Nistennew bi ‘Stennija Ħerqanaʼ

“Il-​ħlejjaq kollha qegħdin jistennew ħerqana r-​rivelazzjoni taʼ wlied Alla.”—RUMANI 8:19.

1. Liema similarità teżisti bejn is-​sitwazzjoni tal-​Kristjani llum u dik tal-​Kristjani taʼ l-​ewwel seklu?

IS-​SITWAZZJONI tal-​Kristjani veri llum tixbah lil dik tal-​Kristjani taʼ l-​ewwel seklu. Il-​qaddejja taʼ Jehovah taʼ dak iż-​żmien kienu megħjunin permezz taʼ profezija biex jidentifikaw meta kellu jidher il-​Messija. (Danjel 9:24-26) L-​istess profezija bassret il-​qerda taʼ Ġerusalemm imma ma kien fiha ebda elementi li setgħu jgħinu lill-​Kristjani biex ikunu jafu bil-​quddiem meta dik il-​belt kellha tiġi meqruda. (Danjel 9:26b, 27) Bl-​istess mod, kienet profezija li ġagħlet providenzjalment lil xi studenti tal-​Bibbja sinċieri fis-​seklu 19 ikunu fi stennija. Billi rabtu s-​“sebaʼ żminijiet” taʼ Danjel 4:22 [Danjel 4:25, NW] maʼ “żmien il-​Ġentili,” dawn antiċipaw li Kristu kellu jirċievi l-​qawwa tas-​Saltna fl-​1914. (Luqa 21:24, Karm Żammit; Eżekjel 21:25-27) Fil-​waqt li l-​ktieb taʼ Danjel fih ħafna profeziji, l-​ebda waħda minnhom ma twassal lill-​istudenti tal-​Bibbja tal-​lum biex jikkalkulaw eżatt meta se tiġi meqruda s-​sistema taʼ Satana kollha kemm hi. (Danjel 2:31-44; 8:23-25; 11:36, 44, 45) Madankollu, dan dalwaqt se jseħħ, għaliex qegħdin ngħixu fiż-​“żmien taʼ l-​aħħar.”—Danjel 12:4.a

Għassa Stretta Matul il-​Preżenza taʼ Kristu

2, 3. (a) Liema ħaġa sservi bħala l-​evidenza ewlenija li aħna qegħdin ngħixu matul il-​preżenza taʼ Kristu bil-​qawwa taʼ sultan? (b) X’juri li l-​Kristjani kellhom jibqgħu għassa matul il-​preżenza taʼ Ġesù Kristu?

² Veru li profezija poġġiet lill-​Kristjani fi stat taʼ stennija qabel ma Kristu ġie investit bil-​qawwa tas-​Saltna fl-​1914. Imma s-​“sinjal” li ta Kristu dwar il-​preżenza tiegħu u l-​konklużjoni tas-​sistema t’affarijiet kien jikkonsisti fi ġrajjiet. U l-​biċċa l-​kbira minnhom kellhom jidhru wara li tkun bdiet il-​preżenza tiegħu. Ġrajjiet bħalma huma​—gwerer, skarsezzi taʼ ikel, terremoti, pestilenzi, żjieda fil-​ksur tal-​liġi, persekuzzjoni tal-​Kristjani, u l-​ippridkar taʼ l-​aħbar tajba tas-​Saltna mad-​dinja kollha—​iservu bħala l-​evidenza ewlenija li issa qegħdin ngħixu matul il-​preżenza taʼ Kristu bil-​qawwa taʼ sultan.—Mattew 24:3-14; Luqa 21:10, 11.

³ Madankollu, is-​sugu kollu tal-​parir li Ġesù ta lid-​dixxipli tiegħu qabel ma ħalliehom kien: “Kunu għajnejkom miftuħa, ishru.” (Mark 13:33, 37; Luqa 21:36) Qari bir-​reqqa tal-​kuntest taʼ dawn l-​eżortazzjonijiet biex wieħed iżomm għassa stretta juri li Kristu ma kienx qed jitkellem primarjament dwar żamma taʼ għassa stretta għas-​sinjal tal-​bidu tal-​preżenza tiegħu. Minflok, hu kien qed jordna lid-​dixxipli veri tiegħu biex iżommu għassa stretta matul il-​preżenza tiegħu. Għal liema ħaġa kellhom il-​Kristjani veri jibqgħu għassa?

4. Liema skop kellu jaqdi s-​sinjal li ta Ġesù?

⁴ Ġesù ta l-​profezija kbira tiegħu bi tweġiba għall-​mistoqsija: “Dan meta għad jiġri [ġrajjiet li kienu jwasslu għall-​qerda tas-​sistema t’affarijiet Lhudija]? U x’se jkun is-​sinjal tal-​miġja [“preżenza,” NW] tiegħek u taʼ tmiem id-​dinja?” (Mattew 24:3) Is-​sinjal imbassar kellu jservi biex jidentifika mhux biss il-​preżenza taʼ Kristu imma wkoll ġrajjiet li kienu jwasslu għat-​tmiem tas-​sistema preżenti t’affarijiet mill-​agħar.

5. Ġesù kif wera li fil-​waqt li kellu jkun preżenti spiritwalment, hu se jkun għadu “ġej”?

⁵ Ġesù wera li matul il-​“preżenza” (Grieg, pa·rou·siʹa) tiegħu, hu kellu jiġi b’qawwa u glorja. Rigward din il-​“miġja” (indikata b’għamliet tal-​verb Grieg erʹkho·mai), hu ddikjara: “Mbagħad jidher fis-​sema s-​sinjal taʼ Bin il-​bniedem, il-​popli kollha taʼ l-​art jibdew jagħtu fuq sidirhom, u jaraw lil Bin il-​bniedem ġej fuq is-​sħab tas-​sema b’qawwa u glorja kbira. . . . Tgħallmu din il-​parabbola mis-​siġra tat-​tin. Meta l-​fergħa tirtab u tarmi l-​weraq, intom tintebħu li s-​sajf fil-​qrib. Hekk ukoll meta taraw dan kollu, kunu afu li hu [Kristu] fil-​qrib, fil-​bieb. . . . Ishru, mela, għax ma tafuhx il-​jum li fih jiġi Sidkom. . . . Mela kunu lesti intom ukoll, għax qatt ma tistgħu tobsru s-​siegħa li fiha jiġi Bin il-​bniedem.” (Korsiv tagħna.)—Mattew 24:30, 32, 33, 42, 44.

Għala Jiġi Ġesù Kristu?

6. Kif se sseħħ il-​qerda taʼ “Babilonja l-​Kbira”?

⁶ Għalkemm preżenti bħala Sultan mill-​1914 ’l hawn, Ġesù Kristu għad irid jiġġudika lil sistemi u individwi qabel ma jesegwixxi ġudizzju fuq dawk li jsib li jkunu mill-​agħar. (Qabbel it-2 Korintin 5:10.) Jehovah dalwaqt se jpoġġi l-​ħsieb fl-​imħuħ tal-​ħakkiema politiċi biex jeqirdu lil “Babilonja l-​Kbira,” l-​imperu dinji taʼ reliġjon falza. (Apokalissi 17:4, 5, 16, 17) L-​appostlu Pawlu qal speċifikament li Ġesù Kristu se jeqred lill-​“Bniedem tad-​dnub”​—il-​kleru apostat tal-​Kristjaneżmu, parti prominenti minn “Babilonja l-​Kbira.” Pawlu kiteb: “Mbagħad jinkixef il-​Ħażin, u l-​Mulej Ġesù joqtlu b’nifs fommu u jeqirdu bid-​dija tal-​preżenza tiegħu.”—2 Tessalonikin 2:3, 8.

7. Meta Bin il-​bniedem jasal fil-​glorja tiegħu, liema ġudizzju se jaqtaʼ?

⁷ Fil-​futur qarib, Kristu se jiġġudika lin-​nies tal-​ġnus fuq il-​bażi taʼ kif dawn ikunu aġixxew maʼ ħutu li jkunu għadhom fuq l-​art. Naqraw: “Meta jiġi Bin il-​bniedem fil-​glorja tiegħu u bl-​anġli kollha miegħu, mbagħad joqgħod fuq it-​tron glorjuż tiegħu. U quddiemu jinġabru l-​ġnus kollha, u hu jifridhom minn xulxin, bħalma r-​ragħaj jifred in-​nagħaġ mill-​mogħoż: in-​nagħaġ iqegħedhom fuq il-​lemin tiegħu u l-​mogħoż fuq ix-​xellug. . . . U s-​Sultan iweġibhom u jgħid [lin-nagħaġ], ‘Tassew, ngħidilkom, kull ma għamiltu maʼ wieħed mill-​iżgħar fost dawn ħuti, għamiltuh miegħi.’ . . . U dawn [il-mogħoż] imorru fit-​tbatija [“fil-​qtugħ,” NW] taʼ dejjem u l-​ġusti fil-​ħajja taʼ dejjem.”—Mattew 25:31-46.

8. Pawlu kif jiddeskrivi l-​miġja taʼ Kristu biex jesegwixxi ġudizzju fuq dawk li jiċħdu ’l Alla?

⁸ Bħalma turi l-​parabbola tan-​nagħaġ u l-​mogħoż, Ġesù jesegwixxi ġudizzju finali fuq dawk kollha li jiċħdu ’l Alla. Pawlu assigura lill-​kredenti sofferenti sħabu: “Għad iserraħ lilkom li qegħdin issofru, kif ukoll lilna, dak in-​nhar li l-​Mulej Ġesù jfeġġ mis-​smewwiet imdawwar bl-​anġli tal-​qawwa tiegħu b’nar iħeġġeġ, biex iħallas lil dawk li ma jagħrfux lil Alla, u ’l dawk li ma jobdux l-​Evanġelju taʼ Sidna Ġesù. Dawn għad jitħallsu bil-​piena tat-​telfien taʼ dejjem, ’il bogħod minn wiċċ il-​Mulej u mill-​glorja tal-​qawwa tiegħu, dakinhar li jiġi biex jieħu glorja mingħand il-​qaddisin tiegħu.” (2 Tessalonikin 1:7-10) B’dawn il-​ġrajjiet eċċitanti kollha quddiemna, m’għandniex aħna neżerċitaw fidi u nibqgħu għassa b’mod ħerqan għall-​miġja taʼ Kristu?

Nistennew bil-​Ħerqa għar-​Rivelazzjoni taʼ Kristu

9, 10. Il-​midlukin li għadhom fuq l-​art għala jistennew bil-​ħerqa r-​rivelazzjoni taʼ Ġesù Kristu?

⁹ Meta “l-​Mulej Ġesù jfeġġ mis-​smewwiet” ma jkunx biss biex iġib qerda fuq in-​nies mill-​agħar imma wkoll biex jippremja lit-​twajbin. Dawk li fadal minn fost l-​aħwa midlukin taʼ Kristu li għadhom fuq l-​art forsi baqgħalhom isofru qabel ir-​rivelazzjoni taʼ Kristu, imma huma jithennew bit-​tama glorjuża tagħhom tas-​sema. L-​appostlu Pietru kiteb lill-​Kristjani midlukin: “Imma ifirħu, għax b’hekk intom qegħdin tissieħbu fit-​tbatijiet taʼ Kristu, biex aktar tifirħu u tithennew fid-​dehra [“rivelazzjoni,” NW] tal-​glorja tiegħu.”—1 Pietru 4:13.

¹⁰ Dawk midlukin huma ddeterminati li jibqgħu leali sakemm Kristu ‘jiġmagħhom biex jingħaqdu miegħu’ sabiex il-​fidi tagħhom ‘mgħoddija mill-​prova’ jkun “jistħoqqilha tasal għat-​tifħir, għall-​glorja, u għall-​ġieħ, meta jidher Ġesù Kristu.” (2 Tessalonikin 2:1; 1 Pietru 1:7) Dwar dawn il-​Kristjani leali, imnisslin bl-​ispirtu, jistaʼ jingħad: “Daqs kemm ix-​xhieda taʼ Kristu kienet imwettqa fikom. Għalhekk m’intom nieqsa minn ebda don, intom u tistennew id-​dehra [“rivelazzjoni,” NW] taʼ Sidna Ġesù Kristu.”—1 Korintin 1:6, 7.

11. Fil-​waqt li jistennew ir-​rivelazzjoni taʼ Ġesù Kristu, Kristjani midlukin x’jagħmlu?

¹¹ Il-​fdal midluk iħossuhom l-​istess bħal Pawlu, li kiteb: “Jiena għadni persważ li t-​tbatijiet taʼ issa ma għandhom xejn x’jaqsmu mal-​glorja li għad trid tidher fina.” (Rumani 8:18) Il-​fidi tagħhom m’għandhiex bżonn titwieżen permezz taʼ kalkoli taż-​żmien. Huma jżommu ruħhom okkupati bis-​sħiħ fis-​servizz taʼ Jehovah, u b’hekk jipprovdu eżempju taʼ l-​għaġeb għal sħabhom, in-​“nagħaġ oħra.” (Ġwann 10:16) Dawn il-​midlukin jafu li t-​tmiem taʼ din is-​sistema mill-​agħar huwa qrib, u jagħtu kas l-​eżortazzjoni taʼ Pietru: “Kunu mħażżmin fir-​ruħ u rżina f’kollox; ittamaw għalkollox fil-​grazzja li għad tingħatalkom meta jidher Ġesù Kristu.”—1 Pietru 1:13.

“Il-​Ħlejjaq Kollha Qegħdin Jistennew Ħerqana”

12, 13. Il-​ħolqien uman kif kien “taħt il-​frugħa,” u n-​nagħaġ oħrajn għal liema ħaġa jixxennqu?

¹² Għandhom in-​nagħaġ oħrajn ukoll xi ħaġa li għaliha jistgħu jgħixu fi stennija ħerqana? Ċertament li għandhom. Wara li tkellem dwar it-​tama glorjuża taʼ dawk adottati minn Jehovah bħala “wlied” imnisslin bl-​ispirtu u “werrieta maʼ Kristu” fis-​Saltna tas-​sema, Pawlu qal: “Il-​ħlejjaq kollha qegħdin jistennew ħerqana r-​rivelazzjoni taʼ wlied Alla; għax il-​ħolqien jinsab taħt il-​frugħa—mhux minn rajh, imma minħabba Alla li xeħtu taħtha—bit-​tama li l-​ħlejjaq huma wkoll għad ikunu meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.”—Rumani 8:14-21; 2 Timotju 2:10-12.

¹³ Permezz tad-​dnub taʼ Adam, id-​dixxendenti kollha tiegħu ġew “taħt il-​frugħa,” billi twieldu fil-​jasar għad-​dnub u l-​mewt. Ma kinux kapaċi jeħilsu lilhom infushom minn dan il-​jasar. (Salm 49:8 [Salm 49:7, NW]; Rumani 5:12, 21) O kemm jixxennqu n-​nagħaġ oħrajn “ikunu meħlusa mill-​jasar tat-​taħsir”! Imma qabel ma jseħħ dan, iridu jiġru xi affarijiet skond iż-​żminijiet u l-​istaġuni taʼ Jehovah.

14. X’se jkun involut fir-​“rivelazzjoni taʼ wlied Alla,” u dan kif se jirriżulta f’li l-​bnedmin “ikunu meħlusa mill-​jasar tat-​taħsir”?

¹⁴ Il-​fdal taʼ “wlied Alla” li huma midlukin iridu l-​ewwel jiġu ‘rrivelati.’ Dan x’se jinvolvi? Fiż-​żmien xieraq t’Alla, se jsir evidenti għan-​nagħaġ oħrajn li l-​midlukin ġew finalment “issiġillati” u gglorifikati biex jirrenjaw maʼ Kristu. (Apokalissi 7:2-4) “Ulied Alla” li huma rxoxtati wkoll se jiġu ‘rrivelati’ meta jieħdu sehem maʼ Kristu fil-​qerda tas-​sistema t’affarijiet mill-​agħar taʼ Satana. (Apokalissi 2:26, 27; 19:14, 15) Imbagħad, matul ir-​Renju t’Elf Sena taʼ Kristu, huma se jiġu ‘rrivelati’ iżjed bħala mezzi saċerdotali għat-​tqassim tal-​benefiċċji tas-​sagrifiċċju bħala rahan taʼ Ġesù għall-​“ħlejjaq” umani. Dan se jirriżulta f’li l-​bnedmin “ikunu meħlusa mill-​jasar tat-​taħsir” u eventwalment “jiksbu l-​ħelsien tal-​glorja taʼ wlied Alla.” (Rumani 8:21; Apokalissi 20:5; 22:1, 2) Bi prospetti grandjużi bħal dawn, għandna għalfejn nistagħġbu li n-​nagħaġ oħrajn “qegħdin jistennew ħerqana r-​rivelazzjoni taʼ wlied Alla”?—Rumani 8:19.

Il-​Paċenzja taʼ Jehovah Tfisser Salvazzjoni

15. Liema ħaġa qatt m’għandna ninsew rigward il-​mod kif Jehovah jwettaq il-​ġrajjiet fil-​ħin preċiż tagħhom?

¹⁵ Jehovah hu l-​Kronometrista l-​Kbir. Il-​mod kif hu jwettaq il-​ġrajjiet fil-​ħin preċiż tagħhom se jkun perfett. L-​affarijiet forsi mhux dejjem jidhru li qed iseħħu bil-​mod li aħna personalment inkunu stennejna. Madankollu, jistaʼ jkollna fidi assoluta li l-​wegħdi kollha t’Alla se jitwettqu. (Ġożwè 23:14) Għandu mnejn li hu qed iħalli l-​affarijiet idumu iktar milli ħafna stennew. Imma ejjew infittxu li nifhmu l-​mogħdijiet tiegħu u nammiraw l-​għerf tiegħu. Pawlu kiteb: “Kemm huma kbar l-​għana, l-​għerf u l-​għaqal taʼ Alla! Kemm tassew ħadd ma jistaʼ jgħarbel il-​ġudizzju tiegħu u jifhem it-​triqat tiegħu! Għax min qatt għaraf moħħ il-​Mulej? Min qatt kien il-​kunsillier tiegħu?”—Rumani 11:33, 34.

16. Min qiegħed f’pożizzjoni li jibbenefika mill-​paċenzja taʼ Jehovah?

¹⁶ Pietru kiteb: “Ħuti għeżież, waqt li nistennew dan kollu [il-qerda tas-​“smewwiet” u “l-​art” il-​qodma u li dawn jiġu mibdulin mis-​“smewwiet ġodda” u l-​“art ġdida” li wiegħed Alla], qisu li [“finalment,” “NW”] jsibkom fis-​sliem, bla tebgħa u bla dnub. Is-​sabar li bih il-​Mulej jeħodna qisuh bħala salvazzjoni tagħna.” Minħabba l-​paċenzja taʼ Jehovah, miljuni oħrajn qed jingħataw l-​opportunità li jiġu salvati minn “jum il-​Mulej,” li se jiġi bla mistenni “bħal ħalliel.” (2 Pietru 3:9-15) Il-​paċenzja tiegħu qiegħda tħalli wkoll lil kull wieħed u waħda minna ‘nħabirku għas-​salvazzjoni tagħna bil-​biżaʼ u t-​tregħid.’ (Filippin 2:12) Ġesù qal li għandna ‘noqogħdu attenti’ u ‘nishru’ jekk irridu li nkunu approvati u jirnexxilna ‘nieqfu quddiem Bin il-​bniedem’ meta jiġi għall-​ġudizzju.—Luqa 21:34-36; Mattew 25:31-33.

Ibqaʼ Stenna bis-​Sabar

17. Liema kliem taʼ l-​appostlu Pawlu għandna ndaħħlu f’qalbna?

¹⁷ Pawlu ħeġġeġ lil ħutu spiritwali biex ma jħarsux “lejn il-​ħwejjeġ li jidhru, iżda lejn dawk li ma jidhrux.” (2 Korintin 4:16-18) Hu ried li xejn ma jċajpar il-​ħarsa tagħhom lejn il-​premju tas-​sema mqiegħed quddiemhom. Kemm jekk aħna Kristjani midlukin jew min-​nagħaġ l-​oħrajn, ejjew inżommu f’moħħna t-​tama taʼ l-​għaġeb imqiegħda quddiemna u ma naqtgħux qalbna. Ejjew nibqgħu ‘nistennew bis-​sabar,’ billi nagħtu prova li “m’aħniex minn dawk li jerġgħu lura, biex nintilfu; aħna minn dawk li jemmnu, biex insalvaw.”—Rumani 8:25; Lhud 10:39.

18. Għala nistgħu bil-​fiduċja kollha nħallu ż-​żminijiet u l-​istaġuni f’idejn Jehovah?

¹⁸ Nistgħu bil-​fiduċja kollha nħallu ż-​żminijiet u l-​istaġuni f’idejn Jehovah. It-​twettiq tal-​wegħdi tiegħu ‘ma jiddawwarx ma jasal’ skond l-​iskeda taż-​żmien tiegħu. (Ħabakkuk 2:3) Sadattant, l-​eżortazzjoni li Pawlu ta lil Timotju għandha sinjifikat miżjud għalina. Hu qal: “Nitolbok bil-​ħerqa, quddiem Alla u Kristu Ġesù, li għandu jagħmel ħaqq mill-​ħajjin u mill-​mejtin, f’isem id-​Dehra tiegħu u s-​Saltna tiegħu: xandar il-​kelma, insisti f’waqtu u barra minn waqtu . . . Agħmel ħidma taʼ evanġelista, aqdi sewwa l-​ministeru tiegħek.”—2 Timotju 4:1-5.

19. Liema ħaġa għadu ż-​żmien għaliha biex issir mill-​poplu taʼ Jehovah, u għala?

¹⁹ Hemm il-​ħajjiet fin-​nofs​—tagħna u dawk tal-​ġirien tagħna. Pawlu kiteb: “Għasses fuqek innifsek u fuq it-​tagħlim tiegħek; żomm sħiħ f’dawn il-​ħwejjeġ, għax, jekk tagħmel hekk, issalva lilek innifsek u lil dawk li jisimgħuk.” (1 Timotju 4:16) Iż-​żmien hu qasir ferm għal din is-​sistema t’affarijiet mill-​agħar. Fil-​waqt li nistennew bil-​ħerqa l-​ġrajjiet eċċitanti quddiemna, ejjew inkunu dejjem konxji li għadu ż-​żmien u l-​istaġun taʼ Jehovah biex il-​poplu tiegħu jippriedka l-​aħbar tajba tas-​Saltna. Dan ix-​xogħol irid jitwettaq skond ma jidhirlu hu. “Mbagħad,” bħalma qal Ġesù, “jiġi t-​tmiem.”—Mattew 24:14.

[Nota taʼ taħt]

Bħala Reviżjoni

◻ Rigward kalkoli taż-​żmien, is-​sitwazzjoni tagħna kif inhi simili għal dik tal-​Kristjani taʼ l-​ewwel seklu?

◻ Il-​Kristjani għala jridu ‘jishru,’ anki matul il-​preżenza taʼ Kristu?

◻ Il-​ħlejjaq umani għala qegħdin jistennew ħerqana “r-​rivelazzjoni taʼ wlied Alla”?

◻ Għala nistgħu bil-​fiduċja kollha nħallu ż-​żminijiet u l-​istaġuni f’idejn Jehovah?

[Stampa f’paġna 17]

Il-​Kristjani jridu jibqgħu mqajmin fi stennija tal-​miġja taʼ Kristu

[Stampa f’paġna 18]

Il-​fdal midluk iżommu ruħhom okkupati bis-​sħiħ fis-​servizz taʼ Jehovah, billi ma jibbażawx il-​fidi tagħhom fuq kalkoli taż-​żmien