Kif il-Verità Teħlisna
1 F’okkażjoni minnhom, Ġesù qal lil-Lhud li kienu emmnu fih: “Tagħrfu l-verità u l-verità teħliskom.” (Ġw. 8:32) Kien qed jitkellem dwar ħelsien li jissupera s-sempliċi libertajiet ċivili, ħelsien li huwa disponibbli għal kulħadd—sinjur jew fqir, taʼ skola jew le. Ġesù għallem verità li kellha ġġib ħelsien mid-dnub u l-mewt. Bħalma spjega Ġesù, “kull min jagħmel id-dnub huwa lsir tad-dnub.” (Ġw. 8:34) Kemm nixxennqu għal dak iż-żmien meta l-bnedmin ubbidjenti kollha ‘jkunu meħlusa mill-jasar tat-taħsir u jiksbu l-ħelsien tal-glorja taʼ wlied Alla’!—Rum. 8:21.
2 Il-verità rigward Ġesù u l-irwol tiegħu fit-twettiq taʼ l-iskop t’Alla ġġib ħelsien bħal dan. Din tinkludi għarfien dwar is-sagrifiċċju taʼ fidwa li ħallas għalina. (Rum. 3:24) Saħansitra fil-preżent, jekk b’ubbidjenza naċċettaw u nissottomettu lilna nfusna għall-veritajiet tal-Bibbja, sa ċertu punt se nkunu nistgħu ngawdu ħelsien mill-biżaʼ, min-niket, u minn kull tip taʼ prattiċi taʼ ħsara.
3 Ħelsien mill-Biżaʼ u n-Niket: M’għandniex għalfejn nitnikktu dwar il-kundizzjonijiet tad-dinja għax nifhmu għala jeżisti l-ħażen u nafu li dalwaqt mhux se jibqaʼ iktar. (Salm 37:10, 11; 2 Tim. 3:1; Apk. 12:12) Barra minn hekk, il-verità teħlisna minn tagħlim falz dwar il-kundizzjoni tal-mejtin. Aħna nafu li l-mejtin ma jistgħux iweġġgħuna, nafu wkoll li m’humiex ibatu f’turment etern, u li Alla ma jiħodhomx biex ikunu miegħu fil-qasam taʼ l-ispirti.—Koħ. 9:5; Atti 24:15.
4 Verità bħal din għenet lil wieħed missier u lil waħda omm meta t-tifel tagħhom miet f’aċċident. “Hemm ċertu vojt ġewwa ħajjitna li ma jistax jimtela sakemm nerġgħu naraw lit-tifel tagħna permezz taʼ l-irxoxt,” qalet l-omm. “Iżda nafu li l-uġigħ li qed inħossu huwa biss temporanju.”
5 Ħelsien minn Prattiċi taʼ Ħsara: Il-verità tal-Bibbja tistaʼ tbiddel il-ħsieb u l-personalità taʼ individwu, u dan jirriżulta f’ħelsien minn problemi li jistgħu jiġu evitati. (Efes. 4:20-24) Li nkunu onesti u beżlin jistaʼ jnaqqas il-faqar. (Prov. 13:4) Meta nuru mħabba li tissagrifika lilha nfisha ntejbu r-relazzjoni tagħna m’oħrajn. (Kol. 3:13, 14) Jekk nirrispettaw l-arranġament Kristjan taʼ l-istat taʼ kap, id-diffikultajiet fil-familja se jonqsu. (Efes. 5:33–6:1) Meta nevitaw is-sokor, l-immoralità sesswali, it-tipjip, u l-vizzju tad-drogi, dan se jgħinna biex ikollna saħħa tajba.—Prov. 7:21-23; 23:29, 30; 2 Kor. 7:1.
6 Wieħed żagħżugħ irnexxielu jieqaf mill-vizzju tad-drogi wara disaʼ snin. Darba minnhom iltaqaʼ maʼ pubblikatur li kien qed jieħu sehem fl-għoti taʼ xiehda fit-toroq. Iż-żagħżugħ aċċetta l-letteratura, u saru xi arranġamenti biex il-pubblikatur jerġaʼ jżuru d-dar. Inbeda studju tal-Bibbja. Xahrejn wara, iż-żagħżugħ waqaf kompletament milli jieħu d-drogi, u wara tmien xhur jistudja, tgħammed. Meta rawh li waqaf mill-abbuż tad-drogi, ħuh u l-mara taʼ ħuh tqanqlu biex jibdew jistudjaw il-Bibbja.
7 Għin lil Oħrajn Jiksbu l-Ħelsien: Dawk li ilhom ilsiera taʼ tagħlim falz għal żmien twil jistgħu jsibuha diffiċli biex jifhmu l-ħelsien li toffri l-Kelma t’Alla. Biex dawn il-qlub jintlaħqu, jistaʼ jkun hemm bżonn taʼ sforz speċjali u preparazzjoni tajba min-naħa taʼ l-għalliem. (2 Tim. 4:2, 5) Dan m’huwiex iż-żmien biex innaqqsu mix-xogħol tagħna taʼ li ‘nħabbru l-ħelsien lill-imjassrin.’ (Is. 61:1) Il-ħelsien Kristjan huwa prezzjuż. Li takkwistah ifisser ħajja taʼ dejjem.—1 Tim. 4:16.