Kapitlu 12

It-​Tifsira tal-​Magħmudija Tiegħek

1, 2. (a) Il-​magħmudija taʼ l-​ilma għala għandha tkun taʼ interess persunali għal kull wieħed u waħda minna? (b) Fil-​qosor, kif twieġeb il-​mistoqsijiet f’paragrafu 2?

FIS-​sena 29 E.K., Ġesù ġie mgħaddas fix-​Xmara Ġordan. Jehovah innifsu kien qiegħed josserva u esprima approvazzjoni. (Matt. 3:​16, 17) Tliet snin u nofs wara, wara l-​irxoxt tiegħu, Ġesù ta struzzjonijiet lid-​dixxipli tiegħu, billi qal: “Kull awtorità ngħatat lili fis-​sema u fuq l-​art. Morru għalhekk u agħmlu dixxipli min-​nies tal-​ġnus kollha, billi tgħammduhom.” (Matt. 28:​18, 19) Ġejt mgħammed int f’armonija maʼ dak li Ġesù dderieġa hemmhekk? Jew qiegħed tipprepara biex tagħmel hekk?

² Hu x’inhu l-​każ, fehma ċara dwar il-​magħmudija hija importanti. Mistoqsijiet li jistħoqqilhom konsiderazzjoni jinkludu dawn: Il-​magħmudija tal-​Kristjani llum għandha l-​istess tifsira bħal dik taʼ Ġesù? Kulma tgħid il-​Bibbja dwar il-​magħmudija japplika għalik? X’inhu involut f’li wieħed jgħix f’armonija maʼ dak li tissinjifika l-​magħmudija Kristjana taʼ l-​ilma?

MAGĦMUDIJIET IMWETTQIN MINN ĠWANNI

3. Il-​magħmudija taʼ Ġwanni kienet limitata għal min?

³ Madwar sitt xhur qabel ma Ġesù ġie mgħammed, Ġwanni l-​Battista mar fix-​xagħri tal-​Ġudea, billi ppriedka: “Indmu, għax is-​saltna tas-​smewwiet qorbot.” (Matt. 3:​1, 2) Nies minn dak ir-​reġjun kollu semgħu x’qal Ġwanni, stqarrew dnubiethom bla ħabi u ġew mgħammdin minnu fil-​Ġordan. Dik il-​magħmudija kienet għal-​Lhud.​—Atti 13:​23, 24; Luqa 1:​13-16.

4. (a) Il-​Lhud għala kellhom bżonn urġenti li jindmu? (b) X’kien meħtieġ jekk kellhom jevitaw li jkunu ‘mgħammdin bin-​nar’?

⁴ Dawk il-​Lhud kellhom bżonn urġenti taʼ ndiema. Fis-​sena 1513 Q.E.K. ħdejn il-​Muntanja Sinaj missirijiethom kienu daħlu f’patt nazzjonali m’Alla Jehovah. Imma ma kinux attwaw ir-​responsabbiltajiet tagħhom taħt dak il-​patt u għalhekk ġew ikkundannati minnu bħala midinbin. Is-​sitwazzjoni tagħhom kienet kritika. “Il-​jum il-​kbir u li jispira l-​biżaʼ taʼ Jehovah” imbassar minn Malakija kien qrib, u fis-​sena 70 E.K. ġie fuq Ġerusalemm bħala qerda b’ħeffa. Ġwanni l-​Battista, b’żelu għall-​qima vera bħalma kellu Elija, ġie mibgħut qabel dik il-​qerda “biex ilesti għal Jehovah poplu mħejji.” Huma kellhom bżonn jindmu minn dnubiethom kontra l-​patt tal-​Liġi u jkunu ppreparati fil-​qalb u fil-​moħħ biex jaċċettaw l-​Iben t’Alla, li lilu Jehovah kien qiegħed jibagħtilhom. (Mal. 4:​4-6; Luqa 1:17; Atti 19:4) Bħalma spjega Ġwanni, l-​Iben t’Alla kellu jgħammed bl-​ispirtu qaddis (liema magħmudija ġiet esperjenzata għall-​ewwel darba mid-​dixxipli leali f’Pentekoste tas-​sena 33 E.K.) u bin-​nar (li ġiet fuq dawk l-​uħud mhux nidmin bħala qerda fis-​sena 70 E.K.). (Luqa 3:16) Biex jevitaw li jġarrbu personalment dik il-​‘magħmudija bin-​nar’ dawk il-​Lhud taʼ l-​ewwel seklu kellhom bżonn jiġu mgħammdin fl-​ilma bħala simbolu taʼ l-​indiema tagħhom, u kellhom isiru dixxipli taʼ Ġesù Kristu meta nfetħet dik l-​opportunità.

5. (a) Meta Ġesù ġie biex jitgħammed, Ġwanni għala qajjem oġġezzjoni? (b) X’kien issimbolizzat mill-​magħmudija taʼ Ġesù fl-​ilma? (ċ) Ġesù kemm kien serju dwar li jwettaq ir-​rieda t’Alla għalih?

⁵ Fost dawk li ġew għand Ġwanni biex jitgħammdu kien hemm Ġesù nnifsu. Imma għala? Ġwanni kien jaf li Ġesù ma kellu ebda dnub x’jistqarr, u għalhekk hu qal: “Jien hu l-​wieħed li jeħtieġ li jkun mgħammed minnek, u ġej int għandi?” Imma l-​magħmudija taʼ Ġesù kellha tissimbolizza xi ħaġa differenti. Għalhekk hu wieġeb: “Ħalli dan ikun, din id-​darba, għax b’dak il-​mod huwa xieraq għalina li nwettqu dak kollu li huwa taʼ tjieba.” (Matt. 3:​13-15) Il-​magħmudija taʼ Ġesù ma setgħetx tissimbolizza ndiema mid-​dnub; lanqas ma kellu bżonn jiddedika lilu nnifsu lil Alla, għaliex hu kien membru taʼ ġens li diġà kien dedikat lil Jehovah. Minflok, il-​magħmudija tiegħu, appena laħaq l-​istat t’adult meta għalaq tletin sena, issimbolizzat l-​ippreżentar tiegħu nnifsu lil Missieru tas-​sema biex jagħmel ir-​rieda Tiegħu għall-​ġejjieni. Ir-​rieda t’Alla għall-​“bniedem, Kristu Ġesù,” kienet tinvolvi attività f’konnessjoni mas-​Saltna, kif ukoll is-​sagrifiċċju tal-​ħajja umana perfetta tiegħu bħala rahan u bħala l-​bażi għal patt ġdid. (Luqa 8:1; 17:​20, 21; Eb. 10:​5-10; Matt. 20:28; 26:28; 1 Tim. 2:​5, 6) Ġesù ħa b’serjetà kbira dak li l-​magħmudija tiegħu taʼ l-​ilma ssimbolizzat. Ma ħalliex lilu nnifsu jiġi żvijat lejn interessi oħrajn. Sat-​tmiem tal-​ħajja tiegħu fuq l-​art baqaʼ sod f’li jagħmel ir-​rieda t’Alla.​—Ġwn. 4:34.

MAGĦMUDIJA GĦAL ĠOL-​MEWT

6. Liema magħmudija oħra għadda minnha Ġesù u matul liema perijodu taʼ żmien?

⁶ F’armonija maʼ dak li kienet tissimbolizza l-​magħmudija taʼ Ġesù fl-​ilma, hu wkoll għadda minn magħmudija oħra. Kien jaf li l-​inkarigu mqiegħed quddiemu minn Alla kellu jwassal għal li jagħti l-​ħajja umana tiegħu bħala sagrifiċċju imma li kellu jiġi mqajjem fl-​ispirtu fit-​tielet jum. Hu tkellem dwar dan bħala li kien magħmudija. Din il-​“magħmudija” bdiet fis-​sena 29 E.K. imma ma kenitx tlestiet sa ma attwalment miet u ġie rxoxtat. Mela madwar tliet snin wara t-​tgħaddis tiegħu fl-​ilma setaʼ jgħid b’mod xieraq: “Għandi magħmudija li biha se nkun mgħammed, u kemm qiegħed inkun imnikket sakemm din tkun intemmet!”​—Luqa 12:50.

7. (a) Min iktar huma mgħammdin għal ġol-​mewt? (b) Min iwettaqha din il-​magħmudija?

⁷ Dawk li se jsaltnu maʼ Kristu fis-​Saltna tiegħu tas-​sema jridu bl-​istess mod jiġu mgħammdin għal ġol-​mewt. (Mark 10:​37-40; Kol. 2:12) Maʼ mewthom huma jwarrbu fil-​ġenb darba għal dejjem il-​ħajja umana tagħhom, bħalma għamel Ġesù. U fl-​irxoxt tagħhom jingħaqdu miegħu fl-​istat taʼ ħakkiem tas-​sema. Din hija magħmudija mwettqa, mhux minn kwalunkwe bniedem, imma minn Alla permezz taʼ l-​Iben tiegħu tas-​sema.

8. X’ifisser li huma wkoll huma “mgħammdin fi Kristu Ġesù”?

⁸ Dawk li huma mgħammdin għal ġol-​mewt taʼ Ġesù jintqal ukoll dwarhom li “tgħammdu fi Kristu Ġesù.” Permezz taʼ l-​ispirtu qaddis mgħoddi permezz taʼ Kristu huma jiġu f’għaqda miegħu, il-​kap tagħhom, bħala membri tal-​kongregazzjoni midluka bl-​ispirtu, il-​“ġisem” tiegħu. Minħabba li dak l-​ispirtu jagħmilhom kapaċi jirriflettu l-​personalità superjuri taʼ Kristu, jistaʼ jingħad dwarhom li huma lkoll isiru “persuna waħda f’unjoni maʼ Kristu Ġesù.”​—Rum. 6:​3-5; 1 Kor. 12:13; Gal. 3:​27, 28; Atti 2:​32, 33.

MAGĦMUDIJA TAʼ L-​ILMA GĦAL DIXXIPLI KRISTJANI

9. (a) Il-​magħmudija skond Mattew 28:19 meta seħħet għall-​ewwel darba? (b) Billi tuża l-​mistoqsijiet u l-​iskritturi pprovduti maʼ dan il-​paragrafu, analizza x’kien qiegħed jindika Ġesù li kandidati għall-​magħmudija jridu jirrikonoxxu.

⁹ L-​ewwel dixxipli taʼ Ġesù tgħammdu fl-​ilma permezz taʼ Ġwanni u mbagħad ġew iddireġuti lejn Ġesù bħala membri prospettivi taʼ l-​għarusa spiritwali tiegħu. (Ġwn. 3:​25-30) Taħt id-​direzzjoni taʼ Ġesù huma wkoll wettqu xi ftit magħmudijiet, li kellhom l-​istess sinjifikat bħall-​magħmudija taʼ Ġwanni. (Ġwn. 4:​1-3) Billi bdew minn Pentekoste tas-​sena 33 E.K., madankollu, huma bdew iwettqu l-​inkarigu li jgħammdu “fl-​isem tal-​Missier u taʼ l-​Iben u taʼ l-​ispirtu qaddis.” (Matt. 28:19) Se ssibu taʼ benefiċċju kbir li tirrevedi dak x’ifisser, fid-​dawl taʼ l-​iskritturi ċċitati mal-​mistoqsijiet li ġejjin:

Biex tkun mgħammda “fl-​isem tal-​Missier,” persuna xi trid tirrikonoxxi dwar il-​Missier? (2 Sla. 19:15; Salm 3:​8; 73:28; Isa. 6:3; Rum. 15:6; Eb. 12:9; Ġak. 1:17)

Magħmudija fl-​isem “taʼ l-​Iben” tirrikjedi rikonoxximent taʼ liema ħaġa? (Matt. 16:​16, 24; Fil. 2:​9-11; Eb. 5:​9, 10)

Persuna xi trid temmen sabiex tiġi mgħammda fl-​isem “taʼ l-​ispirtu qaddis”? (Luqa 11:13; Ġwn. 14:​16, 17; Atti 1:8; 10:38; Gal. 5:​22, 23; 2 Piet. 1:21)

10. (a) X’inhu ssimbolizzat mill-​magħmudija Kristjana taʼ l-​ilma llum? (b) Dan kif inhu differenti mill-​istess magħmudija taʼ Ġesù? (ċ) Meta persuni kkwalifikati Skritturalment jiġu mgħammdin, x’isiru?

¹⁰ L-​ewwel uħud li tgħammdu f’armonija maʼ dawk l-​istruzzjonijiet mogħtijin minn Ġesù kienu Lhud (u prożeliti Lhud), li bħala ġens kienu diġà ddedikati lil Alla u ġew murijin konsiderazzjoni speċjali minnu dritt sas-​sena 36 E.K. Madankollu, meta l-​privileġġ li wieħed ikun dixxiplu Kristjan ġie estiż lis-​Samaritani u lill-​Ġentili, qabel ma tgħammdu dawn kellhom personalment jagħmlu dedikazzjoni lil Jehovah mingħajr riżerva biex jaqduh bħala dixxipli taʼ Ibnu. Għal kulħadd, inklużi l-​Lhud, dan ikompli jkun is-​sinjifikat tal-​magħmudija Kristjana taʼ l-​ilma dritt sa żmienna. Din il-​“magħmudija waħda” tapplika għal dawk kollha li jsiru Kristjani veri. Huma b’hekk isiru xhieda Kristjani taʼ Jehovah, ministri ordnati t’Alla.​—Ef. 4:5; 2 Kor. 6:​3, 4.

11. (a) Il-​magħmudija Kristjana taʼ l-​ilma maʼ liema ħaġa tikkorrispondi, u kif? (b) Kristjan b’hekk minn liema ħaġa jiġi salvat?

¹¹ Magħmudija bħal din għandha valur kbir f’għajnejn Alla. Wara li semma l-​kostruzzjoni taʼ l-​arka minn Noè fejn hu u l-​familja tiegħu ġew ippreservati matul id-​Dilluvju, l-​appostlu Pietru ġibed l-​attenzjoni lejn dan. Hu kiteb: “Dik li tikkorrispondi maʼ dan qiegħda issa wkoll issalva lilkom, jiġifieri, il-​magħmudija, (mhux it-​tneħħija tal-​ħmieġ tal-​laħam, imma t-​talba magħmula ’l Alla għal kuxjenza tajba,) permezz taʼ l-​irxoxt taʼ Ġesù Kristu.” (1 Piet. 3:21) L-​arka kienet evidenza tanġibbli li Noè kien iddedika lilu nnifsu biex jagħmel ir-​rieda t’Alla u li kien imbagħad għamel fedelment ix-​xogħol mogħti minn Alla. Dan wassal għall-​ippreservar tiegħu. B’mod li jikkorrispondi, dawk li jiddedikaw lilhom infushom lil Jehovah fuq il-​bażi taʼ fidi fi Kristu rxoxtat, li jiġu mgħammdin bħala simbolu taʼ dak u li mbagħad jissoktaw jagħmlu r-​rieda t’Alla għall-​qaddejja tiegħu fi żmienna jiġu salvati minn din id-​dinja mill-​agħar tal-​preżent. (Gal. 1:​3, 4) M’għadhomx sejrin fid-​direzzjoni tal-​qerda mal-​bqija tad-​dinja. Ġew salvati minn dan u ġew mogħtijin kuxjenza tajba minn Alla.

NGĦIXU FI QBIL MAR-​RESPONSABBILTAJIET TAGĦNA

12. Li wieħed jiġi mgħammed għala m’huwiex fih innifsu garanzija taʼ salvazzjoni?

¹² Ikun żball li wieħed jikkonkludi illi li tkun mgħammed huwa fih innifsu garanzija taʼ salvazzjoni. Għandu valur biss jekk persuna verament iddedikat lilha nfisha lil Jehovah permezz taʼ Ġesù Kristu u mbagħad twettaq ir-​rieda t’Alla, leali sat-​tmiem.​—Matt. 24:13.

13. (a) X’inhi r-​rieda t’Alla inkwantu għall-​mod li bih Kristjani mgħammdin jużaw ħajjiethom? (b) L-​istat taʼ dixxiplu Kristjan kemm għandu jkun importanti f’ħajjietna?

¹³ Ir-​rieda t’Alla għal Ġesù inkludiet il-​mod kif uża ħajtu bħala bniedem. Kellha tiġi mogħtija fil-​mewt bħala sagrifiċċju. Fil-​każ tagħna l-​iġsma tagħna jridu jiġu ppreżentati lil Alla, biex nissoktaw ħajja taʼ ssagrifikar tagħna nfusna. Iridu jiġu wżati esklussivament f’li tintgħamel ir-​rieda t’Alla. (Rum. 12:​1, 2) Ċertament ma nkunux qegħdin nagħmlu hekk jekk, saħansitra darba kultant, inkunu apposta ġibna rwieħna bħad-​dinja taʼ madwarna jew jekk inkunu bnejna ħajjietna madwar attivitajiet egoistiċi waqt li nkunu tajna servizz minimu lil Alla. (1 Piet. 4:​1-3; 1 Ġwn. 2:​15-17) Meta ċertu Lhudi staqsa x’irid jagħmel biex jikseb il-​ħajja taʼ dejjem, Ġesù fakkru dwar l-​importanza li jgħix ħajja moralment nadifa, u mbagħad ġibed l-​attenzjoni lejn il-​ħtieġa li wieħed jagħmel l-​istat taʼ dixxiplu Kristjan, li jkun segwaċi taʼ Ġesù, il-​ħaġa primarja fil-​ħajja. Dan ma setax jieħu t-​tieni post wara attivitajiet materjali.​—Matt. 19:​16-21.

14. (a) Liema responsabbiltà f’konnessjoni mas-​Saltna għandhom il-​Kristjani kollha? (b) Bħalma huwa muri fl-​istampa f’paġna 101, liema huma xi modi effettivi li bihom nagħmlu dan ix-​xogħol? (ċ) Jekk verament nieħdu sehem f’attività bħal din b’qalb sħiħa, dan taʼ liema ħaġa jagħti evidenza?

¹⁴ Wieħed għandu wkoll jiftakar li r-​rieda t’Alla għal Ġesù inkludiet attività vitali f’konnessjoni mas-​Saltna. Ġesù nnifsu kien midluk biex ikun Sultan. Imma waqt li kien fuq l-​art kien ukoll xhud żeluż rigward is-​Saltna. Aħna għandna xogħol simili t’għoti taʼ xiehda x’nagħmlu u għandna kull raġuni li nieħdu sehem fih b’qalb sħiħa. Billi nagħmlu hekk nuru l-​apprezzament tagħna għas-​sovranità taʼ Jehovah u l-​imħabba tagħna lejn bnedmin sħabna. Ukoll nuru li aħna magħqudin m’adoraturi sħabna madwar id-​dinja, li kollha huma xhieda tas-​saltna, f’li jistinkaw ’il quddiem lejn il-​mira taʼ ħajja taʼ dejjem fil-​qasam taʼ dik is-​Saltna.

Diskussjoni Bħala Reviżjoni

● Liema similaritajiet u liema differenzi hemm bejn il-​magħmudija taʼ Ġesù u l-​magħmudija taʼ l-​ilma llum?

● Il-​magħmudija taʼ Ġwanni għal min kienet? Min huma mgħammdin għal ġol-​mewt? U min isir ‘mgħammed fi Kristu Ġesù’?

● X’inhu involut f’li wieħed jgħix fi qbil mar-​responsabbiltajiet tal-​magħmudija Kristjana taʼ l-​ilma?

[Kaxxa/Stampi f’paġna 101]

Int b’Liema Modi Tipproklama s-​Saltna?

Minn bieb għal bieb

Billi tirritorna lura biex iżżur lil uħud interessati

Fi studji tal-​Bibbja fid-​djar

Fit-​toroq

Lil sħabek taʼ l-​iskola

Lil sħabek fuq ix-​xogħol