Huma Wieġbu Bla Egoiżmu Għall-​Imħabba t’Alla

“O ħa jiżżu ħajr in-​nies lil Jehovah għall-​qalb tajba bl-​imħabba tiegħu u għax-​xogħlijiet tal-​għaġeb tiegħu maʼ wlied il-​bnedmin.”−SALM 107:8.

1. L-​appostlu Ġwanni kif jenfasizza l-​kwalità tal-​imħabba fl-​ewwel ittra tiegħu?

“ALLA hu mħabba.” Kemm huma mimlijin tifsir dawk il-​kelmiet! Mhux taʼ b’xejn li l-​appostlu Ġwanni ħass il-​bżonn li jirrepetihom fl-​ewwel ittra tiegħu. (1 Ġwann 4:8, 16) Alla Jehovah mhux biss hu mħabba imma hu wkoll l-​eżempju, jew il-​personifikazzjoni, tal-​imħabba.

2. Alla b’liema modi wera l-​imħabba f’li ħalaq lir-​raġel u l-​mara u f’li pprovda għalihom?

² Aħseb dwar l-​imħabba li Alla wera bil-​mod li ħalaqna. Il-​kliem taʼ apprezzament taʼ David tant hu xieraq. Bħala salmista mnebbaħ, hu qal: “Jien se nfaħħrek għaliex b’mod li jqanqal il-​biżaʼ jien magħmul b’mod tal-​għaġeb.” (Salm 139:14) Sabiex aħna nkunu nistgħu ngħixu b’saħħitna u kuntenti, Alla għamel għaxqiet bla għadd possibbli għalina permezz tal-​ħames sensi tagħna—li naraw, nisimgħu, intogħmu, inxommu, u nħossu. Xi ġmiel nistgħu naraw fil-​ħolqien madwarna! Kemm huma tal-​għaġeb il-​ħafna pjanti u annimali differenti, biex ma ngħidu xejn dwar il-​ġmiel tal-​għamliet u l-​fattizzi umani! Alla poġġa wkoll varjetà mill-​iktar li tgħaxxaq taʼ frott, ħxejjex, u ikel ieħor fejn nistgħu nilħquhom aħna. (Salm 104:13-16) Għal raġuni tajba, l-​appostlu Pawlu fakkar lill-​abitanti taʼ Listra tal-​qedem li Alla “għamel it-​tajjeb, billi takom ix-​xita mis-​sema u staġuni taʼ frott, waqt li mlielkom qlubkom sax-​xifer bl-​ikel u bil-​ferħ.”−Atti 14:17.

3. Alla b’liema fakultajiet tal-​għaġeb sebbaħna?

³ Aħseb ukoll fil-​barkiet kollha assoċjati mal-​ħajja taʼ familja ferħana. Iktar minn hekk, irrifletti fuq il-​pjaċiri kollha li aħna nistgħu ngawdu bis-​saħħa tal-​fakultajiet mentali u emozzjonali tagħna: l-​immaġinazzjoni, ir-​raġuni, il-​memorja, il-​kuxjenza, u b’mod partikulari l-​kapaċità li nqimu—li dan kollu jpoġġina ferm iktar ’il fuq mill-​annimali; u lanqas ma għandna nwarrbu l-​pjaċiri li l-​mużika tagħtina. Dawn u ħafna rigali oħra huma manifestazzjonijiet tal-​imħabba t’Alla għalina.

4. Liema manifestazzjonijiet tal-​imħabba t’Alla ġarrbu l-​bnedmin minn wara d-​dnub tal-​ewwel ġenituri tagħhom?

⁴ Ma hemm ebda dubju li Adam u Eva gawdew bosta pjaċiri fl-​istat perfett tagħhom fil-​ġnien taʼ Għeden. (Ġenesi 2:7-9, 22, 23) Imma meta naqsu li jwieġbu bla egoiżmu għall-​evidenzi kollha tal-​imħabba divina li kienu qed igawdu, abbandunaha Alla lir-​razza umana? Lanqas xejn! Minnufih hu għamel provvediment biex jirranġa l-​ħażen kollu li rriżulta mill-​ksur tal-​liġi mill-​ewwel ġenituri tagħna. (Ġenesi 3:15) Jehovah wera wkoll l-​imħabba billi ssaporta bis-​sabar lin-​nisel imperfett taʼ Adam. (Rumani 5:12) Għal kemm żmien? Tabilħaqq, għal madwar 6,000 sena s’issa! B’mod speċjali Alla wera l-​imħabba fil-​mod kif aġixxa mal-​qaddejja tiegħu. Veri huma l-​kelmiet: “Jehovah, Jehovah, Alla kollu ħniena u grazzja, bil-​mod biex jirrabja u abbundanti fil-​qalb tajba bl-​imħabba u l-​verità, jippreserva l-​qalb tajba bl-​imħabba għal eluf, jaħfer l-​iżball u l-​ksur tal-​liġi u d-​dnub.”−Eżodu 34:6,7.

5. Jehovah kif wera paċenzja taʼ mħabba fil-​mod kif aġixxa mal-​ġens taʼ Iżrael?

⁵ Iva, kbira tabilħaqq kienet il-​paċenzja li Alla Jehovah wera fil-​mod kif aġixxa mal-​Iżraeliti miż-​żmien taʼ meta ġabhom ’il quddiem bħala ġens ħdejn il-​Muntanja Sinaj sakemm il-​mixi tagħhom lura ġiegħlu jwarrabhom għalkollox. Bħalma naqraw fit-​2 Kronaki 36:15, 16: “Jehovah dak Alla taʼ missirijiethom tal-​qedem baqaʼ jibgħat kontra tagħhom permezz tal-​messaġġiera tiegħu, jibgħat darba wara l-​oħra, għaliex ħass mogħdrija għall-​poplu tiegħu u għall-​post fejn joqgħod. Imma kienu kontinwament qed jitmellħu bil-​messaġġiera tal-​veru Alla u jistmerru kliemu u jżebilħu lill-​profeti tiegħu, sakemm il-​għadab taʼ Jehovah telaʼ kontra l-​poplu tiegħu, sakemm ma kien hemm ebda fejqan.” Imma kien hemm dawk li fil-​fatt wieġbu bla egoiżmu għall-​imħabba taʼ Alla Jehovah. Biex naraw kif għamlu hekk, ejjew neżaminaw il-​ħajjiet taʼ xi wħud minn dawn l-​individwi. Dan se jqiegħed il-​pedament biex nuru kif aħna nfusna nistgħu nwieġbu għall-​imħabba taʼ Jehovah b’modi partikulari ferm.

Kif Mosè Wieġeb Bla Egoiżmu

6. B’liema modi kien l-​eżempju taʼ Mosè wieħed li jispikka, u f’liema kapaċitajiet ġarrab hu l-​imħabba t’Alla?

⁶ Mosè kien eżempju li jispikka taʼ wieħed li wieġeb mingħajr egoiżmu għall-​imħabba t’Alla. Liema opportunitajiet tqiegħdu quddiem Mosè bħala l-​iben adottat taʼ bint il-​Farawni! Imma hu għazel li “jkun ittrattat ħażin mal-​poplu t’Alla minflok ma jkollu t-​tgawdija temporanja tad-​dnub, għaliex hu stima ż-​żebliħ tal-​Kristu bħala rikkezzi akbar mit-​teżori tal-​Eġittu.” (Ebrej 11:25, 26) F’ħin minnhom, Mosè ried li jeħles lil ħutu, l-​Iżraeliti, mill-​jasar Eġizzjan. Imma huma m’apprezzawhomx l-​isforzi tiegħu, u lanqas ma kien iż-​żmien xieraq t’Alla għall-​ħelsien tagħhom. (Atti 7:23-29) Għexur taʼ snin wara, madankollu, minħabba l-​fidi u x-​xewqa bla egoiżmu taʼ Mosè biex igħin lil ħutu, Jehovah tah il-​qawwa li jwettaq ħafna mirakli u li jaqdi lill-​Iżraeliti għal 40 sena bħala l-​profeta, l-​imħallef, il-​leġiżlatur, u l-​medjatur Tiegħu. F’dawn il-​kapaċitajiet, Mosè ġarrab bosta drabi l-​imħabba taʼ Jehovah għalih u għal sħabu l-​Iżraeliti.

7. Mosè kif wieġeb għal espressjonijiet tal-​imħabba t’Alla?

⁷ Mosè kif wieġeb għall-​imħabba u l-​qalb tajba mhix mistħoqqa t’Alla? ‘Aċċetta hu l-​qalb tajba mhix mistħoqqa taʼ Jehovah u tilef il-​għan tagħha’? (2 Korintin 6:1) Bl-​ebda mod! Mosè wieġeb bla egoiżmu għall-​espressjonijiet tal-​imħabba taʼ Jehovah lejh billi kien għalkollox moħħu f’Alla. Hu fittex lil Jehovah l-​ħin kollu u kellu relazzjoni intima mal-​Ħallieq tiegħu. Kemm faħħru Alla lil Mosè meta ċanfar lil Aronne u lil Mirjam talli kkritikaw lil ħuhom! Iva, Jehovah tkellem “minn fomm għal fomm” maʼ Mosè u ħallieh jilmaħ “id-​dehra taʼ Jehovah.” (Numri 12:6-8) Minkejja l-​ħafna privileġġi tiegħu, Mosè baqaʼ jkun l-​iktar bniedem ġwejjed u wettaq il-​kmandi taʼ Jehovah “sewwa sew hekk.”−Eżodu 40:16; Numri 12:3.

8. Mosè kif wera li hu kien tabilħaqq moħħu f’Alla?

⁸ Mosè wera wkoll li hu kien bla egoiżmu moħħu f’Alla bit-​tħassib li hu wera għall-​isem, ir-​reputazzjoni u l-​qima pura taʼ Jehovah. B’hekk, f’żewġ okkażjonijiet Mosè talab bil-​ħniena b’suċċess lil Jehovah biex juri ħniena maʼ Iżrael għaliex l-​isem t’Alla kien involut. (Eżodu 32:11-14; Numri 14:13-19) Meta l-​Iżraeliti saru involuti fil-​qima idolatruża tal-​għoġol, Mosè wera żelu għall-​qima pura billi għajjat: “Min hu fuq in-​naħa taʼ Jehovah? Lejja!” Wara dan, Mosè u dawk li kienu miegħu qatlu lil 3,000 mill-​idolaturi. Imbagħad, għal 40 sena hu ssaporta poplu ribelluż u li jgerger. Żgur li m’hemm l-​ebda dubju li Mosè wieġeb bla egoiżmu għal espressjonijiet tal-​imħabba t’Alla, billi ħalla eżempju mill-​aħjar għalina llum.—Eżodu 32:26-28; Dewteronomju 34:7, 10-12.

It-​Tweġiba mill-​Aħjar taʼ David

9. (a) David kif wieġeb għall-​imħabba taʼ Alla Jehovah? (b) Bħal David, kif nistgħu aħna nonoraw lil Jehovah b’affarijiet taʼ valur?

⁹ Karattru Bibliku ieħor li jispikka u li ħalla eżempju mill-​aħjar f’li jwieġeb bla egoiżmu għall-​imħabba t’Alla kien is-​salmista David, it-​tieni sultan taʼ Iżrael. Iż-​żelu tiegħu għall-​isem taʼ Jehovah qanqlu biex jissielet mal-​iġgant Filistew Gulija li kien qed imaqdar, u li fuqu Alla ta r-​rebħa lil David. (1 Samwel 17:45-51) Dak l-​istess żelu qanqal lil David biex iġib l-​arka tal-​patt lejn Ġerusalemm. (2 Samwel 6:12-19) U ma kinetx ix-​xewqa taʼ David li jibni tempju lil Jehovah espressjoni oħra taż-​żelu u l-​apprezzament tiegħu lejn l-​imħabba u t-​tjubija t’Alla? Dażgur li kienet. Il-​fatt li David ġie miċħud dak il-​privileġġ ma żammux lura milli jħejji għall-​proġett u jonora lil Jehovah billi personalment ikkontribwixxa deheb, fidda, u ħaġar prezzjuż taʼ valur għoli ferm. (2 Samwel 7:1-13; 1 Kronaki 29:2-5) Tweġiba simili bla egoiżmu għall-​imħabba t’Alla għandha tqanqalna biex ‘nonoraw lil Jehovah bl-​affarijiet taʼ valur tagħna’ billi nużaw ir-​riżorsi materjali tagħna biex inġibu ’l quddiem l-​interessi tas-​Saltna.—Proverbji 3:9, 10; Mattew 6:33.

10. Rigward liema ħaġa hija l-​korsa taʼ David waħda li taʼ min jimitaha?

¹⁰ Għalkemm David għamel żballji serji, matul ħajtu kollha hu wera li kien ‘raġel li jaqbel għal qalb Jehovah.’ (1 Samwel 13:14; Atti 13:22) Is-​salmi tiegħu huma mimlijin b’espressjonijiet taʼ apprezzament għall-​imħabba t’Alla. The International Standard Bible Encyclopœdia tgħid li David “joktor iktar u iktar fir-​ringrazzjament minn kull wieħed ieħor li hemm imsemmi fl-​Iskrittura Mqaddsa.” Is-​salmista Asaf qal li Alla “għażel lil David il-​qaddej tiegħu u ħadu mill-​imqajjel tal-​merħla. . . . Daħħlu biex ikun ragħaj fuq Ġakobb il-​poplu tiegħu u fuq Iżrael il-​wirt tiegħu. U beda jirgħahom skond l-​integrità taʼ qalbu.” (Salm 78:70-72) Verament, il-​korsa taʼ David kienet waħda biex aħna nimitawha.

Ġesù Kristu, l-​Eżempju Perfett Tagħna

11, 12. Ġesù kif wera li hu kien verament moħħu f’Alla?

¹¹ M’għandniex xi ngħidu, Ġesù Kristu huwa l-​aqwa eżempju Skritturali taʼ bniedem li wieġeb bla egoiżmu għall-​imħabba t’Alla. Din x’qanqlet lil Ġesù biex jagħmel? L-​ewwelnett, hu ġie mmotivat biex jagħti devozzjoni esklussiva lil Jehovah. Ma hemm ebda dubju li Ġesù kien kollu kemm hu moħħu f’Alla. Apprezzament lejn l-​imħabba u t-​tjubija taʼ Missieru tas-​sema mexxietu biex ikun verament bniedem spiritwali. Hu kellu relazzjoni intima u mill-​qrib m’Alla. Ġesù kien bniedem taʼ talb, u kien iħobb jitkellem maʼ Missieru tas-​sema. Darba wara l-​oħra, naqraw li Kristu kien qed jitlob. F’okkażjoni minnhom hu qattaʼ lejl sħiħ fit-​talb. (Luqa 3:21, 22; 6:12; 11:1; Ġwann 17:1-26) Bi tweġiba għall-​imħabba t’Alla, Ġesù għex il-​verità li ‘l-​bniedem ma jgħix biss bil-​ħobż imma b’kull ħaġa mitkellma li toħroġ minn fomm Jehovah.’ Fil-​fatt, li jagħmel ir-​rieda taʼ Missieru kien ikel għalih. (Mattew 4:4; Ġwann 4:34) Ma għandniex aħna nwieġbu bl-​istess mod għall-​imħabba t’Alla, billi nagħtuh devozzjoni esklussiva?

¹² Billi wieġeb bla egoiżmu għall-​imħabba t’Alla, Ġesù Kristu dejjem idderieġa l-​attenzjoni lejn Alla u l-​Missier tiegħu. Meta xi ħadd indirizza lil Ġesù bħala “Għalliem Tajjeb,” hu oġġezzjona u qal: “Hadd ma hu tajjeb, ħlief wieħed, Alla.” (Luqa 18:18, 19) Ġesù saħaq ripetutament li hu ma setaʼ jagħmel xejn minn jeddu. Qatt ma tilef opportunità biex ikabbar l-​isem taʼ Missieru, u b’mod xieraq ferm hu beda t-​talba mudell tiegħu bil-​petizzjoni: “Ħa jkun imqaddes ismek.” Hu talab: “Missier, igglorifika lil ismek.” U ftit qabel miet, Kristu qal lil Missieru: “Jien igglorifikajtek fuq l-​art, billi temmejt ix-​xogħol li int tajtni biex nagħmel.” (Mattew 6:9; Ġwann 12:28; 17:4) Żgur li, bi tweġiba għall-​imħabba t’Alla, aħna għandna nfittxu li nigglorifikaw lil Jehovah, billi nitolbu għat-​tqaddis tal-​isem qaddis tiegħu.

13. L-​imħabba t’Alla kif qanqlet lil Ġesù biex jaġixxi?

¹³ Issa, jekk jogħġbok innota mod ieħor li bih it-​tweġiba bla egoiżmu għall-​imħabba t’Alla mmotivat lil Ġesù. Din ġegħlitu jħobb it-​tjieba u jobgħod il-​ħażen, bħalma hu mbassar f’​Salm 45:7. (Ebrej 1:9) Hu kien “leali, bla ħtija, bla mniġġes, mifrud mill-​midinbin.” (Ebrej 7:26) Ġesù sfida lill-​opponenti malizzjużi tiegħu biex jixluh b’xi dnub, imma ma setgħux. (Ġwann 8:46) F’żewġ okkażjonijiet, il-​mibgħeda tiegħu lejn il-​ħażen ġegħlitu jnaddaf it-​tempju minn reliġjonisti rgħiba. (Mattew 21:12, 13; Ġwann 2:13-17) U kemm maqdarhom bl-​aħrax Ġesù lill-​mexxejja reliġjużi ipokriti, billi saħansitra qalilhom li ġejjin mix-​Xitan!—Mattew 6:2, 5, 16; 15:7-9; 23:13-32; Ġwann 8:44.

14. Bi tweġiba għall-​imħabba taʼ Jehovah, Ġesù kif aġixxa mad-​dixxipli tiegħu?

¹⁴ Jerġaʼ mod ieħor li bih l-​imħabba taʼ Jehovah immotivat lil Ġesù jistaʼ jidher fil-​mod kif aġixxa mal-​appostli tiegħu u dixxipli oħra. Kemm wera mħabba, paċenzja u sabar fit-​tul magħhom! Min jaf kemm weġġgħuh bir-​rivalità tagħhom bejniethom, billi baqgħu jargumentaw saħansitra sal-​lejl meta ġie ttradut dwar min kien l-​ikbar. (Luqa 22:24-27) Iżda, Ġesù dejjem wera ruħu kalm u ġwejjed f’qalbu. (Mattew 11:28-30) Veru, Ġuda ttradixxa lil Ġesù, Pietru ċaħdu tliet darbiet, u l-​appostli l-​oħra ħarbu meta ġiet marmalja biex tarrestahom. Imma hu qatt ma tqarras magħhom jew stmerrhom. Kif nafu? Sewwa, malli reġaʼ ngħaqad mal-​appostli wara l-​irxoxt tiegħu, Ġesù ma tahom ebda ċanfira li tniggeż talli kienu ċedew għall-​biżaʼ. Minflok, hu farraġhom u qawwiehom għal iktar servizz tas-​Saltna.—Ġwann 20:19-23.

15. Ġesù kif imministra bla egoiżmu għall-​bżonnijiet fiżiċi tan-​nies?

¹⁵ Ejjew nikkunsidraw jerġaʼ mod ieħor li bih Ġesù Kristu wieġeb bla egoiżmu għall-​imħabba t’Alla. Hu għamel hekk billi ssagrifika lilu nnifsu għal oħrajn, sa mewta insolenti u taʼ wġigħ fuq zokk tat-​tortura. (Filippin 2:5-8) Ġesù imministra għall-​bżonnijiet fiżiċi tan-​nies billi temaʼ b’mod mirakoluż lill-​kotriet u wettaq ħafna fejqan. (Mattew 14:14-22; 15:32-39) Hu dejjem poġġa l-​interessi taʼ oħrajn qabel tiegħu stess. Hu għalhekk li setaʼ jgħid: “Il-​volpijiet għandhom il-​għerien u l-​agħsafar tas-​sema għandhom il-​bejtiet, imma Bin il-​bniedem ma għandu mkien fejn imidd rasu.” (Mattew 8:20) Ġesù kien sensittiv għall-​ħidma tal-​ispirtu t’Alla hekk kif dan tferraʼ minnu biex iwettaq fejqan mirakoluż. Imma hu qatt ma pprova jagħmel profitt materjali mill-​użu taʼ qawwa sopranaturali bħal din, bħal meta mara li kienet suġġettata għal nixxiegħa taʼ demm għal 12-il sena misset b’fidi l-​libsa taʼ fuq tiegħu u tfejqet. (Mark 5:25-34) Iktar minn hekk, Ġesù qatt ma uża l-​qawwiet sopranaturali tiegħu għalih stess.—Qabbel Mattew 4:2-4.

16. Kristu b’liema modi imministra għall-​bżonnijiet spiritwali tan-​nies?

¹⁶ Għalkemm Ġesù attenda bla egoiżmu għall-​bżonnijiet fiżiċi tan-​nies billi fejqilhom il-​mardiet tagħhom u temagħhom b’mod mirakoluż, il-​motivazzjoni ewlenija fil-​ministeru tiegħu fuq l-​art kienet li jippriedka l-​aħbar tajba tas-​Saltna t’Alla, jgħallem, u jagħmel dixxipli. Minkejja l-​fejqan meraviljuż kollu li wettaq, hu ma kienx magħruf bħala t-​Tabib il-​Kbir jew Ħaddiem il-​Mirakli imma bħala l-​Għalliem it-​Tajjeb. (Mattew 4:23, 24; Mark 10:17) Ġesù rrefera għalih innifsu bħala l-​Għalliem, bħalma għamlu d-​dixxipli tiegħu u saħansitra l-​egħdewwa tiegħu. (Mattew 22:16; 26:18; Mark 9:38) U liema veritajiet għallem, bħal fil-​Priedka tiegħu fuq il-​Muntanja! (Mattew 5:1-7:29) Kemm kienu xierqa t-​tixbihat tiegħu, u kemm kienu jolqtu l-​parabboli profetiċi tiegħu u profeziji oħra! Mhux taʼ b’xejn li s-​suldati li ntbagħtu biex jarrestaw lil Ġesù f’okkażjoni minnhom ħassew li ma jistgħux jixħtu jdejhom fuqu!—Ġwann 7:45, 46.

17. (a) Ġesù kif ipprovdielna mudell perfett tal-​imħabba? (b) X’se jiġi diskuss fl-​artiklu li jmiss?

¹⁷ Bla dubju, Ġesù Kristu ħallielna l-​eżempju perfett taʼ li nwieġbu bla egoiżmu għall-​wirjiet minn Alla taʼ imħabba lejna. Ġesù ta lil Missieru tas-​sema l-​ewwel post f’ħajtu u fl-​affezzjonijiet tiegħu. Hu verament ħabb it-​tjieba, aġixxa b’imħabba mal-​appostli tiegħu u dixxipli oħra, u qattaʼ ħajtu jimministra għall-​bżonnijiet spiritwali u materjali tan-​nies. Fl-​aħħarnett, Ġesù inkuruna l-​ministeru tiegħu billi ta ħajtu bħala rahan. (Mattew 20:28) Imma x’ingħidu dwarna? Veru, aħna imperfetti, bħal Mosè u David. Madankollu, bħalma juri l-​artiklu li jmiss, hemm modi prattiċi li bihom nistgħu nimitaw lill-​Eżemplar tagħna f’li nwieġbu bla egoiżmu għal manifestazzjonijiet tal-​imħabba t’Alla.

Kieku Kif Twieġeb Int?

◻ Għala jistaʼ jingħad li “Alla hu mħabba”?

◻ Mosè kif wieġeb għal manifestazzjonijiet tal-​imħabba t’Alla?

◻ David b’liema modi wieġeb għall-​imħabba taʼ Alla Jehovah?

◻ Liema eżempju ħalla Ġesù Kristu f’li jwieġeb għall-​imħabba t’Alla?