Mistoqsijiet mill-Qarrejja
X’inhi “l-gwerra . . . t’Alla li Jistaʼ Kollox” f’Ħar–Magedon, u x’se jkun ir-riżultat?—Rivelazzjoni 16:14, 16.
Fi kliem sempliċi, il-gwerra taʼ Ħar–Magedon hija l-battalja globali li se ssir fil-futur u li fiha Ġesù Kristu, is-Sultan maħtur taʼ Ġeħova, se jeqred lill-għedewwa t’Alla. Il-Bibbja tispjega li dawn l-għedewwa, “is-slaten taʼ l-art abitata kollha,” huma mħejjijin b’“espressjonijiet imnebbħin mid-demonji” u huma miġburin flimkien “għall-gwerra tal-jum il-kbir t’Alla li Jistaʼ Kollox . . . lejn il-post li bl-Ebrajk jissejjaħ Ħar–Magedon.”—Rivelazzjoni 16:14, 16.
Il-post li fih iż-żewġ gruppi se jinġabru għall-gwerra m’huwiex letterali. L-isem Ħar–Magedon, tradott “Armageddon” f’xi traduzzjonijiet tal-Bibbja, ifisser “Muntanja taʼ Megiddu.” (Rivelazzjoni 16:16, nota taʼ taħt) Qatt ma kien hemm xi muntanja b’dan l-isem. Barra minn hekk, “is-slaten taʼ l-art u l-armati tagħhom” ma jistgħux letteralment jinġabru f’post wieħed. (Rivelazzjoni 19:19) Minflok, “il-post” jirreferi għall-kundizzjoni jew is-sitwazzjoni li fiha se jittieħdu l-mexxejja politiċi dinjin u s-segwaċi tagħhom—waħda t’oppożizzjoni kontra Ġeħova u kontra “l-armati li kienu fis-sema” taħt il-kmand militari taʼ Ġesù Kristu, is-“Sultan tas-slaten u Sid tas-sidien.”—Rivelazzjoni 19:14, 16.
B’mod sinifikanti, it-terminu “Ħar–Magedon” huwa relatat mal-belt antika taʼ Megiddu f’Iżrael. Minħabba li kienet f’pożizzjoni tajba lejn il-lvant tal-Muntanja Karmel, Megiddu kellha kontroll fuq ir-rotot prinċipali taʼ dak iż-żmien kemm għan-negozju u kemm għall-militar. Kienet ukoll il-post għal battalji deċiżivi. Per eżempju, kien ħdejn “l-ilma taʼ Megiddu” li l-Imħallef Iżraeli Barak għeleb armata Kangħanija setgħana mmexxija mill-Ġeneral Sisera. (Mħallfin 4:12-24; 5:19, 20) F’dan il-post ukoll, l-Imħallef Gidgħon rebaħ lill-Midjanin. (Mħallfin 7:1-22) Billi torbot lil Megiddu mal-gwerra li ġejja, il-Bibbja tassigurana li Alla, permezz taʼ Ibnu, se jeqred għalkollox lill-forzi opponenti kollha.
X’se jkun ir-riżultat? Il-gwerra taʼ Ħar–Magedon se teħles lill-art mill-korruzzjoni u mill-ħażen kollu. Se tħejji t-triq għall-isbaħ żmien fl-istorja tal-bniedem. (Rivelazzjoni 21:1-4) Taħt il-ħarsien kollu mħabba tas-Saltna t’Alla, l-art se tinbidel f’ġenna taʼ l-art li fiha l-ġusti se jgħixu għal dejjem.—Salm 37:29.