Il-​Ħarsa tal-​Bibbja

Xi Ngħidu Dwar li Tnejn Jgħixu Flimkien Qabel Jiżżewġu?

SE TIXTRI int xi tibdila jew libsa mingħajr ma l-​ewwel tipprovaha? X’aktarx li le. Wara kollox, jekk wara ssib li ma tiġikx, tkun ħlejt il-​ħin u l-​flus tiegħek.

Ħafna nies jirraġunaw bl-​istess mod dwar iż-​żwieġ. Huma jħossu li jkun aħjar li raġel u mara jgħixu flimkien qabel jidħlu għar-​rabta taż-​żwieġ. Huma jirraġunaw, ‘Jekk l-​affarijiet ma jmorrux sew, ir-​raġel u l-​mara jistgħu jisseparaw mingħajr ma jkollhom bżonn jiffaċċjaw il-​proċess komplikat tad-​divorzju li jiswa ħafna flus.’

Għandu mnejn li xi wħud li jħossuhom hekk raw lil xi ħadd minn ħbiebhom miżżewġin jissaporti abbużi fir-​relazzjoni tiegħu. Jew forsi raw b’għajnejhom l-​effetti trawmatiċi taʼ żwieġ mingħajr imħabba. B’hekk, il-​fatt li jgħixu flimkien għandhom mnejn jarawh bħala prekawzjoni għaqlija.

X’inhi l-​ħarsa tal-​Bibbja dwar dan is-​suġġett? Biex inwieġbu, l-​ewwel għandna bżonn nikkunsidraw x’għandha x’tgħidilna l-​Kelma t’Alla dwar l-​istituzzjoni taż-​żwieġ.

“Ġisem Wieħed”

Il-​Bibbja għandha ħarsa li tisboq lil kull ħarsa oħra lejn iż-​żwieġ, u ma niħduhiex bi kbira, għaliex dan l-​arranġament kien awtorizzat u stabbilit minn Alla Ġeħova nnifsu. (Ġenesi 2:21-​24) Sa mill-​bidu, Ġeħova kellu l-​iskop li permezz taż-​żwieġ, raġel u mara kellhom isiru “ġisem wieħed.” (Ġenesi 2:24) Wara li kkwota s-​silta fil-​Bibbja fejn insibu dan, Ġesù żied: “Dak li Alla għaqqad flimkien ħa ma jifirdu ebda bniedem.”—Mattew 19:6.

Veru li xi wħud li jiżżewġu jiddivorzjaw iktar tard.a Madankollu, meta jiġri dan ma jkunx minħabba xi ħaġa ħażina fl-​arranġament taż-​żwieġ innifsu; minflok, ikun għaliex wieħed mill-​miżżewġin jew it-​tnejn li huma jonqsu li jgħixu skont il-​wegħdi li għamlu lil xulxin meta żżewġu.

Biex nagħtu eżempju: Suppost li raġel u mara għandhom karozza, iżda ma jiħdux ħsiebha skont l-​istruzzjonijiet tal-​manifattur. Jekk minħabba f’hekk il-​karozza jiġrilha l-​ħsara, min jaħti? Huwa l-​manifattur jew sid il-​karozza li m’għamlilhiex manutenzjoni b’mod regulari?

L-​istess prinċipju japplika għaż-​żwieġ. Meta raġel u martu jaħdmu biex iżommu r-​relazzjoni taʼ bejniethom u jkunu determinati li jsolvu l-​problemi tagħhom billi japplikaw il-​prinċipji Bibliċi, ikun hemm inqas ċans li jiddivorzjaw. Minħabba li jkun sar impenn persunali min-​naħa tat-​tnejn, se jkun hemm sens taʼ sigurtà fiż-​żwieġ tagħhom. Iż-​żwieġ imbagħad isir il-​pedament għal relazzjoni taʼ mħabba.

‘Tbiegħdu miż-​Żína’

Xorta waħda, xi wħud għandhom mnejn jgħidu: ‘Mhux aħjar ngħixu flimkien l-​ewwel? Ma nkunux qed nuru rispett lejn il-​qdusija taż-​żwieġ jekk naraw immorrux tajjeb flimkien qabel nidħlu f’impenn bħal dan?’

It-​tweġiba tal-​Bibbja hija ċara. Pawlu kiteb: ‘Tbiegħdu miż-​żína.’ (1 Tessalonikin 4:3) It-​terminu “żína” jirreferi għar-​relazzjonijiet sesswali kollha barra miż-​żwieġ. Dan jinkludi sess bejn tnejn li jgħixu flimkien, anki jekk għandhom l-​intenzjoni li jiżżewġu. Mela, skont il-​Bibbja, ikun ħażin jekk koppja jgħixu flimkien—anki jekk bi ħsiebhom jiżżewġu iktar tard.

Hija l-​ħarsa tal-​Bibbja antikwata? Hekk jaħsbu xi wħud. Wara kollox, f’ħafna pajjiżi, il-​fatt li koppja jgħixu flimkien—kemm jekk ikollhom l-​intenzjoni li jiżżewġu u kemm jekk le—hu meqjus bħala ħaġa normali. Imma aħseb x’jirriżulta wara. Dawk li jgħixu flimkien sabuh is-​sigriet biex familja tirnexxi? Huma iżjed kuntenti minn koppji li jiżżewġu? Koppji li jgħixu flimkien qabel jiżżewġu għandhom rata ogħla taʼ fedeltà wara ż-​żwieġ? Studji li saru juru l-​kuntrarju. Tabilħaqq, instab li koppji miżżewġin li qabel kienu jgħixu flimkien qed jesperjenzaw ħafna iktar problemi fiż-​żwieġ u fil-​fatt jiddivorzjaw.

Xi esperti jgħidu li studji bħal dawn mhumiex eżatti. “Nies li jagħżlu li jiżżewġu mingħajr ma l-​ewwel jgħixu flimkien diġà huma grupp taʼ nies differenti minn dawk li jiddeċiedu li jgħixu flimkien minn qabel,” tikteb waħda psikologa. Hi ssostni illi li jgħixu flimkien mhuwiex il-​fattur prinċipali; minflok, il-​kwistjoni hi “li napprezzaw l-​istat taʼ li tkun miżżewweġ.”

Anki jekk dan hu minnu, dan sempliċement jenfasizza l-​importanza taʼ li jkollna l-​ħarsa t’Alla lejn iż-​żwieġ. Il-​Bibbja tgħid: “Ħa jkun iż-​żwieġ onorabbli għal kulħadd.” (Ebrej 13:4) Meta raġel u mara jwiegħdu li jibqgħu ġisem wieħed u mbagħad jonoraw l-​arranġament taż-​żwieġ, huma jkollhom rabta li ma tantx tistaʼ tinħall faċilment.—Ekkleżjasti 4:12.

Għalhekk, biex nirreferu għax-​xebh li ntuża fil-​bidu, tassew jagħmel sens li tipprova tibdila jew libsa qabel tixtriha. Madankollu, dan ma jistax jitqabbel maʼ tnejn li jgħixu flimkien qabel iż-​żwieġ. Minflok, ifisser li wieħed jieħu biżżejjed ħin biex isir jaf lill-​persuna li bi ħsiebu jiżżewweġ. Dan il-​pass vitali, iżda li spiss jiġi injorat, huwa wieħed minn ħafna sigrieti biex familja tirnexxi.

[Nota taʼ taħt]

QATT ĦSIBT DWAR DAN?

◼ Il-​Bibbja għala tillimita l-​intimità sesswali għall-​imseħbin fiż-​żwieġ?​—Salm 84:11; 1 Korintin 6:18.

◼ Liema kwalitajiet għandek tfittex f’min tkun se tiżżewweġ?​—Rut 1:16, 17; Proverbji 31:10-​31.

[Kaxxa f’paġna 29]

“JIDNEB KONTRA ĠISMU STESS”

Il-​Bibbja tgħid ċar: “Min jipprattika ż-​żína qed jidneb kontra ġismu stess.” (1 Korintin 6:18) Fl-​aħħar għaxriet taʼ snin, il-​verità taʼ dan il-​kliem ġiet enfasizzata bil-​miljuni li mietu bl-​AIDS u b’mard ieħor trasmess sesswalment. U dan mhux kollox. Studji li saru juru li d-​dipressjoni u l-​attentati taʼ suwiċidju huma iktar komuni fost żgħażagħ li huma attivi sesswalment. It-​taħlit sesswali jwassal ukoll għal tqala mhix mixtieqa, li f’xi każi toħloq tentazzjoni biex isir abort. Meta nqisu dawn il-​fatti nistgħu nikkonkludu li l-​liġijiet morali tal-​Bibbja mhumiex antikwati.