APPENDIĊI

Kif il-​Profezija taʼ Danjel Tbassar il-​Wasla tal-​Messija

IL-​PROFETA Danjel għex iktar minn 500 sena qabel it-​twelid taʼ Ġesù. Minkejja dan, Ġeħova rrivela informazzjoni lil Danjel li kienet se tagħmilha possibbli biex il-​Kristjani jindunaw eżatt liema kien iż-​żmien li fih Ġesù kellu jiġi midluk, jew maħtur, bħala l-​Messija, jew Kristu. Lil Danjel intqallu: “Għandek tkun taf u jkollok id-​dehen li mill-​ħruġ tal-​kelma biex Ġerusalemm tiġi restawrata u mibnija mill-​ġdid sal-​Messija l-​Mexxej, se jkun hemm sebaʼ ġimgħat, ukoll tnejn u sittin ġimgħa.”​—Danjel 9:​25, NW.

Biex niddeterminaw iż-​żmien tal-​wasla tal-​Messija, l-​ewwel jeħtieġ insiru nafu minfejn jibda l-​perijodu li jwassal għall-​Messija. Skond il-​profezija, dan hu “mill-​ħruġ tal-​kelma biex Ġerusalemm tiġi restawrata u mibnija mill-​ġdid.” Dan il-​“ħruġ tal-​kelma” meta seħħ? Skond il-​kittieb tal-​Bibbja Neħemija, il-​kelma biex jerġgħu jinbnew is-​swar madwar Ġerusalemm ħarġet fis-​“sena għoxrin tas-​saltna taʼ Artasersi.” (Neħemija 2:​1, 5-8) Il-​kittieba taʼ l-​istorja jikkonfermaw li s-​sena 474 Q.E.K. kienet l-​ewwel sena sħiħa taʼ Artasersi bħala ħakkiem. Għalhekk, is-​sena 20 tal-​ħakma tiegħu kienet is-​sena 455 Q.E.K. Issa nafu minfejn nibdew ngħoddu fil-​profezija taʼ Danjel dwar il-​Messija, jiġifieri, is-​sena 455 Q.E.K.

Danjel jindika kemm kien se jkun twil il-​perijodu taʼ żmien li jiħodna sal-​wasla tal-​“Messija l-​Mexxej.” Il-​profezija ssemmi “sebaʼ ġimgħat, ukoll tnejn u sittin ġimgħa”​—total taʼ 69 ġimgħa. Kemm hu twil dan il-​perijodu taʼ żmien? Diversi traduzzjonijiet tal-​Bibbja jinnotaw li dawn m’humiex ġimgħat taʼ sebat ijiem, imma ġimgħat taʼ snin. Jiġifieri, kull ġimgħa tirrappreżenta sebaʼ snin. Dan il-​konċett taʼ ġimgħat taʼ snin, jew taqsim taʼ sebaʼ snin, kien familjari għal-​Lhud taʼ żmien il-​qedem. Per eżempju, huma kienu josservaw is-​sena tas-​Sabat kull sebaʼ snin. (Eżodu 23:​10, 11) Għalhekk, id-​69 ġimgħa profetika kienu jammontaw għal 69 taqsima taʼ 7 snin kull waħda, jew total taʼ 483 sena.

Issa kulma rridu nagħmlu hu li ngħoddu. Jekk ngħoddu 483 sena mis-​sena 455 Q.E.K. naslu għas-​sena 29 E.K. Din kienet eżatt is-​sena meta Ġesù tgħammed u sar il-​Messija!a (Luqa 3:​1, 2, 21, 22) M’huwiex dan twettiq taʼ l-​għaġeb tal-​profezija Biblika?

[Nota taʼ taħt]

[Dijagramma/Stampi f’paġna 198]

(Ghall-formazzjoni shiha tat-​test, ara pubblikazzjoni)

“SEBGĦIN ĠIMGĦA”

490 sena

7 ġimgħat 62 ġimgħa ġimgħa

(49 sena) (434 sena) (7 snin)