Għannu Tifħir lil Jehovah

“Ħallini ngħanni lil Jehovah, għax hu sar eżaltat fil-​għoli.”—EŻODU 15:1.

1. Liema attributi u kwalitajiet taʼ Jehovah jagħtuna raġuni biex infaħħruh?

SALM 150 tlettax-il darba jagħti l-​kmand biex wieħed ifaħħar lil Jehovah jew lil Jah. L-​aħħar vers jipproklama: “Kull ħaġa li qiegħda tieħu n-​nifs​—ħalli din tfaħħar lil Jah. Faħħru lil Jah!” Bħala Xhieda taʼ Jehovah, aħna nafu li Jehovah jixraqlu t-​tifħir tagħna. Huwa s-​Sovran Universali, l-​Iktar Għoli, is-​Sultan taʼ l-​eternità, il-​Ħallieq tagħna, il-​Benefattur tagħna. M’hawnx daqsu, bħalu, taʼ mparu, huwa uniku, f’ħafna modi. Għandu għarfien infinit, huwa omnipotenti, perfett fil-​ġustizzja, u l-​personifikazzjoni taʼ l-​imħabba. Hu fuq l-​oħrajn kollha huwa tajjeb; huwa leali. (Luqa 18:19; Rivelazzjoni 15:3, 4) Jixraqlu t-​tifħir tagħna? Ċertament tabilħaqq li jixraqlu!

2. Liema raġunijiet għandna għal li nesprimu gratitudni lil Jehovah?

² Jehovah jixraqlu mhux biss il-​qima u t-​tifħir tagħna imma wkoll il-​gratitudni u r-​radd il-​ħajr tagħna għal dak kollu li għamel għalina. Huwa d-​Donatur taʼ “kull għotja tajba u kull rigal perfett.” (Ġakbu 1:17) Huwa l-​Għajn, is-​Sors, tal-​ħajja kollha. (Salm 36:9) L-​affarijiet kollha li ngawdu bħala membri tar-​razza umana jiġu mingħandu, għax huwa l-​Ħallieq Grandjuż tagħna. (Isaija 42:5) Huwa wkoll id-​Donatur tal-​barkiet spiritwali kollha li jiġu għandna permezz taʼ l-​ispirtu tiegħu, l-​organizzazzjoni tiegħu, u l-​Kelma tiegħu. Għandna l-​maħfra tad-​dnubiet fuq il-​bażi taʼ li hu pprovda lil Ibnu bħala r-​rahan tagħna. (Ġwann 3:16) Għandna t-​tama tas-​Saltna taʼ ‘smewwiet ġodda u art ġdida li fihom it-​tjieba se tgħammar.’ (2 Pietru 3:13) Għandna sħubija mill-​aħjar maʼ Kristjani sħabna. (Rumani 1:11, 12) Għandna l-​unur u l-​barkiet taʼ li aħna x-​Xhieda tiegħu. (Isaija 43:10-12) U għandna l-​privileġġ prezzjuż tat-​talb. (Mattew 6:9-13) Verament, għandna bosta raġunijiet biex niżżu ħajr lil Jehovah!

Modi Li Bihom Nistgħu Nfaħħru Lil Jehovah

3. B’liema modi diversi nistgħu nfaħħru lil Jehovah u nesprimu l-​gratitudni tagħna lejh?

³ Kif nistgħu aħna, bħala l-​qaddejja devoti taʼ Jehovah, infaħħruh u nesprimu l-​gratitudni tagħna? Nistgħu nagħmlu dan billi nieħdu sehem fil-​ministeru Kristjan​—nagħtu xiehda minn dar għal dar, nagħmlu żjajjar lura, nikkonduċu studji tal-​Bibbja, u nieħdu sehem fil-​għoti taʼ xiehda fit-​toroq. Nistgħu nfaħħruh ukoll billi nagħtu xiehda informalment kulmeta tippreżenta ruħha l-​opportunità. Jerġaʼ, nistgħu nfaħħru lil Jehovah permezz tal-​kondotta retta tagħna, saħansitra permezz tal-​mod pulit u modest li bih nilbsu u nżommu ruħna. Ix-​Xhieda taʼ Jehovah spiss ġew imfaħħrin talli huma eżemplari f’dan ir-​rigward. Barra minn hekk, nistgħu nfaħħru lil Jehovah u niżżuh ħajr permezz tat-​talb.​—Ara 1 Kronaki 29:10-13.

4. Liema hu wieħed mill-​isbaħ modi kif nistgħu nfaħħru lil Missierna tas-​sema li jħobb?

⁴ Iżjed minn hekk, wieħed mill-​isbaħ modi li bih nistgħu nfaħħru lil Missierna tas-​sema li jħobb huwa billi neżaltaw lilu u lill-​virtujiet tiegħu b’għanjiet melodjużi tas-​Saltna. Ħafna mużiċisti u kompożituri jaqblu li l-​isbaħ strument tal-​mużika huwa l-​vuċi umana. L-​għorrief tal-​mużika klassika ġew imnebbħin biex jiktbu l-​opri għaliex hemm tant sodisfazzjon f’li wieħed jismaʼ l-​vuċi umana fil-​għana.

5. Għal liema raġunijiet għandna nieħdu l-​għana tagħna taʼ l-​għanjiet tas-​Saltna bis-​serjetà?

⁵ Jehovah bil-​fors li jieħu pjaċir jismaʼ lill-​bnedmin jgħannu, b’mod speċjali meta jkunu qegħdin jgħannu għanjiet taʼ tifħir u gratitudni! Ċertament allura, għandna nieħdu bis-​serjetà l-​għana tagħna taʼ għanjiet tas-Saltna fid-​diversi laqgħat tagħna flimkien—laqgħat tal-​kongregazzjoni, assembleat tas-circuit, jiem taʼ assembleat speċjali, konvenzjonijiet distrettwali, u konvenzjonijiet internazzjonali. Il-​ktieb taʼ l-​għanjiet tagħna huwa kotran b’melodiji verament taʼ għaxqa, li l-​ġmiel tagħhom ġie spiss imfaħħar minn dawk li m’humiex Xhieda. Iktar ma nidħlu fl-​ispirtu taʼ li ngħannu l-​għanjiet tas-​Saltna, iktar nagħtu pjaċir lil oħrajn u nkunu taʼ benefiċċju għalina nfusna.

Għana Taʼ Tifħir Lil Jehovah Fi Żminijiet Bibliċi

6. L-​Iżraeliti kif esprimew apprezzament għall-​ħelsien tagħhom ħdejn il-​Baħar l-​Aħmar?

⁶ Il-​Kelma t’Alla tgħidilna li Mosè u l-​bqija taʼ l-​Iżraeliti għannew trijonfalment malli ġew meħlusin mill-​armata taʼ Farawni fil-​Baħar l-​Aħmar. L-​għanja tagħhom bdiet bil-​kelmiet: “Ħallini ngħanni lil Jehovah, għax hu sar eżaltat fil-​għoli. Iż-​żiemel u r-​rikkieb tiegħu hu xeħet fil-​baħar. Saħħti u s-​setgħa tiegħi hu Jah, ladarba jservi għas-​salvazzjoni tiegħi. Dan hu Alla tiegħi, u jien se nfaħħru.” (Eżodu 15:1, 2) Aħna nistgħu nimmaġinaw tajjeb l-​entużjażmu u l-​ferħ taʼ l-​Iżraeliti hekk kif għannew dawk il-​kelmiet wara l-​ħelsien mirakoluż tagħhom!

7. L-​Iskrittura Ebrajka ssemmi liema okkażjonijiet notevoli oħrajn fejn l-​Iżraeliti qegħdin ifaħħru lil Jehovah bil-​għana?

⁷ Fl-​1 Kronaki 16:1, 4-36, naqraw li Jehovah ġie mfaħħar bil-​għana u bid-​daqq taʼ strumenti mużikali meta David ġab l-​arka lejn Ġerusalemm. Dik kienet okkażjoni verament taʼ ferħ. Kien hemm ukoll għana taʼ tifħir lil Jehovah akkumpanjat b’mużika strumentali fiż-​żmien meta s-​Sultan Salamun iddedika t-​tempju f’Ġerusalemm. Naqraw fit-​2 Kronaki 5:13, 14: “Ġara li malli t-​trumbettiera u l-​għannejja kienu bħal wieħed f’li jikkaġunaw ħoss wieħed biex jinstemaʼ f’li jfaħħru u jiżżu ħajr lil Jehovah, u malli għollew il-​ħoss bit-​trumbetti u biċ-​ċimbli u bl-​istrumenti taʼ l-​għana u b’li jfaħħru lil Jehovah, ‘għax huwa tajjeb, għax għal żmien indefinit hija l-​qalb tajba bl-​imħabba tiegħu,’ id-​dar infisha mtliet bi sħaba, l-​istess dar taʼ Jehovah, u l-​qassisin ma setgħux iqumu bil-​wieqfa biex jimministraw minħabba fis-​sħaba; għax il-​glorja taʼ Jehovah imliet id-​dar taʼ dak Alla veru.” Dak x’juri? Li Jehovah kien qiegħed jismaʼ dan it-tifħir melodjuż u kien ukoll kuntent bih, bħalma kien indikat mis-​sħaba soprannaturali. Iktar tard, kien hemm għana minn żewġ korijiet fiż-​żmien taʼ l-​inawgurazzjoni tal-​ħitan taʼ Ġerusalemm fi żmien Neħemija.—Neħemija 12:27-42.

8. Liema ħaġa turi li l-​għana kien jittieħed bis-​serjetà mill-​Iżraeliti?

⁸ Fil-​fatt, l-​għana kien tant parti importanti mill-​qima fit-​tempju li 4,000 Levit kienu mqegħdin apparti għal servizz mużikali. (1 Kronaki 23:4, 5) Dawn kienu jakkumpanjaw lill-​għannejja. Il-​mużika, speċjalment l-​għannejja, okkupat post importanti fil-​qima, mhux neċessarjament biex tnissel il-​kwistjonijiet iktar peżanti tal-​Liġi, imma sabiex tipprovdi l-​ispirtu xieraq għall-​qima. Din għenet lill-​Iżraeliti biex iqimu lil Jehovah b’mod spirituż. Innota t-​tħejjija u l-​attenzjoni għad-​dettal li kienu ddedikati lil din il-​karatteristika: “In-​numru tagħhom flimkien maʼ ħuthom imħarrġin fil-​għana lil Jehovah, esperti kollha, ġew li jkunu mitejn u tmienja u tmenin.” (1 Kronaki 25:7) Innota kemm ħaduh bis-​serjetà l-​għana taʼ tifħir lil Jehovah. Kienu mħarrġin fil-​għana u kienu esperti!

9. Liema enfasi tingħata lill-​għana fl-​Iskrittura Griega Kristjana?

⁹ Billi niġu għall-​ewwel seklu taʼ l-​era komuni tagħna, x’insibu? Ġesù, fil-​lejl tat-​tradiment tiegħu, b’tant kwistjonijiet peżanti fuq moħħu, xorta waħda ħass il-​ħtieġa li jikkonkludi ċ-​ċelebrazzjoni tal-​Qbiż u l-​istituzzjoni tal-​Mafkar tal-​mewt tiegħu billi jgħanni tifħir lil Jehovah. (Mattew 26:30) Ukoll, naqraw li “għall-​ħabta taʼ nofs il-​lejl,” Pawlu u Silas, wara li ġew imsawtin u mitfugħin fil-​ħabs, “kienu qegħdin jitolbu u jfaħħru lil Alla b’għanjiet; iva, il-​ħabsin kienu qegħdin jisimgħuhom.”—Atti 16:25.

Ngħannu Tifħir ​—Parti Importanti Mill-​Qima Tagħna

10. Il-​Kelma t’Alla tagħti liema kmandi inkwantu għal li nfaħħruh bil-​għana?

¹⁰ Tħoss forsi int li l-​għana taʼ l-​għanjiet tas-​Saltna m’huwiex importanti biżżejjed għalik biex tagħtih l-​attenzjoni tiegħek mill-​qalb? Jekk inhu hekk, m’għandekx int tiżen il-​kwistjoni mill-​ġdid, minħabba l-​importanza li Alla Jehovah u Ġesù Kristu jpoġġu fuq l-​għana taʼ tifħir? Iva, il-​Kelma t’Alla hija mimlija bi kmandi biex infaħħru lil Jehovah u ngħannu tifħir lilu! Per eżempju, f’​Isaija 42:10, naqraw: “Għannu lil Jehovah għanja ġdida, it-​tifħir tiegħu mill-​estremità taʼ l-​art, intom il-​bnedmin li neżlin lejn il-​baħar u lejn dak li jimlieh, intom il-​gżejjer u intom li qegħdin tgħammru fihom.”—Ara wkoll Salm 96:1; 98:1.

11. L-​appostlu Pawlu ta liema twissija inkwantu għall-​għana?

¹¹ L-​appostlu Pawlu kien jaf li l-​għana setaʼ jedifikana, u għalhekk wissiena darbtejn fuq il-​kwistjoni. Naqraw f’​Efesin 5:​18, 19: “Komplu imtlew bl-​ispirtu, billi tkellmu lilkom infuskom b’salmi u tifħir lil Alla u għanjiet spiritwali, billi tgħannu u takkumpanjaw lilkom infuskom bil-​mużika fi qlubkom lil Jehovah.” U F’Kolossin 3:16, naqraw: “Ħalli l-​kelma tal-​Kristu tgħammar fikom b’mod għani fil-​għerf kollu. Komplu għallmu u widdbu lil xulxin b’salmi, tifħir lil Alla, għanjiet spiritwali bi ħlewwa, billi tgħannu fi qlubkom lil Jehovah.”

12. Liema eżempji għandna taʼ li l-​għanjiet tagħna jgħinuna biex ngħallmu u nwiddbu lil xulxin?

¹² Innota li f’kull każ Pawlu jagħmel referenzi ripetuti għall-​għana, meta jsemmi ‘salmi, tifħir lil Alla, għanjiet spiritwali, billi tgħannu bil-​mużika fi qlubkom.’ Ukoll, hu jintroduċi r-​rimarki tiegħu lill-​Kolossin billi jgħid li b’dan il-​mod aħna nistgħu nkunu qegħdin ‘ngħallmu u nwiddbu lil xulxin.’ U dak hu ċertament li nagħmlu, bħalma jistaʼ jidher mill-​istess titli taʼ l-​għanjiet tagħna​—“Il-​Ħolqien Kollu Jbierek lil Jehovah!” (numru 5), “Nibqgħu Sodi, Bla Ma Nitħarrku!” (numru 10), “Kun Hieni bit-​Tama tas-​Saltna!” (numru 16), “Tibżgħux minnhom!” (numru 27), “Infaħħru lil Jehovah Alla Tagħna!” (numru 100), biex nagħtu biss ftit eżempji.

13. “L-​irsir fidil u diskret” kif wera l-​importanza taʼ l-​għana bħala parti mill-​qima tagħna?

¹³ F’armonija maʼ dawn il-​kmandi, “l-​irsir fidil u diskret” irranġa li l-​laqgħat tagħna flimkien​—laqgħat tal-​kongregazzjoni, assembleat tas-​circuit, jiem taʼ assemblea speċjali, konvenzjonijiet distrettwali, u konvenzjonijiet internazzjonali—​jiftħu u jagħlqu bil-​għana taʼ għanjiet tas-​Saltna. (Mattew 24:45) Iżjed minn hekk, għanjiet huma mqegħdin fl-​iskeda biex jiġu kantati f’ħinijiet oħrajn matul dawn il-​laqgħat flimkien. Ladarba l-​laqgħat tagħna s-​soltu jibdew bil-​għana taʼ għanja tas-​Saltna, m’għandniex nagħmluh il-​punt li naslu fil-​ħin, kmieni biżżejjed sabiex nieħdu sehem f’dik il-​parti tal-​qima tagħna? U ladarba l-​laqgħat jispiċċaw bil-​għana, m’għandniex nibqgħu sa l-​għanja taʼ l-​għeluq u t-​talba li ssegwiha immedjatament?

14. Liema eżempji għandna fejn għanjiet li jixirqu jiġu magħżulin għall-​programmi tagħna?

¹⁴ L-​għanjiet fil-​laqgħat tagħna jiġu magħżulin bil-​għaqal sabiex ikunu f’armonija mal-​programm. Per eżempju, fil-​Konvenzjonijiet Distrettwali “Tagħlim Divin” fl-​1993, għanja numru 191, “Għożż il-​Verità,” li tinkuraġġixxi lill-​Kristjani biex jitqabdu maʼ Satana, mad-​dinja, u mal-​laħam imwaqqaʼ, segwiet immedjatament lit-​tliet taħditiet li ttrattaw dwar dawn l-​għedewwa. Bl-​istess mod, għanja numru 164, “It-​Tfal​—Għotjiet Prezzjużi mingħand Alla,” li fiha ħafna twissijiet lill-​ġenituri, segwiet dritt wara taħdita li enfasizzat l-​obbligi tal-​ġenituri biex iħarrġu lil uliedhom. Għanja numru 70, “Kun bħal Ġeremija,” tgħanniet qabel serje taʼ taħditiet ibbażati fuq il-​profeziji taʼ Ġeremija. U wara symposium fuq diversi aspetti tal-​ministeru tagħna tas-​Saltna ġiet għanja numru 156, “Irrid,” għanja orjentata ferm lejn is-​servizz. L-​istess attenzjoni tiġi eżerċitata f’li jingħażlu għanjiet għall-​Istudju tat-​Torri Taʼ L-​Għassa, il-​Laqgħa tas-​Servizz, u l-​Iskola tal-​Ministeru Teokratiku. Fi qbil maʼ dan, meta l-​anzjani jagħtu taħditiet pubbliċi u jindikaw l-​għanja li għandha tiġi wżata biex tiftaħ il-​programm, għandhom jagħżlu għanja li tixraq lit-​tema tat-​taħdita tagħhom.

15. Iċ-​chairman tal-​laqgħa kif jistaʼ jkabbar l-​apprezzament lejn l-​għanja li trid titkanta?

¹⁵ F’li jħabbar l-​għanja li trid titkanta, iċ-​chairman jistaʼ jkabbar l-​apprezzament lejn l-​għanja billi jagħti t-​titlu jew it-​tema tagħha. Aħna ma ngħannux numri imma temi Skritturali. Ukoll, ikun taʼ għajnuna għall-​kongregazzjoni biex tapprezza iktar l-​għanja jekk l-​iskrittura mogħtija taħt it-​titlu tiġi nnotata. Jerġaʼ mbagħad, ftit rimarki jistgħu jkunu addattati, bħal per eżempju li din l-​għanja għandha tiġi kantata b’kordjalità, sentiment, ferħ, jew fiduċja qalbiena, jiddependi min-​natura emozzjonali taʼ l-​għanja.

Uri Apprezzament Lejn It-​Tjubija Taʼ Jehovah Billi Tgħanni

16. Kif nistgħu aħna nidħlu fl-​ispirtu taʼ l-​għanjiet tagħna?

¹⁶ Ladarba l-​versi taʼ l-​għanjiet tas-​Saltna tagħna huma mimlijin tifsir, għandna bżonn nikkonċentraw fuq il-​kliem waqt li ngħannuh. Irridu nidħlu fl-​ispirtu taʼ kull għanja. Xi wħud minnhom, bħal dawk li jittrattaw dwar l-​imħabba, frotta taʼ l-​ispirtu, iqanqlu l-​qalb. (Galatin 5:22) Dawn ngħannuhom b’intensità u kordjalità. Oħrajn huma ferriħin, u għandna nipprovaw ngħannuhom b’mod hieni. Jerġaʼ oħrajn huma għanjiet vigorużi taʼ immarċjar, u dawn għandhom jitkantaw b’entużjażmu u fiduċja qawwija. Fl-​Iskola tal-​Ministeru Teokratiku tagħna, ningħataw parir sabiex nesprimu kordjalità u sentiment kif ukoll entużjażmu fil-​preżentazzjonijiet tagħna. Li nuru kordjalità, sentiment, u entużjażmu meta nkunu qegħdin ngħannu l-​għanjiet tagħna huwa saħansitra iktar importanti.

17. (a) Liema ċensura mogħtija lill-​Iżraeliti m’humiex leali ma rridux aħna li tkun tapplika għall-​għana tagħna? (b) Liema ħaġa tirriżulta meta nieħdu bis-​serjetà t-​twissija li jkun hemm fil-​għanjiet tagħna?

¹⁷ Kieku kellna ngħannu l-​għanjiet tas-​Saltna tagħna bl-​imħuħ tagħna fuq affarijiet oħrajn, billi ma napprezzawx bis-​sħiħ it-​tifsir tal-​kliem, ma nkunux aħna kemmxejn bħall-​Iżraeliti m’humiex leali li kienu mwiddbin għaliex, waqt li faħħru lil Alla b’xofftejhom, qlubhom kienu mbegħdin minnu? (Mattew 15:8) Ma rridux li dik iċ-​ċensura tapplika għall-​mod tagħna taʼ kif ngħannu l-​għanjiet tas-​Saltna, hux tassew? Billi nagħmlu ġustizzja lill-​għana taʼ l-​għanjiet tas-​Saltna tagħna, aħna se nistimulaw mhux biss lilna nfusna imma wkoll lil dawk li jkunu madwarna, inklużi ż-​żgħażagħ. Iva, jekk dawk kollha li jgħannu fis-​Swali tas-​Saltna tagħna jieħdu bis-​serjetà t-​twissijiet li fihom dawn l-​għanjiet, dan kieku jkun inkuraġġiment taʼ qawwa biex inkunu żelużi fil-​ministeru u nevitaw in-​nasbiet taʼ l-​għemil ħażin.

18. L-​għana taʼ l-​għanjiet tas-​Saltna liema effett kellu fuq ċerta mara?

¹⁸ Darba wara l-​oħra, dawk li m’humiex Xhieda jiġu impressjonati bil-​għana tagħna taʼ għanjiet tas-​Saltna. It-​Torri Taʼ L-​Għassa darba ppubblika dan is-​suġġett: “Li l-​għana [tagħna] jistaʼ jservi wkoll biex iġib lil bnedmin għal għarfien taʼ Alla Jehovah kien muri minn esperjenza taʼ mara li ġiet mgħammda fl-​Assemblea ‘Divine Victory’ (‘Rebħa Divina’) fl-​1973, li saret fil-​Yankee Stadium, fil-​belt taʼ New York. Hi kienet għamlet l-​ewwel żjara tagħha f’Sala tas-​Saltna lokali waħedha u qagħdet għaż-​żewġ laqgħat. Waqt li l-​kongregazzjoni għanniet . . . ‘Ibqaʼ Għożż ir-​Rigal!,’ hi tant ġiet impressjonata kemm bil-​kelmiet u kemm bil-​mod kif ġew kantati li ddeċidiet li dan kien fejn hi riedet li tkun. Wara dan hi avviċinat lil waħda mix-​Xhieda u talbet studju tal-​Bibbja, u pprogressat dritt ’il quddiem lejn li ssir xhud Kristjana taʼ Jehovah.”

19. Liema inkuraġġiment finali hu mogħti inkwantu għal li ngħannu l-​għanjiet tas-​Saltna tagħna b’qalbna kollha?

¹⁹ Fil-​biċċa l-​kbira tal-​laqgħat tagħna, hemm komparattivament ftit opportunitajiet biex l-​udjenza jesprimu s-​sentimenti u l-​apprezzament tagħhom. Imma lkoll kemm aħna nistgħu nesprimu l-​mod kif inħossuna dwar it-​tjubija taʼ Jehovah billi nissieħbu b’qalbna kollha fil-​għana taʼ għanjiet tas-​Saltna. Barra minn hekk, meta niltaqgħu flimkien, ma jkollniex spirtu taʼ hena? Mela għandna nħossuna bħal li kieku rridu ngħannu! (Ġakbu 5:13) Verament, skond kemm napprezzaw it-​tjubija taʼ Jehovah u l-​qalb tajba mhix mistħoqqa tiegħu, aħna se ngħannu tifħir lilu b’ruħna kollha. (w94 5/1)

Kif Twieġeb Int?

◻ Liema huma żewġ raġunijiet bażiċi għal li wieħed ifaħħar lil Jehovah?

◻ B’liema modi diversi nistgħu nfaħħru lil Jehovah?

◻ Liema hu wieħed mill-​isbaħ modi kif nistgħu nfaħħru lil Jehovah?

◻ Liema eżempji Skritturali għandna taʼ li nfaħħru lil Jehovah bil-​għana?

◻ Kif nistgħu nagħmlu ġustizzja lill-​għana tagħna taʼ l-​għanjiet tas-​Saltna?

[Kaxxa f’paġna 19]

Tgħallem Dawk L-​Għanjiet!

Jidher li xi wħud sabuha naqra diffiċli biex jitgħallmu xi wħud mill-​għanjiet il-​ġodda. Madankollu, irid jingħad li l-​familja taʼ Betel fi Brooklyn kif ukoll xi ftit mill-​kongregazzjonijiet taʼ New York ma kellhom ebda problema f’li jgħannu kull waħda minn dawn l-​għanjiet. Forsi sempliċement naqra iktar sforz biex wieħed jitgħallem dak li għall-​ewwel jidher li m’huwiex familjari jistaʼ jkun dak kollu li hu meħtieġ. Ladarba tkun saret familjari maʼ għanjiet bħal dawn, il-​kongregazzjoni spiss tapprezzahom iktar minn dawk li ma kienu jinħtieġu ebda sforz biex titgħallimhom.

[Kaxxa f’ paġna 20]

Għannu Għanjiet Tas-​Saltna F’Laqgħat Soċjali Flimkien

L-​għana tagħna taʼ għanjiet tas-​Saltna m’għandux għalfejn ikun limitat għas-​Sala tas-​Saltna. Pawlu u Silas għannew tifħir lil Jehovah waqt li kienu fil-​ħabs. (Atti 16:25) U d-​dixxiplu Ġakbu qal: “Hemm xi ħadd li hu ferħan? Ħalli jgħanni tifħir lil Alla.” (Ġakbu 5:13, nota taʼ taħt) Fil-​laqgħat soċjali flimkien kulħadd ikun ferħan. Mela għala ma ngħannux għanjiet tas-​Saltna? Dan jistaʼ jkun speċjalment taʼ għaxqa jekk l-​għana jkun akkumpanjat bil-​pjanu jew bil-​kitarra. Inkella, hemm it-​tapes bil-​pjanu taʼ l-​għanjiet tas-​Saltna tagħna; bosta familji tax-​Xhieda għandhom l-​album taʼ dawn it-​tapes. Dawn ma jservux tajjeb biss biex jakkumpanjaw l-​għana imma huma wkoll ideali għal mużika sabiħa fl-​isfond.