Aħna Nistgħu Nagħmlu Xogħlijiet Akbar
1 Xogħlijiet li jispikkaw kienu karatteristika tal-ministeru taʼ Ġesù Kristu. Hu mirakolożament temaʼ lil eluf, fejjaq lil ħafna, u rxoxta lil xi wħud mill-imwiet. (Mt. 8:1-17; 14:14-21; Ġw. 11:38-44) L-attività tiegħu ġibdet l-attenzjoni taʼ ġens sħiħ. Madankollu, fl-aħħar lejla qabel ma miet, hu qal lis-segwaċi leali tiegħu: “Min jemmen fija hu wkoll għad jagħmel l-opri li qiegħed nagħmel jien, u akbar minnhom għad jagħmel.” (Ġw. 14:12) Kif nistgħu nagħmlu xogħlijiet “akbar”?
2 Billi Nkopru Iktar Territorju: L-isfera taʼ l-attività taʼ Ġesù kienet limitata għall-Palestina, fil-waqt li d-dixxipli bikrin tiegħu ntqalilhom biex jagħtu xiehda “sa truf l-art,” ħafna iktar lil hinn minn fejn ippriedka Ġesù nnifsu. (Atti 1:8) Ix-xogħol taʼ l-ippridkar li beda hu, issa huwa globali u jkopri 232 pajjiż. (Mt. 24:14) Qiegħed int tieħu sehem bis-sħiħ f’li taħdem it-territorju assenjat lill-kongregazzjoni tiegħek?
3 Billi Nilħqu Iktar Nies: Ġesù ħalla warajh relattivament ftit dixxipli biex ikomplu x-xogħol taʼ l-ippridkar. Madankollu, bħala riżultat taʼ l-għoti taʼ xiehda tagħhom biż-żelu f’Pentekoste tas-sena 33 E.K., dawk li ħaddnu l-verità u tgħammdu f’dik il-ġurnata ammontaw għal xi tlett elef ruħ. (Atti 2:1-11, 37-41) Il-ġbir taʼ dawk “disposti sewwa għall-ħajja taʼ dejjem” baqaʼ sejjer sa żmienna, meta issa qegħdin ngħammdu medja taʼ iktar minn 1,000 kull ġurnata. (Atti 13:48, NW) Qiegħed int tagħmel kulma tistaʼ biex tilħaq lil nies taʼ qalb onesta kulfejn jistgħu jinstabu u ssegwi l-interess mill-iktar fis possibbli?
4 Billi Nippridkaw għal Żmien Ferm Itwal: Il-ministeru taʼ Ġesù fuq l-art kien limitat għal tliet snin u nofs. Il-biċċa l-kbira minna ilna nippridkaw iktar minn hekk. Ikun kemm ikun twil iż-żmien li nitħallew inkomplu dan ix-xogħol, aħna grati li ngħinu lil kull dixxiplu ġdid jaqbad it-triq li twassal għall-ħajja. (Mt. 7:14) Qiegħed int kull xahar tħabrek ħafna fix-xogħol tal-Mulej?—1 Kor. 15:58.
5 Nistgħu nibqgħu fiduċjużi li billi Ġesù jappoġġana, aħna se nagħmlu xogħlijiet jerġaʼ akbar bħala d-dixxipli veri tiegħu.—Mt. 28:19, 20.