Żomm Sod mal-​Libertà li Tak Alla!

“Għal libertà bħal din Kristu ħelisna. Għalhekk ieqfu sħiħ, u tħallux lilkom infuskom li tintrabtu mill-​ġdid taħt madmad taʼ jasar.”−GALATIN 5:1.

1, 2. Kif intilfet il-​libertà mogħtija minn Alla?

IN-​NIES taʼ Jehovah huma liberi. Imma ma jfittxux indipendenza minn Alla, għax dak ikun ifisser jasar taħt Satana. Huma jgħożżu r-​relazzjoni tagħhom mill-​qrib maʼ Jehovah u jifirħu bil-​libertà li jagħtihom.

² L-​ewwel ġenituri tagħna, Adam u Eva, tilfu l-​libertà li tahom Alla billi dinbu u saru rsiera tad-​dnub, tal-​mewt, u tax-​Xitan. (Ġenesi 3:1-19. Rumani 5:12) Iva, Satana poġġa lid-​dinja kollha fit-​triq midinba tal-​qerda! Imma dawk li jżommu sod mal-​libertà li tahom Alla jimxu fit-​triq għall-​ħajja eterna.—Mattew 7:13, 14; 1 Ġwann 5:19.

Libertà mill-​Jasar

3. Alla liema tama estenda f’Għeden?

³ Jehovah ried li l-​bnedmin li jonoraw lil ismu jkunu liberi mill-​jasar taʼ Satana, tad-​dnub, u tal-​mewt. Dik it-​tama ġiet estiża meta Alla qal lis-​serpent użat minn Satana f’Għeden: “Se nqiegħed għadwa bejnek u l-​mara u bejn iż-​żerriegħa tiegħek u ż-​żerriegħa tagħha. Hu se jbenġlek fir-​ras u int se tbenġlu fil-​għarqub.” (Ġenesi 3:14, 15) Ġesù Kristu, iż-​Żerriegħa mill-​organizzazzjoni tas-​sema taʼ Jehovah, sofra għarqub imbenġel meta miet fuq iz-​zokk, imma Alla b’hekk ipprovda sagrifiċċju bħala raħan biex jeħles mid-​dnub u mill-​mewt lill-​bnedmin li jemmnu. (Mattew 20:28; Ġwann 3:16) Fil-​waqt tiegħu, Ġesù se jbenġel lir-​ras taʼ Satana, is-​Serpent oriġinali.—Rivelazzjoni 12:9.

4. Abraham gawda liema libertà, u Jehovah x’wegħdu?

⁴ Xi 2,000 sena wara li ngħatat il-​wegħda f’Għeden, “il-​ħabib taʼ Jehovah” Abraham obda lil Alla u telaq mill-​belt taʼ Ur għal post ieħor. (Ġakbu 2:23; Ebrej 11:8) Hu b’hekk irċieva libertà mogħtija minn Alla u ma għexx iżjed bħala rsir tad-​dinja taʼ Satana taʼ reliġjon falza, politika korrotta, u kummerċ rgħib. Mal-​profezija taʼ Għeden, Alla żied wegħdiet li l-​familji u l-​ġnus kollha se jbierku lilhom infushom permezz taʼ Abraham u ż-​Żerriegħa tiegħu. (Ġenesi 12:3; 22:17, 18) Abraham kien liberu mill-​kundanna għaliex ‘hu poġġa fidi f’Jehovah, li għoddhielu bħala tjieba.’ (Ġenesi 15:6) Illum, relazzjoni mill-​qrib maʼ Jehovah bl-​istess mod iġġib mingħand Alla libertà mill-​kundanna u mill-​jasar għad-​dinja li tinsab taħt il-​qawwa taʼ Satana.

Dramm Simboliku taʼ Interess Kbir

5. It-​twelid taʼ Iżakk kien marbut maʼ liema ċirkostanzi?

⁵ Sabiex Abraham ikun jistaʼ jkollu żerriegħa, martu Sara, li kienet ħawlija, offrietlu lill-​qaddejja tagħha, Ħagar, bħala l-​waħda biex ikollha tarbija. Minnha, Abraham sar missier taʼ Ixmael, imma Alla ma għażilx lilu bħala ż-​Żerriegħa mwiegħed. Minflok, meta Abraham kellu 100 sena u Sara kellha 90, Jehovah ġagħalhom ikollhom iben bl-​isem taʼ Iżakk. Meta Ixmael waqqaʼ għaċ-​ċajt lil Iżakk, Ħagar u binha tkeċċew, billi b’hekk bin Abraham mill-​mara ħielsa Sara tħalla bħala ż-​żerriegħa taʼ Abraham mingħajr ebda rivali. Bħal Abraham, Iżakk ukoll eżerċita fidi u gawda libertà mogħtija minn Alla.—Ġenesi 16:1-16; 21:1-21; 25:5-11.

6, 7. Għalliema foloz dwar liema ħaġa kienu kkonvinċew lil xi Kristjani Galatin, imma Pawlu xi spjega?

⁶ Dawn il-​ġrajjiet taw stampa bil-​quddiem taʼ affarijiet wisq sinjifikanti għal uħud li jħobbu l-​libertà mogħtija minn Alla. Dan ġie nnotat fl-​ittra li l-​appostlu Pawlu kiteb lill-​kongregazzjonijiet taʼ Galatja madwar is-​sena 50 sa 52 E.K. Sa dak iż-​żmien il-​ġemgħa li tiggverna kienet iddeċidiet li ċ-​ċirkonċiżjoni ma kinitx meħtieġa mill-​Kristjani. Imma għalliema foloz kienu pperswadew lil xi ftit mill-​Galatin li kienet fattur vitali tal-​Kristjanità.

⁷ Pawlu qal lill-​Galatin: Persuna hija ddikjarata taʼ tjieba permezz tal-​fidi fi Kristu, mhux bix-​xogħlijiet tal-​Liġi taʼ Mosè. (1:1-3:14) Il-​Ligi ma għamlitx bla valur lill-​wegħda marbuta mal-​patt taʼ Abraham imma għamlet in-​nuqqasijiet jidhru u serviet bħala għalliema li twassal għal Kristu. (3:15-25) Bil-​mewt tiegħu, Ġesù ħeles lil dawk taħt il-​Liġi, billi għenhom isiru wlied Alla. Għaldaqstant, li jerġgħu lura għal arranġament li josservaw il-​ġranet, ix-​xhur, l-​istaġuni, u s-​snin ikun ifisser li jmorru lura għall-​jasar. (4:1-20) Pawlu mbagħad kiteb:

8, 9. (a) Fi kliemek, spjega fil-​qosor x’qal Pawlu f’​Galatin 4:21-26. (b) F’dan id-​dramm simboliku, min jew liema ħaġa ġiet iffiġurata minn Abraham u minn Sara, u min hu ż-​Żerriegħa mwiegħed?

⁸ “Għiduli, intom li tridu tkunu taħt il-​liġi, Ma tisimgħuhiex intom il-​Liġi? Per eżempju, huwa miktub li Abraham kiseb żewġ ulied, wieħed [Ixmael] mit-​tfajla l-​qaddejja [ Ħagar] u wieħed [Iżakk] mill-​mara ħielsa [Sara]; imma l-​wieħed mit-​tfajla l-​qaddejja kien attwalment imwieled fil-​manjiera tal-​laħam, l-​ieħor mill-​mara ħielsa permezz taʼ wegħda. Dawn l-​affarijiet weqfin bħala dramm simboliku; għax dawn in-​nisa jfissru żewġ pattijiet, il-​wieħed [il-patt tal-​Liġi] mill-​Muntanja Sinaj [fejn Alla inawgura dak il-​patt mal-​Iżraeliti], li ġġib it-​tfal għall-​jasar, u li hi Ħagar. [Il-patt l-​ieħor kien dak magħmul maʼ Abraham rigward iż-​Żerriegħa tiegħu.] Issa din Ħagar tfisser Sinaj, muntanja fl-​Arabja, u hi tikkorrispondi maʼ Ġerusalemm illum, għax hi fil-​jasar maʼ wliedha [dixxendenti taʼ Abraham, Iżakk, u Ġakobb]. Imma Ġerusalemm taʼ fuq hi ħielsa, u hi ommna.”−Galatin 4:21-26.

⁹ F’dan id-​dramm simboliku, Abraham kien jiffigura lil Jehovah.“[I]l-mara ħielsa,” Sara, iffiġurat lill-​“mara,” jew organizzazzjoni universali u qaddisa t’Alla. Hija pproduċiet lil Kristu, iż-​Żerriegħa taʼ dik il-​mara simbolika u taʼ Abraham Akbar. (Galatin 3:16 ) Biex juri lin-​nies it-​triq taʼ ħelsien minn qima mniġġsa, mid-​dnub, u minn Satana, Ġesù għallem il-​verità u kixef ir-​reliġjon falza, imma Ġerusalemm u wliedha baqgħu fil-​jasar reliġjuz għaliex huma ċaħduh. (Mattew 23:37, 38) Is-​segwaċi Lhud taʼ Ġesù saru liberi mil-​Liġi, li wriet il-​jasar tagħhom għall-​imperfezzjoni, għad-​dnub, u għall-​mewt. Liberi tassew huma l-​bnedmin kollha li jaċċettaw lil Ġesù bħala l-​Wieħed li tnissel mill-​“mara” t’Alla biex ikun is-​Sultan Messjaniku u l-​Ħellies ‘li qiegħed jipproklama libertà lill-​imjassrin’!—Isaija 61:1, 2; Luqa 4:18, 19.

Evita Madmad taʼ Jasar

10, 11. Kristu minn liema madmad taʼ jasar ħeles lis-​segwaċi tiegħu, u liema xebh jistaʼ jsir illum?

¹⁰ Lil dawk li jifformaw iż-​żerriegħa taʼ Abraham flimkien maʼ Kristu, Iżakk Akbar, Pawlu jgħid: “Ġerusalemm taʼ fuq hi ħielsa, u hi ommna.... Aħna, l-​aħwa, aħna ulied li nappartjenu lill-​wegħda l-​istess bħalma kien Iżakk. Imma sewwa sew bħalma dak iż-​żmien il-​wieħed li twieled fil-​manjiera tal-​laħam [Ixmael] beda jippersegwita lil dak li twieled fil-​manjiera tal-​ispirtu [Iżakk], hekk ukoll issa.... Aħna wlied, mhux taʼ tfajla qaddejja, imma tal-​mara ħielsa. Għal libertà bħal din [mil-Liġi] Kristu ħelisna. Għalhekk ieqfu sħiħ, u tħallux lilkom infuskom li tintrabtu mill-​ġdid taħt madmad taʼ jasar.”−Galatin 4:26-5:1.

¹¹ Kwalunkwe wieħed mis-​segwaċi taʼ Ġesù kien se jkun restritt għal madmad taʼ jasar li kieku ssottometta ruħu għal-​Liġi. Ir-​reliġjon falza hija madmad taʼ jasar preżenti, u l-​Kristjaneżmu jixbah lil Ġerusalemm tal-​qedem u wliedha. Imma wħud midlukin huma wlied Ġerusalemm taʼ fuq, l-​organizzazzjoni ħielsa tas-​sema t’Alla. Huma u sħabhom li jemmnu b’tamiet għall-​art m’huma ebda parti minn did-dinja u m’humiex fil-​jasar taħt Satana. (Ġwann 14:30; 15:19; 17:14, 16) Illiberati bil-​verità u bis-​sagrifiċċju taʼ Ġesù, ejjew inżommu sod mal-​libertà li tana Alla.

Nieħdu Waqfa għal-​Libertà li Tana Alla

12. Liema korsa tittieħed minn dawk li jemmnu, u x’se jiġi diskuss issa?

¹² Miljuni issa jgawdu libertà vera bħala Xhieda taʼ Jehovah. Studji tal-​Bibbja qegħdin jinżammu maʼ miljuni oħrajn, li ħafna minnhom huma “disposti sewwa għall-​ħajja taʼ dejjem.” Meta jsiru jemmnu, huma jieħdu waqfa għal-​libertà mogħtija minn Alla billi jitgħammdu. (Atti 13:48; 18:8) Iżda liema passi jiġu qabel il-​magħmudija Kristjana?

13. X’relazzjoni hemm bejn għarfien u magħmudija?

¹³ Qabel ma titgħammed, persuna trid tikseb u taġixxi fuq għarfien eżatt tal-​Iskrittura. (Efesin 4:13) B’hekk, Ġesù qal lis-​segwaċi tiegħu: “Morru . . . u agħmlu dixxipli min-​nies tal-​ġnus kollha, billi tgħammduhom fl-​isem tal-​Missier u tal-​Iben u tal-​ispirtu qaddis, billi tgħallmuhom josservaw l-​affarijiet kollha li kkmandajtkom.”−Mattew 28:19, 20.

14. Li tiġi mgħammed fl-​isem tal-​Missier, tal-​Iben, u tal-​ispirtu qaddis jirrikjedi liema għarfien?

¹⁴ Li tkun imgħammed fl-​isem tal-​Missier ifisser li tirrikonoxxi l-​pożizzjoni u l-​awtorità taʼ Jehovah bħala Alla, il-​Ħallieq, u s-​Sovran Universali. (Ġenesi 17:1; 2 Slaten 19:15; Rivelazzjoni 4:11) Magħmudija f’isem l-​Iben tirrikjedi rikonoxximent tal-​pożizzjoni u tal-​awtorita taʼ Kristu bħala ħlejqa spirtu eżaltat, is-​Sultan Messjaniku, u l-​wieħed li permezz tiegħu Alla pprovda “raħan li jikkorrispondi.” (1 Timotew 2:5, 6; Danjel 7:13, 14; Filippin 2:9-11) Persuna mgħammda f’isem l-​ispirtu qaddis tirrealizza li huwa l-​forza attiva t’Alla wżat minn Jehovah fil-​ħolqien u f’li nebbaħ kittieba tal-​Bibbja, kif ukoll f’modi oħrajn. (Ġenesi 1:2; 2 Pietru 1:21) M’għandniex x’ingħidu, hemm wisq iżjed x’titgħallem dwar Alla, Kristu, u l-​ispirtu qaddis.

15. Persuna għala trid teżerċita fidi qabel titgħammed?

¹⁵ Qabel il-​magħmudija, persuna trid teżerċita fidi bbażata fuq għarfien eżatt.“Mingħajr fidi hu impossibbli li togħgbu [lil Jehovah] sewwa.” (Ebrej 11:6) Individwu li jeżerċita fidi f’Alla, fi Kristu, u fil-​għan divin se jkun irid isir wieħed mix-​Xhieda taʼ Jehovah, billi jgħix fi qbil mal-​Kelma t’Alla u billi jkollu sehem siewi fl-​ippridkar tal-​aħbar tajba. Hu se jitkellem dwar il-​glorja tal-​istat taʼ sultan taʼ Jehovah.—Salm 145:10-13; Mattew 24:14.

16. X’inhi l-​indiema, u kif inhi marbuta mal-​magħmudija Kristjana?

¹⁶ L-​indiema hija ħtieġa oħra taʼ qabel il-​magħmudija. Li tindem ifisser li “tbiddel ħsiebek rigward azzjoni, jew kondotta, tal-​passat (jew intenzjonata) minħabba sogħba jew nuqqas taʼ sodisfazzjon,” jew li “tħoss dispjaċir, indiema, jew rimors għal dak li tkun għamilt jew li nqast li tagħmel.” Lhud tal-​ewwel seklu kienu jinħtieġu li jindmu mid-​dnubiet tagħhom kontra Ġesù Kristu. (Atti 3:11-26) Xi wħud li jemmnu f’Korintu nidmu miż-​żina, l-​idolatrija, l-​adulterju, l-​omosesswalità, is-​serq, ir-​regħba, is-​sokor, it-​tgħajjir, u l-​imbrolljar. Bħala riżultat, huma kienu “mnaddfin” fid-​demm taʼ Ġesù, kienu “mqaddsin” bħala wħud isseparati għas-​servizz taʼ Jehovah, u kienu “ddikjarati twajbin” f’isem il-​Mulej Ġesù Kristu u bl-​ispirtu t’Alla. (1 Korintin 6:9-11) Mela l-​indiema hija pass lejn kuxjenza tajba u lejn libertà mogħtija minn Alla minn ħtija li tikkastiga minħabba d-​dnub.—1 Pietru 3:21.

17. Xi tfisser il-​konverżjoni, u x’tirrikjedi minn xi ħadd li qed jippjana biex jitgħammed?

¹⁷ Il-​konverżjoni trid ukoll isseħħ qabel ma persuna tistaʼ titgħammed bħala waħda mix-​Xhieda taʼ Jehouah. Il-​konverżjoni taʼ individwu niedem isseħħ wara li hu jirrifjuta l-​korsa ħażina tiegħu u jiddeċiedi li jagħmel dak li hu sewwa. Verbi Ebrej u Griegi li għandhom x’jaqsmu maʼ konverżjoni jfissru “ddur lura, iddur dawra, jew tirritorna.” Meta jintuża f’sens spiritwali tajjeb, dan jirreferi għal dawrien lejn Alla minn triq ħażina. (1 Slaten 8:33, 34) Il-​konverżjoni tirrikjedi “xogħlijiet li jixirqu lill-​indiema,” li aħna nagħmlu dak li jikkmanda Alla, nabbandunaw ir-​reliġjon falza, u nidderieġu lil qalbna lejn Jehovah bla ma jerġaʼ jibdielna sabiex naqdu lilu biss. (Atti 26:20; Dewteronomju 30:2, 8, 10; 1 Samwel 7:3) Dan jitlob għal “qalb ġdida u spirtu ġdid,” għal bidla fil-​ħsieb, fid-​dispożizzjoni, u fil-​mira fil-​ħajja. (Eżekjel 18:31) Il-​personalità ġdida li tirriżulta tbiddel traċċi taʼ bla tjieba maʼ kwalitajiet taʼ tjieba. (Kolossin 3:5-14) Iva, indiema vera tassew li ġġiegħel lil dak li jkun biex ‘idur.’—Atti 3:19.

18. Għala tagħmel dedikazzjoni lil Alla fit-​talb, u x’inhu s-​sinjifikat taʼ dan il-​pass?

¹⁸ Dedikazzjoni lil Alla fit-​talb trid tiġi qabel il-​magħmudija. (Qabbel Luqa 3:21, 22.) Id-​dedikazzjoni tfisser li tiġi sseparat għal skop sagru. Tant hu importanti dan il-​pass li aħna għandna nesprimu lil Alla fit-​talb id-​deċiżjoni tagħna li nagħtuh devozzjoni esklussiva u li naqduh għal dejjem. (Dewteronomju 5:8, 9; 1 Kronaki 29:10-13) M’għandniex x’ingħidu, id-​dedikazzjoni tagħna m’hijiex lil xi xogħol imma lil Alla nnifsu. Dak il-​punt intgħamel ċar fil-​funeral taʼ Charles Taze Russell, l-​ewwel president tal-​Watch Tower Society. F’dik l-​okkażjoni fl-​1916, W. E. Van Amburgh, it-​teżorier u segretarju tas-​Soċjeta, qal: “Dan ix-​xogħol kbir dinji mhux ix-​xogħol taʼ persuna waħda. Huwa bil-​wisq kbir biex ikun hekk. Huwa x-​xogħol t’Alla u ma jitbiddilx. Alla uża hafna qaddejja fil-​passat u Hu bla dubju se juża ħafna fil-​futur. Il-​konsagrazzjoni [dedikazzjoni] tagħna m’hijiex lil xi bniedem, jew lil xi xogħol taʼ bniedem, imma biex nagħmlu r-​rieda t’Alla, kif Hu se jirrivelahielna permezz tal-​Kelma Tiegħu u modi taʼ tmexxija providenzjali. Alla għadu fuq it-​tmun.” Imma x’irid isir iżjed dwar dedikazzjoni lil Alla?

19. (a) Individwi kif jagħtu evidenza pubblika taʼ dedikazzjoni lil Jehovah? (b) Il-​magħmudija fl-​ilma taʼ liema ħaġa hija simbolu?

¹⁹ Evidenza pubblika tad-​dedikazzjoni lil Jehovah tiġi pprovduta meta persuna titgħammed. Il-​magħmudija hija simbolu li jindika li l-​persuna li qiegħda tiġi mgħaddsa fl-​ilma għamlet dedikazzjoni bla riżerva lil Alla Jehovah permezz taʼ Ġesù Kristu. (Qabbel Mattew 16:24.) Meta kandidat tal-​magħmudija jiġi midfun taħt l-​ilma u mbagħad imtellaʼ minn ġo fih, hu jmut b’mod fiġurattiv għall-​korsa taʼ ħajja tiegħu taʼ qabel u jiġi mqajjem għall-​mod ġdid taʼ ħajja, issa biex jagħmel ir-​rieda t’Alla bla riżerva. (Qabbel Rumani 6:4-6.) Meta Ġesù ġie mgħammed, hu ppreżenta lilu nnifsu lil Missieru tas-​sema bla riżerva. (Mattew 3:13-17) U l-​Iskrittura turi b’mod ripetut li wħud li jemmnu u li jikkwalifikaw jitgħammdu. (Atti 8:13; 16:27-34; 18:8) Biex isir wieħed mix-​Xhieda taʼ Jehovah illum, għalhekk, wieħed irid ikun jemmen billi verament jeżerċita fidi u jitgħammed.—Qabbel Atti 8:26-39.

Żomm Sod!

20. Liema huma xi eżempji Bibliċi li jagħtu prova li aħna se niġu mberkin talli nieħdu waqfa għal-​libertà mogħtija minn Alla bħala Xhieda mgħammdin taʼ Jehovah?

²⁰ Jekk int ħadt waqfa soda għal-​libertà li tak Alla billi sirt Xhud imgħammed taʼ Jehovah, hu se jbierkek bħalma bierek lill-​qaddejja tiegħu fil-​passat. Per eżempju, Jehovah bierek lix-​xwejħin Abraham u Sara b’Iżakk, iben li kellu l-​biżaʼ t’Alla. Bil-​fidi l-​profeta Mosè għażel li jkun stmat ħażin mal-​poplu t’Alla ‘iktar milli jkollu t-​tgawdija temporanja tad-​dnub, għaliex huwa qies it-​tmaqdir taʼ [li jkun tip antik ta]l-Kristu [jew il-​Wieħed Midluk t’Alla] bħala rikkezzi aqwa mit-​teżori tal-​Eġittu.’ (Ebrej 11:24-26) Mosè kellu l-​privileġġ li jintuża minn Jehovah biex joħroġ lill-​Iżraeliti ’l barra mill-​jasar Eġizzjan. Barra minn hekk, talli qeda lil Alla fedelment, hu se jiġi rxoxtat u se jaqdi bħala wieħed mill-​“prinċpijiet fl-​art kollha” taħt Mosè Akbar, Ġesù Kristu.—Salm 45:16; Dewteronomju 18:17-19.

21. Liema eżempji nkuraġġanti jingħataw rigward nisa taʼ tjieba taʼ żminijiet tal-​qedem?

²¹ Kristjani ddedikati llum jistgħu wkoll jiġu nkuraġġiti billi jikkunsidraw nisa li saru verament liberi u henjin. Fosthom kien hemm Rut il-​Moabita, li ġarrbet kemm l-​uġigħ il-​qalb meta romlot kif ukoll il-​ferħ tal-​libertà li taha Alla meta ħelset minn reliġjon falza. Billi abbandunat lil niesha u lill-​allat tagħha, hi ngħaqdet maʼ Naomi, il-​kunjata tagħha li wkoll kienet armla. “Fejn tmur int se mmur jien,” qalet Rut, “u fejn tqattaʼ l-​lejl int se nqattaʼ l-​lejl jien. Niesek se jkunu niesi, u Alla tiegħek Alla tiegħi.” (Rut 1:16) Bħala l-​mara taʼ Boaż, Rut saret omm Obed, in-​nannu taʼ David. (Rut 4:13-17) Iva, Jehovah ta lil din il-​mara umli mhux Iżraelita “paga perfetta” billi ħallieha ssir antenata taʼ Ġesù l-​Messija! (Rut 2:12) Kemm se tkun hienja Rut meta tiġi rxoxtata u ssir taf li hi kellha dan il-​privileġġ! Ferħ simili bla dubju fl-​irxoxt se jimla l-​qlub taʼ Raħab, li qabel kienet prostituta, u li ġiet meħlusa mill-​immoralità u mir-​reliġjon falza, kif ukoll taʼ Batxeba, il-​midinba li nidmet, għax huma wkoll se jsiru jafu li Jehovah ħalliehom isiru antenati taʼ Ġesù Kristu.—Mattew 1:1-6, 16.

22. X’se jiġi kkunsidrat fl-​artiklu li jmiss?

²² Konsiderazzjoni taʼ wħud li rċevew il-​libertà mogħtija minn Alla tistaʼ tibqaʼ sejra. Per eżempju, il-​għadd tagħhom jinkludi lill-​irġiel u nisa taʼ fidi msemmijin f’Ebrej kapitlu 11. Huma sofrew tribulazzjoni u trattament ħażin, “u d-​dinja ma kenitx denja tagħhom.” Żid mal-​għadd tagħhom lis-​segwaċi leali taʼ Kristu tal-​ewwel seklu u wħud leali oħrajn minn dak in-​nhar ‘il hawn inklużi l-​miljuni li issa jaqdu lil Jehovah bħala x-​Xhieda tiegħu. Kif se naraw wara dan, jekk int ħadt waqfa magħhom għal-​libertà mogħtija minn Alla, int għandek hafna raġunijiet għall-​ferħ.

Kif Twieġeb Int?

◻ Alla liema tama estenda meta ntilfet il-​libertà mogħtija minn Alla?

◻ Kristu minn liema “madmad taʼ jasar” ħeles lis-​segwaċi tiegħu?

◻ Liema passi jiġu qabel il-​magħmudija bħala wieħed mix-​Xhieda taʼ Jehovah?

◻ Liema eżempji Skritturali jagħtu prova li aħna se niġu mberkin talli nieħdu waqfa għal-​libertà mogħtija minn Alla?