Kapitlu 9

Qawwa Tat-​Tama Taʼ L-​Irxoxt

1. Liema prospetti meraviljużi jintgħamlu possibbli permezz taʼ l-​irxoxt?

MINGĦAJR l-​irxoxt, m’hemm ebda tama għal kwalunkwe ħajja futura għall-​bnedmin mejtin. Imma Jehovah, sforz il-​qalb tajba mhix mistħoqqa, fetaħ għal biljuni li mietu l-​opportunità imprezzabbli li jgawdu ħajja eterna. Bħala riżultat, aħna wkoll għandna t-​tama li tqanqal il-​qalb li nerġgħu ningħaqdu mal-​maħbubin tagħna li raqdu fil-​mewt.​—Qabbel Mark 5:​35, 41, 42; Atti 9:​36-41.

2. (a) L-​irxoxt b’liema modi ta prova li huwa importanti fit-​twettiq taʼ l-​iskop taʼ Jehovah? (b) Partikolarment meta hija t-​tama taʼ l-​irxoxt sors importanti taʼ saħħa għalina?

² Minħabba l-​irxoxt Jehovah jistaʼ, mingħajr ħsara dejjiema għall-​qaddejja leali tiegħu, iħalli lil Satana jagħmel kulma jistaʼ f’li jittanta jagħti prova taʼ l-​allegazzjoni malinna tiegħu, “Kulma għandu bniedem se jagħtih għan-​nom taʼ ruħu.” (Ġob 2:4) Minħabba li Ġesù ġie mqajjem mill-​imwiet hu setaʼ jippreżenta l-​valur tas-​sagrifiċċju uman tiegħu quddiem it-​tron tas-​sema taʼ Missieru, bil-​benefiċċju li jsalva l-​ħajja għalina. Permezz taʼ l-​irxoxt dawk li huma werrieta mseħbin maʼ Kristu huma magħqudin miegħu fis-​Saltna tas-​sema. U għalina lkoll li għandna l-​fidi, l-​irxoxt huwa sors taʼ saħħa lil hinn min-​normal meta ngħaddu minn tiġrib li jġibna wiċċ imb’wiċċ mal-​mewt.

GĦALA FUNDAMENTALI GĦALL-​FIDI KRISTJANA

3. (a) L-​irxoxt f’liema sens huwa “duttrina primarja”? (b) X’ifisser l-​irxoxt għad-​dinja inġenerali?

³ L-​irxoxt, bħalma huwa mistqarr f’​Ebrej 6:​1, 2, huwa “duttrina primarja,” parti mill-​bażi tal-​fidi li mingħajrha qatt ma nkunu nistgħu nsiru Kristjani maturi. Imma dan il-​fatt huwa mbiegħed mill-​mod taʼ kif taħsibha d-​dinja inġenerali. Neqsin mill-​ispiritwalità, iktar u iktar nies jgħixu ħajja taʼ ġiri wara l-​pjaċiri. Jaraw din il-​ħajja biss bħala realtà. (1 Kor. 15:32) Dawk li jibqgħu mqabbdin mar-​reliġjonijiet tradizzjonali, kemm dawk ġewwa l-​Kristjaneżmu u kemm dawk barra, jaħsbu li għandhom ruħ immortali, u dan jagħmel l-​irxoxt inutli. Kulmin jipprova jirrikonċilja dawn iż-​żewġ kunċetti jsib dan iktar taʼ xkiel milli li jispira t-​tama. Kif nistgħu ngħinu lil dawk li huma lesti li jagħtu widen?​—Atti 17:32.

4. (a) Qabel ma persuna tistaʼ tapprezza l-​irxoxt, x’jistaʼ jkollna bżonn li niddiskutu magħha? (b) Liema skritturi kieku tuża int biex tfisser x’inhi r-​ruħ? Il-​kundizzjoni tal-​mejtin? (ċ) Imma xi ngħidu jekk xi ħadd juża traduzzjoni tal-​Bibbja li tidher li taħbi l-​veritajiet li jinstabu f’dawk it-​testi?

⁴ Qabel ma wħud bħal dawn jistgħu japprezzaw xi provvediment taʼ l-​għaġeb huwa l-​irxoxt, jeħtieġ li jifhmu r-​ruħ x’inhi u l-​kundizzjoni tal-​mejtin. Spiss sempliċement ftit skritturi huma biżżejjed biex tiċċara dawn l-​affarijiet għal persuna li hi bil-​ġuħ għall-​verità. (Ġen. 2:7; Eżek. 18:4; Salm 146:​3, 4) Imma xi traduzzjonijiet moderni u edizzjonijiet parafrażiċi tal-​Bibbja jaħbu dawn il-​veritajiet. Mela jistaʼ jkun neċessarju li tikkunsidra l-​espressjonijiet użati fil-​lingwi oriġinali tal-​Bibbja.

5. Kif tgħin lil persuna bħal din biex tifhem x’inhi r-​ruħ?

⁵ In-​New World Translation hija speċjalment taʼ valur f’li nagħmlu dan, minħabba l-​fatt li b’mod konsistenti tittraduċi t-​terminu Ebrajk neʹphesh u l-​kelma Griega li tikkorrispondi magħha psy·kheʹ bħala “ruħ,” u fl-​appendiċi tagħha hemm lista taʼ ħafna testi fejn jinstabu dawn it-​termini. Verżjonijiet moderni oħrajn jistgħu jittraduċu l-​istess kelmiet oriġinali mhux biss bħala “ruħ” imma wkoll bħala “ħlejqa,” “esseri,” “persuna” u “ħajja”; “in-​neʹphesh tiegħi” tistaʼ tiġi tradotta “jien,” u “in-​neʹphesh tiegħek” bħala “int.” Paragun taʼ dawn il-​Bibbji maʼ xi traduzzjonijiet eqdem jew man-​New World Translation se jgħin lil student sinċier japprezza li t-​termini fil-​lingwi oriġinali tradotti “ruħ” jirreferu għal (1) persuni, (2) annimali u (3) il-​ħajja li jgawdu bħala talin. Imma qatt ma jġorru l-​idea li ruħ hija xi ħaġa inviżibbli li ma tistax tmissha u li mal-​mewt tistaʼ tiskappa mill-​ġisem u jkollha eżistenza konxja kontinwa x’imkien.

6. (a) Xi traduzzjonijiet moderni għala jħallu l-​qarrejja mħawdin rigward it-​tifsira taʼ Xeol, Ħades u Geħenna? (b) Kif tispjegaha kieku int mill-​Bibbja l-​kundizzjoni taʼ persuni f’Xeol, jew f’Ħades? F’Geħenna?

⁶ Bl-​istess mod, in-​New World Translation hija konsistenti fl-​użu tagħha taʼ Xeol biex tittraduċi kelma b’kelma t-​terminu Ebrajk sh^eōlʹ u fl-​użu tagħha taʼ Ħades għat-​terminu Grieg haʹdes u Geħenna għal geʹen·na. Imma xi traduzzjonijiet moderni u parafrażiċi oħrajn tal-​Bibbja jħawdu lill-​qarrej billi jittraduċu KEMM haʹdes u KEMM geʹen·na bħala “infern,” barra li jużaw “il-​qabar” u “d-​dinja tal-​mejtin” bħala traduzzjonijiet oħrajn għal sh^eōlʹ u haʹdes. Billi jitqabblu t-​traduzzjonijiet fejn hemm bżonn, jistaʼ jintwera li Xeol huwa l-​ekwivalenti għal Ħades. (Salm 16:10; Atti 2:27) Il-​Bibbja tagħmilha ċara li Xeol, jew Ħades, il-​qabar komuni taʼ l-​umanità, huwa assoċjat mal-​mewt, mhux mal-​ħajja. (Salm 89:48; Riv. 20:13) Din tipponta wkoll lejn il-​prospett taʼ ritorn minn hemmhekk permezz taʼ l-​irxoxt. (Ġob 14:13; Atti 2:31) B’kuntrast, ebda tama taʼ ħajja fil-​futur m’hija offruta għal dawk li jmorru Geħenna, u, m’għandniex xi ngħidu, ir-​ruħ m’huwiex mitkellem dwarha bħala li għandha eżistenza konxja hemmhekk.​—Matt. 18:9; 10:28.

7. Mifhum b’mod xieraq, l-​irxoxt kif jistaʼ jinfluwenza l-​attitudni u l-​azzjonijiet taʼ persuna?

⁷ B’dawn il-​kwistjonijiet iċċarati, il-​mewt u l-​irxoxt taʼ Kristu jieħdu tifsira reali. Persuna tistaʼ issa tiġi mgħejjuna biex tifhem l-​irxoxt x’jistaʼ jfisser għaliha u tistaʼ tibda tapprezza l-​imħabba taʼ Jehovah f’li għamel provvediment tant meraviljuż bħal dan. In-​niket li nħass minn dawk li tilfu l-​maħbubin tagħhom fil-​mewt issa jistaʼ jiġi mibdul f’antiċipazzjoni mimlija ferħ taʼ rijunjoni fl-​Ordni Ġdid t’Alla. Il-​Kristjani taʼ l-​ewwel seklu rrealizzaw li l-​irxoxt taʼ Ġesù Kristu kien il-​ġebla taʼ l-​għareb tal-​fidi Kristjana. B’żelu taw xiehda lil oħrajn dwar dan u dwar it-​tama li dan kien jiggarantixxi. Għalhekk, ukoll, dawk li japprezzawha llum huma ħerqanin li jaqsmu din il-​verità prezzjuża m’oħrajn.​—Atti 5:​30-32; 10:​40-43; 13:​32-39; 17:31.

L-​UŻU TAL-​‘MUFTIEĦ TAʼ ĦADES’

8. L-​użu minn Ġesù taʼ l-​“imfietaħ tal-​mewt u taʼ Ħades” x’ifisser għas-​segwaċi tiegħu midlukin bl-​ispirtu?

⁸ Dawk kollha li għandhom jiġu mseħbin maʼ Kristu fis-​Saltna tiegħu tas-​sema jridu eventwalment imutu. Imma jafu tajjeb l-​assiguranza li hu tahom meta qal lill-​appostlu Ġwanni: “Jien sirt mejjet, imma, ħares! jien qiegħed ngħix għal dejjem taʼ dejjem, u għandi l-​imfietaħ tal-​mewt u taʼ Ħades.” (Riv. 1:18) X’ried ifisser? Kien qiegħed jiġbed l-​attenzjoni lejn l-​esperjenza tiegħu stess. Hu, ukoll, kien miet. Imma Alla ma ħalliehx f’Ħades. Fit-​tielet jum Jehovah personalment qajmu għal ħajja bħala spirtu u tah l-​immortalità. Mhux dak biss, imma Alla tah “l-​imfietaħ tal-​mewt u taʼ Ħades” biex jużahom f’li jeħles lil oħrajn mill-​qabar komuni taʼ l-​umanità u mill-​effetti tad-​dnub Adamiku. Minħabba li għandu l-​pussess taʼ dawk l-​imfietaħ, Ġesù kapaċi jqajjem lis-​segwaċi leali tiegħu mill-​imwiet. Meta jagħmel hekk, hu jagħti lill-​membri tal-​kongregazzjoni tiegħu midlukin bl-​ispirtu l-​għotja prezzjuża taʼ ħajja immortali fis-​sema, sewwa sew bħalma Missieru għamel għalih.​—Rum. 6:5; Fil. 3:​20, 21.

9. L-​irxoxt taʼ Kristjani leali midlukin bl-​ispirtu meta jsir?

⁹ Il-​Kristjani midlukin leali meta kellhom jesperjenzaw dak l-​irxoxt? Dan diġà beda. L-​appostlu Pawlu jispjega li kellhom jiġu mqajmin ‘matul il-​preżenza taʼ Kristu,’ liema preżenza bdiet fl-​1914 E.K. (1 Kor. 15:23) Issa, meta dawn itemmu l-​korsa tagħhom fuq l-​art, m’għandhomx għalfejn jistennew fil-​mewt għar-​ritorn tal-​Mulej tagħhom. Malli jmutu jiġu mqajmin fl-​ispirtu, billi ‘jitbiddlu, f’mument, f’ħakka t’għajn.’ X’hena se jkollhom, għaliex “l-​affarijiet li għamlu jmorru dritt magħhom”!​—1 Kor. 15:​51, 52; Riv. 14:13.

10. Liema rxoxt ieħor se jkun hemm, u dan meta se jibda?

¹⁰ Imma tagħhom m’huwiex l-​uniku rxoxt. Il-​fatt li jissejjaħ “l-​ewwel irxoxt” jindika li rxoxt ieħor irid isegwi. (Riv. 20:6) Dawk li jibbenefikaw minn dan l-​aħħar irxoxt se jkollhom il-​prospett hieni taʼ ħajja taʼ dejjem fuq art magħmula Ġenna. Dak meta se jseħħ? Il-​ktieb taʼ Rivelazzjoni juri li dan se jkun wara li “l-​art u s-​sema” taʼ din is-​sistema mill-​agħar t’affarijiet preżenti jkunu tneħħew. Dak it-​tmiem tas-​sistema qadima huwa viċin ferm. Wara dak, fiż-​żmien maħtur t’Alla, jibda l-​irxoxt taʼ fuq l-​art.​—Riv. 20:​11, 12.

11. Min se jkun inkluż fost l-​uħud leali li jiġu mqajmin għall-​ħajja fuq l-​art, u għala huwa dak prospett eċċitanti?

¹¹ Min se jkun inkluż? Qaddejja leali taʼ Jehovah minn żminijiet l-​iktar bikrin. Fosthom se jkun hemm bnedmin li, minħabba l-​fidi qawwija tagħhom fl-​irxoxt, “ma ridux jaċċettaw ħelsien b’xi rahan”​—xi kompromess taʼ l-​integrità tagħhom lejn Alla sabiex jiskappaw mewta vjolenti. (Eb. 11:35) X’għaxqa se tkun li ssir tafhom personalment u li tismaʼ minn għandhom, direttament, id-​dettalji rigward ġrajjiet li dwarhom il-​Bibbja tirrapporta fil-​qosor biss! Fost oħrajn, se jkun hemm Abel, l-​ewwel xhud leali taʼ Jehovah. Enok u Noè, proklamaturi mhux beżgħanin tal-​messaġġ taʼ twissija t’Alla qabel l-​Għarqa. Abraham, li kien laqaʼ għandu l-​anġli. Mosè, li permezz tiegħu ngħatat il-​Liġi fuq il-​Muntanja Sinaj. Profeti kuraġġużi bħalma kien Ġeremija, li ra l-​qerda taʼ Ġerusalemm fis-​sena 607 Q.E.K. U Ġwanni l-​Għammied, li samaʼ lil Alla nnifsu jidentifika lil Ġesù bħala Ibnu. Se jkun hemm ukoll uħud leali li mietu matul l-​aħħar jiem tas-​sistema preżenti.​—Eb. 11:​4-38; Matt. 11:11.

12. (a) Kemm mill-​mejtin f’Ħades se jiġu mqajmin? (b) Mela min se jkun inkluż, u għala?

¹² Maż-​żmien, oħrajn, ukoll, se jiġu mqajmin. L-​estent sa fejn Ġesù se juża l-​‘muftieħ taʼ Ħades’ għan-​nom taʼ l-​umanità jintwera f’viżjoni mogħtija lill-​appostlu Ġwanni fejn hu ra lil Ħades ‘mixħut fl-​għadira tan-​nar.’ Dak x’ifisser? Li jiġi meqrud; ma jeżistix iktar għaliex tbattal għalkollox. B’hekk, barra li jqajjem lil adoraturi leali taʼ Jehovah, Ġesù bil-​ħniena se jġib lura minn Ħades, jew Xeol, saħansitra persuni m’humiex twajbin. Ebda wieħed minn dawn ma jiġi mqajjem sempliċement biex jiġi ġġudikat li ħaqqu l-​mewt għal darb’oħra. Fl-​ambjent taʼ tjieba taħt is-​Saltna t’Alla se jiġu mgħejjunin biex iġibu ħajjiethom f’armonija mal-​mogħdijiet taʼ Jehovah. Il-​viżjoni wriet “ir-​romblu tal-​ħajja” miftuħ, u huma se jkollhom l-​opportunità li jkollhom isimhom imniżżel fih. Se jiġu “ġġudikati individwalment skond l-​għemejjel tagħhom” li twettqu wara l-​irxoxt tagħhom. (Riv. 20:​12-14; Atti 24:15) B’hekk, bħalma jidher mill-​angolu tar-​riżultat finali, tagħhom jistaʼ jagħti prova li jkun “irxoxt taʼ ħajja” u mhux se jkun “irxoxt taʼ ġudizzju [taʼ kundanna]” li ma jistax jiġi evitat.​—Ġwn. 5:​28, 29.

13. (a) Min m’huwiex se jiġi rxoxtat? (b) L-​għarfien tal-​verità dwar l-​irxoxt kif għandu jeffettwa lil ħajjietna?

¹³ M’għandniex xi ngħidu, mhux kulmin għex se jiġi rxoxtat. Xi wħud ikkommettew dnubiet li għalihom ebda maħfra m’hija possibbli. Dawk maqtulin fit-​“tribulazzjoni kbira,” li issa qiegħda fil-​qrib, se jkunu inklużi fost dawk li jġarrbu qerda għal dejjem. (Matt. 12:​31, 32; 23:33; 24:​21, 22; 25:​41, 46; 2 Tess. 1:​6-9) B’hekk, fil-​waqt li tintwera ħniena straordinarja bil-​ħelsien taʼ dawk kollha li qegħdin f’Ħades, l-​irxoxt ma jipprovdi ebda bażi sabiex inkunu indifferenti dwar kif ngħixu issa. Minflok, dan għandu jimmotivana biex nuru kemm napprezzaw b’mod profond din il-​qalb tajba verament mhix mistħoqqa t’Alla.

IMSAĦĦIN BIT-​TAMA TAʼ L-​IRXOXT

14. L-​irxoxt kif jistaʼ jkun sors taʼ saħħa kbira għal persuna li qiegħda toqrob it-​tmiem tal-​ħajja preżenti tagħha?

¹⁴ Dawk li għamlu t-​tama taʼ l-​irxoxt it-​tama tagħhom kapaċi jieħdu ħafna saħħa minnha. Meta joqorbu tmiem ħajjithom, jafu li ma jistgħux jipposponu l-​mewt b’mod indefinit, huma x’inhuma l-​proċeduri mediċi wżati. (Ekkl. 8:8) Jekk żammew erwieħhom mehdijin fix-​xogħol tal-​Mulej u qdew lealment maʼ l-​organizzazzjoni tiegħu, jistgħu jħarsu lejn il-​futur b’assiguranza sħiħa. Huma jafu li permezz taʼ l-​irxoxt, fiż-​żmien stabbilit t’Alla, se jgawdu l-​ħajja mill-​ġdid. U x’ħajja se tkun din! “Il-​vera ħajja,” bħalma sejħilha l-​appostlu Pawlu.​—1 Tim. 6:19; 1 Kor. 15:58; Eb. 6:​10-12.

15. Jekk niġu mheddin minn persekuturi vjolenti, x’jistaʼ jgħinna biex inżommu l-​integrità lejn Jehovah?

¹⁵ Mhux biss li nafu li hemm l-​irxoxt jagħmilna kapaċi nkunu f’saħħitna, imma li nkunu nafu lil dak il-​Wieħed li hu s-​Sors taʼ dak il-​provvediment. Dan jiffortifikana biex inkunu leali lejn Alla saħansitra jekk niġu mheddin bil-​mewt f’idejn persekuturi vjolenti. Satana ilu żmien twil jinqeda bil-​biżaʼ tal-​mewt mhix f’waqtha bħala mezz sabiex iżomm lin-​nies fil-​jasar. Imma Ġesù ma ċediex għal biżaʼ bħal dan; hu ta prova li kien leali lejn Jehovah dritt sal-​mewt. B’dak li wettqet mewtu hu pprovda l-​mezz sabiex jeħles lil oħrajn minn biżaʼ bħal dan. (Eb. 2:​14, 15) Bħala riżultat tal-​fidi tagħhom f’dak il-​provvediment, il-​veri segwaċi tiegħu bnew isem li jispikka bħala nies li jżommu l-​integrità. Meta tqiegħdu taħt pressjoni, taw prova li ‘ma ħabbewx lil erwieħhom stess’ iktar milli jħobbu lil Jehovah. (Riv. 12:11) B’għaqal, ma jipprovawx isalvaw il-​ħajja preżenti tagħhom billi jabbandunaw prinċipji Kristjani, bir-​riżultat li jitilfu l-​prospett taʼ ħajja eterna. (Luqa 9:​24, 25) Għandek int dak it-​tip taʼ fidi? Se jkollok jekk verament tħobb lil Jehovah u niżżilt fil-​fond taʼ qalbek xi tfisser għalik it-​tama taʼ l-​irxoxt.

Diskussjoni Bħala Reviżjoni

● Persuna għala għandha bżonn tifhem x’inhi r-​ruħ u l-​kundizzjoni tal-​mejtin qabel ma tistaʼ tapprezza l-​irxoxt?

● Min se jirritorna mill-​imwiet? Dan l-​għarfien kif għandu jeffettwana?

● It-​tama taʼ l-​irxoxt kif issaħħaħna?