Se Jkun Hemm Irxoxt tat-​Twajbin

“Għandi tama f’Alla . . . li se jkun hemm irxoxt taʼ kemm it-​twajbin u kemm dawk li m’humiex twajbin.”—ATTI 24:15.

1. Liema sitwazzjoni ffaċċjat lill-​bnedmin kollha mill-​waqgħa t’Adam u Eva ’l hawn?

“KULMA idek issib x’tagħmel, agħmlu bl-​istess qawwa tiegħek, għax la hemm xogħol la ppjanar la għarfien u lanqas għerf f’Xeol, il-​post li lejh int sejjer.” (Ekkleżjasti 9:10) B’dan il-​ftit kliem magħżul tajjeb, l-​għaref Sultan Salamun jiddeskrivi sitwazzjoni li ffaċċjat lil kull ġenerazzjoni taʼ l-​umanità minn mindu l-​ewwel ġenituri tagħna, Adam u Eva, waqgħu fid-​dnub. Mingħajr eċċezzjoni, il-​mewt eventwalment belgħet lil kulħadd—sinjur u fqir, sultan u bniedem komuni, leali u taʼ mingħajr fidi. Verament, il-mewt “ħakmet bħala sultan.”—Rumani 5:17.

2. Xi wħud leali għala għandhom imnejn ġew iddiżappuntati matul dan iż-​żmien tat-​tmiem?

² Minkejja l-​aħħar avanzi tax-​xjenza medika, il-​mewt għadha taħkem bħala sultan saħansitra llum. Waqt li din m’hijiex xi sorpriża, xi wħud forsi kienu kemmxejn diżappuntati meta finalment ġew wiċċ imb’wiċċ maʼ dan l-​għadu antik. Għala? Sewwa, lura fis-​snin 20, il-​Watch Tower Society ipproklamat il-​messaġġ “Miljuni issa ħajjin ma se jmutu qatt.” Min kellhom ikunu dawn il-​miljuni? In-​“ngħaġ” li ssemmew fir-​rimarki li Ġesù għamel dwar in-​ngħaġ u l-​mogħoż. (Mattew 25:31-46) Dawn l-​uħud bħal ngħaġ kienu pprofetizzati li kellhom jidhru matul iż-​żmien tat-​tmiem, u t-​tama tagħhom kellha tkun ħajja taʼ dejjem fuq art magħmula ġenna. Hekk kif għadda ż-​żmien, in-​nies t’Alla kisbu fehma aħjar tal-​pożizzjoni taʼ dawn in-​“ngħaġ” fl-​iskopijiet taʼ Jehovah. Ġie rrealizzat li dawn l-​uħud ubbidjenti kellhom jintgħarfu mill-​“mogħoż” stinati, u wara l-​qerda taʼ dawn taʼ l-​aħħar, in-​ngħaġ kellhom jirtu l-​qasam taʼ l-​art tas-​Saltna li kien ġie mħejji għalihom.

Ġbir Taʼ Wħud Bħal Ngħaġ

3. In-​nies t’Alla fuq liema xogħol ikkonċentraw mis-​sena 1935 ’l hawn?

³ Billi beda fl-​1935, l-​‘irsir leali’ kkonċentra fuq li jsib uħud bħal ngħaġ bħal dawn u fuq li jdaħħalhom fl-​organizzazzjoni taʼ Jehovah. (Mattew 24:45; Ġwann 10:16) Dawn il-​Kristjani li lesti li jitgħallmu bdew jirrealizzaw li Ġesù qiegħed issa jsaltan fis-​Saltna tas-​sema u li ż-​żmien riesaq bil-​għaġla għat-​tmiem taʼ din is-​sistema t’affarijiet mill-​agħar u d-​dħul taʼ dinja ġdida li fiha se tgħammar it-​tjieba. (2 Pietru 3:13; Rivelazzjoni 12:10) F’dik id-​dinja ġdida, il-​kliem taʼ Isaija li jqawwi l-​qalb se jitwettaq: “Hu attwalment se jiblaʼ l-​mewt għal dejjem.”—Isaija 25:8.

4. Għalkemm ittamaw bil-​ħerqa li jaraw is-​sovranità taʼ Jehovah ivvindikata f’Armageddon, xi ġralhom ħafna min-​ngħaġ l-​oħra?

⁴ Ladarba t-​tmiem tad-​dinja taʼ Satana huwa tant qrib, il-​Kristjani bħal ngħaġ se jgawdu bis-​sħiħ il-​ħajja sakemm is-​sovranità taʼ Jehovah tiġi vvindikata matul it-​tribulazzjoni li ġejja fuq Babilonja l-​Kbira u l-​bqija tad-​dinja taʼ Satana. (Rivelazzjoni 19:1-3, 19-21) Għal numru mdaqqas, dan ma seħħx b’dak il-​mod. Ħafna li ttamaw li jkunu fost il-​“miljuni” li ma kellhom qatt imutu tabilħaqq mietu. Xi wħud ġew maqtulin bħala martri għall-​verità f’ħabsijiet u kampijiet taʼ konċentrament jew taħt idejn fanatiċi reliġjużi. Oħrajn mietu f’inċidenti jew minn l-​hekk imsejħin kawżi naturali​—mard u xjuħija. (Salm 90:9, 10; Ekkleżjasti 9:11) B’mod ċar, iktar se jmutu qabel ma jiġi t-​tmiem. Uħud bħal dawn kif se jaraw it-​twettieq tal-​wegħda taʼ dinja ġdida li fiha se tgħammar it-​tjieba?

It-​Tama Taʼ L-​Irxoxt

5, 6. Liema futur jeżisti għal dawk b’tama għall-​art li jmutu qabel Armageddon?

⁵ L-​appostlu Pawlu ta t-​tweġiba meta kien qiegħed jitkellem quddiem il-​gvernatur Ruman Feliċ. Kif insibu f’Atti 24:15, Pawlu ddikjara bi qlubija: “Għandi tama f’Alla . . . li se jkun hemm irxoxt taʼ kemm it-​twajbin u kemm dawk li m’humiex twajbin.” It-​tama taʼ l-​irxoxt tagħtina l-​kuraġġ meta niffaċċjaw l-​agħar avversitajiet. Minħabba f’dik it-​tama, il-​ħbieb għeżież tagħna li jimirdu u jħossu li se jmutu ma jaqtgħux qalbhom b’mod eċċessiv. Jiġri x’jiġri, huma jafu li se jaħsdu l-​premju tal-​fedeltà. Minħabba t-​tama taʼ l-​irxoxt, ħutna rġiel u nisa kuraġġużi li jiffaċċjaw il-​mewt taħt idejn il-​persekuturi jafu li m’hemmx ċans li l-​persekuturi tagħhom jistgħu jiksbu r-​rebħa. (Mattew 10:28) Meta xi ħadd fil-​kongregazzjoni jmut, aħna nsewdu qalbna li tlifna lil dik il-​persuna. Fl-​istess waqt, jekk hu jew hi hu wieħed min-​ngħaġ l-​oħra, aħna nithennew li seħibna fit-​twemmin ta prova li kien leali sat-​tmiem u issa qiegħed jistrieħ, żgurat minn futur fid-​dinja l-​ġdida t’Alla.—1 Tessalonkin 4:13.

⁶ Iva, it-​tama taʼ l-​irxoxt hija karatteristika vitali tal-​fidi tagħna. Għala, iżda, huwa t-​twemmin tagħna fl-​irxoxt daqshekk qawwi, u min huma dawk li għandhom sehem minn dik it-​tama?

7. X’inhuwa l-​irxoxt, u x’inhuma xi skritturi li jesprimu ċ-​ċertezza tiegħu?

⁷ Il-​kelma Griega għal “irxoxt” hija a·naʹsta·sis, li litteralment tfisser “toqgħod bil-​wieqfa.” Tirreferi bażikament għal qawma mill-​imwiet. Huwa interessanti li l-​istess kelma “rxoxt” ma tidhirx fl-​Iskrittura Ebrajka, imma t-​tama taʼ l-​irxoxt hija espressa b’mod ċar hemmhekk. Narawha, per eżempju, fil-​kliem imlissen minn Ġob f’nofs is-​sofferenza tiegħu: “O li f’Xeol int kont taħbini, . . . li kont taħtar limitu taʼ żmien għalija u tiftakar fija!” (Ġob 14:13) Bl-​istess mod, f’Ħosea 13:14, naqraw: “Minn id Xeol se nifdihom; mill-​mewt se nġibhom lura. Fejn huma l-​ingiegeż tiegħek, O Mewt? Fejn hija l-​qawwa qerrieda tiegħek, O Xeol?” Fl-1 Korintin 15:55, l-​appostlu Pawlu kkwota dan il-​kliem u wera li r-​rebħa pprofetizzata fuq il-​mewt tiġi mwettqa permezz taʼ l-​irxoxt. (M’għandniex xi ngħidu, f’dik l-​iskrittura, Pawlu kien qiegħed jitkellem dwar l-​irxoxt għas-​sema.)

Uħud Li Jemmnu “Ddikjarati Twajbin”

8, 9. (a) Bnedmin imperfetti kif jistgħu jkollhom sehem fl-​irxoxt tat-​twajbin? (b) X’inhija l-​bażi tat-​tama tagħna f’ħajja li m’hijiex se tispiċċa bil-​mewt?

⁸ Fl-​istqarrija tiegħu lil Feliċ, li hija kkwotata f’paragrafu 5, Pawlu qal li kellu jkun hemm irxoxt tat-​twajbin u dawk li m’humiex twajbin. Min huma t-​twajbin li se jiġu mqajmin? Sewwa, ebda bniedem m’hu twajjeb di natura. Aħna lkoll midinbin mit-​twelid, u nikkommettu dnubiet matul ħajjitna​—li jagħmilna nistħoqqu l-​mewt id-​doppju. (Rumani 5:12; 6:23) Madankollu, fil-​Bibbja nsibu t-​terminu “ddikjarati twajbin.” (Rumani 3:28) Dan jirreferi għal bnedmin li, għalkemm imperfetti, għandhom dnubiethom maħfurin minn Jehovah.

⁹ L-​espressjoni hija wżata bl-​iktar mod prominenti rigward il-​Kristjani midlukin, li għandhom tama għas-​sema. F’Rumani 5:1, l-​appostlu Pawlu jgħid: “Issa li ġejna ddikjarati twajbin bħala riżultat tal-​fidi, ejjew ingawdu l-​paċi m’Alla permezz tal-​Mulej tagħna Ġesù Kristu.” Il-​Kristjani midlukin kollha huma ddikjarati twajbin minħabba l-​fidi. Fidi f’liema ħaġa? Bħalma jispjega Pawlu fit-​tul fil-​ktieb taʼ Rumani, hija fidi f’Ġesù Kristu. (Rumani 10:4, 9, 10) Ġesù miet bniedem perfett u wara dan ġie rxoxtat mill-​imwiet u telaʼ lejn is-​sema biex joffri l-​valur tal-​ħajja umana tiegħu għan-​nom tagħna. (Ebrej 7:26, 27; 9:11, 12) Meta Jehovah aċċetta dak is-​sagrifiċċju, Ġesù, fil-​fatt, xtara lir-​razza umana mill-​iskjavitù għad-​dnub u l-​mewt. Dawk li jeżerċitaw fidi f’dan l-​arranġament jibbenefikaw ferm minnu. (1 Korintin 15:45) Fuq il-​bażi tiegħu rġiel u nisa leali għandhom it-​tama li jirtu ħajja li m’hijiex se tiġi mitmuma mill-​għadu kiefer, il-​mewt.—Ġwann 3:16.

10, 11. (a) Liema rxoxt jistenna lil Kristjani midlukin leali? (b) Liema xorta taʼ rxoxt kien ittamat minn adoraturi taʼ qabel il-​Kristjanità?

¹⁰ Grazzi għas-​sagrifiċċju tar-​rahan taʼ Ġesù, uħud midlukin leali, billi ġew iddikjarati twajbin, għandhom it-​tama ċerta li jiġu rxoxtati bħala ħlejjaq spirti mmortali, bħal Ġesù. (Rivelazzjoni 2:10) L-​irxoxt tagħhom huwa msemmi f’Rivelazzjoni 20:6, li jgħid: “Hieni u qaddis hu kulmin għandu parti fl-​ewwel irxoxt; fuq dawn it-​tieni mewt m’għandha ebda awtorità, imma se jkunu qassisin t’Alla u tal-​Kristu, u se jaħkmu bħala slaten miegħu għall-​elf sena.” Dan huwa l-​irxoxt għas-​sema. Innota, iżda, li l-​Bibbja ssejjaħlu “l-​ewwel irxoxt,” li jimplika li hemm iktar x’jiġi.

¹¹ F’Ebrej kapitlu 11, Pawlu rrefera għal lista twila taʼ qaddejja t’Alla taʼ qabel il-​Kristjanità li kienu wrew fidi qawwija f’Alla Jehovah. Dawn ukoll kellhom fidi f’irxoxt. Fil-​vers 35 taʼ dak il-​kapitlu, Pawlu jitkellem dwar irxoxtijiet mirakolużi li seħħew matul l-​istorja taʼ Iżrael, billi jgħid: “Nisa rċevew lill-​mejtin tagħhom bl-​irxoxt; imma rġiel oħrajn kienu ttorturati għaliex ma ridux jaċċettaw ħelsien b’xi rahan, sabiex ikunu jistgħu jiksbu rxoxt aħjar.” Dawk ix-​xhieda leali tal-​qedem setgħu jħarsu ’l quddiem lejn irxoxt aħjar minn dawk li jinvolvu, per eżempju, lil Elija u lil Eliżew. (1 Slaten 17:17-22; 2 Slaten 4:32-37; 13:20, 21) It-​tama tagħhom kienet irxoxt għal ġo dinja fejn il-​qaddejja t’Alla ma kellhomx ikunu ttorturati għall-​fidi tagħhom, dinja fejn in-​nisa ma kellhomx jitilfu l-​maħbubin tagħhom fil-​mewt. Iva, huma ħarsu ’l quddiem lejn qawmien mill-​imwiet fl-​istess dinja ġdida li aħna nittamaw għaliha. (Isaija 65:17-25) Jehovah ma rrivelalhomx daqskemm irrivela lilna dwar din id-​dinja ġdida. Minkejja dan, kienu jafu li din kienet ġejja, u riedu jkunu fiha.

L-​Irxoxt Għall-​Art

12. Kienu wħud leali taʼ qabel il-​Kristjanità ddikjarati twajbin? Spjega.

¹² Għandna aħna naħsbu dwar il-​qawmien taʼ dawn l-​irġiel u nisa leali taʼ qabel il-​Kristjanità għal ġo dik id-​dinja l-​ġdida bħala parti mill-​irxoxt tat-​twajbin? B’mod evidenti iva, għaliex il-​Bibbja tirreferi għalihom bħala twajbin. Per eżempju, id-​dixxiplu Ġakbu jsemmi lil raġel u mara tal-​qedem li ġew iddikjarati twajbin. Ir-​raġel kien Abraham, il-​proġenitur tar-​razza Ebrajka. Dwaru naqraw: “‘Abraham poġġa fidi f’Jehovah, u kien magħdud lilu bħala tjieba,’ u ġie li jissejjaħ ‘il-​ħabib taʼ Jehovah.’” Il-​mara kienet Raħab, li ma kenitx Iżraelita u li eżerċitat fidi f’Jehovah. Kienet “[i]ddikjarata twajba” u ġiet li tkun parti mill-​ġens Ebrajk. (Ġakbu 2:23-25) B’hekk, irġiel u nisa tal-​qedem li eżerċitaw fidi qawwija f’Jehovah u fil-​wegħdi tiegħu u baqgħu leali sal-​mewt kienu ddikjarati twajbin minn Jehovah fuq il-​bażi tal-​fidi tagħhom, u bla dubju se jkollhom sehem mill-​“irxoxt . . . tat-​twajbin.”

13, 14. (a) Kif nafu li Kristjani b’tama għall-​art jistgħu jkunu ddikjarati twajbin? (b) Dan xi jfisser għalihom?

¹³ Madankollu, xi ngħidu dwar individwi bħal ngħaġ illum, dawk bit-​tama għall-​art li jiddedikaw lilhom infushom lil Jehovah u li jmutu leali matul dan iż-​żmien tat-​tmiem? Se jieħdu huma sehem mill-​irxoxt tat-​twajbin? Hekk jidher. Folla kbira taʼ wħud leali bħal dawn dehret ġo viżjoni mill-​appostlu Ġwanni. Innota kif jiddeskrivihom: “Rajt, u, ħares! folla kbira, li l-​ebda bniedem ma kellu l-​ħila jgħodd, mill-​ġnus u t-​tribujiet u l-​popli u l-​ilsna kollha, bil-​wieqfa quddiem it-​tron u quddiem il-​Ħaruf, lebsin ilbiesi bojod; u kien hemm friegħi tal-​palm f’idejhom. U jibqgħu jgħajtu b’leħen qawwi, jgħidu: ‘Is-​salvazzjoni nafuha lil Alla tagħna, li qiegħed bil-​qiegħda fuq it-​tron, u lill-​Ħaruf.’”—Rivelazzjoni 7:9, 10.

¹⁴ Innota li dawn l-​uħud ġwejdin huma konvinti b’mod sod mis-​salvazzjoni tagħhom, u jattribwixxu dan lil Jehovah u lil Ġesù, “il-​Ħaruf.” Barra minn hekk, qegħdin bil-​wieqfa quddiem Jehovah u l-​Ħaruf, kollha lebsin l-​abjad. Għala bl-​abjad? Ħlejqa tas-​sema tgħid lil Ġwanni: “Ħaslu lbieshom, u għamluhom bojod fid-​demm tal-​Ħaruf.” (Rivelazzjoni 7:14) Fil-​Bibbja, l-​abjad huwa simbolu taʼ safa, taʼ tjieba. (Salm 51:7; Danjel 12:10; Rivelazzjoni 19:8) Il-​fatt li l-​folla l-​kbira jidhru lebsin ilbiesi bojod ifisser li Jehovah iqishom bħala twajbin. Dak kif inhu possibbli? Għaliex huma, bħal li kieku, ħaslu l-​ilbiesi tagħhom fid-​demm tal-​Ħaruf. Jeżerċitaw fidi fid-​demm imxerred taʼ Ġesù Kristu u għalhekk huma ddikjarati bħala l-​ħbieb t’Alla bil-​prospett li jgħaddu ħajjin mit-​tribulazzjoni l-​kbira. Għalhekk, kwalunkwe Kristjan iddedikat u leali li issa hu parti mill-​“folla kbira” u li jmut qabel it-​tribulazzjoni l-​kbira jistaʼ jkun ċert li se jkollu sehem mill-​irxoxt tat-​twajbin għal fuq l-​art.

15. Ladarba kemm it-​twajbin u kemm dawk li m’humiex twajbin se jkunu rxoxtati, x’inhuwa l-​vantaġġ taʼ l-​irxoxt tat-​twajbin?

¹⁵ Dak l-​irxoxt huwa deskritt f’Rivelazzjoni kapitlu 20, vers 13, b’dan il-​kliem: “Il-​baħar radd lil dawk mejtin fih, u l-​mewt u Ħades raddew lil dawk mejtin fihom, u ġew iġġudikati individwalment skond l-​għemejjel tagħhom.” B’hekk, matul il-​Jum il-​kbir taʼ Ġudizzju t’elf sena taʼ Jehovah, dawk kollha fil-​memorja t’Alla se jiġu rxoxtati​—kemm it-​twajbin u kemm dawk li m’humiex twajbin. (Atti 17:31) Kemm se jkun aħjar, iżda, għat-​twajbin! Huma diġà għexu ħajjiet taʼ fidi. Diġà għandhom relazzjoni mill-​qrib maʼ Jehovah u fiduċja fit-twettieq taʼ l-​iskopijiet tiegħu. Xhieda twajbin minn taʼ qabel l-​Era Kristjana se jistenbħu mill-​mewt ħerqanin biex isiru jafu kif il-​wegħdi taʼ Jehovah rigward iż-​Żerriegħa kienu twettqu. (1 Pietru 1:10-12) Dawk min-​ngħaġ l-​oħra li lilhom Jehovah iqis bħala twajbin fi żmienna se joħorġu mill-​qabar ħerqanin biex jilmħu l-​art magħmula Ġenna li huma tkellmu dwarha meta ddikjaraw l-​aħbar tajba f’din is-​sistema t’affarijiet. Xi żmien mimli ferħ se jkun dak!

16. X’nistgħu ngħidu dwar l-​irxoxt taʼ Jum il-​Ġudizzju taʼ dawk li jmutu fi żmienna?

¹⁶ Matul dak il-​Jum taʼ Ġudizzju t’elf sena, dawk li mietu leali f’dawn is-​snin finali tas-​sistema t’affarijiet taʼ Satana meta eżattament se jiġu rxoxtati? Il-​Bibbja ma tgħidx. Madankollu, ma jkunx raġonevoli li taħseb li dawk magħdudin bħala twajbin li jmutu fi żmienna se jkollhom irxoxt bikri u b’hekk jistgħu jieħdu sehem mal-​folla l-​kbira taʼ dawk li se jkunu salvaw minn Armageddon fix-​xogħol taʼ li jilqgħu ġenerazzjonijiet iktar bikrin lura mill-​imwiet? Iva, tabilħaqq!

Tama Li Tagħti Faraġ

17, 18. (a) It-​tama taʼ l-​irxoxt liema faraġ tipprovdi? (b) X’aħna mqanqlin biex niddikjaraw dwar Jehovah?

¹⁷ It-​tama taʼ l-​irxoxt tagħti saħħa u faraġ lill-​Kristjani kollha llum. Jekk nibqgħu leali, ebda ġrajja mhix mistennija u ebda għadu ma jistaʼ jċaħħadna mill-​premju tagħna! Per eżempju, fin-​1992 Yearbook of Jehovah’s Witnesses, f’paġna 177, jidhru ritratti taʼ Kristjani kuraġġużi fl-​Etjopja li għażlu li jmutu biex ma jikkompromettux il-​fidi tagħhom. Nota żgħira tgħid: “Uċuħ li nistennew li naraw fl-​irxoxt.” Xi privileġġ se jkun li ssir taf lil dawn l-​uħud u oħrajn bla għadd li wrew fedeltà simili meta ffaċċjati mill-​mewt!

Tistaʼ Tispjega?

◻ Liema skritturi jgħinu biex jikkonfermaw it-​tama tagħna f’irxoxt fuq l-​art?

◻ Fuq liema bażi huma l-​Kristjani issa ddikjarati twajbin?

◻ It-​tama taʼ l-​irxoxt kif tagħtina kuraġġ u determinazzjoni?

[Stampa f’paġna 9]

Bħal Pawlu, Kristjani midlukin jittamaw fl-​irxoxt tas-​sema