivelazzjoni 7:9; Luqa 23:43) Hekk kif Alla jgħallem lin-​nies tiegħu, Proverbji 4:18 jagħti prova li hu veru: “[I]l-passaġġ taʼ l-​uħud twajbin hu bħad-​dawl qawwi li qiegħed isir iktar u iktar qawwi sakemm il-​jum jiġi stabbilit fis-​sod.” Dan il-​proċess taʼ tagħlim progressiv jirfina l-​fehma tagħna taʼ tagħlim divin, saħansitra bħalma studenti jimxu ’l quddiem minħabba l-​għajnuna mill-​aħjar taʼ għalliem meta jistudjaw il-​grammatika, l-​istorja, jew xi suġġett ieħor.

12, 13. Tagħlim divin ipproteġa lin-​nies taʼ Jehovah kontra liema perikli duttrinali?

¹² Trijonf ieħor tat-​tagħlim divin huwa li lill-​umlin li jirċevuh jipproteġihom mit-​“tagħlim tad-​demonji.” (1 Timotew 4:1) Mill-​banda l-​oħra, ħares lejn il-​Kristjaneżmu! Lura fis-​sena 1878, il-​prelat Kattoliku Ruman John Henry Newman kiteb: “Billi fdaw fil-​qawwa tal-​Kristjanità biex tirreżisti l-​infezzjoni tal-​ħażen, u biex tbiddel lill-istess strumenti u oġġetti u prattiċi marbutin mal-​qima tad-​demonji għal użu evanġeliku, . . . il-​ħakkiema tal-​Knisja minn żminijiet bikrin kienu lesti, jekk tqum l-​okkażjoni, li jadottaw, jew jimitaw, jew jawtorizzaw ir-​riti u d-​drawwiet eżistenti tal-​popolin, kif ukoll il-​filosofija tal-​klassi edukata.” Newman żied li affarijiet bħalma huma l-​ilma mbierek, l-​ilbies tal-​qassisin, u x-​xbihat kienu “kollha taʼ oriġini pagan, u ġew imqaddsin billi ġew adottati fil-​Knisja.” In-​nies t’Alla huma grati tabilħaqq li t-​tagħlim divin jipproteġihom minn apostasija bħal din. Dan jegħleb lil kull forma taʼ demoniżmu.—Atti 19:20.

¹³ It-​tagħlim divin jittrijonfa fuq l-​iżball reliġjuż b’kull mod. Bħala dawk mgħallmin minn Alla, per eżempju, ma nemmnux fit-​Trinità imma nirrikonoxxu li Jehovah huwa l-​Iktar Għoli, Ġesù huwa Ibnu, u l-​ispirtu qaddis huwa l-​forza attiva t’Alla. Ma nibżgħux min-​nar taʼ l-​infern, għax nirrealizzaw li l-​infern tal-​Bibbja huwa l-​qabar komuni tal-​bnedmin. U fil-​waqt li r-​reliġjonisti foloz igħidu li r-​ruħ umana hija immortali, aħna nafu li l-​mejtin m’huma konxji taʼ xejn affattu. Nistgħu nsemmu għadd kbir taʼ veritajiet miksubin permezz tat-​tagħlim divin. X’barka hi li nkunu ħelsin mill-​jasar spiritwali taħt Babilonja l-​Kbira, l-​imperu dinji taʼ reliġjon falza!—Ġwann 8:​31, 32; Rivelazzjoni 18:2, 4, 5.

14. Il-​qaddejja t’Alla għala jistgħu jkomplu jimxu fid-​dawl spiritwali?

¹⁴ Minħabba li t-​tagħlim divin jittrijonfa fuq l-​iżball reliġjuż, il-​qaddejja t’Alla permezz tiegħu jistgħu jimxu fid-​dawl spiritwali. Hu bħal li kieku jisimgħu kelma warajhom li tgħid: “Din hi l-​mogħdija. Imxu fiha.” (Isaija 30:21) It-​tagħlim t’Alla jipproteġi wkoll lill-​qaddejja tiegħu minn raġunar falz. Meta “appostli foloz” kienu qegħdin jikkaġunaw inkwiet fil-​kongregazzjoni f’Korintu, l-​appostlu Pawlu kiteb: “L-​armi tal-​gwerra tagħna m’humiex tal-​laħam, imma qawwijin permezz t’Alla biex jegħlbu affarijiet li jkunu daħlu fil-​fond ħafna. Għax qegħdin naqilbu taʼ taħt fuq raġunar u kull ħaġa mkabbra li titqajjem kontra l-​għarfien t’Alla; u qegħdin inġibu kull ħsieb fi qbid biex nagħmluh ubbidjenti lejn il-​Kristu.” (2 Korintin 10:4, 5; 11:13-15) Raġunar kuntrarju għat-​tagħlim divin jiġi maqlub taʼ taħt fuq permezz taʼ l-​istruzzjoni li tingħata bi ħlewwa fil-​kongregazzjoni u permezz taʼ l-​ippridkar taʼ l-​aħbar tajba lil dawk taʼ barra.—2 Timotew 2:24-26.

Qima Bl-​Ispirtu U L-​Verità

15, 16. Xi jfisser li tqim lil Jehovah bl-​ispirtu u l-​verità?

¹⁵ Hekk kif ix-​xogħol taʼ l-​ippridkar tas-​Saltna jimxi ’l quddiem, it-​tagħlim divin jittrijonfa f’li juri lill-​ġwejdin kif iridu jqimu lil Alla “bl-​ispirtu u l-​verità.” Ħdejn il-​bir taʼ Ġakobb qrib il-​belt taʼ Sikar, Ġesù qal lil mara Samaritana li hu setaʼ jipprovdi ilma li kien jagħti ħajja taʼ dejjem. Billi rrefera għas-​Samaritani, hu żied: “Intom tqimu dak li ma tafux . . . Is-​siegħa ġejja, u hi issa, meta l-​veri adoraturi se jqimu lill-​Missier bl-​ispirtu u l-​verità, għax, tabilħaqq, il-​Missier qiegħed ifittex lil uħud bħal dawn biex iqimuh.” (Ġwann 4:7-15, 21-23) Ġesù mbagħad identifika lilu nnifsu bħala l-​Messija.

¹⁶ Imma kif nistgħu nqimu lil Alla bl-​ispirtu? Billi nagħtu qima animata minn qlub grati mimlijin bl-​imħabba t’Alla bbażata fuq għarfien eżatt tal-​Kelma tiegħu. Nistgħu nqimuh bil-​verità billi niċħdu l-​qerq reliġjuż u nagħmlu r-​rieda divina, kif irrivelata fil-​Ktieb il-​kbir taʼ istruzzjoni taʼ Jehovah.

Trijonfanti Fuq Provi U Fuq Id-​Dinja

17. Kif tistaʼ tagħti prova li tagħlim divin għen lill-​qaddejja taʼ Jehovah jiffaċċjaw il-​provi?

¹⁷ Meta n-​nies t’Alla jiffaċċjaw provi, it-​tagħlim divin jittrijonfa darba wara l-​oħra. Ikkunsidra dan: Fil-​bidu tat-​II Gwerra Dinjija, f’Settembru taʼ l-​1939, il-​qaddejja taʼ Jehovah kellhom bżonn dehen speċjali fil-​Ktieb il-​kbir taʼ istruzzjoni tiegħu. Taʼ għajnuna kbira kien artiklu f’The Watchtower taʼ l-​1 taʼ Novembru, 1939, li b’mod ċar ippreżenta tagħlim divin fuq il-​kwistjoni tan-newtralità Kristjana. (Ġwann 17:16) Bl-​istess mod, kmieni fis-​snin 60, artikli tal-​Watchtower dwar sottomissjoni relattiva lejn “awtoritajiet superjuri” governattivi għenu lin-​nies t’Alla biex jaġixxu fi qbil mat-​tagħlim divin meta kienu ffaċċjati minn taqlib soċjali.—Rumani 13:1-7; Atti 5:29.

18. Uħud li kienu jistqarru li kienu Kristjani fit-​tieni u t-​tielet seklu E.K. kif kienu jħarsu lejn tgawdija taʼ livelli morali baxxi, u tagħlim divin liema għajnuna jipprovdi f’dak ir-​rigward illum?

¹⁸ It-​tagħlim divin igħinna nittrijonfaw fuq it-​tentazzjonijiet, bħalma huwa li niġu mħajrin biex infittxu tgawdija taʼ livell morali baxx. Innota x’intqal minn dawk li kienu jgħidu li huma Kristjani fit-​tieni u fit-​tielet sekli taʼ l-​Era Komuni tagħna. Tertulljanu kiteb: “M’għandna xejn x’naqsmu, fid-​diskors, fil-​vista jew fis-​smigħ, mal-​ġenn taċ-​ċirku, in-​nuqqas taʼ mistħija tat-​teatru, is-​salvaġiżmu taʼ l-​arena.” Kittieb ieħor taʼ dak il-​perijodu staqsa: “Kristjan leali x’jagħmel fost dawn l-​affarijiet, ladarba hu lanqas biss ma jistaʼ jaħseb dwar il-​ħażen? Għala jieħu gost bir-​rappreżentazzjonijiet taż-​żina?” Avolja dawn il-​kittieba għexu xi snin wara l-​Kristjani taʼ l-​ewwel seklu, huma kkundannaw ix-​xalar taʼ livell morali baxx. Illum, it-​tagħlim divin jagħtina l-​għerf biex naħarbu tgawdija oxxena, immorali, u vjolenti.

19. Tagħlim divin kif igħinna nittrijonfaw fuq id-​dinja?

¹⁹ Li naġixxu fi qbil mat-​tagħlim divin igħinna biex nittrijonfaw fuq id-​dinja nfisha. Iva, li napplikaw it-​tagħlim taʼ l-​Għalliem Grandjuż tagħna jagħmilna rebbiħin fuq l-​influwenzi mill-​agħar taʼ din id-​dinja, li qiegħda taħt il-​qawwa taʼ Satana. (2 Korintin 4:4; 1 Ġwann 5:19) Efesin 2:1-3 igħid li Alla għamilna ħajjin għalkemm konna mejtin fin-​nuqqasijiet u d-​dnubiet meta mxejna skond il-​ħakkiem taʼ l-​awtorità taʼ l-​arja. Niżżu ħajr lil Jehovah li t-​tagħlim divin igħinna biex nittrijonfaw fuq ix-​xewqat tad-​dinja u l-​ispirtu li joħroġ mingħand l-​għadu tiegħu u tagħna​—il-​qarrieq il-​prim, Satana x-​Xitan!

20. Liema mistoqsijiet jixirqilhom iktar konsiderazzjoni?

²⁰ Biċ-​ċar, allura, it-​tagħlim divin jittrijonfa b’ħafna modi. Fil-​fatt, ikun impossibbli li ssemmi t-​trijonfi tiegħu kollha. Jeffettwa lil nies madwar id-​dinja kollha. Imma x’inhu jagħmel għalik? It-​tagħlim divin kif qed jeffettwa lil ħajtek? [w94 02/01]

X’Tgħallimt Int?

◻ Il-​veru għerf kif jistaʼ jiġi definit?

◻ Alla x’irrivela b’mod progressiv rigward Ġenesi 3:15?

◻ Tagħlim divin kif ittrijonfa f’affarijiet spiritwali?

◻ Xi jfisser li tqim lil Alla bl-​ispirtu u l-​verità?

◻ Tagħlim divin kif għen lill-​qaddejja taʼ Jehovah biex jittrijonfaw fuq il-​provi u fuq id-​dinja?

[Stampi f’paġna 23]

Ġesù żamm l-​integrità sal-​mewt—it-​tbenġil taż-​Żerriegħa fil-​għarqub