L-​Aħbar Tajba tas-​Saltna X’Inhi?

Is-​sena l-​oħra f’235 pajjiż madwar id-​dinja kien hemm 6,035,564 ruħ, kemm żgħażagħ u kemm xjuħ, li qattgħu 1,171,270,425 siegħa jitkellmu m’oħrajn dwarha. Dan m’għamluhx bil-​kliem biss, imma wkoll billi ħallew f’idejn in-​nies iktar minn 700 miljun biċċa letteratura biex jirriklamawha jew jispjegawha. Qassmu wkoll eluf taʼ awdjokasetts u vidjokasetts biex ixerrduha maʼ kullimkien. Fuqiex qed nitkellmu?

QED nitkellmu fuq l-​aħbar tajba tas-​Saltna t’Alla. Verament, “dan l-​evanġelju tas-​Saltna” qatt qabel fl-​istorja tal-​bniedem ma ġie pridkat fuq skala hekk kbira kif qed narawh jiġi pridkat illum.—Mattew 24:14.

Dawk li qed jagħmlu dan ix-​xogħol taʼ l-​ippridkar u tat-​tagħlim madwar id-​dinja huma kollha volontieri. F’għajnejn in-​nies forsi jidhru li m’humiex kwalifikati biżżejjed biex jagħmlu dan ix-​xogħol. Mela, minfejn qed iġibu dan il-​kuraġġ u s-​suċċess tagħhom? Il-​qawwa taʼ l-​aħbar tajba tas-​Saltna hi fattur ewlieni, għax din hi aħbar dwar barkiet li se jiġu fuq il-​bnedmin. Dawn huma barkiet li l-​bnedmin kollha tant jixtiquhom—il-​ferħ, il-​ħelsien mit-​tbatija ekonomika, gvern tajjeb, paċi u sigurtà. U hemm xi ħaġa oħra li l-​biċċa l-​kbira min-​nies lanqas biss joħolmuha—il-​ħajja taʼ dejjem! Din hi tabilħaqq aħbar tajba għal min qed ifittex it-​tifsira tal-​ħajja u l-​iskop tagħha. Iva, dawn il-​barkiet kollha, u iktar minn hekk, jistgħu jkunu tiegħek jekk int taċċetta u taġixxi fi qbil mal-​proklamazzjoni taʼ l-​aħbar tajba tas-​Saltna.

X’Inhi s-​Saltna?

Iżda, x’inhi s-​Saltna li qed tixxandar bħala aħbar tajba? Hija dik is-​Saltna li miljuni taʼ nies ġew mgħallmin jitolbu għaliha b’dan il-​kliem familjari: “Missierna, li inti fis-​smewwiet, jitqaddes ismek, tiġi saltnatek, ikun li trid int, kif fis-​sema, hekkda fl-​art.”—Mattew 6:​9, 10.

Din hi s-​Saltna li tkellem dwarha l-​profeta Ebrew Danjel iktar minn 25 seklu ilu meta kiteb: “Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha, waqt li hi tibqaʼ wieqfa għal dejjem.”—Danjel 2:44.

B’hekk, l-​aħbar tajba hi dwar is-​Saltna, jew il-​gvern, li biha Alla se jelimina l-​ħażen. Din, imbagħad, se taħkem fuq l-​art kollha fil-​paċi u se ġġiegħel l-​iskop oriġinali li l-​Ħallieq kellu għall-​umanità u għall-​art isir realtà.—Ġenesi 1:28.

“Is-​Saltna tas-​Smewwiet Waslet”

Kważi elfejn sena ilu, l-​aħbar tajba tas-​Saltna xxandret pubblikament għall-​ewwel darba minn raġel dedikat li d-​dehra u x-​xeħta tiegħu kienu jispikkaw. Dan ir-​raġel kien Ġwanni l-​Għammied, bin il-​qassis Lhudi Żakkarija u martu Eliżabetta. Ġwanni kien jilbes libsa tax-​xagħar tal-​ġemel, bi ħżiem tal-​ġild madwar qaddu, bħalma kien jilbes il-​profeta Elija, li kien jiffigurah bil-​quddiem. Imma kien il-​messaġġ tiegħu li ġibed l-​attenzjoni taʼ ħafna nies. “Indmu, għax is-​saltna tas-​smewwiet waslet.”—Mattew 3:​1-6.

Is-semmiegħa taʼ Ġwanni kienu Lhud, li kienu jgħidu li huma adoraturi taʼ dak Alla veru, Jehovah. Bħala ġens, huma kienu rċivew il-​patt tal-​Liġi permezz taʼ Mosè madwar 1,500 sena qabel. It-​tempju mill-​isbaħ, li fih kienu jiġu offruti sagrifiċċji skond kif kienet titlob il-​Liġi, kien għadu wieqaf f’Ġerusalemm. Il-​Lhud kienu ċerti li l-​qima tagħhom kienet tajba f’għajnejn Alla.

Madankollu, x’ħin semgħu lil Ġwanni, xi nies bdew jirrealizzaw li r-​reliġjon tagħhom ma kinitx dik li ħasbu huma. Il-​kultura u l-​filosofija Griega kienu daħlu bil-​mod il-​mod u saru parti mit-​tagħlim reliġjuż Lhudi. Il-​liġi li kienu rċivew mingħand Alla permezz taʼ Mosè ma baqgħetx pura, u saret saħansitra ma tiswa xejn, minħabba l-​preċetti u t-​tradizzjonijiet tal-​bnedmin. (Mattew 15:​5, 6 [15:​6, NW]) Il-​biċċa l-​kbira min-​nies, li ġew imqarrqin mill-​mexxejja reliġjużi tagħhom bla qalb u bla ħniena, ma baqgħux iqimu lil Alla b’mod aċċettabbli. (Ġakbu 1:27) Kellhom bżonn jindmu mid-​dnubiet li għamlu kontra Alla u kontra l-​patt tal-​Liġi.

Dak iż-​żmien, ħafna mil-​Lhud kienu qed jistennew il-​miġja tal-​Messija, jew il-​Kristu, imwiegħed u xi wħud kienu qed jaħsbu dwar Ġwanni “jekk kienx hu l-​[“Kristu,” NW].” Madankollu, Ġwanni ċaħad li kien hu, u minflok idderiġiehom lejn xi ħaddieħor, li dwaru qal: “Ma jistħoqqlix inħollu l-​qfieli tal-​qorq tiegħu.” (Luqa 3:​15, 16) Lid-​dixxipli tiegħu Ġwanni introduċielhom lil Ġesù billi ddikjara: “Araw il-​Ħaruf taʼ Alla, li jneħħi d-​dnub tad-​dinja.”—Ġwann 1:29.

Din kienet tabilħaqq aħbar tajba, għax Ġwanni kien fil-​fatt qed juri lin-​nies kollha t-​triq għall-​ħajja u għall-​hena—Ġesù, dak li “jneħħi d-​dnub tad-​dinja.” Bħala dixxendenti taʼ Adam u Eva, il-​bnedmin kollha jitwieldu taħt it-​tirannija tad-​dnub u l-​mewt. Rumani 5:19 jispjega: “Għax kif bid-​diżubbidjenza taʼ bniedem wieħed [Adam] il-​ħafna saru midinbin, hekk ukoll bl-​ubbidjenza taʼ wieħed [Ġesù] il-​ħafna jsiru ġusti.” Ġesù, bħal ħaruf tas-​sagrifiċċju, kellu “jneħħi d-​dnub” u jreġġaʼ lura l-​istat tal-​biki tal-​kundizzjonijiet li l-​umanità tinsab fih. “Il-​ħlas tad-​dnub hu l-​mewt,” tispjega l-​Bibbja, “imma d-​don li tana Alla huwa l-​ħajja taʼ dejjem fi Kristu Ġesù Sidna.”—Rumani 6:23.

Bħala bniedem perfett—fil-​fatt, l-​aqwa bniedem li qatt għex—Ġesù beda jxandar l-​aħbar tajba. Ir-​rakkont tal-​Bibbja f’Mark 1:14, 15 jgħidilna: “Wara li arrestaw lil Ġwanni, Ġesù mar il-​Galilija jxandar l-​Evanġelju taʼ Alla u jgħid: ‘Iż-​żmien huwa mitmum, u s-​Saltna taʼ Alla waslet: indmu u emmnu fl-​Evanġelju.’”

Dawk li wieġbu għall-​messaġġ taʼ Ġesù u eżerċitaw fidi fl-​aħbar tajba kienu mberkin bil-​kbir. Ġwann 1:12 jgħid: “Lil dawk li laqgħuh tahom is-​setgħa li jsiru wlied Alla, dawk li jemmnu f’ismu.” Ladarba kienu t-​tfal, jew l-​ulied, t’Alla, huma kien jistħoqqilhom jirċievu l-​premju taʼ ħajja taʼ dejjem.—1 Ġwann 2:25.

Imma l-​privileġġ li jirċievu l-​barkiet tas-​Saltna ma kienx miftuħ biss għan-​nies fl-​ewwel seklu. Bħalma diġà ssemma, l-​aħbar tajba tas-​Saltna t’Alla llum qed tiġi mxandra u mgħallma madwar l-​art abitata kollha. Għalhekk il-​barkiet tas-​Saltna għadhom jistgħu jinkisbu. X’għandek tagħmel int biex tirċievi dawn il-​barkiet? L-​artiklu li jmiss se jispjega dan.