“Agħmlu kollox għall-glorja t’Alla”

BĦALA qaddejja dedikati t’Alla, għandna l-​obbligu li nirriflettu l-​glorja taʼ Ġeħova f’kulma ngħidu u nagħmlu. L-​appostlu Pawlu offra prinċipju taʼ gwida meta kiteb: “Jekk tieklu jew tixorbu jew tagħmlu xi ħaġa oħra, agħmlu kollox għall-​glorja t’Alla.” (1 Kor. 10:31) Dan jinvolvi li nżommu mal-​livelli ġusti taʼ Ġeħova, li jirriflettu l-​personalità perfetta tiegħu. (Kol. 3:10) Għandna nsiru imitaturi t’Alla, bħala poplu qaddis.—Efes. 5:1, 2.

² Biex ġibed l-​attenzjoni tal-​Kristjani lejn dan, l-​appostlu Pietru kiteb: “Bħal tfal ubbidjenti, tibqgħux magħġunin skond ix-​xewqat li kellkom qabel fl-​injoranza tagħkom, imma, fi qbil mal-​Qaddis li sejħilkom, kunu intom ukoll qaddisin fil-​kondotta kollha tagħkom, għax hu miktub: ‘Kunu qaddisin, għax jien qaddis.’” (1 Pt. 1:14-​16) Bħall-​Iżrael tal-​qedem, dawk kollha fil-​kongregazzjoni Kristjana huma meħtieġa jżommu l-​qdusija. Dan ifisser li jridu jibqgħu bla tebgħa, nodfa mill-​għemejjel tad-​dinja u t-​tinġis tad-​dnub. B’hekk, huma magħżulin għal servizz sagru.—Eżo. 20:5.

³ Il-​qdusija tinżamm billi nżommu mal-​liġijiet u l-​prinċipji taʼ Ġeħova, li huma mniżżlin ċar fl-​Iskrittura Mqaddsa. (2 Tim. 3:16) Permezz taʼ studju tal-​Bibbja, ġejna mgħallmin dwar Ġeħova u l-​modi tiegħu, u nġbidna lejh. L-​istudju tagħna kkonvinċiena dwar il-​bżonn li nfittxu l-​ewwel is-​Saltna t’Alla u li li nagħmlu r-​rieda taʼ Ġeħova tkun l-​iktar ħaġa importanti f’ħajjitna. (Mt. 6:33; Rum. 12:2) Dan kien jirrikjedi li nilbsu l-​personalità l-​ġdida.—Efes. 4:22-​24.

INDAFA MORALI U SPIRITWALI

⁴ Mhux dejjem faċli nżommu mal-​livelli ġusti taʼ Ġeħova. L-​avversarju tagħna, Satana x-​Xitan, jipprova joħroġna mill-​verità. L-​influwenzi ħżiena mid-​dinja taʼ madwarna u t-​tendenzi midinba tagħna kultant jagħmlulna l-​affarijiet diffiċli. Li ngħixu fi qbil mad-​dedikazzjoni tagħna jirrikjedi ġlieda spiritwali min-​naħa tagħna. L-​Iskrittura tgħidilna biex ma nistagħġbux meta niltaqgħu maʼ oppożizzjoni jew provi. Se jkollna nbatu minħabba s-​sewwa. (2 Tim. 3:12) Aħna nistgħu nkunu henjin meta nkunu għaddejjin minn provi, għax nafu li provi bħal dawn huma evidenza li nkunu qed nagħmlu r-​rieda t’Alla.—1 Pt. 3:14-​16; 4:12, 14-​16.

⁵ Għalkemm kien perfett, Ġesù tgħallem l-​ubbidjenza mill-​affarijiet li sofra. Qatt ma ċeda għat-​tentazzjonijiet taʼ Satana jew żviluppa ambizzjonijiet dinjin. (Mt. 4:1-​11; Ġw. 6:15) Ġesù lanqas darba ma ħaseb biex jagħmel kompromess. Għalkemm il-​lealtà tiegħu ġabet fuqu l-​mibegħda tad-​dinja, hu żamm mal-​livelli ġusti taʼ Ġeħova. Ftit qabel miet, Ġesù wissa lid-​dixxipli tiegħu li d-​dinja kienet se tobgħod lilhom ukoll. Minn dak iż-​żmien ’l hawn, is-​segwaċi taʼ Ġesù esperjenzaw tribulazzjoni, imma ġew inkuraġġiti mill-​fatt li jafu li l-​Iben t’Alla rebaħ lid-​dinja.—Ġw. 15:19; 16:33; 17:16.

⁶ Sabiex ma nkunu ebda parti mid-​dinja, hemm bżonn inżommu mal-​livelli ġusti taʼ Ġeħova, bħalma għamel Sidna. Minbarra li nevitaw li ninvolvu ruħna fi kwistjonijiet politiċi u soċjali tad-​dinja, għandna nirreżistu l-​kundizzjoni morali degradanti tagħha. Nieħdu bis-​serjetà l-​parir li jinsab f’​Ġakbu 1:21: “Warrbu l-​ħmieġ kollu u dik il-​ħaġa żejda—il-​ħażen—u aċċettaw bil-​ħlewwa li fikom titħawwel il-​kelma li tistaʼ ssalvalkom ruħkom.” Permezz taʼ studju u attendenza għal-​laqgħat, nistgħu nesperjenzaw li ‘nħawlu l-​kelma’ tal-​verità f’moħħna u f’qalbna, u lanqas biss nibdew nixtiequ dak li toffri d-​dinja. Id-​dixxiplu Ġakbu kiteb: “Ma tafux li l-​ħbiberija mad-​dinja hi għadwa m’Alla? Għalhekk, kulmin irid ikun ħabib tad-​dinja qed jagħmel lilu nnifsu għadu t’Alla.” (Ġak. 4:4) Għal din ir-​raġuni, il-​Bibbja fiha twissijiet sodi biex inżommu mal-​livelli ġusti taʼ Ġeħova u nibqgħu separati mid-​dinja.

⁷ Il-​Kelma t’Alla twissina biex ma niħdux sehem f’kondotta immorali u taʼ mistħija. Tgħidilna: “Lanqas biss għandhom jissemmew fostkom iż-​żína u n-​nuqqas taʼ ndafa taʼ kull xorta jew ir-​regħba, bħalma jixraq lill-​qaddisin.” (Efes. 5:3) Għalhekk, għandna nirrifjutaw li nħallu moħħna jhewden fuq affarijiet oxxeni, taʼ mistħija, jew degradanti, u ċertament m’għandniex inħallu affarijiet bħal dawn jidħlu fil-​konversazzjonijiet tagħna bla ma nindunaw. B’hekk, nagħtu prova li rridu nżommu mal-​livelli morali ġusti u nodfa taʼ Ġeħova.

INDAFA FIŻIKA

⁸ Flimkien mal-​indafa morali u spiritwali, il-​Kristjani jirrikonoxxu l-​importanza taʼ li jkunu nodfa fiżikament. Fl-​Iżrael tal-​qedem, l-​Alla tal-​qdusija kien jirrikjedi li l-​kamp jinżamm nadif. Aħna wkoll għandna nkunu nodfa biex Ġeħova “ma jara xejn indeċenti” fina.—Dt. 23:14.

⁹ Il-​qdusija u l-​indafa fiżika għandhom x’jaqsmu ħafna maʼ xulxin fil-​Bibbja. Pereżempju, Pawlu kiteb: “Maħbubin, . . . ħa nitnaddfu minn kull tinġis tal-​laħam u taʼ l-​ispirtu, u nipperfezzjonaw il-​qdusija fil-​biżaʼ t’Alla.” (2 Kor. 7:1) Għalhekk, irġiel u nisa Kristjani għandhom iħabirku biex iżommu ġisimhom nadif billi jinħaslu u jaħslu ħwejjiġhom regolarment. Għalkemm il-​kundizzjonijiet ivarjaw minn pajjiż għall-​ieħor, ġeneralment ikun hemm biżżejjed sapun u ilma biex inżommu ġisimna nadif u biex naraw li wliedna jinżammu nodfa.

¹⁰ Minħabba l-​attività taʼ xhieda tagħna, ġeneralment inkunu magħrufin sew fil-​komunità fejn noqogħdu. Meta nżommu d-​dar nadifa u fl-​ordni, barra u ġewwa, fiha nfisha hi xhieda għall-​ġirien. Din hi ħaġa li fiha l-​familja kollha jistaʼ jkollha sehem. Aħwa rġiel għandhom jieħdu interess partikulari fid-​dar u l-​madwar, għax ġnien nadif u dar miżmuma tajjeb iħallu impressjoni favorevoli fuq oħrajn. Dan, flimkien maʼ li jieħdu t-​tmexxija f’affarijiet spiritwali, hu indikazzjoni li l-​kapijiet tal-​familja qed jippresiedu tajjeb fuq dawk taʼ darhom. (1 Tim. 3:4, 12) L-​aħwa nisa wkoll għandhom responsabbiltà biex jieħdu ħsieb l-​affarijiet, speċjalment fid-​dar. (Titu 2:4, 5) Tfal imħarrġin tajjeb jagħtu sehemhom biex iżommu lilhom infushom kif ukoll kamrithom nodfa u kif jixraq. B’hekk, il-​familja taħdem flimkien biex tiżviluppa drawwiet taʼ ndafa li jixirqu lid-​dinja l-​ġdida taħt is-​Saltna t’Alla.

¹¹ Ħafna min-​nies taʼ Ġeħova llum jużaw il-​karozzi biex jivvjaġġaw lejn il-​laqgħat. F’xi nħawi, tistaʼ tgħid li ma tistax tgħaddi mingħajr il-​karozza fil-​ministeru. Il-​karozza għandha tinżamm nadifa u f’kundizzjoni tajba. Id-​djar u l-​karozzi tagħna għandhom jagħtu xhieda li aħna parti mill-​poplu qaddis u nadif taʼ Ġeħova. L-​istess prinċipju japplika għall-​basket tas-​servizz tal-​għalqa u l-​Bibbja tagħna.

¹² L-​ilbies u l-​maxta tagħna jridu jkunu fi qbil mal-​prinċipji t’Alla. Lanqas biss tgħaddilna minn moħħna li nidhru quddiem xi ħadd prominenti jekk inkunu mlibbsin żmattat jew każwali żżejjed. Kemm għandna nkunu iktar konċernati meta nirrappreżentaw lil Ġeħova fil-​ministeru tal-​għalqa jew fuq il-​platform! Il-​maxta u l-​istil tal-​ħwejjeġ tagħna jistgħu jinfluwenzaw kif ħaddieħor iqis il-​qima taʼ Ġeħova. Żgur li ma jkunx xieraq li nkunu immodesti jew li ma nurux konsiderazzjoni lejn ħaddieħor. (Mik. 6:8; 1 Kor. 10:31-​33; 1 Tim. 2:9, 10) Għalhekk, meta nkunu qed illestu biex noħorġu fis-​servizz jew immorru l-​laqgħat tal-​kongregazzjoni, assembleat, jew konvenzjonijiet, għandna nżommu f’moħħna dak li tgħid l-​Iskrittura dwar l-​indafa fiżika u l-​apparenza modesta. Dejjem irridu nonoraw u nigglorifikaw lil Ġeħova.

¹³ L-​istess japplika għal meta nżuru l-​kwartieri ġenerali jew uffiċċju tal-​fergħa tax-​Xhieda taʼ Ġeħova. Ftakar, l-​isem Betel ifisser “Dar Alla.” Għalhekk, għandna nilbsu u nġibu ruħna l-​istess bħal meta nattendu l-​laqgħat fis-​Sala tas-​Saltna.

¹⁴ Anki meta nieħdu sehem f’attivitajiet fil-​ħin liberu, għandna nagħtu kas l-​ilbies u l-​maxta tagħna. Nistgħu nistaqsu lilna nfusna, ‘Kieku nistħi nagħti xhieda informali minħabba kif jien liebes?’

RIKREAZZJONI U DIVERTIMENT EDIFIKANTI

¹⁵ Il-​mistrieħ u s-​serħan huma neċessarji biex nibqgħu bilanċjati u f’saħħitna. Darba, Ġesù stieden lid-​dixxipli jakkumpanjawh f’post imwarrab biex ‘jistrieħu ftit.’ (Mk. 6:31) Il-​mistrieħ kif ukoll ir-​rikreazzjoni jew divertiment edifikanti jistgħu jipprovdu passatemp pjaċevoli. Jistgħu jirrifreskawna ħalli nkunu nistgħu nibqgħu għaddejjin bix-​xogħol normali tagħna.

¹⁶ Bil-​varjetà kbira taʼ rikreazzjoni li hi disponibbli llum, il-​Kristjani għandhom ikunu selettivi u jeżerċitaw għerf divin f’dak li jagħmlu. Filwaqt li r-​rikreazzjoni għandha postha, mhijiex l-​iktar ħaġa importanti fil-​ħajja. Aħna mwissijin li “fl-​aħħar jiem,” in-​nies ikunu “jħobbu l-​pjaċiri minflok ma jħobbu lil Alla.” (2 Tim. 3:1, 4) Ħafna minn dak li jissejjaħ rikreazzjoni u divertiment hu oġġezzjonabbli għal dawk li jixtiequ jżommu mal-​livelli ġusti taʼ Ġeħova.

¹⁷ Il-​Kristjani tal-​bidu kellhom jirreżistu l-​ambjent degradanti fid-​dinja taʼ madwarhom għatxana għall-​pjaċiri. Fiċ-​ċirklu Ruman, l-​ispettaturi kienu jieħdu gost jaraw is-​sofferenzi taʼ ħaddieħor. Kienu jsiru atti taʼ vjolenza, tixrid taʼ demm, u immoralità sesswali għar-​rikreazzjoni tan-​nies, imma l-​Kristjani tal-​bidu żammew ’il bogħod minn affarijiet bħal dawn. Illum, ħafna mid-​divertiment tad-​dinja fih elementi simili u jissodisfa x-​xewqat baxxi tal-​bniedem. Għandna ‘noqogħdu attenti bis-​sħiħ’ kif nimxu, billi naħarbu minn divertiment li jħassar il-​morali. (Efes. 5:15, 16; Salm 11:5) U anki jekk id-​divertiment fih innifsu jkun aċċettabbli, l-​atmosfera ġenerali tistaʼ ma tkunx.—1 Pt. 4:1-​4.

¹⁸ Hemm forom taʼ rikreazzjoni u divertiment li l-​Kristjani jistgħu jgawdu. Ħafna bbenefikaw billi segwew pariri Skritturali u suġġerimenti bilanċjati li jistgħu jinstabu fil-​pubblikazzjonijiet tagħna.

¹⁹ Kultant, diversi familji jistgħu jiġu mistiedna f’dar għal sħubija Kristjana. Jew l-​aħwa jistgħu jiġu mistiedna jattendu riċeviment taʼ tieġ jew okkażjoni soċjali simili. (Ġw. 2:2) Min jistieden għandu jħossu responsabbli personalment għal dak li jsir. Ovvjament, hemm bżonn l-​attenzjoni meta jiltaqgħu flimkien gruppi kbar. L-​atmosfera rilassata f’laqgħat bħal dawn wasslet lil xi wħud biex jaqbżu l-​limiti tal-​imġiba Kristjana xierqa, u involvew ruħhom f’ikel u xorb żejjed u saħansitra għemil ħażin serju ieħor. B’dan f’moħħhom, Kristjani li għandhom id-​dehen raw li hu għaqli li jillimitaw id-​daqs u t-​tul taʼ ħin taʼ okkażjonijiet bħal dawn. Jekk jiġi servut xorb alkoħoliku, għandu jintuża bil-​moderazzjoni. (Flp. 4:5) Jekk isir kull sforz biex jiġi aċċertat li l-​laqgħat soċjali jkunu edifikanti u rifreskanti spiritwalment, l-​ikel u x-​xorb mhux se jkunu l-​iktar ħaġa importanti.

²⁰ Hi ħaġa sabiħa li tkun ospitabbli. (1 Pt. 4:9) Meta nistiednu lil Kristjani oħra f’darna għal xi ikla, kikkra te, rilassament, u sħubija, ikun tajjeb li nżommu f’moħħna lil dawk li jistgħu jkunu żvantaġġati. (Lq. 14:12-​14) Jekk inkunu mistidnin għal okkażjonijiet bħal dawn, l-​imġiba tagħna għandha taqbel mal-​parir li jinsab f’​Marku 12:31. Ikun dejjem tajjeb li turi apprezzament għall-​qalb tajba taʼ oħrajn.

²¹ Il-​Kristjani jithennew bl-​għotjiet abbundanti t’Alla u b’li jafu li jistgħu ‘jixorbu u jgawdu affarijiet tajbin għax-​xogħol iebes kollu tagħhom.’ (Ekk. 3:12, 13) Meta ‘nagħmlu kollox għall-​glorja t’Alla,’ min jistieden kif ukoll il-​mistidnin jistgħu jħarsu lura lejn laqgħat soċjali bis-​sodisfazzjon li ġew rifreskati spiritwalment.

ATTIVITAJIET TAL-​ISKOLA

²² It-​tfal tax-​Xhieda taʼ Ġeħova jibbenefikaw milli jirċievu edukazzjoni sekulari bażika. Meta jmorru l-​iskola, ikunu interessati f’li jitgħallmu jaqraw u jiktbu sew. Suġġetti oħrajn mgħallma l-​iskola jistgħu jkunu taʼ valur għat-​tfal u għaż-​żgħażagħ hekk kif jirsistu għal miri spiritwali. Matul is-​snin li jkunu l-​iskola, għandhom jagħmlu sforz diliġenti biex ‘jiftakru fil-​Ħallieq Grandjuż tagħhom’ billi jpoġġu l-​affarijiet spiritwali l-​ewwel.—Ekk. 12:1.

²³ Jekk int żagħżugħ Kristjan u qed tmur l-​iskola, oqgħod attent li ma tassoċjax maʼ żgħażagħ tad-​dinja bla bżonn. (2 Tim. 3:1, 2) Peress li Ġeħova pprovda l-​protezzjoni meħtieġa, hemm ħafna li tistaʼ tagħmel biex tiskansa l-​influwenzi tad-​dinja. (Salm 23:4; 91:1, 2) Għalhekk, biex tkun protett, ħu vantaġġ mill-​provvedimenti taʼ Ġeħova.—Salm 23:5.

²⁴ Sabiex iżommu separati mid-​dinja waqt li jkunu l-​iskola, il-​biċċa l-​kbira tax-​Xhieda tfal u żgħażagħ jagħżlu li ma jiħdux sehem f’attivitajiet li ma jkunux fil-​kurrikulu. Dan jistaʼ jkun diffiċli biex jifhmuh sħabek tal-​klassi u l-​għalliema. Madankollu, dak li jgħodd hu li nogħġbu lil Alla. Dan ifisser li int tuża l-​kuxjenza tiegħek imħarrġa fuq il-​Bibbja u li tkun deċiż li ma tinvolvix ruħek f’kompetizzjoni tad-​dinja jew prattiki nazzjonalistiċi. (Gal. 5:19, 26) Billi tisimgħu mill-​pariri Skritturali tal-​ġenituri Kristjani tagħkom u tibbenefikaw minn sħubija tajba, intom it-​tfal u ż-​żgħażagħ se tkunu tistgħu żżommu mal-​livelli ġusti taʼ Ġeħova.

IX-​XOGĦOL U SĦABNA TAX-​XOGĦOL

²⁵ Il-​kapijiet tal-​familja għandhom obbligu Skritturali biex jipprovdu għal taʼ darhom. (1 Tim. 5:8) Minkejja dan, bħala ministri huma jirrikonoxxu li x-​xogħol sekulari tagħhom jiġi wara l-​interessi tas-​Saltna. (Mt. 6:33; Rum. 11:13) Billi jipprattikaw id-​devozzjoni lejn Alla u jkunu kuntenti bl-​ikel u l-​ilbies, huma jevitaw l-​ansjetajiet u n-​nases taʼ stil taʼ ħajja materjalistika.—1 Tim. 6:6-​10.

²⁶ Il-​Kristjani ddedikati kollha li jaħdmu sekularment għandu jkollhom prinċipji Skritturali f’moħħhom. Li bl-​onestà nipprovdu għalina nfusna jfisser li nirrifjutaw li nieħdu sehem f’attivitajiet li jmorru kontra l-​liġi t’Alla jew kontra l-​liġi tal-​pajjiż. (Rum. 13:1, 2; 1 Kor. 6:9, 10) Aħna konxji tal-​perikli li jiġu minn sħubija ħażina. Bħala suldati taʼ Kristu, inżommu lura milli nieħdu sehem f’attivitajiet kummerċjali li jmorru kontra l-​livelli t’Alla, li nagħmlu kompromess min-​newtralità Kristjana tagħna, jew li nipperikolaw l-​ispiritwalità tagħna. (Is. 2:4; 2 Tim. 2:4) U aħna m’għandniex x’naqsmu mal-​għadu reliġjuż t’Alla, “Babilonja l-​Kbira.”—Riv. 18:2, 4; 2 Kor. 6:14-​17.

²⁷ Li nżommu mal-​livelli ġusti t’Alla se jżommna lura milli nużaw is-​sħubija teokratika tagħna biex nippromwovu attività taʼ negozju jew interessi persunali oħra. L-​iskop tas-​sħubija tagħna m’oħrajn fil-​laqgħat Kristjani tal-​kongregazzjoni, assembleat, u konvenzjonijiet huwa esklużivament biex inqimu lil Ġeħova. Inkunu qed nieklu mill-​mejda spiritwali tiegħu u ngawdu l-​inkuraġġiment mingħand xulxin. (Rum. 1:11, 12; Ebr. 10:24, 25) Sħubija bħal din għandha tinżamm fuq livell spiritwali.

NGĦIXU F’UNITÀ KRISTJANA

²⁸ Il-​livelli ġusti taʼ Ġeħova jirrikjedu wkoll li n-​nies tiegħu ‘jħarsu l-​unità taʼ l-​ispirtu fir-​rabta li tgħaqqad tal-​paċi.’ (Efes. 4:1-​3) Minflok ma jipprova jogħġob lilu nnifsu, kull wieħed jipprova jqis l-​interessi taʼ ħaddieħor. (1 Tess. 5:15) Bla dubju, dan hu l-​ispirtu li sibt int fil-​kongregazzjoni tiegħek. Hu x’inhu l-​isfond razzjali, nazzjonali, soċjali, ekonomiku, jew edukattiv tagħna, aħna lkoll immexxijin mill-​istess livelli ġusti. Anki nies li mhumiex Xhieda raw din il-​karatteristika li tispikka fin-​nies taʼ Ġeħova.—1 Pt. 2:12.

²⁹ Biex ikompli jenfasizza l-​bażi għall-​unità, l-​appostlu Pawlu jikteb: “Hemm ġisem wieħed u spirtu wieħed, saħansitra bħalma hemm tama waħda li għaliha kontu msejħin; Mulej wieħed, fidi waħda, magħmudija waħda; Alla wieħed u Missier kulħadd, li hu fuq kulħadd u b’kulħadd u f’kulħadd.” (Efes. 4:4-​6) Dan jirrikjedi l-​unità f’li nifhmu t-​tagħlim bażiku Bibliku kif ukoll tagħlim iktar avanzat tal-​Bibbja b’rikonoxximent tas-​sovranità taʼ Ġeħova. Verament, Ġeħova ta lill-​poplu tiegħu l-​lingwa pura taʼ verità li tgħinhom jaqdu spalla maʼ spalla.—Sof. 3:9.

³⁰ L-​unità u l-​paċi tal-​kongregazzjoni Kristjana huma sors taʼ serħan għal kull min jaqdi lil Ġeħova. Aħna esperjenzajna t-​twettiq tal-​wegħda taʼ Ġeħova: “Inqegħedhom flimkien, bħal merħla fil-​maqjel.” (Mik. 2:12) Irridu nżommu din l-​unità paċifika billi nżommu mal-​livelli ġusti taʼ Ġeħova.

³¹ Henjin huma dawk li ġew aċċettati fil-​kongregazzjoni nadifa taʼ Ġeħova! Li nissejħu b’isem Ġeħova jiswa kull sagrifiċċju li jistaʼ jkollna nagħmlu. Waqt li nieħdu ħsieb ir-​relazzjoni prezzjuża tagħna maʼ Ġeħova, se nħabirku biex inżommu mal-​livelli ġusti tiegħu u nirrikkmandawhom lil oħrajn.—2 Kor. 3:18.