“Issaħħu fil-​Mulej”

“Issaħħu fil-​Mulej, u fil-​qawwa tas-​setgħa tiegħu.”—EFESIN 6:10, KŻ.

1. (a) Liema ġlieda straordinarja seħħet madwar 3,000 sena ilu? (b) David għala ħareġ rebbieħ?

MADWAR 3,000 sena ilu, żewġ ġellieda ffaċċjaw lil xulxin bejn żewġ armati opposti fil-​kamp tal-​battalja. Iż-​żgħir kien ragħaj żagħżugħ jismu David. Wieqaf quddiemu kien hemm Gulija, raġel taʼ saħħa u statura mhux tas-​soltu. L-​armatura tiegħu kienet tiżen 57 kilogramma, u kellu lanza daqsiex u xabla kbira. David ma kien liebes l-​ebda armatura, u l-​unika arma li kellu kienet żbandola. Il-​ġgant Filisti, Gulija, ħassu offiż li l-​Iżraeli li sfidah kien biss daqsxejn taʼ żagħżugħ. (1 Samwel 17:42-44) Għal dawk fuq iż-​żewġ naħat, li kienu qed jaraw x’inhu jiġri, kien jidher ċar x’se jkun it-​tmiem. Imma s-​setgħana mhux dejjem jirbħu l-​battalja. (Koħèlet 9:11) David ħareġ rebbieħ għax iġġieled bis-​saħħa taʼ Jehovah. Hu qal, “Il-​gwerra f’idejn il-​Mulej.” Ir-​rakkont Bibliku jgħid li “David . . . bi żbandola u b’ċagħqa [“wera li kien iktar b’saħħtu mill-​Filisti,” NW].”—1 Samwel 17:47, 50.

2. Il-​Kristjani f’liema tip taʼ ġlieda jieħdu sehem?

² Il-​Kristjani ma jiħdux sehem fi gwerer fiżiċi. Għalkemm jgħixu fil-​paċi maʼ kulħadd, huma għandhom taqbida spiritwali m’opponenti qawwijin ħafna. (Rumani 12:18) Fl-​aħħar kapitlu taʼ l-​ittra tiegħu lill-​Efesin, Pawlu ddeskriva ġlieda li tinvolvi lil kull Kristjan. Hu kiteb: “Għax il-​ġlieda tagħna m’hijiex kontra d-​demm u l-​laħam, imma kontra s-​Setgħat, kontra l-​Qawwiet, kontra l-​Prinċpijiet taʼ din id-​dinja taʼ dlamijiet, kontra l-​ispirti ħżiena li jgħammru fil-​wisaʼ tas-​smewwiet.”—Efesin 6:12.

3. Skond Efesin 6:10 (KŻ), x’għandna bżonn nagħmlu biex ikollna garanzija li se nirbħu?

³ Dawk “l-​ispirti ħżiena” huma Satana u d-​demonji, li jixtiequ jeqirdu r-​relazzjoni tagħna m’Alla Jehovah. Ladarba huma ferm iżjed b’saħħithom minna, aħna qegħdin f’sitwazzjoni simili għal dik taʼ David u ma nistgħux nirbħu jekk ma nistriħux fuq Alla għas-​saħħa. Tabilħaqq, Pawlu jħeġġiġna biex inkomplu ‘nissaħħu fil-​Mulej, u fil-​qawwa tas-​setgħa tiegħu.’ (Efesin 6:10, KŻ) Wara li jagħti dan il-​parir, l-​appostlu jiddeskrivi l-​provvedimenti spiritwali u l-​kwalitajiet Kristjani li jgħinuna noħorġu rebbiħin.—Efesin 6:11-17.

4. Liema żewġ punti prinċipali se nikkunsidraw f’dan l-​artiklu?

⁴ Issa ejja nanalizzaw x’tgħid l-​Iskrittura dwar il-​qawwiet u t-​tattiki taʼ l-​għadu tagħna. Imbagħad nikkunsidraw l-​istrateġija li għandna bżonn nużaw biex niddefendu u nipproteġu ruħna. Jekk insegwu l-​istruzzjonijiet taʼ Jehovah, nistgħu nkunu fiduċjużi li l-​għedewwa tagħna m’humiex se jegħlbuna.

Ġlieda Kontra l-​Ispirti Ħżiena

5. Il-​mod kif il-​lingwa oriġinali f’Efesin 6:12 tiddeskrivi din il-​ġlieda kif jgħinna nifhmu l-​istrateġija taʼ Satana?

⁵ Pawlu jispjega li “l-​ġlieda tagħna [hi] . . . kontra l-​ispirti ħżiena li jgħammru fil-​wisaʼ tas-​smewwiet.” M’għandniex xi ngħidu, l-​ispirtu mill-​agħar ewlieni hu Satana x-​Xitan, “il-​Prinċep tax-​xjaten.” (Mattew 12:24-26) Fil-​lingwa oriġinali, il-​Bibbja tiddeskrivi l-​ġlieda tagħna bħala wrestling, jew sarâr. Fil-​logħob tar-​wrestling li kien isir fil-​Greċja tal-​qedem, kull parteċipant kien jipprova jġiegħel lill-​opponent tiegħu jitlef il-​bilanċ sabiex iwaqqgħu fl-​art. Bl-​istess mod, ix-​Xitan iridna nitilfu l-​bilanċ spiritwali tagħna. Kif jistaʼ jġagħalna nitilfuh?

6. Uri mill-​Iskrittura kif ix-​Xitan jistaʼ juża tattiki differenti sabiex idgħajfilna l-​fidi tagħna.

⁶ Ix-​Xitan jistaʼ jaġixxi bħal serp, bħal iljun jgħajjat, jew saħansitra bħal anġlu tad-​dawl. (2 Korintin 11:3, 14; 1 Pietru 5:8) Hu jistaʼ juża l-​bnedmin biex jippersegwitawna jew jaqtgħulna qalbna. (Apokalissi 2:10) Ladarba Satana għandu d-​dinja kollha għad-​dispożizzjoni tiegħu, hu jistaʼ jagħmel użu sħiħ mix-​xewqat u l-​ġibdiet tagħha sabiex jaqbadna f’nassa. (2 Timotju 2:26; 1 Ġwanni 2:16; 5:19) Hu jistaʼ juża l-​ħsibijiet tad-​dinja jew taʼ l-​apostati biex iqarraq bina, sewwasew bħalma qarraq b’Eva.—1 Timotju 2:14.

7. X’limitazzjonijiet għandhom id-​demonji, u aħna x’vantaġġi ngawdu?

⁷ Għalkemm l-​armi u l-​qawwa taʼ Satana u d-​demonji tiegħu jistgħu jidhru b’saħħithom wisq għalina, huma għandhom il-​limitazzjonijiet tagħhom. Dawn l-​ispirti mill-​agħar ma jistgħux iġagħluna nagħmlu affarijiet ħżiena li ma jogħġbux lil Missierna tas-​sema. Aħna ġejna maħluqin bil-​kapaċità li nagħżlu x’inhu tajjeb u x’inhu ħażin, u għandna l-​kontroll fuq il-​ħsibijiet u l-​azzjonijiet tagħna. Iktar minn hekk, m’aħniex waħedna fil-​ġlieda. Dak li kien minnu fi żmien Eliżew hu minnu wkoll fi żmienna: “Hemm . . . aktar magħna milli magħhom.” (2 Slaten 6:16) Il-​Bibbja taċċertana li jekk nissottomettu lilna nfusna lejn Alla u nieqfu lix-​Xitan, dan se jaħrab minna.—Ġakbu 4:7.

Konxji tal-​Ħsibijiet taʼ Satana

8, 9. Satana liema provi ġab fuq Ġob sabiex ikissirlu l-​integrità tiegħu, u liema perikli spiritwali niffaċċjaw illum?

⁸ Aħna nafu bil-​ħsibijiet, jew pjanijiet, taʼ Satana għax l-​Iskrittura tikxef it-​tattiki bażiċi tiegħu. (2 Korintin 2:11) Kontra r-​raġel ġust Ġob, ix-​Xitan uża problemi ekonomiċi kbar, il-​mewt taʼ wħud maħbubin, l-​oppożizzjoni fil-​familja, it-​tbatija fiżika, u l-​kritika mhux ġustifikata minn ħbieb foloz. Ġob kien dipress u ħass li Alla kien abbandunah. (Ġob 10:1, 2) Għalkemm illum Satana għandu mnejn ma jaqlax dawn il-​problemi direttament, ħafna Kristjani jintlaqtu minn diffikultajiet bħal dawn, u x-​Xitan jistaʼ jużahom għall-​vantaġġ tiegħu.

⁹ Il-​perikli spiritwali żdiedu b’pass mgħaġġel f’dan iż-​żmien tat-​tmiem. Aħna ngħixu f’dinja fejn il-​ġiri wara l-​affarijiet materjali jiġi qabel il-​miri spiritwali. Il-​mezzi tax-​xandir jibqgħu jpinġu s-​sess illeċitu bħala sors taʼ hena minflok taʼ qsim il-​qalb. U l-​maġġuranza saru “jħobbu aktar il-​pjaċir milli ’l Alla.” (2 Timotju 3:1-5) Dan il-​mod taʼ ħsieb jistaʼ jhedded il-​bilanċ spiritwali tagħna jekk ma ‘niġġildux bl-​aħrax għall-​fidi.’—Ġuda 3, NW.

10-12. (a) X’kienet waħda mit-​twissijiet li ta Ġesù fit-​tixbiha tiegħu dwar ir-​raġel li ħareġ jiżraʼ? (b) Uri kif il-​valuri spiritwali jistgħu jinħonqu.

¹⁰ Waħda mill-​iktar tattiki li jirnexxu taʼ Satana hija dik li jaljenana permezz taʼ din id-​dinja u bil-​ġiri materjalistiku tagħha. Fit-​tixbiha tiegħu dwar ir-​raġel li ħareġ jiżraʼ, Ġesù wissa li f’xi każi ‘l-​inkwiet żejjed għall-​ħwejjeġ tad-​dinja u l-​ġibda għall-​ġid taʼ l-​art joħonqu l-​kelma’ tas-​Saltna. (Mattew 13:18, 22) Il-​kelma Griega li hawnhekk hi tradotta ‘joħonqu’ tfisser “tgħallaq kompletament.”

¹¹ Fil-​foresti tropikali, wieħed jistaʼ jsib tip taʼ siġra tat-​tin li toħnoq siġar oħrajn. Din is-​siġra tikber bil-​mod waqt li tixxeblek maz-​zokk tas-​siġra li tgħix minn fuqha. Ftit ftit l-​għeruq tat-​tina, li jibqgħu jissaħħu, idawru s-​siġra l-​oħra u jgħattuha. Il-​ħafna għeruq tat-​tina eventwalment jassorbu l-​biċċa l-​kbira tas-​sustanzi tal-​ħamrija mal-​bażi tas-​siġra, filwaqt li l-​friegħi jgħattulha d-​dawl. Fl-​aħħar, is-​siġra l-​oħra tmut.

¹² B’mod simili, l-​ansjetajiet taʼ din is-​sistema u t-​tfittxija għall-​għana u stil taʼ ħajja komdu jistgħu bil-​mod il-​mod jiħdulna iktar u iktar mill-​ħin u l-​enerġija tagħna. Bl-​attenzjoni tagħna mitfugħa fuq l-​affarijiet tad-​dinja, nistgħu faċilment nittraskuraw l-​istudju persunali tal-​Bibbja u niħduha drawwa li nitilfu l-​laqgħat Kristjani. B’hekk, ninqatgħu min-​nutriment spiritwali. Il-​miri materjalistiċi issa jkunu ħadu post l-​attivitajiet spiritwali, u fl-​aħħar insiru priża faċli għal Satana.

Jeħtieġ li Niqfulu

13, 14. Liema waqfa rridu nieħdu meta jopponina Satana?

¹³ Pawlu ħeġġeġ lil sħabu fit-​twemmin biex ‘jieqfu għat-​tnassis tax-​Xitan.’ (Efesin 6:11) M’għandniex xi ngħidu, aħna ma nistgħux neqirdu lix-​Xitan u d-​demonji tiegħu. Alla ta dan l-​inkarigu lil Ġesù Kristu. (Apokalissi 20:1, 2) Madankollu, sakemm Satana jitneħħa min-​nofs, irridu nibqgħu ‘niqfulu’ sabiex l-​attakki tiegħu ma jegħlbuniex.

¹⁴ L-​appostlu Pietru wkoll enfasizza l-​bżonn li nieqfu lil Satana. “Kunu meqjusa u għassu,” kiteb Pietru. “L-​għadu tagħkom ix-​Xitan qisu ljun jgħajjat, idur u jfittex ’il min sa jiblaʼ. Iqfulu, sħaħ fil-​fidi. Intom tafu li ħutkom, mxerrdin fid-​dinja, qegħdin jaqsmu magħkom l-​istess tbatijiet tagħkom.” (1 Pietru 5:8, 9) Fil-​fatt, l-​appoġġ taʼ ħutna spiritwali huwa vitali għalina biex inkunu nifilħu nieqfu lix-​Xitan meta dan jattakkana bħal iljun jgħajjat.

15, 16. Agħti eżempju Skritturali biex turi kif l-​appoġġ taʼ sħabna l-​Kristjani jistaʼ jgħinna nżommu sod.

¹⁵ Fil-​pjanuri taʼ l-​Afrika, meta jkun hemm xi ljun jgħajjat fil-​viċin, iċ-​ċriev jirreaġixxu billi jitilqu jiġru kemm jifilħu sakemm ikunu ’l bogħod mill-​periklu. Madankollu, l-​iljunfanti huma t’eżempju fil-​mod kif jgħinu u jappoġġaw lil xulxin. Il-​ktieb Elephants—Gentle Giants of Africa and Asia jispjega li normalment l-​iljunfanti f’merħla jiddefendu ruħhom billi jifformaw ċirku, bl-​iljunfanti l-​kbar fuq barra, wiċċhom lejn it-​theddida, u ż-​żgħar protetti f’nofshom. X’ħin l-​iljuni jaraw il-​qawwa taʼ l-​iljunfanti u l-​appoġġ li dawn jagħtu lil xulxin, rari jattakkaw saħansitra lill-​iljunfanti ż-​żgħar.

¹⁶ B’mod simili, meta nkunu mheddin minn Satana u d-​demonji tiegħu, irridu nibqgħu flimkien, spalla maʼ spalla maʼ ħutna li huma sodi fil-​fidi. Pawlu qal li xi wħud minn sħabu l-​Kristjani taw prova li kienu ‘għajnuna li ssaħħaħ’ għalih fiż-​żmien li għamel il-​ħabs f’Ruma. (Kolossin 4:10, 11, NW) Il-​kelma Griega tradotta ‘għajnuna li ssaħħaħ’ tidher darba biss fl-​Iskrittura Griega Kristjana. Skond l-​Expository Dictionary of New Testament Words taʼ Vine, “forma verbali tal-​kelma tfisser mediċina li ttaffi l-​irritazzjoni.” Bħal ingwent li jtaffi l-​uġigħ, l-​appoġġ li jagħtu aduraturi maturi taʼ Jehovah jistaʼ jnaqqas l-​uġigħ kaġunat minn tbatija fiżika jew emozzjonali.

17. X’jistaʼ jgħinna nuru fedeltà lejn Alla?

¹⁷ Illum l-​inkuraġġiment minn sħabna l-​Kristjani jistaʼ jsaħħilna d-​determinazzjoni tagħna biex naqdu lil Alla fedelment. L-​anzjani Kristjani huma ħerqana b’mod speċjali biex jagħtuna l-​għajnuna spiritwali. (Ġakbu 5:13-15) Fost l-​għajnuniet li għandna biex nuru fedeltà hemm l-​istudju regulari tal-​Bibbja u l-​attendenza għal-​laqgħat, l-​assembleat, u l-​konvenzjonijiet Kristjani. Ir-​relazzjoni mill-​qrib tagħna m’Alla tgħinna nibqgħu nuru fedeltà. Tabilħaqq, sew jekk nieklu, sew jekk nixorbu, nagħmlu x’nagħmlu, għandna nagħmlu kollox għall-​glorja t’Alla. (1 Korintin 10:31) Naturalment, li nistrieħu fuq Jehovah bit-​talb hu essenzjali biex inkomplu ngħixu b’tali mod li nogħġbuh.—Salm 37:5.

18. Għala m’għandniex naqtgħu qalbna saħansitra jekk nispiċċaw bla saħħa minħabba ċirkustanzi taʼ niket?

¹⁸ Kultant, l-​attakki taʼ Satana jiġu meta ma nħossuniex b’saħħitna spiritwalment. L-​iljun jaqbeż fuq annimal dgħajjef. Il-​problemi fil-​familja, id-​diffikultajiet ekonomiċi, jew il-​mard jistgħu jħalluna bla saħħa spiritwalment. Imma ejja ma naqtgħux qalbna u nkomplu nagħmlu dak li jogħġob lil Alla, għax Pawlu qal: “Meta nkun dgħajjef, nkun qawwi.” (2 Korintin 12:10; Galatin 6:9; 2 Tessalonikin 3:13) X’ried ifisser? Hu ried jgħid li l-​qawwa t’Alla tistaʼ tagħmel tajjeb għad-​dgħjufijiet umani tagħna, dment li nduru lejn Jehovah għas-​saħħa. Ir-​rebħa taʼ David fuq Gulija turi li Alla kapaċi jsaħħaħ lill-​poplu tiegħu u li fil-​fatt hekk jagħmel. Ix-​Xhieda taʼ Jehovah taʼ żmienna jistgħu jixhdu li f’mumenti taʼ kriżi estrema ħassew l-​id t’Alla ssaħħaħhom.—Danjel 10:19.

19. Agħti eżempju biex turi kif Jehovah jistaʼ jsaħħaħ lill-​qaddejja tiegħu.

¹⁹ Rigward l-​appoġġ li tahom Alla, tnejn miżżewġin qalu: “Matul is-​snin, aħna qdejna lil Jehovah bħala koppja miżżewġa, u gawdejna ħafna barkiet u sirna nafu ħafna nies mill-​aħjar. Ġejna wkoll imħarrġin u msaħħin minn Jehovah biex nissaportu d-​diffikultajiet b’suċċess. Bħal Ġob, mhux dejjem fhimna għala l-​affarijiet ġraw kif ġraw, imma konna nafu li Jehovah kien dejjem lest biex jgħinna.”

20. Liema prova Skritturali turi li Jehovah dejjem jgħin lill-​poplu tiegħu?

²⁰ Id Jehovah m’hijiex qasira żżejjed biex tgħin u ssaħħaħ lill-​poplu leali tiegħu. (Isaija 59:1) Is-​salmista David kanta: “Iwieżen il-​Mulej ’il kull min se jaqaʼ, iqajjem ’il kull min hu mitluq.” (Salm 145:14) Tabilħaqq, Missierna tas-​sema kuljum “jieħu ħsiebna” u jipprovdilna dak li għandna bżonn.—Salm 68:20 (68:19, NW).

Neħtieġu l-​Armatura Kollha t’Alla

21. Pawlu kif enfasizza l-​bżonn taʼ l-​armatura spiritwali?

²¹ Għadna kemm ikkunsidrajna xi ftit mill-​metodi taʼ Satana u rajna l-​bżonn li niqfulu minkejja l-​attakki tiegħu. Issa rridu nikkunsidraw għajnuna vitali oħra li għandna biex niddefendu l-​fidi tagħna b’suċċess. Fl-​ittra tiegħu lill-​Efesin, l-​appostlu Pawlu semma darbtejn fattur essenzjali li neħtieġu biex inkunu nifilħu nieqfu għat-​tnassis taʼ Satana u biex nirnexxu fil-​ġlieda tagħna kontra l-​ispirti mill-​agħar. Pawlu kiteb: “Ilbsu l-​armatura [“kollha,” KŻ] taʼ Alla biex tkunu tifilħu tieqfu għat-​tnassis tax-​Xitan . . . Ħudu fuqkom l-​armatura [“kollha,” KŻ] taʼ Alla, ħalli tkunu tistgħu tieqfu fi żmien il-​ħażen, u, wara li tkunu għamiltu ħilitkom kollha, żżommu weqfin.”—Efesin 6:11, 13.

22, 23. (a) X’tinkludi l-​armatura spiritwali tagħna? (b) X’se nikkunsidraw fl-​artiklu li jmiss?

²² Iva, aħna għandna bżonn nilbsu “l-​armatura [“kollha,” “KŻ”] taʼ Alla.” (Korsiv tagħna.) Meta Pawlu kiteb l-​ittra tiegħu lill-​Efesin, hu kien mgħasses minn suldat Ruman, li xi drabi għandu mnejn kien jilbes l-​armatura kollha. Madankollu, kien b’ispirazzjoni divina li l-​appostlu ġie mqanqal jiddiskuti l-​armatura spiritwali li kull qaddej taʼ Jehovah jeħtieġ b’mod vitali.

²³ Din l-​armatura mogħtija minn Alla tinkludi l-​kwalitajiet li għandu jkollu kull Kristjan kif ukoll il-​provvedimenti spiritwali taʼ Jehovah. Fl-​artiklu li jmiss se neżaminaw l-​armatura spiritwali biċċa biċċa. Dan se jgħinna niddeterminaw kemm aħna armati għall-​gwerra spiritwali tagħna. Fl-​istess ħin se naraw kif l-​eżempju mill-​aqwa taʼ Ġesù Kristu jgħinna nieqfu b’suċċess lil Satana x-​Xitan.

Int Kif Twieġeb?

• Il-​Kristjani kollha liema ġlieda għandhom?

• Iddeskrivi xi ftit mit-​tattiki taʼ Satana.

• Kif jistaʼ jsaħħaħna l-​appoġġ taʼ sħabna fit-​twemmin?

• Fuq is-​saħħa taʼ min irridu nistrieħu, u għala?

[Stampi f’paġna 11]

Il-​Kristjani għandhom ‘ġlieda kontra l-​ispirti ħżiena’

[Stampa f’paġna 12]

L-​ansjetajiet taʼ din is-​sistema jistgħu joħonqu l-​kelma tas-​Saltna

[Stampa f’paġna 13]

Il-​Kristjani sħabna jistgħu jkunu ‘għajnuna li ssaħħaħ’

[Stampa f’paġna 14]

Titolbu lil Alla biex isaħħek?