Tħeġġiġ Effettiv

L-​ANZJANI Kristjani jridu jkunu kapaċi ‘jħeġġu bit-​tagħlim mimli saħħa.’ (Titu 1:9) Kultant dan irid isir meta jiffaċċjaw sitwazzjonijiet tassew diffiċli. Huwa importanti li jagħtu pariri fi qbil mal-​gwida Skritturali. Għal din ir-​raġuni, l-​anzjani jridu jagħtu kas il-​parir: ‘Komplu agħtu ruħkom għat-​twiddib.’ (1 Tim. 4:13) Għalkemm id-​diskussjoni tagħna issa hija diretta primarjament lejn l-​anzjani jew dawk li qed jirsistu għal dan il-​privileġġ, hemm drabi meta l-​ġenituri jkunu jridu jħeġġu lil uliedhom jew dawk li jikkonduċu l-​istudji tal-​Bibbja jkunu jridu jħeġġu lill-​istudenti tal-​Bibbja tagħhom. F’każi bħal dawn tapplika gwida simili.

Sitwazzjonijiet li Jeħtieġu t-​Tħeġġiġ. Biex tkun taf meta għandek tħeġġeġ lil dak li jkun, ikun taʼ għajnuna li teżamina sitwazzjonijiet imniżżlin bil-​miktub fil-​Bibbja fejn individwi ġew imħeġġin jaġixxu. L-​appostlu Pietru ħeġġeġ lill-​anzjani biex joqogħdu attenti għar-​responsabbiltà tagħhom bħala rgħajja tal-​merħla taʼ Alla. (1 Pt. 5:1, 2) Pawlu ta l-​parir lil Titu biex iħeġġeġ lil irġiel żgħażagħ ħalli jkunu “moħħhom f’loku.” (Titu 2:6) Pawlu ħeġġeġ lil Kristjani sħabu biex ‘jitkellmu fi qbil’ u jevitaw lil dawk li kienu jipprovaw joħolqu firdiet fost l-​aħwa. (1 Kor. 1:10; Rum. 16:17; Flp. 4:2) Għalkemm Pawlu faħħar lill-​membri tal-​kongregazzjoni f’Tessalonika għall-​affarijiet tajbin li kienu qed jagħmlu, hu ħeġġiġhom biex japplikaw iktar bis-​sħiħ l-​istruzzjoni li rċivew. (1 Tess. 4:1, 10) Pietru talab bil-​ħrara lill-​Kristjani sħabu biex ‘jibqgħu jitbiegħdu mix-​xewqat tal-​laħam.’ (1 Pt. 2:11) Ġuda ħeġġeġ lil ħutu biex ‘jiġġieldu bl-​aħrax għall-​fidi’ minħabba l-​influwenza taʼ wħud mhux devoti li kienu jieħdu sehem bla rażan f’kondotta laxka. (Ġuda 3, 4) Il-​Kristjani inġenerali ġew inkuraġġiti biex iħeġġu lil xulxin ħalli ħadd minnhom ma jitwebbes minħabba l-​qawwa qarrieqa tad-​dnub. (Ebr. 3:13) Pietru ħeġġeġ lil-​Lhud li kienu għadhom ma poġġewx fidi fi Kristu: “Salvaw minn din il-​ġenerazzjoni mgħawġa.”—Atti 2:40.

Liema kwalitajiet huma meħtiġin biex oħrajn jiġu mqanqlin b’qawwa ħalli jaġixxu f’sitwazzjonijiet bħal dawn? Kif jistaʼ l-​wieħed li jkun qed iħeġġeġ jagħmel it-​talba tiegħu urġenti mingħajr ma jdejjaq lil dak li jkun jew ikun aħrax?

“F’Ġieħ l-​Imħabba.” Jekk it-​tħeġġiġ tagħna ma jingħatax “f’ġieħ l-​imħabba,” dan jistaʼ jinstemaʼ aħrax. (Flm. 9) Veru, meta tkun meħtieġa azzjoni immedjata, il-​mod kif il-​kelliemi jagħti t-​taħdita għandu jirrifletti l-​urġenza tas-​sitwazzjoni. Jekk jitkellem bil-​ħlewwa jistaʼ jinstemaʼ dispjaċut. Fl-​istess ħin, l-​inkuraġġiment għandu jsir bil-​ħeġġa u b’sentiment profond. Meta tinkuraġġixxi bi mħabba x’aktarx li iktar se tqanqal lill-​udjenza. Meta kien qed jitkellem għalih innifsu u għan-​nom taʼ sħabu, Pawlu qal lil dawk f’Tessalonika: “Intom tafu tajjeb li, bħalma jagħmel missier maʼ wliedu, aħna bqajna nwiddbu lil kull wieħed minnkom.” (1 Tess. 2:11) Dawk l-​indokraturi Kristjani ħeġġew lil ħuthom bl-​imħabba. Ħalli dak li tgħid ikun imqanqal minn interess ġenwin fis-​semmiegħa tiegħek.

Uża t-​tattika. Ittellax ħajt bejnek u bejn dawk li qed tipprova tqanqalhom jaġixxu. Fl-​istess ħin, iżżommx lura milli tgħid lill-​udjenza tiegħek “l-​iskop kollu t’Alla.” (Atti 20:27) Min japprezza mhux se jieħu għalih jew iħobbok inqas minħabba li b’qalb tajba tkun ħeġġiġtu jagħmel dak li hu sew.—Salm 141:5.

Spiss ikun taʼ benefiċċju li qabel tħeġġeġ lil xi ħadd, tagħti tifħir speċifiku u sinċier. Aħseb dwar l-​affarijiet tajbin li qed jagħmlu ħutek—affarijiet li Ġeħova żgur qed jieħu gost bihom: il-​fidi li juru permezz taʼ xogħolhom, l-​imħabba li tqanqalhom iħabirku, u s-​sabar tagħhom meta jiffaċċjaw sitwazzjonijiet taʼ prova. (1 Tess. 1:2-​8; 2 Tess. 1:3-​5) Dan se jgħin lil ħutek iħossuhom apprezzati u mifhumin, u se jqanqalhom ikunu lesti li jwieġbu għall-​inkuraġġiment li jkun ġej.

“Bil-​Paċenzja Kollha.” Meta tħeġġeġ lil xi ħadd għandek tagħmel dan “bil-​paċenzja kollha.” (2 Tim. 4:2) Dan x’jinvolvi? Il-​paċenzja tinkludi li tissaporti l-​ħażen u l-​provokazzjoni bis-​sabar. Min ikollu l-​paċenzja jittama li s-​semmiegħa tiegħu se japplikaw dak li jgħid. Meta tħeġġeġ b’din l-​attitudni ma tħallix lis-​semmiegħa tiegħek jaħsbu li int taħseb ħażin fihom. Il-​fiduċja tiegħek fil-​fatt li ħutek iridu jaqdu lil Ġeħova bl-​aħjar mod li jistgħu se tqanqal ix-​xewqa tagħhom li jagħmlu dak li hu sewwa.—Ebr. 6:9.

“Bit-​Tagħlim Mimli Saħħa.” Kif jistaʼ anzjan “iħeġġeġ bit-​tagħlim mimli saħħa”? Billi “fil-​mod kif jgħallem iżomm sod mal-​kelma li tistaʼ tafdaha.” (Titu 1:9) Minflok ma tesprimi l-​opinjoni persunali tiegħek, ħalli l-​Kelma taʼ Alla tkun il-​qawwa wara dak li qed tħeġġiġhom jagħmlu. Ħalli l-​Bibbja tifforma l-​ħarsa tiegħek dwar dak li hemm bżonn jintqal. Agħmel lista tal-​benefiċċji li hemm meta jiġi applikat dak li tgħid il-​Bibbja dwar il-​kwistjoni li tkun qed tiddiskuti. Żomm sew f’moħħok il-​konsegwenzi—kemm preżenti u kemm futuri—li jkun hemm jekk l-​individwu ma jimxix skont il-​Kelma taʼ Alla, u użahom biex tikkonvinċi lill-​udjenza tiegħek dwar il-​ħtieġa li jaġixxu kif suppost.

Kun ċert li tispjega b’mod ċar lil dawk fl-​udjenza tiegħek x’għandhom jagħmlu u kif għandhom jagħmluh. Agħmilha ċara li l-​irraġunar tiegħek għandu għeruq fondi fl-​Iskrittura. Jekk l-​Iskrittura tagħti wisaʼ għall-​flessibiltà fi kwalunkwe deċiżjoni li trid issir, semmi sa fejn tasal dik il-​flessibiltà. Imbagħad, fil-​konklużjoni tiegħek, erġaʼ ħeġġiġhom għall-​aħħar darba biex issaħħaħ id-​determinazzjoni tas-​semmiegħa tiegħek ħalli jaġixxu.

Bil-​‘Libertà tal-​Kelma.’ Biex individwu jkun effettiv f’li jħeġġeġ lil oħrajn, hu jrid ikollu ‘libertà tal-​kelma fil-​fidi.’ (1 Tim. 3:13) X’jippermetti li individwu jitkellem bil-​libertà? Il-​fatt li ‘l-​eżempju tiegħu t’għemejjel tajbin’ ikun fi qbil maʼ dak li qed iħeġġeġ lil ħutu biex jagħmlu. (Titu 2:6, 7; 1 Pt. 5:3) Meta dan ikun il-​każ, dawk li jkunu qed jiġu mqanqlin jaġixxu se jirrealizzaw li min qed iħeġġiġhom ma jistennihomx jagħmlu affarijiet li hu stess ma jagħmilhomx. Se jaraw li jistgħu jimitaw il-​fidi tiegħu saħansitra bħalma hu jistinka biex jimita lil Kristu.—1 Kor. 11:1; Flp. 3:17.

It-​tħeġġiġ li jkun ibbażat fuq il-​Kelma taʼ Alla u li jingħata bi spirtu taʼ mħabba jistaʼ jagħmel ħafna ġid. Dawk li għandhom l-​inkarigu li jagħtu tħeġġiġ bħal dan għandhom iħabirku biex jagħtuh sew.—Rum. 12:8.